Ka Nupepa Kuokoa, Volume XLII, Number 22, 27 May 1904 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, MEI 27, 1904.

 

NO KA MAKAHIKI $2.00

NO EONO MAHINA            1.00

SUBSCRIPTION RATES

ONE YEAR   $2.00

SIX MONTHS           1.00

 

            O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA, E HOOUNA PU MAI ME KA AUHAU, @ INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.

 

O na Dala apau o ka Pepa e hoouna pololei mai i ka HAWAIIAN GAZETTE COMPANY, LTD.

 

HOOPUKAIA E KA

 

Hawaiian Gazette Co., Ltd.

 

Hookomoia ma ka Hale Leka o Honolulu,

Panainau o Hawaii, ma ke ano

Mea o ka Papa Elua

 

DAVID L. A-I,          Lunahooponopono

S. K. NAWAA,          Kokua Lunahooponopono

A. W. PEARSON,      Lunanui

HONOLULU, OAHU.

-----

POALIMA     MEI 27, 1904

-----

 

IKEA I KE AKEA.

 

            O ka hihia apuka dala Aupuni o Mr. Edward Boyd, ke Komikina Aina Aupuni i pau a ke Kilohana e hoopuka aku nei ma keia helu, oia kekahi hooaiai ana o ka oiaio o ka olelo kaulana o ka Buke Nui, i ka hoikeia o na hana i hanaia ma na wahi ma-lu, ma ke akea, ke ku nae i kahi o ka io a aole wale no ma keia aka i na hana no apau i hanaia ma na wahi malu.

            Aole wale o ko Mr. Boyd aka o kona hoahana pu kekahi o Mr. S. Mahaulu, ke kakauolelo nui ana, a ma na mea i loaa mai, ua nui maoli keia mau dala e manaoia nei ua pokole oiai aia ma kahi o na kaukani-mawaena o $10,000 ame $20,000, eia nae hoi aole keia he hana hou me he la o ka hana koke ia ana iho nei no ia i keia mau la koke iho la, - aole pela aka he hana i hanaia iloko o ka manawa hookahi o na apuka dala mua iho o ke Aupuni i hanaia ai e na poo Aupuni o ia mau la. Aia ka hihia o keia mau kanaka ke ku nei, aka o ke ku nae i kahi o ka hewa mamuli aku ia e hoikeia mai ai i ka manawa e puka mai ai ka olelo hooholo o ka aha hookolokolo kahi e noii pono ia mai ai e loaa ai ka io, ina nae no ke ku io i ka hewa a i ole ua hemolele.

            No ka mea he pu-a hope loa ana mai nei keia o ka hana apuka dala, eia nae aole e kala i hanaia ai pela i ku ai ke poomanao o keia kinomanao i ua mea la ke ku nae i kahi o ka oiaio, a e ikeia no ia i ka manawa e puka mai ai ka olelo hoololo a ka aha.

            Nolaila aole keia he apuka hou koe wale no akahi no a ikea, eia nae aole no e kala i hohono mua ai ma o na apuka i ike mua ia a e lilo keia mau haawina hohono i mea hooemi mai i ka ikaika o ka pii mau okeia ano ino, oi loa aku ka maikai o ka hana ole ia ma keia hope aku, no ka mea i ka makou noonoo iho oia wale no ke alanui e pau ai, a e hana ole aku ka poe i aihui ole.

            O ka mea i ku i ka hewa o keia ano aihui i ka ha'i aole he hoohalahala i ke kupono o ka hoopa'i ana, oiai he mea pono e hoopa'iia me ka nana ole ae owai la ia, oia hoi, ke ku ikahi o ka hewa aka, mawaho ae o keia kupono i ka hoopa'i ua kauhihi aku ka ino - o ka mua maluna ona iho oia kona auamo i na ehaeha a o ka lua he hoohohono aku maluna o kona ohana, o ke kolu he hoohohono maluna o kona lahui ame kona aina ame kona aupuni. Aka no keia mau hihia apuka e ku nei i keia mau la e kali aku a puka mai ka hua, ka wa hoi e ku io 'ai i ka hohono a aole paha.

            Ua oi aku ka maikai o ka olioli iho i kau ponoi mamua o ka hana aku ina nei no ma na mea liilii, a he hoopakele ana mai no ia i ke kanaka mai ke komo hihia aku iloko o na imihalaia mai oiai he wa imihaia a elieli aku malalo ka hana o keia mau la i haule mai ai ka makamaka. Ma ko makou noonoo iho he mea kupono e hoopa'iia inba i ku i ka hewa aole o ka po'ipo'i wale a huna paha me ka nana ole ae ina he Hawaii ka mea nana i hana a i ole he haole paha a kanaka o ka lahui e ae. O ka makemake o ke kanawai ke pono e hookoia kekahi kumu e pahoia ai na eheu o ka maluhia.

-----

 

KE KULA HANAI O KOHALA.

