Ka Nupepa Kuokoa, Volume XLII, Number 24, 10 June 1904 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

4                                  NUPEPA KUOKOA, IUNE 10, 1904.

 

            "Wahi au i ha'i mai nei, ua komo mai na makai me ko lakou hoike mua ole mai ia oe?"

            "Ae.  E hoolohe mai oe.  I ka manawa a Ivana i huli mai ae me ka manao e lawe aku ia'u, ike iho la oia i kekahi palapala e waiho ana ma ko'u aoao a o ia no hoi kana i hopu iho ai me ka ike ole ia mai.

            "Pehea, ia oe e waiho la ia manawa, ua hoi mai anei ko'u mau noonoo maikai?"

            "Ae, e hiki ai no ia'u ke hoomaopopo i na mea apau."

            "Pela; alaila e hoomau aku."

            "Ua komo loa mai na makai iloko nei o ka lumi, a i ko lakou ike ana i kuu kaikunane hooho like ae lakou: 'Ua lohi loa kakou no ka hoopakele ana aku iaia; aka nae eia kona mea nana i pepehi,' a ia manawa lakou i lalau mai ai a paa o Ivana."

            "Ua hoole anei o Ivana no keia hopuia ana ona?"

            "Aole.  Heaha aku anei kana hana e hana aku ai?  Ia manawa i lalau aku ai ke poo o na makai i ka pepa mai ko Ivana lima mai.  'A,' wahi ana i hooho ae ai, 'heaha hoi keia,' Nana iho la oia i ua mau pepa la a ike iho la he mau pepa Nihiliti o ka papainoa hoi o ka poe e makemakeia ana e make, a o ka inoa kekahi o ko'u kaikunane maluna o ua papainoa la."

            "Ua ike no anei oe i na mea i kakauia iloko o keia mau pepa?"

            "Aole; o ka pepa wale no a ko lakou alakai e paa ana."

            "Pehea, ma kau nana aku ua hoomaopopo no anei oe ina ua like aku ua pepa la me kekahi mea ponoi ou?"

            "Aole, Ke hoomaopopo nei wau me he mea la aole loa wau i ike ia mea mamua."

            "Pehea hoi ko'u noonoo i kahi i hoea mai ai o ua mau mea la ma kou aoao?"

            "Ua hoohuoi wau na kuu kauwa wahine i hana ia hana."

            "Aia oia mahea i keia manawa?"

            "Ua hookuu aku wau iaia; aka nae ua hoole mai oia i na mea apau!"

            "A, pehea hoi kau i hoopaa aku ai me Ivana?"

            "O, ua makemake wau e ha'i aku i ka oihana makai o ka pepa i loaa aku ia lakou iloko o ko Ivana poli ua loaa ia Ivana e waiho ana ma ko'u aoao, aka nae ua papa koke mai oia ia'u a hawanawana mai la oia ia'u aole e hoopuka iki i kekahi mea e pili ana no Sovia iloko o keia hihia."

            "O Sofia oia ke Kauanwahine Alazamofa?"

            "Ae."

            "No keaha la oia i makemake ai e hoopakele aku i ke kaunawahine?"

            "Ke maopopo ole nei wau ia mea."

            "A ua ike no anei oe i ko lakou wahi i lawe aku ai ia Ivana?"

            "Aole."

            "E kuu haku, e kuu haku!" i lohe aku ai laua nei i ka leo o kekahi luahine o ka lahui Polo, a iloko o ka manawa pokole komo ana ua wahine la iloko o ka lumi, ua kuemi hope aku no nae hoi oia i ka ike ana mai ia Wete iloko o ka lumi.

            "Heaha keia?" i ninau koke aku ai ke kaunawahine, a ia manawa pu no hoi i haikea ae ai kona nanaina.

            "O Kaunawahine Alazamofa?"

            "Heaha iho la kana?"

            "Aia oia iloko o ka lumi hookipa i keia manawa."

