Ka Nupepa Kuokoa, Volume XLII, Number 51, 16 Kekemapa 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

  NUPEPA  KUOKOA,  POALIMA, DEKEMABA 16, 1904.   3

 

  MAKAIKIU

WETE  DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

 

 MOKUNA XXXVI.

LELE MAI KE KAAAHI AKU.

 

 No ka paa ana hoi i ka opio wahine i kona poli a lele aku, he hana hiki ole ia iaia, nolaila ua hilinai aku la oia ma kana mau a'oa'o ana i ka opiowahine i ke ano o ka lele ana, e hooko pono ana ua wahine la.

 O kahi ana i hoolala ai no ko laua lele ana aia no ia ma kahi o elua a ekolu paha i-a mai ka uwapo alahao aku.  Aia malaila he ululaau nui, a e ulu ana hoi ka nahelehele ma kae o ke alanui, a ia laua e lele ai me ka maalahi, e hoomaka koke aku no laua e hele no na palena aina o Rusia.

 Ia laua e ku ana ma na anuu alapii o ko laua kaa no kekahi manawa, aia hoi o-we ana ko lakou nei kaaahi iluna o ka uwapo.  Aole i liuliu iho ike aku la laua nei i na kiai o ka uwapo e ku ana ma kekahi aoao o ka uwapo me na kukui hoailona, a mahope mai ike aku la laua i ke kanaka kiai kuiki alahao e ku ana ma kana hana i haawi ia ai.  Ke hala keia mau mea apau, alaila e lele no laua me ka mea ole nana e ike mai ia laua nei.

 I ka manawa i hooikaika hou aku ai ke kaaahi e holo, oia no ko Wete manawa i kauoha aku ai i ke kaunawahine e lele, a haawi aku la i wahi no ke kaunawahine e ku ai a lele aku.  Iloko o ka manawa pokole, pa-hu ana ua kaunawahine la ilalo, a aole no hoi i liuliu iho lele aku la no hoi ka kakou makaikiu.

 O kahi a ka makaikiu i lele ai ua ano mamao iki aku no mai kahi a ke kaunawahine i lele ai, a ia Wete i ku ae ai iluna, ua huli koke ae la oia ihope, a hoi aku la no kahi ana i manao ai oia kahi a ke kaunawahine i lele ai.  Aia ka manao uluku iloko o Wete no ka pono o kana milimili, a iaia e hoi hope ana, aole loa oia i aa ae e kahea aku i ke kaunawahine o loheia mai a loaa mai paha he mau pilikia maluna o laua, nolaila ua kahea aku la oia me ka leo nahenahe, a ua hoohauoliia kona puuwai i ka puana ana mai o kekahi leo nahenahe e i mai ana:

  "Eia wau maanei."

 Hookolo aku la ua wete nei a kaua ma kahi i pu-a mai ai o ka leo, a loaa aku la iaia ua kaunawahine la, e waiho ana iloko o ka hihipea nahelehele, kahi hoi ana i haule aku ai i kona manawa i lele ai.  Aole i eha ua kauna wahine la, mawaho ae o na wahi poholehole liilii i loaa aku iaia mai na lala laau aku i hihia i kona kino.

 

   MOKUNA XXXVII.

 NOHO PIO ILOKO O KA HALEMA'I PUPULE.

 

 Maanei e na makamaka heluhelu o ka Makaikiu Wete Detona, e haalele kaua i ka kaua mau milimili e huli ana i ko laua wahi e pono ai no ia po, a e huli ae kaua a uhaiaholo aku mahope o ke kaunawahine puni koko e hiolani la iluna o ke kaa, me kona ike ole ae ua hala aku kona mau hoa o ka holo pu ana mai i na hora mamua iho mai kahi hoolulu kaaahi mai o St. Petersburg.  E uhaiaholo aku kaua mahope ona i ike ai kaua i kana hana e hana aku ai maluna o Ivana Horawiki, a e hoomaopopo iho ai kaua i ka nui o na alalai e waiho mai ana mamua o ka kana makaikiu, ame kana hana noeau loa i hana ai a loaa kana mea e kokua nui nei no ka hoohui ana ae i na aloha elua e luaieleia nei mamuli o na hana a Kaunawahine Sofia, ka puni koko.