 

            Mawaho ae o na hooaiai o na manao o ke kumupoo o ke Kula Hanai o Kohala e pili ana i ka hookumuia ana o keia kula kaikamahine iwaena o na Hawaii, aole i nele ka loaa mua o ia mau hiohiona o ua kula nei iloko o na hoomanao ana o ka poe kahiko o Hawaii nei mai na oiwi Hawaii a na haole kamaaina, a makou no hoi e hoomaopopo nei o ka poe malihini no kekahi i noho loihi iki ianei a heluhelu nui i ka moolelo o keia kula hoowaiwai nui iwaena o ko Hawaii nei poe.

            Ua loaa keia ike ia lakou, e like me ia i hoikeia iloko o keia mau manao hooaiai o ke kumupoo, oia hoi, malalo o ke kukulu ana a Mr. Bona a i ka wa kahiko i hookumuia ai a ua mau mai kona oia a hiki wale i keia mau la ano hou o ka aina a makou hoi e hilinai nui nei e mau aku kona oia no ka pomaikai pililaula o na makaainana o Hawaii nei iwaena o na kaikamahine no ka hoonaauao ana ia lakou e lilo i poe malamalama aole wale iloko o na hoonaauao ana o na hana akamai ame na ike o ka honua nei aka o ka ike i ka pono nui ka mana hoi nana e hookele holomua i ka naauao i loaa mai.

            Ke kokua nui nei makou i keia mau manao o ke kumupoo o keia kula a i ka makou noonoo iho aole wale i na kumukula ka holomua o keia hana hoomanao i na kaikamahine aka aia no kekahi maluna o na makua mea keiki - oia hoi, ma ko lakou aoao ka makou e hoonaauaoia na kaikamahine, ina pela e hoounaia ilaila e pono ai, a o ka hoopuipui ana aku no ia i ke kula a oia no hoi kekahi mahele o ke ola o ke kula, nolaila e pono na makua e lawe i keia kumuhana a noonoo nui a e hooko aku ma ka hoouna io aku i na keiki iloko olaila - oi loa aku o ka poe iloko o ka mokupuni o Hawaii e maalahi ai ka hoouna ana ilaila mamua o ka hoouna ana ilaila mamua o ka hoouna ana mai i na kula o na wahi e ae, - a maluna no hoi o keia mahele hookahi i kupono ai e makee pu ia ka hoopiha ana aku i na kula e ae e like me ke Kula Hanai o Kawaiahao, Oahu, Lahainaluna, Kamehameha ame Punahou ame na kula hoonaauao e ae.

            Aole e hiki ke hooleia ka waiwai nui o keia kula hanai o Kohala no ka mea aia he nui o na kaikamahine i puka pono mailaila mai a i lilo maoli i poe makuahine iloko o ka aina, oiai nae aole no i nele ka loaa o ka poe i lilo iloko o ka nohona pupuka ana aka me ka hoohewahewa ole ua emi ia ino i na maikai loa i puka mai, a makou e manaoio nei he mau hua maikai ia no ke kula ma kona ano he wahi hoohana a hooponopono kanaka, oiai hoi o na kahu a papa kahu o ke kula ke kumu o ka hana kahi hoi o ka mana ame ka ikaika e holopono ai ke kula mawaho ae o na makua mea keiki. Nolaila he mea pono i na aoao apau e hooikaika like i holomua ai ka nee ana o ke kula imua - oia hoi, ka aoao o na makua i ka lakou hana, a o ka papa kahu oke kula i ka lakou hana, a o ke kula iaia iho no ka hooholomua ana i ka oihana hoonaauao e kuiukahi like ai na aoao e elua - o na kumu a o ko na haumana. Ke hana like na mahele apau aole e nele ka nee holomua mau e like no me ka holomua e nee mau nei a i nee hoi i na makahiki i hala loa.

 

            O ka hoihoiia ana o ke kula hoopololei o na kamalii kolohe i Waialee, Oahu oia ka hoi hou ana o ke ano o ke kula i kela o na la kahiko loa o Keoneula kahiko, oia hoi maluna o ka mahiai, kekahi hana ikaika a ano nui, alaila ua waiwai loa ka hoihoiia ana o ke kula ilaila, oiai eia ke puka mai la na hua o ke kumu e waiwai io ai ke kula, no ka mea wahi a ka Lunakula nui Atkinson ua hilinai oia no ka hiki i ke kula ke malama iaia iho ma na mea lako ai, e laa ka poi ame na mea ulu kupono i ka ai ma keia mua aku; a o keia iho la no na kulana o Keoneula kahiko a na haumana kahiko e hoomanao poina ole ai.

            O ka hiki ana i ke kula ke malama iaia iho ma o na hana la o na haumana e like me ia e hanaia mai nei i Keoneula houi, ka mahi lo'i kalo ame na mea ulu e ae a lana loa ka manao i ka puka pono, oia no kekahi alanui e hoomakiliia ae ai kekahi mau kaumaha a koikoi a ke Aupuni e auamo nei.

