Ka Nupepa Kuokoa, Volume XLII, Number 45, 4 November 1904 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

2 NUPEPA KUOKOA, POALIMA, NOVEMABA 4, 1904.

 

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole.

 

MOKUNA XXX.

KA WETE PAPAHANA.

            "Pela io no, aka he mea maikai ole keia. E ae mai ana anei oe e komo aku wau a waiho aku i kekahi papahana imua o ko oukou ahakuka?"

            "Ae. E hahai mai oe mahope o'u."

            "E haele ae kua," wahi a Wete i pane aku ai ia Vera.

            Paa aku la o Vera a paa na lima o Wete, alaila hahai aku laua mahope o ko laua alakai iloko no nae o ka pouli nui, a hiki i ko lakou hiki ana aku i ka lumi nui, kahi hoi o na Nihiliti e noho ana me ka hoomanawanui o ka hoea mai o ka manawa e maopopo ai ko lakou hopena.

            "E ha'i aku oe i ka ahakanaka i ka mea e makemake nei e kamailio aku imua o lakou," wahi a Wete i pane aku ai i ko laua alakai.

            "E o'u mau hoaloha, ke makemake nei ke kanaka Amerika e ha'i aku i kekahi mau manao ia oukou."

            "E ae aku iaia e ha'i mai i kona mau manao imua o kakou," i olowalu like mai ai na Nahiliti.

            "E o'u mau hoaloha, ua hoikeia ae nei ia'u ua paa ko oukou mau manao e make mamua o ka ae ana aku e haawi aku i ka oukou mau meahuna i ke aupuni a oukou e inaina nei, a e haalele hoi i ka oukou mea i hoohiki ai e pulama mau i na manawa apau," wahi a Wete i pane aku ai.

            "He oiaio kau i ha'i mai la," i hooho like mai ai na Nihiliti.

            "He mea nui ke ola la ia'u."

            "Ka, ia kakou like no apau," i hooho like mai ai ua poe Nihiliti la.

            "Ina hoi ha pela, heaha no hoi ka mea e malamaia nei kela mau pepa a oukou? Aole no hoi e kii aku la a hoolei ae iloko o ke ahi? Mahope aku olaila e hoao ae kela ame keia o oukou e hoopakele ae iaia iho."

            "No ka mea, ina no makou e hana aku ana e like me kau i ha'i mai nei e pau ana no makou i ka hopu ia, a mahope aku o ia manawa aole i maopopo ia oe ke koikoi o ka hoopa'i e hookauia mai ana maluna o makou, he hoopa'i hoi na makou i ike ai ua oi aku mamua o ka make."

            "Ke ike nei wau i ko oukou minamina ole i ke ola ame ko oukou makaukau e haawi aku i ko oukou mau ola no keia mea liilii loa. E ae mai ana anei oukou e hoolohe mai i ka'u papahana?"

            "Ua makaukau makou no ka hoolohe aku, a e ha'i mai oe me ka awiwi, no ka mea ua kokoke loa na koa e hiki mai i ka puka."

            "E puhi aku i na pepa a oukou i ke ahi. Alaila e kii aku a lawe mai i na dainamaita a oukou iloko nei o keia lumi. E waiho iho iwaenakonu o ka lumi a ma kahi hoi e kokoke ana i ka puka a na koa e komo mai ai, wehe aku i ka puka a hookuu aku i na koa e komo mai iloko nei. I ka wa e pau loa mai ai na koa i ke komo mai iloko nei o ka lumi, e hookuu loa mai ia lakou a hala ka puka o ka lumi mua, alaila o ka poe o oukou i hoonohoia aku e kiai i ke komo ana mai o na koa, e kii aku i keia mau dainamaita a lawe ae a iwaena o ka puka. Ke pau ia, ho-a ae i na kukui, a koi aku i na koa e hana aelike mawaena o oukou. E manaoio mai oukou i ka'u e ha'i aku nei, aole loa e ae ana na koa e pepehi mai ia oukou i ko lakou manawa e ike mai ai i ka make ua makaukau no oukou ame lakou pu no hoi."

