Ka Nupepa Kuokoa, Volume XLII, Number 30, 22 July 1904 — Page 2

 

Ka Nupepa Kuokoa

KE KILOHANA POOKELA NO KA LAHUI HAWAII.

2          NUPEPA KUOKOA, POALIMA, IULAI 22, 1904.

KA Nupepa Kuokoa

NO KA MAKAHIKI             -           -           -           -           $2.00

NO EONO MAHINA-          -           -           -           -             1.00

SUBSCRIPTION RATES

ONE YEAR   -           -           -           -           -           -           $2.00

SIX MONTHS           -           -           -           -           -           - 1.00

            O  NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA, E HOOUNA PU MAI ME KA AUHAU, @ INA AOLE, AOHE NO E HOOKOMOIA.  E HOIKEIA AKU NO KA AUHAU OLELO HOOLAHA KE UI MAI I KE KEENA NEI.

O na Dala apau o ka Pepa e hoouna pololei mai i ka HAWAIIAN GAZETTE COMPANY, LTD.

HOOPUKALA E KA Hawaiian Gazette Co., Ltd.

Hookomoia ma ka Hale Leka o Honolulu, P@laau o Hawaii, ma ke ano Mea o ka Papa Elua.

DAVID . A-I, :           :           Lunahooponopono

S. K. HAWAA,          :           Lunahooponopono

A. W. PEARSON,      :           :           :           :           :           Lunanui

HONOLULU, OAHU.

POALIMA.    :           :           :           IULAI @ 1904.

O KA HOOPA OLE I KA HAI KA PONO.

            O kekahi o na hana hoohilahila loa i ka aina, a i ka lahui o ia aupuni oia no ka apuka dala e like me na apuka dala i hanaia i Hawaii nei i keia mau la i hala iho nei--maloko o na oihana aupuni a iloko o na oihana kalepa o ke kulanakauhale nei ke kumu i haalele ai kekahi poe i ko lakou aina makuahine a holo aku a noho ana i na aina malihini.

            He mea oiaio aole wale no keia o na hana hoohilahila i ka lahui aka aia no he mau hana e ae, aka maluna o keia mea mua makou i makemake ai e hooaiai aku no kakou Hawaii i mea e hoomakiliia ae ai ka noonoo oi loa aku iwaena o ka poe e noho hana nei iloko o na oihana, oiai aole no i liuliu loa aku nei aia hoi ua malele hou aku la kekahi o na oiwi Hawaii i noho loihi iki iloko o kekahi keena aupuni a no kahi manao kolohe i loaa iloko ona ua hana aku oia i ke apuka a mama ana i ka holo--ua iia mai aia i Kapalakiko i keia manawa.

            Ua hiki no ke hoomaopopoia o kekahi kumu o ka puka ana mai o keia mau hihia apuka dala aole ia no ka manao maoli e aihue aka mamuli no ia o ka pono ole o ka hoopa ana i ka ha'i me ka manao e lawe iki no ka manawa a e pani aku i ka manawa e makaukau ai e like me ka hihia o Hakuole ma ka hoike manao o ka lunakanawai a oia no hoi ka manao pilila@l@ i loaa i ka lehulehu.

            A maluna o ia mea i loaa ai ke poomanao o keia kinomanao oia hoi ua oi loa aku ka maikai o ka hoopa ole ana i ka ha'i a e oluolu iho ka noonoo maluna o ka loaa ponoi.  Ua oleloia o ka hemahema nui o na Hawaii oia no ka maa ole i ka lawelawe kupono ana i ka waiwai o ko lakou mau hakuhana, oia hoi, ina he kanaka i ka lawelawe oihana dala a waiwai ano nui okoa ae, o ka hikimua o ka noonoo e loaa ana i kela kanaka opio i ka wa o ka nele oia no ka hooholo o ka manao e lawe i kekahi huina dala mailoko mai o ka waihona o ka hakuhana no ka hoopau ana i kona pilikia a i kona manawa e makaukau ai e pani ai oia, a i ka hooko ana ua kau aku la ka pono ole maluna ona ke kumu i nele ole ai ka hohono i ke akea a lilo i mea hoohilahila, aole wale no iaia, aka i kona ohana a i kona lahui a i kona aina.  Alaila o ka hoopa ole i ka ha'i oia ka pono.

            Eia nae he nui na kumu i ulu mai ai a loaa iho la keia lawelawe ana i ka ha'i.  O ka piliwaiwai e hana maluia mai nei oia kekahi mea nana i alako nui aku i na kanaka opio iloko o ka makemake nui e loaa ke dala i wahi e hoi mai ai o kana i lilo mua--a i wahi e hoi mai ai o kana i lilo mua--a i wahi e loaa ai oia no ke kikoo aku i ka waihona a kona hakuhana, a i ka manawa e puka ai e paniia aku ai ka kona haku, a na mea apau e ike iho ai aole ia he hana maikai a ke kanaka hana.

