Ka Nupepa Kuokoa, Volume XLII, Number 20, 13 May 1904 — Page 4

NUPEPA KUOKOA, MEI 13, 1904.

 

KA  MAKAIKIU

WETE  DETONA

Ke Ahi Lalapa Pio ole i na Nihiliti.

Ke Kanaka America Koa Lua ole.

 

OLELO  HOAKAKA.

 

I kekahi la, e nanea ana o Makai-kiu Nikolaka Kaaka i ka heluhelu i kekahi buke iloko o kona rumi heluhelu.  a o kana mau lei keiki hoi e hialaai ana i ka paani me kekahi opio keikikane e moe ana iluna o ka papahele me kona alo e huli ana ilalo.  Emoole hemo ana ke pani puka o ua rumi nei.  a ku ana ka wahine lawelawe me ka hoike ana aku i ka makai-kiu.  aia kekahi keonimana mawaho i makemake e hui me ka Makai-kiu Nikolaka Kaaka, ka weli iwaena o ka poe haʻihaʻi kanawai o Amerika, a o ka lima akau konahao hoi o ke kanawai.

 

Kauoha aku la o Nikolaka Kaaka i ka wahine e kii aku i ka malihini a hookipa mai iloko o ka rumi heluhelu, a e like hoi me ia kauoha.  Ua komo mai la ka malihini. a kau aku la kona mau maka maluna o na keiki ame ka opio e hoonanea ana ia lakou, me ke kuekue maka nui ana ae o ua malihini la.  Ma ka aoao o ka makai-kiu, aole oia i makemake i keia ano nana ana a ka malihini maluna o kana mau keiki.  a ina aole ke ano pihoihoi o ua malihini la, ina @@ ua kipaku ia e a makai-kiu e hele aku iwaho.  Mahope iho, kaulono pono aku la na maka o ka malihini maluna o ka makai:kiu, me ka pane ana aku:

            "Ke hui nei anei wau me Mr. Nikoloko Kaaka?"  Ma keia ninau ua maopopo aku la i ka makai-kiu he kanaka Rusia keia e hui nei me ia.

            "Ae: owau ia au e ike mai la," wahi a ka makai-kiu.

            "Ke makemake nei wau i makai-kiu no kaʻu hana," wahi hou a ka malihini.

            "Aole wau e ae aku ana i kau.  Aohe oʻu lawelawe ia hana i keia manawa." wahi a makai-kiu i pane aku ai me kona nanaina hoihoi ole.

            "Kahuhu!  E uku aku no hoi wau ia oe no kau hana e hana aku ai."

            "Ke hoole hou aku nei no wau, a ke haʻi aku nei wau ia oe.  ina no oe e haawi mai ana i uku no kau hana i like aku kona waiwai io me ko Rokekaila.  aole loa no wau e lawe ana i kau hana."

            "Aka hoi, o oe wale no ke kanaka aʻu i manao ai he hiki ke hana i kaʻu hana."

            "Hele pela!  Ua hiki iaʻu ke hoike aku ia oe i kekahi kanaka i hiki ke hana aku i kau hana e like me aʻu - a oi aku no paha."

            "I mea e kupono ai i ua kanaka la ke hana i kaʻu hana, he mea pono i kanaka Amerika.  eia nae e hiki iaia ke olelo ma ka olelo lahui o Rusia e like me ke kanaka i hanauia ma ka lepo o Rusia.

            "O ua kanaka la aʻu e hoike aku ai ia oe ua kulike loa me kau i makemake ai."

            "Ihea oia e loaa ai iaʻu?" i ninau aku ai ka malihini me ka hoihoi o kona naau.

            "Wete." i kahea aku ai ka Makai-kiu.

            Ku ae la ka opio e paani ana me na keiki, me ka paa ana ae i na keiki maluna o kona mau poohiwi, a nee aku la imua o ka makai-kiu.

            "Eia ua kanaka la," i pane aku ai ka makai-kiu.

            "O keia wahi keiki ka?  Ke manao nei wau e hoohenehene mai ana oe iaʻu."

            "Aka ----------"

            "Aohe aka malaila.  E oluolu oe e ninau aku iaia i pau kou Luhihewa."

            "Pehea he makaukau no oe ma ka olelo Rusia?" i ninau aku ai ua malihini la ia Wete.

