Ka Nupepa Kuokoa, Volume XLI, Number 52, 25 December 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, DEKEMABA 25, 1903

Maikai Kiu

Kaloke HOME

-AME KA-

Ilihia i Hulii me ka Noeau

 

 

Mokuna III

 

KA HANA

 

            “Aole.  O ke koko hookahi i loaa aku ia makou oia o Rokeke Basekavila ka muli loa o na keikikane a o ka hipa eleele iloko oia ohana.  Ua puka mai ia mai ke koko kahiko o Basekavila, a na ha’iia mai hoi ia’u oia no ke keiki i kulike loa me ko Hugo Basekavila helehele na.  Ua nui kana mau hana ino i hana’i, a ua hiki ole iaia ke poho iho ma Pelekane nei, no ia kumu ua holo aku oia no Amerika Waena, a make malaila i ka ma’i fiva lenalena i ka makahiki 1876.  O Hanale oia ka panina o ka ohana o Baskavila.  Iloko o hookahi hora ame elima minute e hui aku no wau me ia make kahua hoolulu o Watalu.  Ua loaa mai ia’u he lono ma ka uwea telepona ua hiki ae oia ma Saukamatona i keia kakahiaka, Ano, e Kaloke, heaha kau i manao ai e hana aku wau no ka’u malihini?”

            “Heaha hoi ka mea e keakea ana iaia i kona hoi aku no kahi o kona mau makua?”

            “Ua pono io no ia, aka, e noonoo iho kaua, o na Basekavila apau i hoi aku no keia home o lakou ua halawai wale no me na haawina manaonao.  Ke manaoio nei wau ina i hui kamailio hou maua me Sir Kale, ina no ua ha’i mai kela he mea pono ole ka hoihoi ana aku i ka hope loa o ka ohana no ia wahi a halawai pu me ka hopena i ikeia iloko oia ohana.  He mea oiaio o ka holomua o keia wahi i kauia ka weli, aia no ia ma ka noho ana mai o ka hooilina oiaio o ia wahi, a ina aole pela, alaila o na hana maikai a Sir Kale i hoemaka ai e lilo ana lakou i mau mea ole.  Ua komo mai ka maka’u iloko o’u o hana aku wau mawaho o ka mea pono, a oia iho la ke kumu o ko’u hele ana mai ia oe a e loaa mai hoi ke alakui ana no’u.”

            Ua noonoo iho la o Kaloke no kekahi mau minute a pane aku la:

            “Alaila, eia kou manao maoli aia no he uhane lapu e hokae hele nei ma Damoa, a ua hiki ole i kekahi ohana o Basekavila ke noho aku malaila me ka pono ole o kona ola?”

            “Me he mea la aia io no he mau kumu e hiki ai ke manaoia aku oia iho la ke ano.”

            “Pololei.  Aka ina he uhane lapu io, ua like no a like ke ino e loaa aku ana i keia hooilina ina no ia ma Ladana a ma Devonakaia.  O ke diabolo me kona wahi mana wale no ma Basekavila a koe kekahi wahi okoa ae, he mea hou ia oiai ke kaapuni nei na diabolo ina welelau eha o ka honua.”

            “Ke kamailio mai nei oe, e Kaloke, me kou noonoo ole iho,ina paha o oe ma ia wahi, ina no ua loaa aku he wahi manao okoa ae.  O kau i manao ai, ma ka’u hoomaopopo aku, ua pono no ke ola o ka opio ina no ia e noho ana ma Devonakaea a i ole ma Ladana.  E hiki mai ana oia iloko o elima minute.  Heaha kau i manao ai he mea pono ia’u ke hana aku?”

            “E pono ia oe e kii aku i kaa, kahea mai oe i ko ilio e wa’uwa’u mai nei i kuu puka, a holo aku no Watalu a hui aku me Sir Hanale Basekavila, a mai ha’i iki oe i kekahi mea iaia a hiki i ko’u hooholo ana i ko’u manao maluna o keia hana au.”

            “Pehea ka loihi a loaa kau hooholo no keia mea?”

