Ka Nupepa Kuokoa, Volume XLII, Number 48, 25 November 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

 

MOKUNA XXXIV.

 

KE KAUNAWAHINE PUNI KOKO.

 

            Ua like ua kaunawahine la me kekahi tiga hae i kona manawa i ike ai i kona hoa paio, a iaia e ku ana ma kahi ano pouliuli o ka hale hoolulu kaaahi, ua hiki no ke ikeia aku ke keke mai o kona mau niho, me kona mau maka hoi e hoike mai ana i kona hauoli i ka hui ana he alo a he alo me kona hoa paio a waiho aku i na olelo hoaloha ole.

            I ka manawa a Wete i komo ai mawaena ona ame kona hoapaio, ua huli ae la oia a kau aku la kona mau maka pahaohao i huipuia me ka inaina, oiai ua manao mai la oia e halawai ana kona ike me ke kanaka Amerika nana i hoopahu'a i kana papahana, a i kona ike maopopo ana mai me ka hoohewahewa ole i ke Duke Kiekie o Kalouga, ua mae koke iho la keia haawina, ame ka minoaka maluna o kona mau papalina i kau aku ai kona mau maka.

            "E ka kaunawahine," wahi a Wete i pane aku ai me ka hikilele, hoopunipuni, a hoomau aku la me ka hawanawana ana. "ke makemake nei anei oe e hoolilo aku i kou manao lili i keia wahine i kumu nona e lanakila ai?"

            "Heaha ka manao o kau i pane mai la?" i panai aku ai o Sofia me ka puiwa nui.

            "Ua ike ka Emepera i na mea apau! Ua huikala mai oia iaia nei, a e hoopuka koke ia no na hoolaha no ka huli ana ia kaua, a ke maopopo ole nei ia'u owai ae la kekahi poe mawaho ae o kaua."

            "Aole loa e hiki keia mau mea au i ha'i mai nei! He elua hora i hala ae nei ua hui aku wau me ka Emepera!"

            "Eia nae he hapalua hora i hala ae nei me ka Emepera wahine ka'u wahine, a nana i ha'i ae nei i keia mau mea apau ia'u."

            "Nawai i kumakaia ia kakou?"

            "Ua manao ka Emepera wahine na ka duke kiekie i hana i keia hana."

            "Eia nae hoi ua ha'i mai oia ia'u---"

            "Ua ike wau ia mea," i kahamaha aku ai o Wete, "ua ike wau ua hoopaa mai oia ia oe e kokua ana oia, ina nae oe e hoopau ana i kou manao e kumakaia ia kakou apau."

            "Pehea oe i ike---"

            "Ua komo mai ka manao iloko o'u e hoolilo ae ia'u i mea nana e kumakaia, eia nae ua ike iho la wau he nui a lehulehu o ka poe e manao nei e like me ko'u, nolaila i hoopau ai wau ia manao."

            Ku'eku'e ae la na poohiwi o ua kaunawahine la, a ninau aku la me ke okakala o kona leo:

            "Aka hoi, pehea hoi keia wahine?"

            "Hamau! Eia oia malalo o ka'u malama ana---ua waihoia mai hoi e ka ahahui nana e hoomalu nei iaia."

            "Auhea hoi kela kanaka Amerika?"

            "Ua make oia i ka wa i lele alukaia ae ai ko kakou wahi halawai e na koa i keia po, au hoi i hoike aku ai i ke aupuni."

            "Na'u i hoike."

            "Ae, nau! E kala mai no nae oe ia'u e hookaawale ae wau i keia poe e kuku mai nei---mai kanalua hoi oe no ke Kaunawahine Vera.  E waiho aku no wau iaia iloko o kou mau lima ke hoomaka aku kakou i ka kakou huakai."

