Ka Nupepa Kuokoa, Volume XLII, Number 24, 10 June 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, IUNE 10, 1904.         3

 

KE KAUNAWAHINE

O KE

Kulanakauhale o Tarevis.

 

KE ALOHA I KA MAKA PAHIKAUA.

 

MOKUNA XXVIII.

 

"I HAAWI AU IA'U IHO I PANAI NO KOU ALOHA."

 

            "E hoomanao, e ka makua," wahi hou a Rodolofo i pane aku ai me ka leo oluolu,"o ke kumu o ko kakou Ekalesia he keiki oia na kahi kamana."

            "He keiki oia na ke Akua."

            "He oiaio no ia, aka aole e hiki ke hooleia ka'u i hoikeia ae la, a o kekahi no hoi o kekahi o kana poe haumana he poe lawai'a ilihu@. Nolaila, e ka makua ma kekahi ano ua like no ka lawe ana i ka meahou o ke kanaka kalepa waiwai silika me ka lawe ana i ko na Emepera. Ua maopopo loa anei ia oe ka'u mau olelo e pili ana i ke kanaka kalepa silika e ka makua maikai?"

            "E hoikeia aku i ka Barona Sigifarai vona Burunofela i ka maikai o ke olakino o ke kanaka kalepa waiwai silika ana i hele puai me ia no Tarevis."

"Alaila, e pakui hou aku oe, he hana maikai ka hoomau aku o ka Barona i ka hoomahuahua mau ana i ka ikaika kaua mai ka akau a ka hema aole no ke kaua aka no ka lawa o ka ikaika e malama ai i ke maluhia o ka aina, a ke hoopukaia ke kauoha e kona Emepera oia ana no ke alakai kiekie o ka pualikoa holookoa. E noi aku ana no hoi au ia oe e ka makua maikai e malama oe i keia olelo me ka pakui ole aku i kau ponoi ke waiho aku oe imua o ka Barona."

"E ha'i pu aku oe," i hoomau aku ai o Rodolofo i ka haawi manao ana oiai ua ulu hou ae la he manao hou e waiho aku ai i ka moneka, "aia a loaa hou mai na meahou pili i ka Emepera mai ka aina hemolele mai kahi ana e noho mai la, e hoouna mai oia ia meahou ma ou la i o'u nei i ke Kakela Turona a ia'u wale no hoi e loheia ai ia  mea."

"Aole, aka mai nei aku no wau e hoomau aku ai ma ka'u huakai, a hiki i ka hulihoi ana i Palanipoka."

"Ina manao oe e hoomaha iki alaila he hooikaika hou ana ia ia oe no ke koena o ka huakai ka mea hoi e hoohikiwaweia ai kau hulihoi ana no Palanipoka, aka, ua hauoli nui no wau ke hikiwawe kau hoi ana ilaila i ka manawa kupono no ka mea aole e nele ka olioli o ka Barona i kau meahou ke hoike aku."

Ma ka hoole ana mai o ka moneka no ka hiki ole iaia ke hoomaha aka no ka hoomau koke aku i kana huakai ua kauoha aku la o Rodolofo i ke Kapena Setnameta e lawe ma kapo aku i ka moneka no waho o ka pa, a i ua malihini nei a hala o ka hoeu ae la no ia o ke Kaunawahine Tekela no ka holoholo ana nawaho ma kahi o ka malapua ana i kanu ai no ka hoohala manawa ana.

Aia hoi na opio a elua ma ua wahi malapua nei he mala i paa pono i ka pua ame na mea ulu hoowehiwehi home, no ka mea he mau manawa nui ia i hala ae a piha ana ka elua makahiki, a ia laua malaila, aia hoi ke Kaunawahine Henerika ma ka lanai nui iluna kahi i noho nana mai ai i ka wahine opio me he la e kiai mai apa no, no ka mea, he nui ke aloha ona a ua pili aloha maoli no ua wahine no laua iho.

