Ka Nupepa Kuokoa, Volume XLIII, Number 15, 14 ʻApelila 1905 — Page 8
| This text was transcribed by: | Rob Escuadro |
| This work is dedicated to: | Ko'u Amiri Kawika "Doc" Bennett o Las Vegas, NV via Waianae, Oahu |
Ka Nupepa Kuokoa
KE KILOHANA POOKELA NO KA LAHUI HAWAII.
2 NUPEPA KUOKOA, POALIMA, APERILA 14, 1905.
Holo Loa ke Kalana i na Hale.
Mai ka aoao elima mai.
Napoopoo ame Kailua ma ka papa a Greenwall i hookomo ai.
Ua hooaiai ke komite i ka haawina o $100 e hoihi ia Josepah Scharsh no 600 kapuai i laweia aku mai kona aina aku no ke alanui ma Moloaa, Kauai, a Sheldon i hookomo ai e waihoia ke kumuhana iloko o ka lima o ka Lunamui o na Hana Hou.
No ke noi a T. Awana no kona aina o Keauula, Maui, i laweia no ka huina o $3000 a Kalino i hookomo ai, ua hooaiai mai ke komite e haawiia aku i ka mea noi i $200, a hooaiai hoi ke komite i ka huina e $50,000 no ke kukulu hale hookolokolo o Wailuku, a pau pu hoi ka bila a Lilikalani i hookomo ai no ke kuai ana i ke kuleana wai a Pauoa no $140,000.
O keia malalo iho na hoike o ke komite waiwai:
Kokua nui ke komite i ka bila haawina kuikawa a ke Kiaaina o waiho mai ai no ka hooholoia, a pau pui no hoi ma ia ala hookahi ka bila pili i ka haawi mana ana no ke kuai opiuma a Kaleiopu i hookomo ai.
Ua hooaiai ke komite maluna o ka bila pakui a hoololi i na pauku 1264 ame 1288 o na Kanawai Hooponoponoia a Senatoa Bishop i hookomo ai, aka i ka bila a Lewis pili i na hui ua hooaiai ae ke komite e hoopanee loa ia ke kumuhana, eia nae ua waihoia ka hoike ma ka papa no ka noonoo pu ana me ka bila.
Na ke komite oia keia mau hoike malalo iho nei:
O ka bila a Kalawaia i hookomo ai pili i ka hooponopono i ka oihana hoomoe paipu o Honolulu ua kokuaia ae e ke komite me na hoololi liilii, a o ka Pulaa hoi ua hooaiai ia ae e waiho ma ka papa, a waihoia hoi ma ka papa o ka olelo hooholo a Rice no na haukapila ame kauka o Kauai, a ua hooaiai pu ae ke komite ola e waihoia ka palapala noi a ko Palolo poe no ka pailina ma ka papa.
O keia mau bila malalo iho nei i loaa mai ka Senate mai ua noonooia ae a hooholoia ma ka heluhelu ekahi ma ke poo: Bila 104, 107, 108, ame ka bia 109.
Na Mrs. M. E. Holloway o Waialua i waiho mai he palapala hoopii no ka uku aku iaia no ka auhau papalua o 1903, a waihoia ke kumuhana i ke komite waiwai.
Na Broad i hookomo bila mai i haawina o $10,000 no na hoolilo o ke kau kuikawa o 1905 malalo o ke kanawai kalana, a pau no hoi i ka heluhelu ekahi, a pela no hoi ka bila a Harris i hookomo ai no ka haawina o $25,425.20 no na keena oihana aupuni e hoolawa ana hoi a hiki i Iune 30, 1905.
A na Harris no hoi he bila e haawi ana i $500 i na lunakanawai Kaapuni o na Aha Kaapuni e ae, a he $1000 i na lunakanawai o ka Aha Kaapuni Ekahi mawaho ae o na haawina ukumau e haawiia nei e na Mokuaina Huiia o Amerika, a hooholoia ma ka heluhelu ekahi.
Lokahi ka hoike komite hoonaauao malna o ka bila kukulu halekula kiekie no Hilo, a lokahi pu no hoi ke komite huikau maluna o ka bila a Senatoa Dowsett pili i na laikini pu.
Na Rice he olelo hooholo e haawi mana ana i ka Lunanui o na Hana Hou no ka hoomaka koke no i ke kukulu ana i ka hale aupuni e Lihue no $40m000 he haawina hoi i hooholoia iloko o ka bila aie o 1903 a apono loa ia ka olelo hooholo a hoopanee no hoi ka Hale.
KA SENATE.
