Ka Nupepa Kuokoa, Volume XLIII, Number 6, 10 Pepeluali 1905 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

MAKAIKIU

WETE * DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

MOKUNA XLV.

NOHAE KA UPENA I KUUIA

            "O oe paha kekahi makaikiu ike ole aʻu i ike ai.  Ua hiki oe ke hukihuki wale ia ma ka ihu a alakaiia aku i kahi e hiki ai ke lilo aku kou ola, e like iho la me kou alakaiia ana mai la a paa iho la oe iloko nei o keia lumi."

            Maanei i hoomaka ae ai ka kaua Wete e hoike i kona maalea nui, e puni wale mai ai kona mau hoa papaleo iaia, nolaila aa pane aku la oia me ke ano hoomakaʻukaʻu, me kona nee pu ana aku no nae hoi imua o Ke-pa:

            "O, he kanaka helehelena maikai hoi oe i like ole aku me ko ianei; nolaila, e oluolu hoi oe e hoomakaʻukaʻu ole mai iaʻu."

            Ua paneia aku keia mau olelo me ka leo nui pu, alaila ku iki iho la oia a lele aku la me ka hikiwawe me ka puka pu ana aku o na huaolelo hailiili, a iloko o ka imo ana a ka maka, poha ana ka puupuu a ua Wete la a kaua i ke kumupepeiao o Ke-pa a waiho lolo ana ua kanaka la iluna o ka papahele.

            E like hoi me ka lele ana a kekahi tiga pololi, pela no hoi aa Wete nei a kana i huli ae ai me kona manao e lele aku maluna o Keaka, eia nae ua ku koke ae ua Keaka la iluna a aia oia ke ku mai la me ka makaukau ma kona aoao e pale mai i ka kaua Wete.  Mahope iho no nae o ke kali ana o ka kaua Wete no kekahi hapa sekona paha, na lele koke aku la o Wete imua a ike pu aku la no hoi oia i ka makaukau o kona hoa e lawelawe lima maoli mai, aole hoi me na mea eha.

            O keia ka Wete mea i makemake ai, oiai aole ona makemake e lohe mai kekahi poe mawaho i na mea e hanaia ana iloko o ka lumi i kela manawa, ina o ka laua paio i kela manawa a ma na pu punapuna, a me he mea la o ko Keaka manao pu no paha ia ia manawa oiai aole oia i wehe ae i kana mau mea eha, a mawaho ae o ia me he mea la ua hilinai piha ua Keaka la i kona ikaika, oiai ma ka hookuku ana i na kino o laua o Keaka no ke kanaka kino nui.

            I kinohi no poha ana ka papalina o ua Keaka la i ka puupuu a Wete, aole nae o ka ikaika loa, a na keia mea i hoa ae i ka inaina o Keaka no ka kaua Wete, a lele mai la oia me ka haawi pu ana mai i kekahi puupuu ikaika loa maluna o ka kaua Wete.

            I ko Wete loaa ana i keia puupuu mai kona hoa mai, ike koke iho la oia i ka mahanahana, a hoomaopopo pu iho la no hoi oia, o kona hoa paio he kanaka oia i loaa he wahi maamaalea ma ka hoolei puupuu ana, a o kona manawa no hoi ia i malama loa ai iaia iho.

            I ko Keaka ike ana e ku aku ana no kona hoapaio me ka newa ole, na lele hou mai la oia imua me ka hoopuka pu ana mai i na huaolelo hailiili, a aia hoi ka manaolana iloko ona, o keia kana puupuu e moe malie ai ua Wete nei a kaua, eia nae ua kuhihewa oia ma ia manao ana, oiai mamua o ka halawai ana ae o ka laua mau puupuu, ua loaa e aku la ua Keaka nei i kekahi puupuu malalo o ka auwae, a hikaka ana oia a pilipu ma kekahi paia o ka lumi.

            "Ahe, he hiki no i ke keiki ke wauwau mai i ke kanaka makua." wahi a Keaka i pane mai ai, me ka nau ana iho o kona mau kuʻi, a makaukau hou mai la oia e lele mai maluna o ka kaua Wete.

