Ka Nupepa Kuokoa, Volume XLII, Number 33, 12 ʻAukake 1904 — Page 2
| This text was transcribed by: | Inger Hojfeldt |
| This work is dedicated to: | Daughters of Hawaii |
Ka Nupepa Kuokoa
KE KILOHANA POOKELA NO KA LAHUI HAWAII.
2 NUPEPA KUOKOA, POALIMA, AUGATE 12, 1904.
KA
Nupepa Kuokoa
NO KA MAKAHIKI - - - - $2.00
NO EONO MAHINA - - - - 1.00
SUBSCRIPTION RATES
ONE YEAR - - - - - - - - $2.00
SIX MONTHS - - - - - - - 1.00
O NA OLELO HOOLAHA APAU E HOOUNAIA MAI ANA NO KA HOOLAMA MALOKO O KEIA NUPEPA, E HOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUMAU OLELO HOOLAHA KE UI MAI I KE KEENA NEI.
O na Dala apau o ka Pepa e hoouna pololei
mai i ka HAWAIIAN GAZETTE
COMPANY, LTD.
HOOPUKAIA E KA
Hawaiian Gazette Co., Ltd.
Hookomoia ma ka Hale Leka o Honolulu,
Panalaau o Hawaii, ma ke ano
Mea o ka Papa Elua.
DAVID L. A-1, Lunahooponopono
S.K. NAWAA, Kokua Lunahooponopono
A.W. PEARSON, Lunanui
HONOLULU, OAHU.
POALIMA, AUGATE 12, 1904
NA KA HOOKAE ILI MAI KE KAUWAKUAPAA.
O na mea a Kaniahiku i hooaiai ai ma ka pule i hala ame ko keia helu o ke Kuokoa he oiaio ia mau mea o ka hookaeia o na Paele o Amerika Huipuia a hiki wale no i keia manawa, a e koe anoano nei no ka nanauki o ka noonoo o kekahi poe o ka Hema pili i ka hookaulikeia o na paele me na haole e like me ka manaoio o ko ka Akau poe.
A i hooiaio no keia hookae ili e nee nei no i keia manawa iloko o Amerika Huipuia maloko o na palena o ka Hema oia no ka mea hou hoolele hauli i hoopukaia ma ke Kuokoa nei iloko o kekahi o kona mau helu i hala pili i ke kipakuia ana o ke Keikialii Kalanianaole ame ka Wahinealii Kalanianaole mai ka Halekeaka aku mamuli o ka manaoia he mau paele laua, a mihi mai ai i ka manawa i loaa ai na hoomaopopo ana he elele lahui ka ka mea i kipakuia no ka Ahaolelo Lunamakaainana o Amerika Huipuia mai Hawaii aku nei.
O keia iho la kekahi haawina maopopo loa e hoike ana i ka mau o keia hookae ili iwaena o na Amerika o ka Hema no ka mea ua hanaia keia kipaku mamuli o ka hookae ili eleele maloko o na palena o ka Hema iloko o kekahi o na mokuaina pili hikina.
A o keia mahele hookae ili mailoko mai olaila i puka mai ai ka aoao Demokarata, a he mea hiki no ia ke hoomaopopo ae i ka oiaio o ia mea no ka mea, oiai, ka poe o ka Akau i lawe ae ai i ko lakou kulana kalaiaina no ke kahua pililaula, oia hoi, ua like na kanaka apau me ka nana ole i ka ili ame kahi i hanau ai koe wale no kona ano ame kona makaukau, a kapa ia lakou iho he poe Repubalika ua nui loa ke kunahihi o ka noonoo o ua poe hookae ili nei no ke kamahao loa o ka pulamaia o na ili eleele iloko o ka auna hookahi me na haole, ma ka olelo ana ua like no alike, ke kumu hoi i puiwa nui ai i ka hookipaia ana o Mr. Booker T. Wahinekona he paele i ka papaaina o Peresidena Rusewela ma ka Hale Keokeo.
He aoao ka aoao Demokarata no ka poe hookae ili eleele, a na lakou no i kukulu ia aoao a na lakou noonoo hookae ili eleele i alako ia aoao a lilo maoli i aoao hookae ili, a makou e manao pu nei o ka poe i kapa iho ia lakou he Repubalika oiai nae ka hookae ili eleele e noho kukonukonu ana iloko o ko lakou puuwai a e noho nei i ka Akau a i Hawaii nei aole lakou he poe Repubalika oiaio aka he Demokarata oiaio, no ka mea o ka manaoio o ka poe Repubalika oiaio ua like a-like na mea apau a oi loa aku hoi ka mamao o ka hookae ili mai ke kahua aku o ka aoao Repubalika.
