Ka Nupepa Kuokoa, Volume XLI, Number 48, 27 November 1903 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

Lilo Ke Ola oiai ma ka Oihana.

MAKE KA MAKAI MAHELONA MA KONA WAHI I HAULE AI.

PAA KA PAKE PEPEHIKANAKA AIHUE MOA MAHOPE IHO O KONA KI PU ANA I KA MAKAI.

            Ua ki pu ia a make loa i ka po Poaha la 19, o Makai J. W. Mahelona, e kekahi pake aihue moe mahope aku o ke alanui Liliha, ma kahi o na hale nunui e ku nei ma kahi o ke alanui Kukui i manaoia ai e oki. Ua ki aku o Mahelona i kana pu panapana maluna o ka puuwai eleele, aka, no ke ano poniuniu paha ua halahu aku la ia a ku aku la ma ke kuekue lima o Kale Kalaka opio keiki a Kale Kalaka i kamaaina i ko Honolulu nei, a o ka hoike a Kale Kalaka opio oia ka hoike ano nui a ke aupuni e paa nei, i ka wa e lawe ia mai ai keia pake e hookolokolo no ke karaima koikoi ana i hooko iho la, a penei kana ike:

            Ia'u e hoi ana no ko'u home no kahi o kuu makuakane ma ke alanui ololi o Buckler's Lane, ua lele iho la au mailuna o ke kaa uwila ma ke alanui Liliha, a lawe aku la i ke alahele @okole e hiki aku ai i ka home ua ike aku la au i kekahi Pake i ka oili ana mai mailoko mai o ko makou mau pa, a holo pololei mai la imua o'u. Ua maka'u au a holo hou aku la ihope i ke alanui Liliha, ua loaa aku ia'u o Makai kiukawa Pake Apana, a ninau aku la, ihea la e loaa ai ka makai kumau, ua kuhikuhi mai la oia i ka'i a holo aku la au a loaa aku la ia'u o Makai Mahelona. Ua pii mai maua a loaa aku la ua Pake nei e paa ana iloko o kekahi o-pu nahelehele mahope aku o ke alanui Liliha, ua loaa aku i ka makai a kauoha aku la iaia e puka mai iwaho. He wahi pouli loa keia, a e paa ana no hoi ka makai i kana pu. Ua ae mai ka Pake aka, aole nae i puka mai iwaho, a nolaila, ua kii maoli aku ka makai iaia a huki mai la iwah @ e mau huamoa ka i loaa aku iloko o kona pakeke, a he elua moa iloko o ke eke. Ua hoomaka mai la maua e lawe iaia no ke alanui no kahi o ka pahu kahea kaa makai, a malaila ua loaa iho la na keiki opio a Kapena Paka. Ia makou i kokoke aku ai i kahi o ka pahu kahea, ua hoike mai la ua Pake nei he mau moa hou no kekahi ana iloko o ke eke i haalele ia aku la ihope, a e hoike aku no ia i ka makai i kahi i waiho ai. Ua olelo aku makou i ka makai e huli i ke kino o ka Pake, aka aole nae oia i hooko a ua hoi hou aku makou no hope o kekahi hale nui e ku nei mahope o ke alanui Liliha. He wahi lepo pohopoho keia, a ua olelo mai ka Pake e hele hou aku. Ua ku iho la makou ma keia wahi, a hele hookahi aku la ka makai ame ka Pake no hope o ka hale ma kahi o 30 i-a. Ia wa koke no ua lohe aku la makou he leo po-ha pu, a lohe aku la au i ka leo ehaeha o Mahelona. E aumeume ana oia me ka Pake. Ua holo aku la au apo ae la i ka a-i o ka Pake me ka paa ana i kona lima e puliki ana i kekahi pu panapana, a ia maua e aumeume nei me ka Pake, ua hina aku la o Mahelona iluna o ka lepo a hoomaka mai la e ki i ka Pake, a kuu mai la kekahi o ko'u kuekuelima a'u e paa ana i ka Pake, ua hookuu ae au i ka paa ana me ia lima, a koe hookahi lima me ke kahea ana i na keiki a Paka, e holo mai e kokua ia'u. He eha manawa a Mahelona i ki mai ai i kana pu, alaila ua hamau iho la ia. Ua holo mai la na keiki a Paka a paa iho la ia makou ua Pake la. Ua hoea mai na kanaka ia wa, a ua huli makou i ka pu a ka Pake aole nae i loaa, alaila, ua hoouna ia mai la au no ka Haukapila.

