Ka Nupepa Kuokoa, Volume XLI, Number 51, 18 Kekemapa 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, DEKEMABA 18, 1903

4

keia huakai a kakou i keia manawa a he nui no ka manawa i koe no kakou e holo ai mamua o ka hiki i kekahi o na koa o ka Akibihopa ke ukali mahope o kakou, a aole no kakou e kipa ilaila ina he wahi e ae kekahi e loaa ai ka kakou ai."

A hala kekahi mau hora elua ma keia holo ana ua hiki aku la lakou i kekahi wahi kauhale uuku ma ka aoao akau o ka muliwai a malaila lakou kahi i hoomaha iki ai. A pau ka ainakakahiaka aole nae i ponopono loa o ua ainakakahiaka nei, no ka mea ua loaa mai ia lakou he papaa palena ano kahiko ame ka waina o ke ano maikai ole eia nae oia ka mea e hiki ke loaa i kolaila poe a me ia ano, a mahope o ka hoomaha ana ua hoomaka hou aku la lakou ma ke alahele. A hala wale kekahi mau hora, a hala no hoi ka ainaawakea, a i ka auwina la ma waena paha o ka hora ekolu ame ka hora eha ua ike aku la lakou i ke kauhale o Burutika, a he mea oiaio ua pololi maoli lakou apau. "E hoomaha ana kakou ianaei a ianei kakou e ai ai." wahi a ka Emepera. Ke manao nei au aole e loaa ia kakou kekahi kuia. Eia me a'u ko'u palapala ae e hiki ai ke hele ma na wahi apau o keia mau kalana mai Palanipoka mai a hiki i Tarevis a hiki loa aku i Kobilene. O oe ma ke ano ina e ninauia mai--he kaikuahine oe no'u a o laua nei ka kaua mau mea lawelawe. Peia iho la ko kakou kulana ke ulu mai na ninau. A o oe e Konorado e noho no oe i ka waapa nei a o makou ke pii ae i ka hotele, a na'u e kauoha mai e lawe mai i mau mea ai nau. O ka hele hookuoo ana oia kekahi mea kokua ia kakou mai na hoohui mai." Aole he hoohalahala ana ma ka aoao o ke Kaunawahine no keia mau manao o ka Emepera, a hoololi ae la o Konorado i ka waapa a emoole pili ana ka waa i kahi e lele aku ai i kula.

MOKUNA VIII.

HUI NA PAHIKAUA, KA AULII ME KA PILIKUA.

