Ka Nupepa Kuokoa, Volume XLI, Number 51, 18 December 1903 — Page 2
| This text was transcribed by: | Kawena Komeiji |
| This work is dedicated to: | Kapukini Ching |
NUPEPA KUOKOA, DEKEMABA 18, 1903.
KA NUPEPA KUOKOA
-----
No ka Makahiki - - $2.00
No Eono Mahina - - 1.00
------
SUBSCRIPTION RATES.
One Year.....$2.00
Six months.....1.00
O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA. E MOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.
O na Dala apau o ka Pepa nei e hoouna pololei i ka HAWAIIAN GAZETTE COMPANY.
HOOPUKAIA E KA
HAWAIIAN GAZETTE CO.
Hookomoia ma ka Hale Leka o Honolulu Panalaau o Hawaii, ma ke ano mea o ka Papa Elua.
DAVID L. A-I Lunahooponopono
A. W. PEARSON, LUNA NUI
Honolulu, Oahu
POALIMA : : DEKEMABA 18, 1903.
KE ALOHA MAKAHIKI HOU NO HAWAII.
-----
O ka meahou e puka aku nei ma keia helu o ke Kuokoa e pili ana i ka haawi aloha makahiki hou a Amerika Huipuia i na aina naauao apau o ka honua nei mai ke kahua kilo hoku mai o na aumokukaua moana o Amerika ma Wasinetona, maloko o na uwea moe moana, oia kekahi mea hoohikilele manao i o kakou nei no ka mea o Hawaii nei kekahi e haawi aloha makahiki hou ia mai ana.
E like me ia i hoalaiia mai ai kakou, aia i ka manawa hope loa o ka hanu ana o keia makahiki oia no ka manawa e panaiia mai ai ua aloha makahiki hou nei o Amerika Huipuia i na aina a puni ka honua - o ka papa no nae o ke kulana malamalama, alaila wahi a ka hoike manao e hiki aku no ua aloha la iloko o ka hapauuku loa o ke kekona mahope iho o ka manawa e hoounaia mai ai.
He haawina keia i hanaia e Amerika i ka makahiki i hala a ua ikeia ka oiaio ame kona hui aloha ana me na aina malamalama i hui aloha me ia ia manawa a o ko kakou hui ana me na aina naauao i komoia e na uwea moe moana e lohe mau nei kakou i na meahou mailoko mai o lakou, e puka mau aku nei no hoi, ua lawa io ia no ka hoala manao ana ia Hawaii Teritori i ka hoea io mai o keia haawina o ke aloha makahiki hou i ka manawa e make ai keia makahiki a hoea mai ka makahiki hou no ka manawa mua loa.
O keia haawina aloha makahiki hou e loaa mai ana ia Hawaii nei maloko o ka uwea iloko o ka manawa pokole loa i like loa me kekahi mau makamaka e haawi aloha ana oiai laua e ku ana he alo a he alo, oia kekahi o na haawina ano hou loa i loaa ia Hawaii no ka manawa mua loa, a e palapalaia ai ma kona moolelo.
Eia nae, aole i pau pono loa na hooponopono i ka hanaia, a aia a loheia aku ka hui lokahi mai o na aupuni naauao i nohoia e ka malamalama e like me Hawaii e ku nei i keia la a i na makahiki i komoia mai e ka malamalama o ka Euanelio, alaila e loaa ai ia kakou ka hoopaa loa ana iho o ka noonoo no ka hiki io mai o ia nuhou i o kakou nei.
Me he la i ka nana aku, e like me ka makaukau i loaa ia Hawaii i keia manawa aole e nele ka hiki iaia ke panai aloha makahiki hou aku i na aina naauao e ae oiai aia ka uwea moe moana me kakou kahi e hiki ai i ka Teritori ke panai aku no na aina i komoia e keia ano telegarapa.
O ka hiki ana ia Amerika ma Wasinetona ke hana i keia haawina kamahao ke hui lokahi mai na aina e ae ma keia mau hoolala ana alaila, o ka hiki no ia ia Hawaii ke panai aloha aku e like me ka makou i puana mua ae nei, oiai ke manaoio nei makou e panai aloha ae ana no na aina e ae i ka lakou aloha ia Amerika Huipuia.
