Ka Nupepa Kuokoa, Volume XLII, Number 14, 1 April 1904 — Page 1
| This text was transcribed by: | Liisa Laurila |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
HOOPUKAIA I NA KAAKHIAKA POALIMA APAU.
------------------
BUKE XLII HELU 14. NUPEPA KUOKOA, POALIMA, APERILA 1, 1904.
------------------
EIA AKU IMUA KA PUANA A KA MOE
------------------
Ku o Rusia ma ke Kulana Pale
---
KUEMI AKU IHOPE A LOAA KONA KAHUA E PAIO MAI AI.
---
Hoomau o Adimarala Togo i ke Kipoka ana i ke Awa o Poto Ata.
NA LONO KAUA O KA LA 24, AUWINA LA.
ST. PETERSBURG, Malaki 24. -Ua lilo ae nei ia Saharoff ko Generala Kuropatkin wahi ma ke ano Kuhina Kaua. @@@ hala aku nei o Generala Kuropatkin e lawe ae i ke alakai o ko Rusia mau pualikoa kaua aina ma ka Hikina.
LIAO YANG, Mar. 24. -Ua hookaawale @@ nei o Generala Ma, ke alakai @@ pualikoa o Kina, i kona mau pualikoa e noho ana ma Manchuria a hoihoi aku ia lakou ma ka huli komohana o ke alahao o Simintung ma ke alahele aku o Pechili.
ST PETERSBURG, Mar. 24. -Ua hoole ae nei o Generala Pilug aole he oiaio o ka lono e hoike ana ua a'e aku nei na pualikoa Iapana ma ke alahele o T@@@g. Ua hoole pu mai nei no hoi oia i ka oiaio ole o na lono i hoike mua ia ai no ka pilikia o na pualikoa Rusia ma ka aina.
NA LONO KAUA O KA LA 25.
TOKIO, Mar. 25. -He ehiku mau moku kalepa i hoopiholoia me ka holopono mawaho ae o ke awa o Poto Ata.
ST. PETERSBURG, Mar. 25. -Ua loaa mai nei i ke Keena Kaua he mau hoike e olelo ana eia na Iapana ke hoomakaukau nei e lele ae ma ko Kina teritori ma ke kaikuono o Liaotong.
I ka wa e hiki aku ai o Generala Kuropatkin ma Mukden, oia ka manawa e mahale ia ae ai na pualikoa o Rusia iloko o na mahele ekolu. Aole e alakai ia aku ana ke kaua maluna o Korea. E emi aku ana na pualikoa Rusia i ka wa e nee aku ai na pualikoa o Iapana a hiki i ka wa e loaa ai ke kahua kupono a Rusia e palo aku ai.
TIENTSIN, Mar. 25. -Ua hoomau hou aku nei o Viceroy Alexieff i kana koi i na koa ame na aliikoa o Kina e noho nei ma Manchuria e haalele koke iho ia wahi.
SEOUL, Mar. 25. -Ua hoikeia mai nei @ia @@ koa Rusia ke hoopoino nei i na aina e kokoke ana i Anju.
Wasinetona, Malaki 25, 1904.
@A SAITO, Honolulu:
"O keia hoike malalo iho nei oia ka hoike a Adimarala Togo, ke Alakai Nui o ko kakou mau mokukaua:
"Ua lele kaua aku ko kakou mau mokukaua e like me ka papa kuhikuhi i hana mua ia ai.
"He elua mahele o ko kakou mau moku wawahi topito i hana aku i ka lakou hana i kauohaia aku ai mawaho ae o ke awa o Poto Aia mai ka po mai o ka la 21 a hiki i ke ao ana o ka la 22. Ia manawa hookahi no hoi ua hookokoke aku na mokukaua Fuji ame Yashima i ka nuku o ke awa a hoomaka aku la e kipoka i ke awa.
"I ka manawa e kipokaia nei ke awa ua puka pakahi mai la na mokukaua o ka enemi e noho ana iloko o ke awa, a i ka hiki ana i ka hora 2 auwina la, ka manawa hoi i hooki iho ai makou i ke kipoka ana, he 5 mokukaua, 4 mokukaua holo mama ame 10 moku topito ola ka nui o na moku o ka enemi e noho mai ana iloko o ke awa.
