Ka Nupepa Kuokoa, Volume XLIII, Number 29, 21 Iulai 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, POALIMA, IULAI 21, 1905     3

NA WARENA

---OPIO---

ILOKO O KA ENAENA O KA

LUKUWALE.

He Moolelo o ka Lukuwale Ana ia o na Pele-

kane ma Inia.

MOKUNA IX.

PAAPIO A PAKELE MAMULI O KE KIKA.

"He poe kamahao maoli no na Pelekane," wahi a ua alakai nei i hooho ae ai iaia i wehe ae ai i kona ipupaka mai kona waha ae, a kahikahi iho la i kona umiumi.  I ka manaaw pokole i holopapa aku ai ua meahou nei i na koa apau ma kahi o na kaukani ka nui a nui ino ko lakou mahalo no na hana ku i ke aloha a na Pelekane a na ia mea no hoi i hooakakuu mai i ka ikiiki o ka huhu no ka lilopio ana o ke kakela.

A me ka hooka'ulua ole hou iho ua holo aku la na koa no ke kauhale o Ouode no ka hooiaio ana ina ua pahemo io na Pelekane, a hookui aku la no hoi lakou me na koa Inia make o lakou e mokaki ana ma ka puka-pa, a i komo ana iloko o ke kauhale, he mea oiaio ua lele ka manu, ua haalele na Pelekane i ka punana.  Alaila hoi hou mai ka inaina me lakou a he ekolu kaukani koa kaulio i uwa ae ai me ka leo nui a uhai aku la mahope o na Pelekane, aka o ka hora eono ia o ke kakahiaka, a he mea maopopo loa ua kaawale loa na enemi o lakou.

A no ke alakai hoi aole oia i komo pu aku iloko o keia uhaiaholo o na koa ona, no ka mea ua pau ae la kona makemake a o kana wale no i kauoha aku ai oia ka wehewehe ana i na haleole o lakou a e hulihoi aku i ko lakou wahi i Bitari, eia nae, oia no ka i hoi aku i ukaliia e kona mau ukali ponoi maluna o na elepani nunui.

No Warena ma hoi aole o lakou maka'u ana i koe oiai ua mamao loa e hiki ole ai lakou e loaa i na Inia e uhaiia aku.  Malia e hui aku lakou me na enemi hou aka ua maha ko lakou poe lio a ua hoi hou mai ka ikaika alaila ua lawa ka ikaika no ke kupale ana no lakou iho.

O ka poe i loaa aku ai ia Warena ma i Bitari oia o Mr. Hatafoda, he hope komikina me kana wahine ame na kaikamahine elua a laua; o Mrs. Piakona ame kona kaikaina ka wahine mare mua a ka lunakanawai o Bitari, ka mea i hala e aku mai Inia aku mamua o ka ulu ana o ka lukuwale, Kapena Hapa ame Kukanele Iona.

O na koa Inia kaulio aole o lakou ka poe i hoopoino i n amakaainana Pelekane o Bitari, aka o na Inia e ae a koa wawae i hoomaluia e na alakai Sipoe, oiai na lakou i kiki wale aku i na wahine Pelekane pau pu me na kamalii ame kekahi mau kane mahope iho o ka hakoko ana a pau pu na hale i ke puhiia i ke ahi.  Eia nae ua pakele aku no kekahi poe ma ka holo ana maluna o na lio a maluna o na kaa a i ka loaa ana i na koa o ke alakai o ka papu o Bitari ua hahaoia kahi o lakou iloko o ke kakela ma ke ano he poe pio e like me keia poe i loaa iho ai ia Warena ma he poe i manaoia e ke alakai e lawe loa i Lukanao.

Ma keia manawa ua holopapa ae la ke kipi apuni ka aoao akau o Inia ame ka hapawaena, a o na kulanakauhale o Lukanao ame  Kanapoa na kikowaena--na wahi i komo nui ai na Inia a lilo i poe koa kipi, a o na kauhale o Bitua ame ke alakai o ia wahi o Mr. Nana ka mea i noho hoaloha me na Pelekane no na manawa loihi mamua, ua huli aku la oia me na Inia kipi ona a hookahi ke ku-e like ana.  A o, Sir Huila ame kona mau aliikoa kakaikahi ame na wahi koa Pelekane nuku ona aia maluna o lakou ke ko'iko'i o ka malama a kupale ana i na wahine ame na keiki he nui ma kahi o ewalu haneri ka nui e ku-e aku ai i na kaukani o na koa Inia i hoolawa pu ia me na pukuniahi, he hoike ana hoi i ka nawaliwali maoli o ke kulana pale a puuhonua hoi o keia poe wahine ame na keiki.

