Ka Nupepa Kuokoa, Volume XLI, Number 47, 20 November 1903 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

Hoopukaia i na kakahiaka Poalima apau.

BUKE XLI HELU 47. NUPEPA KUOKOA, NOVEMABA 20, 1903.  NA HELU APAU 2990.

 

KU MAI IANEI MAI MEKIKO

MAI, E HOLO ANA NO

IOKOHAMA.

 

OIA NEI KEKAHI MA KE KAUA

O KINA A ME NA

AUPUNI E AE.

            Iloko o ke kuaua eloelo o ka auwina la Sabati nei, Nov. 15, i kapalulu mai ai ka mokukaua Italia Elbe, ma Kou @ mai Acapulco, Mekiko, ke awa ana i haalele aku ai ma ka la 31 o Okatoba.  He ano like keia mokukaua me ko Amerika mau moku.  Ua hookomoia mai ka moku a makai iho o ka uwapo o ka nui mokuahi piliaina o Poka ma, ma@ i @ ae ai.  I ka moku e hoo@ mai ana ola no ka wa i kipu a@ aku ai ko ka aina nei i ka hae o ke Aupuni Italia, a ua panalia mai hoi a mau ohaoha ana.  He nui na kanaka @ naue ae ma na uwapo no ke kilohi paa aku i keia kupueu o ka moana.

            He hookahi paha pule e ku ai keia moku maanei no ka hoopiha ianahu ma, a holo loa aku no Yokohama, kana wahi e holo nei, a malaila oia e hui aku ai me ko Italia mau aumokukaua o na kai o Kina.  Ke hoi hou nei keia moku no kahi ana i haahe ai he makahiki a oi i hala ae nei, oiai oia nei kekahi o na mokukaua i komo ai ma @ kaua a na aupuni nui i aluka iho nei ma Kina.  Ma Kalao kahi i ku ai o keia moku a kauohaia ae e holo no Acapulco, kahi e loaa aku ai o ke kauoha @ i kona aliimoku nui.  O ka la ana ko aku ai mai Acapulco oia no ka la komo aku ai ka mokukaua Bosetona, @ ana no ka Puali o Panama.  Ua @ ae na aliimoku o ka mokukaua Bosetona aole lakou i maopopo i ko la@ wahi e holo aku ai, aka ua loaa a hoo@ i na aliimoku o ka Elbe e @ pu aku ana no ka mokukaua Bosetona no Panama.

            Elua la mahope o ka haalele ana o @ mokukaua ia Acapulco ua hui ae la oia me na auinokukaua Amerika malalo o ke alakai ana a Adimarala Glass, a e holo ana hoi no Panama.  I ke ku ana mai o ka moku ma ke Sabati nei, o ka ninau mua a na aliimoku ninau mai ai i ko ka aina nei, oia no na mea hou e pili ana no Panama, a @ hikilele lakou i ka ha'lia ana aku, ua ike aku nei ke Aupuni Amerika i ke aupuni Repubalika hou o Panama, a @ no hoi me ke aupuni o Geremania.  @ ka ha'lia ana aku ke hoonee la ke aupuni o Colombia i kona mau pualikoa no ke kaua ku-e ana i ke Aupuni @ o Panama, ua mino aka iho na'lii moku me ka puana like ana ae, he @ palaualelo wale no ia mau @.

            O ka mea mua mai ka aina nei aku i @ aku iluna o ka moku oia no o Frank McIntyre, o ka Hui Kalepa o Schaefer, i lawe aku hoi i ka palapala @ ame ke aloha o Mr. F. A. Schaefer, ke Kanikela Italia maanei, kona hoi ana mai ua hoouna aku a me he mau poe pepa, a o keia ke @ pepa mua loa i loaa aku ia lakou @ mahina i hala ae nei.

            Ua hanaia keia mokukaua i ka makahiki 1892, a ke lawae nei oia he 237 mau ola kino kanaka maluna ona.  He @ na mau @, a he 12 nota kona @ mau, e lawe ana hoi i na tona @ he 500.  He mokukaua kiai oia, @ hookahi iniha ka manoanoa o @ halekaua oluna.  O kona paleka@ e pili ana i ka wai ua uhiia me ke @.  O kona mau pu he elua 6-@, he ewalu 4-7 6-ikaik hoonee, e@ hoonee ame elua tabu to@.  He elua mahele o kona enegine he mau mahele ekolu ku'e wale no a @.