"He pipili mau aku na mokukaua o ka enemi malalo o ka malumalu o na papu a ma ka nana aku me he mea ia e hoowalewale mai ana ia makou e hookokoke aku ma kahi ikaika loa o ka lele ana mai o na poka mai na papu mai. Ua ki mai na mokukaua o ka enemi ia makou a he lehulehu na poka i haule mai ma ko makou pohai, o ka oi aku no nae ma kahi o ka mokukaua Fuji, eia nae aole i pololei ka lakou mau kaulono ana a nolaila aole he mau poino i loaa mai i ko kakou mau moku. Ua hoomamao aku ko kakou mau mokukaua ma ka hora 3 p.m.
"TAKAHIRA."
NA LONO KAUA O KA LA 26.
VLADIVOSTOK, Mar. 26. -Ke hoomaka mai nei ke kau wela a ke hoomaka mai nei na pualikoa e komo mai maanei.
NEWCHWANG, Mar. 26. -Ua weheia ae nei ka muliwai o Liao no ka holo ana aku o na moku.
(O ka weheia ana mai la o ka muliwai o Liao oia ka mea nana e hoonawaliwali i ka manao e ala mai ana kekahi kaua nui o na Mana Nui e ku nei ma Yinkow a i ole ma Newchwang oiai ma keia mau wahi ke ku nei he mokukaua Rusia, Amerika ame Pelekane i paa hoi i ka hau. Ua hoomakaukau ae nei o Rusia i ke awa o Newchwang, kekahi o na awa i hemo no na launa kalepa ana, a kahi hoi i nui loa ko Amerika mau lawelawe kalepa ana, me na palekaua kupono, a ina paha i hoomaka mua ko Iapana mau mokukaua e kipoka ia wahi oiai e paa ana i ka hau ina ua poino o Rusia malaila. Ma kekahi o na hoike i loaa mua mai maanei ua oleloia ua noi aku ke kapena o ua mokukaua Rusia la e ae ia mai oia e hoopahu i kona moku ke lelekaua aku na Iapana iaia, a ina i ala io mai keia hana malaila ina ua poino pu me na moku Pelekane ame Amerika e paa
(E nana ma ka aoao 6.)
------------------
Ikaika ko Lakou mau Manao
---
Manaoio lakou he Kauoha keia na ke Akua a e Kupaa ana maluna olaila.
---
LOKO PAAKAI, Uta, Malaki 4. -Ua ikeia o Peresidena Joseph F. Kamika o ka hoomana Mamona, ua mare aku oia no eono manawa. O kana wahine mua loa ua make.
Ua mare aku oia he ekolu mau wahine, oia o Sarah E. Kamika, Alice Kimball Kamika ame Mary T. Schwartz. O ka wahine hope i hoikeia ae nei oia ka makuahine o na keiki hope a Kamika e ola nei. Eia oia ke noho nei me kona makuahine ame kana mau keiki elima; o ka muli loa he kaikamahine nona na makahiki he 4 a o ka mua loa he keikikane nona na makahiki he 13. I keia la ua hoike ae oia i kona manaoio paa i ka pono o ka mare lehulehu. I ka wa i ninauia aku ai oia no ka Peresidena Kamika hoike e hoike nei imua o na lala o ka Ahaolelo Amerika nana e noonoo mai nei ka hoopiii mare lehulehu o Lunamakaainana Smoot i kohoia aku nei mai ka mokuaina aku o Uta, ua pane aku ua wahine la:
"Ke haawi aku nei oia i na mea oiaio apau ia lakou me ka ikaika pu, a ke manaolana loa nei wau e hoomau aku ana oia i kana hoike. E ala mai ana kekahi mea ma keia mua aku i ka poe e ku-e loa nei i ko ha'i mau kuleana. Ke makemake nei wau e lohe pono na pepeiao o keia poe, a e hiki mai ana ia manawa. Na keia poe i hookuke mai ia makou a komo iloko o keia awawa, a ke manao nei wau eia lakou ke manao hou nei e hookuke aku ia makou mawaho aku o keia wahi."
