Ka Nupepa Kuokoa, Volume XLI, Number 46, 13 Nowemapa 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

4          NUPEPA KUOKOA, NOVEMABA 13, 1903.

 

kona kaupale ana iaia iho mai na kulana hanohano o ka aina."

"Alaila, aole anei oia e ae mai ana, e kuu haku?"

"Heaha hoi kou manao, e Kimona?"

"Ke ninau aku nei wau ia oe e kuu haku i maopopo ia'u."

 

"Alaila," wahi a ka eale i pane aku ai, "ke ha'i aku nei wau ia oe aole he hiki ia'u ke hoomau aku ia koi ana maluna o ka Naita o Kiladea. O, e kuu Akua! he mea paakiki loa keia, e Kimona, no kekahi makua e like iho la me a'u i keia manawa. Aole o'u manao ua maemae ole loa no hoi ka'u kaikamahine. I kekahi manawa ua loaa mai ia'u na noonoo ana e aloha aku ana wau iaia, aka e like me kona nui ana ae pela no hoi ke akea o ke awawa mawaena o maua. a no ia mea ua hiki ia'u ke ha'i aku me ka hunahuna ole iho. ua oi aku ka ikaika o ka manao iloko o'u i keia manawa e kaawale aku oia mai ia'@ aku, mamaua o keia ninau no ka hoohui ana ia Kaleloga ame Kiladea. Ano, e kuu kapena maikai, ke makemake nei wau e lohe mai ia oe mai. Ke hoomanao nei anei oe i ko'u kauoha ana aku ia oe he mau pule i hala ae nei e kiai aku oe i na hana a Magareta e hana aku ai?"

 

"Ke hoomanao nei wau ia kauoha au, e kuu haku," wahi a Kimona i pane aku ai me ka pihoihoi.

 

"A ua hooko oe i ka'u mau mea apau i ha'i aku ai oe e hana?"

 

"He oiaio ua kiai aku wau iaia a aole loa hoi i moe iho ko'u mau maka."

 

"Ua pono. Heaha kau mau mea i ike ai?"

 

"E kuu haku," wahi a Kimona i pane aku ai mahope o kona kali ana no kekahi manawa, "ke manao nei wau o ka hooko ia ana o kau mau mea i manao ai iloko o ka wa pokole, oia ka mea maikai. Ina he mea pono e lilo aku o Magareta i wahine na Roderike o Kiladea, he mea pono e hooko koke ia ka mare iloko o ka wa pokole."

 

"E hoomau aku," wahi a ka eale i pane aku ai me kona helehelena pupuka "He kumu no kou o ka ha'i ana mai la i kena manao ou-he mea hoi i loaa mai ia oe mamuli o kau hoomakakiu ana."

 

"E kuu haku maikai, ina ua makemake oe e ha'i aku wau ia oe me ka hunahuna ole iho, e ha'i aku hoi i ka'u mau mea i ike ai, me ko'u mau manao, e hana no wau pela, aka he mea pono ia oe e oluolu mai e lilo ole ka'u mau olelo i mau mea nou e kaumaha ai."

 

"He oiaio ua ike a ua kamaaina oe i ko'u ano. Ia'u i kauoha aku ai ia oe e kiai i kuu kaikamahine, o ko'u manao maoli malaila e hana aku oe i ka hana i waihoia aku ai ia oe, a ia'u e noi aku ai ia oe e ha'i mai oe i na mea au i ike ai, ke manao nei wau e ha'i mai ana oe ia'u i na mea oiaio. Ano e ha'i mai oe. Heaha na mea i loaa ia oe ma kau hoomakakiu ana?"

 

"Ua ike wau ma ko'u hoomakakiu ana," wahi a Kimona i pane aku ai me ke ano hiki pono ole iaia ke kamailio maikai, "oia hoi ke hui pinepine nei o lede Magareta me ka Haku o Dysart."

"No Baraina Duna anei kau mea e kamailio nei?"

 

"Ae, e kuu haku. I keia pule iho nei no ua ike aku wau ia Magareta iloko o ka poli o ua kanaka la."