            "Mahea?  Iloko nei o ko'u wahi?  Heaha hoi kona mea i ae ia aku ai e komo mai iloko nei?"

            "Ua hiki ole ia'u ke pane aku.  Ua ike wau me ko'u mau maka ponoi i kona komo ana mai me ka nana ole i ke kanaka kiai puka."

            "Aole o'u makemake e ike iaia.  E hoi aku a ha'i aku iaia aole loa wau e hele aku ana e ike iaia.  Alia, aole, e hele aku no wau e ike iaia.  Ma ia ano e ike ai oia i ko Vera Radolinisiki kupono no Ivana Horawiki.  Pehea e kali ana anei oe ia'u maanei no kekahi manawa?" wahi a ke kaunawahine me kona huli ana mai ia Wete.

            "Aole," wahi a Wete i pane aku ai mahope o kona ike ana i keia mau mea apau loa; "ina oe e ae mai ana e hele aku no wau ilalo a noho aku me ka ike ole ia mai a hoolohe aku i ka olua mau papaleo ana, ina no nae ua kupono ia i kou manao."

            "E hana aku e like me kau i manao ai; ua hiki ia oe ke poe iho mahope o ka uhi e kuuwelu la mawaena o ka lumi hookipa ame ka lumi kahakii."

            Mahope o keia mau kukai olelo ana, ku ae la ua kaunawahine nei a hele aku la me kona kino maloeloe a hiehie e like aku me ko ka moiwahine.  O ka leha ana a kona mau maka ua like me kekahi ahi e a ana, e papahi ana hoi ka ula maluna o kona mau papalina, iaia e hele ana e  hui me kona hoapaio. 

            No Wete hoi, lele aku la oia mawaho o ka pukaaniani no ka lanai, a malaila oia i iho aku ai a komo aku la iloko o ka lumi kahakii, i mea e hiki ai iaia ke ike aku i na wahine i ko laua manawa e hui ae ai.  I ko Wete hiki ana ma kana wahi i makemake ai, ike aku la oia i ke Kaunawahine Alazamofa e ku ana, ike pu aku la no hoi oia i ka minoaka hoohenehene ana iho o ua kaunawahine la i kona manawa i ike aku ai ia Kaunawahine Radolinisiki.

            "Ke hauoli nei wau i ka hui ana me oi, e Vera," wahi a Kaunawahine Alazamofa i pane aku ai me ka leo hoohenehene.

            "No'u nei hoi," i panai aku ai o Kaunawahine Radolinisiki me ke koikoi o kona leo, "i hele mai nei wau e ha'i aku ia oe aole loa o'u makemake hou e ike ia oe e komo mai ana ma na paepaepuka o ko'u hale nei."

            "He oiaio anei, o Vera, ka oluolu ame ka hilahila wale oia keia e pane mai nei me na olelo ikaika?"

            "O ka wahine i hoahewaea, ke kaikuahine hoi iloko o ke luuluu kaumaha no kona kaikunane oia keia e kamailio aku nei ia oe."

            I ka lohe ana o Kaunawahine Alazamofa i keia pane ua hoohikileleia oia a haikea ae la no hoi kona nanaina, a ike aku la o Wete i ka haka pono aku o na maka o ua kaunawahine la me ka maina i keia pane i loaa aku iaia, a hoomaopopo pu iho la no hoi o Wete mamuli no ia o ko ke Kaunawahine Rodolinisiki hookauhihi ana aku i ka make ana o kona kaikunane.

            "A," wahi ana i pane aku ai me ka a ana o kona mau maka hulili, "ua lohi loa kou kaumaha ana no ia mea.  Mai oi loa aku ka pono ina i loaa mua mai ia manao iloko ou mamua o kou hanai ana iaia i ka laaumake."

            "Owau anei?  Ka wahine lapuwale!"

            "A iloko o kou huhu ame kou kukoino, ua hoolilo aku oe i ke kanaka au e aloha hoopunipuni nei i mea hoohihiaia."