O ke kauhale o Burutika he poe lalani hale ia e kuku ana ma ka lihi muliwai o Mosele he haneri paha kapuai mai ke ka'e aku, a iwaena e ku ana he hale ano huina-ha a mamua pono ona he puka-pa kikina pi'o e hiki ai ke pani a paa loa, a ua hanaia ia no ke pule ana i na enemi e komo hakaka aku ana. O keia hale iwaena o ka hapanui oia no ka hotele o Burutika, he kauhale hoi keia e noho hoomalu ia ana e ekolu mana--o ke Kauna o Winepoka, ke Kauana o Belasetina ame ka Akibihopa o Tarevis. O na ninau e ulu mai ana e noonoo ia lakou e keia poe e like me ko lakou kulana pakahi iho, a e hanaia ma ka inoa o ko lakou apau me ke ano o ko lakou mau aahukoa e like me ke ano o ka aahu o ia mahele aina. O ka waapa e hoopiha ana i kela auwina la he ninau ano nui ia i ulu ae iwaena o lakou a i ka manawa i hoomaopopo ai lakou e kipa aku ana i o lakou la, alaila hoomaka iho la ka lakou ahaku-ka. "Heaha ka kakou e ike nei?" wahi a ka ninau a ke Kapena o ka puali koa o ke Kauna Winepoa i ui aku ai i ke Kapena o ka puali koa o ka Akibihopa. "Na ko kana hoaloha ia e pane ae nona, ke Kapena o ka puali o ke Kauna Belasetina, no ka mea, nana keia mau milihini. Aia he mau wahine maluna o ka waapa a aole he alo wahine ko ka Akibihopa." wahi a ke Kapena o ka Akibihopa. O ke Kapena o ka puali koa o ke Kauna Belasetina he kanaka kino nui ia a he umauma lahalaha kona o ke kulana koa no, a he kanaka nui mai luna a lalo, aia he umiumi pohukuhuku e kau haaheo ana me he mau eheu manu la i ka la makani. "Eia paha ka olelo hiki ke olelo ae," wahi a ke Kapena o ke Kauna Belasetina, "he hana maalahi loa ka hoolele ana mai ia lakou iuka nei o ka aina, a he alanui hamama no hoi no lakou e poholo ai iloko o ka waha o ka liona. He mau olelo keia e hoike ana ua ano like lakou me na manu ka hiki wale no ke alapahu ae. "Ua like no hoi ia mea ko lakou hoomaopopo ole i ka lakou wahi e kipa nei." wahi a ke Kapena o Tarevis, "Aia ke kanaka opio ke hoolele mai la i ka wahine opio, a ke ike la wau he kaikamahine kela o ke alo o na alii. Ina e noii loa ia aku kona ano ame kona helehelena alaila he kanaka laki loa ke Kapena o ke Kauna Belasetina. Ina no hoi he ekolu lakou ina ua pau pono kakou." "Ua lawa laua la no elua." wahi a ke Kapena o ke Kauna Winepoka. "no ka mea, ua hoike mua iho nei ko Tarevis,  aohe kona alo no na wahine." "Ho, e ka mea hookipa, e ku oe malaila," wahi a ke Kapena Belasetina i kahea ae ia me ka leo nui. "Aia he mau malihini e kipa mai ana iloko ou, a e ku makaukau oe no ka hookipa mai." No ka pane a ke Kapena i kalahea ae ai, aia hoi ua oili mai la kekahi wahi kanaka uuku poo kiokio, a ku iho la mamua pono o ka puka-pa a huli aku la a nana i ka poe ana e hookipa mai ai ua loaa iho la no iaia ka manaolana ikaika ole no ka hookipa ana no ka mea wahi ana he wahi heluna uuku wale no e hoonui hana wale ai no kona aoao a he uuku kahi loaa. Ma ko Rodolofo aoao ua leha mai la kona mau maka me ka hikiwawe loa i keia poe eha e kuku aku ana a haawi i kunou aku la i na aliikoa. "Ua makemake keia lede e loaa kona lumi e hoomaha ai mahope iho o keia hele ana mai nei ma keia huakai ana." wahi a Rodolofo i pane aku ai. "E hoomakaukau koke ia mai kana mau mea ai a iloko no oia o kona lumi e paina ai a no'u nei aohe wahi ai ole. E hoouna aku no hoi me ka hakalia ole i kuu kanaka hana e noho mai la iluna o ka waapa i mau mea ai nana." I ka lohe ana o ka mea hookipa i keia mau olelo aole oia i pane aku aka huli ae la oia a nana aku la i na aliikoa ekolu e ku kokoke mai ana me he la e kali aku ana o ka paneia mai o kana mea e hana ai. "Ua lohe mai la oi i ke kauoha a kou Haku," wahi a ke Kapena Belasetina me ka hookoikoi ana iho i kona leo. "e hookipa aku i ka lede iloko o kekahi lumi maikai loa a e hoomakaukau me ka hakalia ole i mau mea ai, a ke manao nei au e noho iho ana kou Haku iwaho nei i loaa ai he manawa e kukai olelo ai me makou." Mahope iho o ke kuhikuhi ana a ka mea hookipa i ka lede ua hele aku la laua, ka mea hookipa mamua o ka lede aku no hoi me HIlda no ka hotele. A e hoomea aku ana o Rodolofo e hele no ka pae oia ka wa i ke'a ia mai ai kona alanui e ua Kapena Belasetina nei. "E ka hoaloha," wahi a ua Kapena nei i pane aku ai ia Rodolofo, "eia ka aina iloko o ka manawa kupilikii, he manawa hoi e nele ole ai ka hoohuoila o ke kanaka, a nolaila aole paha oe e hoohalahala mai ana i na ninau e waihoia aku ana ia oe no ka pane mai i kou kulana a mai kahi hea mai." "Aole ia he mea hoopilikia o ka ninau ana," wahi a ka Emepera. "He kanaka kalepa waiwai au mai Palanipoka mai, i hele aku ai i Tarevis, a pau aku la ka'u hana olaila, a eia au ke huli hoi nei no Palanipoka ma ke ala o Kobilene."

(Aole i pau.)

Makai Kiu

KALOKE HOME

AME KA

Hihia i Huliia me ka Noeau

MOKUNA II.

KE INO O BASEKAVILA.