            "He papahana maikai kau," wahi a ka hoaloha o Gerenigofa i pane mai ai.

            "Pela io no, a ma ka ianei papahana no hoi e make pu ana keia poe koa me kakou ke hoao mai lakou e lawelawe lima mai maluna o kakou," wahi a kekahi o na Nihiliti i hooho ae ai.

            "Heaha ko oukou manao maluna o keia, e kuu mau hoaloha. E hana ana anei kakou e like me na kuhikuhi ana a keia kanaka malihini?" wahi a ke alakai o na Nihiliti i ninau ae ai.

            "Aole he hewa o ka hoao aku. E ho-a hou ae i na kukui a kii aku kakou i na dainamaita," i hooho like mai ai na Nihiliti.

            Ho-aia ae la na kukui, a aole hoi i loihi mahope mai ua loaa ae la na kanaka nana e kii aku i keia mau dainamaita a laweia mai kahi i hoahu ia ai. Mahope o ka pau ana o na dainamaita i ka laweia mai, ua wheia aku la ka puka e komo aku ai i ka lumi a na koa e komo mai ai a laweia aku la kekahi hapa o na dainamaita iloko olaila.

            Ua lawe ae la o Wete i ke alakai ana o na hana ma keia lumi me kona noi mua ole aku, a aole hoi he mea nana oia i hoopaapaa mai ma keia oiai aia ka noonoo o na mea apau i kela manawa maluna o ko lakou mau ola iho. Ina o kaua pu malaila ia manawa, ua hiki no ia kaua ke ike i na nanaina o na kane ame na wahine e noho ana iloko o ka lumi nui ua like me kekahi mau ilio kawa-u e pipika ana ma na paia o ke keena a lakou e noho ana, me ka loaa ole o na manaolana iloko o lakou no ko lakou pakela ae. Iloko ao o ke powehiwehi o ka malamalama, ua ike aku no o Wete i keia haawina weliweli e kau ana maluna o kela ame keia Nihiliti.

            No Vera hoi, aia oia ke hahai hele la mahope o ka kakou Wete me ka lia o ka ili i na hana e hanaia ana ame ka noonoo ana ae i ka hopena e kau mai ana maluna o lakou. Ua maopopo no iaia o keia hana a Wete e hana nei aole ia he hana na Wete i makemake ai e hana, a aole loa no hoi i hooholo o Wete e make pu laua me keia poe Nihiliti, a eia no kekahi papahana iloko o ko Wete noonoo no ko laua pakela aku, ina e hiki mai ana i kahi o ka make, oiai ua hawanawana mua aku ka kakou Wete iaia, e ha'i aku ana iaia aole e maka'u, a ua loaa hoi ka papahana iloko ona no ko laua pakele aku.

            I ka makaukau ana o na mea apau e like me ka Wete i manao ai, ua puka aku la o Wete ame kekahi poe me ia no ka lumi e komo mai ai o na koa, a aia no o Vera ke hahai la mahope ona. Ua kinai hou ia ae na kukui, a ia manawa no hoi i lohe aku ai o Wete ma i ke pahupahu mai o na wawae mawaho, a ia manawa no hoi i ninau aku ai o Wete i kekahi o na Nihiliti i ke ano o ka wehe ana o ka puka.

            Aole i liuliu iho hamama ana ka puka, a ia manawa pu no hoi i a ae ai na kukui nana e hoomalamalama ana i ka puka, a lohe aku lakou nei i ka hooho ana mai o na koa mawaho, he hoailona hoi na lakou nei i hoomaopopo aku ai, ua hauoli na koa i ka loaa ana o ka lakou mea e imi nei. Iloko o ka manawa pokole komo ana na koa iloko, a aia hoi ka kakou Wete ame kona mau hoa Nihiliti ke pili la ma na paia, a no ka pouliuli o ka lumi aole lakou nei i ikeia mai e na koa.