E like no me ia i hoikeia e Kaniahiku, oia hoi mai kinohi mai no keia haawina-he oiaio ia mea no ka mea o ka poe o ka Hema ka i pulama nui ia mau hana hookauwakuapaa i na paele a ulu ikaika mai ka hookae ili e lawe ana i ka paele e like me na holoholona, ka hoohanaia a kaa mawaho o ka mea kupono, a kuaiia e like me ko na holoholona kahi e kaawale ai na makua mai na keiki aku a ke kane mai ka wahine aku a he nui aku na haawina walohia i hanaia maluna o na paele ia mau la i kinohi, aka mamuli o ka puuwai aloha o Peresidena Linekona o ka Akau ua molia aku oia ame kona poe o ka Akau i ko lakou ola e komo iloko o ke kaua i mea e ulaa pu ia ai keia ino nui, a i keia la he kanaka kuokoa ka paele like loa me ka haole-a na ka Repubalika i ano ka mea he Repubalika o Peresidena Aberehama Linekona ame kona poe i molia i ko lakou oia no ke kuokoa o ka paele mai ka nohona kauwakuapaa ana.
Ma keia mahele a ma na mahele no apau ua oi loa aku ke kulana o ka Repubalika mamua o ke Demokarata, eia nae pehea la i kaakaa ole ai ka maka o ka oiwi Hawaii mamua o ke poholo ana iloko o Demokarata. E noonoo iho e pono ai.
KA HUI KOKUA KUAI HOME.
Ma ka ike o Ka Hoaloha he hui maikai keia i kukuluia a ua kupono hoi i ka makemake o kanaka, nolaila ua kakoo aku oia no kona ano maikai, aole i kona ano maikai ole. A mamuli hoi o na hoolaha nupepa o keia mau la iho nei, ua hoea powehiwehi ae kekahi wahi ano maikai ole e like me ia i hoolahaia. Puiwa na lala, a ulu mai na manao ano kue i ka Hui, a hoao mai kekahi poe e kii i ko lakou mau kuleana. Ma ka noonoo ana, aole ia he hana naauao; o ka hana naauao oia no ka hooponopono hou ana a loaa kona kulana maikai ae, e makaikai a loaa na wahi ino, kiloi, a hookomo i ka mea maikai ae. No keia, ua ala mai ka manao iloko o kekahi poe kakaikahi o ka Hui i hui pu ia me ke kokua ana a ka Luna Hoohana, e hanaia i mau kanawai ame na Rula; nolaila ua hanaia, a ua hoolahaia e noho ka halawai no ka noonoo ana i ke kulana e palekana ai ka Hui me ke apono ana i ke Kumukanawai ame na Rula. O keia Kumukanawai, ua ninauia ka manao kanawai o Lylie a. Dickey, ina paha e palekana ana ka Hui malalo oia mau kanawai-ua haawi mai oia i kona apono no ia mea i hanaia. I ka wa i apono ia ai o keia Kumukanawai, aole no i nele na keakea mai kekahi poe lala mai, ua ikeia ia mau ano ma na po apau o ka noho ana o ka Ahahui. Aka o ka manao kumu o ka poe na lakou i hapai keia hooponopono, oia no ka loaa o kekahi kahua kupono i kukuluia maluna o ke kahua paa, no ka palekana o na lala o ka Hui. I ke aponoia ana o ke Kumukanawai ame na Rula, ua hooholoia e kahea i halawai no ke koho ana i na Luna Nui ame ka Papa Kahu Waiwai, aka, oiai eia no keia manao keehi, hoomaopopo ole no ka pono e hooholomua kau iloko o kekahi poe lala, a e hele mai ana no paha lakou me ia manao e hoohaunaele ae i ka pono o ka lehulehu, a lilo i mea holo ole; nolaila ua hooholokekahi poe kupono o ka Hui, no lakou ka nui he umi-kumamakahi ame ka hoihoi ana mai o ka Hui (Copartnership) i ko lakou kuleana a pau i keia Hui hou o umi-kumamakahi lala (Association) a e hoohuiia aku ana me ke Aupuni ma keia mau la iho, e koho no lakou i na Luna Nui ame ka Papa Kahu Waiwai me ke kali ole a noho mai ka halawai nui o ka Aha, nolaila ua noho keia poe a ua wae ia maiwaena mai o keia Hui hou (New Association) i keia poe keonimana malalo iho: Hon. J.A. Akina, Peresidena; S.K. Oili, Hope Peresidena; J.J. Mataio, Kakauolelo; M.W. Tsuchdi, Puuku. Papa Kahu Waiwai; S.N. Lukua, W. Kelle, W.K. Luther, L.K. Sheldon, M.V. Souza ame J.P. Kahawai; a ma ka halawai o keia Papa Kahu, ua wae lakou ia L.K. Kakani i Peresidena no lakou ame Mr. Lupua i Kakauolelo. O keia poe apau he umi-kumamakahi, o lakou no ka Papa Alakai, a e hana ana e like me ke alakai ana o na kanawai ame na rula. Na keia Papa Alakai i koho aku i Luna Hoohana nona, oia hoi o P.E.R. Strauch. O ka Puuku ame ka Luna Hoohana, e noho ana laua malalo o kekahi Bona he $1000 o ka mea hookahi me ka manao e hoopii hou ae i ka Bona i ka wa e mahuahua ai o na lala komo mai.
