Ka Nupepa Kuokoa, Volume XLII, Number 39, 23 September 1904 — Page 2
| This text was transcribed by: | Toni Lynne Kaefferlein |
| This work is dedicated to: | Elizabeth S. Allyn Mummy |
Ka Nupepa Kuokoa
KE KILOHANA POOKELA NO KA LAHUI HAWAII.
2 NUPEPA KUOKOA, POALIMA SEPATEMABA 23, 1904.
KA
Nupepa Kuokoa
NO KA MAKAHIKI - - $2.00
NO EONO MAHINA - - 1.00
SUBSCRIPTION RATES
ONE YEAR - - $2.00
SIX MONTHS - - 1.00
O NA OLELO HOOLAHA APAU E HOOUNAIA MAI ANA NO KA HOOKAHA MALOKO O KEIA NUPEPA, E HOOUNA PU MAI ME KA AUHAU, A INA AOLE NO E HOOKOMOIA. E HOIKEIA AKU NO KA AUMAU OLELO HOOLAHA KE UIMAI I KE KEENA NEI.
O na Dala apau o ka Pepa a hoouna pololei mai i ka HAWAIIAN GAZETTE COMPANY, LTD.
HOOPUKAIA E KA
Hawaiian Gazette Co., Ltd.
Hookomoia ma ka Hale Leka o Honolulu, Panalaau o Hawaii, ma ke ano Mea o ka Papa Elua.
DAVID L. A-I, : : Lunahooponopono
S.K. NAWAA, : Kokua Lunahooponopono
A.W. PEARSON, : : Lunanui
HONOLULU, OAHU
POALIMA : SEPATEMABA 23, 1904.
KEIKIALII KALANIANAOLE.
KEIKIALII KALANIANAOLE KA MOHO ELELE LAHUI REPUBALIKA O HAWAII TERITORI I KA AHAOLELO NUI.
KUIO KE KAKOO AOLE MA KA OIHANA.
Maloko o ka oihana kalaiaina aole i nele ka hanaia o keia mau mahele a elua, oia hoi, o ke komo ana o na kanaka iloko o kekahi aoao kalaiaina a hoike akea ae i na kakoo ia aoao, iloko no nae o elua mahele - he poe i komo ma ke ano ua manaoio a hooiaio oia ke kahua e ku ai a kakoo me ke kuio, a o ka lua o ka mahele oia ke komo ana a kakoo me ka hoohihi nui o ka noonoo, iini nui ka puuwai me na maka alunu e ake ana e loaa ka hana a oihana.
He mea keia i kuluma a aole wale i Hawaii nei aka aia ma Amerika, Pelekane ame na aina e ae no keia mau haawina a elua, a oiai eia ke pii nei ka wela o ke kalaiaina i o kakou nei a mamua aku nei no, aole i nele ka pu-a ana ae o na noonoo iloko o kekahi poe a lawe ae la lakou i ko lakou kulana ma ke ake hana a oihana e like me kela o Manoa i pu-a ai, a makou e manaoio nei aia no ma na wahi e ae kekahi oia hoi, aole lakou e kakoo i ka aoao Repubalika no ka loaa ole o ka hana, a ina eia ke hana nei alaila wahi a ka olelo, he h@ohana wale ana no, no keia manawa kalaiaina a pau ae ke koho balota o ka pau no ia i ke kipakuia.
O ka poe apau i loaa kela ano noonoo pupuka a moowini aole e manaoia e ola na kumuoiaio e kakoo ana ia aoao me ka nana ole ae o ka aoao hea la ia, aka he hana pepehi aoao ka lakou, i like aku la no me ko lakou pepehi ia lakou iho ma ka nuha ana a haalele kohu ole i ka aoao no ka loaa ole o ka hana, alaila komo aku iloko o kekahi aoao hou aku, a i ka hoopaanaau mau ana o ia ano kanaka ia ano noonoo pupuka iloko ona e lilo auanei ia ano kanaka i mea holoholo i o a i o e like me laukea ame kekahi poe e iho i holoholo iho nei a ke Kuokoa e manao nei he hana hooholomua ole ia ina pela na kanaka apau e hana ai a e kuleana ole ai kekahi aoao kalaiaina e kakoo ia kanaka.
Aka aohe hoohewahewa i ka holomua o kekahi aoao mamuli o ke kakoo o ka poe kuio me ka nana ole i ka loaa hana a loaa ole paha, a o ka holomua o ia aoao ma o keia poe kuio oia no ka holomua o ka pono pililaula i ka manawa i makemakeia no ka hooko ana.