Mahope iho o ka hala ana he kanakolu mile ia Warena ma ua hoomaha iho la lakou ma kekahi wahi luakini Inia ano nohaha ma ka pii ana mai o ke alaula o ke ao.  He hale keia iloko o kekahi ululaau kanuia he wahi mamao mai ke alanui nui aku, a kahea ae la o Mekia Warena i ahakuka kahi i akoakoa ae ai kona poe aliikoa, no ka noonoo ana a hooholo i ke ala kupono a lakou e nee ai oia hoi e nee anei lakou no Kanapoa a i ole no Agara, a i ole e hui aku me an koa e noho la i Alahabada.

A ma ka noonoo akahele ana ua hooholo iho la lakou e nee i Kanapoa kahi hoi a Sir Huila e hoomoana ana a o kahi no hoi ia aole i ikaika loa na ku-e o na enemi e like me ka lakou hoomaopopo ma na mea i loaa mai.  Ua loaa pu no hoi ka manaoio i ka haawipio ole aku o Sir Huila a koe wale no paha ka nele o lakou i ka ai a he hoopoino a hoonawaliwali wale ana aku no ia ia lakou ina e hui aku ana keia poe waha lehulehu ke kumu e pau koke ae ai ka ai, a maluna o ia noonoo ana i loli ai e nee loa aku o Alahabada me ke kipa ele aku i Kanapoa, aka e kipa aku kekahi a hoouna leta aku ia Sir Huila aole e haawipio, a e hooikaikaia ana i mau kokua hou nona ma na mea ai pau pu me ona koa hou.

O Kanapoa ke kulanakauhale aia ma kahi o kanaha mile mai kahi hoolulu aku o Warena ma a ano like aku no ka mamao o Lukanao mai o lakou aku ma ke kukulu like ole nae; a ia lakou i hookuu ai e hiamoe a moe kahela ana iluna o ka honua ua hiki ia lakou ke lohe pono i na halulu kani o napukuniahi i kahi mamao loa, eia nae aole e hiki ke hoomaopopo mahea la kahi o ia kani pu, a ma ka hoonohonoho ana ua loaa iho la ka hoomaopopo he ki pu ia no Kanapoa, oiai o ka la 25 ia o Iune a i ka la 30 o ia mahina i hoomaka ai ke kaua ponoi ana o Lukanao.

Ma ka hora eiwa o ke ahiahi o kela la ua-nee hou aku la na puali o Mekia Warena a hala kekahi manawa ua hoea aku la lakou i kekahi kauhale a ma ka ninaninau pono ana i na kanaka pakahi o ia wahi i loaa ai ka ike aole he mau puali nunui o na koa Inia i maalo ae ma ia mau wahi a mamua o ke ala a lakou i manao ai e nee, a ua loaa pu no hoi ia lakou ka ike aole he poe olaila i komo i ke kaua, aka e liuliu ana no nae no ka ma-ki ana no Kanapoa ame Lukanao.

Alaila haalele iho la na koa Pelekane ilaila a nee aku la no mua me ka puiwa nui o na kamaaina o ia wahi i ka hoea ana aku o kekahi pualikoa Pelekane a maihea mai la a e hele ana la ihea, aohe maopopo, a o ka mea i hoopuiwa loa aku ia lakou oia ke kana ole ia ana mai o lakou kamaaina, a ma keia nee ana aia o Dike Warena ame Nede Warena mahope loa o na puali ma ke ano kiai, i mamao loa nae mai ka hapahope o na puali ma kahi o elua haneri i-a.

