Ka Nupepa Kuokoa, Volume XLII, Number 6, 5 February 1904 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

Hoopukala i na kakahiaka Poalima a pau.

Buke XLII Helu 6.     Nupepa Kuokoa.  Poalima.  Februari 5, 1904.                      Na Helu Apau 3001

 

E KANU ANEI A I OLE E PUHIAHI

He Ninau Ano Nui i Noonooia Imua o ka Aha Akeakamai Hoohauoli.

 

O ke puhiahi i ke kino make o ke kanaka ola ke kumuhana ano nui loa i heluheluia mai e Mr. F. J. Lowrey Imua o ka Aha Akeakamai Hoohauoli i malamia ma ka halenoho o Mr. W. R. Kakela i ke ahiahi Poakahi nei.

 

Ua hoomakaukauia ke kumuhana maluna o kela mau hoakaka noeau i kakaula ma ka pepa, mailaila e hoike mai ana i ka hoohana mau ia o keia mau mahele a elua - o ke kanu i ke kino iloko o ka honua ame ke puhiahi ana i ke kino - a ua hoike pu ia mai ka ino ame ka maikai o na kumuhana ame ka manao e kukulu i hale no ka oihana puhiahi iloko o ka Paeaina.

 

Ma ka noonoo ana o ka poe i akoakoa ae ma ia halawai ua lilo aku ka hoapono ana i ke kumuhana i heluheluia mai ma ka aoao puhiai e ka hapanui o na hoa.

 

O keia mau keonimana malalo iho nei o kakou kekahi poe i akokoa ae i kahi o ka hana a i hoolohe ai i keia kumuhana Dr. S. E. Bishop, Prof. Brigham, Rev. W. M. Kincaid, Prof. W. D. Alexander, F. S. Dodge, A. F. Judd, Dr. L. E. @fer, Dr. N. B. Emerson, Dr. W. H. Mays, A. N. Campbell, Jos. Emerson, Dr. C. B. Cooper, Dr. Whitney, T. @ve Davies, Chief Justice W. F. Frear, Rev. O. P. Emerson. W. L. Whitney, Mr. Hedemann, Prof. Scott. C. M. Cooke, Rev. O. H. Gulick, F. J. Lowery, Judge Hartwell ame Rev. W. D. Westervelt.

 

Mahope o ka heluhelu ana i keia kumuhana ua noonoo koke ia, a ma ka hoike manao ana a Mr. Hartwell ua kalele ikaika oia e waihola aku keia hoike piha i ka nupepa Adavataisa no ka hoolaha ana ke kumu hoi i ikela ai a laweia mai no ka pono o na Hawaii iloko o ke Kilohana nei.

 

Ma ke ano nui o keia kumuhana ua hoike ai o Mr. Lowrey i ka hana like ia e kela mau oihana a elua - o ke kanu i ke kino make iloko o ka honua ame ka puhiahi ana i ke kino ma na wahi like @l@ o ka honua a i hoomaamaa mau ia no @a kenekulia koliuliu loa i hala.  A wahi ana o ke kanu ana i ke kino ola no ka oihana i ike nui ia apuni ka honua oiai ke puhiahi aole i puni aka ala he mau aina i hana ia paha a ike lakou i ka oi ae o ka maikai mamua o ke kanu ana.

 

Alaila ua waiho mai ia ka mea kakau o ke kumuhana ano nui i na manao like ole o ka poe i hoike manao mua maluna o keia mau kumuhana, i ka nana aku i ka hapanui o ko lakou mau manao e kakoo ana i ka maikai o ke puhiahi a maikai ole ke kanu na.

 

Wahi ana ua hoomaopopoia ka hana ia o ke puhiahi mamua loa aku o ke au kristiano, e na lahui like ole a koe no nae kekahi mau lahui, oiai o ke kanu no ka lakou rula maa a mai ia manawa mai ka hookumuia ana o keia mau loina a elua a hiki wale i ka puka ana iwaho loa o keia au malamalama, a ma ka huli hoikaika ana o ka poe o hooilio nui i ko lakou manawa ma ia mau haawina a i hoonaauaoia ma ia mau mahele ua hiki mai lakou i ka olelo hooholo na ke puhiahi ka hana maikai i ka poe ola a na ke kanu i ke  kino ka hana hoinoino i ke ola o ka lehulehu e ola ana.

