Ka Nupepa Kuokoa, Volume XLIII, Number 24, 16 June 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

                        NUPEPA KUOKOA, POALIMA, IUNE 16, 1905.                    @

 

NA WARENA

OPIO

ILOKO O KA ENAENA O KA

LUKUWALE.

He Moolelo o ka Lukuwale Ana ia o na Pelekane ma Inia.

MOKUNA VI.

 

NUI NA ALALAI MA KE ALA.

 

            A hala no hoi ka hora mahope ino o ka liuliu ana aia hoi ka huakai a Mekia Warena i ke alanui aupuni e hiki ai i Deli ke nee la ame na hiohiona olioli o ka lanakila na koa ma ko lakou ala, mahope iho o ka hoomanawanui ana i na alakai a lanakila no hoi.  A mahope iho o ka hala a na he eha la mai ka manawa i haalele ai na koa Pelekane ia Miruta ua komo hou aku la lakou me ka mea@ a n@i ino ka olioli o na hoaloha.  A o na wahine opio ua hoonoho pu ia aku laua me kekahi hoaloha o Mekia Warena, he kamaaina nohopaa no Miruta.

 

MOKUNA VII.

 

KE KULANAKAUHALE O DELI.

 

            Aole paha he aupuni ame ka lahui i komopoo aku iloko o ka poino o ka lukuwale oi ae mamua o ke aupuni ame ka lahui o Pelekane i kukuluia iloko o Inia mamuli o ka ulu ana o ke kipi ikaika iloko o na lina Sipoe a laulaha loa aneane e puni ka aina aka ua holopuni loa ma ka hapa akau o Inia me na Sipoe kipi, a he mau la make wale no ia no na Pelekane, aole ma ke ano kupono aka ma ka lukuwale ana.

            A oiai o ke kulanakauhale o Deli ke kikowaena o ka ikaika o na Sipoe a oia no ke kikowaena o keia kipi a lukuwale, alaila ua hoohala ole na Pelekane i ka nee ana ilaila, i mea e ike mai ai na Inia aole ka he manao haawipio ka na Pelekane, a o ka aa ana aku o na Pelekane i ke kikowaena o ka ikaika, oia hoi o Deli, oia auanei ka mea e malani wale mai ai na wahi e ae o na Sipoe i ikaika maoli ka hoouka kaua ana.

            Nolaila ua liuliu koke ae la na Pelekane ma ka houluulu ana i na puali apau, a oia no hoi ke ahiahi o kahi la ae a na pualikoa uuku o Mekia Warena i komo hou ai iloko o ke kahua hoomoana o Miruta a hoomaka no hoi ko lakou nee ana imua a no Deli ka pahuhopu.  Eia nae, ma ke ala he umi-kumamalima paha mile mai Deli mai, i halawai ai na Pelekane me na enemi, a ma kekahi wahi kulanakauhale, a ma keia wahi i hoomaka mua loa ai ke kaua maoli o na aoao a elua a hui kino no hoi.

            Ma ka hoomaopopo ana aole keia hui mua ana he kaua ano nui, aka, o keia kaua ana ka mea nana i kaomi mai i ka lukuwale ana o na Inia, a o na hana o ia ano i hookoia mamua, iho aole i maalahi ka lawelawe ana a ua poe Sipoe nei mahope mai.  Ma ka aoao o na Sipoe ua nui loa ko lakou hilinai i ka wa kinohi, na lakou ana ka lanakila o ka la, oiai ua maopopo loa ua nui hewahewa ino loa na Sipoe a he uuku loa na Pelekane, a mawaho ae o ia he mau pukuniahi nunui ka lakou i oi a he mau pukuniahi liilii iho ka na Pelekane a huiia me na makaukau e ae o ua poe Sipoe nei, me ko lakou makaukau oihana koa, ua haaheo loa ko lakou uhane me ka hilinai nui na lakou ana ka lanakila.

