Ka Nupepa Kuokoa, Volume XLIII, Number 42, 20 October 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, OKATOBA 20, 1905. 3

 

NA WARENA

-OPIO-

ILOKO O KA ENAENA O KA LUKUWALE.

He Moolelo o ka Lukuwale Ana ia o na Pelekane ma Inia.

 

MOKUNA XVII.

KAAWALE ME NA WAIMAKA.

 

            Ua hooholo pu iho no hoi o Generala Kolina e hoouna i kekahi hapa o kona puali no Kanapoa no ke kokua ana i ko lakou poe olaila oiai ua lohe mai lakou i ka poino nui o na koa Pelekane a ua hoouaheeia kekahi poe mamuli o ka nui hewahewa o na Inia kipi i ulu hou mai a mamuli no hoi o ka lawelawe hemahema ma ka aoao o na Pelekane. A i ka hoomaopopo ana iho o ke Generala Nui ua haiki mai la kona mau koa no ka ukali ana i ka poe kaua ole, oia hoi, na wahine ame na kamalii, no ka mea aia no kekahi hapa o kona mau puali i Lukanao kahi i malama ai i kolaila kahua, i kumu e pale aku ai i na enemi mai ka uhai ana mahope o ka huakai, a oiai aia hoi he mau puali i hoouna mua ia aku no ka uwapo ua ike iho la ua Generala nei i ke kauliilii maoli o lakou, aka ua hoopaa iho oia i kona manao e nee ka hana hoopakele i ka huakai imua.

            Ma keia manawa aole i hui iki o Dike me Hagariwa ma oiai o kona puali kekahi i hoounaia no Kanapoa no ka hui ana me kela o Kanapoa, aka aia o Konela Warena me kona puali kaulio ma ka huakai a he nui hoi na manawa o ka hele like ana ame na kokua a ke Konela i na hoaloha o na Opio.

            No na koa hoi o Kanapoa ua nui ka poino i kau mai maluna o lakou, ua pau aku kekahi mau koa ame na aliikoa i ka make a hoopuehu liilii ia hoi kekahi mau mahele koa, aka iloko o ia mau poino aole i kanalua ka nee ana o ka puali o Nede Warena ma kona kulana lukanela, a iloko hoi o ke kaua o ka loa i hoea aku ai na limakokua oia kekahi manawa i wiwoole nui loa ai na hana a Nede oiai he uuku wale no lakou a ua haule aku no hoi ko lakou kapena.

            Ua loaa pu mai no oia i ka eha ma ke ku ana mai i na poka i loaa pono mai no a komo iloko o ka i'o a puka ma kahi aoao ma na lala no nae-ma ka limaakau, aia he mau aihiili a ma kona mau wawae no hoi a iloko o ia mau palapu lahilahi i loaa  iaia aole oia i hoomaopopo i ka eha, oiai aia lakou iloko o ke kupilikii ia manawa e kaua aku ana a kaua mai ma ka lawelawe lima maoli ua ikeia o Nede ma ke kulana ikaika maoli me ka wiwoole lua ole ma ka hakoko ana me na kanaka Inia nunui, a hiki wale i ka naholo ana o na Inia i puhee aku ia lakou akahi no a hoomaopopo o Nede i kona mau eha. Aka i ka haule ana o ke poo, ke kapena o kona puali i hoopii koke ia ae ai oia ma ia wahi.

            Ma keia hakoko ana no hoi i hoopihaia ae ai ka haukipila halelole i ka poe i loaa i na palapu o na kahua kana a no ka ike ana o Nede i ka pihaku'i loa ua ae no oia iaia iho e noho pu me kona pualikoa mahope iho o ka lapaau ame ka wa-hiia ana o kona mau eha a iaia i hoea aku ai i kona kahua kahi a kona puali e hoolulu ana ua hui ae la na opio oiai ua hoea e aku o Dike ilaila.

            "E kuu kaikuaana, o oe ka'u i hali iho nei," wahi a Dike me ka lululima olioli nui ana me kona hanaumua." O ko makou hoea ana mai nei no ia i ka ponei a i ka wa no i hookuuia ae ai no ka hoomaha iki ana o ia au i hiki mai la no ka huli ana ia oe, ma kuu lohe ana eia oe iloko o keia puali. Ua lohe makou i kou loaa i na palapu aka e hoomaikaiia ke Akua oiai he wahi mau palapu lahilahi wale no."