            He hookahi aliikoa iluna o keia moku @ mua no ianei he mau makahiki @ ae nei maluna o ka mokukaua @ Elba, a o keia no hoi ka mana@ a Robert W. Wilikoki i haawi ai i @ luau no ko lakou hanohano.  I @ ana aku no ko Wilikoki make @ kaumaha iho ia lakou.

            @ i ka wa i ala ai ka @ nui ma @ i ka makahiki 1900, ua kauoha a@ aku keia mokukaua no Taku, a haawi oia i hoolele aku ai he elua mau @ koa a huipu aku la iloko o ke @.  He hookahi o keia mau mahele @ kiai aku i ke keena oihana o Italia a he hookahi i ka Halepule.  Ma @ iloko o ke kaua hahana ua @ iho la o Kokua-Lutanela Caritto a @ umi-kumamalima mau loina i make.

            Ua hoouluulu ae na Italia e noho ana @ Kanahai i kekahi huina dala a ma@ aku la i keia moku i kekahi kia @ no Lutanela Carlotto, a ke @ nei keia kia hoomanao ma ka @ kuhoe o keia moku.

 

Hoopa'iia no ka Hoowahawaha Aha.

            Ma ka auwina la o ka Poakahi nei, @ o ka Lunakanawai Kaapuni o ka @ Hookolokolo Kaapuni Ekahi i hoo@ ai ka Hon. Samuela Paka, ke @ o ka Papa Kiure Kiekie no elima @ no ka hoowahawaha eha.

            Mahope iho o ka hora 1:30 i ikeia ae @ kekahi poe hoa o ka Papa Kiure Ki@ e holoholo ana ma ka holo o ka @ Hookolokolo (Aliiolani Hale) a i ka ninauia ana aku ka hana i ke kumi o ka holoholo wale ana, ua hoikeia mai aole ke poo o ka papa kiure i hoea ae i kahi o ka hana.

            Mahope koke iho o ka hora 2 ua kaheaia mai la ua poe hoa kiure nei no kahi o ka hana e ka makai o ka aha, no ke ku ana iluna i ka manawa i komo mai ai o Lunakanawai Gear a noho ma ka noho o ka oihana i kualiia e ka Lunakanawai Nott o Auseturia.

            Ma keia manawa ua hoike ae la ka Lunakanawai i ka hoohakaiia loa ia o ka Papa Kiure Kiekie no ka hapalua hora, a i ka lua o ka manawa i hoopuka ai ua kauoha aku la oia i ke poo o ka Papa Kiure Kiekie ia Hon. S. Paka a emoole ku ana imua o ka Lunakanawai mamuli o ke kii ana a ka makai o ka aha a hoike aku la o Hon. Gear i ka hoohakaiia loa ia o ka Papa Kiure Kiekie mamuli o ke kali ana i ke poo no hapalua hora.

            No ka lohe pono ole o ka Hon. Paka ua nee aku la oia imua me ke kau pu ana ae i kona lima ma ke kumupepeiao me he o-le hoolohe ia i lohe pono ia ai ka olelo a ka lunakanawai, alaila pane hou mai la ka lunakanawai no ka lua o ka mnaawa.  Ma keia manawa ua paku'i aku ka lunakanawai, e hoikeia mai na kumu ma ka aoao o ke poo papa kiure i kumu e hoopa'i ole ai ka aha iaia no ka hoowahawaha.

            No ka loaa ole o na kumu kupono, oiai he wahi hoohalahala wale no kana maluna o na sekona me ka wehe pu ana ae i kana uwati, oia no ka manawa i kapiia mai ai oia i ka paakai o elima dala no ka hoowahawaha aha me ke a'o pu ia mai, o ka manawa wale no a ka aha ka manawa e kupono e malamaia.

            I ka manawa i ui ae ai ua Hon. Paka nei iloko o kona mau pakeke no ka uku hoopa'i me he la aohe a-la olaila, nolaila i ka ui ana i ka lua o ka manawa ua loaa mai la ke kokua mai a Loio Bitting aku a pau ae la ia pilikia i ka hooponoponoia.