(O keia maluna ae kekahi manaopepa o ka Nupepa Kristiano a ka Papa Hawaii e hoopuka nei, oia hoi "Ka Hoaloha" o keia mahina o Augate he manao maopopo loa e kakoo ana i ka Hui Kokua Kuai Home a ke Kuokoa e kahaha nui loa nei i ke komo kakoo ana o keia pepa i kekahi o na hana i manoia he mea hoopoino i ka hoakanaka, eia nae, ua loaa mai ka olelo ia makou ua paaia kekahi mau kope o keia mahina aole e hoopuka mamuli o ka ikeia ana e ka lunahooponopono nui o ua manaopepa nei no kona maikai ole mahopoe iho nae o ka puka ana o kekahi mau kope iloko o ke kulanakauhale nei a ikeia i ke akea.
O ke kakoo ana o kekahi nupepa i kapa iaia iho he pepa Kristiano me ka nana ole ae o ka pepa hea la ia, i kekahi ino i hoomaopopoia he mea hoopoino i ka hoakanaka, he mea e poho ai ka hoakanaka, he mea kahua ole e hiki ole ai ke hilinaiia i ka pakele io o ka hoakanaka, ke manao nei ke Kuokoa aole kela he nupepa Kristiano, no ka mea o ka makou i manaoio ai he pepa ka nupepa Kristiano no ke kakoo wale ana no i na mea apau i ku i ka pono pau pu me na mea pili i ko ke Akua aupuni, a aole loa ia ano pepa e kakoo i na ano ino apau e lumaiia ai ke kanka a poino.
Aia he nui na mahele manao e loaa ana mailoko mai o keia manaopepa o "Ka Hoaloha" o Augate nei i hoopuka hapaia a maiwaena mai o lakou aia he mau mahele ka makou e hooaiai aku ai a na ka lehulehu no hoi ia e pulama mai i ka hapanui no ka noonoo pono ana.
Ma ka hoopuoho ana o na nupepa e ae i kaakaa ai na maka o kekahi poe lala a puiwa lakou ke kumu i noiiia ai a ike lakou aohe kahua nolaila i kukuluia iho la na rula ame na mea like a kohoia na luna nui ame ka papa kahu waiwai, a na keia hooponopono hou ana i hoike ae i ke akea aole ona kahua i ka wa o ka hoomaka ana, eia nae, ke kakooia nei ia hemahema nui, a ka lehulehu i hoomaopopo ai i ka maikai o ka hoopuohoia ana oiai na ka hoopuoho ana i hemo mai ai ka ino, a hoao hou ia ai ka hooponopono e like me ia e ku nei.
O ke kohoia ana o na lunanui o ka Ahahui e ka hapauuku a iloko o kekahi halawai i kukulu malu ia, a aole i kali a ka Aha nui i hooholoia ilaila ke koho lunanui no ka maka'u i na hoohaunaele ana, oia lawelawe malu ana ka mea nana e hoike ae i ke kaulike ole a na hana. Ua oi aku ka maikai e hanaia iloko o ka Aha i hooholoia ilaila na hana e hanaia ai, a oi aku ka maikai ole o ka lawe ana ia mau hana a hooholoia iloko o ka halawai mana ole.
O ka hookohu ana o ka Papa Alakai ia P.E.R. Strauch, ke kanaka i hele maoli aku imua o ka Aha Hookolokolo Federala a noi aku e banakarupaia mai oia, oia hoi ina e loaa iaia ia kuleana, alaila aole e hiki i ka poe i aieia ka lakou dala e ia, e koi aku ia Strauch oiai he mea aie kaa ole oia a he poho nui hoi ia ma ka aoao o ka poe koi aie, a o keia hookohu ana o ka Papa Alakai iaia i lunahoohana oia no ka mea nana i hoike ae ua hilinai lakou iaia a o ka hilinai ana no hoi ia i ka makemake banakarupa o keia lunahoohana o lakou i waiho ai imua o ka aha a o ka hilinai ana no hoi ia o ka Ahahui holookoa. He keu ke kupaianaha o ka hilinaiia o ke kanaka i makemake e banakarupaia oia e keia Papa Alakai, a e ka Ahahui a hoihoi iaia ma kahi o ka io o ka hana. A no ia mea no hoi makou i puiwa ai a kahaha nui ai i ka manao kakoo o "Ka Hoaloha.")
I ka Lunahooponopono o ke Kuokoa.
Aloha oe:-Ke hoike aku nei au i kuu makemake ole i na olelo e pai ana i ka Hui Kokua Kuai Home i puka hewa aku ma ka Hoaloha o Augate nei.
Aole na'u ka Lunahooponopono o ka Hoaloha i kakau a apono i kela hoopuka ana. I kuu ike mua ana ia mea i kakauia, ua pa'i mua ia a ua haaawiia aku ko Kaumakapili ame ko Kawaiahao mau pepa.
Ke hoike akea aku nei au, ke hoole nei ka Hoaloha ia mau olelo i puka hewa ma kona mau kolamu iho.
Na'u na,
O.H. GULICK,
Lunahooponopono o ka Hoaloha.
Honolulu, Aug. 9, 1904.
Opio Hawaii Naauao.
