Ka Nupepa Kuokoa, Volume XLIII, Number 33, 18 August 1905 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA

POALIMA, AUGATE 18, 1905

 

liwai, a o ke alakai hoi ua hooikaika no oia ma ka au ana a ma ka luu pu ana oiai aole oia i maa i ke aholoa, eia nae, ua pae like no lakou apau ma ka aoao i makemakeia me ka loaa ole i kekahi poka o na enemi.

            “He mau hoaloha makou!” i uwa mau aku ai na opio ia lakou e kuupau ana i ko lakou mama pii piina a ua panaiia mai la ko lakou uwa me na leo hookipa o ke ohaoha e na kiai Pelekane e ku kiai ana; eia nae, aole no i nele ka hihio ana ae o na poka o na enemi aole nae i hoomanuhe’u aku i na kamahele a hoea wale lakou iloko o ke apo o na hoaloha.

            Me na lululima ame na haawi hoomaikai i apoia mai ai na opio ame ke alakai Inia i hoea hou aku, a iloko o ka manawa pokole i holo hikiwawe ae ai ka meahou iloko o ke kahua hoomoana a nui ino ka olioli o ka lehulehu makaainana Pelekane piliaiku.

            “Aole makou e ninau piha mua aku i ka oukou meahou,” wahi a na leo i ikuwa mai ai,” a lohe mua ke Konela, aka e ha’i mai nae ia makou, eia anei ke kokua a hiki mai?”

            “Generala Pelekane, eia ae,” wahi a ke alakai Inia.

            “Pela,” wahi a Nede i pane ae ai me ka olioli pu no hoi iloko ona, “aka, aole i ka manawa koke.  Mai hoonuinui loa aku i keia meahou i na lede oiai e hala ana no kekahi manawa mamua o ka hiki io ana mai o na kokua.  Aole e pono ia’u e walaau loa mamua o ko’u ike mua ana i ke Konela, a mai hoonui wale aku i na mea i kaa aku mawaho o ke kupono.”

            Ua hoolawa koke ia aku na opio me na koloka, a ua lohe pu aku no hoi ke Konela i ka hiki ana aku o ke alakai Inia ame elua mau koa Pelekane iloko o na aahu uhiuhi a i makaukau koke no ka hookipa ana ia laua, a oiai ua lohe e ua konela nei i ka ke alakai Inia ua makemake loa oia e lohe i ka na opio.

            “Pono e ke alakai,” wahi a Konela Iniliki i apo ohaoha aku ai a lululima pu me ke alakai Inia, “ua hooko pono aku oe i kau hana me ka wiwoole e kupono ai e ukuia a kupono no hoi oe ma kou kulana i hookohuia aku ai.  A no ia mau maikai au i hana ai no ke Aupuni Pelekane aole e nele ke kanaka hana i kona makana,” a me elima kaukani dala Inia i panaiia aku ai ke alakai Inia e ke Konela.  “A heaha kau olelo mai Kanapoa mai?”

            “Ua ha’i mai ke Kenerala ia’u no ka hoike aku ia oe e nee koke mai no oia me ka hikiwawe.  Ua lilopio ae o Kanapoa he mau la mamua iho o ko’u hiki ana aku.  A ua holo a haalele iho ka Emepera Nana ilaila a holo no Bitua a ua holopono na mea apau.  Aka, aia i na aliikoa opio i hele pu mai nei me a’u na mea aku i koe e hoike mai ai ia oe.”

            “Ke hauoli-nui loa nei wau i ka hui ana me olua e na opio,” wahi a Konela Iniliki i pane aku ai i na Warena Opio me ka lululima pu ana no ka wa mua, “Owai keia mau opio a’u e hui nei me a’u me kuu hauoli nui, oiai me he la he mau koa Sipoe olua a elua ma ko olua kulana e ku nei imua o kuu alo.”

            “O Warena ko maua inoa,” wahi a Nede i pane aku ai, “a o ko’u kaikaina ponoi keia.  O ko’u hookomoia ana iho nei no ia iloko o ka Puali Kanaono a o ko’u kaikaina nei he koa oia no ka oihana kaua moana.  He olelo ka i haawiia mai ia maua nau a nou wale nae i mea e lohe ole ai kou alakai Inia i lawe mai nei ia maua a he kumu no hoi ka hanaia ana pela a e ike no ia mau kumu ma ka’u wehewehe ana.”