A hala hookahi hora a oi o ka hele ana a ia lakou i komo aku ai iloko o ka ululaau maaloalo ae la kekahi poe he la mai ka hoonua ka pii ana ae.  I ka manawa koke no ua loaa mai la o Nede Warena i kekahi puupuu ikaika me he la he paukulaau i uhauia mai a haule ana oia mai kona lio aku a waiho ana iluna o ka honua.  A no Dike Warena hoi ua paa koke mai la oia a piha ana kona waha i ka hoopihaia me ka lole mamua o ka loaa ana iaia o ka hoomaopopo i ka poino i hiki mai maluna o laua.

Ua wa-hi koke ia ae la laua me ka loke a laweia aku la, eia nae, aole i maopopo ia laua kahi e laweia nei, oiai nae aia laua ke hoomaopopo la i ko laua ka'ika'iia no kekahi wahi ame ka awiwi no hoi ko laua laweia ana.  No Dike ua nui ino kona hoomaikai i kona hoomaopopo ana iho aia no kona kaikuaana ma kona aoao oiai laua e laweia ana, ame ka maopopo ana iaia aole i poino kona kaikuaana koe wale no na palapu i kau aku maluna ona mamuli o kela uhauia ana.

A i ka hiki ana o keia poe kimopo i kahi a lakou i makemake ai na hookuuia iho la na malihini a i ka weheia ana o ko laua mau uhi poo ua pana like ae la ka olioli iloko o na opio a elua i ka ike ana aia laua ke ola nei a pili like ana no hoi, alaila kupu koke ae la ka iini nui e mahuka ma ka manawa e loaa ai ka wa e hooko ai.  Alaila nakiikiia ae la ko laua mau kania-i me na kaula, a hookauia ae la maluna o ko laua mau lio, ame ua poe kimopo nei ma na aoao o ua mau paahao nei ua holo aku la ua poe nei iloko nae o ka ululaau.

Ma kahi paha o ka elua hora o ka holo mau ana o na lio ua hiki aku la lakou ma kekahi wahi laau loloa puukiuki, a ilaila i hoomaha iho ai lakou, a emoole ua a koke ae la ko lakou ahi no ke kuke ana, a hookuuia ae la no hoi na paahao e noho like i hoomaha iho ai lakou, a emoole ua a koke ae la ko lakou ahi no ke kuke ana, a hookuuia ae la no hoi na paahao e noho like i hoopuniia nae e na koa.  O keia poe he poe koa Inia lakou e hele ana no Kanapoa ke kulanakauhale hoi e kani maumau ana na pukuniahi a e lohe moakaka loa ia ana hoi na kani pu ana i na manawa apau e kokoke ana ma ke ala e hiki aku ai ilaila.

Ma ko Nede makaukau olelo Inia ua loaa aku iaia ka ike i ko laua hopuia ana ma ka ulia wale no, no ka mea, e ai ana ua poe nei i ka manawa o lakou i lohe ai i ka halulu koekoele wawae lio, a ma ka lohe ana i na olelo haole i hoopukaia e na koa kaulio i maalo ae ai ua pee malie loa iho la lakou a ma ka hala ana o na puali holookoa ua manao ae lakou ua pau loa aole he poe i koe a ala ae la lakou mai ko lakou wahi i pee ai a oia no hoi ka manawa, i oili ae ai na opio Warena a loaa paapio ai, me ka hoopaa ana iho i ko lakou manao e lawe i na paahao i Kanapoa i haawi aku ai lakou i ka Emepera ka mea e loaa ai ko lakou uku.

"Aole he waiwai o ka paio ana," wahi a Nede i pane aku ai i kona kaikaina.

"Pela io no i ka nana aku," wahi a Dike.  "Ke manao nei wau o kela mau koa e noho mai la ua hoonohoia laua i mau kiai no kaua.  Aole anei ou hoomaopopo aku i na pu a laua ua makaukau mua no ke ki ana i ka wa e hoao ai no ka holo ana a hana paha i kekahi mea e ae."

A i ke akakuu ana o na mea apau a moe lolii mai la na koa Inia a koe na koa kiai paahao, a oiai nae ua kali aku laua o ka hiamoe mai o na kiai o lau,--a hiki wale i ka aneane ana o laua e hiamoe, loa oia no ka manawa i owe ikaika mai ai ka laau a pa-hu ana kekahi mea ikaika nui kokoke ia lakou,--a he uwa ana o ka maka'u nui mai na koa Inia mai, me ka uwo nui ana hoi mai ka hapanui ae a puehu liilii ae la lakou apau e holo ana i pakele mai ka poino mai.