            "Ae; i St. Petersburg koʻu aʻo ana," wahi a ka opio i pane aku ai me ka moakaka ma ka olelo Rusia.

            "He kanaka Rukini anei oe?"

            "Aole:  he Amerika no wau, a pela hoi me koʻu mau kupuna.

            "Maikai maoli no ka ianei hoopuka ana i ka olelo Rusia," wahi a ka malihini me kona huli ana aku i ka makai-kiu, "eia nae hoi he opiopio loa keia no kaʻu hana."

            "Aia no paha ia i kou manao.  Aole oia nei ka i makemake aku nei i kau hana.  Noʻu nei aole loa wau e hele aku ana no kauhana ke haawi mai oe i uku kiekie noʻu," wahi a Nikoloko Kaaka i pane aku ai me kona hopu ana iho i ka nupepa e waiho ana iluna o ke pakaukau. a maluna hoi o kona nanaina he mau hoailona e hoike ana i kona makemake ole e papaleo hou aku me ka malihini.

            "E kala mai iaʻu," wahi a ka malihini i pane aku ai, me kona nanaina i piha i ka iini e hoomau aku a ko kaua mea i hele mai ai.  "Ua ha@ia mai iaʻu o oe hookahi ka helu ekahi ma ke ao holookoa aole wale no hoi oia, aka he kanaka oe i hiki ke hiliniia, a malalo o keia mau kumu i hiki mai ai wau i ou nei."

            E kuu hoaloha maikai, ua hoopunipuniia oe.  Aole owau ka helu ekahi ma ke ao holookoa.  O keia keiki," aia ua opio la ke paani hou la me na keiki iluna o ka papahele i keia manawa a Nikoloko Kaaka e kamailio nei - "oia nei ua like no me aʻu.  E pono ia oe e hilinai mai aole loa wau e haʻi aku ana ia oe pela ina aole ia i kulike me kaʻu i haʻi aku nei."

            "O ka opiopio hoi ka hewa," wahi hou a ka malihini me kona @@ e ko@o okoa aku ana i ka makai-kiu e hoolohe ia mai kana noi e lawe ka makai-kiu i kana hana.

            "E oluolu mai oe, Mr. Nikolaka Kaaka," wahi a Wete me kona hele ana mai imua o laua nei, "ina aole au mau hoohalahala, e hele ae wau me iaanei iloko o ka rumi hookipa."

            "Aole: o olua ke noho iho, a naʻu e lawe aku i na keiki," wahi a ka makai-kiu, a e like me kana i olelo ai, pela oia i hooko aku ai.  a haalele iho la oia i ke kanaka malihini iloko o kona kaumaha nui no @@ ko ole o kana mea i hele mai ai.  O keia no hoi ka hope loa o ko Nikolaka kukai ana me ua malihini la i kipa aku e hui me ia.

            O Wete Detona, oia kekahi o na haumana a Makai-kiu Nikolaka.  a o kona hoole ana i ke noi a ka malihini, aole ma ke ano makemake ole a makaʻu paha, aka, mamuli o kona iini nui e ike ia kana mau haumana iloko o na hana hanu i na mea pohihihi, a hoike ae i ka mea olelo.

 

MOKUNA I.

"O OE KAU E HULI NEI."

            "E nana mai oe iaʻu oe e oluolu ana." wahi a Wete Detona i kukai aku ai mahope o ka hala ana aku o ka Makai-kiu.

            Kau aku la na maka o ka malihini maluna o Wete me ka pahaʻohaʻo, oiai ua hoopahaʻohaʻoia oia i ka loli koe ana ae o ko Wete leo ame kona kulana mai ke kulana opio mai a i ke kanakamakua.

            "Ke ike nei oe." wahi hou a Wete i pane aku ai. "he opiopio wau ma koʻu helehelena.  He iwakalua-kumamalima oʻu makahiki i keia manawa.

            "Alaila ke makemake mai nei oe e noi mai i kaʻu hana nau e hana?"  i ninau aku ai ka malihini me ke kanalua.  "Ke manao nei anei oe e hiki ana ia oe ke hana mai me ka pono?"

(Aole i pau.)

 

            HAWAII ame KONA LAHUI.

A hala na makahiki elua, make o Kaahumanu, ke Kuhinanui.  Ua hoouna ia ka olelo no kona make ana i Kaleponi, a manao ua poe la ame ko lakou poe makamaka, e hiki paha ia lakou no ke kaawale ana o Kaahumanu, e malimali aku i ke alii opio e ae mai i ko lakou pae hou ana i ua aina nei.