            Eia nae i ka hoao ana iho ka hana, aia hoi, ua puehu liiliii ae la na Inia a @ ae la ka lanakila i na Pelekane a ma keia hui mua loa ana o na aoao a elua a haule ai na Inia oia kekahi puupuu ika ika nana i hooemi aku i ke kaena wale ana a haano’u wale ana.  A no ka lanakila mau o na Pelekane ma na hakaka liilii o na aoao i hui ai aa lawa loa ka hohewale o na Inia, a no ia mea aole lakou i aa e hakaka he alo he alo me na Pelekane k@ wale no o ka hoolei poka pa-hu mai o na Inia ia lakou ma kahi mamao loa i na Pelekane.  Pela i kaulana ai ke kaua o Gazidinafa, kahi o ke kaua mua loa.

            O keia mau hakaka liilii e hui nei na Pelekane oia no na hui ana o na aoao a elua ma ke ala o na Pelekane no Deli, e like me ka manaoio i loaa ia lakou o ka hui kino maoli no i kahi o ke kum@ o ka hooulu kaua, oia hoi o Deli, pela i puka aku ai na Pelekane mai Miruta aku a mai na wahi e ae a hookahi ka nee like ana me Mekia Warena ame kona mau puali.  A i na manawa apau e hui ai a lanakila na Pelekane, aole i nele ka puhee hoi hou o na Inia i pakele mahunehune aku no ke kahua hoomoana iloko o Deli, a mailaila mai e puka hou mai ai he auna nui okoa, no ka hui kaua hou ana.

            A ma ka la 7 o Iune i hui hou aku ai na pualikoa mai Miruta aku me kela o na pualikoa Pelekane mai Amabala mai i Alipoa, ma kekahi wahi aia ma kahi o eiwa mile mai ke kulanakauhale aku o Deli, a mamuli o keia i pii mahuahua ae ai ka ikaika heluna o na Pelekane, he pualikoa hoi i kaa malalo o ke alakai ana a Sir H. Banada, oiai, ua make aku o Generala Anasona, ke alakai mua o ka pualikoa.

            Mahope iho o ka ma-ki ana o na koa Pelekane no Deli oiai aia no lakou ke hoomau la o ka hiki aku ilaila, ua hoea hou aku la lakou i Babulikasai, mahope nae o ka hala ana o eha mile, a o ka hoea ana no hoi ia o na Pelekane ma ke kahua hoomoana a papu ikaika mua loa o na Sipoe i hoolawaia me na ikaika ma kahi o ekolu kaukani koa ame na pukuniahi he umi-kumamalua.  A o keia mau pu na oi loa aku ko lakou nunui a palanaiki mai na pu o na Pelekane ke hookukuia, a he maopopo loa ko lakou hoopoino i na Pelekane oiai ma na wahi mamao, a oiai no hoi aole he wahi kakoo ana i na Pelekane ma na wahi mamao oiai aole i lawa ka ikaika o ka lakou mau pu no ke kaua ma na wahi mamao, koe wale no ke kaua hui kino a an@ kokoke.

            Ma kela wahi ikaika o na Sipoe i ikaika hou ai ke kaua ma ka aoao o ua Inia, a ano nawaliwali na Pelekane oiai aole he lihi launa aku aka ma ke akamai o ka lawelawe a hoonee kaua ana o na Pelekane ua kaa hou ae la ka lanakila ia lakou a puhee aku na Sipoe me ka waiho ana iho i ko lakou mau mea kaua i ka honua a holo pukaka wale aku i pakele ai ke ola.

            I na Sipoe e hoopapau ana i ke ki hoomau ana i na enemi, oia hoi na Pelekane, oiai @a aoao a elua ma ke kahua kaua mawaho o ka papu, ua haawiia ae la ke kauoha i ka Pualikoa Kanahiku o na Pelekane malaila a iloko o ka uwa hauoli nui o ua puali nei ma he la e hoike ana ua lilo ia lakou ka lanakila, a huiia me ko lakou nee hoi hope ole i hope, aka, nee no imua no ka hui kino ana me na enemi, oiai e ki hoomau ana i na Pelekane ma kekahi aoao mai, ua loaa iho la ka manawa i hui kino ai ka Puali Pelekane Kanahiku me na Inia a o ka hoomaka no ia o ke kaua he alo a he alo.

            A oiai ua kau mua ka weli i na Sipoe no ka wiwoole lua ole o na Pelekane ua lawa ia no ka hoopuhee ana ia lakou a haaleleia iho ai na mea kana a holo pukaka ai i pakele ke ola.  O keia no kekahi Lanakila kamahao i loaa i na Pelekane.

