Ka Nupepa Kuokoa, Volume XLIII, Number 42, 20 October 1905 — Page 2
| This text was transcribed by: | Pam Sinclair |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA KUAKA
NO KA MAKAHIKI……$2.00
NO KONO MAHINA…..1.00
SUBSCRIPTION RATES
ONE YEAR…………….$2.00
SIX MONTHS………… 1.00
O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA UNPEPPER, E HOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.
O na Dala apau o ka Pepa e hoouna pololei mai I ka HAWAIIAN GAZETTE COMPANY, LTD.
HOOPUKAIA E KA
Hawaiian Gazette Co., Ltd
Hookomoia ma ka Hale Leka o Honolulu Panalaau o Hawaii, ma ke ano---Mea o ka Papa Elua.
DAVID L. A-1 : : Lunahooponopono
S. K. NAWAA, : Kokua Lunahooponopono HONOLULU, OAHU,
POALIMA : : OKATOBA 20, 1905.
KA MAKIA HOOULU LAHUI
O kekahi ninau nui i ulu mau a i noonoo nui ia iloko o na la o ka nohona moi o ka Paeaina Hawaii a i hiki ole ai hoi ke alo ae mai ia kumuhana mai iloko o keia mau la a mau loa aku oia no ka Makia o ko kakou Moi Kalakaua i aloha nui ia –“Ka Hooulu Lahui,” a maluna hoi olaila makou i olioli nui ai i ka hooaiai aku iwaena o kakou no ka paipai ana i ke kumuhana maikai no ka lahui.
O ka makia hooulu lahui—malaila i like loa ai ka manao o ko kakou Moi Kalakaua me ko ke Akua ka Mea Nona ka olelo kauoha mua i na kanaka mua loa mai ka hookumuia ana o ka honua ame ka lani ame na mea apau maluna iho o laua, oiai, wahi Ana—e hoohua a e hooulu aku no ka honua. Ua kuhikuhi a ua haawi mpu mai oia i ka loina e ko ai ka hooulu nui ana a oia no hoi ka nohona ohana, wahi ana—e haalele ke kanaka i kona makuakane a e pili aku oia i kana wahine, ma kekahi olelo ana aia wale no ka hooulu lahui maloko o ka nohona ohana ana.
Ma ke kilo ana iloko o ka moolelo kahiko o ke ao, ua hiki ke loaa ka ike maopopo i ka hohaahaa loa ia o ka nohona ohana ana a maloko o Enelani ame na aina nunui e ae mamua i maopopo ai ia ino, oia hoi ka noho ana o ke kanaka hookahi me na wahine he lehulehu a i ka wahine hookahi hoi me na kane lehulehu, a maloko hoi olaila, a ma ia ano noho ana i kauwakuapaa maoli ai ka noho ana o na wahine e hehikuia ana e ko lakou mau hakukane. Aole keia he loina hooulu lahui a ua ku-e maopopo i ka loina a ka Makua Lani i waiho mai ai.
Eia nae, i ka nee ana o ka manawa oiai he mea nee a noho paa ole ia, ua hoomaka ae la ka mukili o ka noonoo iloko o kanaka he mea i pono a oia maoli no ka pono loa o ka hele kuokoa o ke kanaka, oi loa aka @ loaa i na wahine ia haawina hele kuokoa ana, a i ka hala ana mai o kekahi mau manawa ua makili hou, ae @ noonoo aole ma ka noho wahine @ulehu ana o ke kane ka maikai @ a aole no hoi ma ka noho kane @ lehulehu ana ka wahine e pono ai aka aia ka maikai loa ma ka nohona ohana a@ o ke kane hookahi wale no me @ wahine hookahi wale no alaila puka ae la na hooho mahalo ana i ka waiwai nui o ka ike ana ia haawina pookela, alaila kukuiu ia ae la na kanawai no ke aupuni e makee ana i ka noho ohana ana o na mea elua i oi ole aku maluna.
Alaila, like ae la ka hana o ka poe i hoomakiliia na noonoo maluna o ia ninau hooulu lahui me ka loina mua o ke Akua i waiho mai A no na kanaka e hahai ai, e haalele aku ke kanaka i kona makuakane a e pili aku i kana w@ e hookahi. A o keia iho la ka rula no ka hooulu lahui.