Penei hoi ka hoike a kekahi o na wahine i hoike ae ai i kona manao, oia hoi o Edna L. Kamika:
"O ka hana a Mr. Kamika e hana nei oia ka hana a kekahi kanaka hoopono loa e hahai aku ai, a ke manaoio loa nei wau i na mea apau ana e ha'i nei. Ke makemake nei wau e ha'i aku i na kanaka apau o ke ao holookoa, ke hauoli nei wau i ka lilo ana i wahine na Joseph Kamika. He wahine wau i mare lehulehu ia, a ke manaoio loa nei wau i ka mare lehulehu; oia hoi ua ike wau o ka hoike a Joseph Kamika no ka mare lehulehu he kauoha ia na ke Akua i kauoha mai. Mai ko'u manawa i mare ai a hiki i keia manawa owau kekahi o na wahine hauoli loa, a aole hoi he manawa a'u i kaumaha ai i ko'u hana ana pela.
"Ua ike no wau eia ke ao holookoa ke ala ku-e mai nei ia makou, aka aole ia he mea nui na makou e nana aku ai. Ke ku-eia mai nei makou no ko makou hooko ana i ke kauoha a ke Akua. E hahai ana no makou mahope o ka makou hoomana me ka nana ole ae i ka nui o na pilikia e ala mai ana. Oia ke kumu i laweia mai ai keia mau ninaninau ana i ka hihia o Smoot. He
(E nana ma ka aoao 6.)
------------------
Makemake ia Kahapula ka Lunahoomalu
---
Wahi a na Olelo ua hoopaa aku na Repubalika oia no ma ia wahi.
---
Ina aole e koho hou ia ka Hon. F. W. Beckley i lunahoomalu no ka Hale o na Lunamakaainana i keia kau kuikawa @@@ manao na Home Rula e uh@@na na hoohalahala mai ia lak@@@ makemake ai. A ina hoi e kakou mai na Repubalika i ke koho pono ia o Kahapula i lunahoomalu ua oleloia ae i ka hoike manao ana o kekahi mau hoa ahaolelo Hawaii e hooholo maikai no lakou i na hana imua a e huli hoi aku i na home mahope iho o ka pau ana o na hana.
He nui na Home Rula i hoike manao ae i kalele ikaika ko lakou manao me he la aole e hookomoia ke kanawai kalana i ke kau e hiki mai ana aka aole e hiki ke hoopaa mua ae no ka mea aole e ikeia ka hana a kela ame keia hoa pakahi nona iho pili i ka hookomo bila iloko o ka Ahaolelo. I ka la apopo ame ke Sabati iho e hoea mai ai na hoa ahaolelo o kuaaina a ia mau la iho paha e noho ai na halawai hana mamua @@@ noho ana o ka ahaolelo i ka Poakolu @@u.
Ua ho@@@nao ae o Jas. H. Boyd e kakoo @@@ ka manao e hanaia aku ka hana aole @@a ke ano pili kalaiaina aka ma ke ano oihana maoli a e hui ae na aoao a elua, ka Repubalika ame ka Home Rula a hana aku iloko o ke kalana oihana maoli aole iloko o ke kalaiaina, no ka hooikaika ana e pau na hana a hiki i ka pau pono ana, i mea e palekana ae ai ke Aupuni mai ka lua ona e noho nei.
He mau ninau pili wale no i ke dala ka hana nui o keia ahaolelo kuikawa e noho ana a oia wale no na kumuhana e pono ai e noonooia a e kapaeia ka lawelawe pili kalaiaina ana a i ka manawa a ke Kiaaina e hooaiai ai i na kumuhna e pono lakou e aponoia koe wale no kekahi mau bila paha e ulu mai ai na ninau maluna o lakou, a o na poo oihana ka poe na lakou e hoomoakaka loa ae i na hoohalahala a o ka pau no ia.
