Ka Nupepa Kuokoa, Volume XLII, Number 2, 8 Ianuali 1904 — Page 4
| This text was transcribed by: | Dori Nishijo-kim |
| This work is dedicated to: | Nishijo & Kim 'Ohana |
Ka Nupepa Kuokoa
KE KILOHANA POOKELA NO KA LAHUI HAWAII.
Ianuari 8, 1904
“Ae.”
“I alakai aku ke kiai owaho ia oe i ke kiai o ka holo e haawi aku no oe i ke kiai holo i hookahi silina. Eia mai na silina he iwakalua-kumamakolu no ia mahele o kau hana. E ike ana oe he iwakalua mai loko mai o keia huina e ha’i mai ana ia oe ua pau na pepa o ka la mamua ilio i ke puhiia i ke ahi a i ole laweia paha. O ke koena iho e hoikeia mai ana ia oe na pepa a ia manawa oe e huli iho ai no keia aoao o ka nupepa Manawa. He oiaio e nui ana kau hana ma keia huli ana. He umi silina ka’u haawi ia oe ke loaa ka’u mea e makemake nei. E haawi ae oe i kau hoike ia’u ma ka uwea telepona ma Alanui Baka mamua o ka po ana. Ano, e Wa kekona, o ka kaua hana wale no o ka huli ana aku i ke kalaiwa helu 2704, alaila hoi aku kaua iloko o kekahi o na hale kii o ke Alanui Bona a malaila kaua e hoohala manawa ai a hiki i ko kaua manawa e hui aku ai me na hoaloha o kaua iloko o ka hotele.”
MOKUNA V.
NA MAAWE LOPI EKOLU I MOKU.
O KALOKE HOME, oia kekahi o na kanaka hiki ke hoonalowale aku i kona mau manao uluku maluna o kana mau mea e hana ana. Iloko o elua hora, ma ka hale kii, me he mea la ua i lo loa kona noonoo i na kii e kau ana ma na paia a hoopoinaia iho na mea i ala mai i na hora mamua iho. O kana mau kamailio apau ia laua e noho ana malaila ua pili wale no ia i na kii e kau ana, a ia laua i haalele iho ai i ua wahi la e mau ana no keia ano ona a hiki i ko laua hiki ana ma Nokekamalena Hotele i ka manawa a lakou i aelike ai.
“Aia no o Sir Hanale Basekavila iluna ma kona lumi a ke kali mai la ia oe,” wahi a ke kupakako o ka hotele i pane aku ai ia Kaloke ia laua i hoea aku ai. “Ua i mai oia ia’u e lawe loa aku ia oe no kona lumi.”
“E ku-e ana anei oe ia’u ke nana aku i ka papainoa o ka poe e noho nei ianei i keia manawa?” wahi a Kaloke.
“Aole loa,” i panaiia mai ai.
Maloko o ka buke he elua inoa hou e hui pu ana me ko Sir Hanale Basekavila. O Kiofilo Keonitona ame ka ohana, no Nu Kakela, oia ka inoa mua; o Mrs. Olomoa ame kona wahine laweiawe o Hai Loka Aletona, oia ka inoa elua.
“Me he mea la o keia no ke Keonitona a’u i ike ai mamua,” wahi a Kaloke i pane aku ai. “He loio kana hana, aole anei pela, ua hina ke poo, a he hapaku’e kana hele ana?”
“Ua hewa oe, e Kaloke, O keia Keonitona, he lua lanahu kona. he kanaka eleu, aole no hoi i nui loa aku kona mau makahiki mamua o kou.”
“Ke sua la oe no kana hana?”
“Ke sua loa nei wau no ka mea maanei oia e hele mai ai i na wa apau ana e makemake mai ai e hele mai ianei.
“Ina pela ua pau ae la keia. O Mrs. Olomoa kekahi; ke hoomano ae la wau nona. E kala mai oe i keia mau manao o’u, aka i kekahi manawa ke hele aku e ike i kekahi hoaloha e halawai ana me kekahi poe i kamaaina mua me ka maopopo ole.”