            O kekahi pilikia nui oia no ke komo wale no iloko o ka aie i ka ha'i a pau loa ae la ka noonoo e hookaa pololei a hala wale ka manawa kupono, oiai nae, e ike ua kanaka opio la he mea pono iaia nona iho e hookaa aku a i ole ina aole e makaukau no ka uku pau ana he mea pono e ike aku i kona haku i aieia e ia no ka hookaa liilii ana a hiki i ka wa e pau ai, aka o ka mea e ikeia nei iwaena no o na opio Hawaii me he la he hana malihini loa ka hookaa pololei ia lakou a o ka epaepa ka i kamaaina mau.

NO NA MAHELE KOHO.

            O ka manao ana e mahelehele i na mahele koho o na Apana Koho Eha ame Elima iloko o ka mokupuni o Oahu nei ua maikai loa ia noonoo i ulu mai ai iwaena o ka poe hoeueu kalaiaina.

            Oi loa aku ka moakaka o ka maikai o ia kumuhana ke manaia aku maluna o ka Mahele Koho Ehiku, o ka Apana Koho Elima--he mahele nui ma kona kino a henui ma ka heluna o ka poe kupono i ke koho balota--i hooaiai loa ia hoi e na kau i hala aia ma kahi o 900 a oi eia nae e ano emi mai ana paha i keia kau koho aia nae a noho mai ka Papa Kakauinoa e emi io mai ana aole no ia i lawa no ka mahele ole ia o ka mahele koho.

            A e like no me na hoakaka e puka aku nei ma keia helu pili i keia kumuhana no na Mahele Koho Ewalu ame Ekahi ame Eha o ka Apana Eha pela i kau like mai ai ka maikai o ka mahelehele ana maluna o lakou e like me keia o ka Mahele Koho Ehiku o ka Apana Elima.

            No ka Mahele Ekahi oia keia okana aina mai Leahi a hiki i Alanui Punahou ua hiki ke hoomaopopo i keia manawa i ka pii ae o ka heluna o ka poe noho a aole hoi he hoohewahewa ana i ka nui aina, a oia ano hiohiona ka i nele ole i ke kau aku maluna o ka Mahele Ewalu, a nona hoi aole he hoohalahala i ka nui io ona.  O ka pau pu o kekahi hapa o Kakaako a hui pu me Kewalo ame Makiki ua hiki ke kanaka ke ike iho i ka nui io o lakou apau, eia nae me he ia, i ka nana aku no lakou o kahi ko'iko'i loa o ka ikaika mahelehele ana oia no ka nui aina.

            Aka no ka Mahele Eha iho e like me ka papainoa o ka poe koho balota o ke kau i hala ua loaa ka ike i ka nui io oiai aia ma kahi o ka 800 ko lakou nui, a ke hoouluulu i na mea apau ua maikai keia kumuhana i loaa iloko o ka noonoo o ka poe kalaiaina a na Repubalika hoi e liuliu mai nei no ka hanaia o ke kaulike no na mea apau ke holopono hoi i ka mea nana ka mana mahelehele.

            Ke manao nei makou o ka hooko ana ka mahelehele oia ka haawi mauawa kupono i ka poe koho balota e pau pono ai na balota i ka hookomoia a he hoopuikaika hana nui ole hoi ia i na lunakanawai o na wahi koho, a e pau ai na hana maloko o ka manawa i hoomaopopoia a paniku ole ia hoi na balota o kekahi poe koho mamuli o ka pau o ka manawa.

 

E HELE OKOA ANA NA MOHO REPUBALIKA.

            Ma ka hoomaopopo ana i na hiohiona o ka nee o ka ikaika kalaiaina iwaena o na Repubalika o Amerika Huipuia no na moho Peresidena Rusewela no ka noho no ana e paa ia no ke kau hou, ame Senatoa Fairbanks no ka noho Hope-Peresidena, e he e okoa ana laua ma ka laweia ae o ka lanakila e laua.

            Aia he mau kumu kupono i loaa no ke kakoo ana i keia manao e ana aku i ka lilo o ka lanakila i na moho Repubalika, a iwaena o lakou he ekolu a makou i makemake ai e hooaiai mawaho ae o ka hoike heluna balota o ke kau koho peresidena i hala, oiai aohe he hoopaapaa ana i ka oi loa o ka heluna balota Repubalika mamua o ko na Demokarata, ke kumu i puka ai na moho Repubalika Makinele ame Rusewela a haule hoi na moho Demokarata.

            Akahi.--O ka hoike o ka moolelo o na Repubalika no ka holomua mau o ka hapanui o ka lakou mau hana aupuni ma o na paahana la iloko o na kau a na Peresidena Repubalika i noho hana ai me ka ike pu ia e ka lehulehu i ka waiwai maoli o ia mau hana i hanaia no ka pono pililauia.