O keia mau mahele a elua i hooaiaiia ae la aole laua he mau mea hou a a-no wale iho nei no - aole nolaila ka makou kalele ma keia kumuhana aka ma ka paipai mau ana i ka hoakanaka e hoomanao poina ole i ka haawina oikela oia ke kuio a aole o ke ake hana a oihana - he mea kakoo ikaika i ua kanaka nei nona iho, he mea hookanakamakua a hookanaka iaia iho, a ma ka aoao hoi o kona aoao i ku ai e kau auanei ka maka pililaula maluna ona e like me John Lane; J. L. Kaulukou ame kekahi poe e iho i nuha ole ai.
Aka mamua o ke komo ana o ke kanaka iloko o kekahi aoao kalaiaina e like me ko kakou i keia manawa o ka Repubalika, ke Demokarata a Home Rula (ke homimi aku nei no nae o Home Rula) he hana naauao a kupono loa ia i ke kanaka o ke komo iloko o ka aoao i maikai loa ae i ko na aoao e ae a i komo hoi oia ilaila a kakoo hoi ia aoao mamuli o kona manaoio oia ka aoao maikai loa no ka mea ua oi pakela loa ae kana maikai loa i hana ai no ka lehulehu, a maluna hoi o ia kulana ke Kuokoa i ku ai, ana [@@@] no hoi e hoomau nei ma ka paipai ana e koho i ka maikai loa.
Nolaila i ka hookuku ana i na aoao kalaiaina a ekolu e ku nei he mea moakaka loa i ka hoomaopopo pono iho o ka aoao i kau aku ma ka maikai loa oia no ka Repubalika a malalo iho na aoao e ae, a he maikai loa hoi ia i kakooia e na hana i hanaia e ia aoao no ka pono pililaula e ha'o ole ai ka ike ia ma kona mau moolelo o ke ola ana. A ua kaa aku no ke ko'iko'i o ke koho ana o ke kanaka i kona aoao kalaiaina maluna o ka nui noeau a malamalama iloko ona, aka he nui no ka poe malamalama i huhewa na koho ana. [@@@]
I KU NO NA HAAWINA WALOHIA MALUNA IHO NO ONA.
Ma ka leka a Morris Keohokalole e puka aku nei ma keia helu o ke Kilohana o laweia mai ka nupepa "Ke Aloha Aina" mai, he leka i kana aliiwahine - ma ua leka la i loaa hou ai ka ike ia kakou no na haawina waiohia pili iaia e noho mai la i Amerika me ka pololi ame na popilikia pili i ka noho ana.
Aole paha he mea hiki ke alo iho i ka hoomaopopo iho i keia nui pilikia o keia oiwi Hawaii o kakou, he keiki hanau no ka aina - ke hele ia a piha ke kanaha hora o ka noho ai ole ana, a i kekahi manawa ma kahi o iwakalua hora a oi ka noho pololi ana, a iloko o ka nui hooikaika aole no he loaa hana iki, a he keu no hoi a ke kupanaha o ka loaa ole o ka hana no ka mea aia no he mau oiwi Hawaii i Amerika i emi iho ko lakou makaukau ia Kahai, eia nae ua loaa no ka lakou hana: aka nae, aole e hiki ia kakou ke alo iho i ka hoomaopopo ana i ka nui poino o keia Hawaii o kakou.
A o na haawina popilikia e like me keia aole e nele ka huleia o na manao aloha, no ke kokua ana, ke kumu o ka ulu ana mai o kekahi hana kokua aloha no ka laulima ana i mea e loaa ai i alanui nona e hoi mai ai, a makou e manaoio nei aole e nele ka loaa o na kokua, no ka mea he nui na Samaria iloko o Hawaii aloha a he aina nele ole no o Hawaii i na limakokua, a he mea maikai no ke komo kokua ana iwaena o ka poe i loohia i na popilikia.
NA HAILUKU MA'UWALE O NA DEMOKARATA.
A maluna hoi o keia mau haawina ku i ka walohia e hailuku ma'uwaleia nei ke Keikialii Kalanianaole maloko o ka oihana kalaiaina no ke kulana elele e kekahi poe alakai a wahaolelo Demokarata mamuli o kona kipaku ana ia Kahai, i lawe hoonuinui hoi i mea e puka ai lakou; a i ka nana io aka no i ka moolelo holookoa o keia leka a ko kakou makamaka i kana aliiwahine, aole no e nele ka holo o ka noonoo o ke kanaka me ka paukiki nui e hoapono i kekahi aoao a hoahewa i ka Elele Kuhio, aka ke noho ke kannaka a noonoo pono maluna no o ua leka nei aole no e hikiwawe ana ka uluku o ka noonoo o ka poe akahele, e nele ole ai no nae ko lakou kaumaha no ia mau haawina walohia i kau aku maluna o kekahi o kakou, a makou e pane kanalua ole nei i ka moowini o ka noonoo kalaiaina Demokarata o kekahi poe o ia auna ma ka lawe ana i keia mau mea pilikino i mea e hoonui ino ma'uwale ai.