            Alaila huli ae la ua Wete nei a kaua me ka maalea a kau aku la kona mau maka maluna o na kanaka i akoakoa mai mamuli o ko lakou hoopuiwa ia ana e keia mau hana a ke Kaunawahine Sofia, a pane aku la:

            "E kala mai ia makou, e ko'u mau hoa lahui, mamuli o kekahi ulia kuhihewa i ala ae nei keia mea maanei, nolaila e oluolu oukou e hookaawale aku," a ia manawa no hoi i lalau aku ai oia i ka papale o Vera a haawi aku la iaia, a ia manawa no hoi i lalau mai ai oia a hoi aku la no kahi pouliuli loa.

            Lalau aku la o Wete ia Kaunawahine Alamazofa, a kuikuilima aku la laua no kahi e lohe ole mai ai na kanaka i ka laua mea e kamailio ana, e malama ana hoi i ka laua hele ana a e hookaawale ana mai kahi mai o na kukui e a ana.

            "Ke ike nei oe, e ke kaunawahine, o oe ame a'u keia iloko o keia pilikia hookahi, a o ka hana pono ia kaua oia ko kaua hana like a i ole e hana no oe i kau a owau no hoi i ka'u. Heaha ka kaua e hana ai?" wahi a Wete i ko laua manawa i hiki aku ai ma kahi ana i koho ai no laua,e kukaikamailio ai.

            "Aia i kau mea e koho mai ana, ina nae ua makaukau oe e haawi mai i kela wahine iloko o ko'u poholima."

            "Aka hoi, heaha ka mea e hiki ana ia oe ke hana aku maluna ona i keia manawa? Aole oia he waiwai kalewa e hiki ai ke piepiele aku iaia e like me ka makemake o kekahi poe."

            "Ua ike anei oia ua huikala mai oia?"

            "E pono ia oe ke ike iho aole oia i ike ia mea."

"Ina pela, mai ha'i aku oe iaia ia mea, a e waiho mai oe iaia e hana aku wau maluna ona i ka'u mea i makemake ai."

            "Aka hoi, e ke kaunawahine aole anei ou ike iho i ka waiwai ole o kau e manao nei! Aole e hiki ana i kaua ke hana aku i kekahi hana maluna ona i keia manawa, no ka mea i kou manawa e hoao ai e hana ino aku iaia e hooho no oia, a oia no ka manawa o olua a elua e hopuia mai ai e na koa, a ia manawa e puka ae ai na mea oiaio apau, a o oe ke hoka ana."

            "E waiho mai oe ia mea me au," wahi a Sofia i puana ae ai, me ka minoaka ana a Wete i makemake ole ai.

            "Aka hoi, e ke kaunawahine, ke noi mai nei oe i ka mea a'u e hookomo aku ai i ko'u poo iloko o ka pilikia, a oia hoi ka mea a'u e minamina loa nei."

            "O kou manao maoli anei ia o ka hoole mai i ka'u mea e noi aku ana?" wahi a Sofia i ninau aku ai, aia hoi iloko o kona mau maka ka inaina o ka tiga i makaukau e lele maluna o kana mea i makemake ae e apo aku.

            "Oia maoli no ko'u mana'o," wahi a Wete i pane aku ai me ke kuoo, a kua ae la oia a hoike ae la i kona kulana duke me ka hiehie imua o ua wahine puni koko la.

            "Aole anei oe e hookuu mai ana ia'u e hana aku e like me ko'u makemake?"

            "Pehe e hiki ai ia'u ke hana aku pela?"

            "Ua pono no nae e hookuu mai oe ia'u e hana aku e lime ka'u i manao ai."

            "Paakiki maoli no oe, e ke kaunawahine."

            "Ke ike,aku la wau, e kuu haku ke makemake nei oe e akeakea mai i ka'u mea i makemake ai, a ke ha'i aku nei wau ia oe e makaala! E haawi mai oe i kela wahine ia'u, a i ole e laweia aku oe no ka halepaahao no ka hoopaahao ana."

            "A ke laweia wau ilaila, o oe pu kekahi me a'u."

            "Heaha ka'u e nana aku ana no ia mea?"