            "Ua aloha o Ivana ia'u a pela no hoi wau iaia."

            Owai hoi ka mea i nele i ka inaina i ka loaa ana aku o keia mau olelo e hooiaio ana i ka hakukoi iloko o ka puuwai?  I ko Kaunawahine Alazamofa lohe ana ua wela ka inaina iloko ona, a pane aku la oia:

            "Hele pela!  Aloha io paha hoi ia oe!  E ike aku ana no kaua owai io la kana e aloha nei.  Pehea la oia ke ike mai ua hoopunipuni kou aloha ana iaia?  Pehea hoi ina oia e ike mai ana mamuli ou i komo aku ai oia iloko o na lima o na makai?"

            "Aole loa oia e manaoio mai ana i kekahi mau olelo hoopunipuni e like me kau i ha'i mai nei."

            "Pela anei?  Ae, e hooiaio mai ana no ia.  Ua ike anei oe i ka mea e hana ia nei i keia manawa?  I keia manawa hoi a kaua e kamailio nei?  Ua hookuu laelaeia mai oia."

            "Aole loa e hiki ia'u ke hilinai aku maluna o na olelo a kekahi mea pepehi kanaka, aka ke pule nei wau i na Lani e oiaio mai ia mea."

            "E akahele mai oe, e nana pono oe i kau mau olelo i hoopuka mai nei!"

            I keia manawa i lele aku ai o Kaunawahine Alazamofa imua o kona hoapaio me ke ahi e a ana iloko o kona mau maka a Wete hoi i hoomaopopo pono loa ai i ka nui inaina o ua kaunawahine la, a imua hoi o Vera ua like me kekahi holoholona hihiu.

            "O oe, e Sofia Alazamofa ke makaala ia oe iho.  Owau nei ua makaukau wau," me keia mau huaolelo i unuhi ae ai o Kaunawahine Radolinisiki i kekahi pahi a ani ana ika lewa.

(Aole i pau.)

 

HAWAII ame KONA LAHUI.

MAHELE III.

MOKUNA XXII.

NO UMI.

            Ha'i mai o Akahiakuleana, he makuakane kou, aia ma Waipio, o Liloa kona inoa, i aku o Umi, e hele paha wau i ko'u makua, i mai kona makuahine, ae, e hele oe.

            A i kekahi wa i pau ai ka ai ia Umi, pepehi hou ka makua ia Umi, alaila, i aku la o Akahiakuleana, e kuu kane, aole nau ke keiki au e pepehi mai nei.  Huhu mai ua kane la me ka olelo pakike mai, nawai kau keiki na Liloa anei?  I aku o Akahiakuleana, ae, na Liloa ka'u keiki.  I mai ua kane la, auhea la auanei ka hoailona no ke keiki e lilo ai na Liloa ka'u keiki mailoko mai ou, ka'u wahine.  Kahea aku la o Akahiakuleana i kana kauwa wahine e lawe mai i na mea a Liloa i waiho ai no Umi.  I aku o Akahiakuleana i kana kane ke ike pono nei oe i ka makua o ke keiki, a ike oia, aole nana ke keiki.

            A mahope iho o keia olelo ana, a'oa'o pono mai o Akahiakuleana ia Umi no kona hele ana ma Waipio i o Liloa la.  Hoohume aku oia i ko Liloa malo ia Umi, hoolei aku oia i ka niho palaoa ia Umi, ame ka laaupalau.  Alaila, a'oa'o pono oia ia Umi, "Ke iho nei oe i Waipio, i kou hiki ana ilalo o ka pali, a hele aku oe a au oe ma kela aoao o ka muliwai, a ike aku oe i ka hale e huli mai ana kona alo i kou alo, oia no ko Liloa hale ponoi.

            "Mai komo oe ma ka puka pa, aka, e pii aku oe maluna o ua pa la, mai komo oe iloko ma ka puka maoli, aka, e komo oe ma ka pa.