Ua loaa mai nei kekahi leta ia Lunakula Nui Atkinson mai ia William K. Makakoa, kekahi o na kumukula Aupuni o keia Teritori, a pookumu hoi o ke Kula Aupuni o Hilea, Kau, Hawaii, i kakauia mai Poughkeepsie, N.Y., e hoike mai ana, i ka malamaia ana o ka hoike o ke kula kiekie, Eastman College kahi hoi ana i holo aku nei no ka hoomahuahua ana i kona naauao, ua loaa iaia na pa-keneta he 91 ma kana mau haawina i hoikeia ai.
O keia loaa ana o na pa-keneta kiekie iaia ka mea nana i hoopuiwa aku i na haole o ia wahi, a ninau ae lakou ia Makakoa i kona wahi i hoonaauaoia ai i ka olelo Beritania. Ua hoike ae o Makaloa i kona hikilele ana i keia ninau ame ka ike ole o keia poe i na mea e pili ana no Hawaii ame kona mau kula hoonaauao.
O KA LOLI ANA O KA WAI E INU AI oia ka mea nana e hookipa mau nei i ka maʻi hi. Mamuli o keia o ka poe kaahele mau he-lawe mau lakou i omole laau Chamberlainʻs Colic, Cholera and Diarrhoea Remedy i hiki ai ke lapaau koke ia ke loaa i ka maʻi. O keia ka laau i loaa ole kona lua ma ka hoola ana i na maʻi o ka opu. He laau loaa ole no hoi keia ia oe e kaahele ana iluna o na kaaahi ame na mokuahi, a aole hoi he hoohewahewa ana o keia na wahi i kupono loa no keia laau. E kuai mua i omole mamua o kou kaahele ana. Ke kuai ia nei ma na halekuai lapaau apau. BENSON, SMITH & CO., LTD., na Agena ma Hawaii nei.
HOOLAHA MA KE KAUOHA.
HOOLAHA KAKAUINOA.
E noho ana ka Papa Kakauinoa o ka Mokupuni o Oahu ma na wahi i hoakakaia malalo iho nei, no ka nana pono ana i ka poe na lakou na noi no ke kakauinoaia o ko lakou poe inoa ma ke ano koho balota ma ke kau koho balota e hiki mai ana a e hooholo aponoia ko lakou kupono io no ke koho balota.
Ma Honolulu Hale manae iho o ka Haleleta, iloko o Honolulu mawaena o na hora ehiku ame umi a.m. a mawaena o na hora eha ame ehiku p.m. o na la apau koe ke Sabati, e hoomaka ana i ka la 7 o Sepatemaba, 1904, a hoomau mai ia la mai a hiki i ka la 17 o Sepatemaba, 1904, a pau pu me ia la.
POAKAHI, SEPATEMABA 19, 1904:
Ma Puuloa i kahi Hoolulu Kaaahi-hora 7:45 a 9:30 a.m.
Ma Aiea i kahi Hoolulu Kaaahi-hora 9:40 a 11:25 a.m.
Ma ka Hale Hookolokolo o Manana-hora 4 a 7 p.m.
POALUA, SEPATEMABA 20, 1904:
Ma Waipahu Halewili-hora 8:15 a 11:30 a.m.
Ewa Halewili-hora 1 a 3:30 p.m.
Waianae Hale Hookolokolo-hora 5 a 7 p.m.
POAKOLU, SEPATEMABA 21, 1904:
Wahi Hoolulu Kaaahi o Makua-hora 10 a 11 a.m.
Waialua Hale Hookolokolo-hora 1 a 3 p.m., mai ka hora 5 a 8 p.m.
POAHA, SEPATEMABA 22, 1904:
Kahuku Halewili-hora 1 a 3 p.m.
Laie Hale (Hall)-hora 5 a 8 p.m.
POALIMA, SEPATEMABA 23, 1904:
Ma Hauula Hale Hookolokolo-hora 8 a 9 a.m.
Waikane Luakini-hora 12 awakea a 1 p.m.
Kaneohe Hale Hookolokolo-hora 6 a 10 p.m.
POAONO, SEPATEMABA 24, 1904:
Kailua (Sam Bo)-hora 9 a 10 a.m.
Ma ke keena o ka Halewili o Waimanalo-hora 11 a.m. a 12 awakea.
E huli hoi mai no ka Papa Kaukauinoa o ka poe koho balota i Honolulu i ka Poakahi, Sepatemaba 26, 1904, no ka hoopaa inoa mawaena o na hora 7 ame 10 a.m. a mawaena o na hora 4 ame 7 p.m.
WILLIAM T. RAWLINS,
Lunahoomalu o ka Papa Kakauinoa Koho Balota.
Honolulu, Augate 8, 1904.
3028-Aug. 12, 19, 26; Sept. 2, 9.
HOOLAHA I KA POE KOHO BALOTA O KAUAI AME NIIHAU.
O ka Papa Kakauinoa o ka Poe Koho Balota no Kauai ame Niihau e noho ana mai ka hora 8 a.m. a hiki i ka hora 3 p.m. ma keia mau wahi i hoakakaia malalo iho nei:
Waioli Hale Hookolokolo, Hanalei, Sepatemaba 12 ame 13.
