Ka Nupepa Kuokoa, Volume XLII, Number 24, 10 June 1904 — Page 1
| This text was transcribed by: | Lacie Taketa |
| This work is dedicated to: | Lisa & Lance Taketa |
Ka Nupepa Kuokoa
KE KILOHANA POOKELA NO KA LAHUI HAWAII.
HOOPUKAIA I NA KAKAHIAKA POALIMA APAU.
@ HELU 24. NUPEPA KUOKOA, POALIMA, IUNE 10, 1904 NA HELU APAU 3019
O Hearst ka na Democarata Moho
Malamaia ka Ahaelelo Democarata no ka wae ana i na Elele Lahui.
Pau mai ko Hawaii, Maui, Oahu a koe o Kauai Democarata ole.
Ma ka hora 10 kakahiaka o ka Poakahi nei i malamala ae ai ka halawai o ka ahaelele o na Demokarata ma Progress hall, Honolulu, Oahu, kahi i akoakoa ae ai na elele i koho ponoia mai na mahele koho o na apana koho o ka Teritore o Hawaii a koe ka moku@uni o Kauai ka aina Demokarata ole, oiai nae aole no i pau loa na mahele ko@o o kekahi mau apana e ae i ka hoouna mai i ko lakou mau elele, a ma keia halawai no hoi i ikeia iho ai ka nui o na elele ma kahi o 200 a oi, a iwaena hoi o lakou kekahi hapa he poe Home Rula o na kau i hala.
Ma ka hookahua loa ana iho i ka halawai ua lilo ae la ka hanohano o ka lunahoomalu ana ia Konela C.P. Iaukea kakauolelo, ia D. W. Ewaliko makai ia M. Hafferman; kokua makai ia Koahou; ia F. W. Weed ka ma@lelo. He hana keia i waihoia iloko o kekahi komite i koho ponoia no ka wae ana i na lunanui a i ka waihoia ana mai iloko o ka aha i aponoia ae ai na keonimana i hoike mua ia ae nei.
A maloko no hoi o ke komite i waiheia ai ke kumuhana o ke kukulu kahuahana Demokarata a lilo ae la ka hanohano o ka haku manao ana i keia mau keonimana—C. W. Ashford, John Emmeluth, Keikialii Kawananakoa, Hayselden, T. B. Lyons, Frank Harvey, C. P. Iaukea, Ewaliko ame W. A. Kinney. Ua kapaia no hoi keia komite ke komite o na olelo hooholo.
Ma ka manawa i noho hou mai ai ka aha mahope iho o ka hoomaha ana a o ka noho ana keia i ka auwina ia o ka ia hana, a o keia no hoi ka manawa a ke komite o na lunanui i waiho mai ai i ka lakou hoike a kohoia ai o Iaukea i lunahoomalu ua waihoia mai la ka hoike a ke komite olelo hooholo pili i ke kahuahana o ka aoao Demokarata a aponoia ka hoike mahope iho no nae o ka paio nui ana maluna o ka pakui i waihoia mai e Mr. P. Woods e olelo ana e hele na elele Hawaii Demokarata i Sana Lui i ka Ahaelele Wae Moho Peresidena no ke koho ana ia Hearst i moho peresidena Demokarata.
Alaila laweia ka noonoo ana i ke koho elele ana i ka Aha Lahui Nui o na Demokarata a ma ka Emmeluth noi ua makemake oia i elua elele no Hawaii, hookahi no Maui a ekolu no Oahu, a huiia eono elele ka huina nui. He pakui na McCarthy ma ka lawe ana i elua no Hawaii elua no Maui a elua no Oahu, a na kekahi iaia ae hoi i elua no Hawaii, hookahi no Maui, elua no Oahu ame Kauai, eia nae ua hoohalahala ae o Emmeluth oiai aole he aia no Kauai e komo mai ai. Aole i hoouna elele mai o Kauia i ka Aha oiai aole oia i ike i ke kupono o ka hoouna elele ana i ka aha.
A mahope o ka hoomaha ana a noho na halawai kukakuka liilii kahi i noonooia ai na moho elele a ka aha nui e koho ai, a i ka wa i noho hou ai ka aha ua waihoia mai ka papainoa o na moho a ka aha hoi i apono ai me ka lokahi i paninaia hoi me na leo huro ekolu. O keia malalo iho ua papainoa nei—Oahu, Elele C. P. Iaukea, Kauka Noblitt, Kokua: Lunakanawai Galbraith, R. B. Kid.