 

"E Kimona Malabena," wahi a ke eale i hooho ae ai me kona paa ana aku i na poohiwi o kona kapena, "heaha la kou mea i hookanalua ai i ka ha'i ana mai ia'u i keia mea au i ike ai? Heaha hoi kou mea i hookikina mai ai ia'u e ninau mau aku ia oe?? Ke makemake nei wau e ike i na mea oiaio, a ke kauoha aku nei wau ia oe e ha'i mai oe me ka oiaio ame ke kanalua ole no hoi. Ua makaukau wau e lohe aku i na mea apau ina he iho ia mau mea, Ae, ua makaukau wau e lohe aku, ina no ua mare ma lu aku ka'u kaikamahine i keia haku o Dysart."

 

No kekahi manawa ko Kimona noho ekemu ole ana aku, e hakoko ana hoi me na manao like ole iloko o kona waihona noonoo, a me he mea la no hoi ua nakinaki ia kona alelo, a pane aku la oia:

 

"E Sir Habati, mai oi loa aku ka pono no'u, no kou pono, ina i ike ole wau i kekahi mea e pili ana no keia mea, a oiai ua kauoha mai oe ia'u e ha'i aku i ka'u mea i ike ai e ha'i aku ana wau i ka'u mau mea apau i ike ai. He eha manawa iloko o ka mahina i hala i hahai aku ai mahope o lede Magareta, a ike aku hoi i kona halawai ana me Baraina Duna, a elua hoi manawa a Baraina Duna i komo mai ai iloko nei o Kaleloga me ka aahu hoonalonalo o ke kanaka kaahele. O ka wa hope a'u i ike ai ia laua a i elua ma ke kahawai no ia a iloko hoi o ko kakou paka. Ua hookau aku ka opio wahine i kona poo maluna o ka umauma o ua kanaka la, a ua apo maia la hoi oia i kona mau lima maluna o ka opio wahine me ke aloha maoli no. Ano e kuu haku, e ha'i aku ana wau ia oe i kekahi mea a'u i manaoio ole ai e lohe ana, aka i lohe ia e ko'u mau pepeiao me ka hoohewahewa ole. Ua manao wau e ha'i aku ia oe ia mea mamua, aka ua makemake wau e lohe hou aku a loaa hoi ka mea oiaio, lua aole i lohe hewa ko'u mau pepeiao, alaila ke ha'i aku nei wau ia oe, ua ae aku la ka lede opio e lilo i wahine na Baraina Duna."

 

"Auwe no hoi e! aole paha hoi pela!" i hooho ae ai ka eale.

 

"Ina paha na kekahi mea e i ha'i mai ia'u ia mea, e kuu haku, ina no hoi ua like aku no ko'u manao me kou; aka ua nui na mea a'u i ike ai a ua lawa hoi e hiki ai ia'u ke manao iho ua  hoopouliuliia ko Magareta mau noonoo maikai e keia haku o na powa. Me he mea la ua ha'i aku keia haku o na powa i kekahi mau mea i ka opio wahine a na ia mau mea i hookau aku i ka weli maluna ona a ae aku oia e lilo i wahine nana."

 

"Auwe no hoi e!" i hooho ae ai ka eale me ka pii ana ae o ka ula ma kona papalina, "ke hala loa aku nei keia mamua o ka mea i hiki ia'u ke hoomanawanui. Ina ua aloha io aku kuu kaikamahine ia Baraina Duna, a e haawi aku ana hoi i kona lima i keia kanaka, heaha la hoi kona mea e hoomau nei i ke koi ana i ko Roderika lima?"

 

"Malia paha ke hana mai la oia i ka hana e puni aku ai oe iaia."

 

"Aole, aole," wahi a Habati i puana ae ai me ka luliluli ana ae o kona poo, "aole loa pela. Ua maopopo ia'u e haawi aku ana no o Magareta i kona lima i ka la apopo i ka hooilina o Kiladea. Malia paha ua lohe hewa oe, e Kimona."

 

"He oiaio, e kuu haku, ke manaolana nei wau e oiaio mai ua lohe hewa wau a ua koho hewa hoi."

 

"Aka ke manao nei oe ua sua maoli no?"

 

"Ke sua nei wau, aka nae hoi aole no he nele o ka loaa ana mai o ke kohohewa iloko o ke kanaka."

 

"O, e kuu uhaue!" i hoolo ae ai ka eale me ka kaumaha, a hoomaka hou ae la oia e ku iluna, a ope'a ae la i kona mau lima ma kna alo. "Ua loaa mai ia'u ka maka'u no kekahi mea, aka aole loa wau i makaukau no keia mea a'u e lohe nei." Ua hele holoholo ae la oia iloko o ka lumi, a iaia i huli hoi aku ai ua hookau aku la oia i kona lima ma ka poohiwi o kona hoa kamailio. Ua haikea ae kona helehelena, a ua haalulu ae la hoi kona mau lala apau.