“He wahine-kane-make keia. O kana kane oia ka Meia o Koloseta. He hoi mau mai oia ianei ke hiki mai oia.”
“Kinikiu: ke manao nei wau aole io no wau i ike mua iaia. Ma keia, e Wakekona, ua loaa ia kaua he mau mea nui no keia hana a kaua e hana nei.” wahi a Kaloke i hawanawana aku ai ia Wakekona ia laua e hele ana. “Ke ike nei kaua o ka mea e uhai nei mahope o ko kaua hoaloha aole ia i noho iho iloko nei o ka hotele. He hoike ana hoi oiai ke makemake loa nei e makai aku i ko kaua hoaloha aia pu no ka makemake e ike ole ia aku, O keia kekahi maopopo loa.”
“Heaha iho ke alakai ana oia manao au?”
“Eia ka manao—halo, heaha hoi keia?”
Ia laua nei i hiki aku ai i ke anuu oluna o ke alapii, ua halawai aku la laua nei me Sir Hanale Basekavila. Ua hele kona mau maka a piha inaina, a e paa ana hoi oia ma kekahi lima i kekahi kamaa puti kahiko. Ua piha inaina maoli no oia, no ka mea aole ona hoomaopopo i kana mea e hana ana, a iaia i kamailio mai ai ua huli aku la kana mau olelo ma ke ano o ka hoopuka ana o na kanaka i noho ma Amerika.
“Me he mea la ke hoolilo nei lakou nei ia’u i kamipulu,” wahi ana i hoopuka aku ai. “E ike ana keia poe aole owau ke kanaka a lakou e hana mai ai i keia ano hana. Ina aole e loaa ana i keia kanaka kuu kamaa i nalowale ai e ike ana lakou nei i ke ala mai o kekahi hana nui maanei. He hiki no ia’u ke lawe ae i ke koikoi o na hana hoopaani, e Mr. Home, aka o keia hana i hanaia mai maluna o’u ua oi aku ia mamua o ka hiki ia’u.”
“Auwe! ke noonoo nei no ka oe i ko kamaa i nalowale ai.”
“Ae, a ke ake nei wau e loaa mai ia ia’u.”
Ua i mai hoi oe he kamaa hou ua kamaa la ou, ke sua io nei no oe he kamaa hou ia?”
“He oiaio he kamaa hou loa. O keia hoi i hoihoiia ae nei he kamaa eleele kahiko.”
“Ea, aole paha oe e i-----?”
“Oia iho la ka’u i manao ai. He ekolu wale no o’u paa kamaa, o kela i lilo mua ai, he hookahi paa eleele a o keia no hoi a’u e komo nei. I ka po nei i laweia ai kekahi o ko’u mau kamaa hou. a i keia la iho nei ua laweia aku la kekahi o ko’u mau kamaa eleele. Peha ke maopopo mai la ia oe. E ha’i koke mai oe ia’u, e keia wahi kanaka, a mai ku mai la ia oe. E ha’i koke mai oe ia’u, e keia wahi kanaka, a mai ku mai oe pela!”
I ka wa a Sir Hanale e hoopuka ana i keia mau olelo hope oia no ka wa i hoea mai ai kekahi kuene o ka hotele, he kanaka Gere mania.
“Aole i loaa aku nei ua mau kamaa nei ou. Ua ninaninau ae nei wau a aole he mea i ike.”
“Well, ina aole e loaa mai ana keia mau kamaa o’u a hiki i ka po ana, e hele aku ana wau e ike i ka lunanui a ha’i aku iaia e haalele ana wau i keia hotele.”
“E huliia ana no a hiki i ka loaa ana aku. Ke hoopaa nei wau pela ana no hoi oe e hoomanawanui mai ana,” wahi a ke kuene i pane aku ai.