            "Ae, he ike no ke keiki ia ano hana," wahi a ka kaua Wete, a hoomakaukau pu iho la no hoi no ke pale ana iaia iho.  Ike pu aku la no hoi ka kaua Wete eia kona hoa ke makemake nei e hakoko laua, a ke imi mai nei o Keaka e loaa kona mau wahi hemahema, nolaila hookuu ae la ua Wete nei a kaua i kona pale ana nona iho a haawi aku la i kahi a kona hoa e ake mai ana e loaa.

            Ia manawa no i kani ae ai ka Keaka aka, oiaia ua ike mai la oia i ko Wete hemahema, a oia no hoi kona manawa i lele mai ai me ka manao e puili i ua Wete la a kaua.

            No ka kaua Wete hoi, aole ona manao e hakoko aku me kona hoapaio nolaila i ka lele ana mai o kona hoapaio, oia no ka manawa i pii ae ai ka limaakau o na Wete nei, a i ka iho ana iho ilalo, ua like me kekahi hamare a ke kanaka amara, e uwe ana hoi: ke kumupepeiao hema o kona hoa, a iloko o ka imo ana a ka maka, waiho ana ua Keaka la iluna o ka papahele, ua maule i ka puupuu a ke keiki aiwaiu.

            Lele koke iho la ua Wete nei a kaua a nakinaki iho la ia Keaka a paa, a i kona ku ana ae iluna e anehe ae ana o Kepa e ala iluna mai kona moe ana iluna o ka papahele.  Ua lele koke aku la oia a nakinaki iho la ia Ke-pa a paa, alaila noho iho la oia iluna o ka moe e hoomaha ana i ka luhi o na ekona mamua iho.

            Aole i liuliu iho aia ua lima o ua Wete nei a kaua ke haha la iloko o na pakeke o kona mau hoa, e huli ana hoi i na mea e loaa aku ana iaia; eia nae aole he mau mea ano nui i loaa aku iaia e pili ana no kana hana e hana nei, koe wale no na mea eha a ua mau kanaka la e waiho ana iloko o ko laua mau pakeke.

            O Ke-pa no ko laua mea mua loa i ala mai ai, a aole no hoi i liuliu iho ua ala mai no hoi o Keaka, a ma ka Wete hoomaopopo aku, o Keaka no ko laua kanaka i maamaalea loa, a ma ia ano no ua lilo ka puupuu a Wete i mea hooponiniu wale no iaia.

            O Keaka no ko laua kanaka i ala ae ai a hoomaka ae la e kupaka, a hoopuka pu mai no hoi i na huaolelo hailiili, oiai o Ke-pa e noho ana no me kona hoao ana ae e lomilomi i kona wahi i eha.

            "Ea, he ike no ka ke keiki i ka wauwau," wahi a Keaka i pane ae ai.

            Ua hoholo ae la he wahi minoaka maluna o ko Ke-pa mau papalina no keia mau olelo, eia nae aia pu no he inaina iloko oia mau minoaka ana.

            "Ano, e oʻu mau hoa," wahi a Wete i pane aku ai "me keia hiki ia kakou pakahi ke kukakuka like me ka maikai mamua hoi o ka wa mua a olua i lawe mai nei iaʻu iloko nei o keia lumi."

            Maanei i hoike hou ae ai o Keaka i kona manao inaina ma kona hoao ana ae e moku i kona mau kaula i nakinakiia.

            "He mea waiwaiole kou kupaka ana ae," wahi a Wete i pane aku ai me kona minoaka pu ana ae.

            "Ina no hoi e hemo ana kuu mau lima no elima minute wale no" wahi a Keaka i pane ae ai.

            "A ina e homo ana kou mau lima, heaha iho la?" i pane aku ai ka kaua Wete.

            "E ike koke no oe i kou eha iaʻu."