            "Ina i ike oe i ka elemakule e kahili ia ana, ea, oia no kou makua; e pii oe a noho maluna o kona uha.  Ina e ninau mai oia i kou inoa, ea, e ha'i aku oe, o Umi kou inoa."

            Ae aku o Umi i ke kauoha a kona makuahine.  Kena aku la o Akahiakuleana ia Omaokamau, kona kaikunane, e hele pu oia me Umi, e malama ia Umi.  Ae mai o Omaokamau, a hele pu no me Umi.

            Haawi ae la o Akahiakuleana i ka Liloa laaupalau ia Omaokamau me ka i aku, "E malama oe i ka laau a Liloa."

            A pau keia olelo ana, hele laua, o laua wale no, aohe mea e ae.  A hiki laua ma Keahakea, loaa ia laua kekahi keiki o Piimaiwaa ka inoa, ninau mai oia ia laua, "E hele ana olua ihea?"  I aku la laua i Waipio.  I aku o Umi ia Piimaiwaa "I keiki hookama oe, e hele kakou i Waipio."  Ae mai o Piimaiwaa, a hele pu lakou.  A i ko lakou hiki ana i Waipio, ma Koaekea lakou i iho ai a hiki lakou malalo o ka pali, au aku lakou a pae ma o o ka muliwai o Wailoa.  I ko lakou pae ana ma o, ike aku la lakou i ko Liloa hale e ku ana i Haunokamaahale, e huli pono mai ana ka puka o ua hale la imua o ko lakou alo.

            I ko lakou kokoke ana aku i ua hale la, kauoha mai o Umi ia laua "E noho olua maanei, e hele au i o Liloa la.  E kakali olua ia'u; ina e hele au a i make, e hoi olua ma kahi a kakou i hele mai nei; aka, i hoi ola mai au, ola hoi kakou."  A pau kana olelo ana, hele aku o Umi.

            I ko Umi hele ana aku, pii aku la oia maluna o ka pa laau o ko Liloa hale, a komo aku oia ma ko Liloa puka pakaka, e like me ka olelo a kona makuahine mamua o kona hele ana mai.

            A ike mai na ilamuku o Liloa, ua laa kela keiki no ka pii ana ma ka pa laau, kahi kapu o Liloa, alualu mai e make o Umi; alaila, pii aku o Umi a noho maluna o ko Liloa uha, hoohakahaka ae la o Liloa i kona uha, haule iho la o Umi ma ka honua.  A i ko Umi haule ana ike iho la o Liloa i kona niho palaoa ma ko Umi a'i, a me kona malo ma ko Umi hope.  Ninau aku o Liloa, "Owai kou inoa?  O umi anei oe?"  Ae kela, "Ae, o Umi no au, o kau keiki."

            Alaila hii mai la o Liloa ia Umi ma kona uha, a honi ia Umi, me ka ninau aku, "auhea o Akahiakuleana?"

            I mai o Umi, "Ia ia nana no au i kuhikuhi mai e hele mai i ou nei."  Alaila, ha'i ae i ka poe me ia i kona mau mea ia Umi, "O kuu malo keia, me kuu niho palaoa, auhea kuu laau palau?"  Ha'i mai o Umi, "Aia no mawaho i o'u mau hoahele."  Alaila, kii ia mai o Omaokamau laua me Piimaiwaa.

            Alaila, ha'i o Liloa i kona poe kanaka apau, "I ka wa a kakou i hele ai i ke kapu heiau, ua kapa mai oukou ia'u he hehena, i kuu hume ana i ka malo lauki; aka, eia no ua malo la o'u, ame ka niho palaoa, ame ka laau palau.  Ua waiho au no ia nei, no kuu keiki.  O ka'u keiki keia, o Umi.