Ma ka houluulu ana i na mea apau o ke kulana malamalama i loaa i loko o Hawaii nei i keia manawa ua kau maoli kakou i na anuu kiekie loa, a aia a hiki ka hora 6:30 p. m. o ke ahiahi o ka la 31 o Dekemaba nei e oiaio ai ke kumuhana.
-----
UA MAKAUKAU ME NA BONA.
-----
I keia manawa me he mea la i ka nana aku ua makaukau ae nei na luna aupuni kalana me na bona a puni ka Paeaina, a ke ku iho a nana maluna o keia ninau aole e hoohewahewa ke kanaka i ka ike iho i ka holomua e no o na moho Repubalika mamuli o ka makaukau e ana o ka lakou mau bona.
He like ole keia me na moho Home Rula no ka mea aole i liuliu e ia mau moho no lakou iho ma kela mahele (bona), a ke Kuokoa e manao nei ina no i huli mua ia kahi e manaolana ai no ka hoopaa mua mai i ka loaa io o na bona, ina no aole e loaa ke kulana ho-a-a ia lakou i na la mahope iho o ke kau koho balota.
Ma ka aoao o na luna aupuni kalana Home Rula he mea maopopo loa i ka nele io o kekahi poe o lakou me na bona, eia nae, aole lakou i emi iho aka ua nee aku no, no ka hooikaika ana e loaa ka bona a mahope o ka holo ho-a-a ana ua hiki aku la lakou i kahi i loaa ai na bona, pela ka lonoia mai.
Aia a hiki mai ka manawa e hookoia ai ke ku io o na aupuni kalana apuni ka Paeaina oia no ka manawa nana e hooalaiia ae i ka lehulehu i ka makaukau io ma ia haawina.
Aole me keia ke kulana o na moho Repubalika, oiai aole i nele ka loaa o ka ike i ka lehulehu, i ka pu-a leo nui ole ae i ka ho-a-a o kekahi o lakou, a hiki wale i keia manawa ua loaa o ka manao i ka lehulehu ua makaukau e lakou me na bona.
Alaila, i ka houluulu ana i na mea apau e pili ana i keia kumahana aole e nele ka piha pono o ke kaona o ke poomanao o keia kinomanao.
Ma ka hookuku ana maluna o keia kumuhana iwaena o na moho lanakila o na aoao kalaiaina o kakou nei, aole e nele ka loaa o ka ike i ke kanaka i ka like ole o na aoao kalaiaina - oia hoi, o ka makaukau io o na moho Repubalika i lanakila, o ia makaukau no ka mea nana e hoike ae i ke kulana makaukau o ka aoao Repubalika.
Ke manao nei makou a ua hiki no ke puana ae me ke komo lokahi mai o ka lehulehu ma ia manao hookahi, oia hoi, he aoao kalaiaina makaukau io no ka Repubalika a ke holopapa nei kona ikaika apuni ka Paeaina. A ua maopopo pu no hoi ia @ lehulehu, aia iloko o laila ka poe ulakolako maoli o ka aina a o ka poe ma ka oihana hoowaiwai aina, aia @ o iloko olaila.
Alaila o na moho a ka aoao e koho ai a hana paha i manaoia e hooholoia aole e nele ke kakoo mai o keia mau lima akau o ua aoao nei ke kumu no a kakou e ike mau nei i ka hele ikaika mau o na hoohana ana ma na kahua hakoko koho balota a ma na mea pili aupuni.
O ka makaukau ole o na Home Rula ka mea nana e hoike ae i ka makaukau ole o ia aoao kalaiaina, ke kumu i holo pu-a-a iho nei, eia nae iloko o ka hooikaika nui ana ua loaa aku no kahi pono a ua maikai ia loaa ana e like me na lono. O keia mau haawina i hoike ia ae la oia ka makou i makemake ai e hooaiai aku i ka lehulehu i loaa ai ia kakou kekahi ike no ka nui ikaika o na aoao kalaiaina e ku nei.
-----
Na Hana o ka Aha Hookolokolo Federala.
