Ka Nupepa Kuokoa, Volume XLII, Number 47, 18 Nowemapa 1904 Edition 02 — Page 2

This text was transcribed by:	Kate Motoyama
This work is dedicated to:	sister jessa bettger-barzelay

Ka Nupepa Kuokoa

KE KILOHANA POOKELA NO KA LAHUI HAWAII.

2 NUPEPA KUOKOA, POALIMA, NOVEMABA 18, 1904.

Nupepa Kuokoa

NO KA MAKAHIKI - - $2.00

NO EONO MAHINA - - 1.00

SUBSCRIPTION RATES

ONE YEAR - - $2.00

SIX MONTHS - - 1.00

O NA OLELO HOOLAHA APAU E HOOUNAIA MAI ANA NO KA HOOLAWA MALOKO O KEIA NUPEPA. E HOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.

O na Dala apau o ka Pepa e hoouna pololei

mai i ka HAWAIIAN GAZETTE

COMPANY, LTD.

HOOPUKAIA E KA

Hawaiian Gazette Co., Ltd.

Hookomoia ma ka Hale Leka o Honolulu,

Panalaau o Hawaii, me ke ano

Mea o ka Papa Elua.

DAVID L. A-I, : : Lunahooponopono

S. K. NAWAA, : Kokua Lunahooponopono

A. W. PEARSON, : : Lunanui

HONOLULU, OAHU.

POALIMA : : NOVEMABA 18, 1904

O ka mea hooikaika a hiki i ka hopena e loaa no iaia ka lanakila. Pela na Repubalika i hooikaika iho nei a loaa no hoi ka lanakila kamahao loa.

Ua hala aku ia ke Alii huli pomaikai, ka Elele Lahui Kalanianaole, ne Wasinetona, heaha ka hana pono i na Hawaii e hana aku ai mahope nei? E huli ihe i na hemahema i makemakeia no Hawaii nei a hoouna ma kona lima, a nana e hana mai. O ia iho la ka hana maikai.

He ike no ka hoi ke kolohe i ka hilahila ame ka maka'u i na kanawai o ka aina nei i hoao ae ai e holomahuka aku mai ka aina nei aku. Ia malama i na kanawai, a e hoolohe hoi. E maka'u i ka hana hewa a oia wale no ke alahele e pakele ai.

He mea pono no e loaa on a luna alanui no ka Apana Elima o Oahu nei i hiki ke hoomaopopoia na hemahema o ia apana. Ua hana aku ka Elele Lahui i kana hana a pela no hoi me ka lunahoomalu o ke Komite Kuwaena o ka aoao Repubalika, ma ka hui kino ana aku me ke Kiaaina, aka aole i ko ka laua mea i hooikaika ai. He mea pono i na lala o ka Ahaolelo kuloko e han amai i keia hemahema.

Ke kuhikuhi nei na enemi o ka aoao Repubalika i haule lakou no ke koloheia o na balota. Ke ninau nei ke Kilohana: Aia ka hoi ihea na kiai o na aoao kalaiaina e ae? Iloko o kahi koho balota, o na Home Rula wale no paha ka i loaa ole he mau laia ko lakou iloko o na Papa Nana. He elua Lunanana o na Repubalika, a he hookahi o na Demokarata, aia ihea keia Lunanana o na Demokarata? He hookahi no akioma maopopo loa, ua koho na kanaka i na Repubalika, a oia no ke kumu i lanakila ai na Repubalika, aole e like me na waha-a e oleloia nei.

Ua eha na maka o na enemi o ka aoao Repubalika i ka lanakila kamahao i loaa ia aoao ma ka la koho iho nei. Ua hoolahaia ae na olelo e olelo ana i ka luia o na dala a ka lehulehu no na hana kalaiaina. Aole i loaa i ke Kilohana na hooiaio ana no keia. O ka mea i loaa ua kokua na haole waiwai o ke kualanakauhale nei i na hana kalaialua a na Repubalika, a oia na dala i luia iho nei. Ina no hoi ua kiiia na dala o ka lehulehu a luia ae, he mea hewa anei ka lu ana ae ia mau dala i hala ae ia mau la makapehu o ke taona nei? O ka paa ana o ke Aupuni i na dala o ka lehulehu, oia no kekahi mea nana i hooinaina loa i na enemi o ka Repubalika a kalahea nui ae la ma na wahi apau, a iloko no hoi o na kahuahana, he mau hana pono ole keia. I ka luia ana hoi keia, hoomaka mai la e namunamu. O keaha la ka hana pono. O ka hoopau ae i ka namunamu me ke kumu ole, a e hana kakou me ka lokahi.

