Ka Nupepa Kuokoa, Volume XLII, Number 2, 8 Ianuali 1904 — Page 2
| This text was transcribed by: | Francene H Aarona |
| This work is dedicated to: | To those members who shared more history, with us, during services with them. |
Ka Nupepa Kuokoa
KE KILOHANA POOKELA NO KA LAHUI HAWAII.
2 NUPEPA KUOKOA, IANUARI 8, 1904
KA
Nupepa Kuokoa
---
No ka Makahiki - - - - - $ 2.00
No Eono Mahina - - - - - 1.00
---
SUBSCRIPTION RATES.
One Year - - - - - - - - $2.00
Six months - - - - - - - - 1.00
O NA OLELO HOOLAHA APAU E
HOOUNAIA MAI ANA NO KA HOO-
LAHA MALOKO O KEIA NUPEPA, E
MOOUNA PU MAI ME KA AUHAU,
A INA AOLE, AOHE NO E HOOKO-
MOIA. E HOIKEIA AKU NO KA A-
UHAU OLELO HOOLAHA KE UI
MAI I KE KEENA NEI.
O na Dala apau o ka Pepa nei e hoouna pololei mai i ka HAWAIIAN GAZETTE COMPANY.
---
HOOPUKAIA E KA
HAWAIIAN GAZETTE CO
Hookomoia ma ka Hale Leka o Honolulu Pa
nalaau o Hawaii, ma ke ano mea o ka
Papa Elua.
DAVID L. A-I Lunahooponopono
A. W. PEARSON, LUNA NUI Honolulu, Oahu
POALIMA, IANUARI 8, 1904.
KA BONA O KA LUNA AUHAU O OAHU.
---
O kekahi keia o na ninau ano nui iloko o ke aupuni kalana o Oahu mawaho ae o na kumuhana ano nui i ulu mai iwaena o ka hapanui, oia hoi, o ka bona o ka Luna Auhau ame Ohi o ke Kalana o Oahu.
I ka wa i hoomakiliia ae ai ka huina kupono ua like ole no ka manao pililaula maluna o ka huina i hoike mua ia he $ 300,000. A i ka lua mai o ka manawa ua oili mai he mau manao ulu no ka huina o $ 30,000 kahi a Mr. C. P. Iaukea i pili ai ana i manaoio ai oia ka huina kupono no kona bona, ana hoi i waiho io aku ai imua o ka Papa Lunakiai i ka la i kukuluia ai ke kalana.
Alaila, ma na kukai manao ana o na Lunakiai a kakou i ike ai ka lehulehu o ke Kalana o Oahu ua hiki aku ka Papa Lunakiai i ka panina o ka lakou noonoo maluna o ia kumuhana i ka huina o $ 150,000 bona.
E like me ka makou i hoike mua ae nei ua nui na manao like ole i kukuluia maluna o ka bona o keia luna kalana---he mau hoohalahala kekahi no ka pii ino loa o ka heluna e like me ka huina o $300,000 a i ka manawa i pu-a ae ai ka huina o $30,000 a ka Luna Auhau ame Ohi i koho pono ia ma na pahu balota i kakoo ai imua o ka Papa Lunakiai ua hoohalahala loa ae kekahi poe i ka haahaa loa a i ka hooholo ana hoi a ka Papa Lunakiai ua puka aku la ka io i ka $ 150,000 bona.
O ko makou manao maluna o keia kumuhana, oia no ke kukulu huina ana maluna o ke kahua o ka huli pono ana a loaa ma ke ano nui i ka huina nui o na loaa o ia keena ame ka huina nui loa e komo aku ana iloko o ia keena i ka la hookahi a e uhai no hoi e like me ka ke kanawai kalana i kauoha ai.
He hana naauauwa wale no ia i ko makou manao o ka hoopii ana i ka heluna bona a kaa nui hewahewa loa maluna o ka makou loina i noike ae nei e like me ka heluna $300,000 bona a o ka heluna $ 30,000 hoi ua hiki no i ke kanaka noonoo kupono ke ike iho i ka uuku loa io no o ia huina aka e kau aku i ka bona e like me ke kulana maopopo maoli o ia keena oihana. O ka ka Papa Lunakiai i hooholo ai oia akula no ka bona, a o ka ninau no ke kupono kaulike o ia huina i ko ke keena auhau he ninau maikai ia e huli a loaa, oia o na lunakiai no kekahi i ano kaa iki mawaho o ka ike ana i ke kahua loaa maopopo o ia keena hana. Eia nae mamuli aku e maopopo ai i ka manawa e kuonoono loa aku ai iloko o ka hana.
---
KA HOEMI LILO O KE AUPUNI.
---
O ke kumuhana hoohikilele i na luna aupuni o kakou nei oia ka hoohana ana iho nei o kekahi mau keena aupuni i ka pokepoke ana i na ukuhana o na paahana no ka manao e hooemi i na lilo o ke Aupuni.