-----
Ma ka loaa ana mai o ke Komikina o ka Lunakanawai S. B. Dole no ka noho Lunakanawai ana ma kahi o Lunakanawai Estee i make ua ikeia he eono makahiki ka nui o kona manawa e noho ai ma ia wahi o ka oihana.
Ma ka manawa i loaa mai ai ia komikina oia no ka manawa i hoopaaia ae ai ka hana iloko o ka lima o ka Lunakanawai Dole ma ka hoopaa ana iloko o ka hoohiki i hookoia ae e Lunakanawai Kiekie Frear imua o ka Aha Hookolokolo Amerika i ka Poakahi nei.
Ua hoomaka ke komikina i ka la 23 o Novemaba, 1903, a e mau aku ana a hiki i ka piha ana o eono makahiki.
O ka hihia o Solomona Meheula, ma o kona loio la ua waiho aku oia he hoohalahala no ke kumu hoopii e pili ana i ka hoopoinoia ana i na hoike lilo o ka Hale o na Lunamakaainana o ka Teritori o Hawaii.
Ua hoike ae ka Loio Akepoka i ka pili ole loa o keia kumu hoopii i ka mea i hoopiiia, no ka mea, wahi a ka loio o ka mea i hoopiiia aole oia he luna aupuni no Amerika Huipuia i ka manawa i hoikeia iloko o ka hoopii ke kumu hoi i ku-e ole ai i na kanawai o Amerika a o na hoike lilo i hoikeia ae nei o ka hale o na Lunamakaainana aole lakou he mau waiwai no kekahi keena oihana o Amerika Huipuia e kuleana ai ka uha'iia o ke kanawai o Amerika Huipuia.
-----
Ke Karisimaka ma ka Luakini o Kawaiahao.
-----
Ma ka hoiaiia ana aku e ke Kuokoa o ka pule i hala no ka malama ana i na hana hoomanao o ka la Kalikimaka i ka la 17, oia hoi o nehinei, ua ikeia aole oia ka manawa o na hana, oiai ua hoololi hou ia oia keia ahiahi i ka hora 7:30
Ua konoia na mea apau e hui pu ae i keia hana maikai, ua manaoia e piha ana me ka ohohia nui. He hana mau keia i ke Kula Sabati o Kawaiahao i na makahiki apau, a pela no e malamaia ai i keia ahiahi, a o ka papa-kuhikuhi malalo iho na hana o ka la.
: : : PAPA KUHIKUHI : : :
INSTRUMENTAL DUET - "The Petrel's Cry".....D. K. NAONE, D. NAPE
PRAYER -.....REV. H. H. PARKER
HELUHELU KIKE - "Luka 2; 8-20,".....NA MEA A PAU
Kahu - Aia i kela aina he mau Kahuhipa e noho ana i ke kula a e kiai ana i ka lakou mau poe hipa i ka po.
Kula - Aia hoi! Kau mai la ka Anela o ka Haku i o lakou la a hoomalamalama mai la ka nani o ka Haku ia lakou a puni, a maka'u iho la lakou.
Kahu - A olelo mai la ka Anela ia lakou, "Mai maka'u oukou, no ka mea, eia hoi ke ha'i aku nei au ia oukou i ka mea maikai e olioli nui ai e lilo ana no na kanaka a pau.
Kula - "No ka mea, i keia la i hanau ai me ke kulanakauhale o Davida, he Ole no oukou, oia ka Mesia ka Haku.
Kahu - "Eia hoi ka hoailona no oukou, e loaa auanei ia oukou ke keiki ua wa-hiia i ke kapa keiki, e moe ana ma kahi hanai holoholona."
Kula - A emo ole mai la ka lehulehu o ka puali o ka lani me ua Anela la, e hoole'a ana i ke Akua, e olelo ana:
Kahu - "E hoonaniia ke Akua ma na lani kiekie loa, a he malu hoi ma ka honua, he aloha i kanaka."
Kula - Eia hoi kekahi, a hoi aku la na Anela i ka lani mai o lakou aku, olelo iho la ua mau kanaka kiai hipa la kekahi i kekahi. Ea, e hele kakou i Betelehema e ike aku hoi ia mea a ka Haku i hoike mai nei ia kakou.