 

"E Kimona, iua he oiaio ua aloha aku o Magarerta i keia kanaka hihiu, heaha hoi kona mea e mare aku ai i ka naita o Kiladea?"

 

"Pela anei e kuu haku?"

 

"He oiaio e ae aku ana no oia e mare i ka naita."

 

"Malia paha ua oi aku ka makemake iloko ona no ka barona o Kiladea mamua o na paia puanuanu o ka Mauua Dysart."

 

"Ina no hoi oia ka mea oiaio, e kuu kapena. Aka, ---"

 

"Aka, heaha hoi, e kuu haku?"

 

"O, aole he hiki ia'u ke ha'i aku ia oe."

 

Ua huli hou aku la ka eale a hele holoholo aku la iloko o ka lumi, a iaia i huli hoi mai ai, ua hoi hou mai la kona mau noonoo maikai, a ua hiki hoi iaia ke uumi iho i kona mau manao kaumaha.

 

"E Kimona, ke makemake nei wau e ike a oi aku mamua o keia au i ha'i mai nei. Ke ake nei wau, e ike aku i ka'u kaikamahine iloko o ka poli o Baraina Duna, a e lohe hoi i ka laua mau olelo."

 

"Ke manao nei wau e loaa ana ia oe ka manawa e lohe aku ai i ka laua mau kamailio a e ike aku ana hoi oe i kau kaikamahine iloko o ka poli o ua kanaka ia i keia ahiahi. Ina na lohe aku o Baraina Duna i ko Magareta hele ana aku no Kiladea, alaila e ike mai ana oia e lohe i na mea i hanaia, a e hele mai ana oia. Aole ia maanei i ka po nei, a ke manaolana nei wau e hele mai ana oia i keia po."

(Aole i pau.)

 

HE MOOLELO NO KE

KAUNAWAHINE

O KE KULANAKAUHALE O TAREVIS.

 

KE ALOHA I KA MAKA PAHIKAUA.

Ua noho malie loa iho la ua kanaka nei me ka pane leo ole. Ua maka'u loa oia, a o ka mea wale no iloko o kona noonoo oia ka lilo aku o kona oia.

 

"E hoomaopopo oe," wahi a ka Barona, o ka loaa ole o ka hilinai ana maluna o hookahi hana au e hana ai ua pau na hana e ae au e hana ai iloko o ia ano hookahi. "A o kou haku aole oia i manaoio i kau moolelo i ha'i mai nei e pili ana i kou hui me kela wahine opio, ke kumu hoi i loaa ai kekahi manao e noii aku ma keia hana au."

 

"A heaha hou aku ia manao e hana hou ai?" wahi a ka ninau.

 

"A e ike koke no oe. E aa anei oe e komo iloko o na hoao a maua ia oe no ka ike ana i kou oiaio?"

 

"Ae, ua aa wau."

 

"E hoomanao oe, malaila e puka pono mai ai kou oia. Aia i hea e halawai ai oe me keia wahine opio?"

 

"Ma ka lanai o ka halealii e pili la i ka muliwai, ma ke kihi kokoke loa i keia aoao."

 

"Heaha ke kiekie o ia lanai mai ka wai ae?" wahi hou a ka Emepera.

 

"Kaa iho malalo o ke kiekie o ke kanaka. Ke ku ae wau mai ka waa ae e hiki ana ka papahele o ua lanai la i kuu poohiwi."

 

"He mea maa anei ia oe o ka pii a kau iluna o ka lanai?"

 

"Aole e kuu Haku. He ku aku no wau ma ka waapa, pili aku no hoi i ka lanai, a na'u no e paa i ke kaula o ka waapa mai kahi oioi mai o ka lanai, a i ka manawa e loaa ai kekahi kuia alaila e hoohemo koke no wau i ke kaula a pahu ikaika i ka waa mai ka uwapo aku, a na ka waa no hoi e holo malie ia'u e nee ai ilalo o ka papahele o ka waa me ka ike ole ia mai."

 

Ua huli mai la ka Emepera a nana mai la i ka Barona me na hiohiona mohaha a pane mai la, "Ke kamailio nei keia kanaka i ka oiaio." Aka, ua nana wale mai la no ka Barona me ka panel leo ole aka me he la i ka nana aku aole i lawa kona makemake.