KO KAKOU AHAOLELO E

HIKI MAI ANA.

O ke kau Ahaolelokuloko e hiki mai ana i keia makahiki ae oia ka Ahaolelo mua loa e paa ana iloko o ka moolelo o Hawaii nei, he Ahaolelo Repubalika, oiai ma ka Senate he umikumamaha ka nui o na Repubalika a he hookahi wale no Demokarata. Ma ka Hale hoi o na Lunamakaainana he iwakalua-kumamaiwa Repubalika, a he hookahi wale no Home Rula. O ka ninau ma keia wahi: Heaha la ka ikaika o keia mau kanaka elua iwaena o keia huina nui o na Repubalika? Me ka hoohewahewa ole ae ke Kilohana e puana ae nei, aole loa he wahi ikaika o keia mau kauwa a ka lehulehu. He elua no alahele maopopo loa a keia mau kanaka e hana ai. O ka mua, oia na ka hoao ana ma na ano apau e ku-e i ka lawelawe aupuni ana a ka Mana Hooko, i kulike i me ko laua mau kahuahana pakahi i hehi ai ko laua mau kapuai wawae maluna iho: a o ka lua, oia ko laua hoolilo ana ae ia laua i mau kauwa e hoolohe ana i na alakai ana a ka hapanui.

He nui na mea i makemakeia e hanaia mai no keia Teritore ma keia kau Ahaolelo ae. He nui na kanawai hookaumaha e kau nei maluna iho o kakou i keia mau la a oia ka Kiaaina Carter i makemake ai e hooponopono mai ka Ahaolelo e hiki mai ana ia mau kanawai. Ke manao nei kekahi poe i ka hookaumaha o ka Oihana Makai o keia mau la ma ka papa ana i na hana hooikaika kino ma ka la Sabati, ke pani ana i na hale oihana a halekuai liilii ma ia la, ame kekahi mau hana e ku-e ana i ka mluhia o ka la Sabati; eia nae ka mea apiki aole he noonoo ae aia no he kanawai i hanaia a e paa nei ma ko kakou mau buke kanawai e pili ana no ka malama ana i ka maluhia o ka la Sabati. Aole i hewa ke Kiaaina ame ka Oihana Makai ma keia mea, a he mea pono e inaina ole aku i ke Kiaaina ame ka Oihana Makai ma ka hooko ana i ka hana i waihoia aku na laua e hana mai. E waiho aku i keia mau hemahema apau i ka Ahaolelo, ke kuleana ia o ke kohoia ana o na lala o ia Aha e na makaainana. Ma ka aoao no nae o ke Kilohana, ke makee nei oia i ka maluhia o ka la Sabati, e like me ke Kanawai a ke Akua i kau mai ai mahope o Kona hana ana i na mea apau. Ana hoi i kau iho ai penei:

"E hoomanao i ka la Sabati a e hoano ia la. I na la eono oe e hana ai i kau mau hana apau, aka o ka hiku o ka la, he Sabati ia no kou Akua. Aole loa oe e hana ia la, aole oe, aole kou kauwa kane aole kou kauwa wahine," a pela wale aku.

O kekahi o na kanawai ano nui loa e aia mai ana ma keia kau Ahaolelo ae, oia no ke Kanawai Kalana. O keia ka pulakaumaha o ka lahui Hawaii i paio ai iloko o na makahiki i hala ae nei, a maloko o ke Kahuahana o ka aoao Repubalika, ua hoopaa mai la aoao e hana ana i keia kanawai ma keia kau Ahaolelo ae. I hoike no ka paa ana o ia manao iloko o na Repubalika, ua hana iho ke kau Ahaolelo i hala i olelo hooholo e kukulu ana i Papa Komisina haku Kanawai Kalana, a eia keia hana nui ke waiho mai nei iloko o na lima o na lala o ia Komisina i hookohuia ai e ke Kiaaina e hana mai ana ke komisina i ka hana, a waiho ae iloko o ka Ahaolelo e hoea mai ana, no ka hooholo loa ia me na hooponopono ana a na lala o ka Ahaolelo i ike ai he mea pono.

Ma ka aoao o ke Kilohana, ke poloai nei i na lala o ka Ahaolelo e nana pono akahele a noonoo pono mai i ke ano o keia kanawai. Aia maluna o keia kanawai ka make ame ke ola o keia Teritore. E nana pono mai oukou i auhau papalua ole ia na makaainana. He mea pono e hanaia mai i kanawai e kaulike ana maluna o na mea apau i like ke koikoi maluna o ka mea waiwai ame ka mea ilihune, e kaana pono ana hoi i na pomaikai apau iwaena o ka lahui holookoa. E hanaia hoi i kanawai e hiki ai ke ku aku imua o na Aha Kiekie o keia honua me ka loaa ole o ka mea nana e kulai, e like hoi me ke kanawai kalana o keia makahiki aku nei i kulaila ai e ka Aha Kiekie o kakou nei.