            "Pela," wahi a Nede me ka olioli nui no keia hui hou ana me kona kaikaina, "a aole no hoi i ke kukonukonu loa, eia nae, he hakoko ikaika maoli ia a makou i komopoo aku ai. A pehea oe, a pehea o papa."

            "Maikai no maua e Nede. Aole he hookahi wahi kuia. Ia maua no a elua."

            "A pehea o Hagariwa ma?"

            "He maikai no o Mrs. Hagariwa ame na kaikamahine, e Nede, a i ka la apopo paha lakou e hoea mai ai no ka muliwai Ganegira, a o ka hapanui aku o lakou ua pau aku i ka make."

            "O, he nuhou kaumaha ia e Dike aka aole e hiki ke alo." A-no, e oluolu oe e hooponopono mai i kuu mau eha ma ka wa-hi pono ana ae a e hoomaikai mai no hoi oe ia'u no ka mea i ka haule ana aku o ko makou kapena i hoonohoia ae ai au malaila."

            "Huro!" i uwa leo nuiae ai o Dike," he nuhou kamahao maoli ia. Nui ka ulia pomaikai. He umi-kumamawalu wale no makahiki, kapena e no nae."

            Ma ka la 1 o Dekemaba i hooholoia ae ai e ke Kenerala Nui no ka hoololi iki ana i ka papahana, oiai hoi ka hoomaha iki ana i Kanapoa no elua la a i ke kolu e nee ai no Alahabada aole hoi i ka muliwai a malaila aku e hoi loa ai na wahine ame na kamalii no Pelekane a lilo ia he mau manawa hoomaha no ka lehulehu Pelekane i hoopiliaikuia.

            Ma ka lohe mua ana o Konela Warena i ka meahou ua eleu koke aku la oia i ka hoike ana i na keiki ana, alaila holo loa aku la oia e hoike ia mea hookahi i na Hagariwa. Alaila hui like ae la lakou apau-na Warena ame na Hagariwa a oiai o Konela Warena ame Mrs. Hagariwa e kukakuka hooponopono ana no ka liuliu ana aia hoi na opio ke hoohala la ma ka holoholo ana.

            "E elua ana paha makahiki a hoi hou aku wau i Enelani, e Nele," wahi a Dike, "a ua manao wau ia manawa e pii hou ae ai au ma ke kulana hou. Ua ike no wau oia mau opiopio no wau aole i oi aku i ka umi-kumamaono aka o na hana ame ko'u ano i komo ai iloko o keia lukuwale na mea nana i hookanaka mai ia'u a me he la ua elemakule maoli no. Ina no oe e aka mai ana ia'u no ko'u manao e ha'i aku ia oe aole no ia he mea no'u e kuha'u iho ai. E ha'i aku wau ia oe ua aloha au ia oe."

            Aka, no Nele ma keia manawa aole i lilo na olelo o ke kanaka opio i mea aka. Ua haka-nu loa iho la oia.

            "E kuu Dike aloha," wahi a Nele. "Aole au e akaaka aku ana ia oe ma keia. Ua hele mai la wau a kaumaha no keia kaawale ana a no ka manawa loihi no hoi e hui hou ai ke hui. A ua ike no hoi oe aole au i kaa maluna o umi-kumamalima makahiki aka ua like maoli no wau me ka wahine nui, i oo loa aku i ko na kaikamahine iloko o Enelani no lakou na makahiki i like me ko'u. Ua oi aku ko lakou opiopio mamua o'u. Ua ike pu no oe e Dike i kuu makemake nui ia oe a aohe he hoohewahewa ana no ia mea a ina no e oleloia he aloha ia ia oe oia aku la no, a o ka mea i oi loa aku oia no ko kaua aloha ana kekahi i kekahi."

            " Eia nae aole e hiki ia kaua ke kuailo mua i na mea e nee mai ana o na makahiki elima, nolaila, i kuu noonoo ame kuu manao aole kaua e hoopaa i kekahi aelike. E oluolu iho no hoi kaua ma na mea a kaua i ike ai, a ina ma keia mua aku e loli ai ka noonoo o kahi o kaua alaila aole he pilikia ana-oiai aole he hoopaa ana mawaena o kana. Pehea la ia i kou manao e kuu Dike wiwoole?"