 

Ma kekahi mau pa-ilina ua ikeia ke kanu papalua a papakolu a pa-ha, a ua ikeia ka poino nui o ka lehulehu e oia ana ma ia mau wahi, aole wale no ma na wahi kakikahi aka ua ikeia ke ino maopopo ma na wahi apau oi loa aku iloko o na kulanakauhale. 

 

No ke puhiahi hoi ua ikeia ka nui ku-e o ka hapanui o na kanaka mamuli o ka maa a pulama nui ia o keia rula kanu i ke kino, aka i ka noonoo nui ia ana ua loaa ka hoomaopopo i keia mau la i ka waiwai nui o ke puhiahi ana, he maikai no ke kino make a oi loa aku ka maikai i ka poe e ola an a i ka ohana hoi - ua hiki loa ia lakou ke malama me ka loaa ole o kekahi kanalua e loaa ana i ka poino o ka maʻi.

 

Maluna o keia mea hookahi ua hoike ae o Lowrey, aia ma na wahi e lawelaweia nei kekahi mau hoike maikai loa no ka maikai maoli io o keia puhiahi a he uuku no hoi ka lilo e like me kanakolu dala no ke kino hookahi.

 

No ka maikai o keia puhiahi ua kukuluia kekahi mau hale puhiahi nunui a nani maoli, a iloko o ia mau hale na pono puhiahi apau ma ka hale - lalo loa o ka hale a ma na keena nunui maluna ua hoolakoia me na hoowehiwehi @i i ka oihana hoolewa a i hoolako pu ia hoi me na ogana.

 

A i ka manawa e pau ai ka malama ana o ke anaina hoolewa o ke kino make alaila me na mea i hoomakaukauia no ka hooiho ana ilalo hale - lalo ua hiki ke hooiho palanehe ia ke kino a nalowale aku ia ilalo mai ka maka aku o ka poe i hiki ae ilaila, a ina ua makemake ka ohana e ike i na hana o ke puhiahi ua hiki no lakou ke aeia e nana a ʻaole no me ka nanaina weliweli o ke ahi e hanaia mai ai ke puhiahi.

 

Aia a hiki aku ke kino ilaila alaila e hookauia no ke kino iluna o kekahi kaa i hoomakaukauia a ʻoia no ka manawa e pahuia ai iloko o ke keena ahi, he keena aole e ikeia ka ula o ke ahi aka o ka wela wale no ka mea oloko a iloko o hookahi hora a hookahi paha me ka hapa e pau ai ke puhiahi alaila i ka manawa e puka mai ai o ka lehu wale no ka mea i koe iho ka mea hoi i makemakeia e malama ke manaoia pela.

 

Ma keia hana ua hiki ke hoomaopopoia, wahi a ka mea nana keia hoakaka kumuhana ua maikai na mea apau, ua maikai no ka lehulehu a maikai no hoi no ka ohana, no ka mea e hiki ana ia lakou ke malama a he maikai pu no hoi no ka malama anaina hoolewa ana mamua o ke kino e hoolewa kanu ia ana i ka lawehele i ke alanui me ke ano menemene a hiki i kahi e waiho ai.

 

O ka like ole wale no o keia mau mahele a elua - o ke kanu ame ke puhiahi oia no keia - No ke kanu ana, a pupupu nui ma kekahi wahi hookahi aole e nele ka puka o na ea maikai ole mai ka honua mai he ea hoopilikia hoi i ke ola o ka lehulehu, a o ka ino palaho o ke kino iloko o ka honua oia kekahi ino maikai ole loa e hoopauma@le ana i ka wai a ka lehulehu e inu ana ke kumu nui i ulu mai ai na maʻi koikoi inoino apau a hoopilikia nui i ka lehulehu.

