Ka Nupepa Kuokoa, Volume XLIII, Number 17, 28 ʻApelila 1905 — Page 5
| This text was transcribed by: | Pohai Souza |
| This work is dedicated to: | Halau Hula Kamamolikolehua |
Ka Nupepa Kuokoa
KE KILOHANA POOKELA NO KA LAHUI HAWAII.
Make ka Bila Waiona
Mai ka aoao eha mai.
Hoopane loa ia ka bila Senate 83 ma kona wa o ka heluhelu elua, a hoopanee loa ia no hoi ka bila pili i na auhau hui inisua ma ke noi a Dowsett, a pela no hoi i hele aku ai ka bila Senate 130 ma ia alanui hookahi a hooholoia hoi ka bila Senate 132 ma ka heluhelu elua.
Holo ka bila Senate 140 ma ka heluhelu ekolu me ka hoohalahale ole, alaila hapaiia ka noonoo ana o ka bila Senate 12 pili i ka hoo@ alahao a Luka ma, ma ka mokupuni o Oahu a hoomaka ka nui paio, a mahope o ka hooikaika ana o na hoa ua hiki aku la lakou i ka hopena ma ke noi ana o ka makuakane o ka bila oia o McCandless e aeia aku oia e unuhi i ka bila oiai ua maopopo loa ka make o ka bila ma ke noi a Achi a aeia kana noi a o ka pau no noi o ka noonoo ana maluna o ia ninau.
Hapaiia ae la ka noonoo ana i ka vito o ka bila waiona a ke Kiaaina i waiho mai ai, a ma ka noonoo ana ua ikeia ka hemahema a hoihoi hou ia ka leta no ka hooponoponoia mai e ke Kiaaina a ma ka hoike a ke Kiaaina aole e hiki iaia ke hooko no ka mea ua hana mua ae ka Hale elike me ia i hoounaia aku ai, a ina e ae ana ka Hale e hoihoi hou mai i kana i hana ai alaila e oluolu no oia e hooponopono hou i ka hemahema a no ka na ole o ka makemake o ka Aha ua waiho ae oia i ke kumuhana iloko o ke komite wae o elua lala, Bishope ame Achi.
Mahope o ka hoolohe ana i ka leta a ka Hui Kaauwila Honolulu pili i ka noii a ke komite Senate o ia hui a kapaeia ka leta ma ke noi a McCandless, me he la i kana hoakaka he leta paʻi mahanahana ia i ka Aha, ua hapaiia ae la ka noonoo ana o ka bila Senate 97, pili i ka hoomoe alahao i Maui a haule no hoi ka bila ma kona heluhelu ekolu.
Mahope o ka noonoo ana i ka bila Hale 125 ua hooholoia ae la ua bila nei ma ke heluhelu ekolu, he bila hoi pili i na hui a hoopahee no hoi ka Aha.
KA HALE
La hana 55, Aperila 20 - O kekahi hana ano nui i noonooia ae e ka Hale, ma keia la hana oia no ka bila aila ea a mahope o ka nui hooikaika o na hoa i manaoio ma ke keke-le 120 ua ko ae la ko lakou hooikaika ma ka aponoia ana o ka hoike a hooholoia ka bila ma ka heluhelu elua.
Na Andrade i hookomo bila pili i ke ana holo o na Kaauwila o Honolulu ma ke noi a ka Hui o na kaauwila e haawi ana i ka hooponoponoana holo i ke Kiaaina ame ka Lunanui o na Hana Hou.
Hapaiia ka noonoo ana i ka vito a ke Kiaaina maluna o ka bila waiona i hookomo mua ia iloko o ka Hale a hooholoia ai e na Hale a elua a kakooia ka vito a o ka make no hoi ia ke holo pu mai me ka ka Aha.
Mahope iho o ka noonoo ana i ka bila a Fernandez pili i ka lawe hanai keiki a waihoia ka noonoo ana a kahi la ae, a mahope o ka hoike komite makai pili i na peleki o na kaauwila o ka Hui Kaauwila Honolulu, e kakoo ana ke komite i ke ano o ka lawelawe peleki o na kaauwila, ua hookomo mai la o Cox he olelo hooholo haawina o $1500 no ka halekula o Waianae, a na Broad he palapala hoopii mai ko ka Apana Elima poe mai e noi mai ana e kukulu hou ia ka halekula o ke Alanui Smith maluna iki aku o ke alanui Pauahi i pau i ke ahi i Ianuari, 1900.