 

"Ano e hoolohe mai oe me ka hoomaopopo loa," wahi a ka Emepera i hoomau hou aku ai me ke ano kuio maoli no nae i keia manawa, "No ka mea e kau koikoi ana na haawina hoahewa maluna ou, ke ku i kahi o ka hewa. E hele pu ana maua me oe i ka waapa no ka hui ana me ua wahine opio la au, me ko maua ike ole ia no nae e kekahi kino kanaka. Aole e haawiia e oe kekahi hoailona no ko maua ike ia, a ina e lilo kou kunu ana i mea no maua e ikeia ai e lilo koke no kou poo mai kou kino aku. O kau hawanawana e ikeia ai maua e loaa pu ana no ia oe ia haawina. Ua pili ikaika loa anei oe i keia wahine opio?"

 

"E like me kuu manao kuio imua ou e kuu Haku," wahi a ke kanaka.

 

"A, he mea kanalua no ia, a hiki ole ke hilinai i ka manawa koke, aka ke ike ia ka oiaio o kou manao kuio alaila e haawi makana no, wau no kau Hilda i mahele o ka wahine mare ka hookoia ka berita maemae mawaena ona ame ke kanaka hoe waa o ka muliwai o Mose-le. E aa anei oe i keia mau hoao?"

 

"Ua aa wau, e kuu Haku."

 

"Alaila e eleu hoi ha, i kali loihi loa ole mai kela ia oe," wahi a ka Emepera.

 

Me ka eleu nui ua nalo aku la ua kanaka hana nei iloko o ka pouli no ka hooko ana i ke kauoha.

 

"Ke manaolana nei wau e hiki ana iaia ke hooiaio mai i keia mau mea," wahi a ka Barona me na maka pupuku.

 

"E ike aku ana kaua," wahi a Rodolofo," aka o kahi mea ano e loa ma ko kaua aoao, i mea no kaua e nalo ai, e huna ana kaua ia kaua iho iloko o na koloka o kaua a waiho iho ma ka papahele o ka waa me he mau puolo la. O ka mea kupaianaha loa paha ke hana ia ia ano hana,-o ka hoe aku o ua kanaka nei a pili i ka lanai a o koiala lele aku la no ia i kula a kahea i na koa no kaua-he mau kanaka kipi i ka Akibihopa. A hiki mai na koa o ka Akibihopa o ko kaua laweia aku la no ia imua o ka Akibihopa, he mea e hoi ko kaua komo iloko o ka pilikia, ke ku i kahi o ka ninaninauia no ke kaua mau ano ame na kulana. Ke olelo nei wau he mau lopa maopopo kaua ma ke komo ana iloko o keia ano."

 

Ma keia mea na ku koke ae la ka Barona me na hiohiona kumahihi a pane aku la me ke ano pihoihoi-"Aole loa kaua e komo iloko o keia ano e kuu Haku, a aole a pono e hele ma keia huakai."

 

E kala mai ia'u," wahi a Rodolofo "me ka leo oluolu," e hele io no kaua. Aole au ke kanaka e kukulu wale i kekahi hana me ka hooko ole ina no iloo o ka puikaika, aka e hoomanao oe e kau Sigifarai maikai, aia a komo kaua iloko o ka pilikia o ia ano alaila oia ka manawa e hana aku ai oe i kau no kou hoa nei a e hoao wau no ko'u pakele mai ka ike ia ae e ko Tarevis nei."

 

"Ma kahi au e hele ai malaila wau," wahi a ka Barona me ke kuio.

 

Aole i liuliu ua pii hou ae la ke kanaka a hoike aku la ua makaukau ka waa no ka holo ana.

"Ke ike aku nei wau e makaukau ana oukou e hele a he keu maoli hoi ka maikai o keia waina no ka hoohoo pono ana i ka ai ke mo@i aku, a ina e pau ana keia huewai ie, pehea ana la e loaa hou ai ko'u wai i holopono loa aku hoi ka ai," wahi a ke kanaka pana pua i lele oi wale aku ai no.

 

"Aia ka pahu waina ma kekahi lumi mai," wahi a Sigifarai i pane aku ai oiai nae oia ame ka Emepera iloko o ka pouli ia manawa.