I keia ame keia manawa aole i nele ka hoopukaia o na olelo hoomakeaka no ka hoohanoli ana ia, laua opio iho, eia nae, ma ka aoao o ke kanaka opio aia kekahi haawina koikoi o ka manaolana olioli iloko o kona puuwai kahi i hakuko'i nui ai. Na keia mea no hoi i kono iaia iho e noho paahao iloko o ke Kakela Turona, a oia no hoi ke kumu okona manaoioia e ko loko iho o ke kakela aole oia he emepera aka he wahi kanaka opio hookunahihi a haua hookalakupua. Na ia mea hookahi no hoi i kaohi ikaika iaia e noho i Turona no kona makemake e ike pono i ke ano o ke Kaunawahine Tekela ina paha kona he aloha iaia ma ke ano hoaloha a i ole he ipo i aloha maoli ia e ia.

Ua maopopo no ia Rodolofo ua hiki iaia ke haalele koke ia wahi a hoi aku ma kona kulana mau a hoopuka koke ae i kona pualikoa holookoa malalo o kana alakai ana a waiho aku i kana koi i wahine oia nana, e like me na hana limanui a ke Kauna Bitarika ame ka Akibihopa Iseneboga eia nae aole oia kana manaoio pela ke kiina @onimana ana e lilo holookoa mai ai ka puuwai o ka wahine opio u'i iaia. Ua loaa iaia ka manaoio ina aole e lilo ka puuwai palupalu o keia wahine u'i iaia ma na hana maikai ana e hana ai ame kona ano ame kona kulana ana e lawehele ai iaia i kela ame keia la, a ina aole he wahi aloha iki iloko o ka wahine u'i i aloha ole iaia i wahine nana ma ka berita mare. A ua loaa pu iho iaia ka manaoio, a oia no hoi kona iini nui e hanaia mai pela, oia hoi, ina ua aloha io keia wahine opio iaia ma ke ano o Rodolofo ke kanaka maauauwa silika o Palanipoka, a aole ma ka Emepera o Palani poka, alaila o ka hooko ana ia i ka mea koikoi nui e haku'i mau ana iloko o kona puuwai--o kona aloha io i ke Kaunawahine Tekela.

I'a makemake nui oia e hoike aku i keia mau hakuko'i iloko o kona puuwai i ka wahine ana i aloha io ai aka aole i lawa ka wiwoole o kona noonoo e hana pela ia laua e kukaiolelo ana, eia nae, ua hooholo koke iho la oia ua hiki no--ina o laua wale no ma ke kukaiolelo ana no ia kumuhana.

"Ua nui kou makaukau a mikiala ma ka malama ana i keia @alapua," wahi a Rodolofo i pane aku ai, "aka he hookahi a'u wahi hoohalahala nou."

"No'u nei e kuu Haku," i pane aku ai ke Kaunawahine Tekela ma ke puiwa nui a alawa hikiwawe ae la kona mau maka maluna o Rodolofo.

"Ae, e kuu Hakuwahine. Ia'u ame ke Kauna Paele ame na koa o haawi manawa ana no ke ku kiai ana i ke kakela nei aole loa oe i kono kokua iki mai ma ia hana a hele holoholo ae hoi ma na wahi kiai e paahele ai hoi i na ko'ikaua a pahikaua hoi. O kau hana i hana ai maluna o keia kinapaipua aole ia he hana opa pu aku i ka ikaika o ka enemi aka he hana hoohihi mai i ka enemi i @ nei. O ka nani o keia malapua ame ke ala o na pua aole he kipaku enemi ka ilaila aka he mana ume a hoohihi manao ka ilaila. Eia nae, aole i nele ka hoohihi manao aku o na kiai o ke kakela nei i ka wehi o ka malapua. Nolaila ia'u e ku kiai ana i keia o a hiki i ka hora 12 o ke aumoe, ke noi aku nei wau i kou oluolu e hui mai oe me a'u ma kahi kiai mahope iho o ka pau ana o ka ainaahiahi o kakou. Ke noi nei wau ia oe ma ke ano he hana ia nau e hana ai. Pehea la ia?"