 O ka laau hoohiamoe a Wete i haawi aku ai ia Kaunawahine Sofia, ua oi aku ka ikaika i ko kela ana i haawi aku ai i ua kaunawahine la i ka manawa mua, nolaila i ke ao ana ae o kekahi la, aia no oia ke hiamoe la, a i ala wale no oia i kona hoalaia ana e na koa kiai o kahi hoolulu kaaahi hope loa ma ka palena komohana o Rusia.

 O kona ala ana. me ka paakiki maoli no, oiai aole i pau loa ka ikaika o ka laau hoohiamoe a Wete i haawi ai iaia, a mamuli o ka ike ana o na koa i kona nawaliwali, ua manao iho la lakou ua loaa keia wahine i ka ma'i nolaila i kauohaia aku ai ke kauka o na koa e hele mai e nana i keia ohua ma'i a i kona hiki ana mai a pau kana nana ana, ku ae la oia iluna, a pane ae la:

 "He ma'i paha ko keia wahine i lawe nui ai oia i ka laau hoohiamoe a i ole, he inoino paha kona noonoo no kekahi mea."

 I kela manawa e ku ana no ke konokake o ke kaaahi malaila, a i ka wa i puka ai ka hoike a ke kauka, hoomanao ae la oia he mau ohua e ae no kekahi ana oluna o ke kaa, a i noho pu hoi me keia wahine iloko o ke kaa ohua hookahi.  Hoomanao pu ae la oia i na olelo a Wete i pane aku ai iaia e pili ana no keia wahine, a o ka ninau nui i ala mai iaia i kela manawa: aia la hoi ihea keia mau ohua.  Me keia manao e nalu ana iloko ona i pane aku ai oia:

 "Ua ha'i mai ke kokoolua kane o keia wahine ia'u, ua luhi loa ia keia wahine, aole hoi i hiamoe no na po ekolu."

 "Kokoolua kane?" i huli ae ai ke kapena o na koa e kiai ana ia manawa a ninau i ke konokake.

 "Ae,"

 "Alaila, he mau ohua hou aku no ka kekahi au mawaho ae o keia wahine, ame na ohua o na kaa e ae?" wahi hou a ke kapena.

 "Ae: he kane--"

 Aole i pau pono aku ka pane a ke konokake, ku ana ke kopala imua o kona kapena, a haawi mai la i ke aloha aliikoa, a hapai ae la i kekahi mau apana pepa iluna, a pane aku la:

 "Sir, Kapena, ua pau ae nei na ohua apau i ka nana ia, a eia lakou apau, a koe aku elua, aole i ikeia laua mai ka manawa i hiki mai ai ke kaaahi ianei a hiki i keia manawa.  Aole hoi he mea i ike aku ia laua i ka haalele ana iho i ke kaa.  O Kauna Kalouga ame Kaunawahine Kalouga na ohua i koe."

 "Kauna Kalouga ame kana wahine?" i hooho ae ai ke kapena.

 I kela manawa ua pohala loa ae la o Kaunawahine Sofia malalo o na lawelawe ana a ke kauka, a ua lohe aku oia i keia mau kukaiolelo ana mawaena o ke kapena ame ke kopala, a puoho ae la oia me ka puiwa nui:

 "Heaha keia e kamailioia nei no ka Duke o Kalouga?"

 "Aole anei o oe pu kekahi me ke Duke o Kalouga ame kana wahine maluna nei o keia kaa?"

 "I ninau iho ai ke kauka?"

 "Aole o laua me a'u!" i hooho ae ai ua wahine la, "aka o Kaunawahine Radolinisiki ame kela makaikiu Amerika ko'u mau hoi i holo pu mai nei.  Ua paa anei laua ia oukou i ka hopu ia?  Ua loaa mai anei ke kauoha ia oukou no ka hopu ana ia laua?"

 I ka lohe ana o ke kapena i keia mau olelo a Kaunawahine Sofia, ua huli koke mai la oia a hoomaka koke mai la oia e ninaninaau i ke kaunawahine:

 "Pehea i maopopo ai ia oe o laua kou mau hoa o ka holo pu ana mai?"