            I ka pau loa ana mai o na koa iloko o ka hale a kaa aku hoi maloko o ka lumi, oia no ka manawa a Wete i lele aku ai a ku iwaena o ka puka me ka dainamaita e paa ana iloko o kona lima, a pane aku la:

            "E ku iho ma ko oukou wahi e ku nei?"

            "Eia ua poe nei?" i hooho ae ai kekahi o na koa.

            "E kau aku i ka oukou mau pu!" i kauoha aku ae ke aliikoa i kona mau koa.

            E like me ke kauoha i loaa aku i na koa, pela no lakou i hooko aku ai a o ka wa koke no ia i moe like aku ai na pu imua, e kau pono ana hoi imua o na Nihiliti.

            "E kali iki oukou, a i hooko ole mai oukou alaila o oukou kekahi e hoi aku iloko o ka lua me Diabolo!" wahi a Wete i pane aku ai, aia hoi ma kona lima ia manawa kekahi dainamaita kahi i paa ai me ka makaukau no ka hoolei aku i kana wahi i makemake ai. "He dainamaita keia la."

            I ka lohe ana o na koa i keia pane a Wete, oia no ka manawa i nu like ae ai na koa apau me ka weliweli, oiai ua maopopo aku la ia lakou ka haawina weliweli e loaa ana ia lakou ke hookoia keia mau hana a Wete i hoomakaukau ai.

            "He hoopunipuni wale no kela!" wahi a ke aliikoa. "E ki-"

            "Uwoki!" i pane koke aku ai o Wete. "Ke hoopaa aku nei wau i ka'u mau olelo mua i ha'i aku nei, a ke ha'i hou aku nei wau ia oukou he mau dainamaita pakahi ka kela ame keia o makou, a ua hiki hoi i kekahi o keia mau dainamaita ke hoopuehuliilii aku i keia hale iloko o kehena!"

            Na keia mau olelo a Wete i hooi aku i ka maka'u iloko o na koa, a o ka wa no ia i kuu like iho ai na pu ilalo, a hooko ole ia aku hoi ke kauoha no ke ki aku i na Nihiliti ame ka kakou Wete. I kela manawa no hoi i oili mai ai ka aha Nihiliti e noho ana iloko o ka lumi nui a ku ana ma ka puka, a o ko lakou alakai hoi ka mea i ku mai imua o na koa a pane mai la me ka maka'u ole:

            "Ke ku aku nei makou imua o oukou me ka makaukau e make me oukou, a o keia hoi ka manawa a oukou e hooholo iho ai ina paha e make pu oukou me makou. Na oukou ia e koho mai i ka oukou mea i makemake ai."

            He kanaka opiopio wale no ke alakai o keia poe koa, a ua piha hoi kona puuwai me ka manao koa e like me ka liona opio, nolaila aole oia i kunana iho, aka huli aku la oia a pane aku la i kona mau koa:

            "O ka poe kumakaia he poe maopopo loa ko lakou hoopunipuni. O keia poe e ku nei imua o ko oukou alo he poe kumakaia lakou, a aole hoi wau e manaoio aku ana i ka lakou i ha'i mai nei ia kakou ua makaukau lakou e make a na lakou no hoi e pepehi iho ia lakou. E hoolohe ana anei oukou i ka'u mau kauoha a e ki aku ia lakou me ka oukou mau pu, a i ole e hoole mai ana oukou, e like hoi me ka poe hoohewale, a e haalele mai na'u hookahi e hooko aku i ke kauoha i waihoia mai ma ko'u lima."

            "E ke kepane maikai," wahi a Wete i pane aku ai, "ke maopopo ole nei ia oe kau mau mea e olelo nei. He dainamaita keia, a ua makaukau hoi keia poe no ka make ana. Aole i maka'u kou mau koa, aka ua maopopo ia lakou na manao o ko lakou mau hoa lahui mamua ou. Ua oi aku no hoi ka ike o keia mau koa ou i ke kumu i makaukau ai keia poe no ka make, a e aa ana anei oe e lumai aku ia lakou iloko o ka make au i maopopo ole ai?"

