Ka Nupepa Kuokoa, Volume XLII, Number 43, 21 October 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, OKATOBA 21, 1904.

 

@ALE O LEONA

Ka Naita Puuwai

Huo Wiwoole

KA HOOPAKELE O KE KAIKAMAHINE ALII I LAWE MALUIA.

MOKUNA VI.

KA WAHINE MARE I HOOWAHAIA

 

@ wahi a ke kaikamahine i pane aku ai me ke ano ha’oha’o @ kamahao o ka ninau, ame kona hoomaopopo pu aku i ka @ o ka helehelena o kona moiwahine.

            “He maikai anei ko’u nanaina?” ia Emina i ninau hou aku ai @ la iluna o ka noho e ku ana ma kona aoao.

            “A@ he maikai loa, e ka lede.”

            “A@ nou nae ua oi aku kou maikai a’u e ike aku nei.  A he @ani maoli no kou helehelena.”

            Ua @ao iho la o Zira e minoaka aole nae i hiki no ka mea ua hoo@wa loa ia mai la oia e na ano kupaianaha o ka moiwahine.

            “He wahine nani no wau i ko’u mau la.” Wahi a ka Moiwahine ah@la, “aneane loa e like me kou ka nani.”

            “He oia mau no kou nani,” wahi a Zira i pane aku ai.

            “Aka aole ia he nani i lawa a pihapono.  He mea mae ole ka @ani.”

            “Eia nae he mau mea mae wale no na mea honua,” i pane hou aku ai o Emina.

            Ua nana wale aku la no o Zira me ka pane leo ole.

            “He mea pono ia oe e hauoli no ka mea ua weheia ka puka nou e olioli ai no keia mua aku,” i hoomau aku ai ka lede i kana olelo.

            “I kou wa e lilo ai i wahine na ka Mahomeda alaila o kou hauoli no ia.”

            “O no ka pono o na lani, e elouolu e hoeha ole mai ia’u me—”

            “E hoomau, e hoomau aku,” i kahamaha ae ai ka moiwahine me ka nui na’ina’i o kona hanu.

            “He hilinai wau ia oe i kou oluolu mai no’u.  Aole oe e kumakaia mai ia’u.”

            “Aole.  E hoomau aku i kau olelo.”

            Me keia mau olelo o Emina i hoopuka aku ai a kulou aku la imua no ka hoolohe pono ana i na olelo e haule mai ana mai ka waha mai o ke kaikamahine.

            “Ke hilinai nei wau aole au e kumakaiaia e ko’u hoa wahine,” wahi a Zira i puana ae ai.

            “Heaha hoi ka mea e kumakaia ai a no keaha hoi?” i ninau pinapinai aku ai ka moiwahine me ka nee malie ana aku a kokoke i ke kaikamahine.

            “Aole e hiki ia’u ke lilo i wahine na ka Mahomeda.  O, aole loa e hiki ia’u.”

            “Hiki ole?  Aka ua aloha ka moi ia oe.”

            “Aole, aole—aole e hiki iaia ke aloha ia’u.  No ko’u nani wale no oia i hoohili ai ia’u.”

            “Malia paha ua aloha io oia ia oe?”

            “Ina ua aloha oia ia’u aole e hiki ia’u ke lilo i wahine nana.  O, e kuu lede maikai ka mea i loaa ka ike no ka puuwai o ka wahine, ke hoomaopopo nei wau ua loaa aku la no ia ike ia oe no ka mea huna iloko olaila.  Ua hiki ia oe ke hoomaopopo i ka hiki ole i kekahi wahine ke ola iloko o ka hauoli ina ua lilo aku oia i kahi aole ilaila kona puuwai.”

            Ua kunana iho la o Zira no kekahi manawa iki alaila iho iho la kona mau kuli ilalo a kukuli aku la imua o ka Moiwahine ma na wawae o kona hakuwahine.

            “O, malia paha e hiki ia oe ke hoopakele ia’u.  Malia o hiki ia oe ke hoonana aku i ka moi e hookuu mai ia’u iloko iho no o ko’u hauoli.  E ae mai anei oe i ka’u noi?”

