Ka Nupepa Kuokoa, Volume XLII, Number 43, 21 October 1904 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA.  POALIMA.  OKATOBA 21, 1904.

 

 

KA NUPEPA KUOKOA

_____

 

NO KA MAKAHIKI - $2.00

NO EONO MAHINA - $1.00

_____

 

SUBSCRIPTION RATES

ONE YEAR - $2.00

SIX MONTHS - $1.00

 

O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA, E HOOUNA PU MAI ME KA AUHAU, A INA AOLE, AOHE NO E HOOKOKOIA, E HOIKEIA AKU NO KA AUMAU OLELO HOOLAHA KE UI MAI I KE KEENA NEI.

_____

 

O na Dala apau o ka Pepa e hoouna pololei mai i ka HAWAIIAN GAZETTE COMPANY, LTD.

_____

 

HOOPUKAIA E KA

 

Hawaiian Gazette Co., Ltd.

 

Hookomoia ma ka Hale Leka o Honolulu, Panalaau o Hawaii, ma ke ano Mea o ka Papa Elua.

_____

DAVID L. A-I, Lunahooponopono

S. K. NAWAA, Kokua Lunahooponopono

A. W. PEARSON, Lunanui

Honolulu, Oahu.

_____

POALIMA : OKATOBA 21, 1904.

_____

 

KEIKIALII KALANIANAOLE KA MOHO ELELE LAHUI REPUBALIKA O HAWAII TERITORI I KA AHAOLELO NUI

 

KEIKIALII KALANIANAOLE.

 

HE HANOHANO KE KOHO I NA KANAKA MAIKAI.

_____

 

Aia iwaena o na moho i waeia no ke koho aku ma keia kau koho balota e hoea mai ana ma ka la 8 o Novemaba, he poe kanaka kekahi i ikeia ko lakou mau kulana i na wa i hala ae nei, he mau kulana hoi o ka hoopono, ka maikai a hiki ke malama ia lakou iho ma na hana o ke kino, a e noho ana hoi me ka malama naikai i na kanawai o ka aina.  Aia no iwaena o keia huina he poe no lakou na moolelo i hapalaia a nalo na haawina maikai mamuli o ka lakou mau hana a ka lehulehu i ike ae e hana ana lakou me ka pono ole, e ku-e ana hoi i na kanawai o ka aina, e malama ole ana i ke kulana keonimana, ame na mea maikai e hukiia ai ka naau o na kanaka iloko o lakou.

Ke olelo nei ke Kilohana, o ke koho ana i na kanaka maikai he hanohano ia a ke kaneka nana i koho aku e haaheo aik, oiai ma kona koho ana i ke kanaka maikai, e hiki ai iaia ke hoomaopopo iho e hana mai ana ua kanaka la i ka mea maikai, a aole wale hoi oia, aka ua hiki iaia ke ike iho iloko o kona lunaikehala he pono kana i hana ai, a o ua pono ia aole nona wale iho no, aka no ka lehulehu holookoa, kona aina ame na pono e hoolaupa’i ana iluna o ka aina.

Ma kekahi aoao hoi, he mea e eha ai ka lunaikehala i ke koho ana i na kanaka no lakou na moolelo i maopopo loa ko lakou ku i kahi ponoole, oiai o na moho no lakou ia mau moolelo ponoole, ua maopopo loa e like me ka pono ole o ka lakou mau hana oiai lakou mawaho o ka Ahaolelo, peia no e pono ole ai ka lakou mau hana ke hiki aku ilaila, a o ka hopena e loaa mai ana oia ka hoahewa ana o ka lunaikehala o ke kanaka nana i koho i ua moho ponoole ia.

I mea e ala ole mai ai na hoahewa ana a ka lunaikehala iloko o ke kanaka no kana mea i hana ai, he mea pono e noonoo mua ke kanaka i kana hana e hana aku ai mamua o ka hiki ana mai o ka la koho, a hooholo iho ke kanaka e koho i na kanaka i ikeia aole he mau mea i hapalaia aku iloko o ko lakou mau moolelo o ke ola ana, a e kapae ae i na kanaka no lakou na moolelo ekaeka a ka lehulehu no i ike ai, aole ma na mea pili kino, aka ma na mea i’o.

O ke kanaka e hooko maikai ana i kana hana huli oia, e malama maikai ana i ka hana iloko o kona mau lima, e hilinaiia ana e kona mau hakuhana a kanaka paha e hana ana i kona hana ponoi ma ke alahele o ke kaulike ame ka hoohoaloha ana, he kanaka kupono oia e hele aku e hana mai i ka pono o ku lehulehu iloko o ka Ahaolelo O ke kanaka e maka’u ana i ke kanawai, e noho ana me ka maluhia ma kona home ame kona hele ana ma ke ala, he kanaka maikai ia i kupono e kohoia aku, me ka nana ole ae i kona kulana ina paha ia he kanaka waiwai a ilihune paha. O ke kanaka naauao i huipu keia mau haawina maikai apau, he mea oiaio he hua maikai kana e loaa mai ana e hilahila ole ai ke kanaka nana i koho aku iaia, a e hoahewa ole ai ka lunaikehala.