La Hana 44. Aperila 8. - Ma ka wehe ana ae o ka Aha a pau kona mau hana kumau i ka hooholo pono ia ua waiho ae la ka Hale o na Lunamakaainana he hoike pili i ka hooholoia o ka olelo hooholo e haawi mana ana i ka Lunanui o na Hana Hou o ka Lehulehu e hana aku i ka hale aupuni kalana o Wailuku, ma kona haawina i hooholo mua ia, a waihoia ke kumuhana i ke komite aina aupuni.
Na ke komite hookolokolo he hoike lokahi maluna o ka bila Hale 107 a pau pu no hoi i ka lokahiia e ia komite ka bila Hale 153, a na ia komite no he hoike maluna o ka bila Hale 94, e lokahi ana no hoi ke komite maluna o ia kumuhana.
Na ke komite huikau i wiaho mai he hoike maluna o ka bila no ka nana ana i ka hana kapili kamaalio a lapaau lio, oia hoi he hoike lokahi maluna o ke kumuhana, a na ke komite kuikawa mauna o ka bila Hale 68 ame ka bila Senate 176, e hooaiai ana ke komite e hoomoeia ka bila Senate oiai ua hooholoia ka bila Hale ma ka heluhelu ekolu iloko o ka Hale he ma bila hoi keia maluna o ke kumuhana hookahi pili i ka nana ana o na ma'i lepera.
Na Lane i hookomo bila pili i ka hooponopono ana i na hui a na Dowsett he bila pakui pili i ke Keena Hoonaauao a hooholoia na bila ma ke heluhelu ekahi no ka wa mua.
Ma ka hoomaopopo ana ia ua hala loa ka manawa o ka noonoo ana i ka vito a ke Kiaaina i waiho mai ai maluna o ka bila pili i na kau aha hookolokolo kaapuni.
Ma ke noi a Gandall ma ke kapae ana i na rula na noonoo pu ia no hoi ka papainoa hookohu a ke Kiaaina.
Na Achi i hookomo olelo hooholo pili i ka haawi mana i ka Puuku no ka hoihoi ana i ka huina dala o 761.36 mai ka waihona kuike a ka waihona kuai kuikawa o na aina aupuni, a hooholoia no hoi ua olelo hooholo hui nei.
Na ke komite hooponopono i waiho mai he mau hoike maluna o ka bila Senate 86 ame ka bila Senate 110, a maluna no hoi o ka bila Senate 112 a waihoia na hoike ma ka papa no ka noonoo pu ana me ko lakou mau bila pakahi.
Na Dowsett i hookomo bila e hoeueu ana i ka hoonee mua aku i ka hoomoe alahao uwila iloko o ka Mokupuni o Oahu, a holo no hoi ke kumuhana ma ka heluhelu ekahi ana.
Hapaiia ka noonoo ana o ka bila Senate 56 pili i ka hookohu lunakanawai aha apana a hooholoia ma ka heluhelu ekolu ana, a hoopanee loa ia hoi ka bila Senate pili i ke kukulu halekuala kiekie no na kaikamahine ma Kona ma ka wa o ka heluhelu ekolu ana ia o ke kumuhana.
O ka bila Senate 116 ua hooholoia ma ka heluhelu ekolu, a holo pu no hoi ka bila Senate 120 me na hoohalahala ole a pela hoi me ka bila Hale 156, a o ka bila Senate 115 pili i na auhau inisua ua hooholoia ae ia ma ka heluhelu elua ana.
Na Dowsett i hookomo bila pili i ke kukulu i ka auhau makana a holo no hoi ma ka heluhelu ekahi ana a waihoia i ke komite pa'i, a na Hayselden i waiho mai he hoike no ke komite hui kuka maluna o ka bila Hale 84 e kakoo ana hoi i na hoololi a ka Senate a aponoia no hoi ka hoike komite a hookuu no hoi ka Aha.
KA HALE.
La Hana 45. Aperila 8. - O kekahi kumuhana ano nui i noonooia iloko o ka Hale o na Lunamakaainana oia no ka bila waiona a mahope o ka heluhelu ia ana ma ka olelo haole ua noi ae la o Kaniho e heluheluia ia ana ma ka olelo haole ua noi ae la o Kaniho e heluheluia ka bila ma ka olelo Hawaii, a lilo ia i mea kamailio nui ia, a mahope o ka noonooia ana, a ma ke noi a Harris ua hooholoia ae la ka bila ma ka heluhelu elua ana - hooleia nae e Kalino, Mahikoa, ame Nakuina.
O kekahi no hoi o na kumuhana ano nui oia ka vito a ke Kiaaina maluna o ka bila Hale 7 pili i na kau o na aha, a ma ke noi a Andrade ua hoopaneeia ka noono ana o ka vito a ka Poakahi.