I KIPAKUIA OIA NO KONA HEWA NO.
Nolaila makou i makemake ai e hooaiai aku ia kakou aole wale no maluna o keia mau haawina ku i ka walohia a makou no hoi e kaumaha pu nei no ia mau mea, aka, ua makemake nui makau e hooaiai pu aku i ka lehulehu i ke kumu o ka loaa ana o keia mau poino maluna o Keohokalohe.
He nui no paha na kumu liilii o ke komo ana iloko o na popilikia, e laa ka mimino o kona waihona, a nele i ka hana ke kumu o ka loaa loaa ole ame ka nele i na kokua no kona alahele hulihoi (oiai nae, aia no he mau kokua a ka Elele iaia) a na keia mau kumu liilii i hoonui ae i na popilikia ma kona (Kahai) aoao a ku ai i ka walohia, aka, maluna o keia mau kumu liilii apau he hookahi kumu kaalalo maopopo o ka ulu ana mai o keia mau ino, a oia kumu - "oia on kona kipakuia ana e ka Elele Kuhio, wahi a kana (Kahai) leka ponoi i kakau ai i kana aliiwahine." a makou e hoomaopopo nei aia maluna o keia kipaku ana ka mea e painuu hoonui ino nei ke Demokarata (o ka poe noonoo lahilahi a noonoo kalaiaina moowini). A NO KO LAKOU LILO I KA HOONUI INO MA'UWALE MALUNA O KA ELELE KUHIO. UA POINAIA IHO LA KA NOONOOIA ANA O KE KUMU O KE KIPAKUIA ANA, a makou e kalele nei ma ka makou hooaiai e pono ka hoakanaka e noonoo pono iho i ke KUMU O KE KIPAKU ANA MAMUA O KA AHEWA E ANA, a oia no hoi ka ninau kupono loa e ninau ai: "I KIPAKUIA O KAHAI NO KEAHA?"
Maloko o ka leka ponoi no a Keohokalole keia mamalaolelo -"MAHOPE IHO O KO'U HAALELE ANA IHO I KAHI O KUHIO, MA O KO'U KIPAKUIA ANA MAI, UA HELE AKU LA AU --" ke pane kanalua ole nei ke Kuokoa o ua mamalaolelo la no ka haina piha no keia ninau ma ka mawehewehe pono ana a loaa ka io o ka mamaolelo i oleloia ma kekahi olelo moakaka ana ae - I KIPAKUIA O KAHAI NO KONA HEWA NO. Alaila o kona hewa ke kumu o ke kipakuia ana, ke kumu hoi ona i haalele aku ai i kahi o Elele Kuhio a loaa ai na haawina ku i ka walohia a aole maluna o kona kipakuia ana, oiai he alanui he kipaku no keia mau popilikia i kau ai maluna ona aka o ke kumu kupaku kahi i ulu mai ai na ino apau, a o ua KUMU KIPAKU LA HE HANA HEWA AKU LA IA NO KE KANAKAHANA I KONA HAKUHANA, ka mea hoi a ke Keikialii i kalele nui ai ma kana haiolelo ma Hilo e olelo ana i ka eha o ka noonoo o na Hawaii ina e hu'eia ana na ino i hanaia e Mr. Morris Keohokalohe.
Eia na mea i maopopo loa me ka ninau ole aku ia ha'i aka ina e noonoo ke kanaka nona iho maluna o ka leka i oleloia, a oi loa aku ma ka mamalaolelo e olelo ana - "Mahope iho o ko'u haalele ana iho i kahi o Kuhio, ma o ko'u kipakuia ana mai -" alaila aole e nele ka loaa o keia mau oiaio kumau a maa mau malalo iho nei me ka akiuma ole a koho wale, oia hoi: AOLE E KIPAKU WALE IA KE KANAKAHANA KE OLE OIA I HEWA I KONA HAKUHANA, AOLE NO HOI E KIPAKU WALE IA KE KANAKAHANA INA O KA HAKUHANA KA I HEWA NONA IHO, AKA, INA UA HEWA KA HAKUHANA I KONA KANAKAHANA ALAILA O KE KANAKAHANA KE HAALELE I KONA HAKUHANA, A AOLE O KA HAKUHANA KE KIPAKU I KE KANAKAHANA, a ua hooia mai ke leka a Kahai Keohokalohe i kona kipakuia, a e like me ka oiaio i hoikeia ae la maluna pela e loaa ai ka manaoio i ke kanaka noonoo pono no kona hewa kona kumu i kipakuia ia ke kumu o kona haalele ana i kahi o Elele Kuhio a loaa ai keia mau popilikia. O ke kanakahana ua hewa a o ke ano o ka hewa aole i maopopo - o laua no ka i maopopo a makou e kauka'i ole ai o ka lohe aku.