Halekuai o Kilauea Sugar Co., Kilauea, Sepatemaba 14 ame 15.
Halekuai o Makee Sugar Co., Kealia, Sepatemaba 16 ame 17.
Kapaa Hale Hookolokolo, Kapaa, Sepatemaba 19 ame 20.
Hanamaulu Halekuai, Hanamaulu, Sepatemaba 21 ame 22.
Keena o W.H. Rice, Lihue, Sepatemaba 23, 24 ame Okatoba 8.
Keena o Koloa Sugar Co., Koloa, Sepatemaba 26 ame 27.
Halekuai o J.I. Silva, Eleele, Sepatemaba 28 ame 29.
Social Hall (Hale Hoohauoli), Makaweli, Sepatemaba 30 ame Okatoba 1.
Waimea Hale Hookolokolo, Waimea, Okatoba 3 ame 4.
Keena o Kekaha Sugar Co., Kekaha, Okatoba 5 ame 6.
Niihau, Okatoba 7. O keia la aole no i maopopo loa kona hookoia a malia o hoololiia.
W.G. SMITH, Lunahoomalu.
A.H. RICE.
W.J. SHELDON.
Papa Kakauinoa o ka Poe Koho Balota no Kauai ame Niihau.
3028-Aug. 12, 19, 26; Sept. 1, 8.
KULA HANAI KAIKAMAHINE O MAUNAOLU.
PAIA, MAUI.-E hoomaka ana kona kau kula e nee mai nei ma ka la 14 o Sepatemaba. Ua lawa na lumi i koe no umi-kumamalima mau haumana kaikamahine. O na makua e makemake ana e hoouna mai i ka lakou mau keiki i keia kula he mea pono ia lakou e kakau koke mai i ke kumupoo.
MISS C.M. SNOW,
3027-Aug. 5, 12, 19, 26-Sept. 2, 9.
HOOLAHA MA KE KAUOHA
HOOLAHA AINA AUPUNI.
Ma ka Poaono, Sepatemaba 3, 1904, ma ka hora 12 awakea a ma ke alo iho o ka Hale Hookolokolo, Honolulu, e kuaiia aku ai ma ke kudala akea he elua Apana Aina Aupuni o ka aina hanai holoholona e waiho la i Hanalei Kauai, e like me ia malalo iho nei.
Apana 1, nona ka iliaina o 987.25 eka, oi iki a emi mai; kumukuai haahaa $9,000.00.
Apana 2, nona ka iliaina o 894.75 eka, oi iki a emi mai, kumukuai haahaa $4,000.00.
Ma ke dala kuike ka makemake a ma ke dala gula Amerika no hoi.
No na kii palapala-aina ame na mea e ae pili ilaila, e ninau ae i ke Keena o na Aina Aupuni, Hale Hookolokolo, Honolulu.
JAS. W. PRATT,
Komikina o na Aina Aupuni.
Honolulu, H.T., Augate 1, 1904.
3027-Aug. 5, 19-Sept. 2.
HOIKE A KA FIRST AMERICAN SAVINGS AND TRUST COMPANY OF HAWAII. LTD.
Territori o Hawaii )
Kulanakauhale o Honolulu )
Mokupuni o Oahu )SS
Ma o ka hoohikiia ana o Cecil Brown ame W.G. Cooper, ua hoike pakahi ae laua ma ka palapala a olelo ae he mau lunanui laua, o Cecil Brown, ka Peresidena, a o W.G. Cooper ka Mea Malama Dala no ka First American Savings and Trust Company of Hawaii, Ltd., a o ka papa huahelu malalo iho nei he hoike piha pono ia, he oiaio, pono a pololei no na hana o ua hui la i oleloia ka First American Savings and Trust Company of Hawaii, Ltd., i oleloia a hiki i ka la 30 o Iune, 1904, a pau pu me ia la.
O ke kumupaa o ka hui he $250,000 i maheleia iloko o 250,000 mahele o $100,00 waiwai io o ka mahele hookahi. O ka heluna o na mahele i hoopukaia 250,000 a ua uku piha ia na mahele.
Na Loaa no na aie o ka Hui ma ka la 1 o Iulai oia keia malalo iho:
Kumupaa $250,000.00
Na Dala i hookomoia 351,718.60
Puka ame Poho 918.86
Na Loaa Waiwai e ae o ka Hui ma ka la 1 o Iulai, 1904, oia keia malalo iho:
Na Bila loaa mai $348,410.00
Na Bona ame na
Mahele Huikau 96,880.00
Dala Kuike ma ka
Banako 135,426.07
Mahele Ukupanee 4,609.39
Waiwai Paa 17,275.00
Na Palapala Hoopaa
Waiwai e ae 37.00
$602,637.46 $602,637.46
(Kakauinoaia) CECIL BROWN,
Peresidena.
(Kakauinoa ia) W.G. COOPER,
Mea Malama Dala.
Hooia a hoohikiia imua o'u i keia la 25 o Iulai, 1904.
W.P. ROTH,
Notari no ka Lehulehu, Apana Hookolokolo Kaapuni Ekahi.