Kahu - Haele wikiwiki aku la lakou, a ike iho la ia Maria ame Iosepa ame ke keiki e moe ana ma kahi hanai holoholona.
Kula - A ike lakou, hoolaha aku la lakou i ka olelo i ha'iia mai ia lakou no ia keiki.
Kahu - A o ka poe i lohe a pau, mahalo iho la lakou no na mea i ha'iia aku e ka poe Kahuhipa.
Kula - Kaohi iho la o Maria ia mau mea a pau me ka hoomanao iho iloko o kona naau.
Kahu - A hoi mai la na Kahuhipa me ka hoonani a me ka hoole'a i ke Akua no ia mau mea a pau a lakou i lohe ai a i ike ai hoi, e like me ka mea i ha'iia mai ia lakou.
SONG - "Hoku Ao Nani 206,".....BY ALL
SONG - "O Little Town of Bethlehem".....KAWAIAHAO CHOIR
RECITATION AND SONG - "Angels Song".....PRIMARY DEPARTMENT
SOPRANO SOLO - "Consider the Lilies".....MISS L. KAWAINUI
RECITATION - "White Shepherds".....MISS HANAMAIKAI
SONG - "Holy Night".....KAIULANI HOME
EXERCISE - "Glad in the Light".....PRIMARY CLASS
SONG - "Away in a Manger".....INFANY CLASS
RECITATION - "The Best Gift of All".....EMILY NUUHIWA
VOCAL DUET - "Arise, Shine, for Thy Light is Come".....MISS J. KELIIAA AND MISS L. KAWAINUI
EXERCISE - "The Shepherds".....JUNIOR CLASS
TRIO - "Night is Waning".....MOSES HANAMAIKAI, KAMAKAWIWOOLE, KAANAANA
SONG - "I Think When I Read," TWELVE LITTLE GIRLS OF KAWAIAHAO SEMINARY
ANTHEM - "Grand Christmas,".....KAWAIAHAO CHOIR
CHRISTMAS TREE.
O Kuhio ma ko Peresidena Rusevela Manao Ana.
-----
HIKI PONOOLE IAIA KE HOOPUKA I KA INOA "KALANIANAOLE."
Ma ka nupepa Atlanta Journal i loaa iho ai keia manao e kau ae la maluna, a oia ka makou e lawe mai nei a hoike aku i na Hawaii.
O kekahi mea hou ano nui loa iloko o ka Ahaolelo i keia mau la oia no ka elele mai Hawaii mai, Keikialii Kupida. O kona inoa pololei o Keikialii Jonah Kuhio Kalanianaole. O kela inoa "Kupida" e kau nei maluna ona oia ka inoa kapakapa i loaa aku iaia oiai oia e hele ana i ke kula ma Kapalakiko, a i keia manawa e lilo ana kekahi inoa ona no ka hiki ole i ka Peresidena ke hoopuka i ua inoa la. E ikeia aku ana oia ma keia mua aku ma ka inoa Mr. Kuhio.
Ma na wahi apau a Mr. Kuhio e hele ai aia pu me ia kana kakauolelo. He kakauolelo kekahi nona ponoi, a he nui na mea e ae e noho nei me ia. He maikai kona komo ana i kona mau aahu, a he milolii hoi kona lauoho ame kona umiumi. Ua aneane aku kona kiekie i ka 6 kapuai a he kino puipui maikai kona o ke kanaka hooikaika kino. He hauli ko Mr. Kuhio helehelena, a ma na wahi ana e hele ae ai e manaoia aku ana e ka poe e ike ana iaia he kanaka waiwai no Mekiko. He komo mau oia i kona leia-i ulaula.
I kekahi manawa i hala ae nei, ua hele aku o Mr. Haywood, he kanikela Amerika ma Hawaii mamaua a i keia manawa hoi he agena no ka poe mahiko, e hui me ka Peresidena no ka hoomakaukau ana i kekahi ike mawaena o ka Peresidena ame ka Elele Hawaii.