I ka pau ana o ka Matimea heluhelu ana i ka pepa, opiopi ae la oia a hookomo iho la iloko o ke eke o kona kuka. "O keia iho la na mea i ikeia ma ke akea, e pili ana hoi i ka make an o Sir Kale Basekavila," i pane aku ai o Matimea. "E hoomaikai aku ana wau ia oe," wahi a Kaloke. "no keia mau mea ano nui i pili i keia kumuhana. Ua ike no hoi wau i kekahi mau mea i hoopukaia ma kekahi mau nupepa e pili ana i keia mea hookahi no, eia nae hoi ua lilo loa ko'u noonoo ana ma kekahi mau hana e ae ame ka hana nui a ka Pope i haawi mai ai ia'u. Ua ha 'i mai nei oe o keia manao pepa oia na mea i ike akea ia." "Oia iho la na mea oiaio i ikeia." "Ina pela e haawi mai oe i ka palapala au i heluhelu mai nei," wahi a Kaloke me kona hilinai ana aku ihope o kono noho. "Ma keia haawi ana aku i kau mea i noi mai nei e ha'i pu aku ana wau i kekahi mea i ha'i mua ole ia. O ke kumu o ko'u ha'i ole ana imua o ke koronero i keia mea oia hoi he mea pono ole i kekahi kanaka o ka oihana a'u e lawelawe nei e hui pu aku me ka lehulehu ma ke kakoo ana i na lono hoohuoi i laulahea ae ai apuni. Ke manao nei no hoi wau e like me na mea i hoikeia iloko o ka nupepa. Aole he mea e noho aku ana ma Basekavila ina e hana ole ia ana kekahi hana e hoano hou ae ai i kona inoa i hapalaia e na hana ino o ka wa i hala. No keia mau kumu ua manao wau he mea pono ia'u ke ha'i aku aole e oi aku mamua o ka mea pono, oiai aole he mau kumu a'ū e aua ai a e oiaio ole aku ai hoi.  "O ua kula la i oleloia he kakaikahi loa ka poe e noho nei malaila, a o ka poe e noho kokoke ana kekahi i kekahi ua hiki ole ia lakou ke noho kaawale. No keia kumu i ike nui ai wau i na mea e pili ana no Sir Kale Basekavila. Mawaho ae ona o Mr. Palanikelina o Lafa Hale ame Mr. Sapeletona, ka mea kakau moolelo, o laua nei wale no na kanaka naauao o ia wahi, a he mau mile loihi hoi mai ia wahi aku a hiki i kahi e noho nui ia nei e ka poe i loaa na hoonaauao kupono ana. Ua hoopau o Sir Kale i kana mau hana hui waiwai a ua hookaawale aku oia iaia mai na mea e hoohihia ana i kona mau noonoo, a na kona nawaliwali i hoolauna aku ia maua, a na ka'u oihana hoi i hoopaa iho i ko maua hoaloha. Ua hoi mai oia me kekahi mau mea ano nui e pili ana no Aferika, a he nui na ahiahi a maua i luana like ai a kukai kamailio no na mea e pii ana i ke ola kino o na Bukimana ame na Hotenota. "He mau mahina pokole i hala ae nei ua hoomaka mai wau e ike i ka pii mahuahua mai o ko Sir Kale nawaliwali. Ua heluhelu a ua hoopaanaau iho oia i na mea i palapalaia iloko o kela palapala a'u i heluhelu mua aku nei, oiai iaia e hele holoholo ai iloko o kona pa i ka po aole loa he mea nana e kono aku i kona noonoo e hele holoholo aku mawaho o kona pa hale. Ma keia e ike ai oe, ua maopopo maoli no o Sir Kale i na mea i ha'iia e pili ana i kona ohana a he mea hiki no hoi ia kaua ke ike iho aole no keia he moolelo maikai. O ka noonoo ana no kekahi mea i kau nui loa ia ka weli me he mea la ua paa loa ia mea iloko o kona puuwahi, a he lehulehu na manawa ana i ninau mai ai ia'u ina paha ua lohe aku wau i ka nunulu ilio a aowa ana paha e like me ko ka ilio hahai. O ka ninau hope oia kana e hoomau mai ai i ka