Aole loa ke Kuokoa e kakoo i ka Elele Kuhio ma keia mahele ina na Kahai ka haalele me ke kipaku ole ia no ka mea aole no e nele ka loaa ia makou ka manaoio no ka hanaino o ka hakuhana ke kumu e haalele ai ke kanakahana, a ina pela ka hoike o ka leka a Kahai alaila he hana hoopilimeaai wala no ia o ka pili wale ana ma ka aoao o ka mea i maopopo ua hewa. Aka aole he haalele ka hoike o ka leka aka he kipaku a nolaila i loaa ai keia mau oiaio i hoikeia ae la ke kumu a makau i manaoio ai i ka hala ole o ke Alii i kona kanakahana e hailuku ma'uwale pili kalaiaina pilikino wale ia nei. E noonoo e ka hoakanaka i keia mau hooaiai.
[@@@]
KE KALAIAINA HOME RULA-DEMOKARATA MA MAUI.
MAUI, Sept. 17.-I ka Poaono i hala aku nei oia ka la 10 ma ka Haleholohau o Wailuku i malamaia ae ai ka halawai a ka Home Rula-Demokarata a iloko olaila i hooholoia ae ai a ikeia keia poe moho malalo iho nei:
No na moho Senatoa-Wm. White o Lahaina ame James L. Coke Wailuku. No na moho lunamakaainana - John Richardson ame C. L. Kookoo o Wailuku, D. H. Kahaulelio o Molokai, J. E. Kekipi o Pauwela, G. P. Kauimakaole o Hana ame Geo. Kauhi o Honokohau.
Ma ka heihei hoio moho o keia poe keonimana ame kekahi poe hoa e iho ua puka oi moowini loa o Mr. White o Lahaina ma ka balota hookahi a o J. L. Coke hoi ame Senatoa Kaiue ua kaulike laua aka ma ka haawi ana o Kalauokalani Home Rula i kona koho ma ke ano oia ka lunahoomalu ua lilo aku la ia James L. Coke ke eo oiai iaia o Kalauokalani i haawi ai i kona mana koho.
Ma ka heihei moho lunamakaainana hoi ua haalele loa ia o Mr. D. H. Aukai o Kula e kona hoa mokomoko Kekipi o Pauwela ma ka oi o elua a ekolu paha balota. I kela hoi o Molokai ma ka apua wale no ka puka ana o D. H. Kahaulelio ia Hon. W. F. Beckley a haule no hoi ka Hon. A i keia hoi o Hana ua haaleleia iho o Mr. Henry e Kauimakaole.
Ia Geo. Kauhi hoi ua haalele loa ia iho kona mau hoa mokomoko o ka heihei moho lunamakaainana. Kale Makekau ame D. K. Kahaulelio. O ko Lahaina poe keia, a o na hana apau o ka aha Home Rula-Demokarata na ka Peresidena Kalauokalani ka noho hoomalu ana.
Ua olelo ae na Repubalika i ka wiwi o ka papamoho i waeia i ka Poaono i hala a ua lono wale ia ae i ka hoohaiahala loa o na Demokarata no ua papamoho la. Ua lohe pu ia ae e hapai ae ana na Demokarata i halawai ponoi na lakou a wae i papamoho na lakou ponoi iho, a ma keia lono wale ana i puiwa ai ko Pauwela poe Demokarata.
MAI KONA KAIOPUA MAI.
Na Nupepa Kuokoa, Aloha kaua:- He wahi hunahuna mea hou ka'u e hoouna aku nei mai Kalai a Ehu aku o Konakaiopua i ka lai hoi. Eia mai ua wahi mea hou nei.
Ma ke one wali o Kaiakeakua a ma ka halekuai o Mr. Kaelemakule ua hookuene pono iho la ka poe haiolelo o ka aoao Home Rula oia hoi o Senatoa Kalauokalani, Jonah Kumalae ame kela hapahaole opunui ame Kahaulelio ame Poepoe i ke anaina e hoolai ana iloko o ka olu o ka lanai o ka hale kuai o ua Keiki nei o Kailua a oia ka wa o kekahi keonimana no Holualoa mai i hoolauna mai ai ia Kalauokalani e haiolelo a oia no ka wa a Kalauokalani i ku ae ai, a i mai la i ke anaina-"Aole au e hai aku ana aohe ae o Kaelemakule e haiolelo maanei.