 

Ka La Hoalohaloha ma Kawaiahao.

            E like me ke ano mau pela a malamaia ai ka La Hoalohaloha (Thanksgiving Day) i maa i na Amerika a he la kulaia ia no ke Aupuni Nui o Amerika Huipuia, a i malama mau ia i kela ame keia Poaha hope o Novemaba o kela ame keia makahii.

            I keia Poaha ae, ka la 26 oia no hoi ka Poaha hope o ka malama o Novemaba, e malama ai na makaainana Amerika apau i na hana Hoalohaloha i ke Akua no na pomaikai i loaa mai iloko o ka makahiki.

            E malamaia ana ma na luakini o Hawaii Paeaina ame na wahi like keia ano hana ma na mahele like ole, a o Kawaiahao Ekalasia kekahi iloko o ia hana Hoalohaloha i ka Poaha e hiki mai ana.

            Ma keia Poaha e malamaia ana ma Kawaiahao he anaina haipule hoalohaloha i ke Akua no na pomaikai i loaa iloko o keia makahiki, e like me ke kuahaua la kulaia, i ka hora umi-kumamakahi o ke kakahiaka, a i ka pau ana o ia hana e hoopau loa ia ai na hana me ka paina mawaho iho o ka luakini.

            Ua manaoia aole me na mea ai mama na loko o ka papaaina ka me na mea ai maoli e maona ai i piha ai ka manao maoli o ka manao hoalohaloha no na pomaikai o ka aina i hua mai ai no ka hoopomaikai ana i ke kanaka.

            Ma ka hoolaha a ke Kahu Rev. H. H. Parker i ke Sabati i hala o ka poi, ka ai maoli o ka aina ame ka i'a e like me na manawalea e loaa mai ana oia iho ia ka ohu o ka papa-aina e hiki aku i ke kulana maona maoli.

            He hana laulima keia iwaena o na hoahanau o ka Ekalesia ame na hoaloha, a he mea maikai i na hoahanau ame ka poe ake i ka pono e hui pu ae iloko o na hana Hoalohaloha.

 

Hookukeia ka Elele Kuhio no ka Manaoia he Paele.

            Ma keia holo ana aku nei o ka Elele Lahui Kalanianaole no ka Ahaolelo Nui o Amerika Huipuia e noho nei i keia manawa, a ma kona alahele e hiki aku ai i ke Kapitala o Wakinekona aia hoi ua kipa aku la oia i ke kulanakauhale o Columbus Ohio, a ma keia wahi oia i hookukeia ai ame ke Aliiwahine Kalanianaole no ka manaoia he mau Paele.

            Oiai laua e noho ana maloko o kekahi pahu o ka hale keaka Southern Theater i ka Poalima, Novemaba 6, a e hauoli ana hoi i na mea a laua e ike ana, aia hoi, ua pa iho la kona poohiwi i kekahi lima me ke noi e lawe pu aku i kana aliiwahine me ia.

            O ke Keikialii i haawiia na hoohanohano ia ana e na kanaka kiekie, ua manao iho la oia he kuhihewa keia mau hana e hookoia nei maluna ona, aka, ua loaa hou aku la ke kauoha e ukali aku mahope o ke kanaka hana no hope o ka halekeaka, a malaila i haawi ia mai ai ke kauoha i ke Keikialii e haalele lana i kela pahu, mamuli o ka manaoio ia he nika.  Ua hoole aku ke Keikialii i ka hoolohe ana i keia leo kauoha, a i ke maopopo ana i ka Lunanui o ka hale keaka ua hoohaahaa aku oia i kekahi luna aupuni kiekie ua hoouna aku oia he elele i ka hotele a ke Keikialii e noho ana e mihi no na hoohaahaa i hanaia, aka, ua panai ia aku na huaolelo ikaika a haalele iho la no ka Hikina me ka oluolu ole i na hana i hookoia aku maluna ona.

 

Hoohikiia o S. B. Dole

Photo by Davey

PAU KE KIAAINA, LUNAKANAWAI I KEIA MANAWA.

Kona Hookohu Mai a Peresidena Rusevela.

 

THEODORE ROOSEVELT.

Peresidena o na Mokuaina i Huiia o Amerika.