            Ma keia wehewehe manao o ka wahine opio ua piha loa o Dike i ka olioli, a me keia mauolelo iku ae ai na opio mahope iho o ka hoomaha iki ana a hulihoi  aku la no ka halelole. A ma ia manawa no hoi i hoi ae ai o Eda ame Nede a o na nanaina maluna o na opio apau ua like a o na paa opio no ka i ike i na hakukoi iloko iho o lakou.

            Alaila, i ka wa i hiki io mai ai ko lakou manawa e kaawale ai no ka hoi ana i Enelani ua lilo loa ia manawa he wa kaumaha loa mawaena o na Warena Opio ame na Hagariwa. Kekahi ia o na kaawale ana i uwe waimaka nui ai a hiki ole ke paa mai. Ua ulupuni loa ia o Mrs. Hagariwa a nui ino ka uwe o na wahine opio. A no ka wa hope loa oiai ka huakai e nee ana ua haawi aku no ke Konela Warena i kona lululima i na Hagariwa aka o na opio no lakou ua apo aku a apo mai na paa me ka uwe nui ana o na wahine opio i ka puiwa nuio ke Konela.

 

MOKUNA XVIII.

LILOPIO HOU O LUKANAO.

 

            A hala ka poe kaua ole, na wahine ame na kamalii ame na kane kaua ole a o ka pahuhopu oia o Enelani, a pau no hoi ka nanauki ana o na koa no lakou alaila hoopaa iho la na koa Pelekane e nee ke kaua no ka lawepio ae ia Lukanao. O ke koena pualikoa o Lukanao i hoonohoia ilaila ame ka hui ana aku o na mahele koa i ukali ai i ka poe kaua ole i hoomoana iki ai i Kanapoa ua puuki ae la lakou ma ka puuwai hookahi a nee aku la ke kaua me ka hooka'ulua ole iho.

            Ma ka mahelehele noeau ana o ke Generala Nui Kolina ua puni ae la ka Halealii o ua kulanakauhale Lukanao nei ame ke akamai ame ka ikaika ame ka pau o ka manao ua nee aku na koa imua no ka hui kino ana me na enemi he alo a he alo a me na elau pu no hoi na mea kaua e hoohana ai ua kau-e ka weli o na Inia a mahope o ke kana hookuanui ana ua auhee aku la lakou.

            I kela ame keia la ka nele ole o ke ki pu o na aoao a elua a iloko o ekolu mahina o ke kaua neepapa ana ua lilopio io ae la ka halealii a lilopio no hoi ka punana o na Inia a o ka lilopio no hoi ia o ke kulanakauhale holookoa a kauia ae la ka hae e hoike ana i ka lanakila hou ana o na Pelekane. Aole hookahi Inia Sipoe i hookuu wale ia aka me na elau pu lakou e hui ai, a kau ae la ka weli a i ka uhi ana o ka maluhia ua hoolala koke ia ae la ka hoonohonoho ana i na puali no na kahua hoomoana.

            Iloko o keia hakoko kaua ikaika mau ana aole i nele ke komo pu ana o na Warena mahoope iho o ke komo kaua ana ua hoohala kukakuka pu ae la ka makua me na keiki.

            "E a'u mau keiki," wahi a ka makua, "ua hana anei olua e like me ka olua i hoonohonoho ai-o ka loaa mai o ko olua uku a wawahi ae ma ke gula?"

            "Pela e papa," wahi a Nede," o ka hapanui no nae. Aole i hiki ke wawahi a pau loa no ka mea he koʻikoʻi maoli no ka uku-komikina no ka wawahi ana."

            "Eia he hookahi haneri dala ma ke gula," wahi a Konela Warena, "o ka huina keia a'u i ha'i aku ai ia olua e loaa mai ana ia'u no olua. Ano heaha ka olua makemake no ia mau dala? Mai maikai loa ina i hoike mua mai olua iaʻu ia kakou i Kanapoa."