            Elua.--O ka hoike o ka moolelo o na Repubalika i ke akamai ame ka noeau o ko lakou noonoo i ka wae ana i na moho no na noho peresidena a pau pu me na oihana aupuni e ae apuni o Amerika Huipuia--na lakou ka wae ana, aole i nele ka loaa o na limahana a paahana kupono no na keena oihana aupuni, a makou e pane kanalua ole ai--oia ke alanui maoli o ka wae moho ana aole o ka hapuku wale me ka opala pu a he opala no ka mea puka mai.

            Ekolu.--O ka noeau ame ke akamai o ka wae ana o na Repubalika i ka lakou mau moho ma o ka Ahaelele Wae Moho i malamaia mai nei i Kikako a puka mai la o Peresidena Rusewela ame Senatoa Fairbanks.

            Ke puka nei na hooho mahalo no keia noeau o ka wae ana i na makaainana no laua na makaukau e hiki ke hoohiahaia ole a i kupono ma na mahele no apau no ko laua kupono io-pau pu na Repubalika ame na Demokarata ma keia hooho mahalo--a oia no kekahi mea e hooikaika loa ai i ka wae ana mai mailoko mai o ka nui lehulehu i na mana mai na mokuaina like ole mai--a ka lehulehu e ike e aku nei e kaa ana ka hapanui oia mau mana koho ma ka aoao o na moho Repubalika, aka nae o ka la o ke koho ka manawa nana e hoike mai i ka io.

 

NO KA HOOPUOHOIA KE KUMU.

            O ka hana i kekahi hana ma ke alahele o ka pololei aole ia he mea nana e hoala mai i na manao kanalua iloko o ka poe e nana aku ana i ka hana e hana ia mai ana.  O ka poe noonoo maikai apau aole e hala ka lakou kilo ana mawaho aku o ke alahele pololei, a ia lakou e ike ai i ko lakou hoomaka ana e hoolalahu mawaho o ke alahele pololei, he mea oiaio he hikiwawe ko lakou hoopololei ana.

            Ma kekahi poo mea hou e puka aku nei ma keia helu e ike ia ana kekahi haawina o keia ano, a makou hoi e manao nei ua loaa mai ua haawina la mamuli o ka hoopuohoia ana.  O ua haawina la oia ka i hanaia iho nei e ka Hui Kokua Kuai Home, a ke Kuokoa i hoopuoho mua aku ai i kona poe heluhelu ame na hoaloha e ae.

            O ka hauoli o ke Kuokoa oia ka hoomakili ma ke alahele o ka hana pololei, a no ka pono o ka lehulehu holookoa e noho nei ma keia Teritoria e like me kona makia "E hana pono kaulike i na mea apau, oiwi ponoi a haole," pela makou i hoopuoho mua aku ai, a i keia manawa ke ike ia aku nei ka hua oia hoopuoho ana, oia keia hoololi i ke kulana mua a i ke kulana hou a makou e pane kanalua ole nei ina aole i hoopuohoia ina aole e loaa keia hoololi.

 

MAHUAHUA NA LOAA AUHAU TERITORI.

            I kulike ai me na hoike e waiho nei ma na buke i nanania iho nei iloko o ke Keena Hooia, o ka huina nui o na auhau i ohiia ma Hawaii nei e hoomaka ana mai Iulai 1, 1903, a hiki iho la i ka la 30 o Iune, 1904 he $1,681,000.  Ua like keia me $30,000 mahuahua ae i ko ka wa i hala.  O keia ohi auhau i ha'i ia ae ia o ia na auhau kino ame na auhau waiwai.

            Ua manaoia o kela mahuahua ana o na loaa o ka Teritori mamuli no ia o ko J. W. Pratt hooikaika ana iaia e noho ana iloko o ia oihana, a o kekahi o kana mau hana oia kona hoopii ana iloko o ka Ahahookolokio i ka poe hoole i ko lakou uku ana i ko lakou mau auhau waiwai, a iloko o ia mau hoopii ana ona ua kakooia mai kona aoao.

            Ua ae aku nei ka lunanui o ka hui kaa uwila e holo wale na lunanana o ka Papa Ola maluna o na kaa oia hui i ko lakou manawa e hana ana i ka lakou mau hana.

Ka Wahine i a'o pono ia

I KEKAHI MANAWA UA OI AKU KANA HANA MAMUA @ KE KUPONO.--HAI AE KEIA HAUMANA I HEMO MAIKAI MAI KE KUI @A O NU IOKA I KONA PAKELE ANA MAHOPE O KA LOAA ANA I KEKAHI HAAWINA KAUMAHA.

            O ka wahine malama ma'i i hoonaauao maikai ia oia kekahi mea ano nui loa i keia manawa ano hou o ka lapaau ana i na ma'i e kokua ana hoi i ke kauka ame ka mea e kaa ma'i ana.  Mamuli o kona a'o maikai ia ana ua hiki iaia ke hana i na hana pilikia o kana oihana, e hoomanawanui ana hoi i ka luhi e hiki ai ke ala mai na manao ohohia nona.