Hawaii—Elele, Palmer Woods, J. D. Easton, Kokua; A. K. Nawahi, S. H. Ka-ne.
Maui—Elele, T. B. Lyons, J. L. Coke, Kokua; L. R. Crook, Painaiki.
Na Hayselden he noi e haawi a’oia na elele Hawaii apa@ no ka hele ana i ka ahahui elele wae moho peresidena i Sana Lui, Amerika no ke koho ana ia Hearst i moho peresidena no Amerika Huipuia ma ka aoao Demokarata; a maluna o keia kumuhana i nui ai ka manawa hoike manao o na lala o ka ahaelele. Ua hoike pu ae o Hayselden i ka loaa pu ana mai he mau mana koho he umi-kumamakahi-pau loa no ke kakoo ana ia Hearst.
He elele Hawaii no Oahu ua hoike manao ae oia i ka maikai ole loa o ke kupee ana i na elele no ke koho wale ana no ia Hearst, a na Sullivan he kakoo no Hearst no ka mea wahi ana he kanaka o Hearst e imi ana no ka pono o ka limahana. Wahi ana he kanaka ilihune ka limahana iloko a Amerika Hui@uia a ke hele loa aku nei i ka ilihune a o ke kanaka waiwai hoi ke oi loa aku nei kona waiwai a mamuli no keia o ka hoopakele mau o ka aoao Rpubalika.
O Frank Harvey ua hoike ae oia i kona manao ku-e i ka hoouna elele me na a’o no ke koho ana ia Hearst, no ka mea wahi ana ina nei no ka hoounaia o na elele no ke koho ana iaia a ina e oi ae kekahi moho mamua o Hearst alaila aole e nanaia mai ana keia poe elele Hawaii e ua mea la i puka mamuli o ko lakou (elele) ku-e ana iaia ma ke koho ana ia Hearst.
O ke Keikialii Kawananakoa kekahi
(E nana ma ka aoao 2.)
IKE O RUSIA I NA OULI KAUMAHA
NA HOOIA LONA KAUA
Wasinetona, Iune 5, 1904.
Loaa ma ka hora 9:40 a. m.
I KO IAPANA KANIKELA ma Honolulu,
Penei ka hoike a Adimarala Togo.
“ E like me ka lono telegarapa uweaole i loaa mai ke kapena mai o ka mokukaua Chitoes, e holoholo ana hoi mawaho o Poto Ata, ua ikeia aku he eha mau kiamoku me na pono telegarapa uweaole, iloko o ke awa o Poto Ata a ua ike pu ia aku no hoi he pahu kikowaena iluna o Laotishan. Ua loheia kekahi pa-hu nui iloko o ke awa a ua ikeia aku ka pii ana ae o ka uwahi nui e hoomau ana hoi i ka hoopa-hupa-hu ana ma ka Poaono nei.”
TAKAHIRA.
Wsinetona, Iune 6, 1904.
Loaa mai ma ka hora 3:15 p. m.
I KO IAPANA KANIKELA ma Honolulu,
Penei kekahi hoike a Adimarala Togo
“Oiai ko kakou mahele elima o na moku topito e holoholo ana a e paa ana i ka nuku o ke awa o Poto Ata ma ka la 4 iho nei, ma ka hora 7:40 p. m., ua ike aku la lakou i ke pa-hu ana o kekahi mokukaua lawe pu o Rusia i like aku kona ano me Gilkyak, mamua iho o Chentanshan, me he mea la ua hoopa-hula e kekahi o ko kakou mau mea hoopa-hu. Ua hoopoino hou ia kekahi mokukaua lawe pu, a o ka waapa mokuahi i olii mai ai iwaho no ka hookaawale ana i na mea hoopa-hu ua hoi hou aku la iloko o ke awa o Poto Ata me ka awiwi.”
TAKAHIRA.
Wasinetona, Iune 7, 1904.
Loaa mai hora 9:20 a. m.