Na Lilikalani i hookomo olelo hooholo haawina o $2,500 i halekula hou no Pauoa, a na Coelho he olelo hooholo haawina o $345.72 no ka uku ana ia F. H. Jordan no kana hana maluna o ka halekula o Wailuku, a he palapala hoopii mai ka poe maʻi mai o Kalihi no ka nana ana i ka poe maʻi i paaia no ka maʻi a waihoia i ke komite kuikawa maʻi lepera.
Na ke komite aina aupuni he kokua maluna o ka haawina o $3000 no ka hana o ke kapa-alanui mai ka halekula aku o Wailuku ame $1000 no ka hana me ke kahua o ka hale hookolokolo ame halepaahao o Wailuku.
Na ke komite waiwai he hoike kokua maluna o ka bila a Senatoa Dowsett pili i ka auhau o na kaa hehihehiwawae a pau i ke koua ia ka bila a Achi pili i na auhau o na waiwai lewa a hooaiai pu ia ka bila a Achi pili i ke kuai o na waiwai morakiia, e laa na bona ame na waihona-hui.
Na ke komite huikau he hoike maluna o ka bila a Harris uahi kolohe wale, pau pu i ka hooaiaiia ka bila a Dowsett pili i ka hoopakele i ke ki manu ame na mea like a hooaiai hoi ke komite e waihoia ma ka papa ka bila a Cox no ka hoomana koho papa luna alanui.
Na ke komite ola i waiho mai he hoike kokua maluna o ka bila a Senatoa Dickey e hookuu ae ana i na makaikai e hele i ke kahua maʻi lepera a waihoia ka hoike ma ka papa no ka noonoo pu ana me ka bila, a ma keia ninau aole i lokahi ae o Long kekahi o na hoa komite.
Na ia komite hookahi no he hooaiai lokahi maluna o ka palapala noi mai Molokai mai no ke koho ana i kauka lapaau no ia wahi a na ke komite hookolokolo i waiho hoike mai pili i ka bila a McCandless no ke kolohe ia o na ona halelio, a kokua pu hoi ia komite i ka bila a Paris pili i ka hookohu ame hoopau ana o na lunakanawai aha apan a pela ka bila a Achi pili i na olelo hooholo aha hookolokolo.
A mahope o ka noonoo ana o ka Hale pili i ka la kulaia "Poalima Pomaikai" ame ka haawi ana i ke kakauolelo Hale i manawa e hooponopono ai i kekahi mau hemahema o kekahi mau palapala ua hoomaha ae la ka Hale a noho hou ia po.
A ma ka noho hou ana ae o ka Hale i ke ahiahi, ua hooholoia ae e ka Hale he ekolu mau bila laikini ma ke heluhelu elua a hooholo loa ia ka bila Hale 166.
Hapaiia ka noonoo ana o ka bila Hale 182 pili i ka hoolaha ana o na aelike maluna o na hana o ka lehulehu, ame na pakui, oia hoi, e hoolahaia ma na olelo Beritania ame Hawaii a hooholoia ka bila.
Holo ka bila Senate 78 ma ka heluhelu ekolu a mahope no hoi o ka hooholo ana i ka bila Hale 51 ma ka heluhelu ekolu o ka hoopanee no ia o ka Hale.
KA SENATE.
La Hana 55, Aperila 21. - O kekahi hana ano nui i noonooia ae e ka Aha oia no ka heluhelu elua o ka bila waiona hou i hooholoia e ka Hale a ma ka hooikaika o Achi e waiho i ke kumuhana iloko o ke komite ua hooholoia ae la e like me ke noi a waihoia i ke komite kuikawa nona na lala o Dickey, Dowsett ame Kalama, mahope iho no nae o ka hoao ana o Dowsett e hooholoia ke kumuhana ma ka heluhelu elua ma ke poo.
Mahope iho no nae o ka pau ana o na hana kumau i ke kakahiaka ua noonooia ae ka vito a ke Kiaaina maluna o ka bila waiona i hooholoia e na Hale a elua, a i ka mohala ana i na hoa o na kumu hoohalahala a ke Kiaaina maluna o ka bila ua kakoo ae la lakou a o ka make no hoi ia o ke kumuhana oiai ua hooholo a kakoo mua ae ka Hale i ka vito.