Ma keia ke hooia nei wau o ka hoike maluna ae, he kope oiaio a pololei ia o ka hoike maoli a papa huahelu o ka The First American Savings and Trust Company of Hawaii, Ltd., i hoohikiia imua o'u i keia la 25 o Iulai, 1904.
Hoiikeia e kuu pulima ame ka sila i keia la 25 o Iulai, 1904.
W.P. ROTH.
Notari no ka lehulehu, Apana Hookolokolo Kaapuni Ekahi.
3036-Iulai 29-Aug. 5, 12.
HOOLAHA HOOKAPU.
Ma keia ke haawiia aku nei ka hoolaha ua hookohu aku wau ia Kinekake i lunanana no ke kuleana lawai'a o Hamohamo, Waikiki. O na palena o ke kuleana lawai'a i oleloia e hoomaka ana ma ka po'ina-nalu maluna o ka p-ala eleele i ikeia o Paliiki, kokoke i kahi noho o Cunha a malaila aku holo iwaho i ke kai i ke kuanalu a holo ma ke kuanalu ma ke komohana a hiki i ka ma-ka kupono ma kekahi aoao o ke kikowaena o ke kahawai i ikeia o Apuakehau ma ka po'ina-nalu a malaila aku holo hikina ma ka po'ina-nalu a hiki i kahi i hoomaka ai.
Ke papaia aku nei na kanaka apau loa i ka hele ana maluna olaila a lawe i na i'a mai ia kai lawai'a aku me ka loaa ole o ka ae mai ia Kinekake aku o oleloia malalo o ka hoopa'i o ke kanawai.
LILIUOKALANI,
Ma o kona loio ponoi, J.O. CARTER.
Honolulu, T.H., Iulai 27, 1904.
3026-Iulai 29; Aug. 5, 12, 19, 26.
HOOLAHA HOOKAPU.
Ma keia ke haawiia aku nei ka hoolaha ua hookohu aku wau ia Johh Kiaaina, i lunanana no kuu aina Kahala ame ka pono lawai'a o ua aina la i oleloia. O na palena o ke kuleana lawai'a e hoomaka ana ma ka palenaaina o Waiale ma kahakai e holo ana iwaho i ke kai a hiki i kuanalu a mailaila aku ma ke kuanalu holo komohana a hiki i ke "puhi" a malaila aku holo hikina ma ka pa-ala a hiki i ke aeone a malaila aku holo ma ka po'ina nalu a hiki i kahi i hoomaka ai.
Ke papaia aku nei na kanaka apau loa i ka hele ana maluna o ka aina i oleloia a lawai'a iloko o ke kuleana kai lawai'a i oleloia me ka loaa ole o ka ae mai ia John Kiaaina i oleloia malalo o ka hoopa'i o ke kanawai.
LILIUOKALANI,
Ma o kona loio ponoi.
J.O. CARTER.
Honolulu. T.H., Iulai 27, 1904.
3026-Iulai 29; Aug. 5, 12, 19, 26.
HOOLAHA HOPE.
Ua hoonoho aku au i Hope Oiaio a ku i ke Kanawai ia Yuen Chong o Pahala, Kau, Hawaii, e lawelawe ma ko'u inoa ponoi, i ka oihana kalepa ame na oihana e ae e pili ana ia'u iloko o ka Teritore o Hawaii, U.S.A. E hoomaka ana mai keia la 25 o Iulai, 1904.
L. CHONG.
Pahala, Kau, Iulai 25, 1904.
3027.
HOOLAHA MA KE KAUOHA
OLELO HOOLAHA.
Ma keia ke haawiia aku nei ka hoolaha, oia hoi mai keia la aku ke papa loa nei wau i ke komohewa o kekahi kanaka a ilio a komo paha maluna o na aina i ikeia ua kuleanaia e a'u mai Huehue a hiki i Kaumalumalu, Kona Akau, koe wale no a loaa aku ka ae mai ia'u aku.
Iulai 18, 1904.
J.A. MAGUIRE,
3026-Iulai 29-Aug. 5, 12.
HOOLAHA HOOKO MORAKI.
HOOLAHA MANAO PANIKU A KUAI A KA MEA PAA MORAKI.
KAUHOLA (K.)