            "Pela anei? Ina pela aole no hoi ia he mea hewa o ka hoao hou no hoi.  He oiaio he mea maikai ka haawi hou ana aku i manawa nou e hoike ai i kou ikaika, nolaila e hoao hou no paha ka laau lapaau."

            Me keia mau olelo a Wete, kii aku la oia i na mea eha a ua kanaka la, ka pu panapana ame ka pahi, a kiola aku la iluna o kahi moe.  Kukuli iho la oia ilalo a wehewehe ae la i na kaula ana i nakinaki ai ia Keaka, alaila wehe ae la no hoi oia i kana pahi ame kana mau pu panapana a waiho aku la iluna o ka moe.

            "Ano," wahi a Wete i pau aku ai, "eia kau mau mea eha ke waiho mai la iluna o ka moe, aia no hoi malaila kaʻu mau kea eha, a ma keia ano aole o kaua mea e lawelawe ana i na mea eha, a ua hiki hoi ia kaua ke hakaka lima e like me ka loihi o ka kaua manawa i makemake ai.  Ua makaukau anei oe?"

            Mamuli o ko Wete ano hoonuinui ma keia mau olelo ana, huipu me ka loaa ana aku o ua Keaka la i ka puupuu mahanahana nana i kulaʻi iaia ilalo, ua pii ae la ka inaina o ua kanaka la, a aia na huaolelo hailiili ke puka la mai kona waha mai, a ke lelele la oia iloko o ka lumi, eia nae aole oia i anehe hou aku e hoopapa i ua Wete la a kaua.

            "Eaha ana hoi oe?" wahi a Wete i pae aku ai, "aole anei oe e aa hou mai ana e paio me aʻu a i ole ke kali mai nei anei oe a naʻu e lele mua aku?"

            "Kulikuli oe,  Ke maopopo ole aku nei iaʻu kau mau mea e olelo mai nei." wahi a ua Keaka la i pane mai ai, me kona ano hoohewale.

            "Ua pono iho la." wahi hou a Wete, "ina ke kali mai nei oe naʻu ka hana mua, alaila eia mai."

            Me keia mau olelo a me ke kali ole iho no hoi, hele aku la ua Wete nei a kaua imua o Keaka a hopu aku la a paa ka a-i, a mamua o ka hiki ana ia Keaka ke pale mai nona iho, mañana ana oia iluna o ka lewa a kuwalaia ana a pahu iluna o ka papahele, o ke poo malalo a o na wawae ka i iluna.  He u ka mea i loheia moe malie ana ua Keaka la ua maule i keia hana a ka kaua makaikiu.

            "Pehea iho la ia?" wahi a Wete i pane iho ai maluna, oiai oia e ku haaheo ana maluna o kona hoapaio, " he makemake anei kou e haawi hou aku wau i kekahi mea i like iho la me ia, a i ole ua lawa iho la no oe?"

            Aole he huaolelo pane a Keaka, oiai aia oia ke wai mauʻe la me kona ike ole ae i ke ku iho o ka kaua Wete maluna me ka haaheo nui, he ole hoi ka lohe iho i keia mau olelo hookela a ua Wete nei a kaua.

            Mahope o ka hala ana o kekahi mau minute, ua pohala ae la ua Keaka la, a aole no hoi i liuliu iho ku ae la oia iluna, a palepale ae la i ka lepo o kona lole, alaila pane mai la oia me ka leo malie:

            "Heaha la kou ano?"

            "He wahi keiki umiumi ole a he hiki no hoi ke wauwau wale iho no; he makaikiu ike ole, e like hoi me ka Ke-pa i olelo iho nei."

            Me ka inaina iluna o na maka o ua Keaka la, ua huli aku la oia a pane aku la ia Ke-pa:

            "Heaha ke ano o keia hana a kaua e hana nei?"

            "Aole wau i ike mua he kanaka oi loa aku keia o ka ikaika," wahi a Ke-pa i pane mai ai a oia wale no kana wahi pane ia manawa, oiai ua hele mai la oia a makaʻu maoli i kona ikemaka ana i na hana a Wete i hana aku ai maluna o kona hoaloha, oiai iaia e moe ana iluna o ka papahele aia no oia ke hakilo la i na hana a Wete e hana ana maluna o Keaka.