 "O, ua ike wau me ko'u mau maka a elua.  I ko makou halawai ana ma kahi hoolulu kaaahi ma St. Petersburg, ua kuhihewa aku wau i ke kane o ka Duke io no ia o Kalouga, aka ia makou maluna mai o ke kaaahi, ua ike aku la wau iaia e like me ke Duke o Kalouga.  No ka wahine ua maopopo mua ia'u o ke Kaunawahine Radolinisiki no ia, oiai ua ala mai he hakoko ana mawaena o maua ma kahi hoolulu kaaahi, a i ole ke komo ana mai o keia makaikiu Amerika mawaena o maua, a'u hoi i kuhihewa ai o ke Duke o Kalouga, ina ua paa oia ia'u."

 "Heaha hoi kou mea i hoike ole ai i keia mea i ka oihana makai e kiai ana i kahi hoolulu kaa ia manawa?"

 "Mamuli no ia o ke komo ana mai o keia kanaka Amerika mawaena o maua, a ma ko'u kuhihewa ana iaia oia ke Duke o Kalouga.  Ua hoomalimali mai keia kanaka a hiki i ko'u puni ana iaia, a kau makou iluna o ke kaaahi.  I ko makou haalele ana aku i kahi hoolulu kaaahi a holo mai, a mamua o ko makou hiki ana mai i Dunaboro, ua haawi mai la keia kanaka Amerika ia'u i ka laau hoohiamoe me ka limanui, a nolaila i hiki ole ai ia'u ke hoike aku i keia mea i ka oihana maikai olaila."

 O keia ae la a he nui aku na hoike a na kaunawahine la i ha'i aku ai i na kiai o kahi hoolulu, a mahope no hoi o ka pau ana o kana mau mea apau i ninau aku ai oia, ina paha ua paa ae ua mau hoaloha nei o kaua i ka hopuia, a i ka loaa ana aku o ka pane e hoole ana, ua pane koke aku la oia me ka leo huhu:

 "Aole anei oukou i ike iho nei ia laua iloko nei o keia kaa?"

 "Aole laua i loaa iho nei, a ke maopopo ole nei ia makou ko laua wahi i nalowale iho nei?"

"O makou like mai no ka holo like ana mai, a he mea pahaohao no'u ko laua nalowale ana."

"E hoomaopopo oe, e ke kaunawahine," i pane aku ai ke kauka, "ua hoohiamoeia oe i ka po nei me kekahi laau hoohiamoe ikaika loa.  Ma na haawina a'u i ike iho nei maluna ou i kou wa e waiho ana me ka maopopo ole, ua ike iho wau, ua hanaia ka hana maluna o'u e hiki ole ia oe ke ike i na mea apau e hanaia no kekahi manawai loihi.  Ke hoomaopopo nei anei oe i ka manawa i haawi hou ia ai ua laau hoohiamoe la ia oe?"

 "Me he mea la o ka hora eono paha ia o ke ahiahi nei?"

 "Alaila na like me umi-kumamalima hora ko'u moe ana oiai o ka hora ewalu keia o keia la.  O keia laau hoohiamoe i haawiia ai ia oe, he ikaika, aka nae aole e make ke kanaka.

 Me keia mau kukaiolelo ana, a he nui wale aku, ua maopopo ae la i na mea apau ka hana i hanaia maluna o Kaunawahine Sofia, a o ka ninau nui i ala mai, oia hoi: aia la ihea keia mau pio i loaa aku ke kauoha ia lakou no ke kiai makaala loa ana.  Ua loaa ae ka hoohuoi i na mea apau ua lele aku ko kaua mau hoaloha ma kekahi wahi a oiai ua kaulana ka poe Amerika i ka lele mailuna aku o ke kaaahi a pela no hoi ke kau ana iluna i ka manawa e holo ana no ke kaaahi me kona holo ikaika no, nolaila i hooholo iho ai ke kapena ame kona mau hoa, ua lele io no o Wete ma ma kauwahi o ke alahao, a maluna o keia olelo hooholo i haawi koke ia aku ai ke kauoha no ka huli ana aku i ko kaua mau hoaloha.