Ma ke noi a Coelho ua apaonoia ka huli pono ana i na mea apau pili i ka makai o Iwilei ma ka manawa i ninauia ae ai kona uku hana. Na Broad i hookomo olelo hoohoo pili i ka nana pono ana i na hana a ka Hui Lawe Ukana Wells, Fargo & Co. ame ka Hui Alahao Kaahi o Oahu ma o ka ninau pili i ka auhau ukana, a na ke komite aina aupuni e hana ia mea a ina nei no ke ku i kahi o ka i'o alaila e hanaia i bila e hoopakele ana i ka poe mea ukana liilii mai ka auhau kaulele oi ina ua hanaia pela. Ma ka noonoo ana ua aponoia ka olelo hooholo.
Na ke komite aina aupuni he hoike pili i ke noi a Sheldon i hookomo ai mai ko Kauai poe mai e noi ana e hoomoeia i paipu-wai mai Kekaha a Waimea, a ma ka noonoo ana ua aponoia ka hoike e waihoia ma ka papa a noonoo pu ia me ka bila haawina.
Na ke komite hoonaauao he hoike lokahi maluna o ka palapala noi haawina o $2,500 no ka halekula o Kaumana a ma ka hoike hoi a ke komite waiwai ua like ole a mahele lua no hoi ke komite, oia hoi, e kakoo ana i ka hooholo ana i ka bila a o kahi hapa hoi e ku-e ana. He bila keia i pili i ka haawi mana i ka panina o ka aelike o ka Hui Telegarapa Uweaolelo.
Na ke komite ola i waiho mai he hoike lokahi maluna o ka bila Senate 100 pili i na hooponopono rula o ka Papa Ola, oia hoi e hanaia me ka ae o ke Kiaaina. A na ia komite hookahi no he hoike maluna o ka bila e noi ana i ka Peresidena o ka Papa Ola e hoolako mai i ka Hale me na hoike pili i na hoolilo ame ke kumuwaiwai o ka halekuai o Kalaupapa no elua makahiki a Dekemaba 31 o ka makahiki i hala.
Na Holstein i hookomo bila e hookuu auhau ana no elima makahiki maluna o na waiwai paa ame waiwai lewa e hoohanaia ana no ka mahi laiki, a pau no hoi ka bila i ka heluhelu ekahiia.
A na Holstein no hoi i hookomo hou he bila e hoololi ana i ke kanawai pili i ka holo nui ana maluna o na uwapo. He bila hoi keia e hoomaopopo ana i ka hoopai o ka poe ku-e i ke kanawai a holo no hoi ka bila a Senate Brown i hookomo ai no ke kukulu ana i halekula kiekie no Hilo ma ka heluhelu ekolu, a hoopanee no hoi ka Hale.
Ka Aoao Maikai o ke Ola.
He mea maa mau i ka hapanui o kakou ka loaa ana o ka hauoli piha ana i kupono ai hoi e loaa io mai e like me ke kanawai o ke ola anal. Iwaena hoi o na mea heluhelu e hoopilihua ai a e hoopalupalu ai ia kakou o ke ola kino nawaliwali oia kekahi hiki mua. Ua olelo ae o Hannah More o ka hewa ua ulu mai no ia mailoko mai o ka opu inoino. Nolaila he mea kanalua ole o ke akepaa i hoopoinoia mamuli o ke koko inoino, oia ka mea nui nana e hookau iho i na nanaina kaumaha a oi aku mamua o kekahi mau mea e ae. O ke kuluma mau o ka pilikia i ka waihona hoowali ai, wahi a kekahi kauka Pelekane, oia ke alahele no ka poino o na lala o ke kino. A owai la hoi ka mea e hoomanawanui ana i ka hana pono ole a ka eha, a hoala mai hoi i na manao uluku makau no na ma'i like ole o ke kino ame ka waihona loko i kuluma mau i na kanaka. Ua like lakou me na ao hakumakuma e pohai mau ana maluna o ka lehulehu i hiki ole ke heluia. Ua hiki no ia oe ke ike i keia poe kanaka ma na ahi apau. No lakou he mea hiki ole ke olelo ae "he mau mea maikai ma ko lakou ma aoao." A mailoko mai oia mea e ake ana ko lakou mau naau e loaa ka palekana ame ke ola. O ka laau e like me WAMPOLES PREPARATIONS Aole ia i kau aku iwaena o ko lakou nohona ame ka ohohiaia e na kanaka mamuli o na kalahea wale ana ame na hoolaha e pai ana. Ua kono ia aku ia e lawe ae iaia mamuli o ka hookoia ana aku i ka mea i haiia aku ai ia lakou ua hiki iaia ke hana. O ke kau lana ana o keia laau he mea paa ia. He oi aku kona ono e like me ka aihona meli i huipuia me na mea hooulu a hoola o ka Pure Code Liver Oil i hoohuiia me ke Compound o ka Hyphoposphites, Extracts o ka Malt ame Wild Cherry. Aole he mea i oi o kona moolelo holomua no ka hoola ana i ke kanaka koko ole, haalulu o na lala, ka alaala, na ma'i o ka puu ame ke akemama ame na ano ma'i apau i loaa mai mamuli o ke koko maemae ole ame ka pono ole o ka waihona ai. O kana hana he kokua e ike aku i ka aoao maikai o ke ola. Ua olelo ae o Kauka W. H. B. Aikins o Canada penei: "Ke hauoli nei au e hai aku o ka hopena i loaa mai ma ka lawe ana iaia ua oi aku ka maikai ame ke kupono." O keia ame keia e lawe ana iaia he wahi hana kana i hana ai. "Aole loa ia e hoohoka ana."