 

A lana ka manao malaila, ua ee lakou maluna o ka moku kialua, o Kelemenekina ka inoa, he hae Beritania kona, a pe hou laua ma Honolulu.  me ke ike maopopo i na kanawai e pili like ana i na kanaka apau e holo ana ilaila.  Olelo aku la o Kekuanaoa, he Kiaaina ia lakou ame ka mea nona ka moku, e hoi aku no lakou maluna o ka moku.  No keia mea, he wahi haunaele uuku i hana ia e lakou ame ko lakou poe makamaka na haole.  Ua hoounaia kekahi poe i ke Aliinui, aia ia ma ka aoao kukulu makani hikina.  e noi aku iaia e ae mai i ua poe Kahunapula Roma nei e noho a hiki i ko lakou holo ana i no mokupuni o Gamebia.  Ua hoouna aku ke Kiaaina o Oahu i ke alii i keia kana hana.  Kauoha ke Alii penei:  Me ko lakou kipaku aku mamua, pela e pono lakou e holo aku ma ka moku a lakou i holo mai ai.  Ua ku-e mai ke Kanikela Beritania me ka hooweliweli aku, a hooeeia ua poe la maluna iho o ka moku, alaila, ua hukiia mai ka hae o Kelemenekina, halihaliia aku, a puhiia i ke ahi ma ke alanui o Honolulu.  Na ke Kanekela Beritania i puhi, a ma kana olelo aʻo, ua haaleleia ua moku nei i kekahi manawa e ka mea nona ka moku, aia no ua mau kahunapule la maluna iho.

 

Ia manawa, ua hiki i Oahu, he moku manuwa o Enelani, a he moku manuwa Farani, a ua noi na Kapena oia mau moku i na alii, e ae aku i ka pae aina iuka o ia poe i kipakuia, e noho a hiki ia lakou ke holo i Gamebia, kahi a lakou e makemake ai e holo.  Aka, pae iuka, holo aku o Kelemenekina, ame na moku manuwa, aole lakou imi hou e holo ilaila.  Ua noho a hoole i na kanawai o ka aina, ame ka makemake o na alii.  Nolaila, hoolimalima lakou i moku okoa, a hoouna ia lakou i ka aina moku o Gamebia.

 

Oia na mea i hana ia ia Baheloka ma, na kahunapule Roma e na alii Hawaii.  Oia ke ano ame na mea e pili ana i ko lakou komo ana iloko, ame ko lakou kipaku ia ana mai ka aina aku.

 

O KA HANA HAUNAELE A POKI MA. - KA HOOIKAIKA ANA

O KAAHUMANU MA MA KA PONO.

Mahope iho make o Kahalaia, alaila haawi o Kaahumanu ame Kalaimoku ia Kauikeaouli na Poki e malama.  Haawi no hoi iaia i ka aina mai Hawaii a Kauai nana e malama.  A pau keia mau mea iaia, alaila, hoomanao iho la o Kaahumanu i ka pono a kana kane.  Imi nui iho la i pono ke Aupuni o kona alii, maloko o ka olelo a ke Akua, a loaa iho la iaia, huli io no ia a hooikaika no ia i na kanaka ame na ʻLii.  Alaila, huli mai no na ʻLii ame na kanaka i hoolohe mai i kona leo.   Lohe o Poki e hoohaunaele ana o Kalaiwahi ia Kauai, e ake ana ia e kaua me Kaikioewa, alaila, holo ae la o Poki maluna o Paalua me na kanaka ame na pu kau poohiwi he nui loa.   Hoomakaukau iho la ia no ke kaua mai o Kalaiwahi iaia.  A pae ae la o Poki ma iuka, a honi iho la laua me Kaikioewa.  Ua nui ae la ko laua uwe ana, hoomakaukau ia mai la ka mea ai.  A Poalua ka moe ana i kapa, alaila, olelo iho laua e hoike mai o Kalaiwahi i kana pu, a hookuku aku iaia.  Au-a iho la o Kaikioewa, aole o hookuke ia Kaalaiwahi.  Alaila, hele mai la o Poki laua me Kaikioewa a ee mai maluna o ka waa, a holo mai la ma ka muliwai a pae ma kela kapa, a komo aku laua iloko a ka papu a hoike iho la i ka pu a Kalaiwahi ame ka pauda, am ka pahi.  Aole pu oloko o ka pa, ua pau i ka ohi ia e na kanaka mawaho.  Alaila, ike iho la o Poki, ua kolohe io no o Kalaiwahi.  Alaila, i aku la o Poki ia Kalaiwahi, "Euhou kaua ma Oahu."  I aku la o Kalaiwahi, "Aia paha ia ianei."  I aku la o Kaikioewa, "E noho no maua."  I aku la o Poki, "Aole euhoi no maua."  Ae aku la o Kaikioewa, "Ae."  Noho iho la a hiki i ka wa i hoi mai ai o Poki i Oahu, hoi pu mai la no hoi lakou me Kalaiwahi.  Pono keia hana a Poki, aka, aole i mau loa kana hana pono ana.  Eia ka hana hewa, hana iho la o Poki i hale kuai rama nona i mea imi waiwai, oia ka hoomaka ana o kona lilo loa i ka ino.