            A i ka lilop@o ana o keia kahua o na Sipoe aia no he kahua ikaika hou aku a na Pelekane e na’i ai, eia nae aole no i kuha@ iho lakou, aka i ka hoea ana aku ilaila ua maopopo loa ae la ua haalele na Inia a waihoia iho la na mea kaua a loaa ae la keia hoomaopopo ua holo aku keia wahi poe k@ Inia mamuli o ka puiwa i na hooho puhee o ko lakou mau hoa Inia o ke kahua a papu i haulehia ai; a no keia haule kaua ole ana i ma-ki haaheo aku ai na Pelekane iloko o ia wahi kulanakauhale a kau haaheo hou ia ae la ka hae Pelekane iloko @laila, ma ke kahua kiekie no nae o na Sipoe i hookahua ai, oia ke kulana e ku kehakeha ana me ka huli pono o kona alo e nana ana i ke kula na@auhale kaulana o Deli kahi o ka hooulu kaua kipi.

            Iloko o ka hoomaopopo o na Pelekane aia he mau haupu kaumaha i komo aku iloko o na Inia o ke kulanakauhale o Deli ma ka manawa i ike hou mai ai i ka welo hou ana o ka hae Pelekane mai ke poo mai a ke kanaka haahaa. Alaila, e like me ka loihi e kau ia ai ka hae Pelekane, pela ka noonoo i loaa i na Inia aia no ke mau nei ka mana hoomalu o ke aupuni o Pelekane iloko o Inia, aia nae ma ke ano naueue.

            Ua loaa pu no ka hoomaopopo i na Pelekane ame na Iina pu aia ka mau o ka mana aupuni Pelekane iloko o Inia ma ka mau o ka ikaika, a i mea e mau ai ka ikaika oia no ka hoouna hikiwawe ana o Pelekane Makua i mau koa iloko o ka aina haunaele, a pela iho la i hoolana loa ai na Inia.  A ina aole e hiki ana ia lakou Inia ke hookuke aku i na haole mai ka aina aku iloko o ka wa kupono mamua o ka pae ana mai o na kokua hou mai Enelani mai, alaila, wahi a ka noonoo wale a na alakai Inia e hoomau aku no i ka paio ana a na ka hua e hoike mai i ka hopena o ke kipi a lukuwale ana.

            O kekahi mea i hoopuhili i ka noonoo o na Pelekane, a akahi no a maopopo, oia no ko lakou kuhihewa aia ka Emepera ame na keiki ponoi i hopuia e lakou ma ka papu o Nadoa iloko o ko lakou lima he pio, eia ka, aole, no ka mea, eia no ka Emepera iloko o Deli a he mau hoohana hoopuhili wale no ka mea i hanaia i mea e hiki pono ai na elele Inia ke hoounaia.  Eia nae, aole no i hala loa ka manawa mamua o ka maopopo ana i na Pelekane i ka mea oiaio, oiai na ko lakou mau kiu wiwoole ka hooikaika nui ana a loaa ka oiaio.

            Ma ka manawa i hoomoana ai na Pelekane ma keia kualapa e nana ana ia Deli, aole paha he pualikoa o ekolu kaukani wale no e like me ko na Pelekane e hookahua ana ma ua kualapa la, oiai oia ka huina nui o na Pelekane, he ekolu kaukani wale no a hookuku ae me ka huina o na Inia kipi e hoomoana ana iloko o ke kulanakauhale o Deli, ke poo aupuni emepera o na Inia, no lakou ka huina i hiki aku i ka hapaha miliona aka aole no i kuha’u iho na Pelekane.

            A mahope mai e like me ka nee ana o ka manawa, aia hoi, ua hooi loa ia ae ka nui hewahewa o na Inia i pakoluia ae ka nui i ko ka hapaha miliona, no ka mea, e komo mau ana na Inia a lilo i poe koa e hoomaamaa mau ana me na meakaua, a mawaho ae o ke komo nui ana o na koa, e hookomo nui ia ana na meaai ame na lako no ka pono o na koa a ua makaukau maoli no lakou e hiki ole ai lakou ke hoopuhiliia.  E hoomanao pu ia no hoi, aia keia kulanakauhale ua hoopuniia me ka pa pohaku manoanoa i hana noeauia i lawa me na pu nunui a e hiki ole ai ke komo maalahi me ka loaa ole mai o na poino.