Aole no i neie kekahi o keia poe e holo nei i na manao e imi pono no lakou wale iho, a o na moho o keia ano he hiki no ke ike e ia aku ma ka lakou mau hana o na wa i hala, ina ia iloko o ka ahaolelo i na kau i hala, aia no kona moolelo malaila kahi i hoike mai ai i kana mau hana i hana ai ame kona ino; ina hoi ma kana mau hana hulipono nona iho mawaho aia o kona moolelo malaila, a mailoko mai o keia ano e hiki ai no ke hoomaopopo ae, he poe lakou i kupono ole e hele aku e hana i pono no ka lehulehu, a he mea pono e koho ole ia lakou.

Ke poloai nei ke Kilohana i ka poe i loaa ia lakou na mana koho e noonoo mua mamua o ke koho ana; wae i na kanaka kupono i ikeia ko lakou maikai, aole hoi ma na mea pilikino.  E kuokoa ke kanaka ma kona koho ana, aole hoi mamuli o na onoonouia.

_____

“HE HOPENA KO NA MEA APAU.’

O keia kekahi o na olelo hiki ole ke hooleia ae kona oiaio mai ka hookumuia ana o ke ao nei a hiki wale i keia manawa.  Ua pili keia olelo i na mea apau a ke Akua i hana ai a hoonoho iho maluna o keia poepoe honua.  Ina he maikai ka mea i hanaia, he maikai no ka hopena e loaa mai ana, ina hoi he ino he hua ino no ke loaa mai ana.  He uku no ko ka mea maikai, a peia no koi me ke ino i hanaia.

O ka hopena i loaa mai maluna o E. S. Boyd, ke Komisina o na Aina Aupuni i na wa i hala ae nei, oia ka hua o kana hana i hana ai, he hua hoi ma kekahi olelo ana ae he awaMa hia, he hua hoi e hiki ole ai ke aio ae, oiai ua hanaia ka hana, a o ka ukuia ana oia hana oia ka mea i loaa iho ia.

Ma ka aoao o ke Kilohana he ehaeha i ka ike ana i kela haawina i kau aku maluna o E. S., Boyd, kekahi oiwi Hawaii i pii iluna o ke anuu kiekie o ka noho aupuni ana o keia Teritore, aka ua hala ia me kona hua, a no na opio Hawaii ma keia mua aku ko makou leo poloai.

E lawe mai na hanauna Hawaii i keia hopena i loaa i keia opio Hawaii i paku nana e pale aku iaia mai ke komo ana aku iloko o kahi e kau mai ai keia haawina.  E maka’u iho ka opio Hawaii i na kanawai e kau ana a e hoomalu ana i ka aina, a e hoopololei i kou mau aoaoa.  E lawe mai i ka olelo kaulana a ka mea haku Halelu i olelo ai:  “O ka pono ka mea nana e hookiekie ika lahui kanaka, a o ka hewa ka mea nana e hoohaahaa,” a e hoopaa iho iloko pakahi o kela ame keia puuwai o na opio Hawaii, a ke hooholo na opio Hawaii pela lakou ehana ai, alaila ua maopopo iho la e ku kaawale ana lakou mai na poino mai a ke kanawai a pela no hoi me na hoopoino lehulehu e kaapuni nei i keia poepoe honua.

_____

O ke kukulu ana i kahua hoao e lapaau ai a e imi pono ai i ke ola o ka ma’i lepera ma Hawaii nei he hana maikai ia.  He nui na manawa i noho ai he mau kauka ma Hawaii nei no ka huli ana i ke ola io o keia ma’i e hookaumaha nei i ka lahui, eia nae aole he hua maikai i loaa mail.  Malia o ke kukuluia ana o kekahi kahua e like me ia i manaoia ai e na kauka naauao a loea o Amerika maanei he puka ia e hemo ae ai keia ma’i mai i o kakou aku, alaila ua pomaikai iho la kakou.

_____

O kekahi o na hana kalaiaina e hanaia mai nei i keia manawa oia ka manao ana o kekahi poe e komo aku iloko o ka Ahaolelo a hana mai i na kanawai kau kapakahi, e hookoikoi ana i na auhau maluna o ka poe waiwai a e hooluolu ana i ka poe ilihune.  Ke manao nei ke Kilohana o na moho e hoike nei pela ko lakou mau manao, he mea pono e hoonoho ia lakou i kauhale.  Aole anei o ke koikoi ana o na auhau maluna o ka poe waiwai he mea ia no lakou e hoopii ae ai i na kumukuai o ka lakou mau waiwai e huli pomaikai nei?  Aole anei e hala ana ke kanaka ilihune ma ka auhau aupuni a e loaa ana oia i na polohoku mai ka poe waiwai mai ma ka hele ana aku o ke kanaka ilihune e kuai i kana mea i makemake ai?  Noonoo pono i keia mau alapahi, e ka Lahui.  “O ka lohe ke ola, a ao ke kuli ka make,” wahi a kahiko.