I KO IAPANA KANIKELA ma Honolulu,
Ua hoike mai nei o Adimarala Togo ua maikai ka hana hookaawale i na mea hoopa-hu i hoomoeia ai iloko o ke kaikuono o Talienwan a ke nee nei imua iloko no nae o ka inoino o ke kai. Ua loaa aku he kanaha-kumamakahi o na mea hoopa-hu a ka enemi, mai ka la 3 a hiki i ka la 6 o Iune a ua pau aku i ka hoopa-huia. O kekahi Pake i pailata aku i ka enemi ma ka hoomoe ana i keia mau mea hoopahu, oia ke hana nei i keia hana ma ko Iapana aoao. He hookahi ko-wa i loaa ae nei i keia manawa a ua hiki i kekahi moku papau mai ke komo aku iloko o ke kaikuono.
TAKAHIRA.
CRIPPLE CREEK, Iune 8.—He kanalima mau limahana union i pau akunei i ka hookukeia mai nei aku.
CRIPPLE CREEK, Iune 7.—He maluhia ke kulanakauhale i keia la mahope o ka hakaka ana a ka poe hoohaunaele. He umi-kumamalima poe i make a he ewalu poe i eha o ia ka hopena o ka hakaka o ka la inehinei.
Eia na aliikoa ke kipaku nei i na limahana union me ke kauoha aku ia lakou aole e hoi hou mai.
KO IAPANA PUALIKOA HELE WAWAE E NAUE ANA NO KAHI HOOLULU KAAAHI O TOKIO.
HOONEE O IAPANA I KE KAUA NO POTO ATA.
NA LONO KAUA, AUWINA LA, IUNE 2.
ST. PETERSBURG, Iune 2.—Ua hoikeia aku i ko Rusia mau Generala eia he 80,000 ka nui o na koa Iapana e noho nei ma ka anemoku o Liaotung a he 125,000 ma ka Hema o Manchuria.
NA LONO KAUA O KA LA 3.
VANZALEN, Iune 3.—Ke hoolele hou ae nei na Kepani i kekahi mahele koa o 50,000 ma Takushan.
NAGASAKI, Iune 3.—O na moku lawekoa i piha me na koa ke haalele nei i na awa o ke komohana o Iapana i kela ame keia ia.
NEWCHWANG, Iune 3.—Ua hala aku nei o Generala Stalkenberg o Rusia me 14,000 koa mai ka hema ae o Liaoyang no Wafantien.
ST. PETERSBURG, Iune 3.—Ua telegarapa mai nei o Generala Kuropatkin aole i loli ae ke kulana ma Fengwangcheng. Ua haalele na Kepani ia Saimatszu (Samatki), a ua hoi hou ae na Rukini malaila. Aole he loli o ke kulana ma Newchwang a i ole Kichow.
LADANA, Iune 3.—O na lono telegarapa mai na wahi like ole mai ke hooiaio mai nei i na lono e hoao ae ana o Generala Kuropatkin e hoonee kaua aku no Poto Ata.
PARISA, Iune 3.—Ua loaa mai nei ka lono e hoike ana o kela 30,000 koa i manao mua ia ai e hoouna ia aku no ke kokua ana ia Poto Ata aole loa e hoouna ia aku ana. Ua haaleleia ia papahana a e waiho ia ana na ko Rusia mau koa e noho nei malaila e malama ia wahi.
CHEFOO, Iune 3.—Ua loheia aku nei ke kani mai o na pu mai Poto Ata mai.
LIAOYAN, Iune 3.—Ua lele hou ae nei he 15,000 koa Kepani ma Takushan, a ma keia ua hiki aku ko Iapana heluna o na koa malaila i ke 65,000 i makaukau hoi no ke kaua mai keia wahi aku.
TOKIO, Iune 3.—O ka nui o ka poe i poino ma ke kaua o Nanshan Hiia i ka manawa i lelekauaia ai o Kinchow he 744 poe i make a he 3,500 poe i eha.
NA LONO KAUA O KA LA 4.
ROMA, Iune 4.—Ua hoikeia mai nei ua lilo ae nei i na Kepani ko Rusia palekaua waho loa o Poto Ata mahope o ke kupale ana mai me ka nui ole o ke kaua. Ua hoao ae na mokukaua o Rusia e puka iwaho o ke awa, aka nae ua hoi nui hou aku iloko.
NEWCHWANG, Iune 4.—Ua kaumaha na kamaaina Rukini maanei no na ouli e ikeia nei. Eia ko Harbin mau halewili ke wili mai nei i ke ao ame ka po ko Manchuria kau huita. Ke hooikaika nei na poe mahiai o Rusia e hoonui aku i ka lakou mau mahinaai.