I ka poe apau e ike mai ana i keia:

            E ike Oukou: Ma ka waiho ana aku i keia hana ame ka hilinai ana i ka Naauao, Hoopono a Ike a Sanford B. Dole o Hawaii, ke hookohu aku nei wau iaia i Lunakanawai Apana no na Mokuaina i Huiia no ka Teritori o Hawaii a ke kauoha a hoomana aku nei wau iaia e hooko aku a e hana aku i na hana o ia oihana i kulike me ke Kumukanawai ame na Kanawai o na Mokuaina i Huiia i olelo mua ia ae nei, a e paa a noho hoi ma ia kulana, me na mana apau, na pono ame na loaa pono apau e pili ana iaia, oia hoi ka pau ana o keia kau ae o ka Ahaolelo o na Mokuaina Huiia a aole hoi e oi aku mamua o ia manawa, i kulike a i me ka mahele o ke Kanawai.

            I hoike no keia: Ke kauoha nei wau e hoopaaia ke Kope o keia palapala a e kauia ka Sila o ka Oihana Hookolokolo me ia.

            Haawiia ma ko'u lima ma ke Kulanakauhale o Wasinetona, i keia la Kanakolu-kumamakahi o Okatoba, i ka Makahiki o Ko Kakou Haku Hookahi tausani Eiwa Haneri ame Ekolu, a o ke Kuokoa hoi o na Mokuaina Huiia o Amerika, Hookahi Haneri ame Iwakalua-Kumamawalu.

THEODORE ROOSEVELT,

Na ka Peresidena:

            P. C. KNOX

            Loio Kuhina.

            O keia maluna ae ka hookohu o Sanford B. Dole no ka oihana Lunakanawai Apana no Amerika, a ma keia hookohu i lawe ae ai oia i ka hoohiki ma ke kakahiaka Poakolu nei, Novemaba 18.  Eia iho a hoohiki la:

            Owau, o Sanford B. Dole, ke hoohiki nei wau e hooko aku no wau i ka pono hookolokolo me ka nana ole ae i ke ano o ke kanaka, e hana hoi i ka pono kaulike i ka poe ilihune ame ka poe waiwai a e hooko ana wau me ka pololei a kaupaona a hana i na hana apau i hookauia mai ia'u ma ke ano Lunakanawai Apana no na Mokuaina Huiia no ka Teritori o Hawaii, e like me ka hiki ia'u a hoomaopopo ana i kulike ai me ke Kumukanawai ame na Kanawai o na Mokuaina Huiia, a e kaupale no wau i ke Kumukanawai o na Mokuaina Huiia mai na enemi mai, kuwaho a kuloko; a e oiaio ana wau no ia mea a e kakoo hoi: a ke lawe nei wau i keia me ke akaka o ko'u manao, ko'u ike ame ka'u hana; a e hana aku ana wau me ka pono i na hana o ka'u oihana a'u hoi e lawe ae nei.  Pela ke Akua e Kokua ai Ia'u.

 

Konela W. H. Cornwell Ua Hala!

            Ma ka Poakolu nei, Novemaba 18, i hoea mai ai keia lono telegarapa mai Maui mai penei:

            "Ua make o Konela Konuela ma Waikapu ma ka hora 8 o keia kakahiaka mahope o ke kaa ma'i ana no na hora pokole wale no.  Eia ka wahine ame ke keiki ma ka aoao o ka mea i make.  Me he mea la i ka la apopo ana e malama ia ai kona hoolewa."

            O ka mea i hala aku oia ka Lunanui o ka hui mahiko o Waikapu.  He kanaka keia i ike nui ia ma na wahi apau o Hawaii nei ma na hana kalaiaina.  I ke au nohomoi o Hawaii nei oia kekahi hoaloha o ka Moi Kalakaua ame ka Moiwahine Liliuokalani.  He ike nui ia oia ma na hana hookuku heihei lio, a nona hoi kekahi mau lio holo loa o ka aina nei.  He lala oia no kekahi mau hui ma-lu e ku nei, a ma na mea i loaa mai e hiki mai ana kona kino make ma ka mokuahi Mauna Loa o keia kakahiaka.

 

Pau i ke Ahi na Eke Leta.