“E hoomanao oe aole keia he mau olelo hoomeamea wale no. Ua paa ko’u manao o keia ka mea hope loa e lilo ma keia heana o na poe aihue. Well, well, e Mr. Kaloke Home, e kala mai oe ia’u no ko’u hoopilikia aku ia oe a lawe nui ae i ka manawa nou e kali mai ai no keia mau hana pauaka i hanaia iho nei maluna o’u.”
“Ke manao nei wau ua pono no,” wahi a Kaloke i pane al@u ai.
“Eia nae hoi he oi aku kou nana mai me ke pahaohao.”
“Ka, e hoike mai paha oe i keia mau hana au i hana iho nei.”
“E hoomaka aku ana hoi keia e hahai aku. Me he mea la o keia kekahi hana hoopii inaina loa i loaa mai ia’u.”
“E i iho oe o keia kekahi mea kupaianaha i loaa mai ia oe,” wahi a Kaloke i pane aku ai me ka noonoo ana iho.
“Heaha kou manao no keia mea?” i ninau ko@e aku ai o Sir Hanale.
“Well, aole wau e i aku ana ai oe ua maopopo loa ia’u keia mea. O keia hana au. e Sir Hanele, oia kekahi hana pohihihi. I ka wa e noonoo ae ai i ka make ana o keia makuakane ou, me he mea la oia ke koikoi iwaena o na hihia elima haneri a’u e lawelawe nei. Eia nae hoi ke paa nei kakou i kekahi mau maawe lopi, a o ka mea e puka mai ana mai keia mau maawe mai oia na alakai nana e kuhikuhi mai ia kakou i keia mea pohihihi. Malia o lalau kakou malalo o ke alakai ana o kekahi o keia mau maawe, eia nae hoi ua hiki no ke hoihoiia ae a ke alanui pololei.”
O ko lakou nei paina awakea oia kekahi o na paina maikai i loaa aku ia lakou. Aole he hookahi huaolelo i hoopukaia e pili ana no keia hana e huliia nei, ia lakou ma ka papaaina. Mahope o ka pau ana o ka lakou paina ana na hoi aku la lakou no kekahi lumi ma-lu a malaila i ha’i aku ai o Sir Hanale Basekavila i kana hana e hana aku ai.
“E hoi aku ana wau no Basekavila Hale,” wahi ana i ha’i aku ai i kona mau hoa.
“I ka wa hea oe i manao ai e hoi aku?”
“He hookahi paha pule i koe.”
(Aole i pau.)
HAWAII ame KONA LAHUI.
MOKUNA III
Eia no hoi kekahi mahele ana i ka mokupuni, o kahi e ku kiekie ana iluna ma kela wahi keia wahi o ka mokupuni, ua ka@a ia he puu ia, ina i ku lalani, he lalani puu ia, a he pae puu kahi inoa, a ina i ku kinikini ma kahi hookahi, he kinikini puu kahi inoa, he olowalu puu kahi inoa, ina i haahaa iki iho kau wahi, he ahua ia, he ohuku kahi inoa, he kahua kahi inoa.
A o na wahi kiekie o ka honua e moe ololi ana, he lapa ia, a he kualapa kahi inoa, a ina ku kinikini ka lapa, he olapalapa no ia, a o na wahi poopoo o ka honua e moe loihi ana, he kahawai ia, he awawa a he oawa kekahi mau inoa. A o na wahi o ka honua e kiekie kala hale ana ma kahi aoao, he pali ia, a ina haahaa iho @e opalipali no ia. A o kahi e neoneo ololi a loihi he alanui ia, he kuamoo kahi inoa, ina i moe loihi ma ke anapuni o ka mokupuni, he ala loa ia, ma kahi i kiekie ai ke ala, he piina ia, he hoopiina kahi inoa, he kooku kekahi inoa, a he auku kahi inoa, ma kahi e haahaa ai ke aia, he ihona ia, he alu, a he kaolo, a he kalua a hooihona kahi mau inoa, a ma kahi a na kanaka e hoomaha’i he oioina ia, o kahi o ka wai e holo mai ai, he kahawai ia, o kahi mauka he kumuwai ia, o kahi makai, he nuku wai ia, o kahi e holo ana ka wai ma kahi mahiai he auwai ia; o huipu ai ka wai me ke kai, he muliwai ia, a o na wai e lana poepoe ana maloko o ka mokupuni, he loko no ia.