Ma ke noi a Bishop ua hooholoia ae ka bila Hale 223 a holo pu no hoi ma ka heluhelu ekolu ka bila senate 132 ame 144. Na ka Loio Aupuni mai he hoike i ke kanalua o ka hiki ame ka loaa o ka mana i ka Teritori ke hoolilo aku i ka mana hoomalu o na uwapo, na alanui ame na mea like i na kalana me ka apono ole ia mai e ka Ahaolelo Nui, a mahope iho o keia i hooholoia ae ai ka bila Hale 201 ma ka heluhelu elua.
Holo ka bila Hale 52 pili i ka hoomoe ueaolelo a ka Hui Kelepono Standard ma ka heluhelu elua mahope iho o ka noonoo ana, a mahope o ka hoopaaia ana o kekahi mau hookohu a ke Kiaaina ana i waiho mai ai e hana aku ka Aha i kana hoapono a hoopaa ole ia mau inoa, ua hooholo hoopanee loa ia ae la ka bila Senate 72.
Holo ka bila Hale 108 ma ke heluhelu ekolu a he leta na ke Kiaaina mai e hoike mai ana i kona kakauinoa i ka bila Senate 53 pili i ka lomilomi, a mahope iho ka hoike komite hooponopono pili i ka bila Senate 45 ua hooholoia ae ka bila ma ka heluhelu ekolu me ka loaa ole o kekahi hoohalahala.
Ma ke @ a McCandless ua hapaiia ae la ka noonoo ana o ka bila 22@ a hooholoia ma ka heluhelu elua, a hooholoia no hoi ka olelo hooholo ma ke noi a Dickey e ka@oha ana i ka poe mea bila aie a ka Senate i aie ai e waiho mai i ka lakou mau koi mai Aperila 24 a aponoia ka olelo hooholo.
Holo a bila Senate 130 ma ka heluhelu elua, a holo ma ka heluhelu ekolu ka bila Hale 185 ame 188 a waihoia ma ka papa ka olelo hooholo hui pili i ke koho komikina o elima kauka no ka hele ana i Kalaupapa no ka nana ana i na maʻi.
Holo ka bila Hale 31 pili i ka opiuma ma ka heluhelu elua, a waihoia ma ka papa ka bila Hale 5 ma kona wa o ka heluhelu elua a holo no hoi ka bila Hale 96 ma ka heluhelu elua a hoopanee no hoi ka Aha.
KA HALE.
La Hana 56, Aperila 21. - Okekahi o na kumuhana ano nui loa i noonoo hu o ka aka ma keia la hana o ka Hale oia no ka bila aila ea ma ke ana keke-le a hooholoia ma ka heluhelu ekolu ua bila nei ma ke ana 120 kekele ikaika o ka aila aole i ka 140 kekele e like me ka hooikaika o kekahi hui e lilo ka mana kuai o ka aila ina nei no ka 140 kekele.
Mai ka Senate mai he hoike i ka hoololi i hookomoia e ia iloko o ka bila Hale 125 a lokahi no hoi ka Hale ia mau hoololi, a noonooia ka bila Senate 138 pili i ka hoolako haawina dala no na kalana a hooholoa ma ka heluhelu ekolu. He 24 ae ku-e ia 4 hoole.
Holo ka bila 210 ma ka heluhelu ekolu, a holo pu no hoi ma ka heluhelu ekolu ka bila Hale 4 pili i ka o lima a holo no hoi ka bila Senate 139 pili i na lunaauhau ame lunahelu auhau o na kalana no ka hoihoi ana a na na lunaauhau Teritori. Ua hooholoia ma ka heluhelu ekolu.
Holo ma ka heluhelu ekolu na bila Hale 147, 197, 194, 200 ame ka bila 191 a na ke komite aina aupuni he hoike lokahi maluna o ka olelo hooholo haawina o $450 a Pulaa i hookomo ai no ke alanui mawaena o Honaunau ame Keei, a pau pu i ka hooaiaiia ka haawina o $1000 no ka hana o ke alanui o Halawa-Honoulimaloo.
He palapala noi ka i loaa mai, mai ka hui opio o na Pake e noi mai ana e hookuuia mai ka auhau aku a waihoia ke kumuhana i ke komite waiwai a holo no hoi na bila Hale 102 ame 149 ma ka heluhelu ekolu a hoopanee no hoi ka Hale..