"Aole au he mea maka'uwale i ka hooko hana," wahi a Tekela, me ka olioli no hoi ka hoopuka manao ana, "alaila ma kela wahi ku kiai wau e kokua ai ia oe ma ka oihana kiai a hapai pu i na ihe no ke pale ana aku i na enemi e komo mai ana. A o kekahi no hoi he makemake wau e ike i na hiohiona nani o ka aina iloko o ka malamalama o ka mahina oiai he po mahina ana keia."

A e like iho la me ia hoopaa ana, a i ka wa i hiki mai ai ia manawa o ke ahiahi a e hooaumoe loa iho ana, ua ike aku la ke kapaka opio i ka u'i o Tarevis i ka puka kohana ana mai oia wale no me ka uhi keokeo lahilahi e uhi ana iaia mai kona poo a hiki i ka nui kino, a i ka nana aku a ke kanaka opio i lilo ka puuwai no keia wahine u'i maikai, me he la, he anela kana e ike ana i ka hoounaia mai mai ka honua kamahao mai.

"hoomanao ae la ka hoi au no kekahi po." Wahi a Rodolofo i pane ae ai ia laua i hui ae ai. "E pa konane ana no hoi ka mahina ae kahe ana no hoi ka wai o ka muliwai me ka malie. Ke hoomanao no anei oe ia'u e ha'i la?"

"Ae, e kuu Haku. O ka po ia a kakou i haalele ai ia Tarevis ma ka waapa iloko o ka muliwai Mosele."

"O kaua pu kahi."

"Ae, o kaua pu kekahi," i hoopili aku ai ke Kaunawahine Tekela i ka pane a ka Emepera me kona nana hoomahie pu ana aku i ke kanaka opio.

"He kuakai poina ole kela e like me ka poino ole ia o ke ala o na pua. Ua nalohia aku kona mau popilikia a koe iho la na pili aloha ana iloko o ka hoomanao. A o ia ano hoomanao me he moeuhane la ia i hoounaia mai mai ka honua mai o ka nani aole mai keia ao ae. Ke like la no anei kou noonoo me ka'u e kuu Hakuwahine?"

"Pela no," i panai aku ai ka u'i o Tarevis. "Aole he mea i oi aku ka nani mamua o kela o ka muliwai Mosele."

"He muliwai nani io no o Mosele aka i kela po poina ole ke manao nei wau ua oi loa aku kona nani ia manawa."

"Ke ike maopopo la wau ia mau hiohiona o ia po, a e ae mai e kuu Haku e hui pu aku me oe ma ia hoomanao ana, eia nae, aole i pono ka'u hana o ia manawa, a'u hoi i kaumaha nui ai i na manawa apau mahope mai a hiki wale i keia manawa ke noonoo ae, a he kinaunau nui hoi ia no'u. A'u e hoomanao la, ke ike la wau ia oe e ku kohana ana maluna o kela kiapohaku ma ka'e o ka muliwai kahi hoi o ka hana maikai ole a'u i hana ai maluna ou a kipakuia aku la mai ka waapa aku, ka mea hoi a'u i minamina nui ai no'u iho i ko'u hana ana, oia hoi, mai kaikai loa ina wau i hana ole, eia nae, aole e hiki ke hoopau ae ia mea me he la aole i hanaia."

"He hiki ia'u ke hoomaopopo aku i keia manawa," wahi a ke Kaunawahine Tekela i hoomau aku ai i kana olelo, "ia oe e ku kohana ana iluna o ka pohaku ua like loa oe me ke akuamuliwai o ka Mosele e ku ana iloko o ke konane la'ila'i o ka mahina, a oiai aole he wahi hilinai iki o'u nou ia manawa--a oiai he malihini loa oe ia'u ia manawa, ua ike wau no'u iho me he la he mea aie a e hoole ana i ka uku ana i ka auhau kupono o ka holoholo ana maluna o ka muliwai, a'u lanahele ana maluna olaila au e ku kia ana."