_____

Ke loheia aku nei na olelo iwaena o ka poe e hana mai nei i na hana Aupuni i keia mau ia e olelo ana, “O ko makaou wa hana iho keia a pau aku ke koho balota o ka hoopauia mai ia no ia.”  Ke manaolana nei ke Kilohana e hoomau aku ke Aupuni i ka hoohana ana i na makaainana e like me ka loihi o ka manawa e loaa ai na hana Aupuni.  He nui na hana i hooholoia ma ke kau Ahaolelo i hala, a ua loaa mai hoi ke dala iloko nei o ka aina, nolaila aia mai ia i ke Aupuni ka hoopaa ana i na makaainana i ka hana, a e hoomau aku hoi a hiki i ka pau ana o na hana i hoolalaia.

_____

HELEHUHU KE AHI ME KA MOKOMOKO.

(Mai ka aoao 1 mai.)

manawa e make ai o Kuropatkin, i ku aku hoi iloko o ka enaena o ka nooili kaua, ua hoonoho mua iho oia ia ka mea e hoopiha ana i kona makalua, oia hoi o Generala Sakharoff a o Generala Bilderling aku mahope ina e loaa kekahi haawina poino maluna o ke kaua ana i hoonoho aku ai i pani nona.

MUKDEN, Oct. 15.—Ua hoikeia mai nei maanei ua lilo aku ke alahele o Lumin i na Rukini, a o keia hoi ka mea e hiki ai ia lakou ke lelekaua aoao aku i ko na Kepani aoao.

NA LONO KAUA O KA LA 16.

ST. PETERSBURG, Oct. 16.—Eia na Rukini ke paa nei ia Shakhe, eia nae aole i hiki ia lakou ke nee aku imua a pela no hoi aole he nee mai o na Kepani.  Iloko o na la eono o ke kaua ana aia no ke kaulike nei na aoao a i elua.  He kaumaha ke kulana o na manao maanei, ua oi aku ka nui o ka poino ma ko na Rukini aoao i ko kela o Liaoyang.

TOKIO, Oct. 16.—Ua hoike mai nei o Kuroki ua kanuia e kona mau mahele koa he 4,500 kinomake o na Rukini a he 1,000 hoi a Oku.  Ke manaoia nei e oi aku ana ka poino ma ko na Rukini aoao maluna o 30,000.

PARISA, Oct.16.—Eia ko Rusia hoaie ke hauie nei.

NA LONO KAUA O KA LA 17.

MUKDEN, Oct. 17.—O ke kaua o keia la ua hoomaula aku i ka po.  Eia nona Rukini ke paa nei i ko lakou kahua ma Shakhe.  Ua lilo mainei ia lakou he eono mau pukuniahi a na Kepani.  Eia ke kaua ma kahi malaelae, a ke kokua nei ka mahele koa o ka hikina i ka mahele koa o ke komohana.  Eia na muliwai me ka piha waikahe a he pohopoho hoi na alanui hele, a piha hoi i na kinomake.

ST. PETERSBURG.  Oct. 17.—Eia na Rukini ke paa nei i ke ka’e akau o ka muliwai Sakho.  Eia ka pualikoa holookoa ke auhee nei mai Mukden aku.

Ma na koho ana ua hiki aku ka poino o na Rukini ma kahi o 30,000.  Ke manaoia nei e hiki loa aku ana keia auhee ana i Harbin.  Ua oi akuka piha ame ka hana o ka oihana lapaau o na Rukini ma Mukden.  He eono tausani poe i eha i hoea ae ilaila i ka Poaono nei.

Ke aia nei na manao aloha no Kuropatkin.  Ke manaoia nei maanei ua kokoke loa mai ka hopena o Poto Ata, a ke maka’uia nei o haalele nei o Kina i kona ku kaokoa.,

TOKIO, Oct. 17.—Ma na hoike i loaa mai nei ua ikeia iho ua hiki aku ka nui o ka poino ma ke kaua o Mukden i ke 60,000, a mailoko mai o keia huina he 40,000 ma ka aoao o na Rukini. Ua pau ke kaua ma ka aoao akau ame ke kikowaena.  Ke hoomau nei ma ka hema.  O na poka a na Kepani mai ka aina aku ma ke kaua ma Poto Ata, ua hiki aku i kahi o na mokukaua o Rusia e ku nei.

LADANA, Oct, 17.—Eha mokuahi Geremania ke hoouka lanahu nei maanei no ko Rusia aumokukaua.