            "Nau hoi keia hana, nolaila he mea pono ia oe ke ike i na mea apau.  Ua pau ae la kaʻu hana me oe i keia manawa, a ina oe e ae oluolu mai ana alaila e hoopau ae i keia hana maanei."

            "Owau ke ae ole ana e hoopau ae i keia mea," wahi a Wete i pane aku ai.  "Ke manao nei no hoi wau ua hiki ia oe ke hana pu mau me aʻu."

            "Heaha ia ano hana?" i ninau aku ai o Keaka.

            "He hana no hoi e like iho la me ia au i hana mua iho nei."

            "Pehea e hana aku ai?"

            "He uku hou i haawiia ai e hana mai i keia hana maluna oʻu?"

            "Pela io no, a no kekahi manawa wale no, ina nae e hiki ana."

            "Alaila, e pepehi iho olua iaʻu a make, oia anei?"

            "Ua loaa mai la ka mea oiaio ia oe."

            "He uku kiekie no hoi ko olua i haawiia ai e ko olua mea nana i hoohana mai?"

            "Ua pololei kau i koho mai la."

            "Owai o olua ka mea nana i kukakuka a hoonohonoho pu i keia hana?"

            "O Ke-pa."

            "E kii aku oe a e wehw ae iaia, ina nae oe e oluolu ana, a mahope aku e noho iho no hoi kakou a kamakamailio pu i na mea e pili ana i keia hana a olua i hoohanaia mai ai.  Ke manao nei wau e hiki ana no iaʻu ke kuhikuhi aku ia olua i kekahi alahele e loaa ai he mau dala mahuahua ia olua me ka nui ole o ka hana a me ka hana ole no hoi ma ko olua aoao.  Pehea, ke makemake mai la anei olua i keia?"

            "E hoao mai oe ia maua."

            "He kane anei a i ole he wahi anei ka mea i hui kukakuka pu me oe e Ke-pa?" i huli aku ai o Wete a ninau ia Kepa i kona manawa i ku ae ai maluna ae o ka papahele.

            "He wahine ka mea i hui mai me aʻu.  Aole wau i ike i kekahi kane iloko o keia mea."

            "Ua loaa anei ia oe ka inoa a ua wahine la?"

            "Ke manao nei wau he mea pono iaʻu ke hoike ae i na mea apau e Keaka?" wahi a Ke-pa i huli ae ai a ninau aku la ia Keaka.

            "E hoike aku i na mea apau iaia, oiai aole oʻu makemake i keia hana au i hoohuikau pu ai iaʻu iloko, a loaa iho la keia mau palapu iluna oʻu."

            "O Kaunawahine Alamazofa kona inoa, he kamaʻliiwahine hoi no Rusia."

            "Ua ike anei oe i kekahi mea e pili ana no keia kanaka, oia hoi o Ivana Horawiki, au hoi i kamailio iho nei i na mea e pili ana iaia?" i hoomau aku ai o Wete i kana ninaninau ana.

            "Aole loa aʻu mea i ike ai nona."

            "Nau no anei e hele aku ana e hoike aku i keia wahine i na mea apau e pili ana i keia hana a olua i manao iho nei e hana mai maluna oʻu?"

            "Ae, i keia auwina la no."

            "Ihea oe e hoike aku ai iaia?"

            "I kona hale no."

            "Ua ukuia anei olua mamua no keia hana?"

            "He hapa wale no, a o kekahi hapa aku mahope o ka pau aaa o keia hana."

            "E loaa mai ana ia uku ia olua, a e oi aku ana no paha, ina nae olua e hana mai ana malalo o kaʻu mau kuhikuhi ana.  Heaha hoi kau pane ma keia, e Keaha?" wahi a Wete.

            "O ka mea e holo mai ana ia olua ua pono iho la no ia iaʻu."