            Aole he pane ma ka aoao o ke aliikoa, aka kau mai la kona mau maka huhu maluna o Wete, alaila huli ae la oia a kauoha aku la i kona mau koa:

            "E hoomakaukau-hapai i ka oukou mau pu iluna-e ki aku!"

            Aole loa i neeu aku na koa, aole he hookahi pu i kauia aku imua o na Nihiliti, a aole hoi he koa i aa e lawe ae i ke ola o ko lakou mau hoa lahui.

            "Ka hoohewale!" i hooho ae ai ke aliikoa, me ka inaina ame ke kalakala o kona leo. "Ina aole he mea o oukou i aa e kokua mai ia'u, alaila e ike mai oukou i ko'u make hookahi ana!"

            Huki awiwi ae la ua aliikoa la i kana pahi, a lele mai la maluna o Wete. Aia hoi ka kakou Wete ia manawa ke ku la me kana mau dainamaita iloko o kona mau lima. Ina hoi  oia e ku iho ana a waiho iho i ua mau dainamaita la, e oloio ana ka wini o ka maka pahikaua a ke aliikoa; ina no hoi oia e kiola ana i ua mau dainamaita la, e make ana lakou apau, a ina no hoi e paa ana no e make ana no. @

 

MOKUNA XXXI.

 

MA KAHI POHIHIHI LOA.

            No Vera i keia manawa e hanaia nei keia mau hana a e malamaia nei na kukaiolelo, aia oia ke iini nui la e loaa aku he wahi hana ma kona aoao, a iaia i ike ai i ka unuhi ana ae o ke aliikoa i kana pahikaua a hoomaka mai e lele maluna o ka kakou Wete ua hooholo koke iho la oia i kana hana e hana ai. I kela manawa aia no oia ke ku kokoke la mahope o Wete, a ua hoomaopopo i ua u'i nohea Vera la i ka manawa ia laua iloko o ke alahele huna i ko Wete hoomakaukau ana i kana pu panapana a hookomo iho ma ke eke mahope o kona lole wawae.

            Me ka hikiwawe i hookomo aku ai ua Vera la i kona lima iloko o ko Wete eke a paa ana ka pu panapana, unuhi ae la, kula'i mai la i ke kiko, a lele aku ma ko Wete aoao me kona kau ana aku i ka pu imua o ke aliikoa a pane aku la me ka leo koa lua ole:

            "E ku iho, a ke nee mai oe i hookahi kapuai, e ki no wua ia oe!"

            Ua hoopuiwaia ke aliikoa i keia hana a Vera, a ku koke iho la oia me ka aa ole mai e nee hou mai imua, a oia no hoi ka manawa a Wete i hookuu iho ai i kana mau dainamaita ilalo, a e like me ka lele ana a ka tiga pela ua Wete nei a kakou i lele aku ai a paa ana ka puana-i o ua aliikoa la. Hoao ae la ua aliikoa la e hoohana i kana pahikaua, aole nae i hiki a no ia mea ua hoomaka iho la laua e hakoakoa.

            Aole i loihi ka laua kuhalake ana, waiho ana ua aliikoa la iluna o ka papahele me ka oni ole, a o kana pahikaua hoi aia ke waiho la ma kahi mamao mai iaia aku.

            Huli ae la ka kakou Wete a hawanawana aku la i ko Gerenigofa hoaloha, oiai aia no ua Nihiliti la ke ku kokoke la ma kahi a Wete e ku ana:

            "E noho iho oe me keia mau koa no kekahi manawa, a e hoomalielie aku hoi ia lakou oiai wau e kaawale aku ai."