"Aole wau e kapa aku ana iaia o Keikialii Kupida," wahi a Peresidena Rusawela i pane aku ai, "a aole hoi i hiki ia'u ke puana aku i kona inoa hope. Aole e hiki ana ia'u ke hoomanao iho i ua inoa la. Aole anei he mea hiki ia kakou ke oki iho i ua inoa la i hiki ai ia'u ke hoomanao?"
Hoi aku la o Mr. Haywood a kuka iho la me ke Keikialii, a mahope o ke kuai ana no kekahi manawa loihi ua hooholo like iho la laua i ka mea hiki oia hoi "Mr. Kuhio." Hoi hou aku la o Mr. Haywood i ka Hale Keokeo me keia inoa a ha'i aku la i ka Peresidena, a oia hoi kana i apono mai ai a oia aku ana ka inoa e kapaia aku ai a e hoounaia aku ai na palapala kukai ma keia mua aku i ka Elele Hawaii.
Aole i loaa ka mana koho i ka Elele Hawaii, aka ua loaa iaia ka mana e kamailio maluna o kekahi kumuhana. O kona mua, oia no hoi ka Elele Hawaii Wilikoki, i make koke iho nei, oia kekahi o na kanaka kakaolelo naauao, aka ua oleloia ae o Mr. Kuhio aole i loaa ia makaukau iaia.
-----
Ua Pupule io no o Jones.
-----
O ka huli noeau ana o Kauka W. H. Mays maluna o ka ninau i ulu mai no E. M. Jones kulana pupule, ke kanaka hoi e ku nei imua o ka Aha Hookolokolo no kona hihia ano nui no ka hewa pepehikanaka maluna o ke kino o Mrs. Sarah Parmenter ua hoikeia aku ka haina iloko o ka Aha a Lunakanawai Gear i ka Poalua nei.
Mahope iho o ka heluheluia ana mai o ka ninau loihi imua o ka hoike, ke Kauka W. H. Mays, he ninau hoi ona i ninauia ai i ka la iho mamua a i ka pau ana ua ha'i koke aku la ke Kauka i ka pane o ka ninau mahope koke iho no o ka pau ana o ka hopunaolelo hope, e hoike ana ua pupule io no o E. M. Jones.
Ma ka aoao o ke aupuni aole i hookuha'u iho i ka nowele hou ana i na mea no apau e pili ana i keia kulana pupule o ke kanaka e like me ka hoohaili hou ia ana mai o ka ninau i ka hana a ka mea i hoopiiia oia hoi ka hoopiha hou ana i ka pu.
Mamua o ka hookuu ana o ka hana no ia manawa ua ninaninauia iho o Mrs. Marcus Parmenter Hope Ilamuku Kiliniwoki, Kapena Paka ame C. W. Akepoka.
-----
Hoi Hou mai na Mano i ka I'ahamauleo.
-----
Ma ka hoike a na kanaka maa i ka hooholoholo mokukikahi ma na kaiaulu o Ewa eia ke hoi hou mai nei na manao, honu ame na hihimanu iloko o ke awa o Puuloa ka I'ahamauleo.
Ma ka manawa e hoohanaia ana na mea eli awakumoku iloko o ke awa o Puuloa i na manawa i hala iho la i hohonu kupono ai ia awa no na moku nunui e mo-ku ai iloko o laila, ua hiki loa ke hoomaopopoia i ka nalowale loa ana o na honu i ka nee malie iloko o ia mau kai, a o na mano hoi ua nalowale aku ko lakou nanaina hoomaka'uka'u, a o na hihimanu hoi ma ka ilikai hoi e hookikahakaha ai.
O kekahi mea nana i hoomalele aku paha i keia mau i'a o ke kai oia no ka malele ana aku o na pupu kaulana o keia awa ma keia kuehuia ana iho nei, oiai aole i nele ko lakou hu'e pu ia ana mai me na pohaku o ke kai i ka manawa e eliia ana.
He mau pule aku nei i hala ua ikeia ae la na mano e hookikakaha ana i ka ili o ke kai ke kumu hoi i holo pu-a-a ai na i'a liilii. Aole no hoi i liuliu loa ua ikeia iho la na hihimanu iloko o ke awa a hala kekahi manawa a nee ana na honu. Ma keia mau mea ua ulu hou ae na manao uilani i ka poe i maa i ka hooloulou ana i na i'a i paani lealea na lakou no ka hoohala manawa ana.