Ua hoopilipili pu ae ka Mr. Boyd kukulu manao maluna o ke kulana lawelawe oihana ana o na hui hoowaiwai a kalepa waiwai, oia hoi, wahi ana o na hookahua kumuwaiwai ana a ka luna nui o kekahi hui e manaoia ua hanaia me ke akahele a aia maluna ona ke ko'iko'i o ka hilinai ia o ka pono io o ia mau hoolala ana, a i ka manawa e waihoia aku ai imua o ka papa lunahooko o ka apono wale mai no ka lakou, a e like me ka oiaio o ia pela no ka lawelawe ana i ke kulana o ke Aupuni i kea kau, oia hoi aia maluna o ke Kiaaina ke ko'iko'i o na mea apau o ke Aupuni, oiai oia ka mea i ike a hoomaopopo i na mea o ke Aupuni a o kana mau hooaiai i ka Aha-
(E nana ma ka aoao 5.)
------------------
William H. Coney ua hala
---
Kuu Luhi mahope o ke Kaama'i pokole ana.
---
He Opio Naauao a he Mea Kakau Nupepa i ike nui ia ma Honolulu nei.
------------------
WM. H. CONEY.
------------------
Ma ke kakahiaka o ka Poalima i hala i laha ae ai ma ke kulanakauhale nei ka lono kaumaha o ka hala ana aku o Mr. William H.H.Coney, kekahi o na opio Hawaii i hilinaiia a i kau aku na manaolana e loaa ana he mau hana pono no keia Aupuni ma keia mua aku mai iaia mai. O ka opio i hala aku la oia ke keiki a Mrs. Laura Amoe Coney ame John Coney, ua hanauia oia ma Kaulu, Ewa, Oahu nei i ka makahiki 1872, ma ka la 30 o Novemaba, nolaila ua piha iaia na makahiki he 31 a oi iki.
Mahope o kona hoonaauaoia ana ma na kula o Hawaii nei, ua hoounaia aku oia i ke kula kiekie o Colombus, Ohaio, kahi hoi ona i hoonaauao piha ia ai. I kona hemo ana mai ua hoi mai la oia no kona aina hanau nei, a ua apo koke ia aku oia ma ka hana kakau nupepa no ka nupepa Adavataisa i ka wa o ia pepa e kaa ana malalo o ka hooponopono ana a W.R.Farrington, i ka makahiki 1895. I ka loli ana ae o W.R.Farrington a lilo i lunahooponopono no ka nupepa Buletina, ua hahai aku o William H.H.Coney iaia a noho i mea kakau no ua nupepa la, a malaila oia i hookiekieia ae ai i iaia no ka papa lunahooponpono no ua pepa la kahi hoi ana i noho hana ai a hiki wale i kona hala ana aku ia.
Ma ka hana pili kalaiaina, o William H. Coney, oia kekahi o na opio Hawaii i lilo aku i lala no ke Komite Kuwaena o ka Aoao Kalaiaina Repubalika, a oia no hoi ke kakauolelo o ia komite. Ua ili iho ke kaumaha ia Komite, a aole wale hoi ia komite wale no aka i ka aoao Repubalika kekahi. I ka wa i lilo ae ai ka hooponopono ana o ke Aupuni Teritori nei ia Kiaaina Carter, ua waiho aku oia i ka inoa o W.H.Coney i lunanui no na hana hou, aka aole i ae aku ka opio e lawe mai ia hana maluna ona, a ua iini mau hoi oia i ka hana kakau nupepa. Iloko o na hana o ka aoao Repubalika, ua loaa he manaolana e lilo ana keia opio i alakai no ka lahui, a ua nui na manawa i hooloheia ai a i hoohanauia aku ai kana mau hana i manao ai he mea e pono ai ka aoao Repubalika, a ua lilo oia i kuhikuhi puuone ma kekahi mau hana o ia aoao.
He opio oia i ike nui ia iwaena o na hana hoolaulea, a ua lilo oia i mea e kau aku ai na maka o na opio maluna ona e loaa mai he mu alakai no na hana e hana ia aku ana. He lala oia no kekahi mau hui ma-iu o Hawaii nei, a pela hoi me na hana hooikaika kino.