            "He mea ano nui nau e noonoo iho ai ke paa aku oe iloko o ka halepaahao, a e hemo no hoi o Vera mailaila mai, alaila ia manawa aole he mau mea nana e ake'ake'a iaia ame kana aloha."

            Nau iho la na ku'i o ua kaunawahine la, a ia manawa i pane hou aku ai o Wete:

            "Ke ike nei oe i ka waiwai ole o ka paio ana aku maluna o kau mea e manao nei. Ina no hoi he hiki ia'u ke ike aku i ka'u mea e hiki ai ke kokua aku ia oe, e hana no wau me ka hauoli; aka e like iho la me na mea e ku nei i keia manawa, ke ike ole nei wau i ka mea i hiki ia'u ke hana aku."

            Noonoo iho la ua kaunawahine la i keia mau mea apau no kekahi mau minute, alaila pane aku la oia me ke ano hoohuoi:

            "Heaha ka mea nana e hookomo nei i na noonoo ana iloko ou no keia wahine?"

            Minoaka iho la ua Wete nei a pane aku la:

            "He nui na mea nana i hookomo mai i na manao iloko o'u no keia kaunawahine.  Aole anei ou ike he palapala kaahele kona ame kona hoaloha, oia no hoi o Wete Detona, a ua make hoi oia i keia manawa.  I keia manawa eia wau ma kona makalua."

            "Mai ia wai mai i loaa mai ai kona palapala kaahele?"

            "Ke manao nei wau mai ka hoaloha mai o ke kaunawahine, oia no hoi o Genrala Gerisa."

            "Hikiwawe maoli no ka loaa ana o kona palapala kaahele a i keia manawa hoi o ka po. E kuu haku, ke manao nei wau ke ha'i nei oe i kekahi moolelo kaao imua o'u."

            "Ike maoli no oe."

            "O ka poe kipi he mea pono no ia lakou e makaala a e ike hoi i na mea e hanaia mai ana maluna o lakou."

            "Alaila ua like a like kaua ma ia mea."

            "Me he mea la oia maoli no. He manao anei kou e ha'i hou mai i kekahi mau mea e pili ana i keia palapala kaahele, a i ole e hele anei wau e ninau aku i kekahi mau luna aupuni?" i panai aku ai o Kaunawahine Alamazofa, a aia hoi iloko o keia mau olelo ka nioi wela a Wete i ike aku ai e hanaia mai ana iaia.

            "Ma ka'u noi ana i hele aku ai o Kaunawahine Radolinisiki  imua o Generala Gerisa a ha'i aku iaia i na mea apau ana i ike ai___"

            "Oia hoi, e hoike aku i ka hapa o ka'u hana iloko o keia hana nui a kakou apau." i kahamaha aku ai na wahine la.

            "Ae, e ke kaunawahine, ke lohe aku la wau i kou pane ana mai la no ia mea, a ke manaoio nei wau ua lohe io aku no wau i ko Vera ha'i ana aku ia mea a hoopuka aku hoi i kou inoa."

            "Heaha no hoi kou mea ha'i ole mai nau no i a'oa'o iaia?"

            "Nani ia ua hoopuka mai la oia no ia mea, ke loaa nei ka manao iloko o'u e ha'i aku ia oe na'u io no i a'oa'o aku iaia. E ike mai oe ua ha'i mai kanaka Amerika ia makou i kekahi mau mea e pili ana nou, ame kau i manao ai e hana, nolaila aole e hiki ia'u ke alo ae i keia e like no hoi me ka hiki ole ia oe ke alo ina nou ia mea."

            Nau hou iho la na ku'i o na kauwahine la oiai ua maopopo mai la iaia he mea waiwai ole ka hoopapa ana mai me kekahi kanaka i ike a i maopopo i kaua ana ame kona mau manao.

            "Alaila, e hooiaio mai oe ia'u he hoopunipuni keia mau olelo au ia'u."

            "Ke hooiaio aku nei wau i ko'u hoopunipuni," i panai aku ai o Wete me ka minoaka ana aku.