Hoaoia ke Ola o na Maʻi ma ke Kahua Maʻi Lepera o Molokai.
E ke Kuokoa, Aloha nui oe: - Oluolu oe e haʻi ae i ka nuhou hoolana manao o Kalaupapa nei, i ike mai ai na kini mai Hawaii a Niihau, i nei nuhou a makou e manaolana nei. Ua hiki mai ke ola eia i ka ipuka o ka hale, no na poe i loaa i nei maʻi o ka lepera: ka maʻi hookae a ka lehulehu.
Ma keia mau la iho nei ua loaa mai la i ka Peresidena o ka Papa Ola, he laau e hiki ai ke hoola i ka Maʻi Lepera, mai a Prof. Brinton, M.D. o Paris, kela kulanakauhale kaulana o Farani, a ua hoouna loa ia mai la i Kalaupapa nei, ia Dr. Goohue, ke kauka noeau no hoi o ke kahua maʻi nei; no ka hoao ana i kekahi poe maʻi lepera; he ola io paha ka maʻi lepera i keia laau, aole paha. Ua wae ae ke kauka i kekahi poe maʻi, he 20 ko lakou nui; ia lakou e hanai ia ai keia laau, iloko o na mahina ewalu; a iloko o ia manawa e maopopo ai ke ola, ame ke ola ole o ka maʻi lepera i keia laau.
Eia ko lakou mau inoa: - George Kanikau, A. M. Holopinai, J. M. Spencer, M. K. Makaena, Ten Sing, Joao Dias, Nuuanu, M. Klammer, A. L. Kekipi, S. Carter, E. M. Hanuna, Kapuni, Keaka Kaauamo, D. N. Kahale, W. Clark, Miss Amoe Hoopale, Miss Rose Moenahele, Mrs. Lucy Maihui, Mrs. Kaena, Miss Kahau Makaena.
Ma ka Poaha, Aperila 13, ka hoomaka ana e ai i ka laau; o ke ano nui o keia laau, he wai keokeo no ia; aole ano e ae i ka wai maoli. Hookahi kulu iloko o ke puna nui i piha i ka wai maoli, alaila inu aku, elua inu ana o kela ame keia la, kakahiaka, ahiahi. Eha Helu o keia ano laau: E inu ia ana ka Helu ekahi i na la ehiku; helu elua, i na la ehiku hou aku, pela e inu aku ai a pau na helu eha, ua like no hoi ia me eha pule; i ka lima o ka pule, hoi hou e inu i ka helu ekahi, a pela aku. Na ke ano e o ka maʻi e hoololi ae i ke ano o ka inu ana i ka laau, a pela aku.
Aohe awaawa o keia laau ma ka inu ana, he ano like no me ka inu ana i ka wai maoli e hiki oluolu ai i ke keiki liilii ke inu. O ka maneo ame ke aki, na hoailona hiki mua i ike ia ai kana hana i ke kino o ka mea inu i keia laau; hje hoailona hoi ia o ka maikai ma ka inu ana i keia laau hoola maʻi lepera; kahi hoi a ka manaolana e kau nui aku nei.
Aia a hala eono pule mai ka inu iaana o ka laau, alaila haʻi hou aku ai ia oe i na ano o ka hana a keia laau, i keia poe e inu nei - maikai ae paha, aole paha.
Kou no,
E. M. HANUNA
KALAUPAPA, APERILA 13, 1905
Na Moho Kalana e Puapuai Mai Nei
Oiai ua puka ae nei ke kuahaua koho balota Kalana a Kiaaina Carter e like hoi me ia i holo iho nei ua kanawai la, nolaila ke puapuai mai nei na inoa o ka poe e makemake nei e lilo ae i mau luna aupuni no ke Kalana o Oahu nei.
Ua hoike maoli ae o Kalalena Papai (Crabbe) i kona manao e holo moho Makai Nui ana oia ina e waeia mai ana oia e ka aoao Repubalika a ina hoi o ke kanawai kalana e ku nei e aponoia mai ana e ka Aha ua ku i ke Kanawai.
Ua puapuai hou ae no hoi he lono lauahea eia o Lunamakaainana Solomon Mahelona ke makemake nei e holo i moho Luna Hooia a ke koaniani mai nei hoi na lohe o kekahi mau hoa o ka Ahaolelo no kekahi e makemake nei e lilo ae i mau moho.