MOKUNA IV.
NO NA KAI.
Ua kapa aku ka poe kahiko i kahi makai, he kai, a o kahi i po’i iho ai ke kai, he aekai kona inoa, a o kahi o ka nalu i po’i iho ai makai aku o ka aekai, he po ana kai ia, a he pueone kahi inoa, o ia wahi, makai aku o ka po’i ana kai, he kai hele ku, he kai papa’u, a he kai ohua, ekolu inoa no ia wahi hookahi, a ma kai aku olaila, he kuaau, oia kahi e pau ai ke kai papa’u, a he kai au ka inoa o kahi makai aku o ke kuaau, a he hohonu, he kai o kilo hee, a he kai heenalu a kohola kekahi mau inoa o ia wahi, a makai aku olaila, he kai malolo, he kai opelu, a ma kai aku o ke kai uli, ua ike ia he kai hiaku a makai aku olaila, he kai kahala, a makai aku he noana, he wahi lilo he lepo, he lewa, he lipo, oia mau wahi kai pili aku i Kahikimoe.
Eia kekahi, o kahi o ke kai e hooluli ia e ka makani, he ale ia, a o kahi e aui ana, he nalu no ia; aka, o kahi e wili ana, he au ia a he wiliau kahi ino, a o na kai e komo ana ma na wahi kuono o ka mokupuni, he puao, a he koaka no ia, o kahi o na kai e lele ai iluna, mai ka puka pohaku mai, he puhi ia, a o kahi e hoi ikaika ai ilalo ma ka lua pohaku, he mimilo ia, he mimiki hoi, a he aaka kahi inoa.
I ka pii ana mai o ke kai, he kai pii ia, a i ole ia he kai nui he kai piha, a he kai apo, a ina i ku malie ke kai aole i pii mai aole i emi aku, he kai ku ai, a i ka hoi ana aku o ke kai, he kai moku ia, h@ kai emi he kai hoi, a he kai make paha. Ina i po’ipo’i pinepine mai ka nalu, he kai koo ia, o ke kai e po’i ana ma kahi oioi o ka mokupuni, he lae, he kai ma ka lae, a o kahi o ke kai e moe ana me he alanui la he kanai ia, a o ke kai e lana malie lana, he ai ia, he malino, he kai paeaea, a he pohu.
NO KA LAWAI’A ANA.
Ua akamai kekahi poe kanaka Hawaii i ka lawai’a, no ia mea, ua kapaia lakou he poe lawai’a. O ka makau kekahi mea e lawa’ia ai. O ka upena kekahi, a o ka hinai kekahi. Penei ka lawai’a ana me ka makau. E hilo mua ke kanaka lawai’a ana me ka makau. E hilo mua ke kanaka lawai’a i ke aho, ke ano o ke aho e hilo ai, he aho kaa ekolu, ekolu maawe oia aho, he aho olona, ekolu kaau anana o kekahi aho, eha kaau anana ka loa o kekahi aho, a nui aku no hoi, aia i ka manao o ke kanaka lawai’a, a loaa ke aho, alaila, hana i ka makau, a lako ke kanaka i keia mau mea, alaila, kaena iho la ua kanaka lawai’a nei me ka olelo ana, “i kahi e ka ua hana e ka hale, pela hoi keia, i kahi e ka malie hana e ka inakau me ke aho.” Pela ke kaena ana o’ ua kanaka nei, a hiki ma ka malie, alaila, hele ua kanaka nei e luu hee, a loaa ka hee, alaila hoi oia a hiki i ka hale, ai a maona, alaila, papa aku i kana wahine mai lilo oe i ka lealea, mai paani oe ma ko kaua hale nei, no’u hoi keia la hookahi, e kapu oe i ka lealea.” Ae mai kana wahine, alaila, hopu