Ka Nupepa Kuokoa, Volume XLIII, Number 26, 30 Iune 1905 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA  KUOKOA,  POALIMA,  IUNE 30, 1905.    @

 

   NA  WARENA

  - OPIO -

  ILOKO O KA ENAENA O KA LUKUWALE.

 He Moolelo o ka Lukuwale Ana ia o na Pelekane ma Inia.

 

   MOKUNA VII.

KE KULANAKAUHALE O DELI.

 

 Me ke kali hou ole aku ua kani koke ae la na o-le-hoike lanakila no na Pelekane a akoakoa koke ae la lakou apau i kahi hookahi, a ia manawa no hoi i puka mai ai na wahine haole ame na kamalii haole i hoopaaia iloko o ua wahi nei a hui pu ae la me na koa ke kumu i loaa ai ko lakou puuhonua no ka manawa mua loa, a o ka lanakila ana no hoi ia o na Pelekane.

 "O keia ana ko kakou kahua," wahi a Mekia Warena i hooho ae ai, a no elua a ekolu paha la a kakou e noho iho ai ianei, a ua hiki no hoi ia kakou e ku paio aku i na enemi oiai, he nui na pu ame na poka i koe iloko o keia mau papu ame na mea ai pu no hoi e lawa ai no ka malama ana ia kakou no keia mau la."

 A o keia mau puali o Mekia Warena i loaa ai ka lanakila o laua kekahi o na puali i piha loa i ka olioli no ka lanakila kamahao loa i loaa a hui pu ia hoi me ka hoopakele pu ana i na wahine ame na kamalii i makemakeia e hoopoino, a iloko no hoi o keia hui ana mahope iho o ka hoonohonoho ana i na koa no ke kiai ana ua hui like ae la na mea apau - mai ka poe aliikoa maopopo ma ke kulana me na hoa a ka au like ana aole nae me na kulana aliikoa a hookahi ka pane ana he poe keonimana like lakou apau.

 Ma ka aoao o ka Mekia Warena ua lilo loa oia i mea nui i kona poe hoahele nolaila ma ka manao lokahi o lakou apau ua waeia ae la ka hale maikai loa iloko o ia kauhale a haawiia aku no ka Mekia ame kona ohana a o ka hapa iho i koe ua noho aku lakou iloko o na hale i ku i ko lakou makemake, ma ka pakolu a pa-ha iloko o ka hale hookahi.

 Alaila huli ae lakou no ka pono o na holoholona o lakou, ma ka hoohainu ana a hanai ia lakou, a i ka maikai ana o na mea apau a noho hou ka malu me he la aohe i lawelaweia he kaua ia manawa.

 I ke ahiahi ana iho ua lilo ae la ua kauhale nei i kulanakauhale malamalama mamuli o ka malamalama o na lamalama lehulehu i ho-aia, a ua lilo no hoi ia i wa o ka olioli nui iwaena o na koa Pelekane, maluna o ko lakou mau papaaina.

 I keia mau hana e nee ana a hiki wale i ka wa o ka hamau a hookuu no hoi ka luhi a waiho hiamoe aku na mea apau, aole i nele ke kukuluia o na kiai ma ka pakolu a pa-ha ma kahi hookahi a ao wale ia po aole he kanalua ana no ka maluhia i kau iho maluna o lakou apau, eia nae, aole i nele ka noho ana o ka aha kuka a Mekia Warena me kona mau aliikoa no na hana aku i koe.

 

  XIII.

PAIO  HAHANA  ME  KA  WIWOOLE.

 

 "A pehea kou manao e ka Mekia?"  wahi a kekahi o na aliikoa i ui aku ai iaia i wehe ae ai i kona ipupaka mai kona waha ae.

 "Aole no he maikai loa e Crose," i pane aku ai ka Mekia i ke kapena nana ka ninau mua.  "Aole e hiki ke hoonalonalo i ka oiaio o ke kaua ia mai; e lele mai ana lakou iloko o na kauhale apau me he mau iliohae la no ka manao no e lukuwale i ko kakou poe me ka hoomainoino nui.  Aka, ina he wahi heluna kupono nei o na koa ma ko lakou aoao e po'ipu mai ai ia kakou oiai iloko o keia wahi kauhale, ke manao nei wau aole he maka'u ana, aka ina e huliamahi mai ana lakou a oi nui hewahewa loa aku, alaila he hana puikaika no ia ma ko kakou aoao ke kupale aua a kula'i aku.  Ke manao nei wau aia ma kahi o iwakalua koe e lawa ai no ke kiai papa ana no ka aoao hookahi a eha keia mau aoao alaila e pau ana no ka hapanui o kakou, a kau iho maluna o lakou ka hana nui o ke kupale ana aku i na enemi."