 

Ua ikeia ka oiaio o keia mau mea ma na wahi apau a o keia ino o hoikeia ae ia aole e pau i ka manawa koke aka e mau ana no ka manawa loihi maoli e hala ai kekahi mau makahiki loihi, a e like me ka mau o ia ino pela ka mau o ka hoopilikia o ia mea i ke ola o ka lehulehu.

 

Aole hoi e like me keia ka hana a ke puhiahi aka he hoopau kana ia mau ino i maopopo mua iloko o ka manawa pokole loa.

 

Ma ka manawa i pau ai ka heluhelu ana o ke kumuhana ua hoike manao mai ia na hoa a ua kaa aku ka hapanui i akoakoa ae ilaila i ke apono i ke kumuhana a kakaikahi ka poe hoohalahala.

 

PAAHAO  HOLO  MAHUKA

 

Eia kekahi o na paahao o Kawa ke hele nei i ka loa ame ka laula o ka aina.   O Pedro Rodrigues. oia kona inoa.  he Poko Rico @ ikela kona makau ole i ka hana ana i na hana kolohe.  Aole i ikela kona manawa i holo mahuka ai, aka ua manaoia ua mahuka aku oia ma ke kakahiaka nui o ka Poakahi nei.

 

O keia Poko Riko, ua  nauauao maoli no i ka imi ana i kona wahi e hemo ai.  Ke manao wale ia nei, mamuli o na hana ana i hana ai no kona palekana ame ke ano o kona noho ana iloko o ka halepaahao, ua kiai aku oia i na mea apau e pili ana i kona wahi i hoopaaia ai.  a ua lawa ka ike iloko ona e ike ai i kahi hemahema o ko lakou kakela pio.   Ua hoopaa ia aku ola iloko o kona lumi i ka po Sabati e Wiliki Kaelekai, a iloko o kona awiwi ma kana hana.  ua poina iho ia oia i ka wili ana i ke ki o ka puka o keia Poko Riko a paa pono na wili ana.  Me he mea ia i ka wa a kana pio i noho ai iloko o kona lumi.  aole no paha i nele kona ike ana mai i keia hemahema ma ka aoao o ka wiliki.  Ua haʻlia ae, ua hana ua Poko Riko la i kekahi keko wili.  mailoko mai o kekahi hupa hao,  a me ua hupa hao la oia i wehewehe ai i ka poheoheo e paa aku ai ka laka.   Ke hemo keia poheo.  o ka hiki no l@ iaia ke laiau aku i ka hao loihi nana e kaomi ana i ka puka me na ku o ka puka.  Mahope o ka pau ana o kela hana, ua hiki iaia he hele aku iwaho me ka ike ole ia mai e na kiai.  Ua hoolewalewa iho ia oia iaia ma ka aoao o ka pa, a e like me ka lele ana o ka popoki.   pela oia i lele aku ai mawaho o ka pa, a holo aku ia.  Ua hoike ae kekahi o na kiai, ua ike oia i kekahi mea mawaho o ka pa ia wanaao.  e hele hikaka ana, a ua manao oia o kekahi o na kanaka o Iwilei e hoi ana i kauhale.  Ua hoohui wale ia no, o keia kanaka ona ikeia ai oia no ua paahao mahuka ia.

 

Ke manaoia nei, ua hala aku oia no ka huli Koolau o kakou nei. a no ia mea ua hoounaia aku kekahi mau makai e hele aku. no kahi e noho nui ia nei e na Poko Riko.  Ua hoouna pu ia aku nei kona kii ma na wahi apau o keia mokupuni.  a ua hoolaha pu ae nei no hoi o Makai Nui Baraunu, e haawai ia no ka makana o $50 i ka mea e hopu ana a paa ua paahao ia.