            He wahine hoomanawanui oia, aole ia he mea e hoohewahewa ae ai, a i ka manawa o ka hana he mea oiaio e haawi ana oia i kona ikaika apau.  E hana no ia ia kana hana me ka maikai a hiki i ka hopena, a i kona manawa e hoomaha ai oia ka manawa ana e hooikaika ai e loaa hou ka ikaika laia.  Ma ia aono e makemake ana oia i ka laau nana e hooulu i kona mau lala i luhi, a oiai ua mahuahua aku kona ike i ke ano o ka laau lapaau e pau koke ai kona pilikia i ka manawa kupono, he mea hoohewahewa ole ae e koho ana oia i ka laau lapaau maikai a he alakai maikai ana hoi keia no na mea apau.

            O na olelo apau o keia hoike a Mrs. Jessie M. F. Cummings, e noho nei ma ka helu 61 alanui Whitmore, Hartford, Conn., kekahi hoi o na haumana i hoonaauoia ma ke kula Malama Ma'i o Nu Ioka a i hemo maikai mai hoi mai ia kula mai, he mea pono e noonoo pono ia no ka mea he hoike ia na ka mea i ike ma ia oihana, penei ua hoike la: 

            "He mau mahina i hala ae nei," wahi a Mrs. Cummings, "ua kau mai kekahi haawina pilikia nui maluna o'u he hopena hoi i loaa mai mamuli o ko'u hoole ana ia'u iho a hoolilo aku i ko'u mau manawa apau ma ka malama ana i kekahi ma'i koikoi loa.  He mea oiaio ua aia mai ka makemake iloko o'u e hookaawaleia ae ia pilikia, nolaila ua kii aku la wau i eono pahu o ka Dr. Williams' Pink Pills for Pale People a hoomaka iho la wau e lawe ia lakou me ka manaolana e loaa mai ana no ke ola.  O ua pomaikai la au i manao mua ai ua loaa io mai la no ia'u mai keia mau huaale mai, a ke olelo nei wau me ka oiaio ame ka hauoli no hoi o ua mau huaale la oia ka laau maikai loa no ka hooulu hou ana i ka ikaika i nawaliwali mamuli o ka pilikia i pili i na wahine."

            O ka oiaio o keia mau olelo a Mrs. Cummings ke hooiaioia mai nei e ka poe apau i loaa i ka nawaliwali a hoolaia lakou, me ka nana ole ae heaha la ia mau nawaliwali.  O ka laau Huaale Akala a Kauka Williams no ka Poe Haikea eia ke hoola nei i na ma'i lo-lo o na ano apau, a aole wale hoi oia aka o na ma'i i makau ia e pili ana i na  aa@ko.

            @ a keia mau huaale e hoopau i ka mau ana o na lala nawaliwali a hoomaka e hoopiha hou ia mau lala me ka ikaika e mau ana.  Ke kuai ia nei keia mau huaale e na poe kuai laau lapaau.  He buke e kuhikuhi ana i ke ano o ka lapaau ana i na aakoko nawaliwali e hoouna ia aku no me ka auhau ole ke noi ae ia Dr. Williams Medicine Co., Schenectady, N. Y.

 

HE REPUBALIKA O JOHN WISE.

            Ua lilo ae nei o John Wise i Repubalika i keia manawa.  O keia loli ana ae nei o ke kulana kalaiaina o John Wise mai na kulana mua ana i ku ai oia ka aoao Home Rula a mahope mai ka aoao Demokarata a komo iho la ma ka aoao Repubalika, ma Kawaihae, Hawaii, kahii hanaia iho ai ia mea iloko o kekahi halawai kalaiaina i malamaia ilaila ma ke ahiaahi Poakolu.

            Ma keia olelo a keia keonimana ua komo mai la o John Wise a kokua pu ina hana ma ke ano maheleolelo na Loebenstein ma ka olelo Hawaii no ka pono o na Hawaii a oia no hoi ka manawa i hoike ae ai o John Wise i kona manao ponoi ma ka hookuu pono ana mai ia mea oia hoi e noho ma ke kahua Repbalika a wahi ana e hooikaika ana oia ma na mea apau e loaa ka lanakila i ka aoao Repubalika iloko o Novemaba e hiki mai ana.

 

KE LIULIU NEI KA MAHELE EWALU.

            Eia ke kalapu Repubalika o ka Mahele koho Ewalu o ka Apana koho Eha ke hoomakaukau nei i kona papahana o na hana kalaiaina no ka liuliu ana iaia iho no keia kau koho balota e hiki mai ana.

            Eia ke loaa nei i ko kela mahele poe oi loa aku i na Repubalika apau e noho nei ilaila, na leta mai ke kakauolelo aku o ke kalapu, e paipai ana ia lakou apau e ala mai no ka hooikaika ana i na mea e loaa ai ke kulana aupuni maikai no ke Teritori a pau pu no hoi na hooaiai no na manawa e malamaia ai na halawai.

            Ke hooikaika pu nei hoi ke kalapu e hoala i ka waihona no ka hoomakaukau ana ia lakou iho no ka hale, na hana hoolaha, na hana kakau ame na mea lilo e ae.