O kekahi keena i maopopo loa ma keia, oia no ke keena o ka Papa Ola ame na keena oihana e ae, a i ka nana aku ua ano ikiiki maoli no ka manao o kekahi mau paahana a aole no ia he haawina ha ʻ o mai ka loaa ole ana ia lakou aka o ka hana pokepoke ukuhana ua nee aku imua.
E like me ia e ku nei ke Aupuni, i ka manao ana o ke Kuokoa ua maikai maoli keia hoolala a ke poo o na keena hana o ke Aupuni he papahana a hoolala ana hoi na ke Kiaaina.
Ua maikai ae ke kukulu manao aha e ola na hana o ke Aupuni maluna a maloko o kona mau loaa ponoi, mamua o ke ola uhaai wale ana oia hoi, oi aku na hoolilo maluna o na loaa loaa mai---ma kekahi olelo ana he alanui e komo ai iloko o ka aie.
---
KU KE AUMOKU MANUWA PAKIPIKA I MIDWAY.
---
Ma ka manawa i haalele iho ai na mokukaua Amerika i ku iho nei a holo ai mamua o ka Hape-nuia ua ku aku la ke aumokumanuwa i ka mokupuni o Midway i ka hora elima o ka auwina la o ka Lapule nei.
Ma ka hookokoke ana aku o na mokumanuwa i ke awa, o ka mokumanuwa New Orleans ko lakou alakai, oia ka mea i hookomo loa aku, oiai na mokumanuwa Raleigh, Albany ame Cincinnati i ku mamao aku ai iwaho.
O New Orleans no ka mea i hookokoke loa aku i ka aina, ka mea nana i hoolele aku i na ekeleta a hookauia mai hoi na ekeleta e laweia ai no Guama a mailaila aku i Manila ke ole e loaa kekahi moku e holo ana no Honolulu mai Guama mai.
Aole o na ekeleta wale no ka i hooleleia aku iuka o ka aina o ka uwea moe moana mai ka moku mai aka o na lako pono kino kekahi no ka hoolawa ana no ka poe oluna o ka aina.
E like me na lono i loaa mai aole he wahi hoololi no ke alahele aukai o ua mau moku nei mai kahi o lakou i hooholo mua ia ai e holo, oia hoi, o ka hiki aku i Cavite ka pahu hopu i makemakeia ai lakou e hiki, oiai ua manao wale ia e hoololiia ae paha mamuli o na unene kaua o Iapana ame Rusia.
O ke aumokumanuwa keia malalo o ka hoomalu ana a Akimarala Cooper aole hoi o ka Akimarala nui Evans oiai oia ka mana maluna o lakou apau mai na mokumanuwa ame na mokukaua maoli.
Ua hoike ae ke aliikoa he maikai ke ola ona koa apau oluna o na moku apau.
---
Ua Hauoli o Mr. Cunningham me Kakou.
---
" Ua pomaikai kuu huakai i ka luapele Kilauea, " wahi a Konela James A. Cunningham i ka Poaono iho nei. Ua hoi mai oia ame kana wahine mai ka laua huakai makaikai ma Hawaii maluna mai o ke Kinau, me ka hauoli nui no ke ko ana o ko laua manao e ike ia Kilauea i ka manawa e a ana o ke ahi.
Ua hoea mai o Mr. Cunningham me ka pu-lima i anuula ame ka puupuu wawae i okupeia, i mea nana e hoomanao ai i kana huakai i ka luapele. I kona manawa e iho ana iloko o ka luapele e ike aku i kahi o ke ahi, ua ku aku kona wawae i kekahi pohaku pele oioi, ua hina aku oia a ua anuu kona lima a ua moku pu kekahi o kona mau aa koko. Aka, ua mau aku no kona hele ana imua me kona eha no, a ua ukali aku no oia i ke alakai, a he manawa pokole mahope iho, ua hina hou aku la oia ilalo no ka lua o ka manawa a ua okupe ia kona puupuu wawae, aka ua hele aku no oia imua a hiki i kona ike maka ana i ke kapuahi wai wela e boila ana.
I kekahi la ae, he mea ole na eha, ua hele aku no oia ma kekahi huakai hele maluna o ka lio no kanakolu-ku-mamahiku mile. Ua hele aina ae o Mr. Cunningham mai Kawaihae mai, a he mau olelo hoohanohano wale no kana no ia mau apana aina ana i ike ai. Wahi ana, " He poe apana aina nani wale no keia a i kupono hoi no ka mahiai ana aku. He nui ka momona o ka lepo e ulu maikai ai no na mea kanu. Aohe i maikai pono na alanui, aka ua lohe mai au e hana ia aku ana keia mau alanui. Ma ka hele aina ana ua loaa ia ʻ u kekahi nanaina maikai loa o ka mokupuni nui, a ua nui ko ʻ u hauoli no keia mea a ʻ u hoi i ike ai."