Oia ka wa o kekahi mea i ku ae ai a olelo aku la e aho e hele i ka haleukana e haiolelo ai, o ke ku ae la no ia apau ana i ka hele. Ina no paha e kipaku mai ka haole aohe mea bilahila mai a koe. O ka wahahee no paha - aohe no i ninau mua i ka poe no lakou ka hale, he mahaoi mai hoi kau a koe aku. Iaia nei ke kena e ku e haiolelo iaia no ka wikiwiki e hele i ka haleukana e haiolelo ai. I ka hiki ana i kahi i hoikeia ae la ola ka wa o Kalauokalani i haiolelo mai ai; eia ka mea i ikeia ma kana haiolelo: Ina paha ua pau i ka amuia. Iluna wale iho la no o na Repubalika i noke ai; pela no hoi o Kumalae - he ohumu maoli no hoi kana e noke ana i kona hoopunipunila e na Repubalika a ua puni maoli no ka oia, kupaianaha keia keonimana o Kumalae! Pela no hoi ka haiolelo a keia hapahaole e noke ana no hoi i ka pomaikai o ka lahui ia Wilikoki i ka loaa ana o ka manakoho balota, nui na olelo ino a keia poe no na Repubalika.
Pela iho ia ka ke ano o keia hana, he hele aku ka e haiolelo hoinoino. Ke olelo mai la ka Buke Nui "Mai manao ino aku, o manao ino ia mai."
KA ROMA I MANAO AI.
HOOIA KE KAUKA O KA POPE I KA LAAU AMERIKA.
HOOHANA O KAUKA LAPPONI I KA LAAU DR. WILLIAMS' PINK PILLS ILOKO O KANA-LAWELAWE LAPAAU ANA.
O Kauka Lapponi, ke kauka noeau o Viticana, nona hoi ke kaulana i ku'i koke a.e nei ma ke ao holookoa mamuli o kona haawi pauaho ole ana i kona manawa ma ka malama ana i ka Mea Hemolele, ka Pope Leo XIII, make iho nei, ame kona manao aloha kiekie a hilinai piha hoi maluna o ka Pope e ku nei, ka Mea Hemolele Pius X, he kanaka oia i ka ike kiekie loa e hiki ke hilinai ia aku. He kanaka oia i hanauia mai me na ike akeakamai, he kanaka hoi nona iho no kona mau manao, i huipuia hoi me kona kulana ohaoha i na laau lapaau noeau a i hoohana hoi i ka Dr. Williams' Pink Pills for Pale People iloko o kaaa lawelawe iapaau ana me ka loaa o na haawina maikai ana hoi i huna ole iho ai a hoike mai hoi i kona manao e kakoo ana i keia laau me ka mana hoi i hiki ole i kekahi mea ke hoopaapaa aku.
KA KAUKA LIPPONI LETA.
"Ke hoike aku nei wau ua hoohana aku wau i ka laau Dr. Williams' Pink Pills for Pale People i ka'u mau ma'i eha, i loaa hoi i ka anaemia. Mahope o ka hala ana o kekahi mau pule pokole o ka hoohana ana, ua loaa mai la ka hopena e like hoi me ka'i i manao ai. No ia mea aole loa wau e hoopoina ana ma keia mua aku no ka hoomahuahua ana aku i ka laha ana o keia laau aole wale ma na ma'i anaemia, kolera ame na ma'i like aka ma na ano no apau."
(Kakauinoaia) GIUSEPPE LAPPONI,
Via dei Gracchi 332, Rome.
O ka ma'i anaemia mama a Kauka Lapponi i hoike ae nei, oia no kela ulu hoomimi naluea nana e hoemi ana i na kaikamahine opiopio e nee aku ana ko lakou mau la i ka wahine opio, he haawina hoi i kau mau maluna o lakou oiai e nee aku ana ma ke kulana wahine opio. O ka manao o keia kauka no ka pomaikai e loaa ana mai ka laau Huaale Akala a Kauka Williams no ka Poe Haikea oia kekahi manao ikaika loa i loaa mai kekahi mai o na kanaka akeakamai kaulana, a ke kakoo pu nei hoi ia i na hoike lehulehu i hoikeia aku mamua e pili ana no ka anaemia ame na ma'i e ae o ke koko ame na aakoko nawaliwali, ka lolokaa, lolo ame na ma'i lehulehu @ pau i ka hoolaia e keia mau huaa@e. Ke waihoia aku nei lakou imua o ka lehulehu me na hoike lehulehu e pili ana no ka lakou hana hooulu a hoola i ke koko ame na aakoko nawaliwali. Maluna o keia mau mea apau he mea pono e apoia mai lakou e ka lehulehu o ke ao holookoa.
Iloko o na haiolelo apau a keia poe hookahi no kaona o ka lakou olelo o na Repubalika wale no - ke olelo nei o Solomona "ma ka pono e @ nohoalii ai na alii. O ka pono ka mea nana e hookiekie i ka lahuikanaka."
No kahi Kahaulelio hoi he like no oia me Kumalae ka hailuku i na Repubalika, aka no Poepoe maikai no kana haiolelo aka maloko aku he hihiu paha.
O keia iho la ka'u mau mea i ike i ka lakou nei hana e hele kaapuni nei e kuhi ana wau he mau haiolelo kaulike la aole ka. Ka i no paha e mana la hoi ka lokahi, aole ka.