MUKDEN, Iune 4.—Ua lono laulahea wale ia mai nei eia ke kaua hahana ke kaua ia nei ma ka anemoku o Liaotung.
NAGASAKI, Iune 4.—Ua olelo ae na Kepani o ke kumu o ka nui loa o ko lakou poe i make a i eha mamuli no ia o ko lakou kuhihewa ana i ka hae keokeo a na Rukini. Ua oleloia ae ua lawe ae na Rukini i ka hae keokeo haawipio a na keia mea i kono aku i na Kepani e hoikeike i ko lakou mau wahi i kupale ai, a ma ia hana ana ua kiia mai lakou.
ST. PETERSBURG, Iune 4.—He kaua ikaika ia e paioia mai nei ma ka akau o Feng-wang-cheng, pela ka hoike i loaa mai nei. Ua hoauheeia aku na koa Cosaka.
SEOUL, Iune 4.—He lelekaua ikaika ka Rusia ma Gensan, ma ka aekai hikina o Korea.
TOKIO, Iune 4.—Ua hookohuia aku nei o Ilamuku Marquis Yamagata i alakai nui no na Pualikoa o Iapana e noho nei ma ke kahua kaua. E holo koke aku ana oia no ka anemoku o Liaotung.
(O Marquis Yamagata, ke Kepani i hookohuia ae la i alakai nui no ko Iapana mau pualikoa e ku nei ma ke kahua kaua, oia kekahi o na kanaka i kau aku na hilinai koikoi ana a kona lahui maloko o ka oihana kaua a he moolelo maikai hoi kona ma ke ano he alakai kaua. O keia no ke alakai nui kela kaua mawaena o Kina ame Iapana i ka makahiki 1895. Malalo o kana alakai ana i ke kaua aina ame ke kaua moana i lilopio ai o Poto Ata ia Iapana mai na Pake mai. He kanaka oia i kahiko ma ka oihana, a ua loaa ae na manao lokahi iloko o Iapana e hiki mai ana no ka manawa e lilo ai oia i alkai no kona lahui ma na kukai aupuni ana. O kona hoomaka ia ana e ike oia kona komo ana iloko o ka hoohaunaele kuloko, a i kona manawa opiopio loa no kona komo ana, a oia no hoi ka haunaele i hoopauia ai na hna limanui a Tycoons, ke poo nui o Mikado. I ka makahiki 1869, ua hoouna aku ko Iapana Emepera iaia no ka huli ana i ko Farani ame ko Pelekane kulana lawelawe kaua, a i Farani oia i ka makahiki 1870, ka wa hoi e aumeume ana ia aupuni. I kona huli hoi ana no Iapana i ka makahiki 1879 ua hooliloio oia i Kuhina Kaua, a he mea maopopo loa o keia nee ana o Iapana ma ke kulana kaua malolo no ia o na kuhikuhi ame na alakai ana a Ilamuku Yamagata. He ohana oia no kekahi koko kiekie loa o Iapana, a o kona makuakane oia kekahi o na haku mele kaulana o Iapana.)
NA LONO KAUA O KA LA 5.
PARISA, Iune 5.—Ua hoikeia mai o ko Rusia mahelekoa mua loa he 14,000 ka nui o na koa, e alakaiia ana e Generala Stakebleg, oia ka Generala Kuropatkin i hoouna aku nei no ke kokua ana ia Poto Ata a ua hiki aku nei lakou i kahi e komo aku ai i ka anemoku o Liaotung. Mahope aku o keia ka pualikoa holookoa.
(E nana ma ka aoao 6.)
LAWE HOOPUNIPUNIIA
Ma ka Nupepa Examiner o Kapalakiko i loaa ae ai kekahi moolelo walohia o kekahi kaikamahine Hawaii e noho mai nei malalo o na malama ana a na hoaloha maikai ma Kapalakiko, he kaikamahine hoi nona na makahiki he umi-kumamaha, i laweia e kekahi Paele mai nei aku he ewalu mahina i hala ae nei mamuli o ka pelo ana o ua Paele la i ka makuahine, he kanaka waiwai oia a e lawe oia i ke kaikamahine no ka hoonaaua ana ma Amerika.