 "Aka, he mea oiaio," wahi hou a Mr. Kapena Crose he mea pono no e makaala loa ia na paia, a ua manao wau he hookahi wale no a lakou aoao e paluku mai ai i ka wa hookahi, a ina pela ua hiki ia kakou ke pale aku, a oi loa ina aole a lakou mau pukuniahi aole no he wahi poino e loaa ma ka lakou hooikaika ma'uwale ana."

 "Aole e nele ko lakou lako me na pukuniahi," wahi a Kapena Wilikini, kakahi o na aliikoa o Warena - he aliikoa no Ouode i ka wa o ka maluhia o ka aina.  "O keia poe Iuia o keia wahi ua lako wale no lakou me na pukuniahi.  E like me ka lilopio ana ae nei o keia wahi ia kakou ma ko lakou kauohaia ana aku e haawipio, pela i kaa mai ai keia mau pukuniahi me kakou aka aia no he mau pukuniahi i loaa ole mai ia kakou aia no me lakou.  Ke manao nei wau. e piha mai ana owaho nei o kakou me na pukuniahi i ka po o ka la apopo a i ole i ke kakahiaka o ia la aku."

 "Alaila, aohe he pono iki o ko kakou noho hoonanea wale iloko o keia wahi a paapio mai kakou ia lakou me he mau iole la i paa iloko o na haleiole:"  wahi a Mekia Warena i hoomaopopo aku ai.  "He puuhonua keia no kakou i keia po a i ka la-apopo a ia po aku a mahope aku o ia manawa e pau ai ke ano puuhonua o keia wahi no kakou aka e lilo no keia wahi i mea hoopahele ia kakou e lilo ai kakou i poe pio.  Aka no Bitari kahi o ia poe makaainana o kakou e noho piliaiku mai nei, aole o'u makemake e haalele wale me ka hooikaika ole e hoopakele ia lakou.  Oiai nae ua haawiia mai ia'u ka mana o ka hoohana ana, aole nae e hiki ia'u ke mauna wale i ke ola o na koa."

 "Pehea ke ano o ke kakela o ia wahi e ka Mekia?" i ninau aku ai o Kapena Crose "Ua lohe anei oe i kekahi mea e pili ana no ia kakela?"

 "He hale ano huina-ha ia." wahi a Mekia Warena, "i hoopuniia me na pa manoanoa a pa kiekie no hoi.  Mawaho aku o keia pa aia no he pa hou mawaho aku me kona mau puka-pa nunui a ikaika paa.  Ua manao wale ia aia he mau pukuniahi i kukuluia ma kekahi mau wahi o keia mau wahi a he ewalu mau pukaa liilii ma ka pa maloko aku."

 "Manao anei oe e Wilikini e po'ipu mai lakou maluna o kakou i ka la apopo?" i ninau hou aku ai ka Mekia.

 "He mea maopopo loa e houluulu ana lakou i ko lakou poe koa a hoomakaukau e kaua mai ia kakou ke puka aku mawaho o keia wahi, aka ina e noho malie kakou, manao wau aole lakou e lele kaua mai i ka la-apopo; me he la nae e hooko io mai no lakou aole i ka la-apopo aka ia la aku."

 "Alaila ua manao oe he mea pono e hooka'ulua loa ole iho ma keia wahi?" i ninau hou aku ai o Warena.

 "Aole au e olelo ana i ko kakou pono e haalele koke iho i keia wahi, aka o ka'u wale no e kalele ai, oiai no kakou e nee aku imua ma ko kakou ala me ka hoohakalia ole ina ua manao kakou e alo ae i na paioia mai, oiai o ka noho loihi loa ana iho o ia no ka maopopo loa o ko kakou lele kaua ia mai.  "Manao wau eia ae ko Bitari kanaka ke hele mai nei e kaua mai ia kakou?"