Ma keia rula mua no hoi i haawiia mai e ka Maakua Mana i puhili ai na Moremona o ka hapai ana i ka rula o ka noho ohana ana ma ka mare lehulehu, a o ke kue ana i ka rula a ke Akua i haawi mai ai i kumu alakai o ke ku-e ana no ia i ka pono hooulu lahui.
O ka noho moekolohe ana a noho hookamakama ana aole ia he rula no ka makia o ka Moi Kalakaua, a oia no hoi ka emi ana mai o ka heluna nui ame ka pii ole ana o ka lahui iluna. Nolaila, ma ko makou noonoo ana maluna o keia ninau aole o na rula e ae i hoohailiia aku nei ame na hanaino e ae e ko ai ka makia o ka moi aka o ka hahai no i ka rula kumu o ka Makua Lani –e haalele aku ke kanaka i kona makuakane a e pili @ ku i kona wahine, ma kekahi olelo ana, i hookahi wahine a ke kane hookahi a i hookahi kane a ka wahine hookahi e hoohuiia ai ma ka berita maemae o ka mare.
Alaila o na hua o keia loina o ka noho pulua ana na mea kupono e ikeia ai a e loaa ai na hooiaio i kona pihapono io. I ke kilohi ana i na anoai o ka moolelo kahiko o ke ao nei, iwaena o ka poe i malama pono ia rula hooulu lahui a hiki i ka hopena o ke ola honua ana, ua ikeia ka laupa’i io o ka aina me na kanaka ola maikai a malamalama, a iloko o ko lakou nohona honua ana ua ike pu ia ka hanohano ame ke ala o na inoa o lakou i nele ole ai ka waiwai o ia poe inoa no ke ao nei a hanohano pu ka aina ame ke aupuni a o ka lakou mau hana mooikaika maikai i kukulu ai mahope iho o ka hala ana ma o ua lilo i mea alakai e hoomaikai a hoomaemae loa ae i ke ao a o ko lakou poe inoa maikai he mau kukui malamalama lakou no na hanauna hou no ke alakai ana ia lakou ma ko lakou ala.
O ka lakou mau keiki e ulu ana e lilo mo i mau makaainana maikai a hanohano no ka aina. Iloko hoi o ka nohona ohana ana ke kahua mua loa o ka oihana hoonaauao a i ka makaukau ana iloko olaila no ka hemo ana iwaho o ke ao, oia auanei ka manawa e komo aku ai i na home hoonaauao o ka lehulehu, oia hoi, na kula aupuni ame ka kula pokii o na like ole ame na kula nunui a i ke oo ana iloko o ka hoonaauao ana, o lakou auanei na kia pouha-ua no ka aina kahi o lakou i kulaiwi ai. Mawaho ae o keia aole e loaa he rula i kupono no ka hooulu lahui ana a mai hooakamai wale aku e like me na Moremona ma ke a’o hooikaika ana i ka mare lehulehu, a me ka a’o ana o ke kepo-lo e noho huikau a komo iloko o ka hookamakama a moekolohe ame na hanaino apau e like me ke umikeiki o na ano apau.
I mea e kanu paa ia ai keia haawina rula pookela a ka Makua Lani i waiho mai ai i ke kanaka i kumu alakai nona he mea pono i ka poe apau i kupono iloko o ia mahele e laweia rula me ka malama loa, oiai nae, oia kekahi o na aelike laahia paakiki i ka malama maemaeia e na paa i hoohuiia ae a lilo i hookahi. E noonoo e ka hoakanaka i keia makia pookela a ko kakou moi uloha i kukulu ai.
AOLE KA HULAHULA NO KA PONO EKALESIA.