ua kanaka lawai’a nei i ka hokeo aho me ka hoe, o ka hele aku la no ia a hiki i ke awa, hoa ka waa a paa, alaila, hapai a lana ka waa i ke kai, ee ae la ua kanaka nei, hoe aku la no hoi a hiki i ke ko’a ana i lawai’a ai, alaila, nana ka maka iuka, a ike i ka hoainoa ana i ike ai mamua, alaila, hana ka makau a paa i ka maunu, mama hoi ka palu a loko o ka aaniu, alaila, hauhili i ka aaniu me ka pohaku a paa, hookuu aku i ke aho iloko o ke kai me ka makau pu no hoi ke kuu ana ilalo, a ku ka pohaku ilalo, alaila, puehu aku la ka palu ana i wa-hi ai iloko o ka aaniu, alaila, honi mai ka i’a i ka hauna o ka palu muimui mai la lakou ma kahi e lewalewa ana o ka makau me ka maunu, ma ia haule ana o ke aho me ka makau ilalo, pule aku la ua kanaka nei i ka pule i’a. Penei ka pule ana i ka pule i’a: “E ala e ka ulua, e ala e ke kahala, e ala e ka ulaula, e ala e ka hananui, e ala, eia mai ka Hee, he maunu palupalu, he ono, a i ai oe, e ke Kahala, ai no a moni no a ka opu, e Ku, e kuu akua i ka hoau ke aho a kaua, ea, e Ku, kuu akua i ka moana nei la e, amama oe, e Ku, aka haliua ko nuku i ka i’a halapa i ka ikuwai la.”
Pau ka pule ana, kakali ua lawai’a nei, ai mai la ka i’a i kana makau, kahea ae la ua kanaka nei, “E Ku e, paa ia i paa ka i’a a kaua, kona huki mai la no ia ma ke aho, a hoouka i ka i’a i ka waa, ina he Kahala, he i’a maikai loa no ke aho hou, ke hoi a puku. Ina he nui na waa lawai’a e lana ana, alaila, kuu aku la ua kanaka lawai’a nei ewalu makau ma ke aho hookahi, maunu ia keia mau makau, a paa i ka maunu, kuu hou ilalo, a ai mai la na i’a apau loa na makau, alaila, kaena iho la ua kanaka nei me ka olelo ana ka, hanau aku nei paha kuu mau wahi kumulau puaa. Ke aha la? Ke ekueku nei hoi i kuu lima,” pau kona kaena ana, huki mai la ia i kana aho, e like me na makau i kuu ia, pela no ka nui o na i’a i loaa mai, pela mau no keia kanaka e hana ai, a nui na i’a i loaa iaia, hoi mai a pae iuka, auau i ka wai, hoi a ka hale aahu kahi kapa maloo, ho a ka imu o ka i’a, o ka i’a mua i ai i ka makau, kalua ia ia, apau loa i ka imu a mo’a, alaila kahukahu ke kanaka lawai’a, he pule okoa no hoi ia.
Penei ke kahea ana, “E ka hikina, e ke komohana, e ka akau, e ka hema, e luna, e lalo, e ka la, e ike ia’u i ka lawai’a, e nana i ka ohumu, i ka huahua, he mua kaua, he hope ka kaua, e ike oe ia’u e ka la ua, e ka la makani, e ka la malie, o ko’u la hoi ia, ko ke kanaka lawai’a i lako i ke aho me ka makau hoi, e ka la e, e ola ia’u, i ka’u wahine, i kuu keiki, i ko’u mau makua, amama, ua noa, aka haliua ko nuku i ka i’a halepa i ka ikuai la auai ia, alaila, ai ka poe apau o ka hale, a maona, haawi ka i’a okioki ka i’a, kopi i ka paakai, waiho iloko o na ipukai pau ke kapu, ua noa wale no.