E loaa ma na halekuai laau lapaau apau.
Ua Noonoo Anei oe ia Mea?
HE NUI KA POE E NOHO NEI MA HONOLULU NEI E HOIKE AKU ANA IA OE.
Eia kakou ke noho nei ma keia oia awiwi ana. He kakaikahi wale o kakou i hoolilo i ko kakou mau noonoo ana no na mea liilii, a he nui hoi ka poe e nanan nei i na eha a i ole opaopa paha ma ke kua he mea liilii ia. He kali aku lakou o ka hala ae, aole hoi he haawi i manawa e noonoo ai i ke kumu. E Hoomanao: O na Puupaa oia ka auwai hooholo mea ino ia no o ke kino, ke lawe nei na puupaa i na mea ino o ke kino, aka i kekahi manawa he paa no ka auwai lawe mea ino i na opala. Peia no na Puupaa. Aia na puupaa ke waiho la ma kahi uuku loa o ke kua, nolaila i ka manawa e paa ai e eha no ke kua, a o ka hopena he kua haneenee opaopa nawaliwali ke kua ame na mea lehulehu wale aku. He nui no na mea e hoike aku ai maluna o keia ninau, aka aole makou e ha'i aku maanei, no ka mea ke makemake nei makou e hoike aku ia oukou i ke ano o ka malama ana i na puupaa i mea e eha ole ai ke kua. Malia o hilinai ole mai oe ia makou nolaila ke waiho nei makou na kekahi o kou mau hoa e hoike ae i kana mea i ike ai:
Eia ka pane a Mr. W. F. Williams o loko o keia kulanakauhale, ka mea mai noho hoi ma ia hana iloko o 30 makahiki i kaa hope ae nei! "Owau kekahi o na kanaka oloko o na poe he lehulehu wale i loohia me nei mea he kikala haneenee. Aole i kanamai ka nui o ko"u eha ma ko"u lohe ana ala he laau e ola ai keia ano ma'i oia hoi na Huaale a Doan no ke Kikala Haneenee ame na Puupaa kuai aku la wai i kekahi o keia mau Huaale ma ka halekuai laau o ka Hui Kuai Laau o Hollister ma, a ai iho la i ua mau Huaale la. Ua loaa ia'u ka oluolu nui. A ke hoike aku nei au i keia wahi moolelo pokole na @ @ me i ike maka ai no'u iho no ka pomaikai o ka poe apau i ike ole ua hoea mai ka hapanui loa o na eha ma ke kua ame ke kikala mailoko mai o ka pilikia ana o na pupaa a o ka Laau Lapaau maikai loa no ia ano ma'i, oia na Huaale a Doan no ke Kikala Haneenee ame na Puupaa."
E kuai ia ana na Huaale a Doan no ke Kikala Haneenee ame Puupaa ma ke 50 keneta no ke poho e na poe kuai laau lapaau apau. E hoounaia aku no hoi maloko o ka Eke Leta ke loaa mai ke kumukuai ia Hollister Drug Co., Honolulu, na Agena Kuai Nui no ko Haaii Paeaina.
Ilio Aihue Nupepa.
Ma Makiki ae nei ua pahaohao mau kekahi mea lawe o ka nupepa namu Advertiser i ka nalowale mau o kana nupepa a hele okoa e ninau i ke keena i ke kumu o ka loaa ole ana aku o kana nupepa. Ua hoikeia aku he lawe mau ia aku no ka pepa, a hoopaa aku la na hakuhana o ka pepa e huli ana lakou i keia mea.