 

Ua lele aku la lakou apau iluna o ka waapa o ka Emepera me na minoaka ma kona papalina no keia huakai ano e. Ua hoomaka aku la e holo me ka malie loa aole i hoeia ka waa aka e ko malie ia ana e ka wai, oiai ke kanaka e noho mahope no ka hoopololei ana i ka holo o ka waa me he kia pohaku la ka oni ole, aia hoi ka Emepera ame ka Barona iloko o ko laua mau koloka me he mau puolo la o kekahi ano.

 

Ua holo malie aku no ka waa ma ka kumupali a oiai e konane ana ka mahina ua pa ikaika iho la ke aka o ka halealii o ka Akibihopa iluna o ka ili wai ke kumu hoi i hoopouli loa ia iho ai ke kumu o ka pali. Aole i liuliu ka holo ana o ka waapa me ka maopopo ole i na kanaka e moe la, aia i hea ka waa e lanahele ana, aka o ka pa e ana mai o kekahi leo wahine ke kumu hoomaopopo ai laua aia i kahi o ka hana i makemakeia. Ua leo nui mai la ua wahine nei-.

 

"Lohi maoli oe."

 

"Aole no'u ka hewa," wahi a ke kanaka kuhoe iaia i ku ae ai, ia manawa hookahi, a hoolou ae la i ke kaula o ka waapa ma kahi oioi o ka lanai a paa mai la no i ka piko o ke kaula.

 

"Ke hooiaio aku nei wau ia oe, e Hilda, aole no'u ka hewa. Ua loaa mai ia'u he mau kauoha mai kuu haku mai iloko o ka manawa a'u i holo mai ai, a'u hoi e hiki ole ai ke alo ae ia mau kauoha."

 

"Makemake loa wau ina e hiki ia'u ke ike aku i kou helehelena," wahi a ke kaikamahine, alaila e ike no wau i ka oiaio o kau mau olelo ame ka ole. Me he la i ke kulanakauhale aku nei oe no kekahi poe wahine i oi ae ka u'i mamua o'u ke kumu o kou lohi loa ana. O, na ike no wau i ko na wa i hala o ka hoomaopopo mua i na wahi e halawai ai e like ia me oe ia'u, a no keaha la e hiki ole ai ia oe me kekahi mea okoa aku?"

 

"He mea ano koikoi no ka hoomanawanui ana iloko o elua hoahewa i ka hoopunipuni o ka po hookahi," wahi a ke kanaka kuhoe. "Ia'u e hoomakaukau mai ana e holo i ou nei oia ka manawa i hoea mai ai kuu haku, ke kumu hoi o ko'u lohi loa ana. A hookahi wale no mea e ike ai oe i ka oiaio oia no kou hele maoli no e halawai me ia e hooponopono ai no keia mea, i pau ai keia manao ou ua hoopunipuni wau ia oe."

 

"Alaila e lawe mai oe i ko haku i o'u nei, e Konorada." wahi a ke kaikamahine, "i hiki ai ia'u ke hoolalo aku, he hoike pololei oe ma na mea apau, koe no nae na ninau pili i na wahine. He kanalaa no ko'u ia oe ma ia mea. Heaha kau o luna o ka waapa e paahaku mai la? Ua ike mua aku nei wau i kena mau puolo ia oe e hookolo lohi mai ana."

 

"O, he mau pipi keiki ia i pau i ka loleia a e lawe aku ana waa i kauhale aku nei ma ka lihi muliwai. Eia nae, ua iho e mai nei au i ou nei mamua o ko'u holo ana aku nei ilaila."

 

"Owai keia kahu ou i noi mai ai e hana kona kanaka i keia aho hana?" wahi hou a ka wahine.

 

"He kanaka pepehi pipi oia i hauoli hoi ia ano hana."

 

"Ke hoike oiaio nei ka kanaka nona iho," wahi a ka Emepera i hawanawana aku ai ma ke ku e mua ana aku i kona hoa. "Ua @lea oia ma kana mau olelo."

 

"E Konorado, e ha'i pololei mai oe ina aole oe i hele i ke k@ nakauhale i keia la." wahi hou a ka wahine.

 

"Ke hoohiki aku nei au imua ou aole wau i ke kulanakauhale i keia la."

 

"A aohe au mea aloha e ae mawaho ae o'u."

 

"Ia oe wale no wau i aloha ai, a ua makaukau keia nui @ hou ia me ka ihe ma ka puuwai a pili pu i ka paia hale @o koa pono, e kuu aloha."