Aole wale o keia na hana e hana ia ana ma keia kau ae; aka aia no ko kakou bila haawina no na makahiki e nee aku ana a loaa aku keia kau Ahaolelo aku. O keia kekahi mea ano nui loa a na hoa o ka Ahaolelo e nana mai ai. Ua lawelaweia na hana o ke Aupuni i keia manawa maluna o ke kahua o ka hoomakaulii me ka nee malie ana o na hana imua pela hoi ke Kilohana e kauleo nei i na lala o ka Ahaolelo e hoomakili ma ia meheu. Ma na hoike loaa e ikeia nei i keia manawa ke pii nei na loaa o ke Aupuni iluna, nolaila he mea pono no e hooponopono hou ia na lilo a kulike me na loaa mai o ke Aupuni. He mea maikai e loaa na alanui maikai no ko kakou aina nei, aole wale oia, aka he mea pono e loaa no hoonaauao kiekie ana maloko o ko kakou mau kula Aupuni, a o ke alahele e hiki ai ke loaa keia mau mea oia no ka hoomahuahua ana i ko laua mau haawina. O ka hoomahuahua no nae a ke Kilohana e manao nei, oia ka hoomahuahua ana iloko o ke alahele kupono e like ai na loaa ame na lilo o ke Aupuni, aole o ka uhaai wale aku.

Me keia mau hoakaka pokole ana. ke manaolana nei ke Kilohana e lawe ana na hoa o ka Ahaolelo a malama i kela mau alakai pokole ana a ke puana e ae nei no makou, ina e hana mai ana oukou i na hana apau o ka Ahaolelo me ke kaulike, ka maemae, ka hoololoiahili ole, ka hoomakaulii ame ka hooko ana i ka oukou i hoohiki ai maluna o ke Kahuahana o ka aoao Repubalika, alaila i keia kau aku he Repubalika wale no na lala apau o ka Ahaolelo, aole Home Rula aole hoi he Democarata.

HE LEO A'O I NA MAKUA-

HINE.

Mai ka hookumu ana o ke kaa uwila a hiki i keia manawa, ka halawai mau o ka maka o kela ame keia ohua a kau ana maluna o na kaa me na keiki liilii, ma ka umi o na makahiki a emi mai, e hele ana ma o a maanei me ka hoomaopopo ole i ka poino mai na lahui e a ia kakou na Hawaii; nolaila i ulu ae ai keia poo manao e kau ne la maluna "He leo A'o i na Makuahine."

No ka mea, mamuli o ko oukou hoohemahema i auwana hele ai na keiki liilii ma na alanui aupuni, a i ka loaa ana i na ulia popilikia, ka hewa, he holonui, he wahi haole hookano, a pela wale aku; aka, i na oe e huli pono iho i kahi ame ka mole i ulu mai ai o ka poino, e ike auanei oe me ka moakaka lea, mamuli o ka "hoohemahema o na makuahine," i ka hookuu wale ana i ka lakou mau keiki e hana e like me ko lakou makemake i halawai ai me na poino.

O na keiki i a'o pono ia, e ike ana no lakou i ka poino o mua o ko lakou alahele, a e hoomamao no lakou ia lakou i ho mai na alanui aupuni mai, aka, o na keiki i hookulala ia e hana e like me ko lakou makemake iho, ua lilo ia mau alahele a ke keiki i a'o ponoia i makau ai, i wahi lealea loa na lakou, a e moe auanei no lakou i ka po noonoo ana no na kaa uwila. A ulu ae ai keia ninau: "Nowai ka hewa, no na keiki anei, a i ole, no na makuahine paha?"

Ua hiki loa i na poe holona ke kuailo mai i ka haina o ka ninau e kau ae la maluna: "No na makuahine ka hewa." Ma ka hapanui o na home o kakou na Hawaii, he laki loa ke loaa he hookahi hapa-kolu o ia mau home e hoopumehana ia ana e kona haku wahine me hana mau kamalei. O ka hapanui e ike ia nei, oia no ka hamama mai no a na puka, aohe nae he kanaka, e noke oe i ke kahea a ha ka leo, o ke aoa mai no a ka ilio ame ka miao mai no a ka popoki, a he no nae he haku hale. Ina oe e ninau hele aku e loaa aku no auanei ua haku hale nei e kukahekahe ana i ko hai ipuka. O ka hana maa mau la e ike ia nei ma na home, aole o ka noho a hoomaopopo i ka home ame kona mau hemahema liilii, oiai, o ko lakou pahi ia o ka hana, a i na he mu @puu ka lakou, o ke a'o ia lakou me ka ikaika i na hana lima a@ ka loina o ka nohona kanaka ma@ua, aole o ka hookuu na lakou hupo no e imi aku ia mau keehina.