            “He liilii loa ka’u wahi mana maluna o ka Mahomeda.  Ua manao nae wau e loaa no ia oe ka nohona hauoli ke noho pu aku oe iloko o kona nohona alii.  E malama oluolu no oia ia oe oiai he wahine opiopio oe a he nani no hoi i loaa ole aku i ka hapanui o na wahine o Garanda nei, a o oe ana no hoi kana wahine opiopio hookahi iwaena o ka hapanui.”

            “Aole e hiki ia oe ke alo ae i ka panai mai i kau kokua i kekahi mea e noho aku ana iloko o ke kaumaha mau loa.  Ua hiki anei ia oe ke hoomanawanui aku ina e hoopaaia iloko o kekahi lumi paahao pouli a e hoopaaia iloko alaila no ka wa mau loa?”

            Ma keia manawa a ke kaikamahine e olelo nei aia ka moiwahine ke hakapono la kona mau maka maluna o ka wahine opio.

            “Aka e hooko mai ana no ka Mahomeda i kona manaopaa no ka hoolilo mai ia oe i wahine nana.” Wahi a Emina i pane aku ai.

            “Aole, aole—aole e hiki iaia ke hana pela.”

            “Aka he mana kona e hiki ole ai ke pale ia.”

            “Aole no e hiki iaia ke hooko i kona mana.” I pane aku ai o Zira me kona ku pu ana ae iluna, a me ka maloeloe no hoi ia ku ana iluna a pale ae la i ke kihei kuuwelu e hoopuni ana i kona a-i, a waiho laelae mai la kona a-i ame ka hapaluna o kona umauma lamalama.

            “Ae, he mana kona.” I hawanawana aku ai o Emina.

            “E hamau.” I hooho ae ai o Zira.  “Ke lohe la anei oe i kela l@o halulu?”

            “Ae.”

            “O ka muliwai hohonu ikaika ia o Dalo.  Ina e lawe ana ka Mahomeda ia’u i wahine nana alaila e lawe kino ola ole aku no oia ia’@ mana mailoko mai o ka ikaika o ka halulu ae ka hohonu o ia muliwai.  O ka Ala (akua Mahomeda) hoolana manao ia ia’u.”

            Alaila noho hamau iho la ka moiwahine no kekahi manawa loihi e nana pono ana i ka helehelena opiopio o ke kaikamahine.  Ia manawa ua aalo ae na hiohiona ano ikaika maluna o kona helehelena a piha mai la oloko ona i ka nui ilihia no na olelo a ke kaikamahine me ka manaoio iloko ona e hana io aku no ke kaikamahine me ka manaoio iloko ona e hana io aku no ke kaikamahine i kana mea i olelo aku ai iaia, a ha’uha’u iho la kona waha.

            “E Zira,” wahi a Emina me kona lalau pu ana aku i ke kaikamahine a hoopili loa mai la iaia i kona poli.  “Ua ike au i ka oiaio a ia mau olelo au a ke olioli nui nei wau no ka mea na ia mau olelo au i hoopakele mai ai ia’u mai ka hana a’u i hooholo ai e hana, me kuu ike a haalulu no ka nui inoino loa o ua ano hana la.  A mai haalulu oe no ia mea no ka mea aole e hookoia ia mea.  Ina i hoike mai nei oe i kou aloha i’o i ka Mahoeda ina no aole oe e ike i kana mau apo aloha ana mai ia oe; aka i keia manawa aole au mea e maka’u ae ai a aole no hoi iaia.  “No’u iho ua nui maoli ko’u aloha i ka moi a ua hooholo iho wau aole loa kekahi wahine e noho ma ko’u wahi i na mauawa apau e mau ana ke ola iloko o kuu kino.”

            A i ka anoiwahine i hoopau ae ai i kana mau olelo ua huli ae la oia a huna iho la i kona helehelena iloko o kona mau lima a hoomaka iho la i ka uwe no ka piha loa.

            “Mai hoolilo i ka’u mau olelo i mea hoehaeha ia oe,” i pane oluolu aku ai o Zira me ke kau pu ana aku i kona lima ma ka poohiwi o ka wahine kaumaha a nana aku la iloko o kona helehelena.

            “Aole oe i lilo i wahine mare, e Zira.” I puana ae ai ka moiwahine iaia i holoi ae ai i na waimaka e iho makawalu ana ma kona mau papalina.  “Aole oe i hiki aku i kahi i ulupaia ai ke aloha kane oiaio a lilo i mea ole, a lilo i mea hoomailo noonoo e waiwai ole ai ke ola honua ana.  No’u iho ua ike wau ia mea.”