            Alaila haawi ae la o Konela Iniliki he hoailona e haalele iho na mea apau i kona lumi a emoole no hoi i kaawale aku ai lakou.

            “O ka olelo i haawiia mai ia maua nau, ke kaumaha nei wau i ka hoike ae i ka lilo o ia mea i olelo hoolana ole i ka nui o kakou nei a i kulike ole aku hoi i na mea i hoolahaia aku nei e ke alakai Inia.  Ua waiho mai o Kenerala Haveloka i ka olelo i ka hiki ole iaia ke nee mai oiai ua ike oia i ka nawaliwali ma kona aoao a aole he ikaika kona ame kona mau puali e houpoo mai ai iloko o ka nui o na Inia ma ke ala e hiki mai ai ianei, oiai aia lakou ma ia mau wahi kahi i hookahua mua ai no ka hui kino ana.”

            “Aia wale no me ia he hookahi kaukani koa pu kaupoohiwi ame na wahi koa kaulio kakaikahi, a he mea pono hoi iaia e paa ia Kanapoa oiai ua lilopiio mai ia punana o na Inia a ina e hoao oia e nee mai, alaila e mahele ana oia i kona mau koa—o kekahi hapa e paa ia Kanapoa a o kekahi hapa e nee mai ianei, alaila aole e lawa kela mau mahele me ka ikaika e holomua ai.  Ua kanalua no hoi oia i ka hoea koke mai o na kokua mai ka aina makua mai, eia nae, e hoea io mai ana no nae ma kahi paha o ka mahina.”

            “O keia iho la ke kumu nui o kona hoouna maoli ana mai ia mana oiai o keia mau kumu, ina e lohe na Inia alaila he hooikaika loa ana ia i ko lakou manao kipi a e nee ai imua me ka ikaika nui i o oukou nei a i Kanapoa hoi, no ka mea aole e nele ka holopapa o ia mea hou iwaena o lakou, a he hookomo ana hoi ia ia kakou ma ke kulana puikaika loa.  I keia manawa aia ka maka’u me na Inia no kakou a o ke kumu o ia mamuli o ka neeu ole o kakou mai ko kakou mau kahua i ku ai, e hoike ana aia no ke ikaika nei kakou, me he la o keia iho la na mea apau.”

            “Mahalo i ka olelo, aka, he manawa loihi maoli kela mahina hookahi.  Ua manaolana wale ae no makou eia na kokua ke nee mai nei aka aole nae pela.  Aka he mea pono ia kakou e hoomanawanui a e hana aku i ka maikai loa e hiki ana ke hanaia.  No makou iho ua pilipu maoli makou eia nae ke manao nei no wau ua hiki no ia kakou ke kupaa aku a hala ka mahina hookahi me ka nui hoomanawanui no nae.  He mea oiaio no aole e hiki ia Kenerala Haveloka ke hana i ka mea hiki ole ke hana, aka he hana kamahao loa kana i hana ai a lilopio hou ae la o Kanapoa me kahi ikaika uuku lawa ole.

            Pela i manao ai maua e hoike wale no i keia mau mea ia oe,” wahi hou a Nede mahope iho o ka ke konela hoike manao ana, “i lohe mua oe a nau ia e hana aku e like me kau i ike ai he pono.”

            “Ua pololei no ka olua i noonoo ai,” wahi a ke konela,—“aka ke manao nei wau he mea pono e lohe na mea apau o ke kahua hoomoana i ka oiaio.  Ua oi aku ka maikai o ia i ike iho kela ame keia aia no maluna iho ona ke ko’iko’i o ke ku aku i keia paio a aole e kau wale aku na maka i na kokua i maopopo lea aole e hiki mai.  He mea kaumaha no i ka hoike ae i ka loaa mau o ka make i o makou nei, a ke manao nei wau ua nui ka maluhiluhi me olua a he mea pono e hoomaha mahope o ko olua paina, a aohe hoi he pilikia o makee ma ia mea oiai he nui ka ai e hala ai kekahi manawa loihi.”

            Ia manawa koke i kauohaia aku ai na aliikoa e ae e noho hou iho la ka ahakeka, eia nae, ua kuha’u iho la na nanaina olioli i hekau mua maluna o na aliikoa no ka hoea mai o na kokua, ma ka lohe ana aole pela.