 Ua lohi loa ke kaaahi ma keia wahi mamuli o keia mea ano nui i ala mai. nolaila i ka pau ana o na mea apau, ua hao koke ae la ke konokake i kona mana, a haalele iho la ke kaaahi, me ke kau pu ana no o ua kaunawahine puni koko la, e holo ana hoi no Perisa no ka hui ana aku me Ivana a hooko aku i kana mea i manao ai e hana.

 No na aliikoa hoi, mahope koke iho o ka hala ana aku o ke kaaahi ua hoike koke ia ae la ka lohe i ke kalanakauhale no keia mau mea apau a kaua i ike ae nei, me ka ninau pu aku hoi i na mea e pili ana no ke Duke o Kalouga.  O ka pane i loaa mai mahope mai, oia na mea i ike mua ia e kaua, oia hoi ka loaa ana aku o ua duke la e waiho ana iloko o ka lumi a Wete i hoopaa aku ai, ma ka auwina la o ka la mamua iho.

 No ke kaunawahine puni koko hoi, i kekahi la ae kona hiki ana aku i Parisa, a hoi koke aku la oia no kona home, kahi hoi a kaua i ike ai i ka kaua makaikiu e noho lawelawe ana na ua wahine la, mahope o kela pakele mahunehune ana mai ona mai ka halawai mai a na Nihiliti, i lele koheoheo ai oia a kau iluna o ke kaupaku o kela hale ana i hui ai me kela wahine ame ke kane, a kipakuia ai oia mai ia wahi aku.

 Mahope koke o ko ke kaunawahine hiki ana aku i kona hale, ua hoouna koke aku la oia i kona kanaka lawelawe e kii aku ia Gerenigofa, a i ka hiki ana mai o ua kauna la, ua ninau koke aku la o Kaunawahine Sofia i na mea e pili ana no Ivana Horawiki.

 "Eia no o Ivana ke noho mai nei me ka maikai," i pane aku ai o Gerenigofa, me kona pahaohao no keia nanaina ano e o ua kaunawahine la. "Heaha hoi keia ou, o ke kaunawahine?"

 "Aohe au ninau ana i ko'u ano, aka e ha'i mai oe, pehea la ko Ivana manao no'u?"

 "Ua like no me ka manawa au i ike mua ai, e ke kaunawahine?"

 "Aole anei oia e maliu mai ana ia'u ke hele aku wau e ike iaia, a i ole, ke lawe mai no hoi oe iaia i o'u nei?"

 "Ke manao nei wau he hana maikai ole ia au e hana aku ai iaia, no ka----"

 "Alaila, heaha kau hana i keia mau la iho nei i hala ae nei?" i ninau aku ai ua wahine puni koko la, me ka li-o pu ana ae o kona mau maka, "aole anei ua waiho aku wau iaia iloko o kau malama ana, a e hana mai hoi oe i ko'u makemake, oia hoi ka hoohuli ana ae i kona noonoo ana maluna o'u a haalele aku i kela wahine ana e aloha nei?"

 "He oiaio kau i pane mai la, e kuu kaunawahine maikai, a eia no wau ke hana nei i ua hana la au i waiho mai ai na'u e hana.  Ke hooikaika nei wau no kou pono i na manawa no apau loa, a o keaha aku la ka'u hana i koe."

 "E hana oe a hiki i ka lilo ana mai o Ivana Horawiki ia'u.  Ke makemake nei wau e hookaawale aku oe iaia mai ia oe ae, a e hoihoi aku oe iaia iloko o kekahi o na halema'i o na halema'i pupule, a hoopaa aku iaia malaila ma ke ano he pupule."

 Kau aku la na maka o Gerenigofa maluna o ke kaunawahine me ke pahaohao no keia kauoha, alaila ninau aku la:

 "E kuu kaunawahine maikai, heaha ka manao o keia mau mea au e kamailio mai nei?"

 Maanei i ha'i aku ai o Kaunawahine Sofia i na mea apau e pili ana i kana huakai no St. Petersburg, e like hoi me ka kaua i ike mua ae nei, a i ka hope loa, pane aku la ua kaunawahine nei:

 "O keia ka hopena o kau hana hoohemahema ana a komo kela makaikiu Amerika iloko o ka oukou halawai, a ke ha'i aku nei wau ia oe, o keia makaikiu Amerika ka mea nana e hoopoino ia kakou apau, a he manawa keia no kakou apau e hana ai..  E hana aku oe i kau hana ano maluna o Ivana Horawiki, a i hooko ole oe, e hahai aku no na haawina poino mahope ou."