"A, ma ia mea, e kuu Hakuwahine, o ka hoopaneenee maeu ana i ka uku auhau ana ke hoomahuahua mau ana ia i ka aie ma ka ukukuala e koikoi loa ai ke koi ana a ka mea ohi auhau i ka wa e hiki mai ai ka manawa hope loa no ka uku ana. Nolaila ke noi nei ke akuamuliwai ano no ua auhau la me ka ukupanee o elua makahiki e kuala palua ana i ka manawa e uku ai."

Pela!" i hooho ae ai ke Kaunawahine me ka pupuku ana iho o kona mau ku'emaka me he la e noonoo ana, a hohola mai la i kona mau poholima a elua imua o Rodolofo me ka heneaka iki ana iho, laaila pane hou mai la: "ke manao nei wau ua banakarupa wau. I ka manawa e lanakila ai keia paio, e like me ia e------"

"O ka paio hea e kuu Hakuwahine?" i kahamaha aku ai o Rodolofo.

"O, keia paio o Kakela Turona," i pane aku ai ka wahine opio. He paio e ae anei kekahi?"

"Eia he hookahi iloko o'u i keia manawa, a'u e hilinai nei oia paio kekahi e lanakila ai e like me ia lanakaila ai ke kakela a haule hoi na Akibihopa. Aka ina e haulehia ana ke kakela Turona alaiala haeha aku, e kuu Hakuwahine?"

"Alaiala, maopopoloa ko'u banakarupa, no ka mea, e lilo aku no kuu poe aina apau a e ili mai no kekahi mau hookaumaha ana maluna o'u. Me ia mau aina ame na kakela i lilo aku la, pehea la e hiki ai ia'u ke uku aku i kuu aie ke koi mai ke akuamuliwai o Mosele no na auhau o kuu holoholo ana maluna o kona muliwai; a ina no oia e kala mai ana ia aie o'u mamuli o kona lokomaikai wale mai, i ke kala ana aole no ia he mea e pau ai ia aie?"

"O ke akuamuliwai, e kuu Hakuwahine, aole o na kakela ame na aina kana koi. Ina o keia mau kakela ame na aina ke panai ma nawalea ia mai i ke akuamuliwai aole no lakou e lilo i mau mea waiwai nui iaia a oi ae mamua o kahi kiapohaku ana e ku ana i kela po, a ina e panaila mai o Mosele holookoa iaia no kana koi aole no e lawa lakou i me e pihaku'i ai kona iini."

"Alaiala, aole aku la oia he akuamuliwai aka he mea kalepa waiwai alunu no Palanipoka."

"Oia maoli no aeao; aole oia he akuamuliwai aka he mea oia nanan ke koi aie kahua ole, a aohe ana wahi kuleana koi, eia nae, koi no. a ua oi aku kona alunu mamua o ka mea kuai moraki, no ka mea ua ike no oia aole i aieia kana eia nae, koi wale aku, he haawina hoi e hana ole ia e kekahi mea kuai moraki i ka mea i aie ole i kana. A no kahi hana ana i haawi ai no ua mea la a pulamaia mai ai oia e ia oia iho la kana mea e noonoo nei he aie, eia nae--e kuu Hakuwahine, o na mea e hua'i aku ana, o lakou iho la no na hoike no ua mea koi aie la no kona pulamaia ame ka ole," a ia Rodolofo i hoopuka ai i keia mau olelo hope ua ulupuni ae la oia i ke aloha no ka wahine ana i aloha ai i ka mua loa o ka ike ana a kona mau maka maluna o na hiohiona nani, ka wahine no hoi e ku la imua pono ona, a kahe aku la na olelo mai kona waha aku e wehe ana i ka pana ikaika o na kahuko'i o ke aloha mai kona puuwai aku i moelolii no na makahiki elua a oi: "Ke ku nei wau maanei imua ou e kuu Hakuwahine aohe aina, aohe kakela aka he manao ko'u--o ke keonimana ina e ulu mai kekahi ninau mai kekahi kanaka mai no ko'u kulana e like ka hanohano me ko ka Akibihopa iaia iho, aole au e hoohakalia i ke kanana ana ia hoohalahala me kuu pahikaua, no ka p@mau ana i ko'u kulana ame a'u pu ame ko'u kuleana pu."