            “Na na lani e hooluolu mai ia oe.”

            “A na na lani no hoi e hoomaha ia oe.” Wahi a Emina i hoopili aku ai.

            Ua hoopuka aku o Emina i keia mau olelo ana me ka eehia nui a me ke kali ole aku i na pane mai ia Zira mai ua huli ae la oia i ka puka, a me na wawae palanehe o ka malie oia i nehe aku ai a puka aku la iwaho o ka lumi a hui aku la no hoi me Mada kana wahine kauwa e kali mai ana iaia.  A iaia i haalele iho ai i ka home o ka lunakanawai ua namunamu wale iho la no oia iaia iho:

            “E hoomaikaiia o Ala, ke hoi nei au me ka pahikaua paumaele koko ole.

            Aole i lohe mai o Mada i keia mau olelo hawanawana ana no ka mea iaia no oia i hawanawana iho ai.

 

MOKUNA VII.

HUI HOU NA ALOHA O KA LUA IA.

 

            Ma keia manawa ua loaa iho la ia Kale o Leona ka hoomaopopo loa ana i kona hoonakakiuia e na kiu a ka lunakanawai o Garanda; aka, iaia i noonoo iho ai i ke kumu o keia hoomakakiuia ana ona aole he loaa iki iaia o ka haina kupono, koe wale no ina ua hoonuinuiia aku maluna o kekahi kahua hoopunipuni e hoino ana iaia.

                He mea oiaio ua hele io mai no oia i ka Hema nei aooe no ka makaikai wale no aka no kekahi hana i haawiia mai iaia ana hoi i manaoio ai oia wale no ke hiki ke ike ia hana ame kona kanaka ukali a aole hoi he mea e ae mawaho ona e ike i keia mikiona ona i hoounaia mai ai.  Ua noonoo pu iho no oia i ka loaa ole ia Abadala ka ike no keia hana a wahi a kana noonoo he mau hana hoohuahualau wale no ia i mea e hueia aku ai a loaa ka ike iaia.

            Alaila, ina aole he kumu e ae, heaha la ke kumu o ka ka lunakanawai huhu ana a kiu hoi iaia?  Malia paha ua ulu mai ia manawaino mai ka hakoko ana ona me ia maluna o ke kahua hakoko a lilo ai ka lanakila iaia, ke kumu i hooleiia mai ai o ka lei o ka hanohano maluna ona; eia nae, ke noonoo iho oia ina oia ke kumu o kona manaukiia aole no i lawa kona noonoo maluna o na ano hoohuoi o ka lunakanawai.

            Ke aui aku nei ka la i ke ahiahi—a o ka la no hoi ia i ao ae mai ka po ana i ala loihi ai a kukai olelo ai me Abadala iloko o kona lumi i komoia aku ai ma ka pukaaniani.  Iloko no o Kale o kona lumi iloko o ka hokele, i kana ukali hoi e hoomaemae ana i ke kapakila o kona haku.

            “Ua loaa anei ia oe kekahi mau hiohiona e hiki ai i ka pahuhopu no kau hana e kuu haku?” i ninau aku ai o Pidiro.

            “Aole.”

            “Aole no paha e loaa ana ia oe, pela ko’u manao wale iho,” i pane hou aku ai o Pidiro.

            “Aole io no i keia manawa.  Aka he nui aku no ka manawa i koe.”

            “Aka heaha ka mea nana e hoololoiahili nei i kau hana?”

            “Malia o loaa no ia’u o ka mea e huliia nei.”

            “Iloko nei o Garanda?”

            “Paha.”

            Ua ano kunana iho no o Pidiro i keia pane a kona haku a noho iho la me ka pane leo hou ole aku no kekahi mau minute.

            “E ukali ana oe ia’u i keia ahiahi,” wahi a Kale i hoomau aku ai, “nolaila e hoomakaukau oe i kou pono kaua.  Malia e hoohanaia aku ia.”

            “E nana mai oe i keia e kuu haku,” wahi a Bamabino iaia i waiho aku ai i kana mea hana a nana aku la i kona haku.”  Aole o’u makemake e komo kaua iloko o na hoohihia wale ia mai, a ina he hana keia a kaua e hele nei i keia po no ka mikiona au i hoounaia mai alaila ua waiwai ia hooikaika ana o kaua ilaila.”