            E holo aku ana o Lunakanawai Lindsay o ka Aha Hookolokolo Apana o Honolulu nei, no Kauai no ka male o Miss Elizabeth Linsay me George R. Ewart, ke poo luna o ka wiiiko o Makaweli, Kauai.

 

            O NA MAI KAU LA o ia ko na keiki enemi ino loa a o ka hoa paio hoi o na makuahine.  Nolaila o ka loaa koke ana o ka laau ame ka hoohana koke ana o ia ka hana pono e hana ai.  O ka laau Chamberlain's Colic, Cholera and Diarrhoea Remedy, ina e haawi koke ia e like me na kuhikuhi e loaa koke no ke ola.  Ke kuai ia nei ma na halekuai laau apau.  BENSON, SMITH & CO., na Agena ma Hawaii nei.

 

HOOLAHA HOOKO MORAKI.

HOOLAHA MANAO PANIKU A KUAI A KA MEA PAA MORAKI.

LAWRENCE H. DEE.

            Ma keia ke haawiia aku nei ka hoolaha mamuli o ka mana o ke kuai i hanaia iloko o kekahi moraki i hanaia i ka ia 7 o Feberuari, A. D. 1903, e Lawrence H. Dee, o Honolulu, Mokupuni o Oahu, Teritori o Hawaii.  (o Louisa H. Dee, wahine mare a Lawrence H. Dee i oleloia ua hui iloko o keia ma ka hookuu ana a haalele loa i kona kuleana wahine mare iloko a i pili i ka aina i hoakakaia iloko nei) ia J. F. Humburg, Kahu, mea paa moraki, he moraki hoi i kakau kope ia iloko o ke Keena Kakau Kope Aina o ke Aupuni i Oahu, iloko o ka Buke Helu 247, aoao 52, 53, 54 ame 55, o ka mea paa moraki J. F. Humburg, Kahu, ke manao nei e paniku i ka moraki i oleloia no na kumu i uhaiia, e hoike ana, o ka uku ole ia o ke kumupaa ame ka ukupanee i ka manawa e uku ai.

            Ke haawi pu ia aku nei no hoi ka hoolaha o ka waiwai apau i hoopaaia iloko o ka moraki i oleloia e kuaiia aku ana ma ke kudala akea ma ka Hale Inu Rama Hoffman, e ku nei ma ke kihi hema o na alanui Hotele ame Nuuanu iloko o Honolulu i oleloia, ma ka Poaono, ka la 13 o Augate, A. D. 1904, ma ka hora 12 awakea o ka la i oleloia:  koe nae ka waiwai i hoakakaia iloko o ka pauku ekahi (1) oloko nei, a ma keia ke haawiia aku nei ka hoolaha o ua waiwai la i oleloia i hoakakaia iloko o ua pauku ekahi (1) nei e kuaiia aku ana ma ke kudala akea e Will E. Fisher ma kona keena kudala ma Alanui Alakea ame Kalepa iloko o Honolulu i oleloia ma ka Poaono i oleloia ma ka hora 1 p. m. o ka la 13 i oleloia o Augate, A. D. 1904.

            O ka waiwai i hoopaaia iloko o ka moraki i oleloia oia iho keia:

            (1)  O kela apana a mahele apau loa o ka aina e waiho la ma Alanui Young, iloko o Honolulu i oleloia, oia no hoi ka hapalua Hikina o ka Apana Helu 13, he hapa o ka Apana "A" o ka Palapala Sila Nui Helu 78, a oia no hoi ka aina i hooliloia ia Lawrence H. Dee i oleloia ma kekahi palapala kuai aina o E. May McGregor i hanaia i ka la 16 o Iune, A. D. 1901, a i kakau kope ia iloko o ke Keena Kakau Kope Aina i oleloia iloko o ka Buke Helu 130, aoao 363, pau pu me kela apana o ka aina nona ke alo e waiho la ma ke alanui Young i oleloia e pili la me ka mahele o ka aina i hoakakaia maluna ae ma ka aoao Kamaki Kuea (Thomas Square) nona hoi ke alo i aneane aku i ka 25 kapuai a o ke koena o ka aina ua hooliloia mai ia'u mai ia John Grace mai ma kekahi palapala kuai aina i hanaia i ka la 7 o Okatoba, A. D. 1890, a i kakau kope ia iloko o ke Keena Kakau Kope i oleloia iloko o ka Buke 127, aoao 110.  Pau pu me na pono apau, na kuleana, na hale, na hana hou, ame na mea apau i pili ilaila, i kaa nae malalo o ka hoopaa a hoomalu ana o kela moraki i hanaia e Lawrence H. Dee i oleloia ia C. M. Cooke, Kahu, no ka huina o Ekolu Kaukani ame Elima Haneli Dala, i hanaia i ka la 4 o Feberuari, A. D. 1902, a i kakau kope ia iloko o ke Keena Kakau Kope Aina, Oahu, iloko o ka Buke Helu 232, aoao 87 et seq.