-----
MOKUKAUA HOLO LOA.
GLASGOW, Dec. 7 - Ma ka hoaoia ana o ka mokukaua Libertad, oia no hoi ka mokukaua a Pelekane i kuai ai mai ke Aupuni o Cile, ua ikeia oia ka mokukaua holo loa i hoolanaia. Ma kona hoaoia ana mai nei ua hiki aku kona holo i ka 20.3 noka o ka hora. Ma Pelekane no kona wahi i hanaia ai.
HOOLAHA HUI I HOOHUIIA.
-----
O na mea no laua na inoa pakahi malalo iho e noho nei iloko o Honolulu ua hui ae nei laua ma ke ano hui no ka lawelawe ana i ka oihana loio malalo o ka inoa hui o Castle & Whithington, a o ko laua keena hana aia ma ke alanui Kalepa ma kahi aoao mai o ka Haleleta iloko o Honolulu.
WILLIAM R. CASTLE,
DAVID L. WITHINGTON.
2994 - Dec. 18, 25.
HOOLAHA HOOKO MORAKI.
HOOLAHA MANAO PANIKU A KUAI A KA MEA PAA MORAKI.
-----
HAWAII LAND COMPANY.
Ma keia ke haawiia akunei ka hoolaha i kulike ai me ke kanawai a ma ka pono o ka mana kuai i hanaia iloko o kekahi moraki i hanaia e ka Hawaii Land Company, Limited, he Hui Hawaii ia Peter C. Jones, Limited, he hui o ia ano like, i hanaia i ka la ekahi (1) o Novemaba, 1899, a i kakau kope ia iloko o ke Keena Kakau Kope Aina o ke Aupuni iloko o Honolulu, Teritori o Hawaii, iloko o ka buke helu 196, aoao 454 a hiki i ka 458, o Peter C. Jones Limited, i oleloia, ka Mea Paa Moraki, ke manao nei e paniku i ka moraki i oleloia no na kumu i hoikeia e olelo ana o ka uku ole ia o ke kumupaa ame ka uku-panee i ka manawa e uku ai.
Ma keia ke haawi pu ia aku nei no hoi ka hoolaha o na aina pakahi apau loa ame na pahale apau loa i hoopaaia maloko o ka moraki i oleloia i hoakakaia iloko olaila a e hoakakaia nei malalo iho, ame na hana hou maluna o na aina i oleloia e kuai kudalaia aku ana ma ke akea e ka Mea Paa Moraki i oleloia ma ke keena kudala o James F. Morgan iloko o Honolulu i oleloia, ma ka Poaono, ka la eiwa (9) o Ianuari, 1904, ma ka hora 12 awakea o ua la la i oleloia.
O ka waiwai apau loa i hoopaaia maloko o ua moraki nei i oleloia a i manaoia e kuai kudala ia e like me ia i olelo mua ia ae nei oia no na aina apau i hoakakaia malalo iho nei ma na apana, mahele, ame na palapala hoolimalima o na aina e waiho ia a iloko o Honolulu, Mokupuni o Oahu, iloko o ka Teritori i oleloia oia keia malalo iho nei: WAIWAI PAA.
O kela mau apana e waiho ia ma Kapalama, Honolulu, a ike maopopo loa ia hoi na Apana Helu Akahi (1) a hiki i ka Helu Elima (5), pau pu me ka apana helu elima, iloko o keia mau aina i ikeia na Apana o Kalaehao, a o lakou no hoi na hapa o kela mau aina i hoakakaia iloko o ka Palapala Sila Nui Helu 692, L. C. A. Helu 1283, a o lakou no hoi na aina i hooliloia i ka Hawaii Land Company, i oleloia ma ka ka Palapala Kuai Aina a W. C. Achi, i hanaia ma ka la iwakalua (20) o Aperila, 1899, a i kakau kope ia iloko o ka Buke helu 191, aoao 352.
NA HOOLIMALIMA.