Keia hoalauna he Peresidena oia no ka Banako Oihana Kalepa o Salt Lake, he Peresidena no ka Hui Eli Waiwai Mammoth ame kekahi mau oihana okoa, ae, a oia hoi kekahi o na kanaka waiwai o Uta, kahi o ka poe Mamona. E noho ana laua i Honolulu nei ma ka Hotele Young a hiki i ko laua manawa e hoi ai maluna o Korea ma ka la umi-kumamakolu o Ianuari no Kapalakiko.
---
E Noho Hana Ole ana na Paahao
no Kekahi Manawa.
---
E like me ka mea i ikeia ua loaa keia manao e noho hana ole ana na paahao o Kawa a hiki i ka manawa e pau pono ai ka hooponopono ana o ka Papa Lunakiai o ke Kalana o Oahu nei no na mea e pili ana i ka ukuhana o na lunanana o na paahao i ka manawa e hana ai.
I ka manawa i noho ai ka Ahaolelo o ke kau i hala ua nui ka lakou hana maluna o na bila haawina aka iloko o ia nui hana ame ka hoomaopopo ole ia, a i keia manawa ua ikeia aole i hanaia ka haawina uku o na makai hoohana i na paahao ma na wahi like ole o lakou e hoohanaia ai.
No kela kumu, aole e hiki ke loaa na lunakiai o na paahao i ko lakou manawa hana owaho mai ka halepaahao ae ; ke kumu hoi e hiki pono ole ai ke hoohana i na paahao me na kiai aole.
Aia a loaa ka haawina a na kiai o na paahao e hoolawalia ai e na kalana ma o na hooponopono ana o na Lunakiai o na kalana e hoohanaia ai na Paahao.
O ke kahua o ka Halepaahao o Oahu ua kukuluia aka o ka hoopau pono ana e pau ana ka hana iloko o ka manawa kupono, aka, ua ano ulolohi no ka hana mamuli o ke kali ana a hiki mai na o ʻ a hao mailoko mai.
---
Ka Mokuahi Likelike Hou.
Ua manao ka Hui Mokuahi o Waila ma, i ka la 1 paha o Maraki e hiki mai ai ka mokuahi hou o keia hui hooholo moku pili aina o Hawaii Paeaina i Honolulu nei mai Kapalakiko mai.
He mokuahi hou keia nona na tona o 400 a o ka inoa i kauia aku maluna ona oia no o Likelike ka lua o ke o hou ana o keia inoa o kekahi alii o ka aina i ha ʻ o hoi no kekahi mau manawa loihi i hala ae.
O Likelike alua keia, oiai o ka mokuahi mua i ha ʻ o hoi kona kino i keia manawa ua nahaha a no ke kahiko mai no hoi kekahi kumu. O ka Likelike mua i ha ʻ o hoi kona kino i keia manawa ua nahaha a no ke kahiko mai no hoi kekahi kumu. O ka Likelike mua oia kekahi o na mokuahi holo pili aina i kamaaina nui loa ia iwaena o na kai o Hawaii, a kaulana kona inoa i ka waha o na kanaka a i kona mau la oia kekahi o na moku ano nui iwaena o ka hapanui.
Ma kahi i maa iaia i ka holoholo ia oia no na kapakai o Maui a o Hawaii no hoi kekahi a kakaikahi hoi ma na wahi e ae a aole e nalowale loa kona inoa mamuli o ke ola hou ana ma o keia moku hou.
---
Ua Holo Aku o Iroquois no Lanai.
Ma ka hora umi ponoi o ke kakahiaka Poakolu nei, ua holo aku ka mokuahi Iroquois no kekahi huakai no Lanai. O Rodman no ke kapena o kahi moku i holo aku ai, a o Kiaaina Carter, R. W. Shingle, ka makai nui A. M. Balaunu, Kapena Clarke o ka hui moku o Waila ma, Mr. Judd ame Mr. Pratt o lakou ka poe i hookipaia mai e Mr. Rodman i mau hoaai nona ma kela huakai.
I holo pololei aku nei o Iroquois no Lanai, a e noho ana ilaila no elua la, a e hele ana kela poe i holo aku e Rodman i ka aina i ke ki kao ame ke kia, a ua manao lakou e nui ana na holoholona e loaa ana ia lakou.
Ua manao o iKaaina Carter e holo i Kahoolawe e nana i ka apana aina malaila i lilo iho nei ia Christian Conradt ma ka hoolimalima, a e hoolilo ia aku ana no hoi i wahi hanai hipa. Ka apana aina no keia a Dillingham i hoolimalima ai mai ke aupuni mai, a ke KUOKOA no i hoike mua aku ai, a i hoolimalimaia aku e Dillingham ia C. Conradt. Makemake ke Kiaaina e ike i kela aina i maopopo iaia ke ano o ka waihona o ka aina.
Ua haalele iho o C. Conradt i ke ahiahi Poalua nei maluna o Maui, no kona makemake e hiki mua kau oia i Kahoolawe mamua o ka manawa kupono.
---
Hoouluhua Nui !
---
AOLE PAHA PELA NA OLELO A KO
HONOLULU NEI POE.
---
O ka poe manao maikai he hoonaukiuki i kahi wa.