 

"O, e Konorada," i hoooho ae ai ka wahine opio, me ke kukuii pu ana iho ilalo a hii aku la i ke poo o ke kanaka kuhoe iloko o kona mau lima. "Aole he mau hana hoao e hanaia aku no'u, e like me ia e kuu aloha no ka ike ia o kou aloha ia'u, aka he hauoli mau wau i ka lohe mai ia oe mai no ia mea." E hele koke mai oe i ke ahiahi o ka la apopo i nui ai ko kaua manawa e kamailio pu ai, no ka mea, ia'u i kali aku nei ia oe, ua kanalua mau wau i ka pio koke mai o ke kukui e a mai la ma kela pukaaniani mamua o kou hiki mai i o'u nei."

 

"E Hilda, aia a pau ka hana a kuu haku i makemake ai ia'u e hana. He kanaka paakiki oia ma kona ano, a ina oia e ike ana i keia halawai mau o kaua alaila heaha la kaua e hana mai ai ia'u.

"Heaha no hoi kou mea e hana aku ai nona. Ina oe e haalele iaia, alaila e hele no wau e ike i kuu haku wahine a nana ia e huli i hana nau a aole o'u kanalua i ka loaa o kau hana."

 

"Ua oi aku no ka maikai o ko'u hoomau i ka hana ana me ia mamua o ka noho hana ana aku me ka Akibihopa, no ka mea, he lohi loa ka hoopii ia ae o ka ukuhana a i ole o ke kulana hana paha, no ka nui ohua hana e like me kona." Mai poina oe i ka mea a'u i ha'i aku ai ia oe no keia pule ae, "e Hilda."

 

"No ka hoike ana aku anei i ko haku no ko kaua aloha ia kaua iho ame ko kaua hoopalau kau e manao nei?"

 

"E."

 

"Alaila ua hoike anei oe iaia? Heaha kana pane?" i ninau aku ai ka wahine.

 

"Ua ha'i aku wau iaia aka i ka la apopo wau e lohe ai i kona manao."

 

Ma keia manawa ua pio iho la ke kukui o ka pukaaniania a hoooho ae la ka wahine opio-

 

"E ua pio iho la ke kukui. Ua pau ko kaua manawa. E hoi au. Apopo hele mai oe."

 

"Me ka oiaio loa e hiki hou mai ana wau. Gudibai  e kuu aloha."

 

Aia he mau muki ihu hoomaumau ana o na opio a elua no kekahi manawa, a kaawale ana ka waa mai ka lanai aku, hemo mai la no hoi ke kaula a o ka holo malie aku la no ia o ua wahi waa nei. A hala iki kekahi mau anana ua noho iho la o Konorada a hoe ikaika aku, a emoole ua pili aku la lakou ma kae o Zulobena oiai oia ka inoa o ka hale o ka Barona i ka muliwai.

 

Ua lele aku la no hoi lakou apau me ka pane leo ole, a mahope o ka paa ana o ka puka o ka waa ua pii mai la o Konorada a oia no hoi ka manawa i pane aku ai ke Emepera.

 

"Ua hoike oiaio mai oe ia oe iho i keia ahiahi," a e hoopaa aku ana wau i ka'u olelo o ka haawi makana ana i ko Hilda. Aka no kekahi manawa e paa ka waha a hamau no hoi he mea hoi e alakai ana ia oe i waihona nou. E hoike aku ana ka Barona ia oe e hoolohe oe ia'u no keia mau la e like me kou hoolohe iaia."

 

Alaila unuhi ae la o Rodolofo a haawi aku la he mau dala ia Konorado, me ka pane pu ana aku.

 

"Ua lawa anei oe i keia." E hoomanao pu no hoi oe aole hookahi olelo e hoopukaia no keia mea o keia po."

 

"I ke kakahiaka, e haawi ai oe i ainakakahiaka no ke kanaka papa pua a hookuu pono aku iaia e hele ma kana huakai." wahi a ka Barona Sigifarai i kauoha aku ai i kana kanaka hana me na nauaina ano hakumakuma no nae.

 

Ua haawi mai la o Konorado he kunou haahaa me ka pane leo ole nae.

 

"Aole au i makemake loa i kela pane a ke kanaka-he kanaka pepehi pipi wau." wahi a ka Barojna i pane aku ai i ka Emepera oiai laua ma ke ala huli hoi.