Mamuli o keia pelo ana a ua Paele la, a no ke ake waiwai no paha o ka makuahine o ua kaikamahine la, e moeuhane mau ana i na puu dala a ua Paele nei, na komolima daimana, na kula pepeiao olinolino ame na moeuhane palaualelo e ae a ua Paele nei e pelo mai ana, me ka noonoo oie iho no hoi o ka puniu Hawaii, he Paele kela he kanaka ike ia ma ke keokeo mai o na niho ame ka lewa mai o na maka, ua puni aku la no a kakau pulima ana i kekahi palapala a ua Paele la i wehewehe aku ai i ke ano, oia hoi he kahu oia no ua kaikamahine la.
Ua lawe aku ua Paele la i ua kaikamahine Hawaii nei a hiki i Kapalakiko maluna o kekahi mokukuna, a iaia iluna o ka mokukuna i maopopo ai iaia he kuke ka hana a ua Paele la, a ua hei hoi oia i ka upena kuu a ka lawai’a a ua hoopunipuniia kona makuahine, a ke laweia nei oia mak ke ano he wahine na ua Paele la. O rosie ka inoa o keia kaikamahine Hawaii. Ia Rosie i hooaopopo ai i keia fuluia o kona makuahine, ua hoopii oia imua o ke kapena o ka moku ame kana wahine a na laua i lawe ae iaia a malama.
I ke ku ana o ka moku ma Kapalakiko ua kii hou aku la ua Paele nei ia Rosie a lawe aku ia na Mrs. Haynes, e noho nei ma ka helu 915, alanui Powell, e malama. Ua ha’i ku la ua Paele la (o Wise kona inoa) he wahine o Rosie nana. Ua hoole aku o rosie i ka oiaio o keia mau olelo a ua Paele la, aka ua malama ae no ua wahine la la Rosie. Holo hou ua Paele la i kmoana a hoi hou i ka aina a kii aku la oia ia Rosie, aka ua hoole paakiki loa o Rosie a hiki i ka manawa a ua Paele la i hoopuka ai i na olelo ikaika. Hoopii o Rosie i keia hana a keia Paele maluna ona i ka Ahahui Malama o na Keiki Malamaole ia, a i ka wa i lohe ai o Lunakanawai Murasky i ka moolelo o na hana i hanaia maluna o keia kaikamahine Hawaii, ua waihoia aku o Rosie ma ka lima o ke kakauolelo i ka hui, Mrs. White, mamuli o kona hoike ana ae ua ike oia i kekahi ohana i hiki ke malama ia Rosie.
Ma ka hoaoia ana iho nei o ka ikaika o ka lawe olelo ana o ka telegarapa uweaole o Hawaii nei, i hoaoia hot mawaena o ko ka aina nei ame ko na mokukaua Amerika i haalele iho nei ia nei, ua ike ia ua aneane no e hiki na kukai ana i ka 300 mile.
Hui Alu Hana pu na Paahana
Ma Lihue, Kauai ka malamaia ana o ka Ahahui Paeaina.
No ka mua loa i Kohola ai na Lunanui i Kahunapule ole.
Ma ka la 1 o Iune, oia ka Poakolu i akoakoa ae ai na hoa apau o ka Ahahui Euanelio o ka Paeaina Hawaii no kona hui makahiki ana ma ka Luakini o Lihue, Kauai, a maluna aku o 65 lala ame na hoa i hoea ae, mai na kahu ekalesia, na kahunapule, ame na elele, a malolo no hoi o ka hoomalu ana a ka Lunahoomalu i koho pono ia o Lunakanawai H. K. Kahele, he mea hoi i poni ole ia ma ka oihana laa a o ka makamua no hoi keia o ka malele ana o keia kulana oihana mai ke kahunapule aku a ka mea kahunapule ole a ua hooko pu ia aku ia ano kulana hou ma ke kohoia ana o Lunakanawai David Kapahee ma ka oihana kakauolelo he haawina mua loa hoi o ka hemo ana aku o ia oihana m@i ke kahunapule aku oiai o ke kah@napule ka mea maa mau iloko o n@ Ahahui Euanelio o na wa i hala.