 O keia pane i loaa aku la ia Gerenigofa, ame keia mau olelo hookikina a ke kaunawahine iaia, oia na mea nana i hoouluku loa aku iaia, a pane aku la oia:

 "Alaila, eia oia ma kona alahele no Parisa nei me Kaunawahine Radolinisiki?"

 "Pele ko'u manao ana, a ke manao nei no hoi wau ua hemo mai no laua mai Rusia mai, oiai o keia makaikiu, oia kekahi o na kanaka maalea loa, a aole paha laua i loaa mai nei i na kiai, a ina no hoi laua i loaa mai nei, ke manao nei wau aole no laua e paa ana, no ka mea o keia kanaka Amerika kekahi kanaka maalea loa a'u i ike ai."

 Haikea ae la ka helehelena o ua Kauna Gerenigofa la i keia hoike a ua wahine la, a pane aku la:

 "Alaila, aole o kaua manawa e hoopau wale ai.  He mea nui ka manawa, a o ko kaua hoohana koke aku oia ka mea pono; aole wale hoi oia, aka ua hiki mai ka manawa no kaua e hana ai no ko kaua pono iho, no ka mea ke kokoke mai nei kona manawa e hoea mai ai ianei."

 "O keia ke kumu o ko'u makemake ana e ike ia oe, a ke makemake nei wau e lohe mai ia oe mai i ka hana pono loa ma ko kaua aoao no Ivana.  Ke manao nei anei oe o ka'u papahana i hoike aku nei ia oe e hiki ana no ke hoohanaia aku?"

 "Ua hiki ia'u ke hoowalewale iaia a hiki i kona hele ana aku i ka hale pupule; aka no ke koi ana aku i ke kauka o ka hale pupule e paa aku iaia ma ke ano he pupule, ke maopopo ole nei ia'u ina paha e aeia mai ana."

 "O, aole au mea e nana ai ma ia mea.  Ua hiki loa ia'u ke kipe aku iaia me ke dala, ina no nae ua ike oe i kekahi kauka a kamaaina paha iaia i kauka hoi e malama ana i kekahi hale pupule ma Parisa nei."

 "He hoaloha ko'u ma ka inoa o Kauka Matini, a he hale pupule kona e malama nei aia ma ke alanui Hemisa.  E hiki ana ia'u ke hoowalewale ia Ivana Horawiki a hiki ilaila, aka aole paha e hiki ia'u ke koi aku iaia e hoopaa aku ia Ivana ilaila."

 "O, e waiho mai oe ia hana na'u e hana, a oiai ke ike aku la wau i ko'u ano kanalua, nolaila ke kauoha aku nei wau ia oe, e hoi aku a ha'i aku ia Ivana e hoomakaukau iaia iho no ka hele holoholo ana i keia ahiahi.  E hoi aku no hoi oe a hoouna loa aku i ka lohe i na kauka hoaloha la ou e kipa mai e ike ia'u i keia awakea.  O ka pau keia o ka'u hana me oe, nolaila e hoi aku oe a hooko koke aku i ka'u kauoha."

   (Aole i pau.)

 

  KALE  O  LEONA

  Ka Naita Puuwai   Hao Wiwoole - - -

 KA  HOOPAKELE O KE KAIKAMAHINE ALII I LAWE MALUIA.

 

 

 

  MOKUNA  XIII.

 KA  HUI  ANA  MA  KA  HALEPAAHAO.

 

 I ka pa ana o keia mau olelo a ke 'lii Mahomeda i na pepeiao o ka kakou Kale, ua li-o koke ae la kona mau maka, a aneane no oia e hoopuka aku, aole o Zira he wahine  hoopalau nana, oiai ua mareia oia ma ka mana o ka pahikaua.  Aka mamuli o ka nui ika ika o ka manao e kaomi ana i kona noonoo, ua akakuu koke iho la keia manao ona, a lana ae la no kona manao aia no he manawa e hiki mai ana e lanakila ai oia mai kona enemi ae, a ia manawa oia e hoike aku ai i ka oiaio o na mea apau i hanaia mawaena ona ame Zira.