 

            Aole o keia wale no ka waiwai o ka pihana mahi iwaena o na haumana o Keoneula hou ma Waialee aka oia no ka makaukau o na keiki i ka lawelawe ana ma ia oihana a i ka loihi ana o na manawa e hoohala ai ma ia mau hana a huiia me na ike hoonaauao e a'o ia ai ua lawa maoli ka makaukau i ke keiki hoolohe a he makaukau ia nona i kona manawa e hemo ai e hiki ai no iaia ke hilinai iho no ke kukulu home ana nona a e hapai mau i ka hoolako ana i ua home la ona me na hua o na makaukau ana i loaa ai ma Waialee ke hoohana aku oia, a makou e manao nei ma kekahi nana ana, ua oi ae mamua o kekahi mau mahele o na kula nunui o kakou e ku mai nei.

            O ke a'o maoli ana i ke keiki iloko o ka oihana mahi he a'o ana no nae a ke keiki e ike pu aku ai i ka hua o kana mau hana e hana ai e like me kela e puka pono mai la i Waialee oia hoi, na ulu ke kalo a ua paapono na lo'i i kulapaia, a me na mea ulu okoa a @ai pu ia me ka hanai holoholona ana - a ike maopopo na keiki he waiwai no ia no lakou iho i ka manawa e malele mai ai, mai ke kula mai a he waiwai pu no hoi ia no ke kula, no ka mea o ka pukapono o na hana a na keiki oia ka hanohano o ke kula, a aole no hoi e nele ke kau mai o ia hanohano maluna o ka Papa Hoonaauao, a o ke Aupuni no hoi ia.

-----

 

HOOMAAMAA PAIKAU O KA PUALIKOA KIAI LAHUI O HAWAII.

 

            I ka Lapule nei i hoomaamaa paikau ae ai ka Pualikoa Mua ma Kapiolani Paka. Ke hooikaika nei o Konela Jones e hapai ae i ka Puali Kiai Lahui a kau aku ma ke kulana makaukau a ke Keena Kaua i kauoha mai ai e hooikaika mamua o ka hiki ana mai o ka manawa e nanaia ai.

            O ka hana i hoomaamaaia ae oia no ke kukulu halelole ana ke ku kiai ame na mea like.

 

-----

NUI KA HANA A KIAAINA ATKINSON.

 

            I ka Poakahi i hala iho la oia ka manawa mua o ke Kakauolelo Teritori Atkinson hoomaka ana i ka hana hou i kauia aku maluna ona nana e hana no ka manawa i kaawale aku ai ke Kiaaina Carter ma ke ano Hookiaaina, a ua nui ka poe i hele aku e ike iaia me na kuka ana no na hana o ke Aupuni a kaa wale mahope o ka hora elima ahiahi.

            I ke kakahiaka ua loihi ka hui kuka ana o ke Kiaaina Atkinson me Mr. McVeigh ka lunanui o Kalaupapa, Molokai a mahope mai ke kuka ana me Lunamakaainana S. Keliinoi no na hana hou o Maui.

            Pau ia ua noonoo pu iho la ua Kiaaina nei me ka Lunanui Holloway o ke Keena o na Hana Hou no na hana i hoolalaia no ka hoohana aku a loaa keia manao e hooko aku. He mau hana kekahi iloko o keia papahana pili i na alanui o keia mokupuni ame na kuleana alanui pu kekahi. A ma keia kuka ana i loaa ai ka manao e holo aku ka Lunanui Holloway no Hawaii no na hana o ia mokupuni.

            Mahope iho ua ike aku ka Puuku Teritori Campbell ke Kiaaina a kuka pu no na hana o kona keena e pili ana i ka hoopuka laikini waiona, no na noi i waihoia mai. A ma ka noonoo ana ua hoopukaia kekahi mau laikini a hooleia no hoi kekahi.

            Alaila o ka Peresidena o ka Papa Ola kekahi i hui pu aku me ke Kiaaina no ke kuka pu ana no na hana o ia keena.

 

-----

PEPEHI HOOMAINOINOIA E KA POE MORO.

 

            MANILA, Mei 23. - Ua ala ae na Moro o Malaberg a pepehi hoomainoino iho la ia la 53 poe Pilipino i hoohanaia o ka mana kaua aina.

           

Piholo ia Mau Mokukaua o Iapana.

(Mai ka aoao @ mai.)

 

kaua o Vladivostok, ua hooiaioia mai nei. Ua ili ua moku ia a he mea hiki ole ka hoolana ana ae iaia. Ua laweia ae na pukuniahi mai ka moku ae mamua o ka hoopahuia ana.

            (O ka hoopahuia ana o keia mokukaua o Rusia ma Vladivostok oia ka hoonawaliwali ana ia Rusia ma ia wahi, a o ka poino ana no hoi ia o kekahi o na moku hoio loa nana i hoopoino i kekahi mau moku o Iapana. He moku keia o 6.500 tona, 42 kapuai ka loihi, 52 kapuai laula, a he 21 3-4 kapuai kona hohonu. He umi-kumamalua pu 6 iniha, he umi-kumamalua pu 3-iniha, ewalu pu 3-ekolu paona a he elua pu 1-paona a he eha wahi topito, oia kona mau lakokaua. O kona holo he iwakalua-kumamakolu mile i ka hora.