Aole no @hi loa aku nei, ma ke ahiahi no o ka Poaono i hala, oiai ke kaa u@ila helu umi e pii ana no Puunui ma ka uakee mauka aku o ke alanui Kauka, ua holo naaupo mai la he wahi keiki uuku a hooku'i i ka hehina o ke kaa, a in a aole e loaa koke i kekahi o na ohua o ke kaa, i na ua kapoo malalo, a ehia ka hoi mea aloha o ka makuakane, i ka hoi aku o ke ahiahi Poaono, e makena mai ana kauhale. Aole wale ae la no o keia na ulia i loaa, he nui aku mamuli no o ka hoohemahema ame ka hookuukuuia o na keiki.

Nolaila e na makuahine, na haku hoi o ka home, no oukou neia mau leo uwalo. Maihoohemahema i ka hua ka momi makamae hoi o na la u'i, e a'o a paka ia lakou me ke kunukunu ole no ka mea, aia no he la a e hua mai no auanei ia mau a'o ana a oukou, a na oukou no e ai ka loaa.

JAS. K. II.

NA HOOMAIKAI.

E o'u mau Haku Makaainana o ka Mokupuni o Oahu, Aloha oukou:--Ke haawi aku nei au i ko'u mahalo nui mamuli o ko oukou haawi ana mai i ka hilinai piha ia'u ma ka pahu balota a i keia la ke kei nei i ka lei o ka lanakila, he Senatoa no ko kaou mau Pae Aina aloha.

No'u iho ke hoopaa a ke hooia aku nei e hana ana ko oukou KANAKA i ke kaulike no ka pono ame ka holomua o Hawaii aloha a pela auanei na Mana Lani e kokua ai ai ia'u.

Owau iho no, ke kauwa a ka lehulehu, JOHN C. LANE.

Honolulu, Novemaba 9, M. H. 1904.

HE HOOMAIKAI.

E Mr. Lunahooponopono, Aloha oe:--E oluolu mai ia'u i wahi ohua oneki no "Ke Kilohana Pookela no ka Lahui Hawaii;" a eia iho au mai luna a lalo:

I na haku makaainana o ka Apana Koho Lunamakaainana Ekolu o k Teritore o Hawaii, mai ka Mahele Koho Ekahi o Kalawae ame Kalaupapa a i ka Mahele Koho Iwakalua ma Kaupo, ke haawi aku nei au i kuu hoomaikai palena ole ia oukou no ka oukou mau kakoo ana mai ia'u ma ka la Koho Balota i hala iho la, mamuli o na heluna balota a oukou i haawi mai ai no'u; a ke haawi pu aku nei no hoi au i ko'u mahalo nui ia oukou in a aia mau me oukou ka manao kuokoa ame ke kupono mau no ka pono kaulike o ka lehulehu, ke alahele a ka oukou moho i ake nui ai.

Ke haawi pu aku nei no hoi au i ko'u hoomaikai nui i na haku makaainana o'u a pau loa ma na Mahele Koho he Iwakalua, no ka mea, o ka oukou i manao ai e koho aole paha ia i kulike me ka ke Akua i koho ai nolaila, ua loaa mai ka mea pololei mahope o ke koho ana.

A ke haawi pu aku nei no hoi au i ko'u mau hoomaikai no na moho lanakila o ka Aoao Repubalika. Me ka manaolana mau e hanaia na Kanawai a me na pono laula o ka lehulehu ma ke alahele a ke kanaka Amerika i hanau pu ai me ia.

A in a aole pela, e hoea hou aku ana no au imua o oukou.

Owau iho no ka oukou kauwa haahaa.

GEORGE KAUHI.

Na Hono a Piilani, Nov. 10, 1904.

HE HOOMAIKAI.

I o'u mau Haku Makaainana o na Mokupuni o Kauai Manakalanipo ame Niihau aloha oupou apau:

Me na mahalo he nui no ko oukou papahi ana mai i ka Lei o ka Hanohano maluna o ka oukou kauwa nei, ma o ko oukou wae ana a lilo owau kekahi o na Lunamakaainana no keia kau Ahaolelo e hiki mai ana, nolaila ke haawi aku nei i ko'u mau hoomaikai ana he nui ia oukou apau, a ke noi ae nei i na Mana Lani e hookuikahi ia kakou apau ma ke apo o ka lokahi, a e alakaiia na hana ma ke ala o ke kaulike ame ka pololei.