            “Iloko o iwakalua-kumamaha hora.  Ma ka hora umi o ka la apopo, ina he mea oluolu ia oe ka hele hou ana mai, a he mea maikai loa ina no hoi oe e lawe mai ana ia Sir Hanale Basekavila me oe.”

            “E hana no wau pela, e Kaloke,” wahi a Matimea me ka hooponopono ana i ka pulima o kona palule a puka aku la a hele no kana huakai.

            Ua ku iki iho la oia me Kaloke ma ke anuu o ke alapii a ninau aku la o Kaloke.  “Ua ha’i mai nei oe mamua o ka make ana o Sir Kale, ua nui ka poe i ike i keia mea nana e hookau nei i ka weli ma ua kula la.”

            “He ekolu poe i ike.”

“Aole anei i ike hou aku kekahi mea mahope mai?”

“Aole wau i lohe iki mahope mai.”

“Kinikini, o hele.  Aloha kaua.”

Hoi aku la o Kaloke a noho iho la iluna o kona noho aia hoi maluna o kona helehelena ka manaina hoihoi me he mea la ke iini la kona naau i ka hana iwaiho ia aku imua o kona alo.

“E hele ana anei oe, e Wakekoua?”

“Ina paha he makemake kou ia’u.”

“Aole, e kuu hoaloha, aka i ka wa o ka hana wau e makemake ai ia oe.  He mea maikai maoli no keia, he mea hoi i hala aku mawaho o ka mea mau.  Ina oe e hele aku ana, e oluolu hoi oe e hele aku ia Baradale a kauoha aku iaia e hoouna mai i hookahi paona paka huluhulu.  Mahalo.  He mea pono ia oe e hele aku ai mai hoi koke mai oe mamua o ke ahiahi.  Ina oe e hooko ana i keia kauoha, alaila ua hiki ia’u ke hoonohonoho ae i na mea e pili ana i keia hihia ano nui, a kaua hoi e hoike aku ai i ke kakahiaka o ka la apopo.”

Ua maopopo ia Wakekona keia mau mea apau.  Ua maopopo iaia ke koikoi o ka hoohuihui ana ame ka huli ana i na mea alakai iloko o na hihia apau, a e like me ka mea i kauohaia aku ai iaia pela iho la oia i hooko ai.  I ka hora eiwa o ia po ua hiki aku la oia i ka hale.  Ua hoopihoihoiia oia iaia i wehe aku ai i ka puka a puka mai la ka uwahi e like me ka puoho ana o ka uwahi o ka hale pauahi.  Ua komo koke aku la oia me ka awiwi a ike aku la e kau ana no ke kukui iluna o ke pakaukau, a e lewalewa ana hoi kekahi pakini maluna iho a mai keia pa ae e punohu ana ka uwahi iluna.  Ia wa hoomanao ae la o Wakekona i ka paka huluhulu, a hooomaka iho la no hoi oia e kihe no ka pakui paka.  Ua ike aku la no hoi oia iloko o ka punohu uwahi i ke kino o Kaloke e hiolani ana no me kena lole moepo iluna o kekahi noho paipai, a o kona ipupaka e kau ana no ma kona waha.  Ma kona mau aoao e waiho mokaki ana kekahi mau ope pepa.

“Ua anoe oe, e Wakekona?”

“Aole paha no keia mea hohono pakui au ko’u kumu o ke kihe ana.”

“Alaila ua nui maoli no, ina aole pela aole no oe e hoopuka mai pela.”

“Auwe! He nui maoli.  Aole maikai o keia mea.”

“Ina pela e wehe aku oe i ka pukaaniani.  Ma ka’u ike i ka hale hui no oe a po keia la.”

“E kuu hoaloha.” wahi a Wakekona me ka puiwa nui.

“Aole anei ua pololei ka’u koho?”

“Pela no, aka pehea oe------“

Ua aka aku la o Kaloke i ke pahaohao nui o kona haoloha.