            "E akahele e kuu haku! He wahine pono ole wau ke hanaia mai na hana hoopunipuni."

            "E kuu lede kaunawahine," wahi a Wete i pane aku ai me ka hooko'iko'i ana iho i kona leo ame ke kuoo maoli, nana hoi i hookomo aku i ka maka'u iloko o ke Kaunawahine Sofia. "aole anei ou ike mai eia wau ke hana nei i kekahi hana i maopopo loa e kau mai ana ka make ame ke ola ia'u ina oia iho la ke alahele, e like hoi me kau e hana nei?"

            "Ke ike nei wau ia mea."

            "Alaila heaha kau e ku nei maanei a hoike ae i na manao hoomaka'uka'u e like hoi me kekahi kaikamahine e hele ana no i ke kula?" Aia iloko o'u ka minamina i ko'u ola mamua o kou, a i oi aku hoi mamua o kau e hana nei no ko'u aloha i ka olua mea e aumeume nei.  Heaha ka mea e hiki ana ia oe ke hana? Eia me a'u ka hae o ka lanakila, a ke manao nei wau e hana aku a hiki i ka hopena."

            "Pela io no, aka heaha iho la ka pili o keia wahine iloko o ko'u poino au e makemake nei e kaawale aku?"

            "Ua ha'i mua aku nei wau ia oe aia kona palapala kaahele me ia nona ame kona hoa."

            "Eia nae hoi ua ha'i mai nei oe he hoopunipuni ia mea au i ha'i mua mai nei."

            "Nau i noi mai nei e ae aku wau e hoopuka aku pela."

            "Eia nae hoi ua ha'i mua mai nei oe ia'u aole oia i ike ua huikalaia mai oia, a mahope mai no hoi ua ha'i hou mai oe ia'u ua hele aku oia e hui me Genrala Gerisa. Ina ua hana io aku oia pela, alaila ua ike oia ua huikalaia mai oia."

            "Alaila, na maopopo ae la ua ha'i aku nei wau ia oe i ka mea oiaio ole?"

            "Ae."

            "Alaila aole anei e loaa ana kekahi manao mailoko mai olaila?"

            "Ke maopopo ole aku la ia'u."

            "Alaila e hoomoakaka aku ana wau ia oe."

            "E hana mai oe pela."

            "Ua ninau mai oe i na ninau a'u i makemake ole ai e ha'i aku i ka haina a nolaila i hoopunipuni aku nei wau ia oe."

            "A nolaila ke hoohoka mai nei oe ia'u?"

            "Pela io no."

            "A ke manao nei anei oe e puka aku ana oe mai keia aina aku?"

            "He kumuhana okoa loa ia mai keia a kaua e kamailio nei."

            "Ke maopopo ole aku ia'u ka'u."

            "Aole loa no hoi oe e maopopo ana ia mea a hiki i kou manawa e hoopoina loa ai i keia mea mai kou noonoo ae. Na ko hoaloha Gerenigofa i hana ino ia oe mamuli o kona maka'u ia oe."

            "Ke manao nei wau e pono oe ke hoomoakakalea loa mai i kau mau mea e kamailio mai nei. Ke kokoke mai nei i ka manawa e holo aku ai ke kaaahi, a ke ha'i aku nei wau ia oe aole loa wau e hookuu aku ana ia oe a hiki i ka manawa o'u e ike maopopo aku ai i na mea apau au i ha'i mai nei."

            "A ke ha'i aku nei no hoi wau ia oe aole loa wau e nana ana i kau paa mai ia'u ma keia wahi. Ke waiho aku nei wau nau e noonoo mawaena o ka hana ana e like me na wahine lede maoli, i loaa ka manao e ninau i na ninau lehulehu he uuku nae ka mea e loaa aku ana, a i ole e hoolilo iho ia oe i hehena i loaa ka manao iloko ona ua hiki iaia ke hoomaka'uka'u i ke kanakamakua me na manao i pili ole aku iaia."