Ma ke kakahiaka nui o ka Poalima i hala ua hele aku la kekahi o na lunanui o ka Hui Hawaiian Gazette a pee iho la iloko o ka pa o ua mea lawe pepa nei, a malaila oia i ike ai i ka holo ana o ke keiki lawe nupepa a hoolei ae la i ka nupepa iloko o ka pa Aole i liuliu iho ike aku la oia i kekahi ilio i ka holo ana mai lalau iho la i ua nupepa la a huli aku la a hoi aku la i kona wahi. Ua hahaiia aku oia mahope a hiki i kekahi hale e nohoia ana e kekahi kanaka Hawaii, a ninauia aku la ua kanaka la.
"Nau anei keia ilio?"
"Ae; ihea oia i loaa mai nei ia oe?"
"Nau anei keia pepa?" i ninau hou ia aku ai oia.
"Aole; aole i maopopo ia'u kahi e loaa mau mai nei kana pepa i kela ame keia kakahiaka."
Ua laweia aku ua iio la a hoikeia aku i ka mea hoohalahala, a maopopo iho la iaia ka mea nana e lawe mau nei i kanapepa. Ua hookuuia ka ilio mahope no nae o kona loaa pono ana i ka aihue nupepa. Pono paha e kii i palapala hopu no ka ilio aihue?
HOOLAHA HOOKO MORAKI.
HOOLAHA PANIKU A KUAI A KA MEA PAA MORAKI.
LAVINIA KAPU (W).
I kulike ai me na manao o kekahi moraki i hanaia e Lavinia Kapu (w) wahine- kane-make, o Honolulu, Mokupuni o Oahu, Teritori o Hawaii, ia S. I. Shaw, o Honolulu i oleloia, i hanaia i ka la 1 o Augate, A. D. 1901, a i kakau kopeia iloko o ko Hawaii Keena Kakaukope iloko o ka buke 227, aoao 187, a i hooliloia e S. I. Shaw i oleloia ia Frank C. Betters, ma kekahi palapala hoolilo i hanaia i ka la 6 o Mei, 1902, i kakau kope pono ia iloko o ke Keena Kakaukope i oleloia.
Ma keia ke haawiia aku nei ka hoolaha o Frank C. Betters i oleloia mea malama moraki o ka moraki i oleloia, ke manao nei e paniku i ka moraki i oleloia no ke kumu i uha'lia, oia hoi: no ka uku ole ia ana o ke kumupaa ama ka ukupanee i ka manawa e uku ai.
A pela no hoi mahope o ka pau ana o na pule ekolu mai ka la aku o keia hoolaha ana, o ka waiwai i paa ma ia moraki i oleloia a e hoakakaia nei malalo iho nei e kuaiia aku ana ma ke kudala akea ma na keena kudala o James F. Morgan, Lunakudala, ma alanui Kaahumanu iloko o Honolulu i oleloia, ma ka Poaono ka la 6 o Mei, A. D. 1905, ma ka hora 12 awakea o ka la i oleloia.
O ka waiwai i hooliloia e ua moraki la i loeloia a e manao ia nei no ke kuai aku oia iho keia:
O kela apana apau loa a i ole hapa o ka aina e waiho la ma Kalauao, Ewa, Mokupuni o Oahu. I hoakakaia iloko o ka Palapala Sila Nui Helu 746, L. C. A. Helu 9353 ia Palau, nona ka iliaina o 6 - 10 eka, o ua aina la i oleloia, aia malalo o ka hoolimalima ia Woodlawn Fruit Company no ka manawa hoolimalima o 15 makahiki mai Sepatemaba 1, 1899, ma ka uku hoolimalima o $40 no ka makahiki.
No na mea aku i koe e loaa aku mai ia C. F. Peterson, loio no ka mea Malama o ka mea paa Moraki i oleloia, a mai ia James F. Morgan, Lunakudala.
Hanaia ma Honolulu, Aperila 12, 1905.
FRANK C. BETTERS,
Mea Malama Moraki.
303 - Apr. 14, 21, 28 - May 5.
Paakiki ka Lepo.
LOAA I KA MEA I MA'I KA LAAU NANA E HOOLA.
ELUA MAKAHIKI ILOKO O KA NAWALIWALI A HIKI OLE KE HANA -
HE HOOKAHI KAKINI KAUKA I HOA'O A'E E HOOLA KA LAPAAU ANA I OLA AI.
O na poe apau loa i loaa i ka nawaliwali mamuli o ka hemo maikai ole o ka lepo ame ka hiki ole i ka opu hoowali ai ke hana i kana hana he mea pono e heluhelu a'e i keia moolelo o ke ola ana o Mrs. Nettie Darvoux mai ka ma'i mai o kona opu i manaoia ai aole e ola ana.