“Ke ike aka la wau i kou helehelena hauoli, e Wakekona, a ma ia ano wau i hiki ai ia’u ke koho aku.  Ua hele aku nei oe i keia la puanuanu.  Ua hoi mai nei oe i keia ahiahi me ka mau no o ka pulu o kou papale ame kou mau kamaapuki.  Ua hoolilo oe i kou manana ma kekahi wahi.  He mau hoaloha kou.  O ke kanaka i nele i keia mau mea ihea oia e hele ai?  Aole anei keia he mau mea maopopolea?

“Well, ke ae aku nei wai i kau.”

“Ua piha ka honua me na mea maopopolea, e hiki ole ai ke nalo aku mai na maka aku o ka poe e manao ana e ike aku.  Ihea wau ma kou manao ana?”

“I ka hale nei no hoi kahi hoopau manawa ai.”

“Ua hewa oe malaila, i Devonakaia aku nei wau.”

“Alaila maka uhane?”

“Pololei. Maanei kou kino kahi i waiho ai, a ua pau ae nei iloko o ko’u wa e hiamoe ana he elua kikila kope a he hapanui hoi o keia paka huluhulu.  I kou hala ana aku, ua kauoha aku wau i Kanafoda e lawe mai i keia mau palapalaaina o ua kula ia, a maluna o ua kula la ko’u uhane kahi i hele ai i keia la holookoa.  Ke haaheo nei wau i ko’u hiki ana ilaila.”

“He nui maoli no keia palapalaaina.”

“Pela io no” wahi a Kaloke, a ia wa pu no hoi oia i wehewehe ae ai a kau iho la iluna o kona uha.  “Maanei e ike ana oe i kahi a kaua e makemake nei.  O Basekavila Hale keia iwaena.”

“Oia keia e paa nei i ka laau apuni?”

“Pololei.  Ke manao nei wau eia ke alahele, eia nae hoi aole i kaaia ka inoa, a ke holo nei ma keia wahi a hiki aku i ke kula, e like me ia au e ike nei ma ka aoao akau.  O keia mau pupupuhale oia no o Kalipena, kahi hoi o ka hoaloha Kauka Matimea e noho nei.  Ma kahi o elima mile, a oia hoi keia ana e ike nei, ke ku nei he mau hale e kakaawale ana.  Eia o Laa Hale, e hoikeia ma kela moolelo.  Eia he hale maanei, a me he mea la o kahi keia o ke kanaka kakau moolelo o Sapeletona kona inoa.  Eia he elua halemahiai, o To Hai ame Faulamaea.  He umi-kumamaha mile mai nei aku oia ka halepaahao o Taona’ili.  Mawaena o keia mau wahi oia ke kula kanaka ole.  O keia iho la ke kahua i hahaia ai o keia mau hana, a o keia ka kaua wahi e hele aku ai ma keia mua aku.

“He kohu waoakua keia wahi.”

“He oiaio, a he wahi maikai i’o no keia ina ua makemake na diabolo e komo pu ae iloko o ke kuleana o ke kanaka oia--------“

“Alaila, o oe kekahi e manaoio ana i na uhane daimonio” i kahainaha aku ai o Wakekona.

“Malia paha oia mau diabolo he uhane a he koko no hoi ko lakou?  Pehea iho la ia?  He elua ninau nui a kaua e noonoo ai.  O ka mua ina paha ua hanaia kekahi hana karaima; o ka lua heaha ua karaima la a pehea la ia i hoohanaia ai?  Ina he oiaio ka Kauka Matimea mau hoonohonoho ana; a eia kaua ke paio nei me kekahi mau mea i hiki ole i ke kanaka ke ike aku alaila o ka pau keia o ka kaua huli ana.  Aka e hana mua kaua ma na mea ike maka ia a i hiki ole alaila e hilinai aku kaua i kēia mau manao a noonoo e like me ia i loaa ai ia Matimea.  Manaao wau e pono ia oe ke pani i kela pukaaniani, ina no nae aole oe e hoole mai ana.  He mea ano ole no keia aka he mea no nae hoi keia nana e kokua mai i ka kaua hana a e paa ai ko kaua mau noonoo maluna oia kumuhana.  Aole wau i hoolilo nui aku i ko’u noonoo ma keia mea aka o keia ka hopena o ka’u mea i huli ai.  Ua noonoo anei oe i keia hihia a kaua?”