O ka oiaio o keia mau mea apau aia aku no imua. Aole i noho ae nei na Ahaelele a na aoao kalaiaina, a aia no a hiki mai ia manawa e maopopo ae ai na o=ha pili i ke kumu, no ka mea aia ilaila ka iʻo maoli kahi hoi e kanana ia mai ai keia ninau nui a loaa ae kona mole oiaio.
Ka Holo o Kekahi Mau Mokuahi
Ma ka Poaha o ka pule i hala i loaa mai ai ka lono ma Honolulu nei ua holoia e ka mokuahi Minnesora mai Yokohama a Seattle he 11 la me 21 hora, e wawahi ana hoi i ka manawa holo o ka Moana Pakipika. Me he mea la o keia paha ka manawa mawaena o Yokohama ame Seattle wale no, oiai ke waiho nei no ko Yokohama - Kapalakiko manawa me ka wawahi ole ia, a o ka mokuahi Kina ka moku nana e paa nei ia manawa. Ua holoia e Kina mai Kapalakiko a hiki i Yokohama iloko o Okatoba, 1903, he kowa hoi o 4764 mile iloko o na la 9.4 hora ame 17 minute. Ua holoia hoi e Korea mai Yokohama a hiki i Kapalakiko he kowa hoi o 4537 mile iloko o na la he 10. 15 hor amd 14 minute. O keia mau manawa holo eia ke ku nei; ko Kina ma ka hooiho a o ko Korea ma ka hoopii, a he mau manawa hoi i loaa ole i kekahi mau mokuahi e holo nei ma ke alahele akau. O keia mau manawa holo i hoikeia ae nei oia na manawa holo pololei e waiho ana hoi ia Hawaii nei mawaho.
Waiho ae o Kauka Kupa i Kona Hookohu
Ua hoike ae o Kiaaina Carter i ka Poakahi iho nei ua waiho aku o Kauka Kupa i kona hookohu lala no ka Papa Ola a ua apo aku oia i ua hookohu la.
Aole i maopopo loa na kumu oiaio o kona waiho ana mai i ka oihana koe wale no kana kumu i waiho ae i ke Kiaaina, oia hoi ua uluhua oia i ka hana no ka lehulehu mamuli o ka nui o na mea i ala mai i kona manawa e lawelawe hana ana no ke Aupuni a ua makemake oia e kaawale ae mai ia mau mea ae. Me he mea la ua hiki ke hoohui pu aku ma keia ka huli ana iho nei o ke komite Senate i na hana o Iwilei, a i loaa ae ai hoi ka mea oiaio e pili ana no Kauka Kupa. Ina oia iho la alaila ua waiwai keia huli ana iho nei, e like hoi me kekahi mau mea waiwai e ae i ikeia iho nei ma ia ninau oia hoi ka hopuhopuia ana o na wahine e noho hookamakama nei ma Iwilei.
O Peresidena Pinkham kekahi i ikeia iho nei e olepelepeia ana e ka Ahaolelo, a ua puka amaka ae nei hoi ka hoike a ke komite maluna o ka Olelo Hooholo a Senatoa Achi e aʻo ana i ke Kiaaina e hookaawale ae iaia mai ka oihana ae. O Achi wale no ma kana hoike, he hoike hoi e apono aua i ka Olelo Hooholo, a oiai oia no ka makua o ia Olelo Hooholo, aole e nele ka loaa io ae o ka hoike e apono ana i ua olelo hooholo la. O ka hoike a ka hapanui he palaina puna ke ano, e uhiuhi ana hoi i ka hewa io o Pinkham a e kapa ana i na hewa i loaa mai he hemahema i manao ole ia e ala hou mai ana. Ma keia i maopopo loa ai o Pinkham hookahi ia e ku nei iwaena o ke ahi e lalapa nei ma kona mau aoao, a o ka pio ana e keia ahi oia no kona lanakila ana.
Mokuahi Manchuria I Hala Aku la.
Ma ka hora 9:30 o ke kakahiaha Poakahi nei i moku ae ai mawaho o ka nuku o Mamala ae nei ka mokuahi Manchuria mai Kapalakiko mai e holo ana no Kina ame Iapana. Maluna mai ona i hoi mai ai kekahi poe kamaaina o Honolulu nei.