ninau ana, a ua hiki ia'u ke ike aku aia ka maka'u nui iluna ona i kona wa e ninau mai ai ia ninau. "Ke hoomanao nei wau ia'u i hiki aku ai i kona hale i kekahi la maluna aku o ko'u kaa, he ekolu paha pule i hala ae nei. Ia wa e ku ana oia ma ka puka. Ua lele iho wau mai ko'u kaa a e ku ana hoi wau imua o kona alo, ia wa i ike aku ai wau i kona nana ana mai maluna o ko'u mau poohiwi a e kau pono ana hoi kona mau maka i kekahi mea a aia no hoi ka maka'u ke halii la maluna o kona helehelena. Ua huli ae la wau a ike lihi aku la i ka nalo ana aku o kekahi holoholona i like ka nui o kona kino me ko ka bibi keiki. Ua nui maoli no kona pihoihoi ame ka maka'u a na ia mea i kono mai ia'u e hele aku e nana pono i keia mea. Ua nele wau i ka ike ana i ua mea la. Eia nae ua lilo loa keia mea i mea nana e noonoo nui ai. Ua noho iho wau me ia ia po, a oia no hoi ka manawa ana i ha'i mai ai i ke ano o kona kulana a waiho mai hoi ma ka'u malama ana i keia palapala a kakou i ke ae nei. Ke ha'i nei wau i keia wahi moolelo no ka mea he mau mea keia e hoaiai iki ana i ka hopena a kakou i ike ae nei, eia nae, ua komo mai ka manao iloko o'u ia manawa he mea ano ole keia a o ka maka'u i loaa aku iaia aole he kahua oiaio no ia mea. "Ma ka'u kauoha i hoomakaukau ai oia no ka hele ana aku no Ladana. Ua ike wau ua pono ole kona noonoo a he pihoihoi mau oia ke ala mai kona mau hoomanao ana i na mea ana i hoopaanaau ai maloko o keia palapala, a malia o keia kekahi mea nana e hoopoino loa mai i kona ola kino o ke taona oia ka mea nana e hoano hou iaia. O keia no hoi ko Mr. Sapeletona manao hookahi, eia nae ua hoea e mai keia hopena. "I ka po o Sir Kale i make ai, ua hoouna ae o Baremoa ia Pekina, ko Sir Kale kahukaa, ia po e kii mai ia'u, a oiai aole wau i hoi aku e moe, ua hoomakaukau koke iho la wau no ka hele ana i hiki aku la wau ma Basekavila he hora mahope o ka loaa ana o kona kino make. Na'u i hooiaio aku i na mea apau i ha'iia ai imua o na koronero. Ua hele wau ma ka meheu o Sir Kale i hele ai, ia po, ua ike wau i kahi ana i ku ai ma ka puka-pa, a mai ia wahi aku ua ike wau i ke anoe o na meheu wawae, koe na meheu o ko Baremoa mau kapuai wawae, a o ka hope loa ua nana iho la wau i ke kino make e waiho ana, oiai aole i hoonioniia i kona wa i loaa aku ai. E huli ana ko Sir Kale alo ilalo, a o kona helehelena ua hiki ole ia'u ke hoomaopopo pono oiai aia kekahi mea nana i hoopowehiwehi mai i ko'u ike a o na mea ia e kau ana  maluna o ka helehelena o ka mea i make. He oiaio aole he mau hoike ua hanaia he hana karaima maluna o kona kino. He hookahi hoike i hewa i ka wa e nienieleia ana keia mea, a na Baremoa i hoike i ua ike la. Ua ha'i ae oia aole he mau meheu e ae ma kahi e waiho ana ke kino make. Ua ike wau i kekahi mau mea ma kahi mamao iki aku a e mau ana no ka mohaha." "He mau kapuai wawae anei?" i ninau aku ai o Kaloke. "Ae, he mau kapuai wawae hou loa." "No ke kane anei a i ole no kekahi wahine paha?" Ua kau aku la na maka o Matimea maluna o kona mau hoa papaleo ma ke ano kunana, a emi iho la kona leo me he mea la e hawanawana mai ana, a puana ae la: "E Mr. Home, he mau meheu wawae no kekahi ilio nui hewahewa!"