"O ka loaa nawaliwali ana no eiwa makahiki aole ia he ola maikai," wahi a mrs. Darvoux i kona manawa i noiia aku ai e hoike mai i kona moolelo o ka hooiaia ana. "No elua makahiki ua nawaliwali loa ia wau a hiki ole ia'u ke hana aku i ka'u mau hana o ka hale, a i kekahi manawa ua nawaliwali loa ia wa a hiki ole ia'u ke hele. O ko'u pilikia oia ka paa o ka hanalepo. Ua wiwi mai la wau a o-pa na helehelena. Aole he ono mai o ka'u ai a ua hiki ole ia'u ke lawe a'e i ka ai me ka loaa ole mai o ka ehaeha."
"Ua lapaauia anei oe e na kauka?"
"Ae, ua lawe wau i na laau a hookahi kakini kauka, eia na'e aole i loaa mai he pomaikai no'u ma ia lawe ana."
"Pehea oe i hiki ai ma ke alahela o ke oia?"
"Ua hooieiia mai kekahi buke e pili ana i ka laau Dr. Williams' Pink Pills iloko o ko makou pa i kekahi la. Na kuu kane i lawe mai a heluhelu iho la i ua buke nei mai ka hoomaka ana a hiki i ka pau ana. Ua noonoo nui loa oia i na mea i ha'iia ma ua buke la e ka poe i hooiaia e keia mau huaale i ko lakou manawa i kuai ai, nolaila ua kuai koke aku la oia he ekolu mau pahu o keia mau huaale a koi ikaika mai ia ia'u e lawe."
"Ua loaa anei he ola ia oe ma ia lawe ana?"
"I ka lua o na la a'u i lawe ai i keia mau huaale hoomaka mai la wau e ike i ko'u maikai a'e, a i ka manawa i pau ai na pahu ekolu ua oia loa iho la au. He hiki loa i na Huaale Akala a Kauka Williams no ka Poe Haikea ke hoola ia mea hookahi, a he ola pau pono loa hoi kana oiai he loihi loa ka manawa i hala a'e nei mahope o ko'u hooiaia ana aole wau i loaa hou ika nawaliwali a ke ike nei no hoi wau he ola mau kana."
O ka hana maikai loa e hooikaika ai i ka hoowali ana i ka ai o ka opu oia ka mea maikai loa e hoohana aku ai. O ka Huaale Akala a Kauka Williams no ka Poe Haikea eia oia ke haai nei i ke ola hou iloko o ke koko. Aole loa he laau hoola e a'e e hikiwawe ai ka loaa ana o ke koko maikai e like me keia e loaa ai no hoi ke olakino maikai
Aia o Mrs. Darvoux ke noho nei ma ka Helu 497. Alanui Sixth, Detroit, Mich., eia ka Dr. Williams' Pink Pills ke kuaii nei ma na halekuai laau lapaau a puni ke ao holookoa. O ka poe i loaa i ka nawaliwali e like a'e la me ia i hoikeia a'e la maluna, he mea pono e kauoha aku ia DR. WILLIAMS MEDICINE COMPANY, SCHENECTADY, N. Y., no ka buke i kapaia "Ka Mea e Ai ai ame ke ano o ka Ai ana."
KA IKAIKA O KA LAAU HAMO A CHAMBERLAIN E HANA AI.
No ka ikaika maoli o ka laau hamo a Chamberlain aohe he mea like me ia. O na eha o na i'o paahana, pehu a ano maeele e pau koke no ia mau ino ma ke kau ana i keia laau hamo. He hookahi no kau ana e noho malie loa ai ka eha o ka aoao, a ma ka umauma paha a aohe mea like me ia ke hookuku ae ma ke ano he laau hamo mawaho, no ka rumatika. No na eha moku ame na palapu aohe mea oi ae i keia. No ke kuai ana e loaa no ke hele ae ia Benson, Smith & Co., Ltd., na Agena no Hawaii Paeaina.
HOOLAHA AINA AUPUNI.
HOOLAHA AINA AUPUNI.
Ma keia ke haawiia aku nei ka hoolaha ma a mahope aku o ka hora 9 a.m. o na la, a ma na wahi i ha'iia malalo iho nei, e waihoia mai no na palapala noi malalo o na manao o ka Hapa VII (Kuleana Kuai Hoolimalima) Kanawai Aina o 1895, no na apana o ka Aina Aupuni malalo iho nei:
1. Poaono, Mei 13, 1905, ma ke Keona o ka Hope-Agena Aina, Hilo, Hawaii.
Apana 67, Palapala-aina 23, Olaa, Puna, Hawaii. Iliaina 8.30 eka. Papa, aina mahi. Kumuwaiwai haahaa $207.50.