Aia maluna ona he 15,500 tona ukana, a o ka hapanui o keia mau tona ukana he mau mikini ame 600 tona hao alahaka, e laweia ana no Iapana. O keia mau waiwai aia lakou iloko o ka mahele o na waiwai kaua a ina e loaa mai ana keia mokuahi i na mokukaua o Rusia e nee nei ma ko lakou alahele no Vladivostok alaila o keia ana kekahi o na waiwaipio ano nui loa no ko Rusia oihana kana ma Manehuria.
Ma keia huakai aku la ana e kipa ae ana oia ma ka mokupuni Hapawaena no ka hoolohelohe ana i kahi a na mokukaua o Rusia e holo nei a ina e malaelae ana kona alahele alaila hoomau loa aku oia, aka ina aole e hookaulua iki iho ana paha oia malaila no kekahi mau la.
TERITORI O HAWAII
KEENA O KA PUUKU, HONOLULU, OAHU.
Ma ka Hoopau ana i ka Hawaiian Lodge No. 21 of Frwee and Accepted Masons.
Oiai, ka Hawaiian Lodge No. 21 of Free and Accepted Masosns, he hui i hoohuiia a e ku nei malalo a ma ka pono o na kanawai o ka Teritori o Hawaii, ua waiho pono ae ma keia keena i kulike ai me ke kanawai i hanaia a i hookaawaleia no ia mea, he palapala noi no ka hoopau ana i ua hui la i oleloia, pau pu me ka palapala hooia i hoopili pu ia i koiia ai ma ke kanawai.
Nolaila, ma keia, ke haawiia aku nei ka hoolaha i ka mea a i ka poe apau i kuleana a e kuleana nei i keia manawa ma na ano apau iloko o ua hui la i oleloia, o na hoohalahala kue apau i ka ae ana i ua noi la i oleloia e waiho ae ma keia keena ma a mamua o ka Poalua, Iune 27, 1905, a o kela ame keia mea e makemake ana e loheia e hele kino ae ma ke keena o ka mea nona ka inoa malalo iho nei, ma ka Hale Mana Hooko, Honolulu, ma ka hora 12 awakea o ka la i oleloia, no ka hoike ana i ke kumu, ina he mau kumu kekahi, no keaha la e aw ole ia ai ke noi i olelo ia.
A. J. CAMPBELL,
Puuku Teritori o Hawaii
Honolulu, Aperila 24, 1905
3065 - Apr. 28; May 5, 12, 19, 26; Iune 2, 9, 16, 23.
HOOLAHA AINA AUPUNI
PUNCHBOWL SLOPE
Ma ka Poaono, Mei 20, 1905, ma ka hora 12 awakea, ma ke alo o ka Hale Hookolokolo, Honolulu, e kuai ia aku ana ma ke kudala akea:
Pa-hale Helu 552A ma ka ihona o Puowaina (Punchbowl Slope). Ili-aina 8,000 kapuai kuea.
Kumukuai haahaa, $560.00.
Ma ke dala kuike ka makemake a ma ke Dala Gula o Amerika.
Aia keia aina ke waiho nei ma ka aoao Ewa o ke alanui Hackfeld, he 200 kapuai mauka o ke alanui Prospect, a nona hoi ke alo o 80 kapuai a he hohonu hoi o 100 kapuai.
No kke kii aina ame na mea aku i koe e ike ae ma ke Keena o na Aina Aupuni, Hale Hookolokkolo, Honolulu.
JAS. W. PRATT,
Komisina o na Aina Aupuni.
Honolulu, H.T., Aperila 20, 1905.
3065 - Apr. 28; May 5, 12, 19.
HOOLAHA AINA AUPUNI.
Ma ka Poaono, Aperila 29, 1905, ma ka hora 12 awakea, ma ke alo iho o ka Hale Hookolokolo, Honolulu, e kuaiia aku ana ma ke kudala akea:
Elua mau koena o na Aina Aupuni, Honolulu, Oahu.
Koena Helu 1, nona ka iliaina o 707 kapuai kuea. Kumukuai haahaa $530.25.
Koena Helu 2, nona ka iliaina o 159 kapuai kuea. Kumukuai haahaa $318.
Ma ke dala kuike ka makemake, a ma ke Dala Gula hoi o Amerika.
Aia keia aina ke waiho nei ma a e pili kokoke ana ma ka aoao Waikiki o alanui Likeke a mawaena o na alanui Moiwahine ame Halekauila.