Ina e ike oe i ke kumu, aole no oe e puiwa ana.
Ua loaa anei oe i ka puupuu maneo ?
Aole hoi i ma ʻ i kupono no ka waiho ana i kahi moe ; aole hoi he oia maikai e oluolu ai.
O kela maneo e hoonioni mau ana.
Hiki ole ke hoomanawanui, hiki ole ke oluolu.
Hooluhua i kou noonoo, aneane hoopupule ia oe.
Aole anei o ke ola ame ka oluolu oia ka mea i ake nui ia ?
Ua hiki oe ke ola ina oe e hoolohe mai ana i ke a ʻ o a keia keonimana.
O Mr. Frank Leibly o alanui S. Main, Helu 326, o Wilkesbarre, Pa., U. S. A., eia kana olelo ; " Me ka manao hauoli wau e hoike aku nei i ka hana kamahao a ka Laau Doans ma ka ma ʻ i puupuu maneo. Ua loohiaia wau ia haawina i ka makahiki i hala. Ua hoao ae wau i na laau apau i ha ʻ iia mai ia ʻ u ame na laau i hoolahaia no hoi, eia nae aole he loaa mai o ka oluolu Mahope o kekahi mau hoao ana ua hoomaka mai ia wau e oluolu, a hoomau aku la i ka lawe ana i ka Doan laau a i keia wa a ʻ u e kakau nei. No ka olelo ae ua hauoli wau no keia ola ana, he hapa wale no ia o ka ʻ u hoomaikai. E hooia aku ana wau i keia laau ina e loaa mai ka manawa no ia mea. Ua hiki ia oukou ke hoolaha aku i ka ʻ u mau olelo i na wa apau a oukou e makemake ai a e loaa no hoi wau i na manawa apau ma S. Main alanui, helu 326, a e hooia no hoi wau no ia laau.
O ka Laau Huaale a Doan ke kuaiia nei e na halekuai laau apau ; he 50 keneta ke kumukuai. E hoounaia no e The Hollister Drug Co., na agena o ko Hawaii Paeaina, ma ke eke leta ke loaa mai ke kumukuai.
E hoomanao i ka inoa Doan ʻ s, a mai lawe i ka mea hoopilipili wale.
---
LILO KA EO IA CORBETT.
KAPALAKIKO, Kaleponi, Dec. 30.---Iloko o kekahi hakaka palelpale ana mawaena o Corbett opio ame " Eddy " Hanlon, ua eha o Hanlon ia Corbett opio, a ua lilo iaia ka eo iloko o ka umi-kumamaono ai puni ana.
HOOWELIWELI NA HOTTENTOT ( POE PAELE ) I NA KELEMANIA.
CAPETOWN, Afarika, Dec. 30.,---Ke maka ʻ u ia nei e hooulu hakaka ana na paele ( Hottentot ) maloko o ka Teritori o na Kelemania.
E MAKAIKAI ANA O LOUBET IA ITALIA.
ROMA, Dec. 30.---E hele ana o Peresidena Loubet o Palani ma ke kaahele makaikai ana ia Italia iloko ae nei paha o Aperila.
UA HAALELE MAI NA MOKUKAUA
PORT OF SPAIN, Dec. 30.---Ua haalele iho nei ka mokukaua Detroit, ma ke kauoha e holo aku i San Domingo no ka hoomama ana aku i ka moku Scorpion.
HOOLAHA HOOKO MORAKI.
HOOLAHA MANAO PANIKU A KU-
AI A KA MEA PAA MORAKI.
---
M. F. LUCAS.
---
Ma keia ke haawiia aku nei ka hoolaha i kulike ai me ke kanawai a ma ka pono o na manao o kekahi moraki i hanaia i ka la 20 o Mei, A. D. 1901, a i kakau kope ia iloko o ke Keena Kakau Kope o ke Aupuni, Oahu, iloko o ka Buke Helu 220, aoao 265 ame 266, he moraki i hanaia e M. F. Lucas, o Honolulu, Mokupuni o Oahu, ka Mea Moraki Mai ia C. Bolte, Kahu, ka Mea Paa Moraki, o C. Bolte i oleloia, Kahu, ke manao nei e paniku i ka moraki i oleloia no na kumu i uha ʻ iia e hoike ana, o ka uku ole ia i ka manawa e uku ai i ke kumupaa ame ka ukupanee o ka noka aie a ka Mea Moraki Mai i oleloia i hoopaaia e ka moraki i oleloia.
Ma keia ke haawi pu ia aku nei ka hoolaha mahope iho o ka pau ana o ekolu pule mai ka la aku o keia hoolaha e hoolahaia aku ai ka waiwai i hoopaaia maloko o ka moraki i oleloia no ke kuai ana a e kuaiia aku ai ma ke kudala akea, a o ia ano kuai e malamaia ana ma na keena kudala o James F. Morgan ma Alanui Kaahumanu, iloko o Honolulu, ma ka Poaono, ka la @ 0 o Ianuari, 1904, hora 12 awakea o ka la i oleloia.