A o keia mau mea apau na kekahi nui ia, a iloko o kona waha he koa Inia a o kekahi wawae mua ona e umiipaa ana i kekahi Inia me ka nunulu o ka huhu nui e loheia aku ana mai ua holoholona weliweli nui nei--a no lakou Inia hoi ka holo ua holo pu aku la no hoi na paahao opio me ka mama nui a pakele aole wale mai ka waha mai o ke kika nui aka ua pakele pu laua mai ke ano paahao na na Inia, a wahi a laua ua oi aku ka make iloko o ka waha o ke kika mamua o ka make hoomainoino a na Inia.

A i ko laua kaawale loa ana, o Dike ka mea o laua i olelo mua: 

"Heaha la ka kaua hana kupono e hana ai, no ka mea aole e nalo kaua mai ke komo mau ana i keia mau aahukoa?"

"E pono no kaua e hooikaika a mamao loa mai kahi aku o na maka kanaka i ole ai e ikeia kaua me keia mau aahu, a oloko no hoi ia o ka ululaau.  A iloko o ka manawa kupono e haawipio ai kaua ia kaua iho iloko o ka lima o kekahi kamaaina aloha hoakanaka."

A hala paha ka umi minute o ka laua hoomau ana e hele lihi ana i ole e hui me an ilio a ua kamaaina a lilo i mea aoa na lakou e nele ole ai hoi ka puiwa o na kahu, a ma ka aloalo ana ua hiki aku la laua ma kekahi pa kiekie.

"E hooholo kaua e kuaana e lele iloko o keia pa kiekie oiaia he nui na laau lolao oloko nei, no ka mea aole kaua e loaa ina e hele huli na Inia maanei, oiai he manao ko'u aole lakou e nana ana iloko o keia pa."

"He manao pono kena au e Dike, a o ko kaua hooko koke aku oia no ka holo pono o ka papahana, a he haawi ana no hoi ia ia kaua i manawa hoomaha ke looa ko kaua wahi e hiamoe malu ai."

A ma ka hele nana ana mawaho o ua pa kiekie nui nei ua hiki aku la laua ma kekahi kumulaau nui i kokoke loa i ua pakiekie nei a malaila laua i pinana aku ai a poholo ana iloko o na pa nei me ka ike ole ia.  Iloko o keia pa e ulu ana na laau maikai a he nani ka malama pua, a aia he halepohai e ku kokoke ana i uluia e na pua apuni a malalo o kekahi o keia mau o-pupua i haule aku ai laua a emoole i pa'uhia ai i ka hiamoe, a aia ke ala ana i ka auwina la, ma ka puiwa ana o laua i ka akaaka leo o na wahine.

"Auwe no hoi e!" wahi a Nede i hooho ae ai, "eia kaua iloko o kahi o na wahine."

Iloko o ka manawa pokole loa i ike koke aku ai laua i kekahi poe wahine iwaena o lakou he wahine opio u'i a oia no hoi ka wahine ano nui ma kahi o iwakalua-kumamalua a ekolu paha makahiki i aahu ai me ka lole nani i uhi nae i kona poo me kekahi uhi nani lahilahi.

"He wahine Hinedu oia." wahi a Nede i hawanawana aku ai ia Dike, "laki maoli kaua."

Pili kokoke loa i ka wahine opio u'i e ukali ana kekahi wahine oo loa a ano luahine, a i ka nana aku o na opio ua hiki ia laua ke ike iho oia ka hoakuka o ka wahine opio, a o na wahine e ae he poe opio wale no lakou aole nae e hala ka ike i ko lakou ano--he poe hoahele a ukali paha.

"A ua manao oe e Ahaba," wahi a ua wahine opio u'i nei, "he mea pono ia kakou e haalele iho i ko kakou home nei a e hele aku i Kanapoa iloko no o keia wa wela nui."

"He mea pono e hookoia pela e ka Mea Kiekie." wahi a ka wahine nona ka inoa Ahaba a ka wahine opio i puana ai; a oia no hoi ua wahine oo ano luahine nei.  "He nui ke kanalua o keia poe Mahomeda a no ia mea i koi mai ai lakou ia oe e hoi aku ilaila a noho pu me ka hoouna pu ana i kou poe ponoi e hui pu ma ke kaua ku-e ana aku i na Pelekane."