            O keia mau olelo i hoikeia e Kalaka opio, imua no ia o kekahi mea kakau nupepa o ka Adavataisa mahope o ko Kalaka hiki ana aku i ka Haukapila hiki ana aku i ka Haukapila no ka lapaau ia ana o kona kuekuelima i hoeha ia. Ma ka nana ana a ke kauka o ka halemai, a ikeia aole i kukonukonu loa ka poino i loohia iaia, nolaila ua hookuu ia mai no oia e hoi no kona home.

MAKE O MAHELONA MA KONA WAHI I HAULE AI.

            I ka wa i hoea aku ai ke kaa makai me na makai no kahi o ke ki pu i lawelaweia ai, ua loaa aku la o Mahelona ua make ma kona wahi no i hina ai, ua lawe ia aku kona kino no ka halewai a malaila aku no ka hale kaha kanaka o ke aupuni, no ka nana pono ia ana o kahi a ka poka i kapoo ai.

            Ua lawe koke ia aku o Ho Young maluna o kekahi kaa pio no ka halewai me kona helehelena i hele a mainoino me ke koko e kahe ana, malaila ua huli ia kona pakeke a o na huamoa nahaha wale no ka i loaa aku. Ua ike koke mai na makai he Pake aihue moa mau no keia a he lehulehu wale no manawa i hopu ia ai e Ho@ Makai Nui Chillingworth, ame ka Makaikiu D. Kaapa. E hoike ana kona helehelena uli ua palukuia a ma kona kua ua ku lihi i ka poka. Ua haawi ia aku he huluhulu nona e moe ai, a o kona mau pono kino apau ua laweia mai iaia mai, ma o ka hopohopoia o lawe ola i kona ola iho, a ua hoonoho pu ia he makai no ke kiai ana i ke koena paahao i ole ai oia e hana i kekahi hana e poino ai kona ola, ua hoole loa ae o Ho Young aole nana i ki i ka pu i make ai o Mahelona, a aole no hoi oia i ike pehea la i make ai o Mahelona. O kahi a ka poka i kapoo aku ai nana i kaili aku i ke ola o Mahelona ma ka aoao hema o ka ai a puka ma kahi aoao.

            O Makai J. W. Mahelona i make iho la, he kanaka Hawaii oia i kamaaina i na papalina aloha o ko ke kulanakauhale nei, ma ka hale hanahao Ulakoheo kona wahi i noho hana ai no kekahi mau makahiki loihi, a he mau mahina pokole wale ae nei no i hala ua komo oia i ka oihana makai. He kanaka haipule a noonoo pono oia e lawelawe ana hoi i kana oihana me ka paewaewa ole, a i ka wa a ka anela o ka make i hookokoke mai ai ma ka ipuka o kona hale kino, aole oia i ae i kana lawehala e pakele aku, a me he la, o ka manao maoli paha ia o kela mau piha hope ana i ki mai ai.

            Ua hanauia o J. W. Mahelona ma Lahaina, Maui, i ka makahiki 1861 nolaila ua piha iaia na makahiki he 42 a make aku la ia. Ua malamaia kona hoolewa mai ka Hale Hana Kupapau mai o ka Hui Hoolewa o Honolulu, e ku nei ma Waikiki iho o ka Hale Kinaiahi ma alanui Beritania, kokoke i alanui Papu, i ka hora 3 p. m. He lala oia no ka Hui Kaala Naita o Pitiasa, nolaila, ua hiki ae na hoahanau no ke komo pu ana aku i kona anaina hoolewa ma ka hora 1:30 p. m. o ua la la. Ua konoia kona mau hoaloha ame na makamaka apau e komo pu aku iloko o kona anaina hoolewa, na ka Rev. W. N. Lono i malama kona anaina haipule hope ma ka hora 2 p. m. a waiho ma ka ilina o Puu o Hawaii.