O ka waiwai i hoopaaia maloko o ka moraki i oleloia a e manaoia nei e kuai e like me ia i olelo mua ia ae nei a e hoakakaia oia keia malalo iho :
O kela apana o ka aina e waiho la i Keauhou, Kalihi, Oahu, i hoakakaia iloko o ka R. P. ( Grant ) 709, i hoopukaia ia Kaaikanaka a i apoia e like me ia malalo iho :
E hoomaka ana ma ke kihi Hikina o keia a holo,
Hema 29 deg. Kom. 2.52 Kaulahao holo pololei ma ke ala, malaila aku ;
Akau 51 deg. Kom. 2.20 Kaulahao holo ma ko Kaukoa, malaila aku ;
Akau 39 deg. Kom. 5.50 Kaulahao, malaila aku
Hema 60 deg. Kom. 88 Pauku-kaula-hao, malaila aku
Akau 45 deg. Kom. 71 Pauku-kaula-hao, malaila aku
Hema 47 1-2 deg. Kom. 50 Paukukaulahao, malaila aku
Akau 32 deg Kom. 1.22 Kaulahao holo ma ko Kaukoa, malaila aku
Akau 56 deg. Hik. 3.70 Kaulahao holo ma ka pa aina, malaila aku
HOOLAHA HOOKO MORAKI.
Hema 40 deg. Hik. 5.70 Kaulahao, hele ma Kaluaopalena, malaila aku Hema 62 deg. Kom. 95 Pauku-kaula-hao
Hema 40 deg. Hik. 1 Kaulahao ame
Akau 62 deg. Kom. 63 Pauku-kaula-hao holo maka Lo ʻ i o Waianae, malaila aku
Hema 51 deg. Hik. 1.90 Kaulahao holo ma ko Naeka a hiki i kahi i hoomaka ai. Iliaina he 3 eka, oi iki a emi mai.
Hanaia ma Honolulu, Ianuari 7, 1904. C. BOLTE, Kahu. Mea Paa Moraki. 2997---Jan. 8, 15, 22, 29.
HOOLAHA MANAO PANIKU A KU-
AI A KA MEA MALAMA MORA-
KI O KA MEA PAA MORAKI.
---
EMMA AME HENRY DEFRIES.
I kulike ai me ka mana kuai i hanaia iloko o kekahi moraki i hanaia e Emma Defreis ame H. Defries kana kane mare, ia Fred Waldvogel, i hanaia i ka la 6 o Iune, A. D. 1898, a i kakau kope ia iloko o ke Keena Kakau Kope Aina o ke Aupuni, Oahu, iloko o ka Buke Helu 179, aoaoa 417 ame 472, a na Fred Waldvogel i oleloia i haawi aku ia Charles S. Martin ma kekahi palapala i hanaia i ka la 6 o Maraki, A. D. 1902, a i kakau kope ia iloko o ke Keena Kakau Kope Aina i oleloia, iloko o ka Buke Helu 179, aoao 471, ma keia ke haawiia aku nei ka hoolaha ke manao nei ka Mea Malama Moraki o ka Mea Paa Moraki i oleloia no na kumu i uha ʻ lia, e hoike ana, o ka uku ole ia o ke kumupaa ame ka ukupanee i ka manawa e uku ai, a maluna o keia paniku e uku ai, a maluna o keia paniku i oleloia e kuai ia aku ana ma ke kudala akea ma ke keena kudala o James F. Morgan, Alanui Kaahumanu ma ka Poaono, ka la 30 o Ianuari, A. D. 1904, hora 12 awakea o ka la i oleloia, ka aina ame na waiwai lewa i hoakakaia iloko o ka moraki i oleloia a i hoakakaia malalo iho nei :
NO na mea aku i koe e ike ae ia William Savidge, loio o ka Mea Malama Moraki o ka Mea Paa Moraki, Helu 79 Alanui Kalepa. CHARLES S. MARTIN, Mea Malama Moraki o ka Mea Paa Moraki.
---
1. O na ono apau loa, na kuleana ame na pomaikai o ka Mea Moraki mai i oleloia iloko a i pili i kela mau aina e waiho la i Kau, Hawaii, a i hoopaaia ma kekahi palapala kuai aina i hanaia a i kakau kope ia iloko o ka Buke helu 159, aoao 386, a oia no hoi ka hapa o ka R. R. ( Gr. ) 2760.
2. O na pono apau loa, na kuleana ame na pomaikai o na Mea Moraki Mai iloko a i pili i kela mau apana a mahele o ka aina e waiho la i Kau i olelo mua ia ae nei oia no hoi ka aina i hoopaaia maloko o ka palapala haawi malama moraki i hanaia a i kakau kope ia iloko o ka Buke helu 147, aoao 313.