“He oiaio ua nui ko’u noonoo no keia hihia i keia la.”

“A heaha kau mea i loaa mai?”

“He hihia pahaohao maoli no keia.”

“O keia ka hihia oia wale no i kona ano.  Aia no he mau hoike maopopolea.  E nana ae kaua i kela moali wawae.  Heaha kou noonoo no ia mea?”

“Wahi a Matimea na hele aku ke kanaka maluna o kona mau manamana waewae mai ka puka-pa aku.”

“O kana i ha’i mai ai he olelo ia na ka poe kamipulu i ha’i ai imua o ka aha nieniele.  Heaha ke kumu e hele aku ai ke kanaka maluna o kona mau manmaua wawae?”

“A ina aole pela heaha iho la?”

“E holo ana oia, e Wakekona—e holo ana me ka maka’u nui no kona ola iho, ua holo aku oia a hiki i ka naha ana o kona puuwai i ka maka’u a haule iho la oia a make me ka huli o kona alo ilalo.”

“Heaha hoi kona mea i holo aku ai?”

“Oia ka kaua mea e huli ai.  -Ma ko’u manao, e like me na mea i ikeia ua pupule ka noonoo o ke kanaka a ua maka’u hoi mamua o kona holo ana aku.”

“Pehea iho la i hiki ai ia oe ke olelo mai pela?”

“Ke manao nei wau o kahi i hiki mai ai o kona maka’u mai ke kula mai no ia.  Ina pela iho la, a ma ka nana aku oia maoli no, alaila o ke kanaka wale no i nalowale kona noonoo maikai oia ke holo aku i ua kula la, a aole hoi i ka hale.  Ina e noonoo ae ana kaua i ka hoike a ke kanaka kalewa lio e hoike ana ua lole oia i kekahi leo e kahea ana i mau kokua, alaila e loaa ana ia kaua ka ike i holo aku ai o Sir Kale no kahi o kona hoaloha kahi hoi e loaa aku ai na kokua ana.  Eia hou, owai kana e kali ana ma ia po, a heaha la kana mea e kali ana ma ua alahele la o kona pa?”

Ke manao nei anei oe e kali ana o Sir Kale i kekahi mea?”

“E hoomaopopo oe ua elemakule o Sir Kale a ua palupalu hoi kona noonoo.  Ua maopopo ia kaua kona hele holoholo mau ana i na ahiahi apau, eia nae, he po ko’eko’e ua po la ana i hele ai.  Ma ia ano aole oia e ku iho ana ma ia wahi no na minute he umi, e like me ka Matimea mea i ha’i mai ai, e noonoo iho kaua ma kahi o ka lehu kika.”

“Aka he mea maa mau ia la ka hele ana i na po apau?”

Ke manao nei wau aole oia i maa i ke ku ana ma ua puka la i nap o apau.  O na hoike i loaa mai he mea maa iaia ka hele ole ana ma ua kula la.  Ia po ua ku iho oia malaila.  O keia no hoi loa po mamua o ka la ana i makemake ai e hele aku no Ladana.  Ma keia mau mea ke hui ae nei ka’u mau mea i manao ai.  E noi aku ana wau ia oe e lawe mai i kuu pila vaiolina a e waiho ae kaua i ka noonoo ana i keia mea a hiki i ka la apopo.”

 

MOKUNA IV

 

SIR HANALE BASEKAVILA

I ke kakahiaka o kekahi la ae, e noho ana Kaloke ma kona lumi hookipa, mahope o ka pau ana o ko laua paina kakahiaka, e kali ana hoi o ka hoea mai o ka laua mau malihini i ka wa i aelikeia.  Ua hooko pono o Matimea i kana mea i ae ai, oiai ma ka hora i oleloia ua komo mai la oia ame kekahi opio mahope mai ona.  O ka opio he kanaka kino uuku, kulana eleu, maka poni eleele a nona hoi na makahiki ma kahi o ke kanakolu.  He kino ikaika, he mau ku’eku’e maka huluhulu.  He lole manoanoa kona e komo ana, a maluna o kona helehelena ke ano i maa i ka nohona o ka poe mahiai, eia nae, aia no kekahi mea maluna o kona helehelena e hoike ana he kulana keonimapa.