Ka oukou kauwa me ka haahaa.

GEORGE WAIAU MAHIKOA.

Kalihiwai, Kauai, Nov. 5, 1904.

MAI HAWAII O KEAWE.

"Kani na Moa, ua ao,

Ka malamalama Nui e,

Ua ikea--oia--e."

"Ina e hiki ia makou ke hoonee i na kuahiwi ekolu o Hawaii, Mauna Kea, Hualalai, ame Mauna Loa, a ku i ka moana kai uli kai hohonu, a nele nae makou i ke aloha, he mea ole makou."

A in a no he nui ko makou akamai, a pa i ka lani, i ka olelo a na kanaka ame na Anela: a i loaa ole ke aloha, ua like makou me ke Keleawe kanikani ame ke Kumebala walaau. Nolaila, ua oi aku no ke "Aloha" ia, he mokuhia pu ole i na wai kahi he nui. Nolaila, o ke aloha no ko oukou a nui e ka poe koho balota o ka Apana Koho Elua, mai ka lae Akau o Upolu e oni aku la e pili me Maui a ka lae Hema o Kalae e pili oni aku la me Kahiki.

O makou hui, a o makou pakahi na Moho Repubalika i koho pono ia, a kau ka lei hanohaweo o ka Hanohano ma na poo ame na paapilali gula ma na poohiwi, mai ka Elele, na Senatoa ame na Lunamakaainana ma ka la 8 poina ole i hala aku la, a oukou i maki (march) aku ai me ka hopo ole, e hoolohe ana i ka leo kahea paikau. E nee imua ma ka pa-ha hoi iho ma ka pa-lua a pa-kahi. O oukou na koa, ola na iwi ame ka aina, kela mau koa Pelekane a ke kaeaea Napoliona i mahalo nui ai.

"Ua like me na pa-pohaku," a ina nae he mau Ilamuku Farani na Alakai: O ka lilo no ia o ke ao holookoa nei i ua Ahikanana la o Farani. Nolaila, e na koa aloha, ke haawi aku nei makou i ko makou mahalo nui ia oukou me ka poina ole, a o ka makou hana wale no koe no ka pono ame ka @mua o ka aina aloha.

J. K. KALANIANAOLE,

Elele.

J. T. BROWN,

GEO. C. HEWITT,

Na Senatoa.

F. R. GREENWELL,

H. L. HOLSTEIN,

CHAS. H. PULAA,

Na Lunamakaainana.

Hawaii Komohana, Nov. 11, 1904.

LIKE OLE KA ELELE ME

KE KIAAINA.

Ma ka Poalua nei i ala mai ai kekahi like ole mawaena o Kiaaina Carter ame Elele Lahui Kalanianaole, i huipuia hoi me A. G. M. Robertson, maluna o ka ninau no ka hookohu ana ia Henry Vida i hope luna alanui, a hoonoho aku iaia ma ka Apana Elima ma ke ano he luna alanui no ia Apana. Aole he mea i hanaia maluna o keia mea, a ke paa nei no o Kiaaina Carter i kona manao. Ua manao ka Elele e hookuu ae ia Mr. Crowninburg, a e hookomo aku ia Henry Vida ma ia makalua. Mamuli o ka like ole o na manao, ua hoike ae ka Elele i kona manao e waiho i kona kulana Elele, aka ua hoololi ae oia mahope mai.

Ua mana pu no hoi ka Elele e hoonohoia aku o G. L. Desha i hope lunapaahao no Kawa, aole nae e hiki oiai ua hookohu aku o Kiaaina Carter ia Mr. Burke ma ia makalua.

He papale Panama hou ko S. L. Desha i hoi aku nei ma ka mokuahi Kinau o ka Poalua nei. He makana keia mai kona mau hoa Repubalika.

Ma na hookolokoloia ana o na Kepani puhi okolehao o Hauula i ka Poakolu nei, ua hoike ae lakou ua uku aku lakou ia Hope Makai Nui Lane he $75 no ka mahina hookahi, e loaa aku ia lakou ke kuleana puhi rama. E papaa ana paha ka ai.