            ST. PETERSBURG, Mei 23. - Ua hoikeia mai nei ua hoopuehuia aku ka Iapana, lelekaua aina maluna o Poto Ata.

            TOKIO, Mei 24. - O ka loaa ana o ka ulia ma ke kaua moana oia ka mea nana e hoolala hou mai nei i ka papahana elua no ka paio ana aku ia Poto Ata. Iloko o keia papahana ka hoomoana ana o ko ka aina mau mahele koa mamua o ka lelekaua ana aku.

            YINKOW, Mei 24. - Eia ke houluuluia nei ka pualikoa ekolu o Iapana ma keia wahi.

            KRONSTADT, Mei 24. - Ua pahu ae ka Aila Ea maluna o ka mokukaua Orel, i hoolanaia ae inehinei. Ua paa ae ka aila ea iloko o kona mau lua ukana a mamuli o keia pahu ana ua make ekolu poe.

            I keia la ua paa ae i ka hopuia he eha kiu no Iapana.

            ST. PETERSBURG, Mei 24. - Ua loaa mai he lono i hooiaio ole ia mai ua paapio ae nei i na mokukaua Rusia o Vladivostok na mokukaua ekolu a Iapana i kuai iho nei mai ke Aupuni mai o Kile.

            LIAOYANG, Mei 24. - Ke olelo nei na Rukini e puhi aku ana lakou ia Liaoyang ame Mukden mamua o ke auhee ana aku. Ua kauoha ae nei ke Kiaaina i na koa Pake e noho ae ma Mukden mahope iho o ko na Rukini haalele ana iho.

            FENWENGCHENG, Mei 24. - He hookahi haneri kaaahi ame ewalu haneri kaa e ku nei maanei no ka lawe ana aku i na koa.

            SEOUL, Mei 24. - Ua puhi ae na Rukini he elima haneri hale ma Hamheung. Eia na hui haowale ke haowale nei i na kamaaina. Ua hoounaia aku nei he mahele koa Iapana no ka akau no ke kiai ana.

            TOKIO, Mei 24. - Ua hoike mai nei o Generala Kuroki i ka haulehia ana o 200 koa Cossacks o Rusia ma Tontaokou. He 20 poe i poino ma ko Rusia aoao; aole he mea i poino ma ka Iapana aoao.

            ST. PETERSBURG, Mei 24. - Ua hoike ae nei ko Rusia mana kaua moana e hoole ana i ka oiaio o ka paapio ana aku i na mokukaua Rusia o Vladivostok na mokukaua holo mama a Iapana i kuai ai mai ke Aupuni mai o Kile.

            LIAOYANG, Mei 24. - Ua hoikeia mai nei eia na Kepani e noho nei ma Fenwang-cheng ke make mai nei i ka ma'i kolera.

            MUKDEN, Mei 24. - Ua wawahi iho na Rusia i ke taona o Anju ma Korea a eia na Kepani ke emi hope nei.

           

NA LONO KAUA O KA LA 25.

 

            TOKIO, Mei 25. - Ua loaa mai nei he mau hoike hou e pili ana no ke kaua ma kahi e kokoke ana i Takushan i ka Poalima aku nei i hala. He mahele o ka poe koa Cossacks i aneane loa e lukuia apau loa e ko Iapana mahele koa hele wawae. O na aliikoa Rukini apau loa ua pau i ka make, eha a lilopio mai.

            LIAOYANG, Mei 25. - Eia ke kikiou hoomaumau mai nei na koa kaulio. Eia na Cossacks ke hookuemi hope mau nei i na Kepani. Ma na ano apau eia na Kepani ke kali nei o ka hoea aku o na kokua mai Korea aku.

            He nui o na Kepani i lele ae ma Poto Ata maluna o na waapa Kepani me ka manao e hoopahu aku i na uwapo moku, i pau ae i ka hopupioia a kipokaia.

            NEWCHWANG, Mei 25. - Ua hooiaio ole ia mai ka hoike no ka pau ana o elima bataliona o na Kepani i ka lukuia ma ka Poakolu ma kahi e kokoke ana i Kinchow.

            CHEFOO, Mei 25. - Eia na Rukini ke lawe nei i na pukuniahi ame na koa mai Newchwang aku.

            MUKDEN, Mei 25. - Ke manaoio ia nei maanei ua lilopio mai i na Cossacks he elua kahua hoolele ukana o Iapana, a ma keia i hooneleia ai ko Iapana pualikoa me na lakoai.

            ST. PETERSBURG, Mei 25. - Mamuli o ka laha ana o ka ma'i kolera he hookahi haneri ka make ma ko Iapan aoao i kela ame keia la ma Fengwangcheng.