 

Hoohanohano ka Mokukaua Italia Elbe i Kona Moiwahine.

            I ka auwina la o ka Poalima o ka pule i hala i malama ae ai ka Mokukaua Italia Elba i ku iho nei i ke Awa o Kou i na hoomanao ana no ka la hanau o kona Moiwahine Kane-make o Italia ka moiwahine a ka Moi Humbert ma ka hoohiwahiwa ana ae iaia iho—ma kona mau ia ame na wahi e ae me na hae mai ka hope a ka ihu.

            Mawaho ae o keia mau hoowehiwehi aia na leo hoomahie o na pila ke honehone la no ka hookipa ana i ka poe o ke kulanakauhale nei i konoia.

            Mamuli o ke ku o ka mokukaua ma ka uwapo o na mokukaua ua hiki ole iaia ke haawi pu aloha no ka Moiwahine Kane-make aka ua malamaia ka hanohano o kona ola ma na hoopa kiaha ana.

            Ua maikai maoli na hoohiwahiwa ana, me he la o na wahi ano nui apau ua owiliia me na lau-nahele o ka aina, e laa ka maile ame na pua poni-moi ame na mea like, a ma na wahi e kau ai ka weli e like ke kulana o ka mokukaua, e laa na pu ua uhiia aku lakou e na pua no lakou na mana ume manao iloko o ka hooluolu manao.

            Ma ke kauoha a ke Kiaaina Carter i hookahua ae ai ka bana puhi ohe ma ka uwapo pili kokoke i ka mokukaua a haawi aku la i na leo kupono no na hana o ia la, a maluna hoi o ka oneki moku na lede ame na keonimana i hoohala ai ma ka hulahula ana.

            Ua kipa pu aku ke Kiaaina me kona mau ukali ame na aliikoa Amerika ame kekahi poe makahanohano e ae o ke kulanakauhale nei ame ke Kanikela o ke Aupuni Italia.

            Ma ka nana ana i na hana i malamaia o na aliikoa o keia mokukaua Elba ua ikeia he mau keonimana maopopo a makaukau maoli ma ka hookipa ana i na makamaka o ke alo hanohano, a ua kuu akea ia ae na paia laahia o na keena o ua moku nei a aia maloko o ke keena o ke kapena kekahi mau mea kaulana kahiko loa kahi i malamaia ai ma ke ano he mau mea hoomanao no kekahi mau kenekulia loihi i hala ae.

            O Mr. R. N. Boyd kekahi iloko o keia hana, ke kokoolua o R. W. Wilikoki i hoounaia ai e ke Aupuni Moi o Hawaii nei no ka hoonaauao ia laua iloko o na kula kaua o Italia, oiai o ke kapena o keia mokukaua Elba he hoakula  ia no Boyd oiai laua he mau haumana no ke kula kaua moana nolaila ua ikaika kana mau ohaoha no na hoohanohano no ka la hanau o ka Moiwahine.

            Mawaho ae o kela hoakula o ke kapena o ka mokukaua Elba ua ikeia keia mau keonimana ame na lede:

            Ke Kiaaina Carter, ke Kanikela Italia ame Mrs. Schaefer ame na kaikamahine, ka Adimarala Amerika Terrv, na Kapena White ame Rodman na Senatoa Crabbe ame Achi ame kekahi poe e iho.

 

Papa Hana No Na Koa.

            Ke hoolalaia nei e Konela Jones o na pualikoa Lahui Hawaii, e kukulu i Papa Hana no na koa o na pualikoa Hawaii, a ma na mea i loaa mai ke aneane nei e pau loa na hoolala ana.

            O ka manao nui o keia papa, e loaa na hana i na koa i nele me ka hana, a malalo o ke alakai ana o kela papa e loaa ka mea i makemakeia. E hoopaa aku ana kela ame keia koa i kona inoa ame ka hana i hiki ke lawelawe aku, a ma ia ano ike e huliia ai ka hana a haawi aku i ke koa e makemake mai ana.

