Ka Nupepa Kuokoa, Volume XLI, Number 49, 4 December 1903 — Okaikai na Awa o Kona. [ARTICLE]

Okaikai na Awa o Kona.

Ma ke kakahiaka nui o ka Poalua nei i ku mai ai ka mokuahi Mauna Loa mai kona mau awa o Hawaii ame Maui. Ua hoike ae o Kupakako Conkling o ka huakai aku nei mai nei aku oia kekahi o na huakai maikai i ikeia, a ua mau ia maikai a hiki wale i ke ku ana o ka moku ma Kau. Wahi ana ua lana maikai ke kai ia lakou ma Kau a aole i loaa mai na pilikia oiai ka moku e hooili ukana ana. I ka huli hoi ana mai o ka moku ua hoomaka mai la e halawai me na hoailona o ke okaikai, a ma ke awa o Hoopuina i hoomaka ai ke kupilikii o ka hooili ukana ana. Me ka nui o ka hana i kau ai na ukana o keia awa a haalele aku la ka moku ialaila a ku ma Hookena, eia nae ua hiki ole ke hooleleia ka waapa oiai aia na nalu nui ke uhi la iluna o ka uwapo. Ua holo loa mai ka moku a ku ma Napoopoo, a maanei ua nui ka hooikaika ana no ka lawe ana mai i kolaila mau ukana. O ka uwapo o Napoopoo oia kekahi uwapo haahaa loa ma na Kona, a ma keia ino ua uhipuia ua uwapo la e na nalu nui e po'i ana. Ma Keauhou ame Kailua aole i loaa keia haawina oiai he ano okoa ka waiho ana o ko laua mau uwapo a he lana malie hoi ke kai ma ia mau wahi. He 23 ohua kapena i holo mai nei mai Hawaii ame Maui mai, a iwaena oia mau oha o ka Anela o Haili kekahi, Rev. S. L. Desha, a he 53 ohua oneki.