            ST. PETERSBURG, Mei 24. - Ma ke ano o ka nana ana aku i ke kulana hoonee kaua a Rusia me he mea la e lawelawe koke ia aku ana kekahi hoonee kaua ano nui ma keia mua koke iho. Aole i hoike ia na mea e hana aku ai aka ua ike ia eia o Generala Kuropatkin ke hoomakaukau nei no kana papahana koikoi.

            O ka hana a ke Aupuni o Rusia e pili ana i ka hoolaha ana aku i ka wehe hamama ia o na awa o Siberia oia ka mea nana i panai mai i na ninau lehulehu e pili ana i ka loihi o ka manawa e wehe hamamaia ai keia mau awa. Ua hoike aku ke Aupuni o Rusia e wehe hamama ia ana keia mau awa no ka wa mau loa.

            MUKDEN, Mei 25. - Ua hoomaka hou ka nee ana aku o ko Iapana mau pualikoa imua.

            CHEFOO, Mei 25. - Ua hoike hou ia mai nei ua hoomaka hou na Kepani i ke kipoka ana i ke awa o Poto Ata.

 

NA LONO KAUA O KA LA 26.

 

            LADANA, Mei 26. - Ua hoike mai nei ka mea kakau o ka Nupepa Standard i ke kulana pioo ma na apana like ole o Rusia he Kopena hoi i ala mai mamuli o ke kaua. Eia ke pepehiia nei na kanaka me ka hookolokolo mua ole ia. Warsaw he eono haneri i pau i ka li ia. Eia ke laha nei na manao aloha ola i ka lahui.

            Eia o Rusia ke kukai nei no ke kuai ana i kekahi mau mokukaua holo mama o Agenai.

(E nana ma ka aoao 5.)

 

-----

HOOLAHA MANA HOOKOLOKOLO

 

ILOKO O KA AHA KAAPUNI O KA APANA KAAPUNI EKOLU, TERITORI O HAWAII, MA KE KEENA HOOPONOPONO WAIWAI. ILOKO O KA HANA O KA WAIWAI O LUKIA KUAIMOKU, MEA I MAKE.

 

            Kauoha o ka Hoolaha no ka Hoolohe ana i ke Noi no ka Aponoia o na Hoike Helu Waiwai Hope loa, Mahelehele ame Hookuu ana.

            Ma ka heluheluia ana ame ka waihoia ana mai o ke Noi ame ka Hoike o na Helu Waiwai o John D. Paris, Lunahooponopono Waiwai o ka Waiwai o Lukia Kuaimoku i make, iloko olaila i noi ai oia e aeia aku i $820.42 a auhau no oia iaia iho me ka huina o $4,108.00, ame kana noi e nana pono ia mai ka hoike ame ke aponoia mai, a e hoopukaia mai i kauoha hope loa no ka mahelehele ana i ka waiwai i koe iho iloko o kona mau lima i ka poe apau i kuleana iloko olaila ame ka hookuu mai iaia ame kona mau hope hoopaa mai na ko'iko'i aku apau ma ke ano lunahooponopono o ka Waiwai o Lukia Kuaimoku i make.

            Ua kauoha pu ia no hoi o ka Poaha, ka la 30 o Iune, A. D. 1904, ma ka hora 10 a. m., imua o ka Lunakanawai o ka Aha i oleloia ma ke Keena Hookolokolo o ua Aha Hookolokolo la i oleloia ma Kailua, Mokupuni o Hawaii, oia kahi ame ka manawa i hooholoia no ka hoolohe ana i ke Noi i oleloia ame ka Hoike Helu Waiwai, a o ka poe apau i kuleana iloko olaila e hele ae ma ia wahi a i ka manawa i hoikeia a hoike aku i ke kumu, ina he mau kumu kekahi a lakou, no keaha la e ae ole ia ai ia mea ame ka waiho pu ae i mau hoike no ka poe apau i kuleana iloko o ka waiwai i oleloia.

            A he hoolaha no hoi o keia Kauoha, iloko o na olelo Beritania ame Hawaii, e hoolahaia iloko o na nupepa Evening Bulletin ame Kuokoa i pa'iia a hoopukaia iloko o Honolulu, no ekolu pule neepapa, o ka hoolaha hope loa aole e emi malalo o elua pule mamua iho o ka manawa i hooholoia iloko nei no ka hoolohe i oleloia.

            Hanaia ma Kailua, i keia la 9 o Mei, 1904.

 

Na ka Aha:      J. P. CURTS, Kakauolelo.

3016 - Mei 20, 27 - Iune 3, 10.

 

-----

NA LALA O KE KOMISINA KANAWAI KALANA.

 

            E like me ka mana i waihoia aku ma ka lima o ke Kiaaina e ka Ahaolelo Kuikawa i noho iho nei, mamuli o kekahi Olelo Hooholo, nolaila mamua o ka haalele ana mai o ke Kiaaina ia Hawaii nei a au aku la ma kana huakai no Wasinetona, ua hookohu ae oia i keia poe keonimana no lakou na inoa malalo iho nei, i mau komisina no ka hana ana i ke Kanawai Kalana.