            O na eke leta i hoounaia aku ma ka la 25 o Okatoba maluna o ka mokuahi Amerika Maru, mai nei aku a n na wahi hoi ma ka akau o Keaalakiko, ua pau mai nei i ka poino, he hookahi mie mai Tehama, Kaleponi aku ma ka la 1 o keia mahina.  Iloko o keia mau eke leta no na mokuaina o Orekona, Wakinekona, Alaska ,Canada, a me kekahi hapa o Idaho.

            Penei ka hoike a George W. Carr, Kokua Lunanui o ka hui kaaahi Mail Service:

            O ke kaaahi helu 16 o ka Mahele Hema, o ka hui Portland ame Kapalakiko R. P. O., ua pau i ke ahi he hookahi mile ma ka hema o Tehama, Kaleponi, ma ka la 1 o Novemaba, 1903, ma ka hora 5 a. m., mamuli o ka holo ana aku maluna o kekahi uwapo e a ia ana e ke ahi.  Ua a ia ae ke kaa leta.  O na wahi leta i pakele mai he iwakalua apana leta i hoopaaia ma ka hale leta, he hookahi ope nupepa ame 3000 leta, eia nae ua poino no keia mau leta aole no nae i nui loa.  Ua waihoia ae ke kaaahi ma ka akau o Tehama.

            O na eke leta i poino oia no na leta o na wahi ma na kahakai o ka Pakipika, Teritori o Hawaii, na Paemoku o Pilipine, Kina ame Iapana, a i hoouna ia mai no na apana akau o Kaleponi, Oregona, Wakinekona, Alaska, na apana hapa o Idaho; a iloko pu o kela huina i poino kekahi mau eke leta mai na mokuaina mai o ka Hikina i hoounaia mai no na wahi ma ka akau o Tehama ame Oregona.

            O keia hoike maluna ae no ko Hawaii nei mau eke leta, oia no na leta i hoounaia aku mai nei aku ma ka la 25 o Okatoba, ma ka hora 11:15 a. m. maluna o ka mokuahi Amerika Maru.

 

E Maopopo ana ko Niihau Kuiana

            Iwaena o na mokupuni apau o ka Paeaina Hawaii i komo ole iloko o ka helu ma ka hoomaopopoia ana o ko lakou mau kulana pakahi iloko o ka palapalaaina oia no ka mokupuni o Niihau, oiai e like me ia e ku nei ua pau na mokupuni e ae i ka hoomaopopoia.

            A iloko o ka manawa kupono e maopopo ai ko Niihau kulana iloko o ka palapalaaina, no ka mea, aia ia Polopeka Alekanekelo ka hoomaopopo ana o ia mea mamuli o ka mana i haawiia aku iaia e hana pela.

            O keia mana i haawiia aku iaia eia koke iho nei no, a iloko o ka manawa kupono e holo ai oia i Niihau no ke ana ana.  Ina aole na ike kamaaina o na hookele moku i ke kulana o keia mokupuni a hookele hupo aku maluna o ke kulana pololei aole i kauia maluna o na palapala kuhikuhi holo moana, ina ua nui ka poe moku poino ma ka pono holo aku no a kau ana i ka aina mamua o ka holo ana ma ke ala maoli o ka moku e holo ai oia hoi iloko o ke kai.

            Ma ka manawa e hiki aku ai ka Polopeka i Niihau e hoao ana oia e loaa i mau ana huina-kolu ia Kauai mai Niihau aku he hana maalahi loa hoi ia o ka loaa ana ia Niihau na ana huina-ha nona iho, a i mea e loaa ai keia hoolala hana e kukulu ana ka Polopeka i kana hana ma kahi kiekie loa o ka aina o Niihau, oia hoi he 1500 kapuai ke kiekie.

            O ka mokupuni o Lehua aia ma ke kukulu akau o Niihau a malia e komo mai o Lehua i mea e waiwai ai keia mau hoolala huli kulana ana o Niihau mokupuni.

            Maloko o na palapalaaina, ua oleloia he ekolu mile ke kapeke ae, o ke kulana maoli mai ko ke kulana i paa iloko o ka palapalaaina.

 

Loaa no ka Lanahu a Amerika i ka Poe E.