            I ka pau ana o keia mau olelo a Wete, lalau iho la oia i ua aliikoa la a kauwo aku la iaia iloko o kekahi lumi, a i ko laua wa i hiki aku ai ma kahi a Wete i makemake ai, oia no ko Wete manawa i wehewehe ae ai i na lole o ua aliikoa la, nakinaki iho la i na lima ame na wawae, a mahope o kona hookomo ana i kekahi welu iloko o ka waha o ua aliikoa la, ua hapai ae la ua wete nei i ke aliikoa a lawe aku la ma ke kihi pouliuli o ua lumi la.

            Komo iho la oia i ka lole koa o ke aliikoa, alaila lawe ae la oia i kana kukui makai a ho-a ae la, a wehe ae la hoi i kana aniani kilohi uuku, a hoomaka iho la e hoohalike iaia e like me ke kapena.

            Ua like no ko Wete kino me ko keia aliikoa, ka loihi ame ka nui, nolaila he hookahi wale no mea ano nui a Wete e hana ai, oia ka hoololi ana i kona helehelena e like me ko ua kapena la. Wehe ae la ua Wete nei a kaua i kana pahu pena o na waihooluu like ole, a hoomaka iho la e hoohalike iaia me ko ke kapena. Wehe ae la oia i ka umiumi hoonalonalo ana e komo ana a hoopaa ae la malaila i kekahi umiumi pokole, a mahope o kona okioki ana i ua umiumi la me ka upa a like loa me ke kapena, ua pau ae la kana hana hoohalikelike iaia. Aole no i maikai loa keia hoohalikelike ana aka ua lawa ia no ka hoopuhili ana aku i ka poe e ike mai ana iaia ia po, nolaila iloko o umi minute mahope o kona lawe ana aku i ua kapena la a hoopaa iaia ma ka lumi a kakou i ike mua ae nei, aia hoi ku ana keia imua o ua Nihiliti ame na koa, a pane aku la:

            "Ma keia e ike mai ana oukou, e na Nihiliti, ua make keia hoa o oukou. Ua manao oia e lawe aku ia'u a hoopaa aku iloko o kela lumi, aka ke ike nei oukou i ke ko ole ana o ia manao ona."

            I ka lohe ana o Vera i ka leo o ke kapena ame kona ike ana mai hoi iaia e ku aku ana imua o lakou, ua hoopuni koke ia ae la oia i ka maka'u a manaoio iho la oia ua make io no kona hoopakele, nolaila ua huli ae la oia a me ka leo hooho nui, holo aku la oia no kahi ana i ike ai i ko Wete lawe ana aku i ke kapena. Aole i nana ae o Wete i keia, aka huli aku la oia a kaupono aku la kona mau maka i na koa a pane aku la:

            "Ano, e o'u mau hoa, e ki ana anei oukou i keia poe hoa lahui o oukou?"

            Aole he wahi leo i pu-a ae mai na koa mai, aole hoi lakou i oni iki ae a hoao hoi e hooko aku i ke kauoha. Alaila huli ae la o Wete a pane aku la imua o na Nihiliti:

            "Ina e hookuu aku ana wau ia oukou me ka hoopoino ole aku, e ae mai ana anei oukou e waiho mai i ka malama ana i keia mau dainamaita a oukou malalo o makou?"

            "Ae," i pane koke mai ai ka hoaloha o Gerenigofa, oiai oia no ke kanaka kokoke loa ma kahi o ka kakou Wete e ku ana me ka hookohukohu, a me he mea la oia hookahi ka Nihiliti i ike mai i ko Wete helehelena hoonalonalo, "ina nae oukou e waiho iho ana i ka oukou mau meamake, a haawi mai hoi i hookahi hora no makou e haalele ai i keia wahi," wahi hou a ua hoaloha la o Gerenigofa i pane mai ai.

            "E waiho i ka oukou mau meakaua ilalo!" i kauoha aku ai o Wete i na koa.

            Me ka ewaewa ole ua hookuu like iho la ua poe koa la i ka lakou mau meakaua ilalo.

            "Ano," i hoomau aku ai o Wete i kana kamailio ana, imua hoi o na Nihiliti," e haalele iho oukou i keia wahi a e waiho mai maloko o ka makou malama ana i keia mau dainamaita a oukou."