Apana 68, Palapala-aina 23, Olaa, Puna, Hawaii. Iliaina 10.00 eka. Papa aina-mahi. Kumuwaiwai haahaa, $230.00.
2. Poaono, Mei 20, 1905, ma ke Keena o ka Hope-Agena Aina. Hale Hookolokolo, Honokaa, Hawaii.
Na Apana 41, 72 ame 73 (ma ke ano hookahi apana). Palapala-aina 27A. Kapahu, Hamakua, Hawaii.
Iliaina, 15.85 eka. Papa, aina-mahi. Kumuwaiwai haahaa $158.50.
Apana 3, Palapala-aina 12. Niupea, Hamakua, Hawaii.
Iliaina 16.84 eka. Papa, aina-mahi. Kumuwaiwai haahaa $202.08.
Apana 19, Palapala-aina 12. Niupea, Hamakua, hawaii. Iliaina 40.58 eka. Papa aina-mahi. Kumuwaiwai haahaa $405.80.
Apana 7, Palapala-aina 10. Ahualoa, Hamakua, Hawaii.
Iliaina 65.70 eka. Papa aina-mahi. Kumuwaiwai haahaa o ka aina $657.00. Kumuwaiwai haahaa o na hana hou $75, e uku kuikeia ma ke dala gula Amerika ma ka la o ke noi no ka aina.
Apana 19A, Palapala-aina 10. Ahualoa, Hamakua, Hawaii. Iliaina 22.70 eka. Papa, aina-mahi. Kumuwaiwai haahaa $227.00.
O na kii o na aina ame na kuhikuhi piha e pili ana i na mea e kupono ai ka mea e noi ana ke ano o ke noi ana etc., e loaa aku no mai ke Keena o na Aina Aupuni, Honolulu, Keena Aina Hilo a i ole Luna Aina Apana Aina 2 (Joseph Pritchard, Esq.,) Honokaa, Hawaii.
JAS. W. PRATT,
Komisina o na Aina Aupuni.
Honolulu, Aperila 10, 1905.
3063 - Apr. 14, 21, 28 - May 5, 12.
HOOLAHA MANA HOOKOLOKOLO
ILOKO O KA AHA KAAPUNI O KA APANA KAAPUNI ELIMA
TERITORI O HAWAII. MA NA KEENA HOOPONOPONO WAIWAI.
ILOKO O KA HANA O KA WAIWAI O HEKELA (W) O
HANAMAULU, KAUAI, I MAKE.
Kauoha o ka Hoolaha no ka Hoolohe ana i ka Palapala Noi no ka Oihana Lunahooponopono Waiwai.
Ma ka heluhelu ana ame ka waiho a ana mai o ka Palapala Noi a Hu Wa o Koloa, Kauai, e hoike ana ua make o Hokela (w) o Hanamaulu me ke kauoha oie ma Hanamaulu i ka makahiki A. D. 1902, e waiho ana he waiwai iloko o ko Hawaii Paeaina i kupono @ noho lunahooponoponoia, e noi ana @ hoopukaia mai i mau leta o ka oihana lunahooponopono waiwai ia J. H. Coney.
Ke kauohaia nei o ka Poaha, ka la 11 o Mei, A. D. 1905, ma ka hora 10 a.m. o ia a ma keia ke kohoia nei i manawa no ka hoolohe ana i ke no i oleloia iloko o ke Keena Hookolokolo o keia Aha ma Lihue a ma keia manawa ame kahi e hiki ae ai na poe apau i kuleana ilaila a e hoike ae i na kumu ina he mau kumu kekahi, no keaha la e ae ole la ia ai ke noi i oleloia, a he hoilaha o keia kauoha e hoopukaia ma ka olelo Hawaii no ekolu pule nupepa iloko o ka 'Nupepa Kuokoa," he nupepa iloko o Honolulu.
Hanaia ma Lihue, Maraki 25, 1905.
(Kakauinoaia) J. HARDY.
Lunakanawai o ka Aha Kaapuni o ka Apana Kaapuni Elima.
Ikemakaia: - JNO. A. PALMER.
Kakauolelo o ka Aha Kaapuni o ka Apana Kaapuni Elima.
3061 - Mch. 31 - Apr. 7, 14, 21.
ILOKO O KA AHA KAAPUNI O KA APANA KAAPUNI EKAHI.
TERITORI O HAWAII. ILOKO O KE KEENA HOOPONOPONO WAIWAI.
Iloko o ka Hana o ka Waiwai o Kawaihaunuiokahoupookane, i kapa ia ma ka inoa Kawaihau Mahuka i make. Imua o Lunakanawai Alexander Lindsay Jr. Kauoha o ka Hoolaha o ka Palapala Noi ko @ Ae ana o ka Papahelu Waiwai Hope loa ame ka Hookuu ana iloko o keia Waiwai.