            HENRY E. COOPER, Lunahoomalu

            CLARENCE L. CRABBE,

            FRED W. BECKLEY,

            E. M. WATSON,

            T. McCANTS STEWART.

            Ma ka alawa ana ae i keia papainoa maluna ae, ua maopopo loa ko ke Kiaaina wae ana i na kanaka mai na aoao kalaiaina ekolu e ku nei iloko o Hawaii nei, a ma keia no hoi i hoike hou ae ai ke Kiaaina i ka hooiaio ana, aole oia he kanaka no ka aoao hookahi, aka he kanaka oia e kaulike ana i na aoao kalaiaina apau iloko o Hawaii nei. He mea maikai e hoomaopopo ka lehulehu i keia, a e loaa hoi na manaolana e hana ia ana a ko ka makemake o ka lehulehu e kukulu ia na kalana apuni o Hawaii nei.

 

-----

AOLE MAKEMAKEIA O J. H. WISE I HOPE MAKAINUI.

 

            I ka la 15 iho nei i loaa mai ai he leka i ka Makainui Brown he leka hoi mai ke Komite Hooko Repubalika o Kohala Akau e ku-e ana i ke kohoia ae o Mr. John H. Wise i hope makainui no ka Apana o Kohala. He inoa o Mr. Wise i kamailio nui ia no keia oihana hope makainui o Kohala mai ka hapa hope mai o ke kau kuikawa o ka ahaolelo i hala iho la a hiki wale no i keia mau la iho nei a ikeia ae nei keia ku-e mai ka Apana mai o Kohala iwaena o na Repubalika.

            He kumuhana keia i noonooia e ke komite hooko o na Repubalike ma kekahi halawai i malamaia e lakou a ma ka noonoo ana ua hooholoia ka olelo hooholo ku-e ia Mr. Wise, a ma kahi o ua inoa la ua hooaiai mai ua komite hooko nei i ka inoa o C. K. Stillman, ame ke noi pu ia mai o ka mea hookohu oihana e hoopau loa ia ka noonoo ana no ka inoa o John Wise a no ka mea aole oia he mea noho paa no ka apana.

            Ua kakauinoaia ka olelo hooholo e ka komite mana hooko. - E. E. Olding, peresidena; E. C. Bond, kakauolelo; H. H. Renton, lumnahoomalu o ke komite hooko: E. A. Fraser, puuku; C. Al, W. Merseberg, D. S. Kahookano, ame J. W. Atkins, na iaia o ke komite hooko.

 

-----

KU KE KEPANI I KA PU A KA HAWAII.

 

            Ma ka hakoko mawaena o kekahi Kepani nona ka inoa o Mymura ame kekahi kanaka Hawaii nona ka inoa o Luihookano ua kita aku la ke Kepani e ka Hawaii me ka pu panapana a lele ka poka a ku ma ka wawae. Ma kaneohe ka hanaia ana - keia ki pu, a hopuia no hoi o Luihookano a paa iloko o ka halepaahao.

            Ua lawe loa ia mai ke Kepani i Honolulu nei no ka lapaau ana a aia oia iloko o ka haukapila Kepani ma ke alanui Liliha. Ua hoikeia ae aole i kukonukonu loa ka eha i loaa aku i kela Iapana.

 

            UA LIKE KANA HANA ME KEKAHI HANA MANA. O ka oluolu e loaa mai ana mai ka laau Chamberlain's Pain Balm i ka wa e hookauia ai maluna o kahi i wela a i ole pohole paha e hiki koke mai no ia me ka hikiwawe a i ano like aku me ka hana mana. O na eha o keia ano he hiki no ke oia me ka loihi ole o ka manawa ina e hoopaa koke ia keia ano laau, a ina aole i nui loa kahi i eha ke ola mai aole loa e kau ana ka aiina ma kahi i eha. Ke kuai ia nei ma na halekuai laau lapaau apau. Benson, Smith & Co., Ltd., na Agena ma Hawaii nei.

 

-----

HOOLAHA MA KE KAUOHA.

-----

 

HOLAHA I KA POE MEA WAI.

 

            O ka nui o ka wai e pau nei ua oi loa aku i ka manawa no kekahi mau ia kakaikahi i hala iho nei ke kumu hoi e pono e malamaia na rula ame na kuhikuhi o ka hoohana ana i ka wai no ka hoopulu mea kanu ana a e malamaia keia me ka hooko ana.

            O ka poe mea kuleana wai a o ka poe e uku auhau wai nei, ke haawiia aku nei ka hoolaha ia lakou o ka hookahe wai ana no ka hoopulu mea kanu ua kaupalenaia mawena o na hora 6 ame 8 a. m., a mawaena o na hora 4 ame 6 p. m.

            O ke ku-e ana i keia hoolaha maluna ae oia no ke oki ia aku o kona kuleana wai me ka hakalia ole me ka hoolaha ole hou ana; aole no hoi e hoihoi hou ia aku a hiki i ka manawa e uku mua ia mai ai na koina ame na hoolilo o ka hookui paipu wai hou ana.