 

LA HANAU O KA MOI LUNALILO

Hoomanaoia ma ka Lunalilo Home

Piha Hauoli na Elemakule ma ko lakou Papaaina

O ka Poaono i hala iho nei, la 30 o Ianuari, oia ka la hanau o ka Moi Lunalilo, ke alii nona ka waiwai i haawiia no ka pomaikai o kona lahui Hawaii e noho ana iloko o ka palupalu ame ka hune.

 

He la hauoli nui no hoi keia na na elemakule o ka home i na makahiki apau ka manawa a lakou e akoakoa hauoli ai.  ka manawa e loaa ai ko lakou mau haawina manawalea lole ame ka hauoli ana ma ka papaaina e paholaia ai imua o lakou o na hoomanao o ka Moi Lunalilo.

 

Ma keia la no hoi i konoia ai na makamaka o ke kulanakauhale nei ame kekahi poe malihini e ae no ka hui pu ana i keia hoomanao o ka Moi, ka Makua o na iliune a ua piha hauoli na elemakule i ka hui lulu lima ana me na makaikai i hiki ae.

 

E like me ke ano mau o ka hoomoʻa ana i ka puaa ame na mea like o na ono Hawaii pela no i hanaia mai ai na lako o ka papaaina a ua luluu maoli no me na ono like ole a maluna o na papa-kaukau i hookaawaleia no mea ai no na palupalu o ka home a no na makamaka i konoia a i hiki aku ilaila ua hoopiha like aku lakou i ka lua o ka inaina a holo o Keoni Bulu.

 

Ma na hui kukai olelo ana ua hauoli mau na palupalu i ka hui ana me na makamaka i hiki ae e ike ia lakou.  e haawai ana i ko lakou aoha ohaoha kulo @ na lede ma ka honi ana i ko lakou lima ame na kukai olelo maikai ana.

 

Ma keia manawa no hoi i nele ole ai ka loheia aku o kekahi mau mele Hawaii me ka olioli, ua oleloia o ke mele a ka mea nona ka la hanau i punahele nui ai i kona wa e ola ana oia kekahi iloko o ka huina mele i o-lio-liia mai he mea hoolana manao hoi i na makaainana o ka Moi. 

 

O ka bana puhi ohe o ke Teritori kekahi i hiki ae ma ka home no hookani ana i ka lakou poe hokeo me na mele nani.  ku i ka hauoli iloko o ka houpo a hoomaneo hoi i ke kumu pepeiao, a ma na mea apau ua maikai maoli na hana hoomanao i lawelawela ma keia la.

 

He hana maa mau no keia ma keia home i na la hanau apau o ka Moi a ua maikai hoi no na mea apau.  a i na malihini hoi oia kekahi maanawa a lakou e ike ai a hoomaopopo i ke ano o ka hoomoʻa ana i na mea ai Hawaii - maloko o ka imu a lawalu iʻa paha ame na mea like e nele ole ai ka hoohauoli ana ia lakou no ia ike i loaa ia lakou.

 

Mawaho ae o keia ua loaa aku na manawalea lole no na elemakule a ua nui mau no hoi ko lakou hoomaikai no ia lokomaikai i pipili loa ai ko lakou aloha ia Mrs. Weaver ka makuahine e malama nei ia lakou a maluna ona na hoomaikai a lakou he nui no ka nui pulama ia lakou me he mau keiki la.

 

HOME LUNALILO O NA HAPAUEA HAWAII.

 

Pepehi ke Kane i kana Wahine a Make loa

HONOKAA, Ian. 25.- Ua pepehi iho kekahi Kepani i kana wahine a make loa i kea la maanei, a eia o Makai Nui Anaru ke uhai nei mahope o ka meheu o ka puuwai eleele.  O Futsuigoto, ka inoa o keia Kepani, a ua hou iho oia i kana wahine me ka pahi a hiki i kona make ana.  I ka loaa ana aku o ke kino make o ka wahine, ua ikeia ua pahu iho ke kane i kana pahi ma na wahi like ole o kana wahine.   Ua hoikeia aku keia lono ia Makai Nui Anaru iaia ma Waimea, kahi hoi ona i loaa aku ai i ka lono, iaia i huli hoi aku ai i kauhale mai kana huakai makaikai me ke Kiaaina.  I kona lohe ana i keia hana manaonao, ua kauoha koke aku la ia e lawe ia mai kana mau ilio hanu meheu mai Hilo mai.   a haalele iho la no hoi oia ia Waimea a holo aku no Honokaa no ka huli ana i keia puuwai eleele.