            “Ua ike e no wau e na keonimana,” wahi a Konela Iniliki, “ua like no ko kakou noonoo maluna o hookahi mea, a oia mea oia no ko kakou kupaa ma ko kakou kahua me ka haawi ole aku i hookahi iniha i na enemi.  A ua makaukau no hoi kakou i ka paio aku a hala kekahi mahina ina no aole e hoea mai na kokua maloko o ia manawa.  Hookahi nae mea kaumaha ma ko kakou aoao oia no na wahine ame na keiki, a o ke Akua wale no ka i ike i na kokua no lakou a no kakou apau, a o kona makemake no hoi ke hanaia.  Ke manaoio nei no nae wau e hoea mai no na kokua iloko o ka manawa kupono.”

            Alaila hookuu ae la ka ahakuka a malalo o ke kuhikuhi o ke Konela na hoonohoia ae la o Nede ma ko ke Konela aoao i lohe ai ia hapa i na mea hou owaho a o Dike hoi ma kekahi hapa i lohe ai no hoi ia poe—i lohe ai na mea apau i na kumu o ka nee ole mai o Kenerala Haveloka, ka lilopio ana o Kanapoa i na wahi koa uuku wale no, a me ka palaha ana o Deli ame na mea like.

(Aole i pau.)

 

Kenekuria Umi-kumamaiwa

AME

Kana Mau Hana Kamahao.

(Kakauia e Simeon K. Nawaa.)

 

MOKUNA XIV.

 

NA LA HOPE O KO KAMEHAMEHA NOHOMOI ANA—WAHIIA NA AKUAKII—POHA KA MALAMALAMA O KA EUANELIO MA HAWAII NEI.

 

            I ka loheia ana ae ua holo aku na aliimoku o ua moku la no Waimea, Kauai, ua holo aku la o Kapena Bouchard ilaila me ke kauoha mai ia Kamehameha aku i na ‘lii o Kauai.  Ua haawiia mai na poe powa ia Kapena Bouchard, a hookolokoloia lakou a pepehiia ma kahakai o Waimea, a mahope mai hoi mai la keia mau moku no Honolulu no ka hoopiha lako ai ana a holo loa aku no Kaleponi.

            Ma Kailua i noho ai o Kamehameha no ehiku makahiki, a mahope mai i make ai oia ma ka la 8 o Mei, 1819, i ke kanawalu-kumamalua makahiki o kona ola ana, me ka mau no o kona hilinai ana maluna o na oihana kahuna kahiko o Hawaii nei.  Ua oleloia nae, i ke kokoke ana ona e make ua lohe ae la oia i na hana misionari e lawelaweia ana ma na mokupuni Society (Nuuhiwa ma), a ua ninau ae oia i na mea e pili ana i ka hoomana kristiano, eia nae aole he mea i hiki ke hoike aku iaia no ia mea.

            Ua hoohui ae oia i keia mau paemoku a lilo i hookahi, malalo hoi o ke aupuni hookahi, a kulai aku i na mana aupuni liilii ame na kaua hookahe koko, a hoomakaukau iho hoi i ke alanui e komo mai ai ka pono Kristiano.  O kona mau hemahema maluna no ia o na mea kahiko, aka nae ma kana mau hana ame kona ano ua kau kiekie loa ae oia maluna o na alii o kona au.

            Ua oleloia no hoi i ka manawa ana e kaama’i ana, a i ka manawa hoi i koi aku ai kona mau kahuna e mohaiia ke kino kanaka imua o na akua i mea e hooloihiia aku ai kona ola ana, ua hoole loa ae oia me kona hoike ana ae, no Liholiho ke kanaka a ua laa hoi ke kanaka no kana keiki.

            Ua malamaia ae ke kanikau ana nona e like me ke ano mau o na Hawaii.  Mahope mai ua laweia aku la kona mau iwi e Hoapili a hu-naia ma Kona Akau, a hiki no nae i keia la aole i loaa kahi i hu-naia ai ua mau iwi kapu la.

            Ma ke kauoha a Kamehameha ua waiho iho oia i ke Aupuni i kanaka keiki, oia o Liholiho a i ikeia hoi Kamehameha II; ke akua kaua hoi, Ku-kaiili-moku, ua waihoia aku malalo o Kekuokalani, ke keiki a kona kaikaina, ke Keikialii Keliimaikai.  Mamuli o ko Kamehameha ike ana aole i lawa ka ike ia Liholiho e hookele ai i ke aupuni ua hookohu ae la oia ia Kaahumanu i kahu no ke keikialii opio, a kuhina nui hoi ma kekahi olelo ana ae, me ka loaa like o ka mana iaia e like me ko ke keikialii Liholiho.