            O na pualikoa Pelekane e hoomoana ana ma keia kahua hou o lakou, oia hoi, ke kualapa, a malalo o ke alakai ana o Sir H. Banada a e noho aku nei imua o Deli, oia no na Pualikoa Kanahiku-kumamalima, eono mahele koa o ka Puali Raifela Kanaono, ka Puali Benegala Ekahi he eono mahele koa o ka Puali Fusilia Elua, o na koa o ka Mahele Kiai, elua mahele koa o ka Puali Ihe Eiwa, ame na pualikoa a Mekia Warena, na puali kaulio ana i hookumu ai i Miruta a he puali pukaa o na pukuniahi liilii, a i ka hui ana ia lakou apau ua piha aku la ka huina o ekolu kaukani.

            Ma ke kakahiaka ana o kekahi la ae, aia hoi ua hoopuipui hou ia ae la ka ikaika o na Pelekane ma ka hoea ana aku o kekahi Puali Kiai, nona na koa i waeia maiwaena mai o na kupa haole, a i heleia mai e lakou ma kahi o ka elima haneri ame kanawalu mile iloko o iwakalua la e heleia ana he iwakalua mile o ka la, me ka hoomaha ole, a he mea hoi i ike ole ia mamua, oiai he aina wela o Inia, a oi loa aku, o ka wela o ka la o keia mau la lukuwale.

            O keia kualapa o na Pelekane e hoomoana nei, he lalani kualapa kiekie ia e huli pono ana ia Deli, a waiho wale na kualono, ame na wahi ilina o na moelepo ame na hana kaulana e ae o na Iinia i kukulu ai a he nani maoli no ka aina ke nana aku.

            Aia mahope pono aku o keia lalani puu ke kahua o ke kulana kauhale kaulana o Deli, i hoopuniia a paa me kekahi pa kiekie manoanoa, a iloko olaila na kauhale nunui a kilakila maoli o ke kukulu ia ana, a o kona mau papu aole e hiki ke hoole ia i ka mana o kona nanaina, a e moe ana hoi na alanui kulanakauhale aole no nae o ke akea kupono, oia nae ke ano mau o na alanui Inia, a maluna o keia pa pohaku manoanoa na pukuniahi nunui no ke pale ana i ke komo mai o na enemi.  O keia mau hoolala ana apau mamuli ia o ka noeau o na Inia.

            “He kulanakauhale nani maoli ka keia!” wahi a Nede i hooho ae ai ma ka pane ana aku i kona makuakane, ia lakou e kuku ana ma ke kualapa mahope iho o ka hookuu hoomaha ana o na Pelekane a hele holoholo aku ai no lakou no ka makaikai.  “Aole kakou i heluia i ka nunui ame ke kilakila o na hale o keia kulanakauhale a na Inia i kukulu noeau ai.  Ke manao nei wau e nalowale no kakou ke holoholo iloko o kela wahi nani me na alakai ole.”

            “Pela no,” wahi a ka Makua Warena.”

            “Aohe he wahi manaolana no ko kakou hiki ke hoaano aku ke manaoia e komo ilaila, koe wale no a loaa hou mai he mau koa no kakou e lawa ai ka ikaika no ka paio hoomau ana.  Ina no me keia ekolu kaukani o kakou ua hiki ke komo iloko me ka nana ole ae i ka ikaika o ka pa manoanoa e hoopuni la, aka o ka ma-ki ana iloko o na alanui ololi e like me kela e ku Ialaniia la e na hale kiekie ma na aoao, he mea maopopo e puhee a leleliilii ana kakou, ma o na poka e kiia iho ai mai na kauhale, a aia he nui koa maoli no e hiki ai ke paio aku me ka nui no nae o ka make, a e like me ka mea i ike ia iloko o ke kaua---o ka hakaka maloko o na alanui ololi e like me kela oia kekahi o na hakaka weliweli, loa i loaa ole a hiki ole ke hookuku ae me na hakaka ma na wahi akea.  A e hala ana kekahi manawa loihi e like paha me elua mahina a oi mamua o ka hiki ana mai o na kokua i o kakou nei, a pela no hoi ka nui o ka manawa a kakou e paa ai i ko kakou kahua ma keia kiekiena.”