ST. PETERSBURG, Oct,. 17.—Ua lilopio ae nei i na Rukini ka Puu Lone Tree ame umi-kumamalua pukuniahi a na Kepani, a hoopuehu aku hoi i na Kepani ai na kulanakauhale liilii.

TOKIO, Oct. 17.—Ua lilo hou ae nei i na Kepani he wahi hou ma ka hema o Shakhe.  Eia o Generala Oku ke hoao nei e kaupale i ke auhee a na Rukini.  Ma ka hoike oihana kaua ua ikeia aia ma kahi o 200,000 ka nui o na koa hele wawae o na Rukini ma Shakhe, 25,000 koa kaulio ame 950 pukuniahi.

NA LONO KAUA O KA LA 18.

MUKDEN, Oct. 18.—He eono manawa a na Rukini i lelekaua aku ai ia Oku ma ka la inehinei a ua hookuemi hope mau ia mai.  Eia lakou ke nee hou nei o ka lelekaua ehiku ana.

ST. PETERSBURG, Oct. 18.—O na lono e loaa mai nei mai ia Kuropatkin he mea hoolana manao.  Eia no ke kulana o ke kaua ma kahi maokioki loa a aole hoi i maopopo ka manawa e kuu iho ai ke kaua.  Eia o Kuropatkin ke paa aku nei i na Kepani me kona kikowaena, a o kona aoao akau ia e kaua nei i ka enemi ma kahi e kokoke ana i Tumingling.

LADANA, Oct. 18.—Ua hoike ae o Barona Hayashi, ko Iapana Kuhina, e hoomauia aku ana ke kaua iloko o keia kau anu.  Ke lilo mai oTieling e hoomau aku ana na Kepani i ka nee ana no Harbin.

KOPENAHAKINA, Oct. 18.—Eia ko Rusia aumokukaua o ke Kai Balatica ke hoopiha lanahu nei ma Langeland.

ST. PETERSBURG, Oct. 18.—Aole i maopopo ae nei owai la na pualikoa lanakila ma Mukden.  Ua luhi maoli na pualikoa o na aoao a i elua mamuli o keia kaua loihi.

TOKIO, Oct. 18.—Ua hoopuehu aku na Rukini i kekahi mahele koa malalo o Generala Yamada, a lilo pu aku no hoi he 14 pukuniahi.  O keia kekahi o na kaua ikaika loa, eia nae ua lilo hou ae no ia Generala Yamada kona kahua.  O ka lelekaua holookoa a na pualikoa pukaa o na Rukini o ka Poakahi nei ua hookuemi hope ia aku.

NA LONO KAUA O KA LA 19.

MUKDEN, Oct. 19.—Eia na Rukini ke paa nei i ke kahua i loaa ia lakou ma Shakhe a ua lilopio mai nei ia lakou he ehiku mau pu mikini.

ST. PETERSBURG, Oct. 19.—Eia na Rukini ke nee kaua nei i ko na Kepani aoao hema, i hoopuehuia aku hoi me ka nui o ka poino.  O ka ua ka mea nana e alalai nei i ke kaua.

LADANA, Oct. 19.—O ka poka pukuniahi a na Kepani ka mea nana i hoopiholo iho i ka mokukaua Bayan iloko a ke awa o Poto Ata.

CARIFF, Oct. 19.—He hapalua miliona tona lanahu ke hoounaia aku ana mai nei aku ma ko Rusia inoa.

_____

 

MAOPOPO KONA LA HOPE.

Ma ka Poakoku o keia pule ae, Okatoba 26, oia ka la i hooholoia ai e Kiaaina Carter, e make o Jose Miranda maluna o ka amana, e like hoi me ka hoahewa ana o na kiure a ma ka olelo hooholo a Lunakanawai Gear i hooaku ai iaia.

Ma ka hora 5:15 auwina la Poalima Okatoba 14 ko ke Kiaaina kakauinoa ana i ka palapala e hoopaa ana i ka manawa e make ai keia pepehikanaka.  Mamua aku o kona kakauinoa ana ua hoike mua aku ke Kiaaina i kona manao e hanaia na hana apau me ka maalahi, a e papa ana hoi i ka lehulehu mai ka ike ana aku i na hana e hanaia ana.  Aole he mau palapala kono e hoounaia ana no na hana e hanaia ana ma ia la, a e ae wale ia no ka poe he hana ka lakou, a ma ka aoao hoi o ka lehulehu e hookuuia ana ka poe kakau nupepa e hiki ae ma Kawa a na lakou e hoike aku i ka lehulehu i na hana i hanaia.

_____

Ma ka huina o na alanui Betela ame Moi i ke awakea Poalua o keia pule aku nei, ua haiolelo ae o Sam. Kaloa, o ke kii i puka aku ma ke Kilohana o ka pule i hala, oia na kii o Kimo Ko ame Mahelona e puhiia ana i ke ahi.  Akahi laiau o Demokarata.  Auhea aku ka lua.?  E akahele i ke kolu o kani auanei ka moa maopopo ke Demokarata he olohewa.