A kulou iho la ka wahine opio me ke kaumaha nui.

"Ua oleloia," wahi hou a ka wahine opio, "a ke olelo nei lakou he nui na wahine ame na kamalii Pelekane ilaila a he uuku loa na koa Pelekane e kupale nei no lakou."

"Pela," wahi a Ahaba, "eia nae he poe wiwoole loa na Pelekane."  O na koa o Moi Nana ame kona poe kahiko, ua heluia lakou he kanalima i ka akahi koa Pelekane wale no, a ke kani mau nei na pukuniahi a lakou (Inia) i ke ao ame ka po eia nae aole he hookahi iniha o ko lakou kahua i ku ai i malele aku mai a lakou aki."  "He poe haku na Pelekane," wahi a ke aliiwahine opio i hoomaopopo aku ai.

(Aole i pau.)

MAKAIKIU

PETERIKA MAFE.

Ke Kolopa Uneune i  na Nihiliti,

Ka Hoopakele o ke Duke Kiekie.

MOKUNA XIV.

HAKANESA.

"Ke maopopo loa nei no anei ia oe aole he kanaka i hiki mai nei ianei?"

"Aole wau i ike i kekahi kino kanaka."

Noonoo iho la ka makaikiu no kekahi manawa.  Me he mea la aole io no paha he poe oloko o ua hale la i ka manawa ana i kipa aku ai, no ka mea ina ua loaa aku ua uiia pakalaki i ke kanaka loea mahope o kona haalele ana aku i ke Kiekiena o Hobokena, alaila aole io no e loaa iaia ke kaaahi mamua iho o kela a ka makaikiu i holo mai ai no Hakanesa.

"Ina no hoi ua kau pu mai oia kela kaaahi nana i lawe mai nei ia'u, alaila ua nui ka manawa nona e hoi mai ai," wahi a ka makaiiu i noonoo iho ai.

"Heaha la ka hopena i loaa aku nei i ko kaua lio ame ke kaa?" wahi a ka makaikiu i pane ae ai

"Malia paha ua hoi aku nei no i ka halelio," i panai mai ai kona kokoolua.  "He mea pono ia'u ke hele aku e huli."

"O kaua pu no ke hele aku," wahi a ka makaikiu.  "Aole ke kanaka loea i kauhale i keia manawa, a ina aia io no oia ilaila, aole ona makemake e wehe ae i ka puka nou.  Mai hookaumaha i kou noonoo no ke kaa ame ka lio; na'u ia e uku ina he mau pilikia kekalo."

MOKUNA XV.

KA POKOKI ELEELE A KE KANAKA LOEA.

Loaa aku la ia laua ka lio ma kahi he hookahi mile mailaila aku.  He mea oiaio ua pau ka puiwa o na lio la mahope o kona holo piena ana, a ua hele malie aku oia me ka loaa ole o kekahi poino i ke kaa.

Kau ae la laua iluna o ke kaa a hoi aku la no Hakanesa.  Ia laua i kaalo ae ai ma ka puka-pa o ke kanaka loea, ike aku la o Peterika i ka a mai o ke kukui o ka hale o ua kanaka loea la.

"E kii mua ana wau ia oe mamua o ka loaa ana ia oe he manawa, e mahuka aku ai i ke kakahiaka," wahi a ka makaikiu i pane ae ai iaia iho no.

E like me ia a ka makaikiu i manao ai ua kauoha aku la, oia i kona hoa e kaohi mai i ka lio, a iaia i lele aku ai ua kauoha aku la oia e hoi loa aku kona hoa.

"E ike hou no wau ia oe i ke kakahiaka," wahi a ka makaikiu i pane aku ai, "aka ina wau e lohi loa ana, e lawe aku i keia a uku aku i ka ona o keia kaa ame ka lio, a o ke koena iho e lawe oe nou iho."

Me keia mau olelo, haawi aku la ka makaikiu i kekahi bila dala i ke kanaka malama halekuai, a hoomaikai mai la no hoi ua kanaka la.