Eia hoi kekahi, i ka wa i holo ai ua kanaka lawai’a nei a hiki i ke ko’a lawai’a, alaila, kuu ke aho ilalo, me ka makau pu no hoi, a i ole ia mai ka makau e ka i’a, alaila, kuhikuhi ka nele a ka lawai’a iuka, alaila, olelo ae la penei, “he kuko paha, makalahia paha, he lia paha no ka poe o kou hale, he hele paha no kuu wahine i ke kolohe, ka no nae i ko oukou waha e ai ole i ka i’a, ua ola au ka lawai’a i kahi poo maunu,” Pela oia e hana mau ai, huki mai oia i ke aho, kaumaha ka lima no ka nele i ka i’a, o ka pau ia o ka lawai’a ana ma ke aho ame ka makau. O ka lawai’a ana me ka upena ame ka hinai i koe.
NO KA LAWAI’A UPENA.
Aole hookahi ano upena wale no i ike ia ma Hawaii n@ i ka wa kahiko, nui wale lakou, upena nui kekahi, a upena liilii kekahi, ma ke ano o ka i’a i manao ai e lawai’a, pela no ke ano o ka upena. Eia kekahi mau upena, upena Akule, upena Opelu, upena Weke, upena Malolo, upena Uhu, upena Kala, upena Amaama, upena Koki, a Papa kekahi upena a pela aku no.
Ina paha he Papa ka upena, he nui no ke ano o ka lawai’a ana ma ia upena, he lau, akahi mea pono ma ia upena, he l@@ alaa mea pono malaila, a ma na lawai’a e aku i kupono i keia upena.
Ina he upena luu, alaila, hana mua ke kanaka lawai’a i ke kahua maikai e kuu ai ka upena, alaila, kuu ka laau ona ia i ka i’a ke ano o ia laau, ua kau ia i ka uwahi, a eleele, o kona inoa o Malale@@ kuu ia ua laau nei, alaila, paapu mai la na i’a he nui loa, no ka ike ana i ka iaau i makemake ai, alaila, kena ae la ka lawai’a i ke kanaka e noho ana maluna o ka waa upena, e kuu ka upena alaila, kuu ka upena, nakii ia ka upena i ka pohaku nui ma ka mol@ o na upena nei, a moe ka upena, alaila, huki mai no ke kauka lawai’a i ua laau nei, a kokoke i ka waha o ka upena, alaila, kena ae ia ka lawai’a i ka poe luu penei nae ka lawai’a e olelo ai i na l@@ @a i luu oukou, mai luu ino, e luu like, i like hoi ka umauma.” Pela oia i olelo mua ai a lohe kona poe luu, alaila, kena aku la oia me ka leo nui, e luu hoi, alaila, luu mai la ka poe luu, mama iho la na kanaka lawai’a nei i ka hua kukui, a pupulii iho ia i ke kukui i ka ili kai, a ike iho la oia i na i’a he nui loa e komo ana iloko o ka upena, huki mai la i kekahi aoao o ka upena, a huli pono ka waha o ka upena iluna, nui ka leo o na kanaka no ka piha @loko i ka hoihoi no ka nui loa o na i’a maloko o ka upena. Ina elua paali o ka upena, alaila, elua waa e komo i ka i’a, a ekolu paha, ke nui na puali, hoi a pae i ke awa, haawi ka i’a apau ka hoi no ia a i ka hale, okioki a piha ke pa, ka hoonuunuu iho la no ia, o ke @@@ @ @@ wahine, o na keiki.
NO KA LAWAI’A HINAI ANA.
He mau la okoa, na la e pii ai i ke le, a loaa ke le, alaila, hele a i ka hale o ka Aumakua lawai’a, ilaila ke kahua e nala ai ka hinai, he hinai nunui no hoi.