Ma ka manawa i hapaiia ai o ka Ahamele ame Aha-hulahula o ka Ekalesia o Ewa, mokupuni o Oahu, e like me ia i puka ai ma ke Kilohana o ka hebedoma i hala a i malamaia ai ma ka Poaono i hala e like me ia e puka aku nei ma na kolamu meahou o ke Kilohana nei-o ka ahamele wale no nae ka i malamaia ae ma ka aoao o ke Komite Ahamele Rev. E. S. Timoteo ame Keliinohopono, a o ka paani hulahula mahop iho mamuli ia o ka poe i makemake ia hana – o keia kumuhana oia ka mea nana i hoopuiwa ae i na haipule o ke kulanakauhale nei a pii ae la ka like ole o na noonoo, a puka okoa mai ai ka hoike manao o ke Komite Hawaii o ka Papa Misiona Hawaii e hoohalahala ana i ka iaweiaweia o ka aha-hulahula, a i hoomalieia iho hoi ma ka hoike akea ana o ke Komite Ahamele i ke kapaeia ae o na hana hulahula.
Ma ko makou manao he hauoli maikai no ka hulahula e like me ka maikai o na paani e ae i ku i ka pono, koe no hoi na hana ino. He lealea ka hulahula i malama mau ia e ka poe naauao ame ka poe hanohano ame ka poe ko’iko’i ma na oihana aupuni, pau pu hoi me na aliikoa o na mana kaua moana ame aina a pau pu no hoi na mea e ae apau i ke komo ana iloko olaila a koe nae ka poe i laa iloko o ka oihana hoonaauao o ka pono uhane.
Ma na hokele o kakou o Honolulu nei, e laa ka Hokele Hawaii, Hokele Iana ame Moana Hokele ua ike nui ia ka malama mau ia ana o na aha-hulahula a o ka hapanui o ka poe i komo iloko olaila o lakou no ka poe haole hanohano o ke kulanakauhale i huiia me na koa o na mokukaua ame na moku lawekoa e ku mai ai, a ua ike maoli ia ka olioli nui o ka poe i hui aku ma ia mau lealea kupono, a iloko iho no hoi o ko kakou mau aha-hulahula iwaena iho o kekahi poe opia iho ua maikai ka lawelawe ana eia nae he lealea keia i hala ole ka ikeia ame ka hoomaopopoia o ka nele ole o ka houmili maalahi ana o ka ino hewa iwaena o na kane ame na wahine i hoomaheleia nae iwaena o na aha-hulahula kupono ole. No ka hulahula nona iho ua maikai ia a o ke kupu ana mai o ka ino hewa mamuli ia o ka hoohana ana ia o na mea i kau a hoopiliia aku maluna o ka lealea hulahula.
Alaila, e hoohaili ae i keia lealea maikai ma ke ano i alanui e loaa mai ai na loaa no ka pono o na Ekalesia, a ia mau Ekalesia no hoi e lawelawe ai, like loa me Ewa Ekalesia i hapai ai a naauao nae ma ke kapae ana ia mahele mai ka Ahamele ae. I ko makou manao o keia kekahi o na ninau maikai loa a i kupono loa e noonooia e na ahahui kristiano no ka pono ame ka ole o ka hoohana ana o na ahahui kristiano ame na Ekalesia i loaa ae i mau kokua no ka pono o lakou ahahui a Ekalesia hoi.
He hookahi nae mea i maopopo loa ia makou me ka hoohewahewa loa ole iho – he lealea maikai no ka huiahuia, aole nae i kupono no na hana imi kokua no na hana pono uhane ma o na Ekalesia a mau ahahui kristiano paha ma na ano apau. He lealea ia i kupono – he kohu ole nae no na hana pono ma ka imiloaa ma na mea no apau. O na loaa ma ka imiloaa kokua ana no ka Ekalesia, ma kekahi olelo ana, he mau hua ia no ka Ekalesia – a ina he maikai io ka aha-hulahula a maikai hoi kona mau hua a kupono loa no na Ekalesia, alaila ua maikai pu aku la no hoi ke kukulu ana i pa-hulahula no ka hoohulihuli ana i komo nui ai kanaka iloko o na Ekalesia, a aole e emo o ka piha no ia me na hoahanau hulahula.