 

Ua loaa mai ka lono ua nui maoli no ke koa o keia Kepani.   I ka wa ana i hou ai i kana wahine i ka pahi.  e noho ana kana wahine iloko o ko Rickard lumi aina.  O Miss Ethel Rickard kekahi me ua wahine ia ia manawa i komo aku ai ua Kepani ia me kekahi pahi loihi ma kona lima, a hoomaka aku la oia e lele maluna o kana wahine.   Ia manawa pu ho noi i komo ai ka manao iloko o ka opio wahine e hoopakele aku i ke ola o ua wahine Kepani ia, a lele aku la oia mawaena o ke kane ame ka wahine.  No ka nui ikaika o ua Kapani ia, ua pale ae la oia i ka opio wahine a lele aku la maluna o kana wahine a pepehi iho la iaia a make loa.  Mahope o kona hana ana i keia hana karaima, puka aku la oia iwaho a holo aku la a nalo.

 

E HAUNAELE ANA PAHA.

BELGRADE.  Ian. 27. - Ua hoike ae nei na agena o Macedonia e ala mai ana he haunaele ma ka la 28 o Malaki ae nei.

 

E hoi hou ana o Lunakanawai Edings ma ka Oihana Lolo

Ua loaa mai ka lono mai ka Mokupuni mai o Hawaii aole e komo hou ana o Lunakanawai Edings o ka Aha Kookolokolo Kaapuni Ekolu, ma ke ano he moho lunakanawai no ua aha la, ke pau ae kona manawa i hookohuia ai.  Ua hookohuia aku o Lunakanawai Edings ma ka oihana ana e lawelawe nei he eha makahiki i hala ae nei.  Ma ke kulana kalai aupuni he Democarata oia.  Ua loheia kona manao e hoi @a@ no Honolulu nei a hoomau aku i kana oihana ma ka lawelawe loio ana.

 

Ua mahui pu ia mai no hoi o Mr. H . L. Holstein, kekahi o na loio kaulana o ka Makani Apaapaa o Kohala, a luna-hoomalu o ka Aha Wae Moho o ka Aoao Repubalika o kela kau aku nei, oia ka mea o manaoia nei no ka hoopiha ana au i ka makalua o Lunakanawai Edings.

 

Hoomaemae na Paahao i na Auwai o Kewalo

Ma kekahi mau ia o keia pule aku nei, malalo o ka oluolu o ka Lunahalepaahao Henry, ua hoounaia ae la kekahi poe paahao e noho nei ma Kawa e hele ae no Kewalo no ka hoomaemae ana i na auwai oia wahi.  O keia hana hoomaemae i na auwai o Kewalo, malalo no ia o ka hana a ke komite hoomaemae o keia kulanakauhale e hana mai nei no ka pepehi ana i ka makika.

 

O Mr. Larnach, oia ka luna hoohana o keia hana pepehi makika, a o keia hana hoomaemae ana i hana ai no Kwalo oia ka mea nana i hooluolu aku i ka poe e noho nei ma keia wahi.  Ua pau na opala a ka poe o Kewalo i hoahu ai i ka laweia.  a i kela manawa ua maemae keia wahi.  Maikai maoli no keia hana, a he mea pono e hoomau ia iku.

 

Aneane pau loa ko Waimea Poe i ke kue i ke Kanawai Kalana

Ma Waimea nei i keia manawa, ke ikaika loa nei ka manao e kue ana i ke Kanawai Kalana a ua aneane e pau loa na kanaka ma ia manao hookahi.  Ua kaea maoli na kanaka, huipu na Hawaii ma keia manao hookahi, i ke Kanawai Kalana.