Ke upuia aku nei e hoea mai ana o W. R. Castle mai kana huakai aku nei no Amerika i keia Poakolu iho maluna o ka mokuahi Ventura.

_____

O KE KANAKA ILOKO O KA PILIKIA O KOU HOALOHA IA.—Pela iho ia ke ano o ka Chamberlain’s Cough Remedy.  O keia ke kokua i loaa i na makuahine i kona manawa e hoalaia ai i ka po mamuli o kona lohe ana i ke kunu awahia i loaa i kana kamalei ame ka hanu kaumaha hoi o kana bebe.  O keia laau kunu ka mea nana e hoopakele i na keiki ame na makua no hoi i ko iakou manawa e loaa ai i ke anu a e puka mai ana hoi ka male mai ka umauma mai.  O keia ka laau nana e paie aku i ka loaa hou ana mai a hoola hoi i ke anu ame ke kunu.  Ke kualia nei ma na halekuai laau lapaau apau.  BENSON, SMITH & CO., LTD., na Agena ma Hawaii nei.

_____

Olelo o ka Hanohano

O na kanaka e hana ana e like me ka lakou olelo i olelo ai:  a o na mea i puka ai ka oiaio e like me ka lakou i olelo ai—he mau mea hoolana manao ia i kau mai maluna o lakou.  He hoowahawaha kakou i na hoopunipuni ia kakou:  oi loa aku ka hoopunipuni i manaoia e hana peia.  Aka aole he hoopunipuni na kanaka apau ina no e hoopuka kuhihewa ke kanaka.  Ina no ilo ko o na ahahui aole no e loaa. Ua ike kela ame keia o ka hoohana ana i na hana kalepa aina maluna o ke alakai pono ame ka manaoio.  He mau miliona o na mea i kuaiia i kela ame keia la aole ma na olelo hoopaa i kakauia aka maluna o na olelo hoopaa waha wale no.  Ua kapa mau ia ae ka Stock Exchange he punana no na piliwaiwai, eia nae aohe wahi e ae e malamaia ai na olelo hoopaa me ka hanohano nui ae.  Nolaila i ka manawa a makou e olelo ai i ka WAMPOLE’S PREPARATIONS ka laau lapaau o ke au hou i hoaoia a ikeia ke maikai, no kona hoopunipuni ole i kekahi, e loaa iaia na manaolana no ka hoolaia a pomaikai malaila ke manao nei makou e manaoio ana no lakou.  No ka oiaio o keia mea ua nui na ma’i i lawelaweia i na la i hala e hoike ana i kona ano.  Ua hooiaio wale ia aku no oia maluna wale no o na mea ana e hiki ai ke hoohana a holopono.  He hiki oia ke hana i na ma’i inoino o ke koko, La Garipa, na nawaliwali, na eha o ka puu ame ke akemama, ame na ano ma’i inoino o ke koko.  Ho ono ke ai me he hone (meli) la a he hanai a hoola io.  He waiwai keia mailoko mai o ka Aila o ke Akepaa o ka I’a Cod (Pure Cod Liver Oil) mai na akepaa o na i’a cod hou mai i huiia me ke Compound Syrup of Hypophospihites ame ka Extract of Malt and Wild Cherry.  Eia ke Kauka Austin D. Irvine olelo:  “Ua hoohana aku au i keia laau ma na ma’i i ku i kana mana hoola, aka aole nae i ka poe i ku ole, a he maikai maoli no na hua i puka mai.”

He loaa ka manaolana i ka oolopu laau mua a he maikai i ka opu. Aole ia e hoopunipuni a hoopau ‑ ha ia oe a he hoopakele no hoi i ka oe i nele i na hoomaikai mai kekahi ano laau e ae.  He laau ia no ka lanakila lapaau o ke au lapaau e hele nei.  He kuaiia keia laau e ka poe kuai laau lapaau apau.

_____

Hoaa ka hoi ka poe i huli ae ia Kaniahiku ma kona keena i keia mau ia aku nei.  I hewa i ka hala e ana o na huli ina ua papaleo u me ia.  Eia mai no ia ma keia helu e puka aku nei.  O ka hoi ana mai nei no ia mai kana huakai aukai mai.

_____

HOOLAHA AINA AUPUNI.

_____

HOOLAHA AINA APUNI.

Ma ka Poaono, Novemaba 5, 1904, ma ka hora 12 awakea, ma ke alo iho o ka Hale Hookolokolo, Honolulu, e kuaiia aku ana ma ke kudala akea keia mau Aina Aupuni e hoakakaia nei malalo iho nei:

Apana 1, he hapa o ka aina o Kaipapau, Koolauloa, Oahu, nona hoi ka iliaina o 282 eka, oi iki a emi iki mai paha, paupu me kekahi wai, ka hahai holoholona ana ame ka pono e mahi ma ke koena aku o ka aina i hoikeia ae nei maluna.  Kumukuai haahaa, $1000.