 "O, aohe he kanalua ana ma ia mea no ka mea, eia io no oia ke hana nei no ka paio mai ia kakou.  No ka mea ua kukala leo nui ae oia i kona hooko mai ia hana maluna o kakou."

 "Ina pela." wahi a Kapena Danalope i pane ae ai."  oi aku ka maikai o ke komopoo mua e aku o kakou iloko o kona wahi me kona haupu mua ole mai e hanaia aku ana pela."

 "He manao maikai loa kela e Kapena Danalope," wahi a Mekia Warena i pane kokua aku ai i ka hooaiai a ke kapena. "He noonoo maikai loa kela ina e hiki ana ke hookoia.  Alaila, o ka ninau wale no oia ka pane ana i keia ninau,-E hiki anei ia kakou ke hooko aku?"

 A maluna o ia ninau a maluna o na mea e ae i noonoo nui ai ka ahakuka no ka hoomaopopo ana i na hana e hana aku ai mamua o ka hooholo loa ana i na hana e hooko ai - i ko lakou kupono no ka hooko ana ame ka ole.

 I ke ao ana i kahi la ae, a i ke kakahiaka nui okoa no i puka aku ai o Mekia Warena me kekahi poe koa ona no ke kiu ana i ka malaelae o ko lakou ala no Bitari.  A i ka hiki ana o lakou ma kekahi wahi - ma kahi o elia mile mai Ouode aku ua ike io aku la lakou i ka piha io mai owano o na papu ma kahi kokoke i ka puka.pa me na lio kanaka ame na koa helewawae.  A me ka hoohakalia ole ua hulihoi mai la kahi puali uuku i Ouode e alo ana no nae i na poka o na Inia e ki mai ana ia lakou.

 Ma kahi o hookahi mile mai ke kauhale aku o Ouode i ku iho ai kekahi puali Inia no keke'ake'a ana i na koa ame Warena pu ma ko lakou ala e hulihoi ana, aka, ua ike mai la o Kapena Kenta i keia mau hoohalua o na Inia ma ka nana ia ana mai maloko o ke anianinana ua holo mai la lakou no ka hui kino ana, a ma ia mea i haalele iho ai ua poe Inia nei i ko lakou kahua ke kumu i kaawale ai ke ala no Warena ma, aole no nae i nele ka hoolele poka mua mamua o ka haalele loa ana mai o na Inia.

 Ma ka hiki ana ae i ka hora ewalu alaila ua ikeia aku la na puali o na Inia e nee mai ana iloko o ke kauhale o Ouode, a i ko lakou kokoke ana mai ma kahi mamao kupono a lakou e hoolele mai ai i ko lakou mau poka ua hoomaka mai la ka lakou ki ana a he makawalu hoi ia o na poka e haukawewe ana iluna o na pa o ke kauhale.  Lele pu mai na poka me na uwa ame na leo ikuwa o ke kaua mai na Inia mai.

 "E haawi aku i ainakakahiaka no na lio a e makaala i ka malama pono ana ia lakou," wahi a Mekia Warena i haawi kauoha aku ai i kona poe koa, no ka mea i ka la-apopo e hookuu ai kakou i ko lakou mamaholo apau."

 A ma kahi o ka hora umi-kumamakahi i ikeia aku ai ka nee malie ana mai o kekahi mau elepani nunui me kekahi poe Inia maluna o lakou a i hoopuniia hoi e kekahi mau lio kanaka.

 "A eia ae ua poe Inia nei e like me ka'u i manao mua ai e puka mai ana me na elepani a ke manao nei wau aia kela mau elepani ke huki pu la i kekahi mau pukuniahi a lakou, a'u no hoi e manao pu nei e lawe ana ia mau pu iluna o kela ahua."  O keia na olelo a Kapena Wilikini i hoopuka ae ai i ka manawa i ikeia aku ai na elepani.  "Pela," wahi a Kapena Danalope i hooho ae ai, "a e ike ana kakou i ko lakou paani aole e loihi loa.  "Nolaila," wahi hou ana i pane aku ai nau ia Dike Warena, "e ike ana oe i ke ano o ka hoohana ana o na Inia i ko lakou mau pukuniahi e like me ke ano o ka lakou ano kaua ana.  Aole i like ke ki ana a keia poe me ko Deli poe, oiai o ko Deli poe aia ka lakou ma ke ano o ka kakou hoohana ana a ua a'oia lakou ma ia ano haawina, aka o keia poe, o ke ano kahiki no o ko lakou aina ke ano o ka lakou rula ki pukuniahi ana."