HE OLA NO KA PUU EHA.--O ka hoailona mua loa no ka puu eha oia ka hope aku o keia hanapilo e hoomaka ana ka puu e kalakala a kunu mai hoi me ka aaki. Ina e haawiia ka laau Chamberlain's Cough Remedy mahope o ka puka ana mai o ka hanapilo e kaupaleia no ka loaa ana mai i ka puu eha. Eia keia laau ke hoohanaia nei ma na home apau ma keia aina nui a aole hoi he manawa i loaa aku ai ke kaumaha maluna o na makuahine no lakou na kamaiki i loaa i keia haawina. Aole loa makou i lohe mai i kekahi hoohalahala ana e pili ana nona. Aole he laau i hoike mai i kona moolelo maikai e like me keia laau--a ua oi aku hoi mamua o kanakolu makahiki o ka hoohanaia ana o keia laau me ka loaa ole mai o kekahi hoohalahala. Ke kuaiia nei ma na halekuai laau lapaau apau. BENSON, SMITH & CO., LTD., na Agena ma Hawaii nei.

HOOLAHA MA KE KAUOHA.

HOOLAHA KUKULU HUI.

Ma keia ke haawiia aku nei ka hoolaha o ka poe no lakou na inoa malao iho nei ua komo ae nei lakou ma ke ano hui no ka hana o ka lawelawe mahi laiki, ma ka Mokupuni o Oahu, Teritore o Hawaii, malalo o ka inoa hui LUNG DO WAI COMPANY.

Na Inoa. Leong Sou, Choy Pan, Ng Kin Ching, Lum Yin, Lum Gee, Mark Wah Chean, Lo Sun, Lau Choy, Lau Din, Lee Kuon Tio, Lum Ng. Wong Ching, Yee Joe See, Yee Yuen Sin, CHoi Kee, Yee Chin, Trustee, Choy Sum, Yee Jam, Choy Fon, Young Kau, Lee Hu Ken, Hu Kung, Yong How Yee, Pang Bang Tuck, Lau Pau, Yum Sarm, Lau Bow, Lee Duck, Hung CHew, Chang See, Lau Low, Wong Sun Me, Yee Shob Choi Sam, Chow Kwai, Lum Quai Hou, Yee Yuen.

Honolulu, Oahu, Oct. 31, 1904.

3041--Nov. 11, 18.

HOOLAHA MANA HOOKOLOKOLO

ILOKO O KA AHA HOOKOLOKOLO KAAPUNI O KA APANA KAAPUNI EKOLU, TERITORE O HAWAII--

HOOPONOPONO WAIWAI HOOILINA MA KE KEENA. ILOKO O KA WAIWAI PAA O REV. S. C. LUHIAU,

I MAKE O KOHALA AKAU, MEA I MAKE.

Kauoha o ka Hoolaha o ka Hoolohe Palapala Noi no ka Hooponopono Waiwai Ana.

Ma ke heluhelu ana ame ka waihoia ana mai o ka Palapala Noi a Carrie Luhiau, ka wahinekanemake a Rev. S. C. Luhiau o Kohala Akau, Hawaii, ua make kauoha ole oia ma Kohala Akau, ma ka la 29 o Feberuari, A. D. 1904, e waiho ana hoi he waiwai paa iloko o ko Hawaii Paeaina i kupono no ka hooponoponoia, a e noi ana e hoopukaia i mau palapala hooponopono waiwai ia Carrie Luhiau.

Ua kauoha pu ia no hoi o ka Poalua, ka la 29 o Novemaba, A. D. 1904, ma ka hora umi (10) a. m., oia iho ia a o keia ka manawa i hooholoia no ka hoolohe ana i ua palapala noi la i oleloia iloko o ke keena o keia aha ma Kailua, Hawaii, a ma keia manawa no hoi a me kahi i hoikeia ae nei o na poe apau i pili i keia e hiki ae lakou a hoike ae i ke kumu, in a he mau kumu ka lakou, no keaha ia e ae ole la ai ke noi i oleloia, he hoolaha o ke Kauoha e hoolahaia ma na olelo Hawaii ame Enelani no ekolu pule neepapa iloko o na nupepa Pacific Commercial Advertiser ame Kuokoa iloko o Honolulu.

Hanaia ma Kailua, Hawaii, Okatoba 21, 1904.

JOHN ALBERT MATTHEWMAN,

Lunakanawai o ka Aha Hookolokolo Kaapuni o ka Apana Kaapuni Ekolu.

Ikemakaia:

JOHN P. CURTS.

Kakauolelo o ka Aha Hookolokolo Kaapuni o ka Apana Kaapuni Ekolu.

3039--Oct. 28, Nov. 4, 11, 18.

HOOLAHA AINA AUPUNI.

PUUWAAWAA LAND.

Ma ka Poaono, Dekemaba 3, 1904, ma ka hora 12 awakea, mamua iho o ke alo o ka Hale Hookolokolo, Honolulu, e kuaiia aku ana ma ke kudala akea:

25.38 eka aina kula, e waiho ia ma Puuwaawaa, Kona Akau, Hawaii. Kumukuai haahaa, $507.60. Ma ke kuike ka makemake a ma ke dala gula hoi o Amerika.