Apana 2, he hapa o ka aina o Puako,S. Kohala, Hawaii, nona ka iliaina o 3.91 eka, oi iki a emi iki mai paha.  Kumukuai haahaa, $196.

Ma ke dala gula o Amerika ka makemake, kuike.

No ke kii aina ame na mea aku i koe e ike ae ma ke Keena o na Aina Aupuni, Hale Hookolokolo, Honolulu.

JAS. W. PRATT,

Komikina o na Aina Aupuni.

Honolulu, H. T., Oct. 4, 1904.

3036—Oct. 7, 14, 21, 28.—Nov. 4.

_____

HOOLAHA MA KE KAUOHA

_____

KEIKI NALOWALE

_____

Mai Niolopa, Honolulu, Oahu, Sept. 28, 1904, ua hele auwana aku o Simeona Kane he keiki no 12 makahiki a oi aku.  He malihini oia no Kalaoa, Papaikou, Hilo, Hawaii mai.  O ka mea e loaa ana e oluolu e hoike mai ia J. S. Kalakiela ma “Kalakaua Hale” Honolulu.

Honolulu.  Oct. 21, 1904.

3038—Oct. 21, 28.—Nov. 7.

_____

HOOLAHA.

___ __

Ke haawiia aku nei ka hoolaha ua lilo ae nei o ALEXANDER GARVIE, ESQ. iaia no ko makou hui a peia iho la a mai ka la 1 o Okatoba, 1904.

BISHOP & CO.,

Honoluu, Okatoba 8, 1904.

3036.

_____

HOOLAHA PONO WAI.

_____

IMUA O KE KOMISINA O NA ALANUI LIILII AME NA PONO WAI.  MOKUPUNI O OAHU, E HOOHUI ANA I NA APANA LUNAMAKAAINANA EHA AME ELIMA.  HOOLAHA HOOPONOPONO WAI.

Ma ka pono o ka mana i hookauia mai maluna o’u ma ke ano he Komisina o na Alanui Liilii ame na Pono Wai no ka Mokupuni o Oahu nei, e huipu ana na Apana Koho Lunamakaainana Eha ame Elima, Teritore o Hawaii.  Ma keia ke haawi aku nei wau i ka hoolaha ma ka la 21 o Novemaba, A.D. 1904, ma ke Keena Hookolokolo o Lunakanawai J. T. De Bolt iloko o ka Halehookolokolo ma Honolulu, Mokupuni o Oahu, e hoolohe ana wau a e hooholo ana hoi i ka hoopaapaa pono wai i hoomakaia e Harriet E. Wight, mea hoopii. vs. (ku ‑ e) i ka The Dowsett Company, Limited, Ah Chong, Ah Sam, Chun Loke, Mrs. Kaluka Elekula, John Hookano Manuia ame Geo. Kawahalama Manuia, na poe ma ka aoao pale no ka hooholo ana i ka mea i kuleana i na pono wai apau loa e kahe nei a i ole i loaa ke pono e kahe iloko o kekahi auahawai kahiko a auwai i ikeia ma ka inoa “Auwai o Kukuiholiilii” i loaa hoi kona wai e kahe ana mai ke Kahawai o Nuuanu, a oia kahawai hoi i oleloia ke HOOLAHA MA KE KAUOHA

_____

holo nei ma ke Awawa o Nuaanu, Mokupuni o Oahu, ma ka aoao hikina o ua awawa la, a no ka hooholo ana no hoi i ka mahele kaulike ana o na wai i oleloia, a no ka hooponopono ana i na ioina e loaa mai ai ua pono wai ia, i oleloia ame ka noho mana ana i kona wai e kahe@ na no a ma ka aoao o na mea kulea, ia mea.

Ke haaawi hou aku nei no hoi wai i ka hoolaha i keia ame keia me kuleana aina, me e noho ana iluna o ka aina, a i ole i kekahi mea okoa i loaa ka pono iloko o keia hoopaapaa i hoikeia ae nei e hele ae ma ka manawa ame kahi i olelo mua ia ae nei no ka hooiaio ana i ko lakou mau pono i na wai o ua auwahawai kahiko la i hoikemua ia ae nei, a o na mea e ae i pili iloko o keia ninau hoopaapaa wai i oleloia e like me ia i olelo mua ia ae nei, a i ole o na pono o ia ana hooponoponoia aku ana me ka hiki ole ae o kekahi mea iloko o ua aha la, e hooleia no lakou a e papaia hoi no ka wa mau loa mai ke koi ana a hoohalahala ana iloko o keia hooponopono i oleloia.

Haawiia mai maloko o ko’u lima i keia la 12 o Okatoba A.D. 1904.