O ka hulahula oia kekahi o na lealea pipili nui ia e ka poe lealea kupono ole a poe maikai e ae no hoi, a oi loa aku iwaena o ka poe opio, alaila aole makou e kanalua i ka pane ae e piha ana na Ekalesia i na hoahanau a pau ka uwe hoahanau mai, a oiai ua komo nui mai ma ka hulahula alaila ua maikai aku la ka hulahula, oia hoi, ina ua maikai ka hulahula no ka imiloaa kokua ana. Ina ua pono ka imi kokua ma ka hulahula alaila ua pono ka hoohuli knaka no ka Ekalesia ma ka hulahula.
Ka makou e kalele nei aole ia he pono. He hoopiha hoahanau opala ana ia a he ku-e maopopo ia i ka Mea Nona ka pawaina, ma kekahi olelo ana ua like no na kihapai pono uhane me ko ke ao – o na hoomaloka ame ka poe iini nui i ka ino hoopoino ua like, a maluna olaila kekahi i kukulu ai ko makou manao ku-e i ka lawe ana i na aha-hulahula no no Ekalesia a aha kristiano e ae. E noonoo e ka hoakanaka no keia kumuhana a e makee mau aku i ka pono.
Ikea ka Waiwai o ke Komite Hoeueu Kaahele.
O keia malalo iho ka hoike no ka hooaiai ana i ka waiwai o ke kukuluia ana i komite Hoeueu kaahele iwaena o na Ekalesia o ka Paeaina Hawaii i laweia mai ka Hoike Makahiki o ka Ahahui Euanelio Paeaina o ka makahiki i hala ma o Rev. E. S. Timoteo la:
HOIKE O NA HANA HOEUEU. Rev. E. S. Timoteo – Komite Hoeueu.
E like me ka nee ana o ke au o ka manawa e ko ana imua, a e hoonalo ana i na mea o ke au kahiko, pela no ka manawa, e lawe mai nei i na mea hou, e hooholo mua ai i ka nee awiwi ana o na mea hana o ke au holomua. Iloko o ia nee ana, ke nee pu nei no nahana iwaena o na Ekalesia, e like me ka uwila e hoonee ana i ke alahao.
Ua mahele ia na hana a ke Komite Hoeueu i keia makahiki iloko o na mahele hana elua: 1. Ka mahele hana okoa iwaena o na Ekalesia. 2. Ka mahele hana Hoeueu. Ua hoomakaia na hana hoeueu ma ka Ekalesia o Kohala Akau a hiki i kekahi hapa o ka Ekalesia o Kohala Komohana, ma ka la 28 o Novemaba, 1904, a hiki i Ianuari la 12, 1905. Ma na hana hoeueu, o ke komo kauhale, ame ka hoala ana i na halawai hoeueu, oia no na hana ano nui i hapaiia. Ma ke komo kauhale, ua hui pu mai kekahi mau makuahine o ka Ekalesia, me ke Komite Hoeueu a hele pu iloko o na kauhale, mai ka pali o Pololu, ahiki i ke kai heenalu o Puakea. Ma keia komo kauhale ana, ua lehulehu ka poe i loaa aku i ke Komite, a kukakuka pu me lakou, a haipule me lakou. Oluolu na kuka pu ana, a ae no kekahi poe e hoi mai iloko o ka pono, a hoike mai kekahi poe i ko lakou iini e loaa ke kahu hou no lakou. He lehulehu lakou i makemake e hoi mai iloko o ka pono; o ka poe hele auwana, ua ala mai na manao mihi e ahewa ana ia lakou, o ka poe i alakai hewa ia iloko o na hoomana e ae, ua ala hou mai na manao aloha i ka Ekalesia Makua. Ma kekahi halawai a ka hoomana Molemona, ua ku ae la kekahi makamaka, a ha’i ae la i kona manao, “Ua haalele au i ka oukou hoomana (Molemona) a e hoi ana no au i ka Hoomana Makua, ka mea nana i hoopomaikai mai ia’u a i lakai ia’u ma ka oiaio.”