“O Sir Basekavila keia,” wahi a Kauka Matimea.

“O ka mea apiki,” wahi a ua opio la i pane aku ai,” e Mr. Kaloke. Ina aole ko’u hoaloha e koi mai ia’u i keia kakahiaka e hele pu mai me ia ina no ua hele mai wau ma ko’u manao ponoi.  Ua lohe wau eia oe ke noonoo nei i kekahi mea pohihihi, a eia no hoi keia mea pohihihi a’u e makemake nei hoike aku ia oe.”

“Ke noi aku nei wau ia oe, e Sir Hanale e noho iho ilalo.  Ma kau mau olelo ua hoomaopopo aku nei wau ua halawai oe me kekahi mau mea pohihihi i kou wa i hiki mai nei mai Ladana mai.”

“Aole no he mea ano nui loa, e Mr. Kaloke Home.  Me he mea la he mea paani wale iho no keia.  O keia leka i loaa ai ia’u i keia kakahiaka oia ua mea la.”

Waiho iho la ua opio nei i ka wa-hi leta iluna o ke pakaukau a ia wa i nana like iho ai lakou.  Maluna o ka wa-hi leta e kau ana keia mau mamala olelo.  “Sir Hanale Basekavila, Nokekamalena Hotele,” a o ke kuni e kau ana maluna.  “Ke’a Kalalena,” a o ka wa o i hoounaia ai oia no ke ahiahi mamua iho.

“Owai ka mea i ike e hoi aku ana oe no Nokekamalena Hotele?” i ninau aku ai o Kaloke me ka leha ana aku o kona mau maka maluna o ka opio.

“Aole anei o Kauka Matimea kekahi i noho pu me oe?”

“Aole, me ko’u hoaloha wau i noho ai.” wahi a ke kanaka.  “Aole no hoi he mau hoike e hoike ana i ko maua hoi aku no ka hotele.”

“Ina pela eia kekahi mea ke noonoo nui nei i kou pono,” wahi a Kaloke me kona wehe pu ana ae i ka leta i opiia i na opi eha.  O keia kana i wehewehe ae ai a hohola iho la iluna o ke pakaukau.  Iwaena e kau ana kekahi mau huaolelo i pa’iia a i hoopipiliia a penei na mea i palapalaia:  “Oiai he mea nui kou ola ma kou manao a no na kumu kupono e hookaawale oe mai ke kula aku.” o ka huaolelo “kula” oia wale no ka mea i kakau lima maoli ia.

“Ano, e hiki ana paha ia oe e Kaloke e ha’i mai owai la keia mea e nana nui mai nei i ko’u pono?”

“Heaha hoi kau, e Matimea?  Me he mea la he mea pono ia oe e hoole ae aole he wahi lihi o na hana uhane lapu ma keia mea.”

“Pela io no, aka me he mea la na hoea mai kena leta mai kekahi mea i loaa aku iaia ka hilinai ana maluna o na mea uhane.”

“Heaha keia mea uhane?” i ninau awiwi aku ai o Sir Hanale.  “He he mea la na ike oukou, e na keonimana, i kekahi mau mea e pili ana no’u.”

(Aole i pau.)

 

HAWAII ame KONA

LAHUI.

 

MAHELE I.

 

MOKUNA I.

NO KA AINA ANA MA HAWAII NE.

1.        O  na mokupuni o ko Hawaii nei Paeaina, he umi keia mau moku ame kumamalua, eia no ma ka moana Pakipika nei, ma ka latitu akau he 18 degere 54, a hiki aku i ka 22 degera 17, ma ka latitu komohana 154 degere 54.

He mea kahaha loa no kamanao i ka lohe ana mai i na olelo a ka poe kahiko, no ke kumu o ka aina ma Hawaii nei, he k@ ko lakou manao, aole he like pu.