MOKUNA III.

KA HANA.

I ka wa i puka aku ai keia mau olelo a Matimea, e like me ia i hoikeia ai ma ka mokua i hala, ua okalakala ae la ko Wakekona lauoho. Ma ke ano hoi o ko Matimea leo, ua hiki ke hoomaopopo ia aku ua kau pu aku ia haawina hookahi maluna ona. No Kaloke hoi, aia oia ke kulou la imua me kona helehelena hiaai o ke kanaka i maa a i hoolilo i kona ola ma ka huli ana i na hihia pohihihi. "O keia anei kau mea i ike ai?" i ninau aku ai o Kaloke.

"Ua ike maopopo wau e like me a'u e ike aku nei ia oe." "Eia nae aole loa oe i hoopuka iki i keia mea?" "Heaha auanei ka waiwai ina wau e hoopuka ana ia mea?" "O ua mau meheu la aia lakou ma kahi o iwakalua i-a mai kahi aku o ke kino make a aole hoi he poe i noonoo e huli aku ma kahi mamao aku mai ke kino make aku. Mai huli ole no paha wau ina aole i loaa mua mai ia'u keia mau mea i hoikeia ma ka palapala a kakou i ike mua ae nei." "Ke ole wau e koho hewa he nui na ilio kiai hipa ma ua kula la," wahi hou a Kaloke. "He oiaio ia eia nae aole keia he ilio kiai hipa." "Ua i mai nei oe he mau moali wawae nunui keia?" "O, he nui anei a kanamai." "Eia nae hoi aole i kokoke aku i kahi i waiho ai o ke kino make?" "Aole." "Heaha ke kulana o ua po la?" "He kawa-u a puanuanu hoi." "Aole paha he ua, ea?" "Aole." "Pehea hoi ke ano o ka nanaina o ke alahele?" "Aia he elua laina laau uliuli e ku ana ma kela ame keia aoao, he umi-kumamalua paha kapuai ke kiekie o keia mau laau. O ke akea o ua alahele la he ewalu kapuai." "Aole he mau mea mawaena o ke alahele ame ua laina laau la?" "Ae he manienie ka mea e ulu nei, he eono paha kapuai ke akea, a e holo ana e like me ka moe ana o ke alahele." "Ua maopopo aku nei wau ma kau mau olelo aia he puka-pa ma ka palena pau o ke alanui?" "Ae, aia malaila he puka-pa uuku e puka aku ai i ke kula." "Aole anei he puka hou aku no mawaho ae o keia?" "Aole.""Nolaila, i mea e hiki ai ke hele aku ma keia alahele, o ka mea e makemake aku ana e hele malaila, o ka hana pono wale no o ka hele aku i ka hale alaila hele aku ma ua alahele la?" "Aia no he puka ma ka hale hoomaha e ku ana ma kekahi wahi mamao aku." "Aole anei i hiki aku o Sir Kale ia wahi?" "Aole; ua waiho iho ia he kanalima i-a mai ia wahi aku." "Ano, e Matimea, e ha'i mai i keia--a o keia no hoi ka mea ano nui--o ka meheu au i ike ai aole ia maluna o ka manienie aka ma ke alahele no?" "Aole he wahi meheu iki iluna o ka manienie." "Aia anei keia ma ka aoao o ka puka-pa e puka ana i ke kula?" "Ae; aia keia mau meheu ma ka'e o ke alahele a ma ka aoao hoi o ua puka-pa la." "Ke hooiaio loa mai nei oe ia'u. Ua loaa aku la ia mea ia'u. Ua paa anei keia puka i ke paniia?" "Ua paniia a ua hoopaaia i ka laka." "Heaha ke kiekie?" "He eha kapuai." "Alaila ua hiki i kekahi mea ke pinana aku maluna?" "Ae." "A heaha na mea i loaa ia oe maluna o ua puka-pa la?" "Aole he mea i loaa ia'u." "Auwe! Aole ka oe i huli ia wahi?" "Ae, ua huli no wau." "A loaa ole iho la no ia ia oe he wahi moali?" "Ua huikau aku a huikau mai. Ma ka hoomaopopo aku ua ku iho o Sir Kale ma ia wahi no umi minute." "Pehea iho la i maopopo ai ia oe?" "No ka mea he elua manawa i haule iho ai ka lehu o kona kika." "Nani kela! E Wakekona, he haumana keia o keia ike i loaa ia kaua. Pehea hoi na meheu?" "O ka'u mau meheu i ike ai oia no ko Sir Kale aole hoi he mau meheu mawaho ae o kona." Pa'i iho la o Kaloke i kona lima iluna o kona uha me kona ano nauki maoli, a puana aku la: "Ina no hoi a owau kekahi malaila. He mea