            "Alaila, ua pono iho la keia, e Ke-pa, e oluolu oe e hui pu me aʻu i keia auwina la, i ka hora elua paha."

            "E kali no wau ia oe ia manawa au i haʻi mai la."

            "Aole no nae oe e haalele iho i keia wahi a hiki i koʻu hoi ana mai."

            "No keaha hoi?"

            "Mai ninau mai oe i kekahi ninau.  Aole anei ina e uku aku a naʻu hoi ke kauoha, he hoolohe wale mai no hoi ka olua?"

            "Ua pono oe," wahi a Keaka i pane mai ai, e hoonaukiuki ana hoi i ka Ke-pa ninau hoohuahualau.

            "Aia ke manao nei____>" wahi a Ke-pa i pane mai ai, i ka manawa a Keaka i kahamaha aku ai iaia:

            "E hoopaa oe i kou waha, e Ke-pa!  He nui kou hoolalau ma keia mau mea, a ua hiki mai ka manawa nou e hoopaa ai i kou waha."

            Maanei, e like me ka Ke-pa i haʻi aku ai ia Ke-pa, ua paa iho la kona waha, a ia manawa no hoi i ku ae ai o Wete iluna, a noi aku la i ke ki ia Keaka, a puka aku la oia iwaho, laka mai la i ka puka a haalele iho la i kona mau hoa papaleo o na minute i kaahope ae.

 

MOKUNA XLVI.

NA KE-PA ELUA.

            I mea e halawai ulia ole ai ua Wete la a kaua me Kaunawahine Sofia nolaila o ka hana mua ma kona aoao i kona manawa i puka aku ai mawaho o ke alanui a laua i komo mai ai, oia no kona hele ana aku i kahi keena ona maluna ae o ka hale inu rama.  Malaila oia i hoololi ai i kona helehelena, alaila hoi aku la oia e ike ia Vera.

            I kona manawa no i hoike aku ai iaia iho ia Vera, o ka pa koke mai la no ia o ka ninau:

            "He meahou anei kekahi i loaa mai nei no Ivana?"

            "Aole he mea ano nui loa, i keia manawa no nae he mea pono ia oe e hoomakaukau no ka hui ana aku me ia iloko paha o na hora he kanakolu-kumamaono."

            "Ina paha aole au meahou nona, heaha hoi kou mea i olelo mai la pela?"

            "No ka mea ke ike aku nei wau i ke ano o ka moe ana o na mea apau i hana ia no kaua.  Aole anei he mea pono ia oe e hoopau iho i kou mau manao uluhua?"

            "E hoao no wau, ke hiki nae."

            "Ina, e noho iho oe me ka hoomanao ana i kaʻu mau aʻo ana ia oe e pili ana i kou haalele ana iho i kou lumi."

            "E hoomanao no wau."

            "Eia kaʻu aʻo hope loa ia oe, malia paha o kakau mai wau ia oe i kekahi leta, ke hiki io mai ka manawa aʻu e hana ai pela, a ina e kakau leta mai wau ia oe, e hoomanao oe i keia.  E nana oe ma ka aoao malalo ma ke kihi hema no keia ma-ka."

            (Aole i pau.)

 

KALE O LEONA

Ka Naita Puuwai

Hao Wiwoole---

KA HOOPAKELE O KE KAIKAMAHINE ALII I LAWE MALUIA.

MOKUNA XIX.

KA LUAPAAHAO O KA HALEPAAHAO POOKANAKA.

            O kekahi mea i maopopo ia Kale oia no ka lilo io o ka @ o ke Alakai Mahomeda i ona la, eia nae, aole me Beni @ kuleana hookuu i ka paahao mai ka hoopai ana.  Ua loaa keia @ wina hoaloha iloko o ka Naita Mahomeda mamuli o kona @ i ka oiaio ame ke keonimana o ka Naita Kristiano ame ka @ mai a lehia ma ka oihana hakaka, ana hoi i ikemaka ai @ hakaka kino ana me ia ame ka haule ana o ka lunakanawai @ Hame.