            E lilo aku ana ka lawelawe ana o keia papa ia W. C. Weedon ma ke ano oia ke kakauolelo, a e hoolilo aku ana oia i kekahi hapa o kona manawa ma ke kiai ana i ka pono o na lala o ka pualikoa Hawaii. Ke manaoia nei e hoomaka ana na hana o kela papa ma ka la 1 o Dekemaba.

 

Kiaaina Carter

LAWE I KONA HOOHIKI I KA POAKAHI NEI

AOLE I LOAA MAI KONA HOOKOHU

            Ma ke kakahiaka Poakahi nei i lawe ae ai o George R. Carter i ka hoohiki a lilo aku la ia i Kiaaina ma kahi o Sanford B. Dole i hookiekieia ae i Lunakanawai Apana no Amerika. Ua maopopo mua ia kakou e lilo ana oia i kiaaina e like me na lono i loaa mai ia kakou mamua aku nei ma ka uwea telegarapa, aka aole i manaoia e kau koke ana ia ma ka noho kiaaina a hiki i ka loaa ana mai o kona hookohu.

            Ma ke kakahiaka Poalima o ka pule i hala, Novemaba 20, ua loaa mai la ia Geo. R. Carter he lono telegarapa mai Wasinetona mai, a penei ua lono la:

            Wasinetona, Nov. 20, 1903

            Hon. George R. Carter, Honolulu,

            E lawe ae i ka hoohiki Kiaaina e like me ka mau. Komisina ma ke eke leta.

            E. A. HITCHOCOCK, Kakauolelo.

            I ka loaa ana mai o keia telegarapa, ua ninau koke aku o Carter, ina paha o ka manao e lawe ae oia i ka hoohiki mamua o ka hoea ana mai o kona Palapala Hookohu, a ma ka Poaono mai ua loaa mai la ka pane, e lawe koke ae i ka hoohiki me ke kali ole, a pela iho la i loaa mai ai keia hopena.

            Ma ke kakahiaka i ha'iia ae nei, a mamua o ka hora 11, ua piha ae ka Halealii i ka poe makaikai, na lunakanawai, na kanikela, na aliikoa, na lala o ka Ahaolelo me na haole waiwai o ke kulanakauhale nei. Na Rev. George L. Pearson i kalokalo ae i na Lani no na hana e hanaia ana, oiai ke anaina e ku ana iluna, a mahope o ka hookuu ana iho o kana leo pule, ua nee aku la o Lunakanawai Kiekie Frear a heluhelu aku la i ka hoohiki. Mahope mai ua hai mai la oia i kona manao, a penei kekahi mau olelo ana:

            "Eia ka'u e ha'i aku nei ia oukou: E hoolilo ana wau ia'u iho, kou puuwai ame ko'u uhane ma ka hana o ko'u kulana. Aole hoi e i mai ana ko'u aina hanau ua kapae ae wau ia'u iho mai ka hana ana nona. Ma ka lawe ana mai i ke kulana Kiaaina, e hoolilo aku ana wau i ka ike i loaa mai ia'u no ka pono o Hawaii ame ko Hawaii lahui kanaka.

            "Ke ku nei wau maanei me ka iini e paio aku no ka pono o ke kane, ka wahine ame ke keiki iloko o Hawaii nei, a ke iini loa nei no hoi no ka hoonee ana aku ia Hawaii ame kona mau makaainana ma kahi o ka mokuaina.

            "E hooikaika no wau ma keia mana hooko i loaa mai ia'u e hoohana aku i na hana o keia Teritori me ka hoomakaulii, a ma ia ano e hoomamaia ai ka haawe o ka poe ilihune.

            "Ua manao wau e uku aku me ka pololei i na aie aupuni apau ame na koikoi e ae, a ma ia ano e hiki ai ke paa ko kakou hilinaiia mai. Ina poe apau e loaa no ka nana pono ia ana.

            "Ma ko'u ano he Repubalika oiaio a he makaainana hoi ke manaolana nei wau ma ka'u mau hana e hoopau ae i na manao inaina a kuekue e paa nei, i pono ole hoi a i kumu ole a hauoli ole hoi i ko lakou ulu ana ae.