No ke kii aina ame na mea aku i koe, e ike ae ma ke Keena o na Aina Aupuni, Hale Hookolokolo, Honolulu, a i ole ma ke Keena Aina, Hilo, Hawaii.

JAS. W. PRATT,

Komisina o na Aina Aupuni

Honolulu, H. T. Novemaba 1, 1904

3040--Nov. 4, 11, 18, 25.

HOOLAHA AINA AUPUNI.

Ke haawiia aku nei ka hoolaha o na aina i hoakakaia ma keia Papa Kuhikuhi malalo iho nei e weheia aku ana no na noi malalo o ka Hapa VI o ke Kanawai Aina o 1895, no na Home Hookuonoono Hoolimalima, ma ka hora 9 a. m. Novemaba 25, 1904, ma ke Keena o ka Hope-Agena, Hale Hookolokolo o Hanalei, Hanalei, Kauai.

PAPA KUHIKUHI.

Na Eka.

Apana 1 . . . 3.6

Apana 2 . . . 3.7

Apana 3 . . . 3.7

Apana 4 ame 4A . . 5.3

Apana 5 ame 5A . . 5.5

Apana 6 ame 6A . . 5.4

Apana 7 ame 7A . . 5.5

Apana 8 ame 8A . . 5.5

Apana 9 ame 9A . . 5.5

Apana 10 ame 10A . 5.5

Apana 11 ame 11A . 5.5

Apana 12 ame 12A . 5.4

Apana 13 ame 13A . 5.4

Apana 14 ame 14A . 5.5

Apana 15 ame 15A. 5.5

Apana 16 ame 16A . 5.7

Apana 17 . . . 1.5

Apana 18 . . . 1.8

Apana 19 . . . 1.7

Apana 20 . . . 1.3

Apana 21 . . . 1.3

Apana 22 . . . 1.6

E hiki Kino ae ka poe e noi ana no keia mau pa i oleloia ae nei maluna ma ke Keena o ka Hope Agena, e like me la i hoikeia ae nei maluna.

Eia keia mau apana ma ke awawa o Hanalei, aole hoi i loihi loa mai ke kaikuono o Hanalei, Kauai.

No ke kii aina ame na mea aku i koe e hiki no ke loaa aku ma ka ike ana ae i ke Keena.

JAS. W. PRATT.

Komisina o na Aina Aupuni.

Keena Aina Aupuni o Honolulu, Okatoba 2, 1904.

3039--Oct. 28, Nov. 4, 11, 18.

HOOOLAHA AINA AUPUNI.

1. Ma ka Poaono, Novemaba 26, 1904, ma ka hora 12 awakea, ma ka Hale Hookolokolo, Waimea, S. Kohala, Hawaii, e kuaila ana ma ke kudala akea:

He hapa o na mahele Helu 1 ame Helu 2 o ka aina o Paulama, Aina o Puukapu i Hookaawaleia, Waimea, Kohala Hema, Hawaii.

Iliaina o ka Helu 1, 10 005-1000 eka. Kumukuai haahaa, $300.

O ke kuai ana aia maluna o kekahi mau kumu. No na mea apau, kii aina, etc., e ike ae ma ke Keena o na Aina Aupuni, Hilo, Hawaii.

2. Ma ka Poaono, Dekemaba 3, 1904, ma ka hora 12 awakea, ma ke Keena Aina Aupuni ma Hilo, Hawaii, e kuaila aku ana ma ke kudala akea:

Pa aina 27 o ka Palapala Aina Aupuni Helu 3, Ponohawai, Hilo, Hawaii. Iliaina 98.2 eka. Kumukuai haahaa, $500.00 ma ke kuike.

Pa Aina 27, Palapala Aina Hookuonoono Helu 9, Kaiwki, Hilo, Hawaii. Iliaina 15.3 eka. Kumukuai haahaa, $239.50.

Pa Aina 40, Palapala Aina Aupuni Helu 13, Kaiwki, Hilo, Hawaii. Iliaina 10.06 eka. Kumukuai haahaa, $163.90.

O ke kuai o na aina ma Kaiwiki aia maluna o kekahi mau kumu. No na mea apau, palapala aina, etc. e ike ae ma ke Keena Aina Aupuni, Hilo, Hawaii.

JAS. W. PRATT,

Komisina o na Aina Aupuni.

Keena Aina Aupuni o Honolulu, T. H. Okatoba 24, 1904.

3039--Oct. 28; Nov. 4, 11, 18.

HOOLAHA AINA AUPUNI.