He kapu loa ke nala ana. Ina he kupapau make, aole hiki ke hele aku ka poe nala hinai e uwe, ua haumia i ke kanaka make, noho oia a haia na @ebedoma ekolu, alaila, pau ka haumia o ke kanaka. I ka hili ana o ke kaula o ka hinai, kapu no aohe e a’e kekahi maluna o ke kaula o hookae ke akua i’a.
A paa ka hinai, alaila, lele ke Api i kai, ua like kona ano me ka hinai, he hamama no nae o luna o ke Api. Ua uhao ia oloko a piha i ka Limukala, oia hoi ka mea hanai mua i ka i’a, a nanea ka i’a i ka ai i ka Limukala, alaila, lawe ka hinai a kahi i kukulu ai ke Api, a kukulu ka hinai, hoihoi ke Api iuka. Ua uhao ia ka hinai a piha i ka Lumikala, kukulu no hoi i kai me ka mono e laua an@@ maluna o ke kai, i hoailona e nalowale ole ai.
A awakea, kii a e huki ina he nui ka i’o maloko, huki ae a ka ili o ke kai, e haluku ana lakou maloko o ka hinai, e like me ka haluku ana o na kao maloko o ka pa, pela na i’a e kupaka ai, ohi mai a pau. K@ ke ahua mamua o ka ihu o ka waa, ka hoi mai la no ia a pae iuka.
Hopu iho la i mau Kala eha paha, a elima paha, puholo ua mau Kala nei a mo’a, alaila, kii aku i ka Aumakua lawai’a, hele mai, hana oia a pau kana hana, alaila, ai a pau ka i’a ina koe, haawi na ka ilio, ame ka puaa paha a pau iho la no ia.
MOKUNA V.
NO KA MAHIAI ANA.
He poe mahiai ko Hawaii nei poe mai ka wa kahiko mai, no ka mea, malaila no e loaa ai ia lakou na mea e ola ai a e pono ai ko lakou noho ana, ame ko lakou mau ohua. Aole nae makaukau loa na kanaka kahiko ma kiea hana, no ka mea, ua @ele lakou i na mea paahana ole, aole a lakou oohao, aole hoi na mea paahana e ae. O ko lakou mau lima, oia ka oo kope, ka oo palahalaha, oo palau, halo, a me ia mea paahana aku ia mea paahana aku. Ina he oo ka lakou he oo laau wale no ia, no ia mea, hemahema maoli lakou, a hakalia wale iho no kamahiai ana.
Aole like loa ka mahiai ana ma na wahi apau, okoa kekahi, a okoa kekahi. Penei ke ano o ka mahiai ana i ka wa kahiko, Kalai mau ke kanaka mahiai i ka oo. Eia na laau e kalai ai i oo, ka Mamane, ka Oiha, Ke Aa’lii, ame na laau paa e ae. Kua iho la, a moku kahea aku la i na akua o ka mauna. Penei ke kahea ana, “Kumokuhalii, Kupulupulu, Kualanawao, Kupaaikee, kua i ke kumu, kua i kaelau, kua i ka lala, e ike, e nana i ke kalai ana o ka oo, he lapa ka oo mahi au i ka aina kula, he uwala ka ai, he uhi ka ai, he kalomaloo ka ai, me na ai kupono i ka aina maloo ke kanu,” Penei ka hoomaka ana i ka mahiai, ua puhi moa ke kanaka i ke ahi, waiho aku a haule ke kuaua mua, helu mua ka mahiai, akahi kuana, hookahi kuaua i koe ma-u kuu wahi wela, a haule hou ke kuaua, ahiahi oia la, hele i ka ako lau, a loaa ka apana lau, ka inoa o na lau e ako ai he Hualani, he Hokeo, he Kawelo, he Lapa, he Likolehua, a nui aku no, a ope a paa waiho a kakahiaka o kekahi la, pii aku a hiki i ka wela ana a kanu, a pahu mua i ka makalua, a