Ma ka mookuauhau o Puanue i oleloia mai ai.  Ua hanau maoli ia mai na kukulu o ka honua ame na kukulu o ka lani.  @ Kumukanikekaa i hanau mai, a o kana kane o Paiaalani no ia a na eleloia mai e kekahi, na Kamaieli i hanau mai ka mole o ka

honua a o Kumuhonua kana kane.

2.       Ma ka mookuauhau o Wakea, ua oleloia mai, na Papa i hanau mai keia paemoku, a o Wakea kana kane, a o kekahi p@ i aole lakou i keia, a olelo mai lakou i mai la, ua hana maoli @ keia paeaina e ko Wakea mau lima.

3.       Ma ka mookuauhau o Kumulipo, ua oleloia mai, aole i@ nau maoli ia ka aina, aole hoi i hana lima ia, aka, ua ulu w@ mai no ia; ke ike nei kakou i ke kuhihewa, ame ka lapawale o keia mau manao o na mookuauhau, no ia mea, e ini kakou i ka manao o ka poe noonoo, penei ka manao o lakou.

4.       Aole paha aina maanei i ka wa kahiko loa, he moana wale no, manao lakou ua hoea mai na aina, mailoko mai o ka moana a o na ahi pele ka mea i hoea mai ai, eia ka mea a manao ai lakoa pela, ua ikeia kekahi mau moku i hoea mai, a ua like ke ana o ia mau aina me Hawaii nei, eia ka mea akaka loa, he aina pe@ w@ no keia poe moku, a pela no hoi na moku apau ma keia moana.  O na pohaku apau, he pohaku i hoohehee wale ia no, aole i l@ na pohaku me ko na aina puni ole, no na pele wale no koo@ l@aku, i neia wa, ua pio ka nui o na pele, aka, i ka wa kahiko h@ pele no ma Maui, ame Oahu, ame Kauai, a ma keia paemoku apau, nolaila, ua manao wale ia,ua hoea mai keia paeaina malalo m@ aole nae i ike pono ia, malama he aina no maanei mai kinohi mai.

 

O KE KUMU MUA O KO HAWAII NEI KANAKA

 

Ua olelo ia mai ma ko Hawaii nei mau mookuauhau kupuna na kanaka mua o Hawaii nei; no lakou mai ko Hawaii nei lahui kanaka apau.

Ma ka mookuauhau o Kumulipo i ha’i ia mai ai, he wahine @ kanaka mua loa, o Lailai kona inoa, ua oleloia mai, he po wale no kona mau kupuna, a mau makua, a ioia hanau kanaka mai, o Kealiiwahilani ka inoa o ke kane a ua Lailai la, i aole nae i ha’i ia mai ka inoa o kona ma makua, ua oleloia, mai ka lani mai o Kealiiwahilani ka inoa o kekane a ue Lailai la, i nana mai oia a ike i ka wahine maikai o Lailai e noho ana i Lolowaia, a hu ae la ke aloha @o

ko ona iaia, a iho mai oia a ike aku oia ia Lailai, a hanau mai ka laua keiki, oia kekahi kupuna o keia lahuikanaka.

            A mahope mai o Lailai ma, ua haiia ma ka mookuauhau o Ol@ he kane ia kanaka mua loa, o Kahiko kona inoa, aole maopopo @ na mea i oleloia mai no kona makua ame kona poe kupuna o Kupa lauakehau ka inoa o ka Kahiko wahine, na laua mai o Lihauula ame Wakea, he wahine ka Wakea, o Haumea kona inoa, o Papa no ia ua olelo ia mai no ua Haumea la, he pali kona mau kupuna a ma makua, iaia maopopo mai ke kanaka ana.

            O keia poe wale no ke kumu mua o Hawaii lahui apaum aole na maopopo lea ko lakou wahi i hanau ai, ua hanauia mai lakou, ma Hawaii nei paha, ma kekakhi aina e paha; ua oleloia mai ko lakou wahi i noho ai, aia ma Lolowaia o Lailai ame Kealiiwahilani, o Kahiko me Kupulanakehau, o Kamawaelualani ko laua wahi i noho ai o Loloimehani kahi i noho ai o Wakea me Papa, aole nae he wahi o Hawaii nei i kapaia ma keia mau inoa.