oiaio he hihia ano nui keia, a o kekahi mea hoi i kupono loa na ka poe makaukau maoli no e huli. O keia wahi i hiki ai ia'u ke huli aku ua lilo ae nei i mea ole oiai he loihi ka manawa i hala ae nei, a ua haule iho ka ua a holoi ae i na meheu e kau ana ma na wahi la. O, e Kauka Matimea, he mea anoe loa kou hele ana mai ia'u i keia manawa. No keaha la oe i kii mua ole mai ai ia'u? He oiaio o oe ka mea nana e wehe ae i ke pohihihi o keia mea." "Ua hiki ole ia'u ke kii mai ia oe, me ko'u hoike ole aku i keia mau mea imua o ke akua, a oiai ua hai mua aku nei wau ia oe i na kumu. Mawaho, mawaho-------" "Heaha kou mea e kunana nei?" "No ka mea aia kekahi mea ano pohihihi loa e hiki ole ai i kekahi makai-kiu naauao loa ke loaa aku ka hopena." "Alaila o kou manao he mea hookalakupua a uhane hoi keia?" "Aole wau i olelo aku nei oia." "Pela io no; eia nae o ke ano ia o kou manao." "Mai ka wa o keia mea i hanaia ai a hiki wale i keia wa, ua nui na mea a'u i lohe ai e hiki ole ai hoi ke ikeia aku me keia mau ike i loaa mai ia kakou ke kanaka." "Na kumu oia hoi?" "Ua lohe wau mamua o ke ala ana mai o keia mea i ka olelo a kekahi poe ua ike lakou i kekahi mea kino ma ua kula la i ano like aku me ke diablo o Basekavila, a ma ka hoomaopopo aku aole ia he holoholona i ikea ma na ike o ka honua nei. Ua kulike ka lakou mau hoike e hoike ana he holoholona nui maoli no i ka hoomaka'uka'u. Ua nienieleia e a'u keia poe, he hookahi o lakou he poo paakiki, o kekahi he kauka lio, a o kekahi he mahiai, a ua like a like ka lakou mau hoike e kulike ana hoi me ka ilio i hoikeia ma ka moolelo a kakou i ike iho nei. Ke ha'i aku nei wau ia olua, ke kau nei ka weli ma keia kula, a aole hoi he poe e hele nei malaila i ka po." "A o oe hoi, he kanaka i hoonaauaoia ma na ike hohonu, ke manaoio nei oe he uhane keia mea?" "Ua maopopo ole ia'u ka'u mea e manaoio ai." Ku'eku'e ae la o Kaloke i kona mau poohiwi, a pane aku la; "Mai kinohi mai ua hoolilo wau i ko'u mau la ma ka huli ana i na mea o keia ao. Ma kekahi olelo ana ae, ua paio aku wau me na mea ponoole, aka o ka noonoo pu ana i ka Makua o na Diabolo, he hana hiki ole ia ke lawe mai a hoopili me na mea o keia ao a ke kanaka i hiki ai ke hana. Nolaila, he mea pono ia oe ke hooia mai o keia mau meheu he mau meheu maoli no." "O ka ilio mua i ikeia ai he ilio maoli no oia ua nahuia ka puu o ke kanaka, eia nae ua like no kona weli e like me keia." "Ke ike aku la wau ke kaa aku nei oe ma ka aoao o a poe i manaoio i na uhane diabolo. Aka, e Matimea, e ha'i mai ia'u i keia. Ina oia iho la na noonoo ana iloko ou, heaha kou mea i hele mai ai e hui pu me a'u. Ua ha'i mai nei oe he mea makehewa ka iini ana aku no ko Sir Kale mae ana, eia nae ke makemake nei oe e huli aku wau." "Aole wau i olelo aku ia oe ke makemake nei wau e huli aku oe?" "Alaila, pehea iho la e hiki ai ia'u ke kokua aku ia oe?" "Ma kou ha'i ana mai ia'u heaha la ka'u e hana aku ai no Sir Hanale Basekavila, ka mea e hiki ae ana ma ke kahua Hoolulu o Watatu"--Nana iho la o Kauka Matimea i kana uwaki--"he hookahi hora me ka hapa o kona hoea mai no ia." "Oia ka hooilina o Basekavila." "Ae. I ka make ana o Sir Kale, ua huli aku makou i keia opio, a loaa ia makou he mahiai kana hana na Canada. Mai na mea i loaa mai he opio maikai keia. Ke kamailio aku nei wau i keia manawa aole ma ke ano he kauka, aka ma ke ano he kahu waiwai a he mea hooko hoi i ka Sir Kale palapala hooilina." "Alaila aole he mau hooiina e ae?" (Aole i pau.)