Ma na hana halawai hoeueu, ua malamaia ma na Apana o Honomakau, Ka paau ame Makapala, a ma ka hale kula o na kaikamahine o “Mauna Oliva.” Ma ia mau halawai, ua hooiaio mai kekahi poe, ua ae e hoi mai ma ka mihi. Ma ke Sabati la 4 o Dekemaba, 1904, ua hookomoia iloko o ka Ekalesia he 10, hoihoi ia mai ma ka mihi 2; bapetizoia 8. A mawaho ae o keia poe he lehulehu na inoa i waihoia mai mahope o ka pau ana o ke Sabati ahaaina, no ka iini no e hoi iloko o ka poli o ka Makua. bUa ha’i aku au i ka manao hoolana ia lakou. E hoomanawanui lakou, a na ke kahu hou e hookomo ia lakou i ka Ekalesia.
Mailoko ae o keia mau hana, ua ulu ae na manao kahea kahu. O ka manao kahea kahu, he hana ia i aneane io iloko o ka manao o na wahi hoahanau kakaikahi e hoomanawanui ana i ka hana, mamuli o ko lakou nna iho ia lakou, he uuku loa, aole e hiki ia hana i ka manao o na hoahanau palaka, ame ke komo hou ana mai o kekahi poe, ame ka ike ana aku i ka lehulehu o ka poe hou e ake ana e komo i ka Ekalesia, nlaila, ua hapaiia ka noonoo e kahea i kahu.
O ka hana kahea kahu, he hana ia i noonooia me ka manao lokahi mai kekahi pea o ka aina a i kekahi pea.
Ma ke Sabati la 27 o Novemaba, 1904, ua malamaia ka halawai o ka Aha Ekalesia o Kohala Akau i noho Lunahoomalu ia e ke Komite Hoeueu, a ma ka noonooia ana, ua hooholoia e kahea ia Rev. G. L. Kopa, kahu o ka Ekalesia o Waimea, Kauai, e lilo oia i kahu no ka Ekalesia o Kohala Akau. Ua hoounaia ka olelo hooholo imua o ka mea i hooholoia mamua o ka hoounaia ana ka palapala kahea; a ua noi ia ka oluolu o ka mea i hooholoia, e holo mai e lawelawe pu i ka hana o ka Ekalesia. Ua hiki mai o Rev. G. L. Kopa ma ka la 21, i malama ai oia i kana haiolelo mua loa maloko o ka luakini o Kalahikiola. Ua hui pu mai oia me ke Komite Hoeueu, ma na hana komo kauhale ame na halawai hoeueu a hiki i ka manawa i pau ai ka ke Komite hana ma Kohala.
Ma ka halawai a ka Ahahui Euanelio o ka mokupuni o Hawaii, i malamaia ma Kau i ka mahina iho nei o Maraki, ua aponoia ka palapala kahea kahu a ka Ekalesia o Kahala Akau ia Rev. G. L. Kopa, a ma ke Sabati la – o Mei, 1905, ua hoonohoia oia i Kahu, e ka Aha ma o kona Komite la i kohoia.
O ka manao iini – E haawi i ka ke Akua i ke Akua –Oia kekahi o na mea ano nui i ala pu mai mailoko mai o na hana hoeueu. Ma ka noonooia ana o ke ola o ke kahu, ua hooholoia i $420 no ka makahiki. Ua kohoia a hooholo lokahi ia ke Komite Ola Kahu, no lakou ka heluna o elima hoa, a na lakou e ohi i na dala no ke ola kahu a hoihoi i ka Puuku mamua o ka pau ana o ka mahina, i hiki ai i ka Puuku o ka Ekalesia ke uku aku i ke kahu, ma ka ia mua o ka mahina.
Ma ka Aha o Hawaii, ua hookau ia mai kekahi mau hana maluna o ke Komite Hoeueu, oia mau hana, oia no: 1. Ka hoohui ana i kekahi mau Ekalesia pilikia. 2. Ka aie o na Ekalesia i ke ola o na kahu. 3. Komite kiai i kekahi mau Ekalesia.