 "E kali iki," wahi a Beni Hame i kahamaha ae ai.  "E pono e make keia ilio Kristiano."

 "E lawe koke aku iaia iloko o ka halepaahao.  E make no oia iloko o ka wa kupono." wahi hou a ke 'lii Mahomeda i kauoha aku ai i kona mau koa.

 "E pono oia e make i keia manawa, " wahi hou a Beni Hame i pane aku ai.  "O keia kekahi o na kanaka maikai ole ke ola no kekahi manawa hou aku.

 "Aole," i hooho ae ai ke 'lii me ka leo nui, me kona ku ino ana ae mai kona noho ae a pa'i ae la i kona mau lima me ka ikaika.  "E lilo no kona make ana i mea nana e hoohanohano mai i ko'u la e mare ai a ia manawa e ike ai kau kaikamahine i kona poo e kihe'a he'a ana me ke koko!  O ka'u makana ia e haawi aku ai i ua kaika mahine la au, a ina ua aloha io oia i keia ilio kawa u, alaila o keia ka makana maikai loa e haawi aku ai iaia.  E lawe koke aku iaia, a e ha'i aku ia Tarika e makaala loa oia i ka ilio Kristiano."

 O na kaula nana e paa ana i na lima o ka kakou naita ua ikaika maoli no, aka nae me keia mau olelo i poha pono aku i kona mau pe peiao ua aneane ua mau kaula nei e mokumoku i kau a mea he inaina e holopuni ana i kona kino.  Aia kona poo ke luli la me ka inaina, ua puu ae la hoi kona puu me he mea la aia kekahi puu iloko olaila, eia nae aole he wahi huaolelo i puka mai kona waha mai.  Ua lalau mai la na koa o ke 'lii iaia a ka'i aku la, a me ka huaolelo ole i huli aku ai oia a hele aku la e like me ke alakai ana a na koa iaia.

 He hora mahope mai o ia manawa ua waihoia aku o Kale o  Leona iloko o ka halepaahao naue ole o "Iwi Poo Kanaka" a malaila hoi i kii mai ai o Terika i kana pio a lawe aku la iaia mai na lima aku o na koa a hoopaa aku la iaia iloko o kekahi o na lumi paahao o kona kakela.  O keia lumi i hoopaaia ai o ka kakou Kale, oia ke kahi o na lumi paa loa o ua halepaahao la o Iwi Poo Kanaka, a aia hoi ia i ka hale elua malalo o ka honua.  O na paia he hamani pu i hanaia hoi me na pohaku paa loa, a nona hoi ka manoanoa o eha kapuai, e hiki ole ai no i kekahi mea ke wawahi aku.  I ke kakahi aka no keia hoopaaia ana o ua Kale nei a kaua, a o kahi malamalama uuku e loaa ana iloko o ua lumi la, mai kekahi mau puka liilii no ia i hanaia ma kahi he ewalu kapuai mai ka papahele aku.

 Iwaena o ua lumi la e waiho ana kekahi pakaukau pohaku, a ma kahi e kokoke ana i ua pakaukau la e paa ana kekahi apo hao paa loa.  I ka manawa i laweia aku ai o ua Kale nei a kana, ua hahai aku la kekahi o na limahana o ka halepaahao ia laua me kekahi kaulahao nui, a aole i loihi mahope mai o ko lakou komo ana aku iloko o ka lumi, ua paa ae la ua natia nei a kaua i ke kupeeia me ke kaulahao a hoopaaia aku i ka lina hao ana i ike ai.  Ua kupeeia ae la kona mau lima me kekahi mau kupee i hoohuiia me ke kaulahao e hiki ai no iaia ke lawelawe nona iho me kona mau lima, a i ka pau ana o na mea apau, ua kauoha aku la o Terika i kona kokoolua e hoi aku.

 "Ke paa nei oe iloko o na lima kakauha, e ka naita," wahi a Terika i pane mai ai, iaia i ku ae ai iluna mai kana hana ae.

 Kau aku la na maka o ka kakou naita maluna o kahi elemakule kino ikaika a hoholo ae la na haawina aloha iloko ona ne keia kanaka, oiai ua ike aku la oia he kanaka oluolu keia o kona mau helehele na.