            Ike ae la na kanaka apau o Liloa, he keiki o Umi na Liloa.  Kena ae la o Liloa, "e lawe ia mai na akua ona e oki i ko Umi piko."  A ooki ia iho la ko Umi piko.  A lohe o Hakau, ka Liloa keiki mua, i ke kani ana o ka pahu, ninau mai oia, "He pahu aha keia?"  I aku kanaka, "He pahu oki, no ka piko o ka Liloa keiki hou, o Umi kona inoa."

            I ko Hakau lohe ana he keiki hou ka Liloa, hele mai oia me ka huhu nui, a ninau mai ia Liloa, "O kau keiki hou keia?"  A@ mai o Liloa me ka hooluolu ia Hakau, me ka i ana mai.  "O oe @ ke alii, o kou kanaka keia, maluna oe a malalo aku ia ou."  Pela o Liloa i hooluolu ai ia Hakau no kona huhu nui ia Umi, a oluolu o Hakau me ka hookamani.  I ko Umi noho pu ana me Liloa, malama pono o Umi i ka Liloa mau olelo, a malama nui o Liloa ia Umi; a ike mai o Hakau i ko Liloa malama ia Umi, huhu kona naau ia Umi, olelo kalaea wale mai o Hakau ia Umi i ko Liloa wa e ola ana.  Kaumaha ko Liloa naau no Umi, i ka huhu o Hakau.  Pela mau ka Hakau kue ana ia Umi, a hiki i ko Liloa wa i make ai.  I ke kokoke ana o Liloa e make, kauoha o Liloa no Hakau ka aina apau; aka, o ke akua me ka hale akua, oia ka Liloa i kauoha aku ai no Umi, malama no o Umi i ke akua.

            I ka make ana o Liloa, noho aku o Umi malalo o Hakau, a nui no hoi ko Hakau huhu mai ia Umi, a nui no ka hookae mai ia Umi.

            I ko Umi wa e hee nalu ai i ko Hakau papa, i mai o Hakau ia Umi.  Mai hee oe i ko'u papa, no ka mea, he makuahine noa wale no kou ma Hamakua, e kapu ko'u papa, he alii au.  I ko Umi hume ana i ko Hakau malo, hookae mai o Hakau me ka i mai ia Umi.  Mai hume oe i kuu malo, he alii au; he makuahine kauwa kou no Hamakua.  Pela no o Hakau i hoino ai ia Umi me ka hookuke maoli; alaila, hele malu o Umi mai o Hakau aku.  Eia ko Umi hoa hele, o Omaokamau, Piimaiwaa, o laua kona mau hoahele mua mai Hamakua mai a Waipio.

            I ko lakou hoi hou ana i Hamakua mai Waipio aku, ma ko lakou ala i hele mua mai ai, i ko lakou pii ana aku ma Koaekea hiki lakou ma Kukuihaele, alaila loaa ia lakou o Koi malaila, lawe ae la o Umi ia Koi i keiki hookama nana, a ae mai no o Koi, alaila hele oia me Umi.

            I ko lakou hele ana aku a hiki lakou i Kealakaha, aia ko Umi wahi i hanau ai, aole lakou i kipa i kona makuahine, no ka mea, ua manao lakou, e hele kuewa wale aku.

            No ia mea, hele aku lakou ma ka akau aku oia wahi, a komo lakou ma ko Hilo palena hema, malaila kekahi aina o Waipunalei ka inoa.  A no ke kokoke ana e po ka la kipa lakou e moe, a ao hele malaila aku; no ka mea, ua paa ka manao o Umi, e hele ku@wa oia a noho ma kahi nalowale no ka hilahila i ke kuamuamu a Hakau iaia.  I ko lakou kipa ana e moe, ike mai na kaikamahine o ia wahi, he poe keiki maemae lakou, koho mai lakou ia Umi ma i mau kane na lakou, a hoao ae lakou.