 "Aia ke nee ae la he mau elepani," wahi hou a Danalope i hoomau aku ai i kana wehewehe ana i ka opio. "e pii ana kela iluna o kela ahua, a malaila mai e ki mai ai ia kakou - o ke ahua hoi kela i anaia ai a loaa ka ike aia ma kahi o elima haneri i-a ka mamao mai nei aku, a he hiki loa hoi i na poka a ko kakou mau pu liilii ke lele ilaila, a e ike ana oe i ko lakou hoopuiwaia e ka kakou mau poka."

 Iloko o ka manawa kupono ua hiki aku la ua mau puali elepani nei iluna o ke ahua, a hoomaka mai la ua poe nei e uwa me ka leo nui, me ke kowelo ana i ko lakou mau hae, e hoike ana i ko lakou haaheo nui, a ia manawa hookahi no hoi e kani kapalili ana ka pahu liilii ame ka haanui na koa iluna o ua wahi ahua nei.

 Ma keia manawa no hoi o na Inia e hoonee nei ia lakou iluna o ke ahua, ua hoi aku la na koa apau o Mekia Warena mahope pono o ko lakou mau pale a mahope olaila i pee mai ai, he pale monoanoa o elua kapuai ka manoanoa a he umi-kumamaha hoi kapuai ke kiekie e nalowale ai no ke kanaka.  A mahope pono aku o keia pa manoanoa aia he pale manoanoa kekahi nona ke kiekie ma kahi o elima kapuai i kukuluia hoi maluna o ke ka'e, a aia he mau puka makani liilii a ma na kihi hoi he mau puo'a liilii, he mau puo'a i lawa no eha wale no kanaka e noho ai, a iloko o keia mau puo'a ame na wahi pukapuka liilii o na papu pale i hoonoho aku ai o Mekia Warena he iwakalua o kona poe koa akamai loa ma ke ki pololei kahi hoi e hiki pono ai i keia poe ki pololei e ki i na enemi me ka loaa ole mai i na poka owaho mai.

 Ma ka manawa e holo-ke ana na koa o ka aoao o ka enemi iluna o ke ahua, ua ikeia aku la ka hookaawale ana ae o na koa ame na lio ame na elepani, a kau lalani pono mai la he umi pukuniahi e huli pono mai ana na waha i ke kauhale o na koa Pelekane e hoomoana ana, a mahope koke aku no he elepani nui, a mahope aku ona na elepani e ae ame kekahi poe e ae.

 No Mekia Warena aia oia iloko o kekahi o na puo'a me kekahi alakai ona ame na keiki elua ana he mau elele hooko kauoha hoi i ka manawa e haawiia ai na kauoha no ka lawe ana a hoihoi mai i na pane.

 "Holo e na keiki," wahi a Mekia Warena, "a ha'i aku i ke kauoha i ka poe o na ale'o e ae e ki aku lakou i ka pahu oluna o ka elepani nui mahope pono o na pukuniahi, a o ka hapanui ma na puka makaui liilii e ki aku lakou i ka puali pukaa ame na elepani e ae.  E ha'i aku e ki papa lakou ame ka hoopololei loa i ole e hala, me ka ha'i aku na'u e waiho aku i ka olelo o ke ki ana.  Mai hoohakalia e na keiki no ka mea ua makemake loa wau na kakou ka papa poka e lele mua a na ia mea hoi e hoopuiwa ia lakou, ko lakou kumu hoi e pihoihoi ai a ike ole i ka mea e hoohana pono ai i ka lakou hooneekaua ana."

 I ka manawa koke no i eleu aku ai na keiki - o kekahi ma kekahi aoao a o kekahi ma kekahi aoao, a oiai aia o Makia Warena ke hakapono la kona mau maka no ka makaukau io o kona mau koa, ua ike io aku la oia i na'pu apau o na koa ona e kau papa like ana, a ia manawa no i haawi ae ai oia i ke kauoha:

 "Paea."