 "O ka'u i manao ai, aole o ko'u na lima kakauha," wahi a Terika i pane hou aku ai, iaia i ike aku ai i ko Kale haka pono ana mai ma luna ona me ka pane leo ole mai. "aka he mea oiaio o ka'u hana e hana nei aole ia he hana ku i ke aloha, a o ko'u manao i pane aku nei ia oe, oia keia, ke manao nei wau aole he wahi manao maikai o ke 'lii nou."

 "Aole loa e aa mai ana ke 'lii e lawe aku i ko'u ola," i puana ae ai ka Naita o Leona.

 "Mai noonoo oe pela. He nui a lehulehu na kanaka opiopio mamua aku ou i hoopaaia mai maanei mamuli o ke kauoha a ke 'lii, a aole---"

 "E hoomau aku," wahi a Kale o Leona i pane @ ka ai i ke kuha'u ana iho o ka leo o ua lunapaahao la.

 "Aole hookahi o keia poe opiopio i puka hou aku mai kela@ hale paahao aku," i hoomau hou aku ai o Terika, me ka luliluli pu ana ae o kona poo.

 O keia na olelo nana i hookomo aku i ke anu maeele iloko o na aahuki o ka kakou naita, a aole he mau olelo i puai hou ia mai kona waha mai.

 "O na kauoha i loaa mai nei ia'u nou aole no i koikoi loa, koe wale iho no keia ke kau nei ko'u poo ma kahi nihinihi no kou paa iloko nei.  Ina he makemake kou i kekahi mau mea ai ono, a he dala hoi kau e hiki ai ke kuai ia mau mea, he hiki no ia'u ke kokua aku ia oe."

 "Ke haawi aku nei wau i ko'u mahalo no kau lokomaikai wale mai: aka, aole a'u mea e makemake nei nau e hana mai no'u," wahi a Kale i panai aku ai.

 "Pehea hoi no na mea e pili ana i kau mau mea ai e ai ai?"

 "E haawi mai i kau mau mea ai maikai e like me ka hiki ia oe.  He dala no ka'u e uku ai.  Aole no paha waa e ola loihi ana, aka nae e haawi mai oe i na mea ai maikai i ola maikai ai wau a hiki i ka hopena o ko'u mau la."

 "E hookoia aku ana kou mau makemake apau," wahi a Terika i pane mai ai, alaila huli aku la oia a puka aku la iwaho o ka lumi a iloko o ka manawa pokole kani ana ka laka, a noho hookahi iho la ka kakou naita.

 Ae, ua noho hookahi iho la na Kale nei a kana me kona naaa@  piha i ka ehaeha no keia haawina i kau iho la maluna ona.  Aia kona lunaikehala ke hoomaopopo la i ka hoopa'i weliweli i kau aku maluna o kona poo, a keia alii Mahomeda aloha ole hoi i hook@u aku ai, a iaia e noonoo ana no keia mea, ua ulu ae la he ninau iloko iho ona:  He wahi manaolana anei kekahi no ko'u palekana aku." Iaia @ hookuku ana i keia ninau me kana haina, aole loa he wahi mala malama nana e mawehe ai i kona pohihihi.  He hookahi mea i loaa iaia i keia manawa, oia hoi o ka lunapaahao, Terika, oia kekahi o na kanaka nanaina oluolu i halawai mai me ia iloko o keia manawa o ke kaumaha e kau nei maluna ona: eia nae hoi, e hiki ana anei iaia ke hoopakele ae iaia?

 I ke ahiahi oia la laweia mai la na wahi mea ai a ianei.  O keia mau mea ai ua ku i kona makemake, eia nae aole he wahi hua olelo i puka mai ka waha mai o ke kanaka nana i lawe mai i na mau mea ai nei ana e pili ana i ka auhau o na mea ai.

 I ke kakahiaka o kekahi la ae ia Kale o Leona e ai ana i kona paina kakahiaka, na hemo mai la ke pani o kona luini.

 "E komo aku iloko." i lohe aku ai o Kale i ka leo o Terika, "eia nae e hoomaopopo oe he hapalua hora wale no kou manawa i aeia e noho pu me ia."