"Nolaila, i ke kapae ana i na kuleana apau," wahi a Rodolofo i hoomau aku ai i kana olelo, "na aina, na kakela ame na mea e ae i kuleanaia e oe a e a'u, ua oluolu anei oe e kuu Hakuwahine Tekela e hoopaa mai i kou limaakau iloko o kuu poholima kalaneo nei, a i mai e Rodolofo, ke lawe nei au ia oe i kane na'u?"

Aia ka emepera ke ku oeoe la me kona mau lima a elua i uhola aku imua o ka wahine opio me na poholima i mohala, a o ka wahien opio no hoi aia imua pono o ke kanaka opio aole i mamo loa, e kulou ana kona poo a emoole leha ae la kona mau maka palupalu mai ka nana ana i kona mau wawae aulii a ka mahina e pa konana la'ila'i iho ana, alaila me ka hikiwawe ua waiho aku la oia i kona mau lima iloko o ka puili ana o ko Rodolofo, a pane aku la me ke ano pihoihoi:

"E Rodolofo, e Rodolofo, he aelike naaupo loa keia au i hana iho nei a aole he kupono ia'u ke lawe mai. Ua oi loa ae ka maikai o keia aelike mamua o'u no ka mea aole au i kulike me ia. E kali, e kali iki a hiki i ko'u manawa e ike ai au i ko'u mau mea e kuleana ai. Aia a lilo wau i mea ilihune like loa me kekahi mau wahine opio hana o Alakena ae nei alaila ia manawa oe e noi mai ai ia'u nau e Rodolofo. A oia ka manawa e like ai kaua, a e kohu pono ai ka'u pane no kau noi."

"Aole e Tekela, e pane mai no oe ia'u ano--i keia manawa no."

"Ke opiopio nei no oe, e Rodolofo. O kou manaolana nou iho e ia imua aku i ka manawa e hiki mai ana, a aole he mea pono e lilo au i mea ke'ake'a i kou nee mua ana. Ua ike wau ua komo oe iloko o ka hale ohana maknahana, a o kuu pili hookahi nei aole i hiki iaia ke kau pale aku ia oe me ka maka o kana pahikaua. Ua hoomaopopo wau i ka hoopilikia ia mai maluna o kakou, eia nae, iloko o ia kulana kupilikii ua papau loa mai no ko'u hoomaopopo ana ia mau kulana pohihihi a hele mai la iwaho nei me ka olioli nui e hui pu ai me oe. E noonoo pono oe e kuu Haku i kau mea e hana nei; aia na Akibihopa he mau enemi ikaika loa nou a aohe he mea pili o'u i lawa ka ikaika e komo kokua ai ia oe, a e noho hoaloha pu ai me oe. E kali, e kali hoomanawanui oe no ka hooko ana i keia noi, mai pupuahulu."

"Ua kali wau--a no elua makahiki wau i kali hoomanawanui ai. Ua makemake wau e paneia mai ka'u noi e kuu Hakuwahine Tekela."

"Aole, aole pela. Na ka pa konana la'ila'i o ka mahina i keia po ka mea nana i hoouluku mai i keia mau manao hikiwawe o kaua,--o na olelo hoomanao o na hana o ka muliwa na mea nana i hoopouli ae i ko kaua noonoo maikai, a'u hoi e noonoo nei, me he la owau kekahi o na Lorelei o ka Mosele e makemake ana e lumai i na kanaka opio iloko o ka poino mau loa. Aole hoi au e lilo i Lorelei o ka Mosele."

(Aole i pau.)

 

MAKAIKIU

 

WETE DETONA

 

Ke Ahi Lalapa Pio ole i na Nihiliti Ke Kanaka Amerika Koa lua ole

 

MOKUNA III.

 

HILIKAU NA PAHIKAUA.

 

Puili ae la ke kaunawahine i kona mau lima iluna o kona mau maka, a mahope o ka hala ana o kekahi manawa, e paio ana hoi kona mau noonoo iloko ona, pane mai la oia me ka ha'uha'u o kona waha:

"Ua aloha kuu kaikunane ia Kaunawahine Alazamofa."