            "Aia i Deli," wahi a Nede, "he nui na mea makamae i kaa mai iloko o ko kakou aoao nei a na koa e kuai-hele nei me ke kumukuai haahaa loa. Aia he manawa i kuaiia mai ai kekahi mau lei daimana ia maua me ke kumukuai haahaa loa, a no ke dala ole me maua ia manawa pela i lilo ole ai ia maua. Nolaila i hooholo iho ai maua ia manawa pela i lilo ole ai ia maua. Nolaila i hooholo iho ai maua e hoolako ia maua iho me ke dala no na mea o ia ano e hoea hou mai ana. Ua olelo ae na koa i ka nui hewahewa o na waiwai nani makamae iloko o ka Halealii Kaisarabaga a oiai he waiwaipio ua kuleana ka mahelehele ana iwaena o na koa, a ilaila paha e loaa nui mai ai ka maua ma ke kuai ana mai."

            "He hana naauao ia o ka noonoo e ana ia mau hoolala ana." wahi hou a ke Konela, "a ke manaoio nei wau i ka loaa io ia olua kekahi waiwai makamae. Aole e nele ka hoolilo mai o na koa i ko lakou mau waiwai e loaa mai ana ma ke dala oiai, ua oi aku ko lakou lawe ana ma ke dala mamua o ia mau waiwai. Aole au e komo pu ana iloko olaila, no ka mea ua haawiia mai iaʻu ka malama o na palena waho o ke kulanakauhale no ke pale ana aku i ke komo mai o na enemi iloko o ke kulanakauhale."

            I ka lilopio ana o ke kulanakauhale o Lukanao ua piha koke ae la oloko o na Halealii Imamubara ame Kaisarabaga, he mau halealii nani no ke alii o Ouode mahope iho o ka puehuliilii ana aku o na Inia. Iloko o ka Halealii Kaisarabaga, mailuna a lalo ua piha i na mea makamae, na waiwai nani e laa na lihilihi daimana, na puupuu daimana na pupu aniani ame na mea like i laweia mai na wahi e ae apau o ka honua. E like me ke ano mau o ke  kaua he kuleana i piha i ka aoao lanakila ka hao ana ia mau mea apau pela na koa i komo aku ai i ka hao ana e wawahi ana i na pahuume no ka lawe ana i mea makamae waiwai nui mama ke lawe iloko o na puolo a haaleleia iho na mea waiwai nui Kaumaha.

            Kokoke i keia wahi na puali o na Warena Opio, a oiai aole laua iloko o ka hana ia manawa ua hiki ia laua ke hele ilaila a i ko laua hiki ana aku ma ka puka-pa e kakahe-e mai ana kanaka mai ua Hale alii nei me na waiwai waiwai nui.

            "Heaha kau haawi no keia lei, e ke keonimana?" wahi a kekahi koa i pane mai ai ia Nede.

            "Aole au i ike i ka waiwaiio o kena," wahi a Nede.

            "A okiloa aku no hoi au," wahi a ke koa i hooia pu mai ai i ka Nede manao. "Malia paha he aniani wale no keia a i ole he mea okoa ae paha. Nau keia no ka hapaha dala. Pehea ia?

            "Alaila ua pono," wahi a Nede; alaila haawi aku la oia i ka hapaha.

            Pela iho la laua o ka hele-kuai ana me ka makepono loa ame ka maopopo ole no hoi ina paha he mau mea waiwai nui a i ole he mau mea waiwai nui ole a i ole he mau aniani wale no paha. I ko laua komo ana aku ua piha maoli oloko i na koa a e waiho mokaki ana na hoowehiwehi mahope iho o ka wawahi ana, a ua lohe pu aku no hoi na Warena Opio i ka hoohalahala nui o na hoa aliikoa o laua i ka loaa kenikeni ole iloko o ko lakou mau ekeeke i loaa ai ka lakou ma ke kuai ana oiai aole he ae o na koa e kuai ma ka aie aia no he kuike.

            He nui na kaula leipupu waiwai nui ma kahi o na kaukani dala i kuaiia no na wahi dala nuku wale no. A oiai aia he mau haneri dala ekolu a oi iloko o na ekeeke o na Warena Opio ua hooliloia aku la ia huina no na waiwai makamae mai na koa mai a i ko laua hoi ana i ke kahua hoomoana ua piha ko laua mau pakeke a piha no hoi ko laua mau poli a iloko no hoi o na puolo haina-ka.

            "Aole i maopopo ia'u," wahi a Dike i pane aku ai i ke kaikuaana, "ina paha ua naauao kaua ma keia kuai ana a aole paha, a no ka ike ana i ka oiaio no ia mea e maopopo no ia i ka manawa e hoikeia mai ai. Aole no oʻu kanalua ke pane ae aole lakou apau he mau mea waiwai ole e like me na mea hookinohinohi o na kaikamahine hulahula. Eia nae, aole e hiki ia'u ke hooia i ko lakou wawaiio."