 Iloko o na kekona pokole loa i kani like aku ai na pu apau, a lua'iia aku la no hoi na poka me ka lele pololei ana a na wahi i makemakeia oluna o kahi ahua, a i panaiia mai hoi e ka puiwa nui o na koa o ka aoao enemi me ke kunana nui ma ko lakou aoao.  O ka elepani nui keia ame kekahi mau elepani e iho o na aliikoa hanohano a ano nui ua loaa pono aku lakou i na poke a pela no hoi kekahi poe e nonoho ana iloko o na pahu oluna o na kua o ua mau elepani nei a holo pukaka ae la lakou me ka ikaika me ka maopopo ole o kahi e holo ai a hiki ole hoi i ko luna poe ke hoomalu i na holoholona nunui, oiai hoi ko lakou mau ihu loloa e mananahele ana iluna i ka lewa me he la e hoo-na ana i wahi e maha ai.

   (Aole i pau.)

 

  MAKAIKIU

PETERIKA  MAFE.

 Ke Kolopa Uneune i na Nihiliti, Ka Hoopakele o ke Duke Kiekie.

 

   MOKUNA  XII.

 MA KE KIEKIENA O HOBOKENA.

 

 "Ina  no hoi oe e hoike mai ana i kau buke i makemake ai," wahi a ke kanaka malama buke i pane mai ai "malia o hiki no hoi ia'u ke hoike aku ia oe a hoopokoleia mai hoi kou manawa e huli ai."

 "Heaha no hoi kou mea e hookuu ole mai ai ia'u e komo aku iloko o ke keena buke me kou hookuu pu ana mai hoi i kekahi o ko oukou poe lawelawe e hele pu aku me a'u?" wahi a ka makaikiu o pana aku ai.

 Kau mai lo no na maka o ua kanaka malama buke nei me kona manao paa e hoole mai no.

 "Eia ka mea oiaio." wahi a ka makaikiu i pane aku ai, "aole no i maopopo ia'u ka'u buke i makemake ai."

 "Malia paha e hiki ana no ia'u ke kokua aku ia oe ke hoike mai oe ia'u i ka inoa o ka mea nana i kakau i ua buke la," wahi a ke kanaka malama buke i pane mai ai.

 "Ina no hoi ua loaa ia'u ka inoa o ka mea nana i kakau i na buke la aole no hoi wau e huli ana a hooluhi wale aku hoi ia oe. E nana mai ho hoi oe i keia." a ia manawa i wehe ai ka makaikiu i ka makaikiu i ka apana buke ana e paa ana a hoike aku la i ke kanaka malama buke.

 "O ko'u makemake," wahi hou a ka makaikiu. "oia ka huli ana i ka buke i pa'iia me na hua palapala i like aku ke ano me ko keia. He buke Akeakamai Hoohuihui ka buke nona keia ili, a e ike ana no hoi oe a hoomaopopo iho i ka oiaio ma keia mau hua palapala i koe iho, a he kumu no hoi ko'u o ka makemake ana e loaa ua buke la ia'u.

 "O ka mea e hiki ai ia'u ke koho aku i ka buke nona keia ili oia ke ano o ka ili buke i hanaia ai ua buke la ame ke ano o na hua kepau i pa'iia ai ka inoa o ua buke la," i hoomau hou aku ai ka maikaikiu.

 "Ma ka'u nana aku me he mea la aole he buke nona ka hua kepau i like aku me ko keia au e hoike mai nei ia'u." wahi a ke kanaka malama buke, "aka ina oe e hilinai mai ana ia'u e kokua pu aku ia oe i ka huli ana, e hele ae wau e huli i ka makou mau buke i pili i keia ike."

 "Ina oe e oluolu mai ana, alaila e hooko aku oe i kau i ha'i mai nei," wahi a ka makaikiu.

 Ua hooko koke aku la ka kanaka malama buke, a mahope o kona hala ana aku no kekahi manawa loihi, ua hoi mai la oia me kekahi mau buke a waiho iho la iluna o ke pakaukau.

 "Aole o'u manao e loaa ana kau mea i makemake ai mawaena o keia mau buke aka e nana no hoi oe nou iho."

 Aole i loihi loa ko ka makaikiu nana ana iho a ike koke iho la no oia aole i loaa kana mea e huli nei iwaena o keia mau buke.  He lehulehu o keia mau buke i humuhumuia e like me ko kela buke i hoounaia ai no Rusia, aka nae aole loa iwaena o lakou he buke a ka makaikiu i manao ai ua loaa kana mea e huli mai ai.