Keia iho la ka'u wahi meahou o ke Kai Malino a Ehu.
A. K. KAPA.
Kohanaiki, Kona, Hawaii.
KA HIKI ANA E HOOKAAWALE I KA PILIKIA A KE ANU.- Ua ike no na poe apau i ka pilikia e loaa mai ana mamuli o ka loaa ana i ke anu koikoi loa, a he mea hoi keia e koi ana ia lakou e noho iloko o ka hale a hiki i ka hala ana o ka pilikia. He nui a lehulehu hoi, na poe i makemake ole e haule ko lakou mau manawa a e hauoli ana no hoi lakou ke lohe aku i ka pilikia koikoi e loaa ana ma o ka loaa ana i ke anu i hiki hoi ke oaloia ae ma ka loaa koke ana i ka laau Chamberlain's Cough Remedy. Aole o ke ola wale no kana e haawi ana aka he ola hikiwawe a kaupale aku hoi i ka loaa ana i ka numonia. Ke kuaiia nei ma na halekuai apau. BENSON, SMITH & CO., LTD., na agena ma Hawaii nei.
HOOLAHA MA KE KAUOHA
HOOLAHA I NA MOHO NO KE KOHO ANA I KA AHAOLELO.
Ma keia ke haawiia aku nei ka hoolaha, oiai ke koiia nei ma ke kanawai o na moho no ke koho ana i ka ahaolelo, koe ko ka Mokupuni o Oahu, e waiho ae i ko lakou mau palapala i waeia ai i moho me ke Kakauolelo o ka Teritore aole e emi iho malalo o Kanakolu la mamua o ka la Koho Nui, nolaila he mea pono no o na palapala wae moho i oleloia e waiho ae ma keia keena aole e haule aku mahope o ka hora Elima o ka auwina la o ka Poakahi, Okatoba 10, 1904.
I hiki ai ke kupono no ke koho ana ma ke ano Senatoa o ua moho la i kane ia a makaainana o na Mokuaina Huiia, i hiki aku kona mau makahiki i ke kanakolu; i noho hoi ma ko Hawaii Paeaina aole i emi iho malalo o ekolu makahiki a i kupono hoi no ke koho ana i na Senatoa iloko o ka Apana ona i kohoia ai.
I hiki ai ke kupono no ke koho ana ma ke ano he hoa o ka Hale o na Lunamakaainana o ua mea la i ka manawa no i kohoia ai, e loaa iaia na makahiki he iwakalua-kumamalima; i kane hoi a kupa o na Mokuaina Huiia; i noho hoi ma ko Hawaii Paeaina aole i emi iho malalo o ekolu makahiki; a i kupono hoi e koho no na lunamakaainana ma ka Apana ona i kohoia mai ai.
O na palapala waemoho apau e hoouna pu ia mai me na dala hoopaa he iwakalua-kumamalima, a e kakauinoaia hoi e na poe kupono i ke koho aole e emi iho malalo o iwakalua-kumamalima mai ka Apana nona ua koho la e malamaia aku ana.
A. L. C. ATKINSON.
Kakauolelo o Hawaii Teritore,
Hale Aupuni, Honolulu, Sepatemaba 15, 1904.
3034 - Sept. 23, 30-Oct. 7.
HOOLAHA MA KE KAUOHA
OLELO HOOLAHA. HOOPAU HUI HOOHUHA.
HYMAN BROTHERS. (NA HOAHANAU HYMAN.)
Ma keia ke haawiia aku nei ka hoolaha o ka hui i ku a i oia ai mawaena o ka poe no lakou na inoa mala@ iho nei malalo o ka inoa hui o Hyman Brothers (Na Hoahanau Hymana, e lawelawe oihana kalepa ana iloko o Honolulu, T. H., ma keia ua hoopauia.
O na kuleana loaa no na ko'iko'i apau ua pau pono mai lakou a e hookuai aku no e ka mea nona ka inoa mala@ iho nei Isidor Rubinstein ka mea noi i haawiia aku ai ke kuleana pina @ ka ohi ana i na helu-waiwai ame @ bila i kuleanaia e ka hui i oleloia.
Honolulu, Iulai 1. 1904.
H. W. HYMAN, MICHAEL HYMAN, MORRIS HYMAN, JOSEPH HYMAN, ISADOR RUBINSTEIN.
E hoomau aku ana no o I. Rubinstein ma ka lawelawe oihana kalepa ana @ like me mamua ma Alanui Moiwahine helu 58 malalo o keia ano o I. Rubinstein & Co., a he olioli nui hoi kona i ka hui aku me na hoaloha ame na makamaka kuai ke kipa mai i ona ia.
I. RUBINSTEIN.
3033-Sept. 16, 23.
HOOLAHA HOOPAU HUI I HOOHUIIA.