 

Wahi a F. W. Carter, ka luna nui o ke kula hanai holoholona o Kamuela Paka, ua nui ke kue o na kanaka i ka holioli ana i ke aupuni a i Aupuni Kalana.  O na hana i hanaia iho nei no ua Kanawai la oia ka mea nana i hoano e i na manao o na kanaka.  a ua manao na kanaka o na lunakiai kalana ua pono loa na ke kiaaina e hookohu mai.

 

Ua loaa pu keia manao hookahi ia Frank Johnson, ka lunahoomalu o ka Papa Alanui.  Ua hai pu ae no hoi oia, ua komo pu o Joe Bell, ke alakai iwaena o na Hawaii malaila, ma keia manao hookahi.   O ke kumu o ko Johnson kue ana i ke Kanawai Kalana, oia ka hamama loa o ka puka a ma ia hamama ana e lilo aku ana na hana maloko o na lima o ka poe a@e oihana.  Ua hoike pu ae no hoi o Johnson, aole he makemake o na Hawaii naauao maikai i ka hoololi ana i ke kulana o ke aupuni.  a o na Hawaii naauao hapa aole o lakou nana i na mea e hoea mai ana a ua like no kekahi me kekahi ma ko lakou manao ana.

 

Ina e ku io ana ke Aupuni Kalana, ke makemake nei ko Waimea poe e hooponopono ia.  Ua oi aku ko lakou makemake na ke Kiaaina e hookohu mai i na Lunakiai, e like me ia i hoikeia ai ma ke Kanawai Kumu.  Ke makema

 

ke pu nei no hoi lakou e hoolilo ia Hawaii holooko@ i hookahi kalana.  Ma ke kanawai mua a maheleia ai o Hawaii i elua kalana ua puikaika kekahi aoao mamuli o na auhau ia.  Ua makemake ko Hawaii Hikina, ina i elua kalana.  alaila e hoohui aku ia Hamakua ma ko lakou kalana.  Ke makemake nei hoi ko Waimea poe, ina elua kalana, alaila ma Waimea ke kikowaena a o ke kahua @o@ o ke kalana.

 

Hala aku o Ilamuku Hendry no Iapana

Ma ka mokuahi America Maru o ka la Sabati i hala iho la. i kau aku ai o Ilamuku Hendry.  a holo aku no Iapana no ke kii ana ia Adachi, keia Kepani i hopuia mai nei ma Iapana malalo o kekahi kumu hoopii i hoohikiia ai maanei.  i kekahi manawa i hala ae nei.  O keia paha kekahi hihia mua loa i ikeia ai maanei, oiai akahi no a kilia kekahi lawehala i hala aku mai na mana aku o ke kanawai o ka aina a i hiki hoi i kona aina, e like iho la me keia Kepani.

 

I ka la i holo ai ua Ilamuku la e hooko i ke kauoha i loaa aku iaia, ua hele aku kona mau hoaloha a haawi aku la iaia i na manao hauoli, a hoolei aku ia maluna ona i ne lei onaona o ka aina, e like hoi me na mea i maa mau i na malihini holo moana a kakou e ike nei.  Ua kau pu aku me ka Ilamuku Hendry kana keiki no ka holo hoomaha ana ma na aina malalo aku nei o kakou.

 

O ka mea i kilia aku la, oia kekahi o na hoike ma ka hihia i hookolokoloia ai kekahi poe Kepani no ka hoopae malu i na wahine hookamakama maluna nei o ka aina i kekahi manawa i hala ae nei.  Mamuli o kekahi mau hoike i loaa ae i ka oihana hookolokolo Amerika maanei e pili ana no Adachi, nolaila i hanaia ai kekahi palapala hopu nona a hoounaia aku ua palapala la no America a malaila i loaa ai na kukai ana mawaena o ke Aupuni Makua ame ko Iapana, a mamuli o kekahi mau aelike i hanaia ai mawaena o America ame Iapana.  I loaa mai ai keia aela ana e kii aku i ka mea hoopiiia, a pela i loaa ai ka mana i ka Ilamuku America maanei e kii aku ai i kana pio.