            "Aka ke ha'i hou aku nei wau ia oukou: a oia ka'u e makemake nei e ha'i aku: Ua hanauia wau he Polinesia, i malamaia nei iwaena o na Hawaii. O ka hanohano iloko o ko'u ola ana oia hoi ke ku ana ma ko Amerika aoao a hoohana aku i kona mau pono iwaena o na Hawaii, a aole paha he poe iwaena o lakou e hui pu ole mai ana me a'u ma ka puana ana ae: O ke kulana kiekie o ke ao nei, ka mea hoi a'u e haaheo ae nei, ka mea hoi i oi ae mamua o ke kulana Polinesia, oia hoi HE KUPA AMERIKA WAU. Ke noi ae nei wau e eko aku ia mau huaolelo mai Hawaii a Niihau iwaena o ka poe oiaio, na kupa aloha aina e noho nei malalo o ka eheu malumalu o ka Hoku ame ke Kahakaha.

            "Ma ke@ mau mea apau ame keia manao no ka holomua ke lawe nei wau i ke kulana Kiaaina."

            Mahope o na kukui aloha ana ame ka ike ana, ua hookuuia ae ke anaina a komo aku la o George R. Carter e lawelawe i ka hana o kona keena.

            Ua hanauia o Hon. George R. Carter ma ka la 28 o Dekemaba, 1866, ma keia kulanakauhale, iloko o kekahi wahi hale uuku mauka iho o ke Alanui Kukui, a ma Hawaii Paeaina nei no ka hanau ana o kona mau makua.

            O Carter makua he kanaka holomua oia maloko o kana mau alakai hana hoowaiwai, a ma ka manawa i hanau ae ai o Carter Kiaaina nei ua heluia kona makuakane he kanaka ano nui iloko o na hana kalepa hoowaiwai aina.

            Ma kekahi manawa ua hookohuia o Carter makua i Kuhina Hawaii a noho i Wasinetona, a ma kona moo-kuahau i loaa ai keia ike he ohana ko keia Kiaaina hou iloko o na mahele elua—mahele mikanele a he mea hookele moku.

            I na la opiopio o Carter i hoomaka ai kona hoonaauaoia ana ma ke kula i Nuuanu, i noho kumu ia e Mrs. L. Smith, ka wahine a Kamika kahu o ka Ekalesia o Kaumakapili. Mahope iho ua hoomau aku oia i ka hele ana i ke kula a Atkinson a i ka manawa i pau ai ia kula ua komo aku oia i ke kula o Koleaka.

            Mahope o na hoonaauao ana o ka Paeaina nei ua hoouna aku kona mau makua iaia i Amerika Huipuia no ia mea hookahi no, a iloko oia o ekolu kula nui i hoomanawanui ai e like me ka upu mau a kona makuakane no ka puka pono mai o ua keiki nei, a ma ka manawa ona i puka pono mai ai mai ke kula hope loa ana i komo ai, ua loaa io na iaia ka makaukau kupono.

            Oiai oia iloko o kekahi kula nui o Amerika ua ikeia oia iloko o na paani hooikaika kino, ma na paani peku popo, a hoehoe waapa a elua makahiki mahope mai ua mare aku oia ia Miss Helen Young kekahi o na u'i o Nu Ioka.

            Ua hoohala nui o Carter i kekahi mau la o kona ola honua ana i Amerika a iloko o na oihana banako malama dala ame na hana i pili aku ia mahele hookahi e laa ka hui hoopaa ola i noho hana ai, a i ka make ana o kona hoahanau ponoi Charles L. Carter ua hooholo koke iho oia e hoi mai i ka aina no ka malama ana i kona makuahine.

            Ua noho nui no oia iloko o ka oihana i maa iaia a ma ka banako Hawaii oia i noho ai a hiki i ka manawa i kaheaia mai ai e hoopiha aku i ka makalua i waiho hakahaka ia e Henry F. Cooper ka oihana Kakauolelo o ka Teritori. A mai keia anuu aku ke pii ana a kau i ka noho kiaaina.