Huli aku la ua makaikiu nei a kaua a komo aku la iloko o ka pa, a hele loa aku la no ka hale o ke kanaka loea, a iaia i keehi aku ai i ke anuu alapii mua loa o ka hale lohe hou aku la no oia i ke kani ana o ka bele e like no me kona wa mua i hiki ai ilaila.

Aole i kekeke koke aku ua makaikiu nei i keia manawa, aka kali iho la oia no kekahi manawa, ame kona manao ana e hele mai ana ua kanaka loea la a wehe mai i ka puka.  I ka hala ana no nae o ka manawa a ka makaikiu i manaoai, ua kikeke aku la oia e like me ke kikeke ana a a poe Nihiliti.

Mahope koke iho o ka pau ana o kana kikeke ana, aia hoi lohe aku la oia i ke pahupahu mai o na kapuai wawae o ua kanaka loea la maloko mai, a aole i liuliu iho lohe aku la oia i ke panaia ana ae o ka laka, a hamama hapa ae la ka puka.  O Loea Malabere no ka i kiei mai iwaho, aole no nae me kela hoonalonalo a ka makaikiu i ike ai iaia e hele ana mawaena o na Nihiliti.  Mamuli o kona wehe ana i kona hoonalonalo, ua kilo pono loa aku la ka makaikiu a ike pono iho a he kanaka aoo keia, me kona lae puu, alauoho eleele hoi.  O kahi kulike wale no a ka makaikiu i ike aku ai oia no kela mau maka poopoo ona.

"Owai keia i makemake mai nei ia'u?" i ninau mai ai na loea la.

Ike koke iho la ka makaikiu o keia kekahi o na ninau i maa i na Nihiliti, a he mea pono e loaa koke aku ka haina.

"Ina no hoi aole i make o Petero," i noonoo iho ai ka makaikiu, "ina no hoi ua ninau aku wau i ka pane kupono no keia mea."

Oiai aole i makaukau ka kaua makaikiu me ka pane kupono, nolaila aole oia i hoao ae e koho wale aku; aka pane aku la oia me ka leo malie:

"O Loe Melebere ane keia?"

"Ae," wahi a ua loea la i pane mai ai.  "Heaha kou makemake?"

"He makemake ko'u hana mai oe i kekahi hana no'u." i pane aku ai ka makaikiu, "oia hoi e hoomakaukau mai oe i kekahi mea hoohuihui akeakamai a'u i makemake ai e loaa koke mai i keia manawa."

"Owai kou inoa?"

"E kapa mai oe ia'u o Keakasona."

"He manawa kupaianaha loa keia e kipa ai e ike i kekahi kanaka, e Mr. Keakasona."

"Aole ia he kupaianaha mamua o ka'u hana i makemake ai, e ka loea."

I kela manawa a laua e papaleo ana aole i hala ae na maka o ua loea la mai ke kau pono ana maluna o ka kaua makaikiu.  Me he mea la e noonoo ana ua kanaka la ina paha ua kupono nona e ae aku i keia kanaka malihini e komo aku iloko o kona hale.

Mamua o kona pane ana mai, na hoopuiwaia ka makaikiu mamuli o ka oili hikiwawe ana mai o kekahi popoki nui eleele a kau ae la maluna o ka poohiwi o ua kanaka loea la.  Mamuli o ka palamimo loa o ka lekei ana ae o ua popoki la a kau iluna o ka poohiwi, ua like iho la ia ma ko ka makaikiu noonoo ana iho he uhane na popoki la i iho mai ka lani mai.

Kau iho la ua popoki la maluna o ka poohiwi me kona poo e hoopili ana i ka pepeiao o ua loea la, a e aa mai ana hoi kona mau maka me he diabole la i hoohanaia e keia kanaka loea no ka hoike mua ana aku iaia i ka poino e hoea mai ana.

I ka hala ana ae o keia mea hoohikilele i ko ka makaikiu noonoo, ua pane aku la oia:

"Maikai maoli no kena popoki au."

Aole i onioni ae ua loea la i keia manawa; oiai ua kamaaina oia i keia hana a ua popoki nei.

"E komo mai iloko nei." i kono mai ai ua loa la.

Wehe ae la ua loea la i ke kaulahao mai ke pani-puka @e a ha-