I kulike ai me ka olelo o kekahi palapala moraki i hanaia ma ka la 9 o September, A.D. 1898, mawaena o Kauhola (k.) o Makua, Waianae, Oahu, ame C.B. Maile o Honolulu, Oahu, i oleloia, a i kopeia ma ka Keena Kakau Kope o ke Aupuni, Buke 180, aoao 477 ame 478, a i hooliloia mai ia moraki ia Douglas Kaona ma kekahi Palapala Hoolilo i hanaia ma ka la 2 o July, A.D. 1904, a i kopeia ma ka Buke Aupuni o ke Keena Kakau Kope i oleloia a no ka hookaa ole ia o ke kumupaa ame ka ukupanee; nolaila ke manao nei ka mea malama moraki i oleloia o ka mea paa moraki i oleloia, e pani, a ke hoolaha aku nei no ke kuai ana ma ke kudala ma ka Hale Kudala o J.F. Morgan, ma Alanui Kaahumanu, Honolulu, Helu 847, ke hiki aku ma ka la 6 o Augate, A.D. 1904, a o ka waiwai i oleloia ma ia moraki, penei no ia:
He apana aina ma Makua, Waianae, Mokupuni Oahu, nona ka Palapala Sila Nui Helu 3634, Kuleana Helu 9054 i hookoia no Kawaa no Manua, nona ka nui he 9 eka oi aku a emi mai a i loaa mai iaia ma ka Palapala Kuai a D.K. Mahu ma ka la 4 o September, A.D. 1878, a i kopeia ma ka Buke Aupuni 93, aoao 155, ame 156, a ke hoike pu ia aku nei o na lilo no ka hana ana i na palapala, na ka mea e kuai mai. Kuike ke dala ma ke dala gula o Amerika.
No na mea i koe, e ninau ia
DOUGLAS KAONA,
Mea Malama Moraki o ka Mea Paa Moraki.
Ma o kona loio la, J.P. Ball, Alanui Moi, Helu 3, Waity Building.
3024-July 15, 22, 29 Aug. 5.
O ke kuai o ka moraki maluna ae ua hoopaneeia a ka Poaono, Augate 20, ma kahi ame ka manawa i hoikeia maluna ae.
JAMES F. MORGAN,
3029-Aug. 12, 19 Lunakudala.
HOOLAHA MANAO PANIKU A KUAI A KA MEA PAA MORAKI.
LAWRENCE H. DEE.
Ma keia ke haawiia aku nei ka hoolaha mamuli o ka mana o ke kuai i hanaia iloko o kekahi moraki i hanaia i ka la 7 o Feberuari, A.D. 1903, e Lawrence H. Dee, o Honolulu, Mokupuni o Oahu, Teritori o Hawaii, (o Louisa H. Dee, wahien amre a Lawrence H. Dee i oleloia ua hui iloko o keia ma ka hookuu ana a haalele loa i kona kuleana wahine mare iloko a i pili i ka aina i hoakakaia iloko nei) ia J.F. Humburg, Kahu, mea paa moraki, eh moraki hoi i kakau kope ia iloko o ke Keena Kakau Kope Aina o ke Aupuni i Oahu, iloko o ka Buke Helu 247, aoao 52, 53, 54 ame 55, o ka mea paa moraki J.F. Humburg, Kahu, ke manao nei e paniku i ka moraki i oleloia no na kumu i uhaiia, e hoike ana, o ka uku ole ia o ke kumupaa ame ka ukupanee i ka manawa e uku ai.
Ke haawi pu ia aku nei no hoi ka hoolaha o ka waiwai apau i hoopaaia iloko o ka moraki i oleloia e kuaiia aku ana ma ke kudala akea ma ka Hale Inu Rama Hoffmana, e ku nei ma ke kihi hema o na alanui Hotele ame Nuuanu iloko o Honolulu i oleloia, ma ka Poaono, ka la 13 o Augate, A.D. 1904, ma ka hora 12 awakea o ka la i oleloia; koe nae ka waiwai i hoakakaia iloko o ka pauku ekahi (1) oloko nei, a ma keia ke haawiia aku nei ka hoolaha o ua waiwai la i oleloia i hoakakaia iloko o ua pauku ekahi (1) nei e kuaiia aku ana ma ke kudala akea e Will E. Fisher ma kona keena kudala ma Alanui Alakea ame Kalepa iloko o Honolulu i oleloia ma ka Poaono i oleloia ma ka hora 1 p.m. o ka la 13 i oleloia o Augate, A.D. 1904.
O ka waiwai i hoopaaia iloko o ka moraki i oleloia oia iho keia:
(1) O kela apana a mahele apau loa o ka aina e waiho la ma Alanui Young, iloko o Honolulu i oleloia, oia no hoi ka hapalua Hikina o ka Apana Helu 13, he hapa o ka Apana "A" o ka Palapala Sila Nui Helu 78, a oia no hoi ka aina i hooliloia ia Lawrence H. Dee i oleloia ma kekahi palapala kuai aina o E. May McGregor i hanaia i ka la 16 o Iune, A.D. 1901, a i kakau kope ia iloko o ke Keena Kakau Kope Aina i oleloia iloko o ka Buke Helu 130, aoao 363, pau pu me keia apana o ka aina nona ke alo e waiho la ma ke alanui Young i oleloia e pili la me ka mahele o ka aina i hoakakaia maluna ae ma ka aoao Kamaki Kuea (Thomas Square) nona hoi ke alo i aneane aku i ka 25 kapuai a o ke koena o ka aina ua hooliloia mai ia'u mai ia John Grace mai ma kekahi palapala kuai aina i hanaia i ka la 7 o Okatoba, A.D. 1890, a i kakau kope ia iloko o ke Keena Kakau Kope i oleloia iloko o ka Buke 127, aoao 110. Pau pu me na pono apau, na kuleana, na hale, na hana hou, ame na mea apau i pili ilaila, i kaa nae malalo o ka hoopaa a hoomalu ana o kela moraki i hanaia e Lawrence H. Dee i oleloia C.M. Cooke, Kahu, no ka huina o Ekolu Kaukani ame Elima Haneli Dala, i hanaia i ka la 4 o Feberuari, A.D. 1902, a i kakau kope ia iloko o ke Keena Kakau Kope Aina, Oahu, iloko o ka Buke Helu 232, aoao 87 et seq.