            Aole he pane ma ka aoao o na Nihiliti, aka ku koke ae la lakou iluna a hoomaka aku la e hele e like me ke kauoha i haawiia aku ia lakou. I na Nihiliti i hala aku ai, oia no ka manawa o Wete i huli ae ai a pane aku la i kona mau koa:

            "E hopu i ka oukou mau meakaua a e ku me ka makaukau. Makaukau!-Pakahi!-Huli akau! Maki!"

            Ia manawa i hooko like aku ai na koa i ke kauoha i loaa aku ia lakou a iloko o ka manawa pokole komo ana ua poe koa la iloko o ka lumi nui a na Nihiliti i noho ai, oiai ka kakou Wete e hoolohilohi ana mahope, a i ka pau loa ana o na koa iloko, ua kauoha aku la o Wete i na koa e noho hoomanawanui a hiki i kona kii ana mai ia lakou, a iaia i pani mai ai i ka puka, ua laka ae la oia a paa ana ua poe koa la iloko o ka lumi. Huli mai la oia a loaa kekahi panipuka okoa, a mahope o kona laka ana ia puka a paa, hoomau aku la oia i ka hele ana no kahi ana i haalele aku ai i ke kapena.

            Mamua o ko Wete hiki ana aku i ka puka o ka lumi ana i hoopaa ai i ke kapena, ua halawai aku la oia me ka hoaloha o Gerenigofa, a ohaoha mai la no hoi ua kanaka la iaia nei me ka pane aku mai:

            "Ke hilinai piha nei wau maluna ou," wahi a ua Nihiliti la i pane mai ai ia Wete. "Eia ke kaunawahine. Ina olua e hahai mai ana mahope o'u e lawe no wau ia olua i kahi e malu ai no kekahi manawa."

            "Ua komo mai ka manao iloko o'u ua pepehiia la oe e keia kapena," wahi a Vera i pane mai ai ia Wete i ko laua manawa i hui ae ai.

            "Aole wau he kanaka maalahi loa o ka pepehi ia ana, a ina wau e make e oili mai no kekahi mea okoa ae ma ko'u wahi, nolaila mai hopohopo oe no'u a nou hoi, e ke kaunawahine, aka e hoomanawanui a e manaolana mau hoi ao ko kaua pakele. E pono ia'u e ike mua i ke kapena mamua o ko kakou hele ana aku. Malia paha na ikaika loa aku nei ka'u mea i hana aku nei nona, a aole hoi he mea pono e make oia."

            Huli aku la ua Wete nei a hele aku la no ka lumi a ke kapena e paa ana, a mahope o kona nana pono ana i ua aliikoa la, kule@ iho la oia a hawanawana iho la ma na pepeiao:

            "Aia a hoi mai kou noonoo maikai a hemo ae hoi oe mai keia wahi ae, e loaa ana no ia oe kou mau koa iloko o ka lumi nui e kali mai ana i kou hoea aku," a haalele iho la ua Wete nei i ke aliikoa e moe ana i kona eha.

            Ma ka Wete hoomaopopo aia he nui a lehulehu o na puka e hemo aku ai iwaho o keia wahi halawai o na Nihiliti, oiai ua hele aku la na Nihiliti ma na alahele like ole. No laua nei hoi, ua alakaiia aku la laua nei e ko laua hoaloha Nihiliti ma kekahi alanui okoa, a puka aku la hoi lakou nei ma kekahi alanui kanaka ole, a alakai awiwiia aku la laua nei no kekahi kihi alanui, kahi hoi i loaa aku ai ke kaapio ia lakou nei, a kau awiwi aku la lakou nei, a lilo aku la ke koena o ka lakou nei alahele i ka mana o ke kahukaa.

            (Aole i pau.)

 

KALE O LEONA

Ka Naita Puuwai

Hao Wiwoole - - -

KA HOOPAKELE O KE KAIKAMAHINE ALII I LAWE MALUIA.

 

MOKUNA VIII.