EMMA M. NAKUINA.

Komisina o na Alanui Liilii ame na Pono Wai iloko a no ka Mokupuni o Oahu, e hoohui ana i na Apana Koho Lunamakaainana Eha ame Elima.

3037—Oct. 14, 21, 28.—Nov. 7

_____

HOOLAHA A KA LUNAHOOPONOPONO WAIWAI.

_____

WAIWAI O AMARA.

_____

No ka mea ua hookohuia ka mea nona ka inoa malalo iho, i Lunahooponopono i ka waiwai o Kekie Amara w o Waialua, mokupuni o Oahu, i make, nolaila ke hoike ia aku nei ka lono i ka poe apau ina he koi ka lakou, e waiho mai ia mau mea i ka mea nona ka inoa malalo iho, ma kona keena ma Aliiolani Hale, Honolulu, mokupuni o Oahu, iloko o na mahina eono mai keia la aku, o hoole loa ia auanei.

A o ka poe i aie i ka mea i make, ke kauoha ia aku nei lakou e hookaa koke mai i ka mea nona ka inoa malalo iho, ma Aliiolani Hale i hoike ua ia ae la.

Kakauia i keia la 24 o Sepatamaba, 1904.

HENRY SMITH,

Lunahooponopono Waiwai i hoikeia ae la.

3035—Sept. 30—Oct. 7, 14, 21, 28.

_____

HOOLAHA I NA MOHO NO KE KOHO ANA I KA AHAOLELO.

_____

Ma keia ke haawiia aku nei ka hoolaha, oiai ke koiia nei ma ke kanawai o na moho no ke koho ana i ka ahaolelo, o ka Mokupuni o Oahu, e waiho ae i ko lakou mau palapala i waeia ae i moho me ke Kakauolelo o ka Teritore aole e emi iho malalo o Umi la mamua o ka la Koho Nui, nolaila he mea pono no o na palapala wae moho i oleloia e waiho ae ma keia keena aole e haule aku mahope o ka hora Eha o ka auwina la o ka Poaono, Okatoba 29, 1904.

I hiki ai ke kupono no ke koho ana ma ke ano Senatoa o ua moho la i kane ia a makaainana o na Mokuaina Huiia, i hiki aku kona mau makahiki i ke kanaholu; i noho hoi ma ko Hawaii Paeaina aole i emi iho malalo o ekolu makahiki a i kupono hoi no kekoho ana i na Senatoa iloko o ka Apana ona i kohoia ai.

I hiki ai ke kupoNo no ke koho ana ma ke ano he hoa o ka Hale o na Lunamakaainana, a ua mea la i ka manawa no i kohoia ai, e loaa iaia na makahiki he iwakalua ‑ kumamalima; i kane hoi a kupa o na Mokuaina Hulia; i noho hoi ma ko Hawaii Paeaina aole i emi iho malalo o ekolu makahiki; a i kupono hoi e koho no na lunamakaainana ma ka Apana ona i kohoia mai ai.

O na palapala waemoho apau e hoouna pu ia mai me na dala hoopaa he iwakalua ‑ kumamalima, a e kakauinoa ia hoi e na poe kupono i ke koho aole e emi iho malalo o iwakalua ‑ kumamalima mai ka Apana nona ua koho la e malamaia aku ana.

A. L. C. ATKINSON

Kakauolelo o Hawaii.

Hale Aupuni, Honolulu.  Sepatemaba, 29, 1904.

3035—Sept. 30—Oct. 7, 14, 21.

_____

HOOLAHA MANA HOOKOLOKOLO

_____

ILOKO O KA AHA KAAPUNI O KA APANA KAAPUNI EKOLU TERITORE O HAWAII, HOOPONOPONO WAIWAI HOOILINA MA KE KEENA, ILOKO O KA WAIWAI O DAVID HUKAI KAHOIWAI O KOHALA AKAU, HAWAII I MAKE KAUOHA OLE.

Kauoha o kaHoolaha o ka Hoolohe Palapala Noi no ka hooponopono Waiwai ana.

Ma ka heluhelu ana ame ka waiho ana mai i ka Palapala Noi a E. A.Fraser o Mahukona, Kohala, he mea i aieia e David Hukai Kahoiwai, e hoike ana o David Hukai Kahoiwai o Mahukona, Kohala Akau, Hawaii, ua make kauoha ole ma Mahukona i oleloia ma ka la 13 o Dekemaba, A. D. 1903, e waiho ana hoi he waiwai iloko o ko Hawaii Paeaina i kupono no ka noho Kahu ia a e noi ana e hoopukaia na Palapala Lunahooponopono Waiwai iaia.