 

MOKUNA II.

NO NA HANAUNA MAI O WAKEA MAI

 

1.        Mai ia Wakea mai a hiki mai i ko Haumea make ana, eono ia mau hanauna kanaka, aia ma Ololoumelani ka e noho ai keia ma@ hanauna, a mahope mai o keia hanauna eono, 19 ia hanauna a ua manao wale ia o kekahi poe o keia mau hanauna ka i hele mai a noho ma Hawaii nei, no ka mea, o ka iwakalua paa o keia hanauna o Kapawa kona inoa, oia ka i haiia mai, ma Kukaniloko no Waialua, Oahu kona wahi i hanau ai.

2.       A mai-ia Kapawa mai a hiki mai i keia wa, ua ike po@ ka hanau ana o kanaka ma Hawaii nei; ua manaoia ua hele lakou mai ka paeaina mai, e kokoke ana ma keia paemoku, no ka mea, @@@ @ana i ko Hawaii nei poe kahiko ka inoa o Kahiki, a ua paa @@@ hiki maloko o na mele, ame na pule, ame na kaao, o ka poe @@ o Hawaii nei.  Eia ua wahi inoa o na aina i paa ma na mele o Kahikihonuakele, o Nuuhiwa, o na aina ma na kaao, Upolu o Kaii@puaiku, o Kuaihelani, na aina ma na pule, o Uliuli, o Melemele, o Pelapola, o Haehae, o Maokuululu, ame Hanakalauai, aia la makua ka paeaina i ikeia keia mau inoa aina e maopopo lea ai keia, ina @@ akaka kahi i noho ai na kupuna o keia lahui, a e ike hoi i ko kakou wahi e holo mai ai a hiki mai i keia paemoku.  Aia paha @ ka paeaina o Kahiki keia mau inoa, a ma ia mau aina paha lakou i noho mua ai, a mahope mai ma Hawaii nei, a no ko lakou aloha paha ia Kahiki, ame Hawaii, kapa lakou i kau wahi o Maui, o Kahikinui, a kapaia keia paeaina o Hawaii, ina i ole ia o Hawaii paha ke kanaka i noho mua ai, o Maui paha, o Oahu paha, o Kauai paha, a make lakou kapaia paha ka aina ma ko lakou mau inoa.

 

O KO PILI HOLO ANA MAI.

 

3.       Ua oleloia o Paao laua me Makuakaumana ame kekahi poe pu me laua, ka i holo mai mai Kahiki mai ma ka wa kahiko, a noho o Paao ma Kohala i Hawaii, aka, hoi no Makuakaumana i Kahiki, ua hiki mai o Paao ma Kohala, i ke kau ia Lonokawai ko Hawaii alii, mahope mai o Kapawa, o ka umikumamaono ia oia hanauna alii.  I ka wa i noho ai o Paao ma Kohala, lilo ko Hawaii nei mau alii i ka hana hewa, alaila, kii o Paao i alii ma Kahiki, o Pili ka inoa o ua alii la i holo pu mai me Paao, a hoonoho ia oia ma ko Hawaii nei papa alii.  Ma ka waa no ka holo ana mai o Pili ma i Hawaii nei, aole nae maopopo ke ano o ka waa, aka, o kona inoa, oia ka i ikeia o Kanaloanui ia, a hiki mai o Pili ma i keia paeaina, hoi aku o Paao, ame Makuakaumana, ame ka poe e ae, a o ka nana aku i ka hoku oia ko lakou panana i holo mai ai a hiki i Hawaii nei.  Ua oleloia, i ko Pili holo ana mai, hele pu mai na i’a elua me ia, ka Opelu kekahi, a o ke Aku kekahi, ma ka wa e makani ai ka moana haluku mai la ke Aku, hoolili mai la ka Opelu, malie iho la ka makani a pohu loa ka moana.  Pela o Pili ma i holo mai ai a pae ma Hawaii nei, nolaila, ke kapu o ke Aku ame ka Opelu i ka wa kahiko.

(Aole i pau.)