Ma ka heluhelu ame ka waihoia ana mai o ka Palapala Noi ame ka Papahelu Waiwai o Pahia Mahuka (w), Mokupuni o Oahu, Teritori o Hawaii. Mea Hooko o ka Waiwai o Kawaihaunuiokahoupookane i kapaia ma ka inoa Kawaihau Mahuka, iloko olaila e noi ana oia e aeia aku i $25.15 a kaki ai oia iaia iho me ka huina o $….. a e noi pu ana e nana pono ia mai ia mea hookahi, a e aponoia, a e hanaia i kauoha hope loa no ka Pujnaue ana o ka waiwai i koe iloko o kona mau lima i ka poe apau i kuleana ia mea, a e hookuu ana iaia ame kona mau hope hoopaa mai na ko'iko'i hou aku ma ke ano unahooponopono waiwai.
A ua kauohaia o ka Poakahi ka la 22 o Mei, A. D. 1905, ma ka hora 10 a.m. imua o ka Lunakanawai o ka Aha i oleloia ma ke Keena Hookolokolo o ka Aha i oleloia ma Honolulu, Mokupuni o Oahu, a ma keia ke kohoia nei oia ka manawa ame kahi no ka hoolohe ana i ka Palapala Noi i oleloia ame ka Papahelu Waiwai a e akoakoa ae ka poe apau i komo kuleana ilaila a hoike ae i na kumu ina he mau kumu kahi a lakou no keaha la e ae ole ia ai ia mea a e waiho pu ae i na hoike i ka poe i komo kuleana i ka waiwai i oleloia. A he hoolaha no keia Kauoha, iloko o na olelo Beritania ame Hawaii, e hoolahaia iloko o ka Pacific Commercial Advertiser ame ka Nupepa Kuokoa he mau nupepa i pa'iia a hoolahaia iloko o Honolulu, hookahi manawa o ka pule, no ekolu pule neepapa, o ka hoolaha hope loa e puka no la aole e kaa malalo o elua pule mamua o ka manawa oloko nei i kohoia no ka hoolohe ana i oleloia.
Hanaia ma Honolulu i keia la 10 o Aperila, 1905.
(Kakauinoaia) Alexander Lindsay Jr.
Lunakanawai Elua o ka Aha Kaapuni o ka Apana Kaapuni Ekahi.
Ikemaka: - Wm. R. Sims.
Kakauolelo o ka Aha Kaapuni o ka Apana Kaapuni Ekahi.
3063 - Apr. 14, 21, 28 - May 5.
HOOLAHA AINA AUPUNI.
HOOLAHA AINA AUPUNI.
AWAWA O PALOLO.
Ma keia ke haawiia aku nei ka hoolaha ma a mahope aku o ka hora 9 a.m. Poakahi, Aperila 24, 1905, e waihoia mai no na palapala noi malalo o na manao o ka Hapa VII (Kuleana Kuai Hoolimalima) Kanawai Aina o 1895 ma ke Keena Aina Aupuni Hale Hookolokolo, Honolulu, no keia mau apana ana o ka Aina Aupuni malalo iho nei:
20 apana aina kula mahiai ma ke Awawa o Palolo, Kona, Oahu, no lakou ka iliaina mai ka 2.17 eka a hiki i ke 31.30 eka pokahi.
O keia mau aina ala ma kahi o elua mile mai ke alanui hao o ka Hui Kaauwila e holo nei no Kaimuki.
Ua hookoe ke aupuni i ka pono o kanalima Kapuai ololi maluna o kekahi a i ole maluna o na aina apau loa, ina i makemakeia ia mau wahi no ka hana ana i mau alanui aupuni; a oia mau wahi e hoike la no e like me ka manao ana o ka luna aupuni i waihoia aku ai no ka hana i na alanui aupuni iloko o keia Apana a e laweia no me ka ukupanai ole no na wahi i hana hou ole ia.
O ke kumu waiwai haahaa loa o kela mau aina maluna ae mai ka $4.00 a hiki i ka $100.00 o ka eka.
O na kii o na aina ame na kuhikuhi piha e pili ana i na mea e kupono ai ka mea e noi ae ana, ke ano o ke noi ana, etc., e loaa aku no mai ke Keena o na Aina Aupuni, Hale Hookolokolo, Honolulu.
JAS. W. PRATT,
Komisina o na Aina Aupuni.
Honolulu, T. H., Maraki 23, 1905.
3061 - Mch. 31 - Apr. 7, 14, 21.