 

Na Aumoku Kaua a Hiki Mai.

ANONINONI KO AMERIKA KULANA MA PANAMA.

EHIKU MOKUKAUA AME 2,500 KOA E HOOLULU AMA MAANEI.

            WASINETONA, Nov. 22.—O na mokukaua ame na moku hoomaamaa o na aumoku Amerika e ku nei ma na kai o Kina, ua kauohaia ae nei lakou e holo ae no Honolulu a noho malaila no elua pule.

            WASINETONA, Nov. 3.—O Adimarala Robley D. Evans, ke alakai o na aumokukaua o Amerika ma ke Kahua o Kina, oia no ka mea nana e alakai ae ana i na aumoku e holo ae ana no Honolulu.

            O keia ae la na lono telegarapa i loaa mai ma Honolulu nei. O ka nui o na moku e ku mai ana he ehiku, no lakou hoi ka huina kanaka o 2,500. Aia keia mau moku ma na awa like ole o Iapana, a me he mea la i keia manawa ua hui ae nei ka hapanui a ke holo ae nei paha kekahi e hooko i na kauoha i loaa aku ia lakou.

            O ke kumu o keia hoolala aumokukaua aole no i maopopo loa, aka, hookahi mea i hiki ke kohoia aku oia no ka onene e ala mai nei ma Panama, a o ka hiki ana mai o keia mau moku maanei mamua o ka hoea io ana mai o kekahi haunaele, he mea ia e maalahi ai ka holo ana aku o keia mau moku mai nei aku no kahi o ka hana.

            Penei ka lono telegarapa i loaa mai i ka la 23 nei:

            BOGOTA, Nov. 23.—Eia ke manaoia nei e na alakai aupuni, aole e apono ana ka Hale Senate o Amerika i ka Peresidena Rusawela hoolala alawaioki. He hookahi haneri tausani poe Colombiana i ae ia lakou e komo aku iloko o ke kaua ina e ala io mai ana ke kaua me Amerika.

            Ma keia lono telegerapa i koho ia ai, o keia manao hakaka ku-e a ke aupuni o Colombia ia Amerika, oia ke kumu o ka loaa ana o keia kauoha ia Adimarala Evans e lawe mai i kona mau mokukaua no na kai o Hawaii nei, a kali aku o ka loaa mai o ke kauoha.

            Aole he mau mea i hoea mai ia Adimarala Terry, ko Amerika alakai kaua moana maanei, e pili ana no keia kauoha ame ka holo mai o na mokukaua. Ma ka hoonohonoho ana o na alakai e noho nei maanei, ke hiki io mai keia mau moku e lilo aku ana he 6,500 tona lanahu mai keia kahua hoolulu aku, eia nae aole ia he mea e hopohopo ai, no ka mea aia he 25,000 tona lanahu e waiho nei i keia manawa. Ina e hiki io mai ana keia mau moku ua hiki ke hoopihaia i ekolu o lakou i ka manawa hookahi, a iloko o elua pule e lawa ana keia mau moku me ka lanahu.

            Penei ka olelo a kekahi aliikoa Pelekane i kipa ae ma Manila: "O ka ikaika kaua moana o Amerika ma na kai o Kina ua hiki ke hoopuehu liilii i na mea apau mai ka ilihonua aku." A ina he oiaio loa keia mau lono, alaila e ike aku ana kakou i keia mau mokukaua o kakou, a he mea na kakou e haaheo ai ka ike ana i ka manao o keia aliikoa Pelekane e hooiaio ana i ka ikaika o ko kakou mau mokukaua a hoea mai. O Hawaii uuku iloko o ka moana Pakipika ua haaheo i ka noho ana kiko uuku loa, eia nae ma ka malumalu o ka eheu Aeko, ua lawa kona ikaika e "hoopuehu liilii i na mea apau mai ka ilihonua aku."

 

Aole Hewa o ke Koho Balota.

KA HOIKE KEIA A KE KIURE NIENIELE HOAPONO OLE IA O BIRBE.