 "Aole anei he keena waiho buke hou aku no kekahi mawaho ae  o keia?" i ninau aku ai ka makaikiu.

 "E hele paha oe e hoao ma ke Kula Nui o Kolomebia," i panai mai ai ua kanaka malama buke la.

 Haawi aku la o Peterika i kona hoomaikai nui a haalele iho la i ua hale la.  Aia ke Kula Nui o Kolomebia ma kahi mamao aku mai ke kulanakauhale aku, a ma kahi hoi ana e hele nei aia no he mau halekuai buke liilii, nolaila ua hooholo iho la oia e ho'ao i keia mau halekuai.

 Me kona hoike maoli ole aku i kona manao ua hoike pakahi aku la oia i kela ame keia kanaka malama halekuai buke i ka ili o ka buke ana i makemake ai, me kona ninau pu ana aku ina paha aia me lakou kekahi mau buke i pa'iia i like aku na hua kepau me ko keia ana e paa nei.

 He meamakehewa ia kana ka uhai loloa ana iloko o keia mau hora loihi a ko kaua makaikiu e huli hele nei i kana mea i makemake ai, aka he mea pono ke i ae maanei, mahope o kona hoomanawanui ana i ka huli ana no kekahi manawai loihi, ua loaa aku la iluna o kahi waiho buke o kekahi o na halekuai buke kahiko he buke e kau ana na hua paiapala@ "Chemistry" i kulike loa aku na hua kepau me ko keia ana a paa nei.  O ka inoa piha i loaa aku iaia oia keia

 

 NA MEA ANO NUI O KE AKEAKAMAI  HOOHUIHUI

  Melebere.

 

 "Ke manao nei wau o keia kau buke e makemake nei," wahi a ke kanaka o ka halekuai buke i pane mai ai i ka makaikiu.

 "He like ole no nae hoi ke ano o ka humuhumu ana" i pane aku ai ka makaikiu.

 Maanei i hoohalikelike iho ai kahi kanaka helekuai, a pane mai la oia:

 "He oiaio kau i olelo mai nei; eia nae o kau buke no keia e huli nei.  He elua manawa i pa'iia ai keia buke.  O ka humuhumu ana au e ike la ma kau apana ili buke e paa la oia ka buke mua i hoopukaia ai, a o keia nei ka lua."

 Kuai iho la ua makaikiu nei a kaua i ua buke la, a no kona piha hauoli i ka holopono ana o kana huli ana aole oia i wehewehe ae i ua buke la a nana hoi i na mea i palapalaia iloko ona iaia iloko o ka halekuai, aka puka aku la oia iwaho, a iaia e hele ana i wehe ae ai oia i ua buke la a heluhelu iho i ka inoa o ka mea nana i kakau.  O keia iho na huaolelo ana i ike ai:

 "Akamu Melebere, Loea Akeakamai, Kula Nui o Hakanese, Nu Ioka."

 "Ka, aole wale no keia kanaka a he loea, aka oia kekahi mea i pili i kekahi kula kiekie," wahi a ka makaikiu i puana malie ae ai.

 Ua kahaha loa ia ka kaua maikaikiu i kona ike ana i kekahi kanaka i kau ma kekahi anuu kiekie loa iloko o ke Kula Nui o Hakanese, e like hoi me kela kanaka loea e hui nei me na Nihiliti, kona komo pu ana a hana pu i na hana a na Nihiliti.

 "Ua pupule ia paha keia kanaka loea," wahi hou a ka makaikiu i puana ae ai.

 Po'i ae la oia i ka buke, alaila hoi aku la no kona home, a ia manawa no hoi i hoomakaukau iho ai oia i kana papahana e hui aku ai me keia kanaka loea, a iaia e hoi ana ike aku la oia ia Valadimea e ku ana ma ke alanui helewawae.

 I keia manawa e hele nei ua makaikiu nie a kaua, aole oia ma kela kulana kanaka Geremania a kaua i ike ai, aka aia oia ke hele ia e like no me kona ano maoli.

 "Ke kiai nei paha keia Valadimea ia'u." wahi a ua makaikiu nei i puana ae ai. "hoao ae hoi wau i maopopo ai ia'u kona makemake."