            “A ina aole keia hana o keia ahiahi no ka mikiona alaila heaha?”

            “Alaila he mea pono e hoopau ka noonoo hele ana i keia ahiahi.”

            “A, ke ano pokole nei kou noonoo e kuu Pidiro.”

            “Aole.  He noonoo noeau no ka’u.  Ke manao nei oe e hele i ka home o Beni Hame.”

            “Ha.”

            “Ae.  Ua olelo oe i kou wa hiamoe.”

            Alaila pii ae la ka ula o na papalina o ka naita opio, no ka mea ua ike io oia i ka pololei o kana koho.

            “Pela.” Wahi a Kale mahope iho o ka hamau iki ana, “a no ia mea wau i makemake ai e ukali mai ia’u i keia po.”

            “Ina he kauoha keia au aole au i makemake e hoole a hookuli hoi i kuu haku.  Aka ke komo nei oe iloko o kahi haiki no ka poino aku no ka mea ua lohe wau e lilo ana o Zira i wahine na ka moi.”

            “A e manao anei oe e hoolilo i kela wahine u’i a nani i mohai na ka lealea o kela Mahomeda?”

            “Ina aole ona makemake alaila he hana paakiki loa io no ia.”

            “Makemake?” i puana ai ai o Kale Kristiano.  “Na’u no e hoike aku ia oe i kona makemake ame ka ole.”  A maluna o ia kumuhana i hoike aku ai o Kale i na mea apau i hanaia i kela po poina ole ma ka’e o ka mmuliwai Dalo, oia hoi, ka halawai ana ona me Zira a hoopakele ia ai mai ka make mai.

            “Alaila, ma ka inoa o ka noonoo maikai,” Wahi a Pidiro Bamabino i hooho ae ai me kona ku pu ana ae iluna,” e hui pu aku no wau me oe me kuu naau apau.”

            “Ua ike no wau aia kou puuwai ma ia mea,” wahi a Kale i pane aku ai me ka nanaina maikai.

            “A pela aku la no kuu haku.”

            “Alaila ke makemake nei wau ia oe e hoomakaukau i alanui no kaua e hiki aku ai ilaila ma kou kommo ana i ka aahu Mahomeda a’u i aahu ai i kela po aku nei a e hele aku i ka home o Beni Hame no ka hoomaopopo ana i kahi o ka lumi o Zira e moe ai.  Manao anei oe e hiki ia oe ke hana?”

            “E hoao no paha ka laau lapaau.”

            “Ke hoomaikai aku nei wau ia oe no ia mea.”

            “Alia nae hoi e kuu haku,” wahi a ka ukali i ka manawa i ulu koke ae ai kekahi noonoo iloko ona.

            “Aole oe e hana aku i keia e komo loa aku ai iloko o kana (Beni Hame) hana?” i ninau aku ai ka ukali.

            “Mai maka’u oe no ia mea.”

            O Pidiro, mahope iho o kona hoomakaukau ana iaia iho, ana hoi i haawi pau ai i kona noonoo ame kona kino e hui pu me kona haku a e komo iloko o ka hana a kona haku, aole no i lawa loa kona noonoo i ke ano o ka hua o ka laua hana e hoopapau nei, a oiai ua ike maopopo oia ua pau loa ka noonoo o kona haku ilaila a ua maalo aku ka maka’u ole mai iaia aku nolaila ua hooko aku oia iloko o ka maka’u ole e like me kona haku; a hoomaka aku la no hoi oia e hele no ka mikiona a kona haku i waiho aku ai nana e hooko; a hala no hoi he elua hora o ka Kale kali ana me ka nanauki nui aia hoi ua huli hoi mai la o Pidiro.

            “Pehea kau huakai?” i ninau aku ai o Kale me ka pihoihoi nui o ka lohe koke aku i ka meahou.

            “Ua loaa aku nei ia’u ka lumimoe o Zira ame ka hana nui no nae e hiki ai ilaila.  Ina wau ma kahi kaawale e hiki ai ia’u ke hoohana i kuu pahikaua ina ua ike pono kela poe Mahomeda pegana, no ka mea ua hakoko mai lakou me a’u—e huki ana kekahi i kuu lole a o kekahi nhoi i kuu papale a o ke kolu i kuu umiumi-ku’i a ina no aole kuu nui hooikaika ina no ua hoohana wau i kuu pahi pokole nei.”