            “Makemake loa wau aole e noho loihi ma keia wahi,” wahi a Dike i hoomaopopo aku ai.  I ka nana aku aole io no e hiki pono ia kakou ke paio aku ke ole e lawa ka ikaika kupono me kakou.”

            “Eia nae,” wahi a Mekia Warena i pane hou aku ai, “ua hiki no ia kakou ke hana i kekahi mau mea, e laa ke kiu ana, a hoihoi mai i na mea i ikeia a he mau waiwai nui hoi ia ma ko kakou aoao no na hoohana o keia mua aku.  A o kekahi no hoi, ua hiki ia kakou ke wawahi i kekahi mau pale o na Inia,---o na pale owaho aku nei e loaa maalahi ai ia kakou.  Halo!  Heaha kela?”  i hooho leo nui ae ai ka Mekia.

            I ka manawa a Mekia Warena i hooho ae ai, oia ka manawa i poha mai ai o ke ahi me he uwila la ame ke kani pu ana, mai na papu manoanoa mai o na Inia, a hihio ana ka poka maluna pono o ko lakou mau poo, a ia manawa hookahi no i pee koke iho ai lakou a momoe ana ilalo i ka honua i ole e loaa mai i ka poka.

(Aole i pau.)

 

MAKAIKIU

PETERIKA@MAFE.

Ke Kolopa Uneune i na Nihiliti,

Ka Hoopakele o ke Duke Kiekie.

 

MOKUNA IX.

 

KA WAIHONA UWILA PAKEKE.

 

            “Aole wau e pono e kali ia lakou la,” i noonoo ae ai ka makaikiu.  “Ina wau e hana ana pela e poino paha auanei wau ia lakou la.  E hoao ae hoi wau ia lakou la.”

            Hoopaa iho la oia he hapalua dala a paa me kekahi poo o ka uwea loihi, a hoolewalewa aku la iwaho a hookuu iho la iluna o ke alanui helewawae, me ka lohe ole o na Nihiliti.  Alaila hookuu iho la oia i ka uwea pokole a pa i ka lepo, a o ka hui ana no hoi ia o ka uwila.

            He mau minute loihi i hala ae mahope o ka pau ana o ka ka makaikiu hooponopono ana i kana waihona uwila, ua huli hoi mai la ua poe Nihiliti nei no kahi a ka makaikiu e pee ana.

            “Me he mea la ua kokoke mai ka manawa e hiki mai ai ua kanaka la maanei,” i lohe aku ai ka makaikiu i ka pane ana ae o kekahi o na Nihiliti.

            “Auwe! heaha hoi keia?” wahi a kekahi o lakou i ka ike ana i ka apana dala e hulali ae ana.

            He elua o keia poe i ike mua i ua apana dala nei, a o laua like no ka i kulou like a lalau iho la.

            Ua hookuu koke ae la ka makaikiu i ka uwila, a he anuu ana ka mea i ikeia aia hoi waiho ana laua a elua iluna o ka lepo.

            Ua puiwa ae la hoi ke koena iho o na Nihiliti, a kulou iho la e kokua i ko lakou mau hoa, a i lawa no a pili ko lakou mau lima i ko lakou mau hoaloha e waiho ana, o ko lakou loaa aku la no ia i ka uwila a papapau nui ana he a-a ko ka hale.

            “Ahahana! pau oukou i ka paa,” i hooho ae ai ka makaikiu.

            Hoopaa koke iho la o Peterika i ka uwila, alaila holo kake ae la na kupee a paa ana ua poe nei, o na lima ame na wawae.  Alaila noho iho la oia e lapaau i ua poe la e like hoi me na hana e hoopohala ai i kekahi kauaka i piholo iloko o ka wai.

            Aia ua makaikiu la ke hana hookahi la maluna o na Nihiliti e hapai ana hoi a e hookuu ana i na lima ilalo, a pela oia i hana pakahi aku ai i keia poe a hiki i ka oluolu ana, a o keia no hoi ka manawa i hoea mai ai ka makai kuhuina, iaia e holoholo ana ma kana oihana.