            O keia kekahi o na paio hahana loa mawaena o ka makaikiu ame kekahi wahine i oi aku ka maalea i ko ka nahesa, he hana hoi na ua Wete nei a kaua e hana ana i mea e kuhea ole ai ua kaunawahine puni koko nei i na koa e kii mai ia Vera, ke pio mahuka mai ka halepaahao mai. Ina no i loihi loa aku ko laua papaleo ana, a manao ka makaikiu e lanakila ana kona aoao.

            No Kaunawahine Alamazofa hoi, ua paha'oha'o nui oia i keia mau hana a ke kanaka ana e kuhihewa nui nei oia no ke Duke Kiekie o Kalouga, a aia hoi oia ke noonoo la i ke kumu i lilo aku ai keia duke kiekie i kokua no kona enemi, he mea hoi i pili ole aku i ua duke la. Mamuli no o keia kanalua, ua hooikaika hou ae la oia, a pane aku la me ka leo waipahe:

            "Aole wau i manao e hana hoaloha ole aku ia oe eia nae he mea pono e kaa mai kela wahine ma ko'u mau lima, me ka nana ole ae i ka mea e ala mai ana!"

            "Aole anei wau i hoopaa mua aku nei ia oe e waiho aku no wau iaia iloko o ka poho o kou lima mahope o ka pau ana o ka'u hana?"

            "Heaha kau hana, a pehea hoi ka loihi o ka manawa au e paa ai iaia?"

            "O ko'u hemo aku me ka maalahi mai keia aina aku, oia ka'u hana, a e hookoia aku no kou makemake i ka manawa a'u e kaa aku ai mawaho o keia aina."

            "E haawi mai ana anei oe i kekahi hoopaa ana ma kou aoao e hooko io ia mai ana no ko'u makemake?"

            "Pehea e hiki ai i kekahi kanaka e holo mahuka ana ke haawi aku i kekahi olelo hoopaa?"

            "Ua hiki ia oe ke ha'i mai ia'u i kau mau mea e manao nei."

            Mahalo. Aole wau e waiho aku ia'u iho iloko o na lima o ke Kaunawahine Alamazofa. Ua pinepine na manawa ana i hana ai i na hana kipi, nolaila aia no ko'u pakele a hana wau e like me ka'u i manao ai a pulama hoi i ka'u mau mea e makemake ana e hana iloko iho o'u."

            I ka lohe ana o Sofia i keia pane a Wete, ua pii koke ae la ka inaina iloko ona, eia nae ua ninau mai la oia me ka leo oluolu, oiai ua hoomaka ae la oia e maka'u i ua Wete nei a kaua:

            "Alaila heaha kau e manao nei e hana mai no'u?"

"Oia ka ninau maikai, a ua hoopuka mai la no hoi oe mahope o kou noonoo pono ana. Heaha la ka'u e hana aku ai nou?"

(Aole i pau.)

 

KALE O LEONA

Ka Naita Puuwai

Hao Wiwoole - - -

 

KA HOOPAKELE O KE KAIKAMAHINE ALII

I LAWE MALUIA.

 

MOKUNA X.

 

MAHUKA A MARE MA KA MANA O KA PAHIKAUA.

 

            Alaila wehewehe aku la o Kale i kana papahana hou i kona ukali---e hana hoi me ke akahele no ka ninau ana i ka mea hale hokele ina he kahunapule kekahi iloko o kona hokele a i ole ma kekahi wahi kokoke e loaa ai; a i ka hala ana o Pidiro na ui aku la oia i ka wahine opio no ka hoohui ia laua iloko o ka erita o ka mare me ka hoohakalia ole iloko no olaila a imua o ka elele o ke aloalii i hoounaia mai ai; aka aole he leo i puka aku mai ia Zira aku koe wale no ka huaolelo "ae" oiai no oia e pili loa ana i ka naita opio me he la oia wale no kona puuhonua.

            Aole no i li'uli'u loa ua komo io mai la no ua elele nei ma ka hookipa ana mai o ka mea malama hokele iloko o ka lumi a na aloha e noho ana.