 

Hoi mai o Makai nui Baraunu ma Hawaii mai

 

            Maluna mai o ka mokuahi Kinau o ke Sabati nei i huli hoi mai ai o Makai Nui Baraunu mai ka Mokupuni mai o Hawaii. Ma Waimea, Hawaii, Kona wahi i noho mai nei, a malaila no hoi oia i kukakuka mai nei me Makai Nui Anaru maluna o ka laua oihana. Ma kana hoike i loaa mai ai ka lono ala na makaainana o Hawaii ke hookipa la i ke Kiaaina me ka maikai.

            Ua hala hou aku oia maluna o ka mokuahi Claudine o ka Poalua nei no Hilo, no ka hooponopono ana i kekahi mau huikau i loaa mai nei mamuli o na hoololi aupuni i ikeia iho nei, ma o ke Kanawai Kalana la. Ua waiho ae o Hope Makai Nui Overend i kona kulana a aole he mea i hookohuia aku ma kona makalua. E hooponopono ia ana keia hemahema me ke kokua pu ana o na Repubalika o Hawaii. Aia pu no he makalua ma kahi o ka Hope Makai o Kohala Hema, a ua loaa keia manao e hookohu aku ia Wm. Lindsay ma ia makalua. Iaia e noho aku ai ma Hilo, ilaila oia e noonoo ai no ka hana ia aku o ka telepona lawehala a na makai, e like me ko Honolulu nei e ikeia nei ma na huina alanui.

 

E Hookolokoloia ana e ka Aha Federala

 

            Ma ka Poakolu o ka pule i hala i hookomo hou ae ai o George A. Davis, he noi e hoolohe hou ia kona hihia ma ka olelo hooholo a ka Aha Kiekie, no ka hihia hoopau iaia mai ka papa loio mai. Ua hookomo mua ae no oia he palapala o keia ano, a ua hoole ia ua palapala la.

            Ua loaa mai nei ke kauoha, mai ke Keena Hookolokolo mai, ia Loio Apana Amerika Breckon, e lawe ae i hoopii kue ia Davis iloko o ka Aha Hookolokolo Federala, malalo no oia kumu hookahi ona i hookolokoloia ai a hoopauia oia mai ka oihana loio a@.

            O ke kumu o keia, oia no ko Davis hoopaapaa ana me ka Loio Kuhina ana hoi i makemake ai e imi mai ka Aha Federala i kona hihia. Ua kau leta aku o Breckon i ke Keena Hookolokolo ma Wakinekona i kela mahina aku nei, a loaa mai la ka pane.

 

Na Hana Alanui e hoohanaia nei.

 

            Eia o Sam Johnson, ka luna alanui ame Henry C. Vida, kona hope, ke hoohana mai nei i na hana hoomaemae i ko kakou mau alanui i keia mau la, a eia na wahi wawahi pohaku ke hoohanaia mai nei me ka ikaika.

            O ka hoomaemae ana i ke alanui Moi mai ka huina alanui o Pawaa mai, ua hiki ae nei ma ka aoao Waikiki o Kamaki Kuea, a aia malaila ka lola alanui e hana mai nei. Eia pu no hoi ke hoomaemaeia mai nei ia alanui hookahi no mai ke alanui Liliha mai a hiki mai i ke kahawai o Nuuanu.

            Ke manaolanaia nei e hoohana koke aku i ka hoomaemae ana i ke alanui Hapakela. He nui na hoohalahala i hoopukaia no keia alanui, a me he mea la e pau ana paha na hoohalahala ana. Ke manao pu ia nei no hoi e hoomaemae i ke alanui Pensacola. Mawaho ae o keia mau mea i hoikeia ae nei, eia no ke hoomaemae ia mai nei kekahi mau wahi okoa ae.