O ka hana hoohui i na Ekalesia pilikia, he hanaia i hookauia mai maluna o ke Komite, ma ka halawai o ke Kau mua o ka makahiki ma Kailua. Elua mahele hana a ke Komite Hoeueu i hapai ai e hana no keia kumuhana: 1. Ka hoouna ana i na leta. 2. Ka hele kino. Ua hoouna ia na leta i na Ekalesia o Opihikao ame Kalapana. O ka pane i loaa mai aole lakou i makaukau no ka hoohui ana me ka Ekalesia o Puula. Ma ka Ekalesia o Hamakua Huiia, ua halawai aku ke Komite me kekahi hapa o ia Ekalesia a ua hoike mai lakou i ko lakou manao, aole e ae i ka hoohui me ka Ekalesia o Hamakua Hikina, oiai, ua manao no lakou e kahea i kahu no lakou mahope o ka pau ana o na hemahema o ka Ekalesia.
O na Ekalesia i noho aie i ko lakou ola kahu i hookomoia mai iloko o ka lima o ke Komite Hoeueu, oia no ka Ekalesia o Puula, Hamakua Hikina, ame Kailua ame Helani, Mamuli o ka hooholo ana o ka Ahahui e hapai ke Komie Hoeueu i ka lulu dala ma ka manawa e malamaia ai ka Hoike Kula Sabati Hui o na Kula Sabati o Kau ma Waiohinu, ua hapaiia ia lulu a loaa na dala he $25 a hoolilo ia no ka aie o ka Ekalesia o Kailua ame Helani i ke ola kahu.
O na Ekalesia kahu ole, i hookomoia mai malalo o ka malama ana a ke Komite Hoeueu, oia no na Ekalesia o Kohala Akau ame Haili ma Hilo. O ka Ekalesia o Kohala Akau, ka Ekalesia a ke Komite Hoeueu i komo ai e hana malaila, a hiki i ka loaa ana o ke kahu. O ka Ekalesia o Haili, aole i hiki aku ke Komite ilaila. O ke kumu, oia no ke kau koikoi na mai o ka ma’i pilikia maluna o ka ohana, nana i hoomoe nawaliwali loa iho i ka makuahine ame ke keiki maluna o kahi moe i na mahina ekolu. Ua hoomaha mai no nae ka lima o ka Mea Mana Loa, e like no me ka nui o Kona lokomaikai.
Mawaho ae o keia mau hana, ua lawelawe ia na hana e ae. 1. Ka malama ana i ka Papa Ahaaina a ka Haku ma ka Ekalesia o Waialua, Mokupuni o Oahu ame ka huli pono ana, a hoomaopopo i ka aina o ke kahua o ka hale kahu. Ua huli ia, a ua maopopo na mea apau. 2. Ka hooponopono a hoolaulea i ke ku-e mawaena o kekahi hapa o na hoahanau o ka Ekalesia o Waianae ame ke kahu. Ua hooponopono ia a ua pau ke ku-e.
I ka hoopau ana i keia Hoike, ua malaelae no ke ala no mua, no na Ekalesia Hawaii, e koi mai ana ia kakou na paahana, e ala a e hana, oiai, ke puapuai mai nei no ka holomua o na hana iwaena o na Ekalesia i hana ia. E ala kakou a e hana! He wa hou keia a he wa a ka Uhane e hana nei iloko o na haipule apau mai o a o.
E Mare ana ia Alice Rusawela.
O ka poe hoahele pu o Kakauolelo Taft i makaikai ai i na mokupuni o Pilipine ame na Aina Hikina ua olelo ae lakou o ka launa pu ana o Miss Alice Rusawela ame Lunamakaainana Nicholas Longworth o Ohaio (Ohio) o ia mau hiohiona me he la oia na mea e hoike ae i ka hiki ku o ka hopena ma ka awai ma kekahi la aole i mamao loa, a oia no hoi ka manawa e lilo ae ai o Miss Alice Roosevelt o Mrs. Longworth.
O Lunamakaainana Longworth he onamiliona oia a o na opio hoi no laua iho ua kupono maoli ma na mea apau. Ua pili mau aku no hoi oia ia Miss Alice Rusawela i ka hapanui o ka manawa ma ka manawa o ka huakai makaikai a ua oleloia ae o ka hoopakeleia ana o Alice mai kekahi kulana poino ma ke ala makaikai i hele ai i ka mokupuni o Mindanao.