            O ke kipa mau o na mokukaua o na lahui like ole i Honolulu nei oia ka mea nana i koi ikaika aku a he haawina koikoi hoi i kau aku maluna o ke kahua lanahu o na mokukaua Amerika malalo o ka hoomalu ana a Akimarala Terry.

            Aole i liuliu aku nei ke kipa ana mai o ka mokukaua Farani Protet no ka hoopiha ana iaia iho me ka lanahu no kana huakai moana a oia hoi ke kumu i unuia aku ai kekahi mau haneri tona lanahu o keia kahua lanahu o na mokukaua Amerika maanei.

            A i kela mau la ke ku ana mai o ka mokukaua Italia Elbe a ke hoopiha nei i kona opu me ka lanahu o keia kahua hookahi a e hakahaka hou aku ana no e like me keia manawa mua.

            Aole wale o keia, aka i ka manawa i ku mai ai na mokukaua Amphritite ame Aphion ame na moku topido liilii, ua lilo ka hoopiha lanahu ana i ko lakou poe op i mea hopuiwa ia Kapena Rodman i ka hele a olohaka maoli o ua kahua lanahu nei o na mokukaua mamuli o keia poe mokukaua o na lahui e i kipa mai.

            Ma keia mea ua loaa ka manao i na alii o ke kahua hoolulu o na mokukaua Amerika, he mea hoowaiwai no keia i ka poe kalepa o ka aina nei o ka hoomakaukau i lanahu a i ka manawa e kipa mai ai kekahi o lakou e like ae la me keia ua hiki i na kahua lanahu o ka poe kalepa waiwai ke hoolawa aku me ka lalau ole mai i ko na mokukaua Amerika lanahu.

            Aole keia hana hoolawa a Amerika e hana nei i na mokukaua o na aupuni e no ka imi waiwai, oiai he kahua keia no ka hoolawa ana i kona mau aumokukaua ponoi aka o ke kipa ana mai o na mokukaua e ae a hoolawa aku ia lakou me ia mau mea mamuli ia o ka hana maikai, no ka mea aole e nele ka hana maikai ia mai o kona mau aumokukaua ke kipa aku i na awa kuwaho.

            I ke kipa ana aku o kauka Sinclair o ke Kahua Halewai Amerika maanei maluna o ka mokukaua Elba, ua ike iho la ia aole he palapala hookuu o ia moku mai ke awa mai o Acapulco e hoike ana i ke kulana oia o na kanaka oia moku.  Ma ke ano hoaloha i hookuuia ai ka moku mai na kanawai mai e pili ana no ka malama ola.

 

Hala ia Paahana a ka Haku!

HOOKUU MAI O MRS. HIRAM BINAMU I KEIA AO LUHI.

HOOMAILO IA E KA MA'I NO KEKAHI MANAWA LOIHI HALA.

            Mahope o ke kaa ma'i ana no umi makahiki, a ma ke ahiahi o ka Poalua nei, Novemaba 17, ua kii mai la ka Haku i Kana kauwa wahine a hoomama mai la i kona mau auwe ana no ka wa hope loa, a i keia wa aia o Mrs. Minerva Clarissa Binamu ke moe nei iloko o ka maha mau loa, a o kana kane ame ka laua keiki eia ke kilohi nei i kona aka-ku ma na paia o ko lakou home ma alanui Alekanekelo, Punahou.

            Ua kaa ma'i oia no umi makahiki me ka ma'i lolo.  Ua haawiia na malama maikai ana nona iloko oia manawa eia nae, ua pii mahuahua mau mai i ka mahina aku nei o Mei, ua ili iho la maluna ona ka ma'i ha'iha'i iwi i pahola iho nei ma ke kulanakauhale nei.  Mai ia manawa mai ua waiho nui oia maluna o kahi moe.