3. O na pono apau loa, na kuleana ame na pomaikai o na Mea Moraki Mai, iloko a i pili ina Pono Halenoho aia iloko o elua lumi ( Lumihookipa ame Lumimoe ) o ka Halenoho e ku la ma Alanui Puowaina, Honolulu, e hoike ana, Hookahi Lumimoe he 5 mau ponohale like ole e like me ia malalo iho : Hookahi Moe Oka me ka pela uwea-holuholu, hookahi pahuume oka me ke aniani-nana ame ka papamabara no luna iho, hookahi pakaukau, pawai-holoi maka, me ka papamabara no luna iho, 2 noho oka. Na Ponohala o ka Lumihookipa : Hookahi Punee Oka ame na noho o ia ano like, ame ke akaukau ku-waena ame ka laaukii-ku.
HOOLAHA MANAO PANIKU A KU-
AI A KA MEA MALAMA MORA-
KI O KA MEA PAA MORAKI.
---
EMMA AME HENRY DEFRIES.
I kulike ai me ka mana kuai i hanaia iloko o kekahi moraki he moraki i hana ia e Emma Defries ame Henry Defries, kana kane mare ia A. B. Ingalls i ka la 3 o Mei, A.d. 1897, a i kakau kope ia iloko o ke Keena Kakau Kope Aina o ke Aupuni, ma Oahu, iloko o ka Buke Helu 170, aoao 259 ame 260, a na ua A. B. Ingalls nei i oleloia i haawi aku ia Fred Waldvogel, ma kekahi palapala i hanaia i ka la 6 o Iune, A. D. 1898, a i kakau kope ia iloko o ke Keena Kakau Kope Aina i oleloia, iloko o ka buke helu 179, aoao 466, a na Fred Waldvogel i oleloia i haawi aku ia Charles S. Martin, ma kekahi palapala i hanaia i ka la 6 o Maraki, A. D. 1902, a i kakau kope ia iloko o ke Keena Kakau Kope Aina i oleloia iloko o ka Buke helu 170, aoao 259.
Ma keia ke haawiia aku nei ka hoolaha o Charles S. Martin, ka mea Malama Moraki o ka Mea Paa Moraki i oleloia ke manao nei e paniku i ka moraki i oleloia no na kumu i uha ʻ iia, e hoike ana, o ka uku ole ia o ke kumupaa ame ka ukupaanee i ka manawa e uku ai a maluna o ua paniku la i oleloia e kuai kudala ia aku ai ma ke akea iloko o na keena kudala o James F. Morgan, Alanui Kaahumanu, Honolulu, ma ka Poaono, ka la 3 o Ianuari, A. D. 1904, hora 12 awakea o ka la i oleloia ka aina i hoakakaia maloko o ka moraki i oleloia e like me ia malalo iho.
No na mea aku i koe e ike ae ia William Savidge, loio o ka Mea Malama Moraki o ka Mea Paa Moraki, Helu 79 Alanui Kalepa, Honolulu. CHARLES S. MARTIN, Mea Malama Moraki o ka Mea Paa Moraki.
1. O kela mau aina apau loa e waiho la ma Kau, Hawaii i hoopaaia ma kekahi palapala kuai aina i hanaia a kaku kope ia iloko o ka Buke helu 159, aoao 386, oia no hoi ka hapa o ka R. P. ( Gr. ) 2760.
O na pono apau loa o ka Mea Moraki mai, na kuleana ame na pomaikai iloko a i pili i kela mau apana a mahele o ka aina e waiho la i Kau i olelo mua ia ae nei a i hoopaaia iloko o ka palapala haawi malama moraki i hanaia a i kakau kope ia iloko o ka Buke helu 147 aoao 313. 2997---JAN. 8, 15, 22, 29.
I ka Poaono nei i hoea mai ai he ekolu mau pupule, he elua wahine Hawaii a he hookahi Pake no ka hoopaa ana ma kahi mau. Mai Hilo mai keia poe.
HOOLAHA HOOKO MORAKI.
HOOLAHA MANAO PANIKU A KU-
AI A KA MEA PAA MORAKI.
---
ELIZABETH K. SMITH
---
Ma keia ke haawiia aku nei ka hoolaha mamuli o ka mana kuai i hanaia iloko o kekahi moraki i hanaia i ka la 31 o Mei, A. D. 1899, e Elizabeth K. Smith, wahine mare a George W. Smith, o Honolulu , Mokupuni o Oahu, Teritori o Hawaii, ka mea Moraki Mai, ia Mary J. Alexander, Mea Paa Moraki, a i kakau kope ia iloko o ke Keena Kakau Kope Aina o ke Aupuni, Oahu, iloko o ka Buke Helu 196, aoao 40-43, ke manao nei ka Mea Paa Moraki e paniku i ka moraki i oleloia no na kumu i uha ʻ iia, e hoike ana, o ka uku ole ia o ka ukupanee ame ke kumupaa i ka manawa e uku ai.