O keia no hoi ka Ahahui Paeaina mua loa i aui ae ai ke kulana mau i ke ano hou oiai ma keia ua hui pu ae na hoa paahana apau mai na Hawaii, na haole, no Pukiki, na Iapana ame na Pake, a e loheia ana no hoike manao ana ma o ka puunaue like ana iloko o na olelo apau, a ua maikai hoi me ke ohahia nui.
Ua maikai loa ka malamala ana o na lala apau o ka Ahahui e ko Kauai poe, mai ka hoolaka ana ia lakou me na home kupono a ua lawa maoli, a o na lala o na wahi loihi loa aku mai ka luakini aku aole lakou e ikeia ma ka pekipeki-wawae ana oiai ka Hon. W. H. Rice i komo maoli aku iloko o ka hooponopono ana me kona mau kanaka no ka hoolako ana me na kaa a ma na hana no apau o ka ahahui, a ma ka hoolako ai ana no na ai ana apau ekolu o ka la aole i nele ka ikeia o Mrs. W. H. Rice i ke komo hooponopono ana no na mea ai me kona poe hoahana o Mrs. Hanaike, Mrs, H. K. Kahele ame kekahi poe makuahine e ae o ka pono o ka Apana o Lihue, eia nae aia maluna o na komike na lokou keia mau hana hoolako i na pono o na lala apau ka ikaika ame ke koikoi o ka hooholo pono ana i na mea apau a aole he hoohalahala ana no ka lawa pono o na mea apau.
I ka la mua no i nee aku ai ka aha a i ka Poaha ae i loheia ai na hoike manao maluna o ke kumuhana—“ka Home, ka Ekalesia ame na pono kuloko” a i maweheweheia mai hoi e na haiolelo o ka la—Lydgate, David L. A-i, Kulika, Nakuina, Kalino, Emekona, ame Kodoma ke kahunapule Kepani. A mahope mai ma ia papa hookahi i ikeia ai na manao waiwai nui o Lono, Hanaike, Desha, Kapu, Poepoe, Mrs. Nakuina, Merille ke kahunapule Pake ame kekahi poe e ae maluna o na kumuhana ka home ame ka hoonaauao Kristiano, na kula aupuni ame na kula hanai a pela aku, a mailoko mai o na kumuhana i hueia mai ai na ino a kaula’iia ae la i ka la iloko o na lahui like ole—o ko na haole ka ikaika ma ka waiona ame na mea haumia e ae, na Ia@ana ame na Hawaii ma na mahele o ka nohona kuulala a o na Pake hoi iloko o ke puhi opiuma, a ua waiwai maoli ma ke kanana ana i na hemahema ame na ino e luma’i nei i ka poe noonoo oie, he mau manao hoi i hoikeia no ke ake e holoi pau ae ia mau ino.
Ma na hoike o na ahahui mokupuni i loaa ai kekahi mau ike no ka nee maikai o na hana a ka Haku, a oi loa iloko o na hoike o ka mokupuni o Maui kahi i loaa ai keia ike waiwai loa maloko o ka oihana kuia Sabati, na ia oihana i kokua pu aku i ke ola o na kahu ekalesia, he mea hoi i maa a ike ole ia iloko o kekahi mau mokupuni e ae, a oia wale no hoi ka mokupuni i kukulu ae i komite hoeueu iloko o na hana kula Sabati o umi-kumamalima lala—he umi-kumamakolu wahine a he elua kane.
Ma ka noho mua ana o ka ahahui kula Sabati ua kohoia ae o Hon. W. H. Rice o Kauai i Peresidena e hoopiha makalua ana i kahi i waiho hakahakaia e ka Hon. H. Waterhouse, a o ka hope Peresidena oia ke Komite Hoeueu Rev. E. S. Timoteo, kakauolelo Rev. L. K. Kakani.
Mawaho ae o keia mau ahahui aole i haule na hana o ka Ahahui Hooikaika Pono Kristiano ma ka hoomalu ana o ka Lunahoomalu Nakuina a iloko o na hana i awahaia mai e keia poe hooikaika i na hana maikai ua loaa no na manaolana mamuli o na hoike manao mai na hoa mai ma na manawa like ole i malamaia, a no ke koho hou ana i peresidena no ka makahiki e hiki mai ana ua pauaho ole ka hilinai o na hoa elele ia Mr. M. K. Nakuina ke kumu ona i hoomauia aku ai ma ia wahi.
(E nana ma ka aoao 2.)