 

Mahope iho, inu iho la o Poki i ka rama a lilo loa i ka hewa.  A hilahila o Kalaimoku, a holo ia ma Hawaii a make malaila.  Ma ka makahiki 1827 kona make ana.  He kanaka ano haipule o Kalaimoku, a kokua ikaika aku oia mamuli o ka pono.   He alihikaua ikaika no hoi oia.  A pue iho la o Poki ia Kaahumanu e kaua, no ka mea; ua lilo no ka aina ia Kaahumanu.  Hooikaika loa iho la o Poki a me kana wahine ma ka hewa, a aie nui iho la o Poki;  uuku ka Liholiho aie ana; nui loa ka Poki.  A alakai no o Poki laua me kana wahine ia Kauikeaouli ma ka hewa.  Hiki hou mai la ua mau hewa nui la i hana ia ma wa o Liholiho; o ka inu rama, ame ka aie, a luhi hou iho la na makaainana i ka pii i ka wahi ala ame ka imi kala.  Aole he mau hewa nui e ae ma keia paeaina e like me keia mau hewa elua, o ka inu rama, ame ka aie, o na mea no ia e poino loa ai ke Aupuni.

 

Ua nui ko Poki hooikaika ana i huli na kanaka i ka hewa, a kipi i ka aina, aka nui no hoi ko ke Akua kokua ana mai i ka pono, ma ka waha o Kaahumanu.  Nolaila, aole i lilo kanaka i ka hewa me Poki, he mau opala wale no ka i lilo me ia.  Nui ka Poki hana ino mai ia Kaahumanu ia wa, a nui no hoi ko Kaahumanu hooikaika ana ma ka pono.  Kau iho la o Kaahumanu i ke Kanawai no Hawaii nei i like me ko na aina naauao.  Hele aku la o Poki a hui pu me kekahi poe, a kue loa mai la lakou ia Kaahumanu, pai mai la lakou ma ka olelo kaua, a haunaele loa iho la ka aina.   Noho o Poki me ke kau o kona manao i ka waiwai ame ka hanohano, a noloaila, manao oia e kipi i loaa mai ia mau mea iaia.

 

I kekahi manawa, holo akula ia ma Hawaii a noho iho la i Hilo.  Okioki iho la i ka aina a haawi ae la i na ʻLii ame na ka o ke alii a kuko no i ke kaua ame ka make no o Kaahumanu.  A lohe ia no keia kaua ma Honolulu.

 