Ke haawi pu ia aku nei no hoi ka hoolaha o ka waiwai apau i hoopaaia iloko o ka moraki i oleloia e kuaiia aku ana ma ke kudala akea ma na keena kudala o James F. Morgan, Alanui Kaahumanu, Honolulu, ma ka Poaono, ka la 6 o Feberuari, 1904, ma ka hora 12 awakea o ka la i oleloia. O ka waiwai i hoopaaia maloko o ua moraki nei i oleloia oia keia malalo iho :
Akahi : O kela apana a mahele o ka aina e waiho la ma Pauwela, Hamakualoa, Apana o Makawao, Mokupuni o Maui, Hawaii Paeaina, nona ka iliaina o 46 eka, 2 kaulahao, ame 65 anana ( oi iki a emi mai ) a oia no hoi ka aina i hoakakaia iloko o ka Palapala Sila Nui Helu 144, i hoopukaia ia Paele a hooliloia i ka Mea Moraki Mai e Kia Brooks ame George Brooks, kana kane mare, ma kekahi palapala kuai aina i hanaia i ka la 28 o Novemaba, 1895, a i kakau kope ia iloko o ke Keena Kakau Kope Aina iloko o Honolulu, iloko o ka Buke 158, aoao 366 ame 367.
Elua : O keia apana a mahele o ka aina e waiho la i Kamaole, Kula, Mokupuni o Maui i olelo mua ia ae nei, nona ka iliaina o 5 eka ( oi iki a emi mai ) a oia no hoi ka aina i hoakakaia iloko o ka Palapala Sila Nui ( Grant ) 392, i hoopukaia, ia Pilipili : a pela no hoi na apana a mahele o ka aina e waiho la i Hamakualoa, o ka Mokupuni o Maui i oleloia, oia no hoi na hapa 1, 5 ame 6 o ka Palapala Sila Nui 2168, L. C. A. Helu 3829 ame Helu 6613 i hoopukaia ia Paele ; no ka Hapa 1 he 86-100 o ka eka kona iliaina ; Hapa 5 he 5-100 o ka eka kona iliaina ; a o ka Hapa 6 he 3 24-100 eka kona iliaina ; a o keia mau hapa o ka aina i oleloia ae nei ua hoakakaia iloko o ka Pauku Elua o lakou no hoi ka poe aina i hooliloia ia Elizabeth K. Smith i oleloia ma kekahi palapala kuai aina i hanaia e Kia Brooks ame kana kane mare ma ka la 29 o Iulai, 1896, a i kakau kope ia iloko o ke Keena Kakau Kope Aina, Oahu, iloko o ka Buke Helu 164, aoao 131 ame 132.
Ekolu : O na mahele pakahi apau loa o ka aina e waiho la i Kauluwela iloko o Honolulu i oleloia, i apoia a i hoakakaia e like me ia malalo iho :
E hoomaka ana ma ke kihi Hikina o keia aina, oia no hoi ke kihi Komohana o ke Alanui-olowi Makainai ame Alanui Kuakini, a holo :
Akau 41 deg. 20 min. Kom. 101 kapuai holo ma ke alanui Kuakini ;
Hema 53 deg. 00 min. Kom. 110 kapuai ;
Akau 41 deg. 00 min. Hik. 118.5 kapuai holo ma ka Apana 3 :
Akau 44 deg. 20 min Hik. 110 kapuai holo ma ke Alanui-olowi Makainai a hiki i kahi i hoomaka ai, a nona ka iliaina o 12,058 kapuai kuea ( oi iki a emi mai ).
A oia no hoi ka aina i hooliloia ia Elizabeth K. Smith i oleloia ma ka palapala kuai aina a Jesse P. Makainai, i hanaia i ka la 1 o Iune, 1899, a i kakau Kope, Oahu, iloko o ka Buke Helu 238, aoao 214-216.
Pau pu me na pono, na pomaikai na kuleana ame pono e ae i pili aku ia lakou aina.
Aia he halenoho maikai e ku nei maluna o ka pa-hale i hoike hope ia ae nei ma ke Alanui Kuakini mawaena o kahi noho o Mr. P. C. Jones ame ke Alanui Liliha, ame na aina e ae apau loa ua loaa maoli he manawa kupono loa no ka hoomoe dala ana no ka hoowaiwai ana.
Ma ke dala kuike ka makemake a ma ke dala gula Amerika no hoi a ma ka aoao o ka mea kuai mai na lilo palapala apau.
No na mea aku i koe e ike ae ia W. O. Smith, Judd Building ( Hale ) Honolulu.
Hanaia ma Honolulu, Ianuari 6, 1904. MARY J. ALEXANDER. Mea Paa Moraki.
Ma o kona loio ponoi, WILLIAM O. SMITH. 2997---Jan. 8, 15, 22, 29.---Feb. 5.