(a) Palapala Hoolimalima o J. F. Colburn ia Akana, i hanaia i ka la kanakolu (30) o Sepatemaba, 1897. Ua kakau kope ia ka Palapala Hoolimalima iloko o ke Keena Kakau Kope Aina, Honolulu, iloko o ka Buke helu 202, aoao 94, nona keia mau aina malalo iho nei e waiho la i Kapuukolo, Honolulu: Akahi: 41-100 o ka eka ma ke Alanui Moi i hoakakaia iloko o ka palapala Sila Nui Helu 1646, L. C. A. Helu 670; Elua: 90 anaana kuea i hoakakaia iloko o ka Palapala Sila Nui Helu 7593, L. C. A. Helu 2944, (i hooliloia ia J. F. Colburn ma ka palapala kuai aina o P. F. Manini, i kakau kope ia iloko o ka buke 85, aoao 52-53); Akolu: 50 anana kuea ame 25 kapuai kuea o ka aina i hoakakaia iloko o ka Palapala Sila Nui helu 1910, L. C. A. 151, (i hooliloia ia J. F. Colburn i oleloia ma ka palapala kuai aina a Kama i kakau kope ia iloko o ka Buke Helu 133, aoao 224-225). Manawa Hoolimalima: He 25 makahiki mai ka la ekahi (1) aku o Okatoba, 1897, no ka ukuhoolimalima o $3,000 no ka makahiki hookahi.)
(b) Palapala Hoolimalima o W. R. Castle, Mea Hooko, ia J. F. Colburn, i hanaia i ka la 31 o Iulai, 1890, i kakau kope ia iloko o ka Buke Helu 128, aoao 136-138. (Oia no hoi ka Hoolimalima o ka pahale ma ka aoao Komohana o ke Alanui Maunakea, Honolulu, i hoakakaia iloko o ka Palapala Sila Nui Helu 2096, L. C. A. Helu 46. Manawa Hoolimalima: 20 makahiki mai ka la ekahi (1) mai o Augate, 1890, "ke mau ke ole o ke keiki hope loa a J. R. Williams." Ukuhoolimalima, $35 no ka mahina hookahi.)
(d) Palapala Hoolimalima o Cecil Brown ia J. F. Colburn, i hanaia i ka la 28 o Sepatemaba, 1897, (i kakau kope ia iloko o ka Buke Helu 202, aoao 90, 3-100 o ka eka o ka aina e waiho la i Kapuukolo, Honolulu, i hoakakaia iloko o ka Palapala Sila Nui helu 1986, L. C. A. Helu 1039. Manawa Hoolimalima: 25 makahiki mai ka la ekahi (1) o Okatoba, 1897, no ka uku hoolimalima o $120 o ka makahiki hookahi.)
(f) Palapala Hoolimalima a C. Afong ia J. F. Colburn i hanaia i ka la eha (4) o Iune, 1886. (Kakau kope ia iloko o ka Buke Helu 99, aoao 313, apana o ka aina ma ke kihi o na alanui Moi ame Maunakea, Honolulu, oia no hoi ka aina apau loa i hoakakaia iloko o ka Palapala Kuai Aina ia C. Afong, i kakau kope ia iloko o ka Buke Helu 49, aoao 1 ame 2. Manawa Hoolimalima: 20 makahiki mai ka la ekahi (1) mai o Iulai, 1886, no $20 ukuhoolimalima no ka mahina hookahi.)
O na Palapala Hoolimalima i oleloia (b), (d) ame (f), ua haawiia aku e J. F. Colburn ia Akana ma kekahi palapala i hanaia i ka la 30 o Sepatemaba, 1897, a i kakau kope ia iloko o ka Buke Helu 202, aoao 92, a o ua mau hoolimalima nei i oleloia (pau pu me ka palapala hoolimalima (a) i oleloia) ua haawiia aku e Akana i oleloia i ka Hawaii Land Company, Limited, i oleloia ma kekahi palapala i hanaia i ka la 31 o Okatoba, 1899, a kakau kope ia iloko o ka Buke Helu 193, aoao 469-470.
O ke kulana o ke kuai: Ma ke Dala Kuike ka makemake a ma ke dala gula Amerika no hoi, a ma ka aoao o ka mea kuai mai na lilo palapala kuai apau.