            Mahope o ka nieniele ana iho nei o ka Aha Kiure i ka hoopii a na Home Rula, ua puka mai he hoike e hoike ana ua loaa ole he wahi kinaunau ma ke koho balota iho nei o Oahu nei. He elua hoike i waihoia ae, oia hoi ka hoike a ka hapanui ame ka hapa uuku, o ka mea apiki loa no nae, ua kakauinoa ka hapa uuku i ka hoike a ka hapanui, he hoike hoi e apono ana i ka hoike a ka hapanui. Ma ka hoike a ka hapa uuku, e noi ana e waiho hou ia keia hana iloko o kekahi kiure i nui aku na lala mamua o kela i noho iho nei, a ma ia ano ua manao ka hapa uuku e loaa mai ana he hoike i ano like ole me ia i hoopukaia ae nei, oia hoi, e loaa ana paha ka pono ma ka aoao Home Rula. Ke manao nei o Lunakanawai Gear e hooloheia ana keia noi a ka hapa uuku, a ina oia iho la ke ano, alaila aole i pau ka noonoo ia ana o keia hoopii a na Home Rula.

            Hookahi mea i maopopo loa, oia hoi, o Birbe, ka lunahoomalu o ka Mahele Koho Ehiku, ua apono ole ia kona noho hou ana ma ke ano lunahoomalu a lala paha no ka Papa Nana, aole no nae i loaa he olelo hooholo e hoahewa ana iaia no kekahi hihia, koe wale iho no kona ano kupono ole e lawelawe maluhia i ke koho balota. He mea i ike mau ia, o ka Mahele Koho Ehiku, oia kahi ulu mau o na haunaele.

            O kekahi hoike i loaa mai, ua waiho loa ia aku kela hihia imua o ka Aha Kiekie, a ina oia iho la, he mea pono e nana pono ia mai. Aole he mea pono e hunaia ka oiaio, ina ua hana kolohe maoli ia, i ole e ala hou mai na nune ana ma keia hope aku.

 

            E hoomaka hou ana ke Kiure Hawaii i keia Poakahi ae.

 

Kalanianaole ma Wasinetona.

HIKI MUA MA KAHI O KA HANA.

HAAWI I KONA NOHO IA LUNAMAKAAINANA HEMENWAY O INDIANA.

            Penei ka mea i loaa mai ia makou mai ka mea kakau o na nupepa Avalakaika, E. G. Walker, e noho la ma Wasinetona, e pili ana no ka Elele Hawaii Kalanianaole iaia i komo aku ai a lawe ae i kona noho ma ka Hale o na Lunamakaainana.

            Ua hiki mai ianei ke Keikialii Kuhio ame kana wahine ma ka Poaono nei, a eia laua ke noho nei i keia manawa ma Edbitt Hale. He huakai ka laua i piha i na ano pilikia apau ma ka moana Pakipika ame ka holo ana mai nei ma ka aina, a ua lohi no hoi ko laua haalele ana aku ia Kapalakiko. Ke manao nei laua e hoolimalima i hale noho maanei. Ua hiki aku ke Keikialii i ka wa i weheia ai na hana o ka Hale ma ka Poakahi a oia kekahi iwaena o ka poe i laki. Ma ka huki koho ana no na noho oia kekahi o ka poe i loaa na noho maikai iwaena o 386 mau lunamakaainana ame na elele. O ke ano o ke koho ana i ka noho, e hele aku na poe apau mahope o ka pale, a ia wa e huki ana kekahi mea i puloulouia kona maka i na popo nihopalaoa i kauia na huahelu maluna i kulike me na mea i hoopaaia maluna o ka papainoa. E like me ka hikiwawe o ke kaheaia ana o na inoa, pela ka hikiwawe o ka hele ana mai o na lala mai kahi mai o ka pale a lawe ae i ka lakou mau noho i makemake ai. O ka poe i puka mua ko lakou mau inoa o lakou ka poe i pono.