            Pakahi lakou i na wahine, aka, o Umi elua ana mau wahine, no ka maikai o ko Umi kino ke nana aku.  I ko lakou noho ana mailaila, kuka lakou e huna ia Umi, aole e ha'i i kona inoa; kuka hou lakou, aole e hana o Umi, e noho wale no, a noho wale o Umi e like me ko lakou manao.  A i ko lakou liuliu ana malaila, hele aku o Piimaiwaa a me Koi me Omaokamau e mahi ai ma ke kihapai o ko lakou makuahonowai, aka, o Umi ka i hele ole.  I ko lakou hoi ana, mai ka mahiai mai, olioli ko lakou makuahonowai no ko lakou ikaika i ka mahiai.

            Aka, o ko Umi mau makuahonowai, kaumaha loa no ko Umi ikaika ole i ka mahiai no kana wahine.  A i kekahi wa hele lakou ma kahakai o Laupahoehoe e kahanalu, he akamai o Umi i ke kahanalu, a heihei ana, hooke ikaika mai o Paiea, ia Umi, eha loa ko Umi poohiwi ia Paiea, oia ko Paiea hewa i make ai ia Umi i ko Umi wa i ku ai i ka moku.  A hiki i ke kau aku o ua wahi la, holo o Piimaiwaa, Omaokamau me Koi i ka hoe aku me kamaaina o ia wahi.  I ka wa i loaa mai ai ka lakou aku, olioli ko lakou mau makuahonowai, aka o ko Umi mau makuahonowai, kaumaha loa no ko Umi holo ole i ke kaohi Aku me na lawai'a o ia wahi.  I mai na makuahonowai o Umi i kana mau wahine.  Ina paha ka puipui o ka olua kane, he kanaka lawai'a, ina ua ai ia ke Aku; aka, makehewa o ko olua mau kino iaia.  I kekahi manawa, ike mai na lawai'a he kanaka puipui o Umi, kii mai lakou iaia i kaohi Aku, ae aku no o Umi i ka lakou olelo, aole nae lakou i ike he alii o Umi, aka, ua kaulana ka nalo ana o Umi.  Aole nae lakou i ike o Umi keia.  I ko Umi holo ana e kaohi aku i ka wai, haawi mai ai kana aku e ka lawai'a, ike aku o Umi ua polalo mai ka lawai'a i ke aku malalo o ka lemu, aole o Umi ia ia nana.

            Aka, kuai aku o Umi i kana i'a me ke kaohi e, ka mea i haawi i i'a mai kona ia maluna mai, i mai o Umi, homai na'u kau ia iki, eia mai kau o ka i'a nui, a ae mai kela kaohi.  Aole o Umi i ai i na i'a nei, lawe aku no na Kaili, ko Umi akua, aia no ma kahi o Hokuli, ko Umi wahi i huna ai.  I kona holo pinepine ana i ka lawai'a, haohao o Kaleioku, i ka pi'o mau ana o ke anuenue ma ia Malau.  Manao o Kaleioku, o Umi paha kela, no ka mea, ua lohe ia ko Umi nalowale ana.  Alaila, iho mai o Kaleioku me ka pua@ a ike oia ia Umi e noho ana me ke ano hanohano, manao iho la o Kaleioku, he alii keia.

            Alaila, kaumaha koke aku oia i ka puaa ma ka i aku.  Eia ka puaa, e ke akua, he puaa imi ahi.  I ka Kaleioku kuu ana ai @ ka puaa, holo aku la ka puaa a ku ma ko Umi alo, alaila, huli hoomai ua puaa nei ia Kaleioku.  Ninau aku o Kaleioku.  O Umi an@ oe?  Ae mai o Umi, Ea, owau no.  I aku o Kaleioku.  E hoi kaua @ ko'u wahi.  Ae mai no o Umi, alaila, i ae kona mau makuahonowai ame kolaila mau kanaka apau.  He alii ka keia! o Umi ka ia! o ka Liloa keiki ka! ka mea a kakou i lohe iho nei i keia mau la @ nalowale!

KA HOPENA.

 

[image]

HUI HIMENI KAWAIHAU.           (Williams Photo)