            Ua hiki aku la lakou i ka halepaahao i ka po me ka @ kekahi kuia a hoopaaia aku la no hoi na paahao iloko o ka paahao no ka laa o ka manawa ia Kale o Leona.  Ua @ olioli iloko o ka lunapaahao i kona ike ana i ka naita @ maha iho la no hoi kona uluku nui ana no kona poino.

            Ua laws like ia auk no hop o Kale ame Pidero iloko o ka luapaahao o ka Halepaahao Pookanaka.  He luapaahao ia e hiki@ kekahi ke pakele no ka mea aohe he wahi ipuka hui kupono @ kino kanaka e puka ai o kekahi ano e loaa ai ma kona @.  Aia no he mau pukaaniani aole nae i oi aku maluna o ekolu @ laula a eono iniha ka loa.  Ua hoopaa pu ia aku no hoi ma ko @ may wawae na kaulahao nunui a lawe pu ia ae la na pahikaua @ polo a laua.

            "Ua hoowahawaha mai oe i koʻu lokomaikai e ke kristiano?" wahi a Terika i pane aku ai ia Kale mahope iho o ka pau pono @ o kana mau hana hoopaahao maluna o na kamahele me ka @ popo loa iaia i ka maikai o na mea apau ma kona aoao.

            "Alia," wahi a Kale, "e kuʻi mai no oe iaʻu a eha aka aole @ me kena mau olelo."

            "Aka he oiaio maoli kaʻu i haʻi aku la ia oe.  Ua hana @ aku wau ia oe a ua hoowahawahaia mai e oe." i hoomaopopo @ aku ai ka lunapaahao i kana manao.

            "Aole, aole pela," wahi hou a Kale.  "E hoolohe mai e Terika.  Ina i hele oe i ka aina malihini a hoopaahaoia oe no ka hoopaʻ@ ka make i kauia maluna ou mai kekahi mana pakaha wale mai.  A@ aia i kou aina kulaiwi kou makuahine ame kou ohana: alaila heaha kau hana e hana ai i ka wa e hiki aku ai imua ou kekahi hoopakele i upu mua ole ia e oe."

            "O, e mahuka no wau," wahi a Terika.

            "A pela no hoi wau i hana ai."

            "A ke kala aku nei wau ia oe no ia hoomahukaia ana: aka no keia mmanawa aohe he pakele ana i koe nou."

            "Alia e awiwi loa e Terika.  E ninau aku wau ia oe i kekahi ninau.  Eia anei o Abadala iloko o ka halepaahao?"

            "Ae, eia oia ilaila a ua hauhoaia a paa i ke kaulahao e like me kou."

            Mai ninau hou aku o Kale aka ua hulihoi aku la ka lunapaahao a oki pu iho la no hoi ko Kale hoohuahualau ana.  Aia he elua panipuka o ka ipuka o ka luapaahao, he hookahi maloko aku a he hookahi mawaho mai.  O keia ka ka lunapaahao i pau paa ai a uhipaa iho la ka pouli iloko o ka luapaahao.

            "Eia kaua iloko nei no ka hua o ko kaua mahuka ana." wahi a Pidero i pane aku ai i kona haku.

            "Ae, e kuu Pidero." wahi a Kale me ka leo hakanu.

            "Aia kaua ihea i kou manao e kuu haku?" i ninau aku ai o Pidero.

            "Iloko o ka halepaahao Mahomeda."

            "Aia ma o aku olaila," i panai hou aku ai ka ukali.  "Ua hoomaopopo anei oe i ke ano o keia wahi i ka lunapaahao ianei me ke kukui?"

            "Ae e kuu Pidero.  Ua ike wau he wahi paa loa keia.  A heaha keia wahi i kau hoomaopopo?

            "Alia, e ninau mua aku wau ia oe," i pane hou aku ai o Pidero.  Ua ike anei oe i ka papahele o ka luapaahao o keia halepaahao."

            "He apohao kaʻu i ike ai ma kuu aoao akau."