            Ua hoike aku la ka makaikiu i ke kumu o ka hopuia ana o keia poe, a oia no hoi ka manawa i hoounaia aku ai ka lohe no ka halepaahao e kokoke ana malaila me ke kauoha pu ia aku e hoouna awiwi mai i ke kaa lawe pio.

            Aole i piha he hapalua hora mahope mai aia ua poe Nihiliti la i makemakeia na lakou e pepehi i ka makaikiu ke moe lolii la iloko o na paia puanuanu o ka halepaahao kahi i moe kokoolua ole ai.

           

MOKUNA X.

 

POINO O PETERO.

 

            O ka hora elua ia o ka wanaao i hahao aku ai ka makaikiu i kana mau pio iloko o ka halepaahao, eia nae aole i nana ka makaikiu ia mea, oiai ua mauaoio loa oia he hihia ano nui keia, a hoike aku la oia i na mea nui o kana hihia i ka lukanela ame ke kakiana e ku ana ma ia wa@.

            Ma ka hoike pokole ana a ka makaikiu ua maopopo ae la, aia he iwakalua-kumalima poe i hoohui ae ia lakou iho no ka manao ana e hoala haunaele kuloko ma Rusia mamuli o ka manao ana e pepehi i ua luna aupuni.

            Aole he wahi hoike e maopopo ai na uhai keia poe i na kanawai o Amerika Huipuia, koe wale no ka hu-na ana i kekahi huina nui o na mea hoopa-hu ma na Kiekiena o Hobokena.

            “He hookahi a kakou mea e hoomaopopo loa ai,” wahi a ka lukanela i pane mai ai, “ua maopopo loa na keia poe no i hoouna aku i ka mea hoopa-hu i hookomoia iloko o ka buke i ka Za o Rusia a make ia luna aupuni, eia nae aole he mau hoike ku i ke kanawai no ka oiaio oia mea.”

            “Oia ka mea i koe e huli aku ai,” wahi a Peterika.

            “O oe ke kanaka i pono e huli aku ia mea,” i panai mai ai ka lukanela.

            “Oia no ka’u i manao ai.  Malia paha o hoike mai kekahi o keia poe i paa mai nei no ia mea,” wahi a ka makaikiu.

            E like me ia a Peterika i pane aku ai, pela i hele aku ai ua lukanela la a ninaninau pakahi aku la i ua poe Nihiliti la, e hooikaika ana hoi ma na ano apau e huli ae ai kekahi o lakou a lilo i hoike ma ka aoao o ke aupuni.

            O na hoao ana apau o ia ano aole i holopono.  Ua kupaa keia poe apau maluna o ka lakou i hoohiki ai imua o ko lakou mau hoa, a mahope o ka hala ana o hookahi hora o ka ninaninau ana, ua puka mai la ka lukanela ame ka makaikiu me ko laua pouli e like no me ia mamua o ko lana ninaninau ana i ua poe Nihiliti la.

            He hookahi wale no iwaena o keia poe i paa i hiki i ka makaikiu ke hoomaopopo loa, oia no o Borisa, o ke koena iho he poe aole i komo kuhohonu loa iloko o na kukakuka ana o ka ahakuka.

            O keia ka ike nana i hookomo aku iloko ona i kekahi noonoo iloko ona e eleu koke ae oia a e hoonee koke aku i kana hana imua.  Hoomaopopo ae la oia aole e nele ka hana aku o keia poe i kekahi hana limakoko maluna o Petero, oiai ma o Petero la i lilo ai oia i mea e loaa ai na hana a na Nihiliti, a oia no hoi ua hoaoia mai e pepehi iaia, nolaila, aole e nele ka hooko aku o na Hihiliti ia mea maluna o Petero.

            “Aole he manawa e noho iho ai a hoopau wale ma na kamailio ana,” i puana ae ai ka makaikiu, me kona ku awiwi ana ae iluna.

            “Alaila, e hele aku ana oe e huli i na mea pili i keia kanaka loaa?” i ninau mai ai ka lukanela.

            “Ae, no ka mea o keia hookahi ke kanaka Amerika iwaena o lakou, a oia hookahi ke kanaka i ike a oi aku mamua o keia poe ma na mea pili i na mea hoopahu, nolaila, he kanaka keia e maka’uia aku ai.”

            “He oiaio kau, no ka mea nana e hana nei i na mea hoopa-hu a