            (2)  O kela aina hoolimalima e waiho la ma ke kihi Hema o na Alanui Nuuanu ame Hotele iloko o Honolulu i oleloia nona hoi ka manawa hoolimalima i pau ole o 4 makahiki a pau pu me na waiwai pakahi apau loa, na wawa kuai, na pono hale apau iloko olaila i komo ole iloko o ke kuleana hoolimalima i hoakakaia o na mea apau i ikeia ka Hale Inu Rama o Hoffman.

J. F. HUMBURG, Kahu,

Mea Paa Moraki.

            Hanaia i Iulai, 1904.

            Frank E. Thompson, Loio no ka Mea Paa Moraki.

            3025--July 22, 29; Aug. 5, 12

 

HOOLAHA MA KE KAUOHA

HOOLAHA.

            I na poe apau.  O ke Kailawai'a o Moanalua, aia malalo o ka hoomalu ana a Sam. Kipi.  Ke papaia aku nei na mea apau aole e hele a lawai'a ma ua kai la koe wale iho no na kupa ame na poe e noho hoolimalima nei a e hookoeia ka i'a kapu a ke konohiki oia hoi ka amaama no ko'u pono ponoi.  O ka mea e ku-e ana i keia e hoopiiia no ma ke kanawai.

 

HOOLAHA O NA UKU O KA PAIPU LAWE MEA INO.

            Mamuli o ka lohi o ka hoouna ia ana aku o na hoike o ke paipu lawe o na mea ino, nolaila ua hooloihiia aku ka manawa no ka uku ana a hiki i ka la 31 o Iuali, 1904, a mahope aku oia la e kau no ka hoopa'i o 10 pa-keneta maluna o na uku e panee ana.

C. M. WHITE,

Poo Kakauolelo.

            Aponoia e C. S. HOLLOWAY.

            3024--July 15, 22, 29.

 

HOOLAHA HOOPAU HUI.

            Ma keia ke haawiia aku nei ka hoolaha o ka hui i ku iho nei mawaena o John B. Watson ame Charles P. West o Honolulu, malalo o ka inoa hui Watson & West ua hoopauia a hookuu loa ia ma ka la 12 o Iulai, A. D. 1904, ma o ka hana o ke kanawai:  oia hoi, o John B. Watson i oleloia, i keia manawa, oia ka oia maoli o ka hana kalepa mikini humuhumu lole i lawelaweia iho nei e ka hui i oleloia, a e hoomauia aku ana ia hana kalepa ma kona wahi e ku nei.  A aole mea e ae koe wale no o John B. Watson i oleloia ka mea kuleana e ohi i na aie ame na helu waiwai e ae i kuleanaia e ka hui i oleloia.

(Kakauinoaia)  JOHN B. WATSON,

            Honolulu, Iulai 18, 1904.

            3025--July 22, 29; Aug. 5.

 

            Ma na ouli e kau mainei maluna o ke kaua a Iaana ame Rusia e kaua mai nei, me he mea la e hiki mai ana ka manawa e haulani ae ai na Mana Aupuni o Europa ma ke kue ana ia Rusia mamuli o ko Rusia hopuhopu ana i ko lakou mau moku e holo nei i ka moana.

 

KOENA MAI KA MOKU POINO MAI.  GLASCOW, Iulai 8.--He iwakalua poe i pakele mai ka moku poino Norge i hiki ae nei i ka mokupuni o Shetland.

 

HOOLAHA MANA HOOKOLOKOLO

ILOKO O KA AHA KAAPUNI O KA APANA KAAPUNI ELIMA, TERITORI O HAWAII.--HOOPONOPONO WAIWAI HOOILINA MA KE KEENA.

Iloko o ka Waiwai o W. E. H. Deverill o Hanalei, Kauai.

            Kauoha o ka Hoolaha o ka Hoolohe Paiapaia Noi no ka Hooko Kauoha.

            He Palapala e hoike ana o ia ka Palapala Kauoha hope loa ame ka Hoike a W. E. H. Deverill, mea i make, i waihoia mai hoi ma ka la 23 o Iune, A. D. 1904, imua o ka Aha Hooko Kauoha i oleloia a he noi hoi no ka Hooko ana i ua Palapala Hooko Kauoha la, a no ka hoopuka ana aku i na Palapala Hoike ia Sarah B. Deverill i waihoia mai hoi e ia.

            Ke kauoha pu ia nei no hoi o ka Poahu, ka la 4 o Augate, A. D. 1904, ma ka hora umi a. m. o ka la i oleloia, ma ke Keena Hookolokolo o ka Aha i oleloia, ma Lihue, Mokupuni o Kauai, o kahi ia ame ka manawa i hookawaleia no ka hooiaio ana i ka Palapala Kauoha i oleloia ame ka hoolohe ana i ka Palapala Noi i oleloia.