Mamua o kona loaa ana i ka ma'i, ua hele aku oia e ike ia Dr. Walter, a noi aku iaia e nana ia mai kona puuwai, a mahope o ka nana ana a ke kauka ua ha'iia aku iaia e loaa ana oia i ka ma'i a e make ana oia. I kona lohe ana i kela pane a ke kauka ua hoi aku oia me ka hauoli, he haawina hoi e hoike mai ana aole oia i maka'u i ka make. Ua loohia iho la oia i ka ma'i garipa ma ke ahiahi o ka la Sabati, Malaki 20, a waiho oia maluna o kahi moe. Ua kiiia aku na kauka a ua hele ae lakou, a mahope o ka lakou mau kukai ana ua hoike ia aku la i ka makuahine o ka opio e hoomakaukau no ka manawa e hiki mai ana, oiai aole e ola ana ka opio mai ka haawina i loaa aku iaia. Maluna oia o kona wahi moe a hiki wale i ka hoea ana mai o ka hopena, a lawe aku la hoi ka Makua Lani i Kana o ka uhane.
Ma ka auwina la o ke Sabati nei i malamaia ae ai kona hoolewa mai ka luakini aku o Kawaiahao i ukaliia hoi e na lala o na hui ma-iu ana i @io ai i lala, ame ka hana Teritori. Mamua no nae o ka malamala ana o kela anaina hoolewa, ua malama mua ia ae he anaina pule kupapau maluna o kona kino ma ka home o kona l@@ makuahine, a laweia aku no Kawaiahao, kahi hoi i akoakoa ae ai na makamaka ame na hoaloha e hoike hope aku i ko @@kou luuluu nona. Ua maneleia aku kona kino lepo a kanuia iloko o ka pa ilina o Kawaiahao, a malaila i hanaia ai na hana hope loa i huipu ia mai hoi me na leo pu i ki aloha ia mai e ka Pualikoa F. o ka Pualikoa Kiai Lahui.
------------------
MOKU KIAIAWA NO HONOLULU NEI.
---
Ma ka Poalua nei i loaa mai ai he lono ia Luna Duke Awa Stackable mai Kapalakiko mai e hoea mai ana ka moku kiaiawa Thetis maanei ma ka la 8 o Aperila nei, oiai ua loaa ae nei ke kauoha i ua moku la e haalele aku i ke awa o Kapalakiko ma ka la 1 o keia mahina a holo mai no Honolulu nei.
Ua hoihoiia ae o Kapena Hamlet o ka moku kiaiawa Hugh McCulloch maluna o keia moku a ua waihoia aku ke kauoha ma kona lima no ka lawe ana mai i keia moku no Hawaii nei. E noho iho ana keia moku maanei no kekahi manawa a holo aku oia no ka Lae Barrow ma kana huakai holo mau o ka makahiki.
Me he mea la i ka manawa e haalele iho ai keia moku i keia awa e hoouna ia mai ana kekahi moku hou aku no ka lawe ana ae i kona wahi maanei, a e hoomau ia aku ana keia mau holoholo ana maanei a hiki i ka manawa e paa mai ai ka moku e hana ia aku ana no keia awa.
------------------
HOOLE LAKOU AOLE I HEWA.
---
I ka Poakahi nei iloko o ka aha hookolokolo a Lunakanawai Kaapuni Robinson o Honolulu nei i ku ai o Jonah Kumalae, Enoch Johnson ame Solomona Meheula imua o ka Lunakanawai e like me ke kauohaia ana e hele aku imua o ka aha no ka hoike ana i ko lakou kulana ina paha ua hewa a aole paha no ka hewa i hoopiiia ai lakou no na hewa like ole pili i na hoike hoolilo o ka Hale o na Lunamakaainana.
Ua hoike aku lakou no lakou pakahi iho aole i hewa a oiai ua pau na kiuro hookolokolo no keia kau ua waihoia aku la ko lakou hihia a ke kau hookolokolo o keia mahina o Aperila.
------------------
Ua kohoia ae nei ke Keikialii Kawananakoa i peresidena no ka @wi Ku-e Hoomainoino Holoholona ma kahi hoi o Miss Helen Waila i noho mua ai. Ke hoomaka mai nei oia i kana hana i keia mau la.