            (Aole i pau.)

 

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

MOKUNA XXVIII.

HUI HOU ME NA NIHILITI.

 

            “O ka’u hoike e makemake nei e hoike he mea maikai no e hoikeia imua o kekahi poe kakaikahi.  He mea hiki no hoi i ua poe kakaikahi la ke hoike aku ia oukou mahope o ka pau ana o ka’u hoike.”

            “He mea oiaio no ia, aka ma keia me he mea la aole he waiwai.”

            “Aole keia he mea waiwai ole.  O ka’u mea e makemake nei e hoike aku oia kekahi o na mea ano nui.”

            “O makou no hoi na lunakanawai nana e nana aku a hooholo iho.”

            “No ko oukou pono e hoole aku ana no wau aia wale no a hoike ia aku imua o kekahi poe kakaikahi wale no.”

            Mamuli o keia koi ikaika a Wete, ua huli aku la ke kanaka a laua nei i hoomaopopo aku ai oia ke alakai o na Nihiliti, a o ke kanaka no hoi nana i haawi i keia mau kukaiolelo ana me ka kakou makaikiu, a pane aku la imua o kona mau hoa:

            “E na hoaloha, heaha ka oukou pane no keia noi?”

            “E hana aku e like me kana i noi mai nei,” i hooho like mai ai na mea apau.

            I keia manawa i hele aku ai ua kanaka alakai la o na Nihiliti a hui aku la me kekahi o kona mau hoa, a mahope o ka hala ana o kekahi mau minute pokole, ua hookaawale ae la he umi poe maiwaena mai o ka huina nui e noho ana iloko o ka lumi a kamoe aku la ka lakou hele no kekahi lumi okoa aku.

            “E hahai mai ia’u,” i hopu aku ai o Wete ia Vera, a hoomaka aku la e alakai i kona hoahele.

            “Ea, aole loa oia e hele aku mai keia lumi aku,” i hooho like mai ai na poe apau e noho ana iloko o ka lumi.

            I keia manawa i lele koke aku ai o Wete a ku ma ka aoao o Vera a me ka leo kuoo i pane aku ai oia:

            “O maua like no ke hele aku.”

            O ka poe i lele mai imua i ka manawa a lakou i hooho ai e like me ka kaua i ike ae nei, hoomaka ae lakou e uluao’a me ka pii ana ae o ko lakou inaina, a ma ka Wete hoomaopopo aku, eia keia poe ke hoao nei e hookaawale aku ia Vera mai iaia aku, ka mea hoi ana i hoohiki ai e haawi ana i na kokua ana apau i hiki iaia me kona ola.  Me kela hoomaopopo o Wete i ka Kaunawahine Alamazofa hana ame ka ikaika o kona manao ume iwaena o na Nihiliti, ua hoomakaukau iho la o Wete no ke pale ana no laua.  Lalau iho la oia i ka pu ana i lawe mai ai a paa hou ae la ma kona lima, a ku ae la no ke pale ana.

 

MOKUNA XXIX.

KO GERENIGOFA HOALOHA.

 

            He manawa keia i uluao’a ae ai ke anaina kanaka a aneane no i kahi o ka haunaele loa, a no ko Wete makemake ole e ala mai kekahi pilikia ia laua, ua pane aku la oia me ka leo ku i ka ume manao:

            “No keaha la kakou e uluku nei no keia mea?  Eia wau imua o oukou a iloko hoi o ko oukou mau poholima, a ina no wau e hana aku e like me ka’u i manao ai, aole ia he mea no oukou e poino ai.”

            “No keaha la hoi oe i hoopaakiki loa mai nei ma ke ku-e ana mai i ko makou makemake?”

            “E hoolohe mai.  I keia la ua haawi aku wau i ko’u ola no ka hoopakele ana i keia opiowahine mai ke oki ia ana o kona poo e ke Aupuni o rusia nei.”

            Maanei i nu ae ai na leo like ole iloko o ke anaina o na Nihiliti.

            “A no ka hoopale loa ana aku i na poino e kau mai ana maluna o keia opiowahine ua makaukau wau e waiho aku i huu ola.”

            “Aole hoi he poino e kau aku ana maluna o ka opiowahine,” wahi a ke alakai o na Nihiliti i pane mai ai.