I ka poe apau e ike mai ana i keia :
O ka hui i ku ai a i ola ai mawaena o E. COIT HOBRON, JOHN M. SASS ame ARCHIBALD YOUNG, na hoa hua e lawelawe oihana kalepa ana iloko o Honolulu malalo o ka inoa hui ame ke ano o ka THE HAWAIIAN ROCK COMPANY, i keia la ua hoopauia mamuli o ka ae lokahi like ana.
Honolulu, Sepatemaba 13, 1904.
E. COIT HOBRON,
JOHN M. SASS,
ARCHIBALD YOUNG.
3033 - Sept. 16, 23, 30.
KULA HANAI KAIKAMAHINE O MAUNAOLU.
PAIA, MAUI. -E hoomaka ana kona kau kula e nee mai nei ma ka la 14 o Sepatemaba. Ua lawa na lumi i koe no umi-kumamalima mau haumana kaikamahine. O na makua e makemake ana e hoouna mai i ka lakou mau keiki i keia kula he mea pono ia lakou e kakau koke mai i ke kumupoo.
MISS C. M. SNOW.
3033 - Sept. 16, 23.
HOOLAHA MANA HOOKOLOKOLO
ILOKO O KA AHA KAAPUNI O KA APANA KAAPUNI ELUA, TERITORE O HAWAII MA KE KEENA HOOPONOPONO WAIWAI. ILOKO O KA HANA O KA WAIWAI O WILLIAM KEAMO, MEA I MAKE, O KEONEOIO, HONUAULA, MAUI, IMUA O KA, LUNAKANAWAI A. N. KEPOIKAI.
Kauoha o ka Hoolaha no ka Hoolohe ana i ke Noi no ka Aponoia o na Hoike Helu Waiwai Hope loa, ame Hookuu ana iloko o keia waiwai.
Ma ka heluheluia ana ame ka waihoia ana mai o ke Noi ame ka Hoike Helu Waiwai o J. D. Keamo, Lunahooponopono Waiwai o ka Waiwai i hoikeia ae nei maluna, iloko olaila i noi ai oia e aeia aku i $256.19 a auhau no oia iaia iho me ka huina o $197.44, ame kana noi e nana pono ia mai ka hoike ame ke aponoia mai, a e hoopukaia mai i kauoha hope loa no ka mahelehele ana i ka waiwai i koe iho iloko o kona mau lima i ka poe apau i kuleana iloko olaila ame ka hookuu mai iaia ame kona mau hope hoopaa mai na ko'iko'i aku apau ma ke ano lunahooponopono.
Ua kauoha pu ia no hoi o ka Poalua, ka la 25 o Okatoba, A. D. 1904, ma ka hora 10 a. m. imua o ka Lunakanawai o ka Aha i oleloia ma ke Keena Hookolokolo o ua Aha Hookolokolo la i oleloia ma Wailuku, Mokupuni o Maui, oia kahi ame ka manawa i hooholoia no ka hoolohe ana i ke Noi i oleloia ame ka Hoike Helu Waiwai, a o ka poe apau i kuleana iloko olaila e hele ae ma ia wahi a i ka manawa i hoikeia a hoike aku i ke kumu, ina he mau kumu kekahi a lakou, no keaha la e ae ole ia ai ia mea ame ka waiho pu ae i mau hoike no ka poe apau i kuleana iloko o ka waiwai i oleloia.
Hanaia ma Wailuku, i keia la 10 o Sepatemaba, 1904.
EDMUND H. HART.
Kakauolelo o ka Aha Kaapuni o ka Apana Kaapuni Elua.
3033 - Sept. 16, 23, 30- Oct.7.
HOOLAHA HOOKO MORAKI.
HOOLAHA MANAO PANIKU A KUAI A KA MEA PAA MORAKI. KAMALO SUGAR CO., LTD.
Ke haawiia aku nei ka hoolaha, i kulike ai me ka mana o ke kuai i hoikeia iloko o kekahi moraki i hanaia i Augate 26. A. D. 1903, i hanaia mawaena o Kamalo Sugar Co. Ltd., he hui, ma ke ano he mea moraki, ame A. Mouritz, M.D., ma ke ano he mea paa moraki a o ua moraki la i oleloia ua kakaukopeia iloko o ke Keena Hoona Aina, o Honolulu, Oahu, Teritore o Hawaii, iloko o ka buke 251, ma na aoao 170, 171 ame 172.
O ka mea paa moraki, A. Mouritz, M.D., ke manao nei e paniku i ua moraki la i oleloia no ke kumu i uha'iia, oia hoi o ka uku ole ia ana o ke kumupaa ame ka uku-panee i ka manawa e uku ai.