            (Aole i pau.)

 

            -KULIANA-

Ka Weli o Damaseko.

KA HOOKO MOEUHANE A KA UʻI ULINA.

 

MOKUNA II.

 

KA HALEALII O KE AWAWA.

            Ua kipa aku o Horama i ko Aboula Casema hale i ka lua ma@na la; a pela no hoi i ke kolu ame ka ha; a i kela ame keia kipa ana pela no hoi i pii mahuahua ae ai kona aloha no Ulina. Me he mea la ua ho-aia ae iloko ona kela mau manao uwila o ka wa opio. Ua makaukau ko'u halealii no ka hookipa ana ia oe, a ke ake nei wau e lilo koke mai oe i hakuwahine no ua halealii la."

            "Ke kali nei wau i kou oluolu, e ke "lii," i panai aku ai o Ulina, me ka leo malie a oluolu no hoi.

            "Na kou makuakane e ku ma kou aoao, aole anei pela?"

            "Ae."

            "Ina pela aole e loihi loa a o ka hooko koke ia no ia o ko kaua mare. O keia ka ekolu o na la o ka pule. I ke ono o na la e mareia ai kaua. Ina e ae mai ana o Aboula i keia, aole anei oe e ae ana?"

            "Ua ae no wau, e kuu haku."

            Me na huaolelo hoopomaikai ame na honi ana maluna iho o kela ihu kina ole o ka opiowahine, i haalele iho ai ka moi ka opio wahine. Huli aku la oia i kona kuhina, a hoike aku la i kona makemake. Ua oluolu iho la ko Aboula manao i ka papahana a kona moi, a haawi mai la no hoi oia i kona ae me ka hikiwawe.

            Pela iho la i paa ai e lilo ae o Ulina i wahine na ka moi iloko o na la ekolu i koe.

            Pehea hoi o Ulina! Ua nana aku anei oia i ka mare e hoea mai ana me ka hauoli? Aole paha. Eia nae aole no oia i hauoli loa. Aole oia i aloha i ka moi-a ua hiki ole no hoi iaia ke aloha kau; ua kuolo loa oia, a he paakiki kona mau aoao, a ua noho mua ia hoi kona puuwai e ke aloha o na wahine he lehulehu wale. Ua lawe ae o Ulina i keia ma ke ano he hapa ia o kana hana; a malia paha o ka olinolino o kela noho kalaunu kekahi mea nana e koi ana i kona puuwai. Ma na ano apau ua ae a'e oia e lilo i wahine na Horama, a o kana hana wale no i keia manawa oia ka hoomakaukau ana iaia iho no kela ola hou e hoea mai ana imua ona. Eia nae me he mea la he mea makehewa nona ka hoao ana e kula iaia iho, no ka mea ma kela ame keia hoao ana ana ua ku mai la imua ona na mea maopopo - hoole ai oia i ka hooko io ana. O kaua e iini ana i na manawa he nui, o ia hoi, mai oi loa aku ka pono ina aole oia i lohe i kekahi mea e pili ana no Helina. O ka hopena i loaa aku ia moiwahine o ia ke kau koikoi ana iloko o kona puuwai, a e hoinino ana hoi i kona noonoo.

            "E Alabia," wahi a Ulina i kana kauwa wahine, ia laua e noho ana ma ia ahiahi, "ke manao nei wau ua loaa no na kumu kupono i ka moi e ku-e ana i kana wahine mua."

            Kau mai la ke poo o Alabia iluna, a nana mai la kona mau maka pahaohao maluna o kona haku, a pane mai la:

            "Alaila, ua ike no oe i na kumu."

            "Eia nae aole oia i hoahewa e make kekahi wahine ana iloko o ka muliwai o Papa mai kela manawa mai a hiki i keia manawa."