1. Ma ka Poakahi Dekemaba 12, 1904, ma ka hora 12 awakea, ma ke alo iho o ka Hale Hookolokolo, Honolulu, e kuaiia aku ana ma ke kudala akea:

6731 kapuai kuea o ka aina e pili ana i ke Alanui o Diamond Head (Kaimana Hila Alanui) ma Kaalawai, Oahu. Kumukuai haahaa $336.55. Ma ke kuike ka makemake a ma ke dala gula o Amerika.

Pa-hale 7A, ma Tantalus, nona ka iliaina o 1.82 eka. Kumukuai haahaa $1820. Ma ke dala kuike ka makemake a ma ke dala gula no hoi o Amerika.

2. Ma ia manawa hookahi a ma ia wahi hookahi no hoi, e kualia aku ana ma ke kudala akea, ka hoolimalima o keia aina malalo iho nei e waiho la ma Hilo Akau, Hawaii.

Ka aina o Kulaimanu, nona ka iliaina o 374 eka, oi aku a emi iki mai paha. Manawa hoolimalima Elima (5) makahiki mai ka la 27 aku o Dekemaba, 1904. Uku-hoolimalima haahaa 42200 no ka makahiki, e uku hapa makahiki ana ma ka hookaa mua.

No na kii aina ame na mea aku, i koe, no na aina maluna ae nei, e loaa no ke ike ae ma ke Keena o na Aina Aupuni, Honolulu, Oahu.

JAS. W. PRATT,

Komisina o na Aina Aupuni.

Honolulu, November 12, 1904.

3042--Nov. 18, 25--Dec. 2, 9.

Ma keia Sabati aku nei i malama ae ai na Kepani koa he hoomaamaa kikipu ma Kaimuki. Ke manaoia nei he hana ku-e kela i na kanawai Lahui.

HOOLAHA KUMAU

Kakela me Kuke

[KAUPALENAIA]

Poe Kalepa ma

ke Komisina

::A HE::

POE LAWELAWE KOPAA

Poe Agena no na Ma-

hiko Lehulehu.

Hui Alahao ame Aina o Oahu

MANAWA HOLO

Oct. 6, 1904

MAI HONOLULU AKU

No Waianae, Waialua, Kahuku ame na wahi hoolulu ma ke alahao--*9:15 a. m., *3:20 p. m.

No Pearl City, Ewa Mill, ame na wahi hoolulu ma ke alahao--+7:30 a. m., *9:15 a. m., *11:05 a. m., @., *3:20 p. m.,

*5:15 p. m., @ p. m., +11:15 p. m.

MAI WAHO MAI.

Ku i Honolulu mai Kahuku, Waialua, ame Waianae mai *8:36 a. m., *5:31 p. m.

Ku i Honolulu mai Ewa Mill ame Pearl City mai--+7:46 a. m., *@6 a. m., *10:38 a. m., *1:40 p. m., *4:@ p. m.,

*5:31 p. m., *7:30 p. m.

*Kela ame keia la.

@Sabati wale no.

+Koe ke Sabati.

G. P. DENISON,

Lunahoohana.

F. C. SMITH,

G. P. & T. A.

Na Papale I-e Nunui

O na Lede âme na Kee@ o ia

ano hou e loaa no ma @ o

FUKURODA

Helu 28-32 - - - Alanui Hotele.

HUI HOOLEWA HONOLULU.

Ke hooiaio nei keia hai i @ hana kokua i kona mau @ wa ua oi mamua o 13@ mau nei i kela ame keia la.

J. H. THOWNSEND. K@

He Huaale Maikai

Aole he like o na

"HUAALE A AYERS."

me na huaale e ae no ka mea he @ huaale kokua keia i ka nana a @ naau, a he laau hoomaha maikai @ hoi. Ina he paa kou hana @ o@

"HUAALE A AYERS."

ka laau e hemo maikai ai, a e @ maikai mau ana hoi mahope aku oia manawa.

Aole loa he hiki i kekahi kanaka @ Olelo ae he maikai kona oia @ in a aole he hemo o kona @ he hookahi manawa o ka la a oi @ paha. Ina i maopopo keia kanawai @ ke ola i na kanaka apau aole @ e like ka nui o ka poe ma'i me @ mea e ike ia nei i keia mau @

Ua hana ia owano me ke a paa @ maikai loa ka lawe ana.

Aohe mau Huaale i oi ae ka ma@ mamua o na

"HUAALE A AYERS."

Hoomakaukau ia e Kauka J. C. Ayer & Company, Lowell, Mass, U. S. A.

E loaa no keia mau Huaale ma ka Hale Kuai Laau o Hollister, alanui Papu.