            Honolulu, Mei 12, 1904.

(Kakauinoaia)  J. H. Howland.

Lunanui o ka Oihana Wai o Honolulu.

Aponoia e

(Kakauinoaia)  C. S. HOOLOWAY,

Lunanui o na Hana Hou.

3016 - Mei 20, 27, - Iune 3.

 

-----

HOOLAHA I KA POE AIE.

 

WAIWAI PAA O J. P. MIOI.

 

            Ke haawi ia aku nei ka hoolaha e S. K. Mioi, Lunahooponopono Waiwai Paa o J. P. Mioi i make, o ka poe apau loa he mau koi ka lakou iloko o ka waiwai i oleloia, ke ha'i ia aku nei lakou e waiho ae i ua mau koi la, me na hooiaio i hooiaioia ame na palapala kikoo pololei, ina eia kekahi oia ano ke waiho nei a ina no hoi oia kou ua hanaia ma kekahi molaki maluna o ka Waiwai Paa, i ka mea nona ka inoa malalo iho nei ma Kailua, Kona Akau, Hawaii, a i ole ia G. F. Maydwell, Holualoa, Kona Akau, i hoike mua ia ae nei, kona @oio, iloko o na majina eono mai keia la aku, a i ole e hoole loa ia no ia mau koi no ka wa mau loa.

 

S. K. MIOI, Lunahooponopono o ka Waiwai o J. P. Mioi i make.

            Kailua, Kona Akau, Hawaii, Mei 17, 1904.

 

3016 - Mei 20, 27. - Iune 3, 10.

 

-----

HOOLAHA I KA POE AIE.

 

WAIWAI PAA O EKEKALA MALANI

 

            Ke haawi ia aku nei ka hoolaha e Malani, Lunahooponopono Waiwai Paa o Ekekala Malani, mea i make, o ka poe apau he mau koi ka lakou iloko o ka waiwai paa i oleloia, ke ha'i ia aku nei ia lakou e waiho ae i ua mau koi la me na hooiaio i hooiaioia ame na palapala kikoo pololei, ina eia kekahi oia ano ke waiho nei, ina eia kekahi oia ano ke waiho nei, ina no o ua koi la ua hoopaaia e kekahi molaki maluna o ka waiwai paa, i ka mea nona ka inoa malalo iho nei, ma Keauhou, kona Akau, Mokupuni o Hawaii, a i ole ia G. F. Maydwell, Holualoa, Kona Akau, i olelo mua ia ae nei, kona loio, iloko o na mahina eono mai keia la aku, a i ole e hoole loa ia no ia mau koi no ka wa mau loa.

 

MALANI, Lunahooponopono o ka Waiwai Paa o Ekekala Malani i make.

Ekekala Malani i make.

Keauhou, Kona Akau, Hawaii, Mei 17, 1904.

3016 - Mei 20, 27 - Iune 3, 10.

-----

 

HOOLAHA AINA AUPUNI.

 

            Ma ka Poaono, Iune 18, 1904, hora 12 awakea, ma ke alo iho o ka Hale Hookolokolo, e kuai ia aku ai ma ke kudala akea ka hoolimalima o na aina malalo iho nei iloko o Waikiki, Honolulu, Oahu:

            Apana 4A, Mookahi, iliaina 24.57 eka.

            Apana 5 Kalia, iliaina 22.22 eka.

            Apana 6C, Kaaumoa, iliaina 1.97 eka.

            Apana 6D, Kapuna, iliaina .53 eka.

            Manawa hoolimalima - 5 makahiki.

            Uku-hoolimalima kaupalenaia -n $1, - 250.00 no ka makahiki hookahi, uku mua i kela ame keia hapa makahiki.

            No na kii aina ame na mea e ae e hele ae ma ke Keena Aina Aupuni, Honolulu, Oahu.

JAS. W. PRATT, Komikina Aina Aupuni.

Keena Aina Aupuni, Mei 17, 1904.

3016 - Mei 20, 27 - Iune 3.

-----

 

MAKEMAKEIA

 

I KANAKA MAKAUKAU MA KE KUAI LOLE.

 

E Kakau ae ma ka P. O. Box 809.

-----

 

E KOE ANA IA OE

 

Oi Mamua o ka Hapalua o na Lilo ke kuai oe i

KE DAIMANA

He Oluolu loa na Uku ana.