            "Aole kaua i ike no ia mea," i pane mai ai o Alabia, me ka luliluli pu ana mai o kona poo. "He nui nae kana mau wahine mai ia manawa mai, a he mea hiki ole ia kaua ke olelo ae heaha la kana mau hana i hana aku ai maluna o lakou. Ua make kekahi poe wahine-aole he poe i ike pehea la ko lakou make ana; ua hookukeia aku no hoi kekahi o lakou-aole he poe i ike i ko lakou wahi i kipakuia aku ai. O ko Helina make ana oia ka mea nana i hoala mai i na kamailio ana he nui, no ka mea oia kana wahine mua loa, a i kela manawa hoi, oia wale no kana wahine; a o kekahi no hoi na loaa ae na manaolana ana e puka mai ana he keiki mailoko mai ona."

            "Eia nae aole i ikeia ua pepehi aku ia i kekahi o kana mau wahine mahope mai," wahi a Ulina i pane aku ai me ka haalulu ana ae o kona leo.

            "Aole a'u pane malaila, e kuu haku. Ke manao nei wau ua paa kou manao e mare aku iaia?"

            "Ae; ua paa ko maua la e mare ai."

            "Ina pela aole wau e noonoo ana no kana i hana aku ai i kana mau wahine. Ina ua ae oe a ua puka aku kau olelo hoopaa me ia, ke manao nei wau aole au mea e huli ae ai i na kokua ana a he mea pono ia oe ke hoomanawanui i ka haawe ana i kona kaumaha."

            "Ua kuhihewa oe, e kuu Alabia," wahi a Ulina i pane aku ai me ka hikiwawe. "Aole oʻu makemake e kokua ia mai no ka'u i hana ai. Ua oluolu no keia ia'u. Aole no hoi o'u makemake i ikaika hou no ka haawe ana iho ia mea. Eia wau ke kakooia mai nei e ka manao e hooko aku i ka'u hana."

            "E kuu haku," wahi a ke kauwa i pane aku ai mahope o kona mumule ana no kekahi manawa, a i hoopukaia aku hoi ia mau olelo me he mea la ua koiia mai lilo loa mai o kona puuwai e hua'iia aku ia mau olelo, "eia oe ke hana nei i kekahi hana paakiki loa no ka hooko ana aku i kau hana, he hana hoi i hana ole ia e kekahi moi o Damaseko nei; a ke pule ae nei wau ia Alahe e ukuia mai oe i ka uku kupono no kau hana ana."

            Mai hoomau loa aku no o Alabia i kana hoike manao ana, eia nae ua papaia mai la oia e kona hakuwahine.

            "Ke hoomaikai aku nei wau no kau mau olelo maikai, e Alabia; no ka mea ke ike nei wau ua puka mai ia mau olelo mailoko lilo loa mai o kou puuwai. E haalele mai oe ia'u i keia manawa."

            He elua la i hala ae, a hiki mai la no hoi ke ahiahi. I kekahi la ae e lilo ai o Ulina i wahine na ka moi Horama. Ua huli aku la kona makuakane iaia mahope o ka ho-aia ana ae o na kukui, e loaa aku la iaia kana kaikamahine e uwe ana. Honi iho la oia iaia a ninau iho la i ke kumu o kona uwe ana.

            Ua hoike aku la o Ulina aole oia i hauoli, a hoike pu aku la no hoi aole loa ona maka'u no ka lilo ae i wahine na ka moi. Ua kaumaha oia a ua mehameha hoi. Ua kaumaha oia no ka mea aia kona makuahine ke waiho la iloko o ka ma'i nui; a ua mehameha hoi no ka mea e haalele iho ana oia i kona home. Eia nae aole e loihi loa ia noonooana. Ua hoike ae oia i kona manaolana o na hana o kona home hou o ia na mea nana e hanai mai i na manaolana hou iloko ona, a e oluolu ana hoi oia a hauoli no hoi.

            "E hauoli no oe ke lilo ae oe i maowahine no Damaseko," wahi a Aboula Casema, "a e haaheo no hoi wau ke ike aku ia oe ma @ kulana. Eia ke ikaika nei ka manaolana iloko o'u-oia hoi mai ko'u koko aku, mailoko aku hoi o ka'u kaikamahine aloha, e puka mai ana ke 'lii nana e noho aku ka noho kalaunu o Damaseko. A e kuu keiki, ke hoea mai ia mea, e hauoli no oe e like me a'u e hauoli nei no ia manaolana."

            "Ae, e papa," i pane aku ai ka opiowahine me ka malie ame ka noonoo pono ana hoi, e kulou ana kona poo ilalo, a aia hoi kona mau manamanalima ke onioni la iloko o na hu'a o kona lole.