I ka hololio ana ma ka ihona i aneane ai o Miss Alice Rusawela e haule e ole wale no o ka hoea koke ana o Hon. Longworth e komo kokua aku i ka wahine opio i ka wa i maopopo loa ai o ke kulana puikaika.
O Miss Rusawela ame Longworth ame kekahi poe e iho o ka hukai i holo aku ai mainei aku aole i hoi mai ma ka mokuahi Korea, aka ua hoomau aku no i ko lakou makaikai ana ma na aina hikina i ike ai lakou ia Pekina ame Seoul. E hoi mai ana lakou ma ka Siberia. - Examiner.
HE HOOMAIKAI.
Ke haawi aku nei au i ko’u hoomaikai i ka poe apau i komo pu mai e kanikau a i hele pu i ka hoolewa o kuu lei aloha, Miss Rose Moenahele.
MRS. SARAH ALOHIKEA.
Kalaupapa, Molokai, Okatoba 9 th , 1905.
He mau himeni kekahi i hakuia a mele ia mai me ka nani e lakou ma ua po la oia keia malalo iho:
1 st . --- He uhane he aloha, Chorus ---
Nou no e Pualoke; Me ka naau luuluu,
Ua haalele iho oe, Me na waimaka helelei;
Ia makou na hoa. E hoomanao ai,
Ia oe ka makou milimili.
2 nd --- Me kou mau makua ‘loha, 3 rd --- E ke keiki e,
Ko makou kuilima pu, E hoomanao oe
Me na hoa hooikaika, I kou Haku ma ka lani
O na hana o ke Akua. Ma kou alahele.
O ka leo o keia himeni “I’ll stand by you” Gospel Hymn. Eia kekahi:
Kanikau he aloha, Nou e Pualoke;
Nou paha ka uhane I niau iho nei.
Ninau ka makua, Auhea kuu lei;
Pane mai na lani Ua hala ua nalo.
Aia i ka poli, ka houpo Hana;
Ma ke ala hoiula, Ala koiaweawe.
Aweawe ka helena, A ia kamalei;
Kuliaikanuu, I ke ao polohiwa.
Aloha ka makua, Aloha e ka home
Aloha na hoa O ka alo like ana;
Haina ka puana, I lohe ia oe
Nou e Pualoke, Nei lei ua mae.
Leo “Ke Kupua Koolau.”
A he nui wale aku na nani i hana ia i kela po.
Ma ka auwina la i malama ia ai ke anaina pule nona ma ka luakini o Kaana Hou iloko o ka uuwehi o na pua ame na kahakahana kanikau a mahope iho o ka pau ana o ke anaina pule ua manele ia aku kona kino iwaena o kekahi huakai hoolewa nui iwaena pu hoi o na leo mele e mele ia ana e kona mau hoa haumana o ke Kula Sabati. E hapai ia ana kona kino e kekahi mau haumana he 12 o ka Papa Opio kane.
Keia kekahi o na hoolewa mui loa a nani loa no hoi i ike oleia mamua.
Ua awa kaua me ke aoha, me na keiki oniu hua o kou papa pa’i ko’u anoi.
J. K. KELIIKULE, Kalaupapa, Molokai, Okatoba 12 th , 1905.
HE HOOMAIKAI.
O makou o na lala apau o ka Ahahui Euanelio Mokupuni o Oahu, ma keia; ke haawi a ke pahola aku nei makou i ka makou mau hoomaikai ana he nui loa, ia oukou e na hoahanau aloha a pau o na Ekalesia o Kawaiahao ame Kaumakapili, no ka oukou mau haawina kokua aloha i ke kiai, i ka malama a i ka hanai pono ana mai ia makou i na mea e hooluoluia ai ko makou mau pilikia ma ke kino, ioko o na la a makou i noho pu ai me oukou, ma ke kulanakauhale o Honolulu.
Na ka Makua Lani e hoopomaikai mai ia oukou apau.
Kou mau hoahanau me ke aloha.
Ma o ko makou Kakauolelo la, WM. K. POAI,