(2) O kela aina hoolimalima e waiho la ma ke kihi Hema o na Alanui Nuuanu ame Hotele iloko o Honolulu i oleloia nona hoi ka manawa hoolimalima i pau ole o 4 makahiki a pau pu me na waiwai pakahi apau loa, na waiwai kuai, na pono hale apau iloko olaila i komo ole iloko o ke kuleana hoolimalima i hoakakaia o na mea apau i ikeia ka Hale Inu Rama o Hoffman.
J.F. HUMBURG, Kahu,
Mea Paa Moraki.
Hanaia i Iulai, 19, 1904.
Frank E. Thompson, Loio no ka Mea Paa Moraki.
3025-July 22, 29; Aug. 5, 12.
HOOLAHA KUMAU
Kakela me Kuke
(KAUPALENAIA)
Poe Kalepa ma ke Komisina
::A HE::
POE LAWELAWE KOPAA
Poe Agena no na Mahiko Lehulehu.
Hui Alahao ame Aina o Oahu
MANAWA HOLO
Mei 1, 1903.
MAI HONOLULU AKU
No Waianae, Waialua, Kahuku ame na wahi hoolulu ma ke alahao-*9:15 a.m., *3:30 p.m
No Pearl City, Ewa Mili, ame na wahi hoolulu ma ke alahao-+7:30 a.m., *9:15 a.m., *11:05 a.m., *8:15 p.m., *3:20p.m., +4:15 p.m., *5:15 p.m., #9:30 p.m., +11:15 p.m.
MAI WAHO MAI.
Ku i Honolulu mai Kahuku, Waialua, ame Waianae mai *8:36 a.m., *5:31 p.m.
Ku i Honolulu mai Ewa Mili ame Pearl City mai-+6:50 a.m., +7:46 a.m., *8:36 a.m., *10:38 a.m., *2:05 p.m., *4:31 p.m., *5:31 p.m., *7:40 p.m.
*$5:31 p.m., *7:40 p.m.
*Kela ame keia la.
#Sabati wale no.
+Koe ke Sabati.
G.P. DENISON.
Lunahoohana.
F.C. SMITH,
G.P. & T.A.
KAUKA T. MITAMURA
Alanui Kukui Ololi Helu 68, Honolulu. Na Hora Hana:
Hora 9 a.m. a 12 m; 6:30 p.m. a 7:30 p.m. Sabati, Hora 9 a.m. a 10:30 a.m.
Telepone Blue 2366 P.O. Box @42.
Na Papal@ I-e Nunui.
O na Lede ame na Keonimana o ke ano hou e loaa no ma kahi o
FUKURODA
Helu 28-32 - - - Alanui Hotele
HUI HOOLEWA HONOLULU
Ke hooiaio nei keia hui i kana mau hana kokua i kona mau lala. I keia wa ua ei mamua o 1300 lala, a ke pii mau nei i kela ame keia la.
J.H. TOWNSEND, Kakauolelo.
UA UKU AKU KA
Fidelity Funding Co.
Iloko o na makahiki elua i hala ae nei i ka poe i hoahu i ka lakou mau dala he $380,000.
Na ka FIRST NATIONAL BANK O HAWAII e ku nei ma Honolulu, T.H., e hooiaio mai i keia mea.
$1.00 o ka pule no 100 pule e loaa ana he $150.00.
O na papa hoike ame ka papainoa o ka poe e uku pule ia nei ame na Agena e loaa no ma ke Keena o
R.D. HIGHTOWER,
Agena ma Hawaii, Teritori nei.
41 ame 52 Young Block, Honolulu.
He Huaale Maikai
Aole he like o na
"HUAALE A AYERS."
me na huaale e ae no ka mea he mau huaale kokua keia i ka hana a na naau, a he laau hoomaha maikai loa hoi, Ina he paa kou hanalepo o na
'HUAALE A AYERS."
ka laau e hemo maikai ai, a e hemo maikai mau ana hoi mahope aku oia manawa.
Aole loa he hiki i kekahi kanaka ke Olelo ae he maikai kona oia kino ina aole he hemo o kona hanalepo he hookahi manawa o ka la, a oi aku paha. Ina i maopopo keia kanawai e ke ola i na kanaka apau, aole loa e like ka nui o ka poe ma'i me ka mea e ike ia nei i keia mau la.
Ua hana ia owaho me ke kopaa he maikai loa ka lawe ana.
Aohe mau Huaale i oi ae ka maikai mamua o na
"HUAALE A AYERS."
Hoomakaukau ia e Kauka J.C. Ayer & Company, Lowell, Mass., U.S.A.
E loaa no keia mau Huaale ma ka Hale Kuai Laau o Hollister, alanui Papu.