A hoi mai la no ia a noho iho la ma Oahu. ia manawa iho no, hele aku la ia ma Waikiki, hoonoho iho la no ia i ke kaua.  Manao iho la o Kekuanaoa ame Kanaina e hele aku e nana, no ka mea, ua lohe no laua i ke kaua.  Ee ae la laua maluna o na lio, holo mai @@ laua a hiki i Kewalo.  Alaila, makaʻu mai la o Kanaina i aku la ia Kekuanaoa.  "O hele oe, e hoi au me na wahine a kaua, a e hoomaha aku ia laua, ame Elisabeta" (oia o Kaahumanu.)  A hoi no hoi o Kanaina, a holo aku no o Kekuanaoa.  Holo aku la maka lio a hiki aku la ia i Waikiki.  Nana iho la ia no kanaka, paapu @@ kou o Kalahea, a paa ana na lima i ka pu.  Aole leo pane, elua mau kanaka i aloha mai iaia, aole aku no hoi ia.   A ike mai o Poki iaia, pawe ae la kona maka iaia.  Ua lele aku no nae ia me ka manaolana ame ka hopo ole a ku i ke alo o Poki a hoohuli aku la iaia a oki wale iho la keia hana ana.  Pela ke kue mau ana o Poki ame kana wahine, a alakai no hoi laua ia Kauikeaouli ma ka hewa. No keia mau mea, nui loa iho la ka haunaele o ka aina o moekolohe hou na kanaka, a hoomana hou kahi poe i na kii.  Ia wa hooikaika hou mai ke Akua i ka pono ma ka waho o Naahienaena, kupaa oia ma ka pono ia wa.  Kii aku oia ame Kaahumanu, ame kekahi poe alii e hoohuli mai ia Kauikeaouli ma ka pono, a ae @@@ no ia.  A ma @@ hope mai, poai hele o Kaahumanu, am Kauikeaouli apuni Oahu, a holo aku laua a Maui, hui pu me Naahienaena ame Hoapili, a poai lakou apuni o Molokai, ame Maui, ame Hawaii, e hoohuli mai i na makaainana ma ka pono, a ua maluhi no ke aupuni.

 

NO KA HOLO ANA O POKI MA E KUA LAUA ALA.

E noho ana o Poki me ka manao e hele no i ka laau ala no ka aie, ma na kuahiwi o Hawaii nei, ame na alii ame na makaainana apau loa.

 

Ua holo o Kaahumanu i Kauai ia manawa, ua hele kekahi poe hulumanu i ka laau ala.  Ku mai la kekahi moku haole ia mau la, na ia haole i olelo mai penei, "Ina e holo aku i ka paeaina i loaa mai nei iaʻu, he nui loa ka laau ala, e ku ana ka laau mai kahakai aku a hiki iuka loa i kuahiwi, hookahi no wahi e kua ai, komo ka moku, komo ka moku.

(Aole i pau.)

 

 

Moolelo o ka Aha Euanelio o Hawaii.

(Hoomauia.)

Kumuhana - Na palapala hoopii. 

Na Keliipio he palapala hoopii mai Puula mai, e noi mai ana i keia Aha e weheia ae na Ekalesia apau malalo o keia Aha i komo mai lakou e kokua pu i ka hale kahu o Puula.  Hooholoia me ke kaupalena ia no nae i ekolu Haneri ($300) dala a ke komite e imi ai, a o Keliipio no ke komite.

 

Mahele (e) o ke Kumuhana 6 - Na Ekalesia Kahu ole.  Kalapana ame Opihikao ia Keliipio; Olaa ia Desha; Onomea ame Hakalau ia J. N. Komoku; Laupahoehoe ia Kahooio; Kohala Akau ia Kekuewa; Kekaha ame Pukaana ia Kalaiwaa; Konawaena ame Kealakekua, Kaohe ame Milolii ia C. C. Kaeo.

 

Mahele (o) Ka Waihona o ka Papa Hawaii.  Ua wiwi a Waihona i keia manawa, e pono na kahu ame na Elele e hoomanao i ko lakou mau haawina.  He mea pono loa nae, e hoomanaoia i haawina no ka Papa Amerika, i na paha i hookahi dala a kela ame keia Ekalesia e kokua ai i ka Papa Amerika, ua lawa ia no ke kokua anaʻku ia Papa, a i oleia, e like me ka hooholo ana a ia Ekalesia.  Aponoia.

 

E hoounaia na kokua mamua ae o ka la 15 o Mei.  Mahele (h) na mea keakea.  Nui na mea keakea, ka ona rama, ke kinipopo i ka la Sabati.

 

Hoopaneeia me ka pule a Timoteo.

 

LA HANA VI.  Malaki 16, hora 9 a.m., noho hou ka Aha e like me ka hoopaneeia ana.  Malamaia ka hapalua hora haipule.  Helehelu Moolelo.  Aponoia.

 

Hoike a ke komite Hookaulike Kumukanawai ame na Rula.

 

KE KUMUKANAWAI AME NA RULA O KA AHAHUI EUANELIO O KA MOKUPUNI O HAWAII.  A PONOIA MA HILO I KA LA 14 O MALAKI, A WAIHO IA E HOOHOLO LOA IA I KE KAU O SEPATEMABA.