            "E ae mai ia'u e hoolauna aku i keia keonimana." wahi a ka mea hokele i pane aku ai ia Kale," he elele mai ke aloalii mai i makemake e ike ia oe."

            Alila haalele iho la ka mea hokele a nalo aku la iloko o ka pouli a iloko hoi o kekahi hapa o ka hokele a oia no ka manawa i waiho aku ai ka elele i kana mikiona i hoounaia mai ai.  Wahi ana ua hoounaia mai oia e hopu i ka naita o Leona i lawe malu mai i ka wahine hoopalau a ka Moi Mahomeda ma ka inoa o Zira ke kaikamahine a ka Lunakanawai Beni Hame, a eia ae mahope mai ua lunakanawai nei me kona poe koa no keia mikiona hookahi no i ikaika ai ka aoao o ka moi.

            Ma keia mau olelo a ka elele, aole i lilo na mea i hoikeia mai i mea hoopuihili i ka lana malie o kona noonoo, aka ua pane aku ua pane aku no na naita opio nei me ke kuio aole oia e haawi pio, me kona ku pu ana ae iluna oiai kana pahikaua iloko o kona lima.

            "Aole e hookoia ia kauoha oiai ke ola iloko o'u," wahi a Kale i pane aku ai me ka leo ko'iko'i a kuio.

            "Aka he hana maalahi ia nou o ka haawipio ana, mamua o ka mauna wale ana i ke ola imua o ka hapanui. Ua ike no @@ @ oe no ua kanaka nei a aia hoi o Zira ma kou aoao i keia manawa he hoike oiaio loa no keia hoomahuka wahine ou."

            "O ka wahine opio ma kuu aoao o ka'u wahine hoopalau ia a i keia manawa a imua o kou alo ame ua hoike kupono e hoohuiia ai maua i hookahi ma ka berita o ka mare, a o oe ko'u elele e hoke aku ai i ka Moi Mahomeda i ka oiaio o ka wawahiia o kana papahana kumakaia i manao ai e kau maluna o ka mea aole i aloha iaia."

            Ma keia lohe ana o ke aliikoa Mahomeda ua nui ino loa kona puiwa, a pii ino ae la ka eha o ka huhu iloko ona a i ka wa pokole no ua hemo koke ae la kana pahikaua, me ke ano kanalua no, oiai ua loaa maopopo loa iaia ke kulana ame ke ano o ka naita opio mai keia lanakila hanohano ana i hakoko maalahi ai'mai ka lunakanawai Mahomeda mai, a iaia i hoeu mai ai, oia no ka manawa i komo mai ai o Pidiro ame ke kahunapule ame ka mea hokele.

            "Pidiro," wahi a Kale i pane aku ai, "e ku makaukau nou iho, a o ka mea e aa e nee a oni a hooho leo nui iloko o keia maluhia o ka po e make no oia ma keia papahele."

            No Pidiro ua maopopo koke no iaia ke ano o kona Haku a hooholo koke iho la e ku me ka oiaio mahope o kona Haku.

            "Eia ke keonimana i makemakeia, he malihini mai Kasetila mai."

            "Ina e hoao oe e ku e i ke kauoha a ka Moi e ili mai no he poino weliweli maluna ou." wahi a ka elele i pane aku ai me ka leo ano kukule oiai ua iho iho ke ano maka'u iloko ona no kona hookahi wale no a he kokoolua hoi ko ka naita e hiki ole ai ke lanakila kona ikaika nolaila ua hooholo iho oia e kali a hoea mai ka hapanui ame ka na nauki nui no hoi oia e nalu ana.