"A pehea hoi ua kaunawahine la?"

"Ua aloha iaia Ivana."

"A pehea hoi o Ivana?"

"O, aole ona makemake i ua wahine la; ua nui kana mau olelo hoino iaia," i pane aku ai ke Kaunawahine Radolinisiki me kona mau maka kiena.

"Eia nae hoi, ua hoopalauia laua?"

"Pela io no, aka i kona manawa i hoolauna loa aku ai me ua wahine la, ike iho la ia aole keia he wahine, aka he holoholona hiena no na kuahiwi, he mea lohe ole mai i na olelo maikai."

"Ahe! He mau punalua ka olua a aumeume nei i ka paukuiwi hookahi," wahi a Wete iloko iho ona, a pane aku la: "Alaila o ka olua ka hakoko a o Ivana ko olua lunakanawai?"

"Aole na maua e hakoko," wahi a ke kaunawahiine, a ia manawa pu no hoi i hiena hou ae ai kona mau maka.

"Eia nae hoi o ia iho la ke ano ma kau mau olelo i ha'i mai nei. Pehea la, ke maopopo loa nei anei ia oe, aole io no i aloha aku o Ivana i ke kaunawahine?"

"He oiaio keia, no ka mea he hoowahawaha loa oia i ua wahine la."

"Malia paha ua hoopunipuni mai o Ivana ia oe?"

"He aha ia? A, aole oe i ike i ko Ivana ano!" wahi a ke kaunawahine i pane mai ai, a maluna hoi o kona mau maka ka nanaina hoowahawaha, a loli ae la i hoomahie, e hoike ana hoi aia iloko o kona naau ka haaheo ana no Ivanan Horawiki Opio.

"Eia nae hoi aole no paha i nele ko Kaunawahine Alazamofa aloha no Ivana?"

"He aloha kona i like me ko ka tiga aloha i ke koko o kekahi mea ola. O, mai luliluli mai kou poo no keia mau olelo a'u ia oe. Ke ha'i hou aku nei wau ia oe aole oia he wahine. He mea aoiaio e hana no keia wahine i na hana apau e hiki ai iaia ke kaili aku ia Ivana Horawiki nana."

"A pehea hoi e lilo mai ai ka make ana o kou kaikunane i mea nana e hookaawale aku mai ia oe aku i kau mea e aloha nei?"

"A, ina no hoi a owau wale no ka mea e hoohuoi nei, pehea hou aku?"

"Alaila ke hoohuoi nei oe nana i hanai i ko kaikunane i ka laaumake i mea e kau mai ai na poino maluna ou?"

"O, heaha aku la ka'u i ha'i aku nei? He mea hewa loa ka hoohihia ana aku ia'u e like iho la me keia! A ke ha'i aku nei wau ia oe ua ae wau aole loa wau e kamailio iki no ka'u mea i hoohuoi ai."

"Ia wai keia ae ana au aole loa e kamailio no kau mea i hoohuoi ai?"

Ia Ivana."

"Alaila, oia no ka kekahi e hookuoi nei e like me kou?"

"Mai ninau mai oe no ia mea."

"Aka hoi, e kuu madame maikai,e pono ia oe ke loaa keia manao, eia wau ke hana nei no kou pono ame ko Iavana."

"O kau ia i ha'i mua mai nei ia'u."

"A ma keia hana au e hana mai nei imua o'u, ku hoike mai nei oe i kou hilinai ole maluna o'u, ka mea hoi i haalele aku i kona noho lanakila ana a hookomo mai i kona poo iloko o na pilikia no kou pono ame ko Ivana."

"Alaila, heaha ka'u hana e hana aku ni?"

"E hilinai piha mai maluna o'u, e kau kaunawahine maikai. Imua o na lani, he hookahi wale no a'u hana e kau nei imua o ko'u alo, a oia no hoi ko Ivana pono. No keaha la oe e hilinai ole mai nei maluna o'u? e kau mai kou mau maka maluna ou. Pehea, ua like anei wau me kakahi kanaka lapuwale?"