            Me he mea la o na kaukaualii ano nui o ka aina, ame Hewahewa, he kahuna nui, na komo mua ae no iloko o lakou ka manaoio ole i na kapu ame ka mana o na akua kii; a o na aliiwahine kiekie e like me Keopuolani ame Kaahumanu, ua hui like ae no me ka malu no ka wawahi ana i na hana hookaumaha.  Nolaila, i ka make ana o Kamehameha ua hiolo koke iho la na hana kahiko.  I ke kakahiaka o ka la o Kamehameha i make ai, o na alii ekolu i hiki ae malaila ua koi aku lakou ia Kaahumanu e kukala ae i ka hoopau ana i na kapu; eia nae ua manao o Kaahumanu aole i hiki mai ka manawa e hookoia ai ia mea.

            He umi la mahope o ka make ana o Kamehameha @a hoi ae la o Liholiho no Kailua, a i ka la mahope iho o kona hiki ana ua hookauia aku la maluna ona i ka mana piha o ka nohomoi ana.  Ua hanaia keia hana ma Kamakahonu, e kokoke ana i ka heiau kahiko, imua hoi o kekahi heluna nui o na kanaka ame na koa.

            Mailoko mai o ka heiau i puka mai ai o Liholiho me kona ahuula ame ka papale mahiole, e ukaliia ana hoi e na kaukaualii kiekie i aahu no hoi i ka ahuula, me ka paa ana i na kahili ame na hulumanu.

            Me ko Kaahumanu aahu no hoi e like me ko ka Moi Liholiho, ua nee mai la oia imua no ka halawai pu ana me ia, a kukala akea ae la oia ke kauoha a Kamehameha e waiho ana hoi i kana keiki i ka nohomoi me ia hoi ma ke kulana kuhina nui.  I kona hoopau ana i kona kuahaua ana, ua hoike aku la oia i kona manao e ai noa, eia nae aole i pane mai ka moi ia manao.

            Oiai o na a’o ana i haawiia i ka Moi opio e pili ana i na mea kahiko ua komo ikaika loa aku iloko o kona puuwai, nolaila aole oia i ae mai, aka kakali no oia.  Ia ahiahi no, ua kauoha aku la o Keopuolani e kina aku o Kauikeaouli a laweia ma@ imua ona i ai noa pu ai laua.  Ua ae aku o Liholiho i keia, eia nae ua malama no oia iaia iho mai ka wawahi ana i ke kapu.

            Mahope koke iho o keia ua hoi aku la oia no Kawaihae, kahi hoi ana i hoao ae ai e hoolaa i kekahi heiau, a hana no hoi ia mea hookahi ma Honokohau ma Kohalau Akau.  Ma keia mau hoao ana ua haule wale mamuli o ka loaa ole o ka aha piha a mamuli no hoi o ka nui o ka ona iwaena o na kanaka.

            I ka Moi e noho ana ma Kawaihae, ua ku ae la ma Kailua ka moku Farani “Urania,” malalo o ka noho kapena ana o Freycinet, ma ka la 8 o Augate, 1819.  Ua hookipaia aku oia e Kuakini, oia no hoi o Kiaaina Akamu, a malamaia ae la he mau aha ma ka aina.  Ma ka la 12 haalele aku la oia ia Kailua a holo ae la no Kawaihae, kahi hoi o ka Moi ame ka hapanui o na kaukaualii e noho ana iloko o ka ahaolelo, a hoohala iho la he mau la malaila me ka launa maikai ana me na lii.  He haole Farani ma ka inoa o Jean Rives ka mea nana i mahele ae i ka olelo.

            Oiai e like ole ana o Kekuaokalani, a e kau ana hoi na ao omamalu o ke kaua kuloko, ua kaheaia he ahakuka a noho ae ua aha la ma ka la 14 o Augate, a ma ua aha la i hoike ae ai o Kapena Freycinet, oiai o Beritania ame Farani ua hui ae ma ke ano he mau aupuni hoaloha, noilaila ua makaukau oia e kokua aku ia Liholiho ma na ano apau.  Mahope koke iho o ka noho ana o keia aha, ua noi ae la o Kalanimoku e bapetizoia oia, a ua hookoia keia noi mamuli o kona bapetizoia ana iluna o ka moku “Uranie” e Abbe De Quelen, ke kahunapule oluna o ka moku.