            Ke kauoha hou ia nei no hoi, he hoolaha o keia e hoolahaia ma ke pa'i ana i kela ame keia pule no eha pule nee papa iloko o ka "Hawaiian Gazette" ame ke "Kuokoa" he mau nupepa e hoolahaia nei ma Honolulu, o ka hoolaha hope hoi aole e emi iho malalo o umi la mamua iho o ka manawa i hoopaaia iloko nei no ka hoolohe ana.

            Hanaia ma Lihue, Kauai, i keia la 24 o Iune, 1904.

            Na ka Aha:

(Kakauinoaia)  JNO. A. PALMER,

            Kakauolelo.

            3022--July 1, 8, 15, 22.

 

HOOLAHA HOOKO MORAKI.

HOOLAHA MANAO PANIKU A KUAI A KA MEA PAA MORAKI.

KAUHOLA (K.)

            I kulike ai me ka olelo o kekahi palapala moraki i hanaia ma ka la 9 o September, A. D. 1898, mawaena o Kauhola (k.) o Makua, Waianae, Oahu, ame C. B. Maile o Honolulu, Oahu, i oleloia, a i kopeia ma ka Keena Kakau Kope o ke Aupuni, Buke 180, aoao 477 ame 478, a i hooliloia mai ia moraki ia Douglas Kaona ma kekahi Palapala Hoolilo i hanaia ma ka la 2 o July, A. D. 1904, a i kopeia ma ka Buke Aupuni o @ ke Keena Kakau Kope i oleloia a no ka hookaa ole ia o ke kumupaa ame ka ukupanee; nolaila ke manao nei ka mea, malama moraki i oleloia o ka mea paa moraki i oleloia, e pani, a ke hoolaha aku nei no ke kuai ana ma ke kudala ma ka Hale Kudala o J. F. Morgan, ma Alanui Kaahumanu, Honolulu, Helu 847, ke hiki aku ma ka la 6 o Augate, A. D. 1904, a o ka waiwai i oleloia ma ia moraki, penei no ia:

            He apana aina ma Makua, Waianae, Mokupuni Oahu, nona ka Palapala Sila Nui Helu 3634, Kuleana Helu 9045 i hookoia no Kawaa no Manua, nona ka nui he 9 eka oi aku a emi mai a i loaa mai iaia ma ka Palapala Kuai a D. K. Mahu ma ka la 4 o September, A. D. 1878, a i kopeia ma ka Buke Aupuni 93, aoao 155 ame 156, a ke hoike pu ia aku nei o na lilo no ka hana ana i na palapala, na ka mea e kuai mai.  Kuike ke dala ma ke dala gula o Amerika.

            No na mea i koe, e ninau ia

            DOUGLAS KAONA,

            Mea Malama Moraki o ka Mea Paa Moraki.

            Ma o kona loio la, J. P. Ball, Alanui Moi, Helu 3, Waity Building.

            2024--July 15, 22, 29 Aug. 5.

HOOLAHA MANAO E PANIKU A KUAI A KA MEA MALAMA MORAKI.

KAHUILA WILCOX AME W. L. WILCOX.

            Ke haawi ia aku nei ka hoolaha i kulike ai me ka mana o ke kuai i hanaia iloko o kekahi moraki i hanaia i ka la 1 o Iulai, 1897, i hanaia e Kahulia Wilcox ame W. L. Wilcox, kana kane mare, o laua a elua no Honolulu, Mokupuni o Oahu, Teritori o Hawaii, na mea moraki, ia W. R. Castle, Kahu, oia wahi hookahi no, a o ua moraki la i oleloia ua kakaukopeia ma ke Keena Hoona Aina iloko o Honolulu i oleloia, iloko o ka Buke 170 ma ka aoao 429, et seq., a o ua moraki la i oleloia, i kekahi manawa mamua aku nei, oia hoi, ma ka la 27 o Dekemaba, 1902, ua hooliloia aku e W. R. Castle, Kahu, i olelo ia ia John Hind, Kahu, a o ua hoolilo la i oleloia o ka moraki i oleloia ua kakau-kopeia iloko o ka Buke 247 ma ka aoao 19 o ke Keena Hoona Aina i oleloia, o ka mea malama o ka moraki i oleloia o ka mea paa moraki i oleloia ke manao nei e paniku i ka moraki i oleloia no ke kumu i uhaiia, oia hoi no ka uku ole ia o ke kumupaa ame ka ukupanee i ka manawa e uku ai.

            Ke haawi pu ia aku nei no hoi ka hoolaha o ka waiwai i paa iloko o ka moraki i oleloia e kuai ia aku ana ma ke kudala akea ma na keena kudala o Jas. F. Morgan, Alanui Kaahumanu, iloko o Honolulu i oleloia ma ka Poakahi ka la 1 o Augate, 1904, ma ka hora 12 awakea o ka la i oleloia.