O ka laau lapaau " Chamberlain ʻ s Cough Remedy " ua hanaia ia no na ma ʻ i kunu, anu, naeoa ʻ iku, kunu kalea ame ka nalulu. Ua hooka ʻ ulua keia laau iaia iho ma na aupuni malamalma apau o ka honua nei ma o kana hoola kamahao ana i keia mau ma ʻ i i oleloia ae la. Ua loaa mai na hoaiai like mau pilikia e hoike mai ana i na hana kamahao o keia laau ; na ma ʻ i kunu ikaika loa i hoolaia e keia laau ; na anu ikaika loa i haawi pio aku malalo o ka ikaika loa i haawi pio aku malalo o ka ikaika o keia laau ; a o na ma ʻ i naeo ʻ iku i hoolaia e keia laau e hoopale mau ana i ke ola makamae o ke kamaiki. O ka hana hoohana lauia o keia laau no na ma ʻ i ikaika loa o ke kunu kalea ua hoike maopopo loa mai keia laau i kona ikaika a mana e hookaawale i na hua ino e loaa mai ana mamuli o keia mau ma ʻ i. Ua makahehi loa ia keia laau e na makuahine me he milimili o keia mau ma ʻ i. Ua makahehi loa ia keia laau e na makuahine me he milimili ia na lakou oiai aole he mau mea hoopilikia iloko o keia laau a ua hiki loa ke haawi ia keia laau i ka bebe uuku. He hoola mau keia laau i keia mau ano ma ʻ i a he hoola me ka hikiwawe loa.
E loaa no keia laau ma ka halekuai laau o Benson, Smith Co., Ltd., no ke kumukuai kupono.
Ua hoopuka ae ka Oihana Hale Leta i ka lakou papa manawa Helu 29 no na mahina o Ianuari, Feberuari ame Maraki o keia makahiki hou 1904.
HOOLHA KUMAU.
LEWERS & COOKE
LOI AME KUKE, Kaupalenaia
Na Mea Hookomo mai a Kuai aku i na
LAKO HANA HALE
O Kela ame Kena Ano.
Malaila e loaa ai na mea malalo ihea.
---
NA PAPA N. W., NA PAPA HOLE, PILI HALE, NA PUKA. NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.
O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
Hui Alahao ame Aina o Oahu
MANAWA HOLO
Mei 1, 1903
MAI HONOLULU AKU
No Waianae, Waialua, Kahuku ame
na wahi hoolulu ma ke alahao---
*9:15 a. m., *3:30 p. m.
No Pearl City, Ewa Mill, ame na wahi
hoolulu ma ke alahao---+7:30 a. m.
*9:15 a. m., *11:05 a. m., *8:15 p. m.,
*3:20 p. m., +4:15 p. m., *5:15 p. m.,
@++9:30 p. m., +11:15 p. m.
MAI WAHO MAI.
Ku i Honolulu mai Kahuku, Waialua,
ame Waianae mai *8:36 a. m., *5:31 p. m.
Ku i Honolulu mai Ewa Mill ame Pearl
City mai---+6:50 a. m., +7:46 a. m.,
*8:36 a. m., *10:38 a. m., *2:05 p. m.,
*4:31 p. m., *5:31 p. m., *7:40 p. m.
*$5:31 p. m., *7:40 p. m.
* Kela ame keia la.
@++ Sabati wale no.
+ Koe ke Sabati.
G. P. DENISON, Lunahoohana. F. C. SMITH, G. P. & T. A.
Kakela me Kuke
[ KAUPALENAIA ]
---
Poe Kalepa ma ke Komisina
: : A HE : :
POE LAWELAWE KOPAA
---
Poe Agena no na Mahiko Lehulehu.
KAUKA T. MITAMURA
. . .
Alanui Kukui Ololi Helu 68, Honolulu.
Na Hora Hana:
Hora 8 a 10 kakahiaka ; hora 1 a 3 ame
hora 6 a. m. 8:00 p. m. Sabati : Hora 6 a 8 p. m.
Telepone Blue 2366 P. O. Box 342
Poe Akepau i loaa hou ke Ola Kino Maikai.
Ke hoike mau mai nei na Kauka ia makou mai na wahi like ole mai o ke ao nei no ka nui o ka poe i aneane o loaa i ka ma ʻ i Akepau i hoopakele ia mai keia ma ʻ i mai mamuli o ka laau
" AYER ʻ S CHERRY PECTORAL. "
Ke loaa i keia laau e loaa ana i ka ma ʻ i ka maha no ka wa mau loa, a aole no kekahi manawa pokole e like me kekahi ano laau okoa ae.
Aohe Laau Kunu i oi ae o ka maikai mamua o ka LAAU KUNU
" AYER ʻ S CERRY PECTORAL. "
He mea maikai e ike kakou i keia, no ka mea ua hoola keia laau i ka poe i loaa i keia haawina no aneane kanaono makahiki. E malama mau i keia laau. Ina aole au omole laau kunu o keia ano, e kuai koke mamua o ka loaa ana i ke kunu. Ina ua loaa kekahi iloko o ka ohana i ke anu e hooinu i keia laau a e loaa no ka maha.
Hoomakaukau ia e Kauka J. C. Ayer & Co., Lowell, Mass., U. S. A.
E loaa no keia mau Huaale a na halekuai laau a pau.
E LAWE I KA NUPEPA " KUOKOA, " I IKE MAU I NA MEA HOU.