No ke kii aina ame na mea aku i koe, e ike ae ma ke Keena o na Aina Aupuni, Hale Hookolokolo, Honolulu,
JAS. W. PRATT,
Komisina o na Aina Aupuni.
Honolulu, H.T., Maraki 27, 1906.
3061 - Mch. 31 - Apr. 76, 14, 21, 28.
Olelo o ka Hanohano.
O na kanaka e hana ana e like me ka lakou olelo i olelo ai: a o na mea ipuka ai ka oiaio e like me ka lakou i olelo ai - he mau mea hoolana manao ia i kau mai maluna o lakou. He hoowahawaha kakou i na hoopunipuni ia kakou; oi loa aku ka hoopunipuni i manaoia e hana pela. Aka aole he hoopunipuni na kanaka apau ina no e hoopuka kuhihewa ke kanaka. Ina no iloko o na ahahui aole no e loaa. Ua ike kela ame keia o ka hoohana ana i na hana kalepa aina maluna o ke alakai pono ame ka manaoio. He mau miliona o na mea i kuaiia i kela ame keia la aole ma na olelo hoopaa i kakauia aka maluna o na olelo hoopaa waha wale no. Ua kapa mau ia ae ka Stock Exchange he punana no na piliwaiwai, eia nae aohe wahi e ae e malamala ai na olelo hoopaa me ka hanohano nui ae. Nolaila i ka manawa a makou e olelo ai i ka
WAMPOLES PREPARATIONS
ka laau lapaau o ke au hou i hoaoia a ikeia ka maikai, no kona hoopunipuni ole i kekahi e loaa iaia na manaolana no ka hoolaia a pomaikai malaila ke manao nei makou e manaoio ana no lakou. No ka oiaio o keia mea ua nui na maʻi i lawelaweia i na la i hala e hoike ana i kona ano. Ua hooiaio wale ia aku no oia maluna wale no o na mea ana e hiki ai ke hoohana a holopono. He hiki oia ke hana i na maʻi inoino o ke koko, La Garipa, na nawaliwali, na eha o ka puu ame ke akemama, ame na ano maʻi inoino o ke koko. He ono ke ai me he hone (smell) ia a he hanai a hoola io. He waiwai keia mailoko mai o ka Aila o ke Akepaa o ka Iʻa Cod (Pure Cod Liver Oil) mai na akepaa o na iʻa cod hou mai i huiia me ke Compound Syrup of Hypophosphites ame ka Extracts of Malt and Wild Cherry. Eia ka Kauka Austin D. Irvine olelo: "Ua hoohana aku wau i keia laau ma na maʻi i ku i kana mana hoola, aka aole mae i ka poe @ ku ole, a he maikai maoli no na hua i puka mai."
He loaa ka manaolana i ka oolopu laau mua a he maikai i ka opu. Aole ia e hoopunipuni a hoopau-ha ia oe a he hoopakele no hoi i ka poe i hele i na hoomaikai mai kekahi ano laau e @. He laau ia no ka lanakila lapaau o ke au lapaau e hele nei. He kuaiia keia laau e ka poe kuai laau lapaau apau.
KA IKAIKA O KA LAAU HAMO A CHAMBERLAIN E HANA AI.
No ka ikaika maoli o ka laau hame a Chamberlain aohe he mea like me ia. O na eha o na iʻo paahana, pehu a ano maeele e pau koke no ia mau ino ma ke kau ana i keia laau hano. He hookahi no kau ana e noho malie loa ai ka eha o ka aoao, a ma ka umauma paha a aohe mea like me ia ke hookuku ae ma ke ano he laau hamo mawaho, no ka rumatika. No na eha moku ame na palapu aohe mea oi ae i keia. No ke kuai ana e loaa no ke hele ae ia Benson, Smith & Co., Ltd. na Agena no Hawaii Paeaina.
HOOLAHA.
Ma keia ke haawiia aku nei ka hoolaha o maua na mea no laua na inoa malalo iho nei ua kuai hoolilo aku maua i ko maua Hui Mahi Laiki ma Hanalei Mokupuni o Kauai, ia Han Sing Companu, Ltd.
MAN SANG CO.,
Ma o CHANG POO LEONG,
Lunanui,
Hanaia i Aperila 11, 1906.
3064 - Apr. 21, 28.