            “Ke maopopo ole nei ia’u kau e ha’i mai nei.”

            “Heaha kou manao?  Aole makou he poe pepehi wale, ua ike no hoi oe.”

            “Ma ke ano he ahahui ua ike wau, aka ke maopopo ole nei ia’u ka manao pakahi o kela ame keia o oukou.”

            “E hoomoakaka loa mai ia makou.”

            “Ina aole i hana kekahi o ko oukou lala i kekahi hana pono ole no keia wahine me nei aole e ala mai keia pilikia a aole hoi he mea a keia opiowahine e maka’u ai.”

            “Ke maopopo ole aku la ia makou kau mea e ha’i mai nei.”

            “Ina e ae mai ana oukou e lawe aku ia’u ame keia opiowahine no kahi a ko oukou ahakuka e noho ai, ialaila wau e hoike aku ai a ilaila hoi wau e hooiaio aku ai i ka’u i ha’i aku nei ia oukou.”

            “E hookuu aku ia laua e hele like,” i hooho mai ai kekahi.

            “E huli pakahi aku ia laua,” i hooho mai ai kekahi.

            “Ke ike nei oukou,” wahi a Wete me kona huli ana ae i ke kanaka nana i hoopuka i na huaolelo hope a kau aku la kona mau maka huhu, “eia kekahi poe iwaena o oukou e kumakaia ana i ka oukou ha@a a hoike aku hoi i ke aupuni a oukou e inaina nei.”

            Ua kuemi hope aku la ua kanaka la i kona lohe ana i keia mau olelo a Wete, a o keia no hoi ka hopena o keia hana ku-e ia laua nei.  Hopu aku la o Vera i na lima o Wete a hahai aku la iaia no ka lumi halawai o ka ahakuka, a ia laua no a komo iloko o ua lumi la, ua pane koke aku la o Wete:

            “Aole anei oukou e oluolu mai e hoouna aku i kekahi o oukou e nana i kahi kanaka i ku-e loa mai nei ia maua, a ina oia e haalele ana i kahi kanaka i ku-e loa mai nei ia maua, a ina oia e haalele ana i kahi halawai, e paa aku iaia.  Ke hoohuoi nei wau malia paha he kipi oia.  Aole no hoi he hewa o keia noi a’u.”

            Me ka pane leo ole ua puka aku la kekahi o na Nihiliti i waeia no ka nieniele ana ia Wete ma, a he mau minute hoi i hala ko lakou nei noho mumule ana, a i ka hoea ana mai o ua konaka la, ua kau like aku la na maka o na poe apau iloko o ka lumi maluna o ua kanaka la.

            “I ko’u hiki ana aku nei e hele ana ua kanaka la no ka puka aku iwaho.  Ua paaia mai nei oia.”

            I ka lohe ana o na Nihiliti i keia hoike, ua huli ae la kela ame keia o lakou a nana aku la kekahi i kekahi, a mahope iho i hoomaka mai ai ko lakou alakai e pane.

            “E oluolu anei e hoike maopopo loa mai ia makou i ka manao o kau mau olelo i hoopuka mai nei e pili ana no ko makou ahahui?”

            “E ae mua mai oukou e ha’i mua aku wau i ko’u moolelo.”

            “E hoomau aku.”

            “He makaikiu Amerika wau.”

            “He makaikiu Amerika!” i hooho like ae ai na Nihiliti.

            “Ua hoounaia mai wau ianei no ka imi pono ana i ke kumuhoopii i hoopaahaoia ai o Ivana Horawiki Opio, he kumuhoopii pepehi kanaka hoi.”

            “Owai ka mea nana i hoouna mai ia oe?”

            “Na ka makuakane.  Ua hiki mai wau ianei i ka manawa o Ivana Opio i hookuuia ai, a ike hoi i keia opiowahine, i alohaia e ia, e paa ana iloko o ka halepaahao ma kahi o kana aloha.”

            “O kau e ha’i mai la he moolelo ia i maopopo,” i pane mai ai ke alakai o na Nihiliti.

            “Ae; aka o ke koena aku aole oukou i ike.  Ua hoopaaia aku keia opiowahine iloko o ka halepaahao aole ma ke kumuhoopii pepehikanaka wale no, aka ua hoopilia oia ma ka hewa Nihiliti.”