            O ka Elele mai Hawaii mai oia kekahi iwaena o ka poe i kahea mua ia, nolaila ua lawe ae la oia i kekahi o na noho maikai ma ka aoao o na Repubalika, ma kekahi aoao ona o Lunamakaainana Lacy o Iowa, oia no ka aoao akau, a o kekahi hoi o na lala ma ka aoao hema. Ua paa iho oia ia noho a hiki i ka pau ana mai o na lala he 400. Ke nana aku iaia me he mea la aole oia e nana ana a he kuoo maoli no. Aia iwaena o ka huina pakalaki kekahi mau lala ano nui iloko o ka Hale, a aia oia ke nana la owai la iwaena o na poe hope loa o Lunamakaainana Hemenway o Indiana, a oia no hoi ka lunahoomalu o ke Komite o na haawina. Ua ike koke aku la ke Keikialii i kona manawa kupono. Ua hoouna koke aku la oia i kekahi palapala e haawi aku ana i kona noho no Hemenway, a oia ka Hemenway i apo mai ai me na hoomaikai ana he nui, a ma ia ano i pakele ai oia mai ka hoi ana aku ma ka noho hope loa, a he wahi no hoi i hookaawaleia no na Repubalika, ma kahi o na Demokarata. A oiai aole no e kamailio nui ana ka Elele imua o ka Hale, a aole hoi ona mana koho, nolaila aole he mea ano nui loa kahi o kona noho. Ma ia ano ua hauoli loa ke Keikialii i ka haawi ana aku i kona noho a hoi aku oia ma kahi e a haawi aku hoi i kona pono ia Hemenway, mamua ponoi o ka Lunahoomalu o ka Hale.

            Aole he nui ka ka Elele mau mea e ha'i ai koe wale no ua nui na mea i hoea aku imua ona maanei e kaua mai ai i ka nee awiwi ana o kana hana. Ua hookipa ohaohaia aku oia iloko o ka hale, a he nui na lala i hoolaunaia aku iaia a hoike ku i ko lakou hoohoaloha ana aku iaia a no Hawaii. I keia manawa ua kono ikaika ke Keikialii i ka puuwai o kona mau hoa. Ke manaoia nei maanei e nui ana kana mau mea e hana ana no ka Teritori o Hawaii ina e hele ana kana mau hana ma ke alahele pololei.

 

Mai Lilo ia Oiaio i ke Kai.

            I ka manawa i huli hoi mai ai ka mokuahi Ke Au Hou mai Kauai mai, a ku ianei i ka Poalima o ka pule i hala i hui mai ai oia m e ka ino o ka makani ke kumu i kupikipikio ai ke kai, a na ia ino i hooluhiluhi ino ae i ka moku a uhi mai ke kai maluna ona a aneane e lilo kekahi oiaio o ka moku, he wahine Pukiki, i ke kai.

            Na ka Wiliki Ekahi Gardner i hoopakele i kela wahine oiai oia e laweia ana e ke kai ma ka oneki moku no ka haule aku iloko o ke kai, a oiai ka wiliki e paa ana i ka wahine oia pu no kekahi i hukiia aku e ka ikaika o ke kai a ma ia ano i hooku'i aku ai kona poo i kekahi wahi paa o ka moku, a na ia hooku'i ana i hoopoinaia ai kona noonoo no kekahi manawa.

            Iloko no nae o ia kulana o ka wiliki, a ano maalo ae ka noonoo mai iaia aku, aia no nae oia ke paa la ia ka wahine ke kumu i pakele ai ka wahine, a i ka manawa pokole ua kauoha ae la ke kapena i na ohua apau e noho iloko o na lumi. Oia no kekahi i hoolana pu ia ae e ke kai i ka manawa e iho @ ana ka ihu o ka moku iloko o ke kai.

 

Makana ia Kapena J.D.S.Phillip o ka Mokuahi Aorangi.

            Ma ka huakai aku nei a ka mokuahi Aorangi mai Honolulu aku nei no Victoria, ua haawi makana uwaki gula aku na ohua ia Kapena J. D. S. Philip oia moku. Maluna iho o ka uwaki e kau ana keia mau mamala olelo: "Ia Kapena J. D. S. Philips mai na ohua o ka R. M. C. Aorangi no ka piha ana o ka iubile o na huakai aumoana, Okatoba, 1903.