            O ka waiwai i paa iloko o ka moraki i oleloia oia iho keia:  O kela mahele apau loa o ka aina e waiho la ma ka Mokupuni o Molokai, o ka Teritori i ha'i mua ia ae nei, i ikeia ka Ahupuaaa o Pukoo Elua, i hoakaka piha pono ia iloko o ka L. C. A. 8214, R. P. 7375 ia Ilae Napohaku, a oia no hoi ka aina i hooliloia ia Kahuila Wilcox ma ka palapala hoolilo a John Napohaku Ilae, i hanai a i ka la 1 o Iulai @, a i kakaukopeia iloko o ka Buke 172 ma ka aoao o 86 o ka moolelo o ke Keena Hoona Aina i oleloia.

            Pau pu me na pono apau na pomaikai apau ame na mea apau e pili ana iloko o ua apana ia i oleloia.

            JOHN HIND, Kahu,

Ka Mea Malama Molaki i oleloia o ka Mea Paa Moraki i oleloia.

            Ma ke dala kuike ka makemake a ma ke dala gula Amerika no hoi, a ma ka aoao o ka mea kuai mai na lilo palapala apau.

            No na mea aku i koe e ike ae ia Smith ame Lewis, na Loio o ka Mea Malama moraki o ka Mea Paa Moraki.

            Hanaia ma Honolulu, Iulai 5, 1904.

            3023--July 8, 15, 22, 29.

 

HOOLA KUMAU

            LEWIS & COOKE

            LOI AME KUKE, KaupalenaIa

Na Mea Hookomo mai a Kuai aku i na LAKO HANA HALE

O Kela ame Kena Ano, Malaila e loaa ai na mea malalo @

            NA PAPA N. W., NA PAPA HOL@, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI @ KA OIHANA KAMANA, NA PONO PENA.

            NA PENA LIKE OLE AME NA HUI O PENA, NA ANIANI, NA PAPA HALE, PALE PUKA ANIANI MOEANA, ETC.

            O na kauoha pono hale apau loa @ hiki mai ana ia makou e h@k@ k@ la no me ka eleu ame na KUMUKUAI HAAHAA LOA.

LEWERS & COOKE Kakela me Kuke [KAUPALENAIA]

Poe Kalepa ma ke Komisina : :  A HE  :  : POE LAWELAWE KOPAA

Poe Agena no na Ma hiko Lehulehu.

 

Hui Alahao ame Aina o Oahu

MANAWA HOLO

Mei 1, 1903.

MAI HONOLULU AKU

No Waiane, Waialua, Kahuku ame na wahi hoolulu ma ke alahao--

            *9:15 a. m., *3:30 p. m.

No Pearl City, Ewa Mill, ame na wahi hoolulu ma ke alahao--+7:30 a. m.,

            *9:15 a. m., *11:05 a. m., *8:15 p. m.,

            *3:20 p. m., @4:15 p. m., *5:15 p. m.,

            @9:30 p. m., @11:15 p. m.

MAI WAHO MAI.

Ku i Honolulu mai Kahuku, Waialua, ame Waianae mai *8:36 a. m., *5:31 p. m.

Ku i Honolulu mai Ewa Mill ame Pearl City mai-@6:50 a. m., @7:46 a. m.,

            *8:36 a. m., *10:38 a. m., *2:05 p. m.,

            *4:31 p. m., *5:31 p. m., *7:40 p. m..

            *@5:31 p. m., *7:40 p. m.

            *Kela ame keia la,

            @Sabati wale no

            @Koe ke Sabati.

G. P. DENSION,

            Lunahoohana.

F. C. SMITH,

G. P. & T. A.

 

KAUKA T. MITAMURA

Alanui Kukui Ololi Helu 68, Honolulu.

Na Hora Hana:

            Hora 9 a. m. a 12 m; 6:30 p. m. a 7:30 p. m. Sabati, Hora 9 a. m. a 10:30 a. m.

Telepone Blue 2366    P. O. Box 84@.

 

O KE Koko Ino ka mea e loaa ai na Pilikia ma ke Kino.

            E Heluhelu i keia mau Manao.

O KA LAAU--

AYER'S SARSAPARILLA KA laau nana e hookaawale na ma'i ino mai kou koko aku.  He laau hoonoono ai, a he laau e hooikaika ana i k@u mau lala apau.  O ka Laau Ayer's Sarsaparilla ka laau kaulana loa a puni ke ao holookoa.  Ina i hoomau ia ka lawelawe ana i keia laau e loaa ana ka ke ola kino maikai a me ke koko maemae, hoi hou mai ka ula o kou mau lehelehe, pu'ipu'i maikai kou mau papalina, a loaa ke kulana ola kino maikai.

            He loaa na pu'u paa o ke kino i ka laau Ayer's Sarsaparilla, e hoopakele ana mai ka ma'i puu paa (Brights' Disease@ ame na ma'i oia ano.  Ke koi ikaika aku nei makou e lawe ia keia @no laau ma kahi i ike ia na ma'i Pua paa apau.

            Hoomakaukau ia e Kauka J. C. Ayers & Company, Lowell, Mass., U. S.

            E loaa no keia mau Huaale ma na hale kuai laau apau.