nui no hoi ka makalua, alaila, kanu ka lau, a paa ka wela pau ke kanu ana. Noho ua kanaka nei a loihi iki, alaila, alaa i ka mauu, a pau ia, alaila, pue ka uwala, pau ia, kuehu hou i ka manu, a pau ia, o ke oo no @a o ka ai, alaila, waiho aku a loihi na la, alaila, kii aku ke pau ka uha’i ana i ka ai, alaila, kahea aku ia i ke Akua. Eia ke kahea ana, “kela ao nui eleele i ka maka o ka opua la olalo iho, e malu, malu kiai, kiai oe i ko kaua waena nei, la e Keaonui, malu oe i ko kaua waena nei la, e Keaonui, e malu oe mai kela kihi a keia kihi, e malu oe mai kela iwi a keia iwi, mai malu oe i ko ha’i waena o huhu ia oe i ke pani i ka La, koekoe ka mea nona ia waena nei, e Keaonui e! e malu no oe i ko kaua waena nei, malu oe i ka pue malu oe i ka lau o ka kaua ai, i ulu, i piha ka pue i ka uwala, E Keanonui e! i ka lau o ka kaua, ai, i ulu, i piha ka uwala, E Keanouni e! malu i ko kaua waena mai uka a kai, mai nae a lalo, pau kou, e Keaonui, a Kanepuaa i koe.
Kahea hou aku ua kanaka mahiai ne ia Kanepuaa. @@@ e kahea ai, “e Kanepuaa, ekua i uka, ekua i kai, ekua i nae ekua, ekua ilalo, ekuia iwaena o ka kaua mala @wala nei la, e Kanepuaa, ekuia, eku oe mai kela kihi a i keia kihi, mai kela kaika, a keia kaika ekuia, eku oe mai kela iwi a keia iwi, i hua i ka mole, i hua i ke kano, i hua i ka lala i hua i ke aakolo i ka wa, mai eku oe i ko ha’i waena, o nou ia oe i ka pohaku, a pa, eha oe, o hou ia oe i ka oo a ku, puka, eha oe, e Kanepuaa e , hoi mai no a ko kaua waena nei la eku ana malama i ko kaua waena, i ulu, i hua, i ola na ohua o ko kaua hale me ka malihini kipa mai i ko kaua hale nei, pau ke kapakapa ana, he hoouluai, he hoohua ai na Kanepuaa.”
Hoi ke kanaka me ka ai a hiki i ka hale, kaka ka wahie, kalua ka puaa me kekahi mau uwala, a mo’a alaila, kaumaha hou he wahi pule @uku, penei ka hana ana, “E Kukulia, Ua mo a ka ai, ka uwala hou, ua mo’a ka puaa, Eia ka ai, eia ka i’a, e hoi e ai i ka ai a’@, a-a mea, ka mahiai nui, e ola ia’u a me ko’u mau ohua amama.” Ua noa holo wale hoi. E ai O ka pau keia o na mea pili i ka mahiai ana ma ka aina kula.
Eia hoi ke ano o ka mahiai ana ma ka aina wai i ka wa kahiko. Hele ke kanaka mahiai, a kona loi, kulap;a mua oia i ka nahelehele a pau, waiho aku a pulu ka ma@u ana i hana’i mamua, alaila, kupele hou ka loi,k a ike oia i ke ano kupono ke kanu, alaila, kii ka puahuli, lawe a hiki i ka loi, puepue mua oia a pau ka loi, alaila, kanu ka huli kalo a paa ka loi, alaila, noho aku a liuliu. Ulu ae la ka nahelehele, hele ke kanaka e mahiai, o ka inoa o ia mahiaai ana, heau loi, a ekolu lau o ka ai i mohola ae, alaila, laupai ka ai, alaila, kii ke kanaka, ako i ka lau o ka ai a nui, alaila, ope a paa, ho-a ke ahi, pulehu i ua ope luau nei, a mo’a wehe oia i ka mea ino a pau, alaila, wehe ka poi o ka umeke, pule aku i ke Akua.
(Aole i pau.)