 

"He mau olelo aloalo wale no kela a he ano ikiiki io no, aka ua oiaio ke kanaka iaia iho." wahi a ka pane a kona hoa.

 

Ma ko laua hiki ana aku i ka hale aia ke lewalewa la ke kaula o ka pukaaniani a ma ia kaula ko laua pii ana a noho ana iloko o ko laua mau lumi pakahi iho.

 

MOKUNA IV.

NALOWALE HONUA KA EMEPERA.

No ekolu la ka hele makaikai ana o ka Emepera ame ka Barona i ke kulanakauhale o Tarevis a ua loaa ia laua he mau ike nui a hoolana manao pili i keia kulanakauhale. Ma ka nana a na kamahele ua oi aku ka ikaika o na rula e maalahi ole ai ke komo ana iloko o ke kulanakauhale o Palanipoka ke kapikala hoi, oiai o Tarevis he palanaiki mai no a lahilahi iki mai no ka ikaika, aka i ka nana ana ma kekahi ano o ka mana oi aku o ke kaulele ia oia ko ka Akibihopa, a me he la, aohe ia mea he emepera malaila. O na makemake ame ka ole o ka Akibihopa oia iho la no ke kanawai no ke kulanakauhale.

 

"Ke manao nei wau.' wahi a ka Emepera ia Sigifarai, "aia a hoi mai au mai ka Aina Hemolele mai, alaila e hele mai au me ko'u mau puali koa e ike i ka bihopa ma ke kulana o ka oihana, no ka mea ke manao nei wau he nui ka poe koikoi o keia wahi aule i hoomaopopo lea i ka nui o ka mana hoomalu o ka Emepera iloko o keia kulanakauhale.

 

Ma keia hele makaikai ana o laua aia he elua a ekolu manawa o laua i hookui ia mai e na koa o ka Akibihopa, ame ke akamai no hoi ke kupale ana ua hemo mai no, me ke ano puikaika no nae. I ke kolu o ka la o ka laua hele ana, a nui no hoi ka la, a ma ko laua ala huli hoi i ka hale, ua halawai iho la laua me kekahi ke'ake'a ma ke ku ana mai o kekahi kauaka a kikoo ae la i kona mau wawae no ke paniku ana i ko laua nei alanui e hoi ana.

(Aole i pau.)

 

 

Loaa i ka Makani Taifuni,

Ma ke kakahiaka Poakahi o ka pule i haia i kapalulu mai ai ka leviatana Korea o ka moana Pakipika ma Honolulu nei mai Kina mai me 1268 tona ukana no keia awa.

 

Ma keia holo ana mai nei ana a mawaena o Yokohama ame Kobe, a ma ka la 22 ame 23 o Sepatemaba, ua loaa iho la oia i ka makani taifuni, a wahi a ke kapena, o keia ka oi ma kana ike ana. Ua haule iho ka barometa i ka 28.40 degere a ua komo aku ka moko iloko o ka ino nui no 14 hora. Ua hoikeia ae o ke kikowaena o ka ino oia no kahi a Korea i holo ae ai, eia nei ua lilo keia ino i mea liilii loa i ua levitana nei a ma ka hoomaopopo ana o ka poe e holo ana me ke mea la no aia no ia ke holo ia i ka wa maile. O ka hoike maopopo no keia oia no ka hoike ana o na ohua aole lakou i ike i ka loaa ana o ka moku i ka ino i ka po oiai aole i hoalaia ko lakou hiamoe a i ke ala ana mai i ke kakahiaka o kekahi la ae akahi no lakou a ike eia lakou ke holo nei iloko o ka ino. Ke manaoia nei o keia ka ino i piholo ai ka mokuahi lawe ukana Pelekane Finnisbury.

 

O KA PAAO KA LEO O KA BEBE i kaa malalo o ka naeoa iku he hoaliona ia o ka puka mai o ka ma'i. Ina e hoohana koke ia ka laau kunu CHAMBERLAIN'S COUGH REMEDY i ka manawa no e hoomaka ai e paa ka leo o ka bebe a i ole mahope iho o ka puka ana o ke kunu alaila aole he olelo ana no ka mea he mea maopopo loa ka hemo o la ano pilikia. Aole hala keia laau kunu mana hoola a he hala hakalia ole no hoi. O Benson, Smith & Co., Ltd., na Agena Kuai Kukaai ka poe e kuai nei i keia laau.