            He wahine i ike nui ia o Mrs. Binamu ma kana mau hana no ka pono o na uhane o kanaka.  Iloko o na mokupuni liilii o ka Pakipika Hema, ua ikeia oia he lima akau no kana kane a he mea hoi i makaukau e haawi i na kokoua ana i na hoaloha o ia mau aina malihini.  Ina i koe iho ka hanu ola me ia a hiki i keia Okatoba ae ina ua hiki kona mau makahiki i ke kanahiku.  Ua hanauia oia ma Northampton, Makekukeka, i Okatoba 19, 1834, a malaila no hoi i hoonaauuaoia ai oia.  Maanei oia i halawai ai me Hiram Binamu, oiai o Binamu e hoomakaukau ana iaia iho no ka oihana Misionari no na aina liilii o ke kai.  Ua hoohuiia ae laua ma ka berita maemae o ka mare i Novemaba 1856, he eiwa hoi la mahope o ko Binamu poniia ana no ka oihana misiona.  Ua hoomakaukau koke iho la laua no ka laua huakai a iloko o elua pule mahope iho o ko laua hoohuiia ana ua kau ae la laua maluna o ka moku misionari mua loa, oia no hoi ka Hoku Ao, a holo mai la a hiki i Hawaii nei ma ka la 24 o Aperila o kekahi makahiki ae, a he mau mahina mahope hiki loa aku la laua ma Ponope, a malaila i hooholo ai ka ahahui misiona e noho ana malaila e hoi laua no Apiang, ma ka Paeaina Kilipati.  Ua hoomaka ae laua i ka laua hana malaila ina na la hope o Novemaba, 1857, a malaila i halawai ai laua me na inea o ka Kristo oihana; pono ole ka ai malihini i ko laua mau opu a like ole hoi ka nohona e like me ko ka home ponoi, a na ia mea i hoonawali i ko laua mau ola kino.

            He nui a lehulehu na mea a laua i ike ai oia laua e hana ana i ka hana mawaena o na Kilipati, a he nui na mea e hoohikilele ai i ko laua nohona, a ua aneane no e lilo aku ko laua mau ola iloko o na lima o keia poe naaupop eia nae e like me ka ka Haku i olelo ai, - "Aole wau e haalele ana ia oukou a nele," pela io no Oiai i hana mai ai no Kana mau kauwa.

            Ua loaa ka makaukau olelo Kilipati ia Mrs. Binamu, a me ia makaukau ua lilo oia i lima akau no kana kane ma ka unuhi ana i na buke hoonaauao ame ka baibala me na himeni ma ka olelo oia lahui.  Ia laua i huli hoi mai ai a noho ma Hawaii nei, ua lilo laua i mau makua no na Kilipati e noho ana maanei, a no kekahi mau makahiki ua noho kumukula Sabati ae oia no ka papa o na wahine Kilipati me Kawaiahao, a o kana kane hoi ke kumu o na kane.  Ma ia kulana laua i noho ai a hiki i ka hiki hou ole ana ia Mrs. Binamu ke hana mamuli o ka nawaliwali.

            O kana mau hana i hana ai ma na aina Kilipati, he mau kia hoomanao lakou nona, a aole no he hewa ke i ae aia ke ko-wa iloko o na puuwai o na kanaka o ia lahui no ka hoomanao ana o Mrs. Binamu.  He hoahanau oia no ka Ekalesia o Kaukeano a he lala hoi no ka Papa Misiona o na wahine, a iaia iloko o ka nawaliwali ua hoike aku keia Papa i ko lakou kaumaha no ko lakou hoahana, a ma kona hala ana kau la ua waiho iho la oia he hakahaka iloko o ia Papa.

            Ma ka aoao o kona moe make, kana kane ame kona kaikoeke, Mrs. Lydia B. Koana i noho aku ai e kiai a hiki wale i ke kii ana mai o ka Mea nona ia i hana mai.  Ua malamaia ae kona anaina hoolewa ma ka auwina la Poakolu nei, a na Rev. W. M. Kincaid i malama ae i ke anaina hoomanao.  Ma @ o Kawaiahao i moe aku ai kona kino wailua, a @ hoi e moe ai a hiki i ke kani ana o ka pu a ka anela i ka la hope, a @ mai na kino make ma ke ala hou ana no ke ku hoike ana aku imua o kona Haku i na hana maikai ana i @ ai no na uhane o kanaka, a apo aku hoi i ka leo, -"Ua pono e ke kauwa @ e komo ae oe iloko o ko'u aupuni."

 

            Eia ka pili nei ka mokukaua Italia, Elba me ka uwapo Helu 1 o ke Aupuni Amerika.  Maanei oia e hoopiha iho ai i ka lanapu a ka moe aku no kana huakai no na kai o Kina.