            "Ua noonoo wau ia mau mea apau," wahi a Kale "a na hooholo iho i ka'u olelo hooholo." A hapai pu ae la oia i kana pahikaua iluna a pane hou ae la me na olelo moakaka, oiai na ni@@ apau e hamau leo ana no ka nui maka'u mamuli o ke kauoha i waihoia aku imua o lakou aole e walaau a onioni.---a o ke kahunapule hoi aia ka maka'u iloko ona me ka maopopo ole nae o ke kumu o keia hana a heaha la kana i hoalaia ai mai kona hiamoe mai; a o ka mea malama hokele aia kona mau kuli ke haalulu la no ka maka'u a me ka maopopo ole no hoi iaia o ke kumu o ka hanaia ana o keia hoohaunaele iloko o kona kuleana.

            "Ma ka mana o ka pahikaua o ka naita o Leona, ke kauoha aku nei wau ia oe e ke kahunapule e lawelawe i kau oihana laa o ka berita mare maluna o'u ke Kauna Kale Valedolida ame Zira ka wahine opio ma kuu aoao nei imua o keia poe hoike me ka hakalia ole."

            Ma keia mea ua puiwa loa ke kahunapule a pioloke loa ae la kona noonoo a maopopo ole iaia o ka mea e hana ai, aka o ka hiki mua iloko o kona hoomanao he hana hiki ole ia iaia o ka mare ana ma ka ikaika o ka pahikaua koe wale no a ae na mea elua.

            "O, e ka naita o Leona aole e hiki ia'u ke lawelawe i ka oihana laa," wahi a ke kahuna me ka wili ana ae i kona mau lima i kahi hookahi e hoike ana i kona kaumaha, a ia manawa koke no ua @@@ aku la o Kale imua a na keia hoohele ana o ka naita i hui pu ia me ka weli o kana kana pahikau e kau la iluna, oia ka mea nana i h@@ hikilele loa ae i ka noooo o ke kahuna, a o mai la i kona mau lima a elua iloko o ka lewa me ka hoopuka ana:

            "Ua hiki no ke ae like olua." A no keia mea i lohe like ai na mea apau i ka pu-a koke ana ae o ka leo o ka wahine opio e haawi ana i kona ae no ka hoolilo ia laua i hookahi ma ka berita mare.

            "Oia ko'u iini," wahi a Zira i pane aku ai i ke kahunapule n@@ na kuli e haalulu ana no ka nui maka'u, "a mai hoohakaha i ka lawelawe ana i kau oihana maluna o maua no ka mea ke ae aku nei wau e hana pela e ka makua."

            "E makaala e Pidiro," wahi a ka naita i kahamaka ae ai, "aole loa e hapaia kekahi limaikaika ma ka manawa o ka oihana laa e lawelaweia ana e ke kahuna,"a huli ae la oia a kauoha aku la i ua kahunapule nei no ka lawelawe ana i kana oihana.

            "E ka makua, ke kauoha hou aku nei wau ia oe aole e hoohakalia i kau oihana mamuli o kou lohe ponoi ana mai la no i ko maua manao ae."

            Ma ka aoao o ka elele o ka moi aia oia ke nanauki loa la no ka hoea koke ole mai o kona poe hoa e hiki mai hoi i ka wa mamua o ka mare ana e pono ai. a aia me ia na hoolono maopopo akahele loa ana o ka lohe aku i na haluku lio mai owaho. Aia pu no hoi ka mea hokele iloko o ka puiwa nui a hala wale kekahi manawa o ka hamau leo ana oiai ua hiki ole ke hoopuka leo mamuli o ke kauoha i waihoia mai, ua komo koke aku no ka iini nui iloko ona e hoopau koke ae ke kahua i kana hana me ka hoohakalia ole a e hookuu aku i na mea apau e hele mai kona home aku, oiai aole no he waiwai o keia mare iaia, wahi ana e nalu nui ana.

            A me ka oni ole no hoi o ka ukali o ka naita, a oiai ua hooholo iho no oia e hookoe ola ole iho,a mahope iho o a lawelawe haalulu ana a ke kahuna i ka oihana laa o ka berita mare maluna o na opio, ua lilo ae la laua i hookahi ma ka puana ana mai o ke kahuna he kane a he wahine i mare pono ia.