 

PAUKU I.

E kapaia ka inoa o keia Aha, ka Ahahui Euanelio o na Ekalesia Aha Huina o ka Mokupuni o Hawaii.

 

PAUKU II.

O na lala o keia Aha, oia no na Kahu Ekalesia, na Elele pakahi i koho ponoia e na Ekalesia Euanelio, na Haiolelo e noho Haiolelo ana malalo o keia Aha; ke Kakau Leta o ka Papa Hawaii, ame na lala mau a keia Aha i apono ai.

 

PAUKU III.

O na luna o keia Aha; oia ka Luna hoomalu, ame ke Kakauolelo, i koho ponoia ma ka Balota i kela ame keia halawai ana o ka Aha, e noho laua a koho ia na Luna hou.

 

PAUKU IV.

O na hana a keia Aha, oia ke kiai ana i kona mau lala i apono ia, ka imi ana i na mea e malu ai kona mau Ekalesia, ka hoolohe ana i na hoopii i waiho ia mai imua ona, ka hookumu ana i na Ekalesia hou, ka hoohui a hookaawale ana i na Ekalesia malalo ona, ka Poni ana, hoonoho ana, a hookaawale aku paha i na Kahu mai na Kihapai aku, ka haawi ana i na Laikini no na Haiolelo kupono, ka ninaninau ana i na keiki a ka Aha no ko lakou kupono ma kahale ana i ke Kula Kahunapule, ke koho ana i na Komite ame na Elele no ka Ahahui Euanelio nui o ka Paeaina.

 

PAUKU V.

He elua halawai ana o keia Aha i ka M. H.; o ka mua i ka mahina o Malaki, a o ka lua i ka mahina o Sepatemaba.

 

PAUKU VI.

E hiki no ke hoololiia a pakui hou paha i keia kumukanawai, he hoolaha e mai ka mea hoololi i kahi halawai mamua ae, a e aponoia ia hoololi a pakui paha e ka Elua hapa-kolu (2-3) o na lala i akoakoa mai ma ka halawai mahope iho o ka hoolaha ia ana.

 

NA RULA O KEIA AHA.

Pauku 1.  Ua hiki no i ka Aha ke koho i mau Kanaka hoopono e ae ma ke ano he poe hoakuka, koe nae ka mana koho.

 

Pauku 2. - E hoomakaia na hana @ kela ame keia la ma ke kakahiaka me na hana haipule no ka hapalua hora.  E hoomakaia hoi na hana ma ka auinala me ka himeni ame ka pule, a e hookuuia na halawai a pau me ka pule.

 

Pauku 3. - E kahea ke Kakauolelo i na inoa o na lala ma ka hoomaka ana o na hana, i kela ame keia la.

 

Pauku 4 - E koho ka @@nahoomau i mau komite ku mau he Eha (4), oia hoi ke Komite Imihana, Komite Halawai Haipule, Komite Imi Haawina Heluhelu, ame ke Komite Paʻi Moolelo.  A nana no noi e koho na komite Wae.

 

Pauku 5. - E hiki no i na Luna o keia Aha ke kahea i halawai kuikawa ina e noi ia mai e kekahi mau Kahu Ekalesia Elua, ua hiki no hoi ia laua no na kumu kupono ke koho i kahi ame ka la e halawai ai ua Aha @@@kawa la.

 

Pauku 6. E malama keia Aha i na Rula o ka Ahahui Euanelio o ka Paeaina mamuli o ka Buke Lawelima.  a e hooholoia na hana mamua o na kanawai pili laula e ae.

 

Pauku 7. - I ka hoomaka ana o na hana o ka la mua, e hoike mai ke kakauolelo i na hana i koe o ke kau i hala.

 

Pauku 8. - Ina e makemake ana kekahi iaia e kaawale mai ka halawai aku, e noi mua oia i ka Lunahoomalu.

 

Pauku 9 - E hiki no i ka Aha ke kapae no ka manawa i kekahi Rula hoomalu ke apono ka Aha holookoa.  e hiki no hoi ke hooponopono hoololi a pakui i keia mau Rula hoomalu ma ke koho ana o na hapa-kolu elua o na lala i hiki mai na kahi halawai ana.

(E nana ma ka aoao 6.)

 

 

(Large picture of Ka Mokukaua Bennington.)