            I kekahi la ae ua holo ae la ua moku nei a ku ma Lahaina, kahi hoi a Kapena Freycinet i kukulu ae ai i keena kilo, ma kahi e kokoke ana i ka halepohaku o ke ‘lii.  Mahope o kona hoopiha ana i kona moku me ka lakoai ame ka wai ua holo loa mai la oia no Honolulu ma ka la 26, a malamaia ae ke kipu aloha ana me ka papu o ka aina.  O Boki, ke kaikaina o Kalanimoku, oia ke noho ana i kiaaiina no Oahu.  I ka lohe ana o Boki i ka bapetizoia ana o kona hanaumua, ua noi ae la oia e hookoia ia haawina maluna ona, a ma ka la 27 ae ua bapetizoia oia iluna o ka moku.

            Mahope mai ua hoouna hou no o Kaahumanu e kiiia o Liholiho, me ka hoike pu aku ua makemakeia oia e holo mai no Kailua i hoopauia ai na kapu o ka wa kahiko, a e like me ke kono a kona makuahine, ua hooko iho la o Liholiho a kau ae la oia maluna o na waa me kona mau hoahele a holo aku la no Kailua.  Elua la i holoia ai e lakou, a ia mau la ua inu iho la oia me kona mau hoa a ona loa, a ma ia hana ana a ka Moi ua uha’i iho la oia i kekahi mau kapu kahiko.

            Iaia i hiki aku ai i Kailua, loaa aku la iaia he ahaaina nui i hoomakaukauia nona, a ma ia ahaaina i noho iho ai oia iwaena o na wahine ame na kane a ai noa iho la me lakou, oiai na kanaka e ku aku ana me ke pahaohao ame ka maka’u i keia hana a ka Moi.  Ua manaolana loa na kanaka e ku ana he ku-e maopopo keia i ke kanawai o na akua, a o ka lakou e kali ana oia ka ike aku i ka make mai o ko lakou moi ame na poe e ai pu ana me ia.  I ko lakou ike ana no nae aole he ino i kau mai @a hooho ae la lakou me ka leo nui, “Ua pau na kapu, a he hoopunipuni na akuakii.”

            O keia hana i hanaia e ka moi ua like no ia me ke kiola ana i ka pohakukumu o kekahi pi’o, a ma ia kiolaia ana na hi@ iho la ka hoomanakii ame na kapu no ka manawa mau loa.  Ua @ ke pu a no hoi ke kahunanui ia manao hookahi mamuli o ka @ ana o na akuakii, ua hoounaia ae na elele mai Hawaii a hoea loa aku i Kauai no ke kukala ana i ka hoopauia ana o na kapu a e ai noa na mea apau.  Ua ae mai o Kaumaalii i keia me ka hauoli, a malamaia ae la he hauoli nui ana ma ia mokupuni apuni, me ka malamaia ana o kekahi mau anaina e hoike ana, ia manao; eia nae na kolo ke aa o keia hana mai kinohi loa mai, a e like me kona kolo ana ame kona kumu ana ua lilo no keia i mea paakiki loa no kekahi mau makaainana e hooko ai.

            Mamuli o keia hana ana a Liholiho, ua komo aku ka huhu iloko o Kekuaokalani, a hoi aku la oia no Kaawaloa.  Malaila i kipa ae ai na kahuna a waiho aku la iaia i ka nohomoi, me ko lakou olelo pu ana aku iaia i keia mau olelo naauao o ka wa kahiko: “O ke alii pono oia ke nohomoi ae aka o na ‘lii pono ole e mau auanei ko lakou ilihune.”  Ua ku koke ae la he heluna nui o na kahuna ame na makaainana ma ko Kekuaokalani aoao, a ia manawa hookahi no hoi o ka poe i lokahi like ko lakou mau manao me ko Kekuaokalani, a e noho ana ma Hamakua i kela manawa, ua lawe ae la lakou i na meakaua a pepehi iho la lakou ia Kainapau, kekahi o na kaukaualii.

(Aole i pau.)

 

[Kii]

 

KA HEIAU O KUPOPOLO

O keia kekahi o na Heiau kahiko e waiho nei ma Waialua, ame ke kii o na keonimana o ke Komite Hoeueu nana e huli nei i na mea kahiko o Hawaii nei.