No na mea aku i koe e ike ae ia Peter C. Jones, Esq., a i ole ia Smith & Lewis, na Loio o ka Mea Paa Moraki, Judd Building (Hale). Honolulu.
Hanaia ma Honolulu, Novemaba 27, 1903.
PETER C. JONES. LIMITED.
Mea Paa Moraki
2992 - Dec. 4, 11, 18, 25 - Jan. 1, '04.
AOLE HE MEA PONO e paani wale i ke kunu ino. Aole he mea i maopopo i ka hopena e loaa mai ana. O ka numonia, eha ma ke poo me ke kahe o ka hupe, hanapilo ame ke akepau oia no na ano like ole e loaa mai ana ma o ke anu, kunu ame ka wela, a aole he lua e like ai me ka Chamberlain's Cough Remedy. He oiaio he oia no a he oia hikiwawe hoi. O Benson, Smith & Co., Ltd., oia na Agena nana e kuai mai.
HOOLAHA KUMAU.
LEWERS & COOKE
LUI AME KUKE, Kaupaleaala
Na Mea Hookomo mai a Kuai aku
i na
LAKO HANA HALE
O Kela ame Kena Ano,
Malaila e loaa ai na mea malalo iho!
NA PAPA N. W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA, NA ANIANI, NA PAPA HALE, PALE PUKA ANIANI, MOENA, ETC.
O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
Hui Alahao ame Aina o Oahu
MANAWA HOLO
Mei 1, 1903.
MAI HONOLULU AKU
No Waianae, Waialua, Kahuku ame na wahi hooulu ma ke alahao - *9:15 a.m., *3:30 p.m.
No Pearl City, Ewa Mill, a me na wahi hoolulu ma ke alahao - 7:30 a.m., *9:15 a.m., *11:05 a.m., *8:15 p.m., *3:20 p.m., 4:15 p.m., *5:15 p.m., 9:30 p.m., 11:15 p.m.
MAI WAHO MAI.
Ku i Honolulu mai Kahuku, Waialua, ame Waianae mai *1:35 a.m., *5:31 p.m.
Ku i Honolulu mai Ewa Mill ame Pearl City mai - 6:50 a.m., 7:45 a.m., *8:36 a.m., *10:38 a.m., *2:05 p.m., *4:31 p.m., *5:31 p.m., 7:40 p.m.
*5:31 p.m., *7:40 p.m.
*Kela ame keia la.
Sabati wale no.
Koe ke Sabati.
G. P. DENISON, Lunahoohana.
F. C. SMITH, G. P. & T. A.
Kakela me Kuke
[KAUPALENAIA]
Poe Kalepa ma ke Komisina
: : A HE : :
POE LAWELAWE KOPAA
-----
Poe Agena no na Mahiko Lehulehu
KAUKA T. MITAMURA
Alanui Kukui Ololi Helu 63, Honolulu.
Na Hora Hana: Hora 8 & 10 kakahiaka; hora 1 a 3ame hora 6 a.m. 8:00 p.m. Sabati; Hora 6 a 8 p.m.
Telepone Blue 2366 P. O. Box 342
He Huaale Maikai
Aole he like o na Huaale a Ayers" me na huaale e ae no ka mea he mau huaale kokua keia i ka hana a na naau, a he laau hoomaha maikai loa hoi. Ina he paa kou hanalepo o na "Huaale a Ayers" ka laau e hemo maikai ai, a e hemo maikai mau ana hoi mahope aku oia manawa.
Aole loa he hiki i kekahi kanaka ke olelo ae he maikai kona oia kino ina aole he hemo o kona hanalepo he hookahi manawa o ka la, a oi aku paha. Ina i maopopo keia kanawai o ke ola i na kanaka apau, aole loa e like ka nui o ka poe ma'i me ka mea e ike ia nei i keia mau la.
Ua hana ia owaho me ke kopaa he maikai loa ka lawe ana.
Aohe mau Huaale i oi ae ka maikai mamua o na "Huaale a Ayers"
Hoomakaukau ia e Kauka J. C. Ayer & Company. Lowell, Mass., U. S. A.
E loaa no keia mau Huaale ma ka Hale Kuai Laau o Hollister, alanui Papu.