"Eia nae, ua hookau mai oe i ka maka'u maluna ou, iloko no nae o ia hilinai o'u ia oe."

"No keaha hoi?"

"Ua like oe me kekahi keiki, aneane no e like me kakahi keikikane nuku, a ua like hoi kou maalea ma kekahi o na Uhane Lapu."

"A," wahi a Wete i puana ae ai me na minoaka e kau ana maluna o kona nanaina opiopio, "o ua maalea la au i ike mai nei, eia ke hoohana ia nei no Ivana a me oe pu no hoi, ina no nae oe e ae mai ana e hoohui pu ia oe iloko o keia. A ina ho hoi aole oe e ae mai ana e lawe aku i ka'u kokua ia oe, heaha ka mea i hiki ia oe ke hana aku. Iawai oe e hele aku ai kokua nou?"

"E hai mai i kou inoa, ina nae oe e oluolu mai ana," wahi a ke kaunawahine mahope o ka lana ana mai o kona mau manao anoe.

"O Wete Detona ko'u inoa," i panai aku ai ka kakou opio, a ia manawa pu no hoi i ku ae ai oia iluna a haawi aku i ke kunou hoomaikai ana i ka wahine.

"E Wete Detona, ke hilinai aku nei o Vera Radolinisiki ia oe. Eia mai ko'u lima, a e ae mai e lawe aku i ko'u hilinai piha maluna ou. Ua ha'i mai o Ivana ia'u o keia ko Amerika rula o ka hookau ana o kekahi mea i kona hilinai piha maluna o kekahi, a ma keia no hoi, e huikala ia ae ai ka'u mau olelo mua i panai aku nei ia oe."

Lalau aku la o Wete i lima palupalu i paholaia mai imua o kona alo, elike hoi me kona lalau ana aku i ka lima o kekahi bebe, a no kekahi manawa kana paa ana, a pane aku la oia:

"Ke mahalo aku nei wau ia oe. Pehea ua loaa aku no anei ia Ivana he wahi hoohuoi no ko kaunawahine?"

"E hoolohe mai, a e ike oe i ke ino maoli. I ka manawa i make ai kuu kaikunane aia o Ivana i ka lumi hookipa ia manawa."

"O ia no paha ka lumi a'u i kali mai nei?"

"Ae. E kamailio ana o Ivana me a'u ia manawa me ua kaikunane la o'u a oia no hoi ka manawa i ike ai oia i ka eha. 'E make ana wau;' wahi ana i hoopuka mai ai, a ia manawa hookahi no hoi i hina iho ai oia iluna o ka papahele."

Maanei i paa ae ai o Vera i kona mau lima maluna o kona lae, me he mea la e pani ana i kona mau maka mai na haawina weliweli ana i ike ai maluna o kona kaikunane, a hoomau hou aku la:

"Me ka hikiwawe i hoopuka ae ai oia i keia mau huaolelo, 'Mai o Sofia mai nei wau. Nana wau i hani mai nei i ka laaumake. He nihiliti oia. Ua ha'i aku wau iaia ua like wau ia mea. Olelo mai kela ia'u e hele pololei mai no onei. O kona makemake e make wau maanei. E hoao ana oia ma na ano apau, e kuu kaikuahine, e hookaawale aku ia oe mai kau mea i aloha ai, no ka mea ua manaolana oia ma ia ano e hoi hou aku ai o Ivana me ia.

:Nana'ona'o maoli no kena! A heaha hou aku?"

"O, mahope mai maule iho la wau."

"Alaila o ka pau ae la no ia?"

"Aole, aole. Mai oi loa aku ina o ia iho la no hoi ka hopena! Ua kahea aku o Ivana i ko'u wahine lawelawe, a hele mai la no hoi ua wahine la a wehe ae la i ko'u lole ma ko'u ai, a hele aku la no hoi o Ivana no kahi e waiho ana ke kinomaku o kuu kaikunana. Ia manawa koke no i komo mai ai ka oihana makai iloko nei me ke noi ole mai; a i ka manawa i ike ai o Ivana i na makai ua huli mai la oia e lawe aku ia'u mailoko aku o ka lumi."