            "A pela no hoi ma koʻu aoao e kuu haku."

            "A he mau apohao hoopaa hoi ia i ka paahao," wahi a Kale @ hoomaopopo aku ai.

            "Aohe i like loa pela?" wahi a Pidero.

            "Alaila no keaha?"

            Ua hanaia ia mau apohao i wahi e hookomo ai i na kaula no ka huki ana i ka pani pohaku."

            "A," i hooho ae ai o Kale me ka eeke ana o kona mau poohiwi.

            "Ae e kuu haku.  Ua hanaia no ia mea."

            "Ike maoli no oe e Pidero."

            "Ilaila au ke kumu o koʻu ike ana."

            "Alaila, heaha iho la kou ike no ia panipuka?" i ninau aku ai o Kale.

            "Ke manzo nei wau he luapaahao kupapau."

            "Heaha?"

            "He panipuka ia no kahi e komo ai ke kanaka a aole he hoi @ ana mai.  O ka papahele o keia wahi paahao o kaua i hoo@ mai nei ua paa pu i ke koko kanaka.

            "O, e na lani e hoopakeleia mai maua," wahi a Kale, " E hoomoakaka pono mai oe i ke ano o kau mea e hoohaili nei."

            "Eia.  Ua hoonohoia mai kaua iloko o ka luapaahao, kahi e hoonohoia ai ke kanaka a ka moi i makemake ole ai e puka @ a ike hoi iaia.  Ilaila oia no ka mau loa."

            "Malia paha ua hoonohoia mai kaua i ole e mahuka hou?"

            Eia nae, aia no he mau wahi paa e ae o keia halepaahao no ka hiki ole ke mahuka," wahi a Pidero.

            "Me he la pela io no."

            "Pela koʻu manao," wahi hou a Pidero.

 

MOKUNA XX

KA MOIWAHINE EMINA I HOOWAHAWAHAIA.

            ʻUa paa ua paa pono aku la e Beni Abasa? wahi a ka Moi Mahomeda i hooho leo nui ae ai me ke ku ana ae iluna ia Husama i komo aku ai a imua hoi o kona alo.

            "Ae e kuu haku, a aia iloko o ka halepaahao."

            "Aia anei laua iloko o ka luapaahao?"

            "Aew, e ka moi."

            "Alaila e waiho ia laua ilaila," wahi a ka moi.  "O, na noho hiamoe ole iho nei au i keia po aka ua hoohauoli mai kau meah@ iaʻu.  No ia mea ua like ke aumoe o ka po me ke awakea iaʻu.  @ ku-e mai anei ke kristiano ia oe e Beni Abasa?"

            "Aole ana ku-e ana mahope iho no nae o ka paio ana.  Aole au i ike i kekahi kanaka akamai a lehia ma ke kakapahi e like me @ oia paio ana ua ____"

            "Uwoki kau pai ana i ke kristiano," i leo nui aku ai ka moi.  "A ihea i loaa aku nei ia oe?"

            Ma o aku o _____" wahi a Abasa, eia nae, ua kahamaha hou @ mai la e ka moi.  "Aole nana i na mea i hanaia oiai ua paa mai ia no oia a o kona ola no kaluahi o ka hooluhi wale ana.  Ua ike aku anei oe ia laua iloko o ka luapaahao?"

            "Ae."

            "Alaila e hoohakalia ole ia kona make.  Aole e ike hou ka ilio kristiano i ka malamalama o ka la.  Ma ka inoa o ke Kaula he paahao oia na;u, a aohe mana e hoopakele hou iaia.  He kokoolua kona a naʻu no e hoomaopopo iaia."

            I ka moi e haanui ana aia o Beni Abasa ke nana pono la i ka moi me ka nanaina ano kaumaha maluna o kona helehelena.

            "E make like no laua a elua."

            "E akahele e ka moi,: wahi a Beni Abasa i pane aku ai i ka moi me ke kuio.  "He hana maalahi ia ia oe o ka hookahe ana i ke