Ke haawi pu ia aku nei no hoi ka hoolaha o ka waiwai i hoopaaia iloko o ua moraki la i oleloia e kaulia aku ana ma ke kudala akea mamua iho o ke alo o ka Hale Hookolokolo o Lahaina, Maui, ma ka Poaha, ka la 6 o Okatoba, A. D. 1904, ma ka hora 12 awakea. O ka waiwai i hoopaaia iloko o ua moraki la he 100 poo bibi, 12 hoki Kaleponi (i hoolakaia), 15 lio kauia.
A. MOURITZ, M.D.,
Mea Paa Moraki.
Ma ke dala kuike ka makemake a ma ke dala gula Amerika no hoi. O ka hoohuli ana, ke kuni ana ame ka lawe ana ma ka aoao o ka mea kuai mai ia mau lilo.
Hanaia ma Pukoo, Molokai, T. H.,
Sept. 6, 1904.
3033 - Sept. 16, 23, 30.
HOOLAHA KUMAU
Kakela me Kuke
[KAUPALENAIA]
Poe Kalepa ma ke Komisina
: : A HE : :
POE LAWELAWE KOPAA
Poe Agena no na Ma hiko Lehulehu.
Hui Alahao ame Aina o Oahu
MANAWA HOLO
Mei 1, 1903.
MAI HONOLULU AKU
No Waianae, Waialua. Kahuku ame na wahi hoolulu ma ke alahao- *9:15 a.m., *3:30 p.m.
No Pearl City, Ewa Mill, ame na wahi hoolulu ma ke alahao- +7:30 a.m., *9:15 a.m., *11:05 a.m, *8:15 p.m., *3:20 p.m., +4:15 p.m., *5:15 p.m., @9:30 p.m., +11:15 p.m.
MAI WAHO MAI.
Ku i Honolulu mai Kahuku, Waialua, ame Waianae mai *8:38 a.m., *5:31 pm.
Ku i Honolulu mai Ewa Mill ame Pearl City mai -+6:50 a.m., +7:46 a.m., *8:36 a.m., *10:38 a.m., *2:06 p.m., *4:31 p.m., *5:31 p.m., *7:40 p.m.
*@5:31 p.m., *7:40 p.m.
*Kela ame keia la.
@Sabati wale no.
+Koe ke Sabati.
G. P. DENISON, Lunahoohana.
F. C. SMITH, G. P.& T. A.
Na Papale I-e Nunui.
O na Lede ame na Keonimana o ke@ ano hou e loaa ao ma kaki o
FUKURODA
Helu 28-32 . . . Alanui Hotele
HALAWAI HUI HOOLEWA HONOLULU@
E noho ana ke ha@ ka Hui Lala Hoolewa H@ Harrison ma Progress H@ kihi Ewa alanui Papu @ Honolulu, i Sept. 30, 1904. @ m. E akoakoa mai na lala@ na ukukomo me na au@ pu mai i na pepa hookaa @ kauinoaia e ke kakauoi@ iloko. Ma ke kauoha o ka P@
J. H. TOWNSEN@
3034 - 2 ts. K@
UA UKU AKU KA
Fidelity Funding Co.
Iloko o na makahiki elua i hela a@ nei i ka poe i hoahu i ka lakou @ he $380,000.
Na ka FIRST NATIONAL BANK O HAWAII e ku nei ma Honolulu, T.H.
e hooiaio mai i keia mea.
$1.00 o ka pule no 100 pule @ he $150.00
O na papa hoike ame ka @ ka poe e uku pule ia nei ame @ e loaa no ma ke Keena o
R. D. HIGHTOWER.
Agena ma Hawaii. @
41 ame 52 Young @
He Huaale Maikai
Aole he like o na
"HUAALE A AYERS."
me na huaale e ae no ka @ he maa huaale kokua keia i ka nana a @ naau, a he laau hoomaha maikai ka hoi. Ina he paa kou hana @ o no
"HUAALE A AYERS."
ka laau e hemo maikai ai a e hemo maikai mau ana hoi mahope aka oia manawa.
Aole loa he hiki i kekahi kanaka @ Olelo ae he maikai kona ola kino ina aole he hemo o kona hanalepe he hookahi manawa o ka ia, a oi a@ paha. Ina i maopopo keia kanawai o ke ola i na kanaka apau, aole loa, e like ka nui o ka poe ma'i me ke mea e ike ia nei i keia mau ia@.
Ua hana ia owaho me ke kopaa he maikai loa ka lawe ana.
Aohe mau Huaale i oi ae ka maikai mamua o na
"HUAALE A AYERS."
Hoomakaukau ia e Kauka J. C. Ayer & Company, Lowell, Mass., U. S. A.
E loaa no keia mau Huaale ma ka Hale Kuai Laau o Hollister, alanui Papu.
Ua hoopa'iia o Elama no ka aihue ana i ka lole o ke Kepani, a e noho hana ana ma ka hana oolea no hookahi makahiki ma ke Kakela o Kawa.