 

KE KE'A LEIGULA.

            No ka naita o Leona na ike maopopo o Zira me ke kuhihewa ole i ka hiki maalahi loa iaia i ke aloha ana i ke kanaka e like me ia-a oia no hoi ka mea ana i aloha ai i ka wa mua no o kona ike ana iaia ma ke kahua hakoko lealea, me ka ume pau loa ia ana aku e kona puuwai lahilahi, a no ka wa mua loa no hoi ka loaa ana o ia ano haawina o ke "aloha" iaia. Ma ko laua hui ana ae ua maopopo loa no iaia o ko laua pukuiia ana ae i hookahi, ana i hoomaopopo ai na kekahi mau mana okoa ia hana i hoolilo ai ia laua i hookahi a o ia mau mea mana okoa apau mailoko mai no ia o ke aloha.

            Ua aneane aku no hoi ka wahine opio e hiki aku i ka puka o kona lumimoe oia no ka manawa i hoea mai ai o kekahi mea pouliuli ma kona ala mamua pono ona. A na keia mea i hoohikilele ae iaia a nehe awiwi aku la kona mau wawae a o ka paa aku no hoi ia o ka puka i ke paniia mahope iho o kona wehe awiwi ana a komo iloko o ka lumi, iaia e paa ana i ke poheoheo o ka pani puka ma ka aoao maloko no ke pani ana a paa, oia no ka manawa i paaia mai ai o ke poheoheo o ka puka ma ka aoao mawaho e kekahi lima ikaika, ke kumu i hiki ole ai i ka lima palupalu ke pani mai i ka puka; a i ka manawa pokole no hoi komo ana o Beni Hame, oiai, nona ka lima ikaika o ka paa ana i ka puka.

            E mau ana no ka a o ke kukui a Zira i haalele iho ai a na ia malamalama i haawi aku i ka ike i ka wahine opio e ku ana iloko o ka haalulu nui no ka mea i komo aku iloko o kona lumi a oia no hoi o Beni Hame.

            "Zira," wahi a Beni Hame i pane aku ai me ka leo huhu, "Ihea aku nei oe?"

            "I ka malapua e kuu papa," wahi a Zira me ke ano kakanalua no ka maka'u.

            "A heaha aku nei kau olaila?"

            "I holoholo aku nei iwaena o na pua."

            "O oe wale no anei?"

            Ma keia ninau hou a ka lunakanawai ua hakapono aku la kona mau maka maluna pono o na hiohiona o ke kaikamahine a hookokoke loa aku la no hoi iaia.

            "O oe wale no anei ilaila?" i palua aku ai ka ninau ana.

            Ma ko Zira aoao he mea paakiki loa iaia ka pane ana i ka ninau hope i waihoia mai iaia. Aole oia he kaikamahine i maa i ka hoolohe ole ia Beni Hame a aole no hoi oia i maa i ka hoopunipuni.

            "O oe wale no anei ilaila," i pakolu aku ai ka ninau ana.

            "Aole," i pane aku ai o Zira me ka haalulu nui.

            "Ha! Ua ike aku nei au he elua kanaka i puka aku mai ka pa aku nei ia'u i komo mai nei. Owai laua?"

            Ma keia manawa koke no i ulu ae ai kekahi noonoo iloko o Zira i ka maikai loa ina oia i hoopunipuni ia Beni Hame, no ka mea he pono iaia (iaia e noonoo ana iloko iho ona) e ku wiwoole aku imua o ka huhu nui o kona makua e kupale ai hoi i kana naita ana i aloha nui ai, oiai e lilo no ka naita opio i mea poino ina e loaa pono ana ia Beni Hame.

            No ke ku ana aku imua o ka huhu o Beni Hame aole ia he mea no ka wahine opio e wiwo ai aka o ka ikeia o ka naita oia kana mea i maka'u loa ai. Ua ike no hoi o Zira i ka hopena o ka naita ina e ikeia ana na mea apau mawaena o laua nolaila ua hooholo koke iho