Ua kauoha pu ia no hoi o ka Poalima, ka la 11 o Novemaba, A.D. ;1904, ma ka hora Umi a. m., oia kahi ame ka manawa no ka hoolohe ana i ka Palapala Noi i oleloia maloko o ke Keena Hookolokolo o keia Aha ma Kailua, a oia hoi ka manawa ame kahi a ka poe apau i kuleana iloko o keia mea e hiki ae ai lakou a hoike ae i ke kumu, ina he mau kumu kekahi no keahi la e hiki ole ai ke aeia ke noi i oleloia, he hoolaha o ke Kauoha e hoolahaia ma na olelo Hawaii ame Enelani iloko o ka Nupepa Kuokoa ame Pacific Commercial Advertiser, he mau nupepa iloko o Honolulu, no ekolu pule neepapa.

Hanaia ma Kailua, Hawaii, i keia la 23 o Sepatemaba, 1904.

JOHN ALBERT MATTHEWMAN, Lunakanawai o ka Aha Hookolokolo Kaapuni o ka Apana Kaapuni Ekolu.

Ike makaia:

John P. Curts.

Kakauolelo o ka Aha Hookolokolo Kaapuni o ka Apana Kaapuni Ekolu.

3035—Sept. 30.—Oct 7, 14, 21.

_____

HOOLAHA KUMAU

_____

Kakela me Kuke

[KAUPALENAIA]

Poe Kalepa ma ke Komisin@

:: A HE ::

POE LAWELAWE KOPA

_____

Poe Agena no na Mahiko Lehulehu.

_____

 

Hui Alahao ame Aina o Oahu

MANAWAHOLO

Oct. 6, 1904

MAI HONOLULU AKU @

No Waianae, Waialua, Kahuku ame na wahi hoolulu ma ke alahao *9:15 a.m., *3:20 p.m.

No Pearl City, Ewa Mill, ame na wahi hoolulu ma ke alahao-- *9:15 a.m., *11:00 a.m., @ *3:20 p.m., *5:15 p.m., @ *11:15 p.m.

MAI WAHO MAI.

Ku i Honolulu mai Kahuku, Waianae ame Waianae mai *8:36 a.m., @ *5:31 p.m.

Ku i Honolulu mai Ewa Mill ame Pearl City mai--*7:45 a.m., @ 10:38 a.m., *1:40 p.m., @ *5:31 p.m., *7:30 p.m.

Kela ame keia la.

Sabati wale no.

Koe ke Sabsti.

 

G.P. DENISON, Lunahoohana.

 

F. C. SMITH,  G. P. & T. A.

_____

Na Papale I-e Nunui.

_____

O na Lede ame na Keonimana o na ano hou e loaa no ma kahi o

FUKURODA

Helu 28-32 - - - Alanui Hotele

_____

$1.00 i ka pule e hoaha ai, iloko o @ pule e loaa ana i ka mea @ $150.00 ke hoahu iloko o ka @

Fidelity Funding Co.

O KAPALAKIKO.

Ua hoihoi aku keia hui i ka makahiki i hala, no hookahi makahiki i ka poe i hoahu he $275,000.00 a @ keneta uku-panee i ka poe @ hu mai i ka lakou mau dala @ o elua makahiki.

E loaa no na mea apau ke @ ia.

R. D. HIGHTOWER.

Agena ma Hawaii, Teritori nei. 41 ame 52 young Block, Honolulu.

_____

HUI HOOLEWA HONOLULU

_____

Ke hoolaio nei keia hui i kana mau hana kokua i kona mau lala. I keia wa ua oi mamua o 1300 lala, a ke @ mau nei i kela ame keia la.

J. H. TOWNSEND.  Kakauolelo

_____

He Huaale Maikai

Aole he like o na

“HUAALE A AYERS.”

me na huaale e ae no ka mea he mea huaale kokua keia i ka hana a na naau, a he laau hoomaha maikai loa hoi.  Ina he paa kou hanalepo o na

“HUAALE A AYERS.”

ka laau e hemo maikai ai a e hemo maikai mau ana hoi mahope aku oia manawa.

Aole loa he hiki i kekahi kana ke Olelo ae he maikai kona oia kino ina aole he hemo o kona hanalepo he hookahi manawa o ka la, a oi aku paha.  Ina i maopopo keia kanawai o ke ola i na kanaka apau, aole loa e like ka nui o ka poe ma’i me ka mea e ike ia nei i keia mau la.

Ua hana ia owaho me ke kopaa he maikai loa ka lawe ana.

Aohe mau Huaale i oi ae ka maikai mamua o na

“HUAALE A AYERS.”

Hoomakaukau i a e Kauka J. C.Ayers & Company, Lowell, Mass., U.S.A.

E loaa no keia mau Huaale ma ka Hale Kuai Laau o Hollister, alanui Papu.

_____

Eia ke kali nei o Kiaaina Carter i ka loaa mai o ka pane a Kakauolelo Hay no na mea e pili ana i na hana hookipa i ke Keikialii Fushima o Iapana e hoea mai ana maanei i keia mau la iho.