 

            Mai kuai oe i Komolima Daimana nou a i ole na pihi pulima paha ame na waiwai makamae e a'e o keia ano a hiki i ka wa e ike mua ai oe i ke DAIMANA ZAMBESA, ke alohilohi nani. Ke kuai aku nei makou ma ka hapaiua o ke kumukuai o ke Daimana Trust a me ka uku @@@@ ana i kela a me keia mahina me ka oluolu loa o na uku ana. E kauoha mai i kekahi o keia -ina i ku i kou makemake a makemake paha oe e paa iho, ua hiki ia oe ke uku mai me ka haahaa, alaila e hoounamai ia makou i kela ame keia mahina ma ka uku liilii ana o elua dala a hiki i ka pau ana. Aia iloko o na PALAPALA HOAKAKA e hai ia ai na ninau apau - e kauoha mai i kope mau o keia mau PALAPALA HOAKAKA. O ke **** maoli o ia ke apo nana e a pau i keia mau daimana, a e waiho ia aku no na hooiaio ana i kakau ia no keia mau waiwai no kela ame keia waiwai e lilo aku ana. He hui makou i hilinai ia i hoohu7iia hoi malalo o kekahi huina waiwai io o $1@@,@@@.00, a o hoouna aku no makou i ka makou mau waiwai no ka hoa'o ia mai na ka @@@ ole @@ i na koikoi e ili mai ana. Ke haawi aku nei makou i ka daimana no ka kumukuai e hiki ai i kela a me keia ke kuai mai a hiki hoi ke uku mai i hookahi dala a i ole elua paha i kela ame keia mahina. Ke hooia nei makou e hoouna la aku ao i ka mea kauoha mai a e loaa no iaia iloko o hookahi pule. E oluolu e kauoha mai i mau palapala hoakaka; no ka mea ae like no kona waiwai io me ke gula i ka mea e makemake ana i ke Daimana.

BOYLSTON DIAMOND CO.,

510 Boylston Building,

Chicago, Ill.

-----

 

HOOLAHA KUMAU

-----

 

LEWERS & COOKE

LOI AME KUKE, Kaupalenaia

 

Na Mea Hookomo mai a Kuai aku i na

LAKU HANANHALE

O kela ame Kena Ano.

Malaila e loaa ai na mea malalo @@@

 

            NA PAPA N. W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

            NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

 

            O na kauoha pono hale apau loa a hiki mai ana ia makou e hooko koke ia no me ka elua ame na KUMUKUAI HAAHAA LOA.

 

LEWERS & COOKE

-----

 

Hui Alahao ame Aina o Oahu

MANAWA HOLO

Moi 1, 1903.

 

MAI HONOLULU AKU

 

No Waianae, Waialua, Kahuku ame na wahi hoolulu ma ke alahao - *9:15 a.m., *3:30 p. m.

No Pearl City, Ewa Mill, ame na wahi hoolulu ma ke alahao - #7:30 a. m., *9:15 a. m., *11:05 a. m., *8:15 p. m., *3:20 p. m., #4:15 p. m., *5:15 p. m. +9:30 p. m., #11:15 p. m.

 

MAI WAHO MAI.

 

Ku i Honolulu mai Kahuku, Waialua ame Waianae mai *8:36 a. m., *5:31 p. m.

Ku i Honolulu mai Ewa Mill ame Pearl City mai #6:50 a. m. #7:46 a. m., *8:36 a. m., *10:38 a. m., *2:06 p. m., *4:31 p. m., *5:31 p. m., *7:40 p. m.

 

            *5:31 p. m., *7:40 p. m.

*Kela ame keia la.

#Sabati wale no.

+Koe ke Sabati.

 

G. P. DENISON, Lunahoohana

F. C. SMITH.

G. P. & T. A.

-----

 

Kakela me Kuke

(KAUPALENAIA)

 

Poe Kalepa ma ke Komisina

A HE

POE LAWELAWE KOPAA

 

Poe Agena no na Ma hiko Lehulehu.

 

-----

 

KAUKA T. MITAMURA

 

Alanui Kukui Oloii Helu 68, Honolulu.

Na Hora Hana:

            Hora 9 a. m. a 12 m; 6:30 p. m. a @ p. m. Sabati, Hora 9 a. m. a 10:30 a. m.

Telepone Blue 2366    P. O. Box 842.

-----

 

Ina He Makemake

KOU I KA

Lauoho Maikai

E HELUHELU I KEIA.

 

Malia paha ke pau nei kou lauoho ka helelei, a koe kakaikahi. E kau i ka laau mamua o ka pau loa ana i ka helelei, e hana i laau e ulu hoe ai. O ka laau

 

"Laau Hooulu Lauoho a Ayer's"

 

ka mea e ulu hou ai. He nani ka lauoho ke ulu mai, a he nui hoi.

 

Ina he nawali ka ulu ana o kou lauoho, o ka

 

"Laau Hooulu Lauoho a Ayer's"

 

ka mea e manaonoa ai ka ylu ana, e ke loaa i keia laau pau loa ka helelei ana. I na he piha kou poo ke Kopia, o ka

 

"Laau Hooulu Lauoho a Ayer's"

 

ka laau e pau ai a maemae kou poe. Ke loaa i keia laau e hoi hou ana ka ulu ana o kou lauoho a like me ko kou wa bebe.

 

Hoomakaukau ia e Kauka J. C. Ayer & Company, Lowell, Mass., U. S. A.

 

E loaa no keia mau Huaale ma ka Hale Kuai Laau o Hollister, alanui Papu.

 

 

LAST COLUMN - ADD SYMBOLS!!!