Ka Nupepa Kuokoa, Volume XLI, Number 45, 6 November 1903 — Page 2
| This text was transcribed by: | Kelly Murray |
| This work is dedicated to: | Kaleilani Alexander Pili Olsen |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, NOVEMABA 6, 1903.
KA NUPEPA KUOKOA
__
no ka Makahiki $2.00
No Eono Mahina 1.00
__
SUBSCRIPTION RATES.
One Year $2.00
Six months 1.00
O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA, E HOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.
__
O na Dala apau o ka Pepa nei e hoouna pololei mai i ka HAWAIIAN GAZETTE COMPANY.
__
HOOPUKAIA E KA HAWAII GAZETTE CO.
Mo komoia ma ka Hale Leka o Honolulu Pa @laau o Hawaii, ma ke ano mea o ka Papa Elua
DAVID L. A-I, Lunahooponopono A.W. PEARSON, LUNA NUI Honolulu, Oahu
_____
POALIMA NOVEMABA 6, 1903.
_____
HALA HE ELELE A HE LUNAKANAWAI.
__
O ka hala ana o R.W. Wilikoki i ke ala hiki ole ke hoi hou i keia honua oia ka hala ana o ke kanaka a Hawaii i koho ai a lilo ka hanohano o ke kulana Elele mua loa o ke Teritori o Hawaii nei i ka Ahaolelo Nui o Amerika Huipuia.
He alakai no hoi oia i lawe a ohaohaia e na Hawaii iloko o ka oihana kalaiaina, mai ka manawa ana i hoomaka ai iloko o ia hana a hiki wale no i kona moe ana aku la.
O ka lehulehu o ka Paeaina Hawaii ka i ike i kana mau hana a na lakou no e hoike ae i ka nui maikai ame ka ino o na hana i hanaia, a pehea la ko lakou nui, ame ke ano, ame ka hoopmaikai ame ka ole ua palapalaia iia mau mea apau iloko o na nupepa ame na palapala e ae o ka moolelo o keia Teritori.
Ma na mea apau iloko o ka lawelawe kalaiaina o Hawaii mai ka wa mai o na moi a hiki wale i ka hala ana aku la o keia kalaiaina oia nei paha ke alakai i kaa ae maluna o lakou apau ma ka loaa ana iaia kekahi haawina ume manao ano e i ke kanaka i loaa ole i na kanaka e ae ke kumu kupaianaha o keia kanaka mai ka hapanui ae.
O kana mau hana apau no ka lehulehu i ikeia o ka lehulehu no ka ike a o ka haule ana ona ma na komo kaua ana a ka lehulehu i ike ai, e na ai a malana wale ka mana ume o keia kanaka, he haawina i nele ole ka loaa i ke kanaka e emi mai ka manao nui aku o na kanaka iaia, eia nae, ua lilo no oia i mea nui iwaena o kanaka, i ka poe Hawaii no nae.
HALE PU HE KAUKA O KE KANAWAI.
Ua hala o Wilikoki, eia nae, aole e nalowale kana mau hana iloko o ka moolelo o keia Teritori o Hawaii, a aole no hoi i u iho ua hala pu aku ma ia alanui hookahi kekahi kanaka, he loea a he kauka hoi o ke kanawai, ka Lunakanawai M.M.Estee.
Iloko o ka moolelo o ke Teritori o Hawaii ame ko Amerika Huipuia o keia loea kanawai ka mea nana i lawe ae i ka hanohano mua loa o ka oihana lunakanawai o ka Aha Hookolokolo Apana o ke Aupuni o Amerika Huipuia ma Hawaii nei.
He hanohano keia i oi ae mamua o ke kulana Kiaaina o ka Teritori, no ka mea, o ke kulana kiaaina o ka Teritori, o ke kiekie ia maloko o ke ano ame kulana Teritori wale no, oiai ka Lunakanawai o ka Aha Hookolokolo Apana o Amerika Huipuia aia iloko o ke kulana Aupuni Nui, he kulana hoi i oi ae maluna o ke ano teritori.
Ma kono ana ia ma keia oihana iloko o Hawaii, a iloko o kona ola honua ana, oiai i Hawaii nei, ua lilo kana mau hana ame kona amo keonimana ame kona ano maoli a ka lehulehu i kamaaina ai nona i mea hoike he kanaka puuwai hamama no na hana maikai e pili ana i kana oihana.
He loea kalaiaina maopopo oia, i lilo ai kona mau manao alakai ma na ninau pili kalaina he haawina hoomalamalama i ka hapanui, he kanaka i ku ma ka aoao hookahi, a o kana mau manao pili kanawai a olelo hooholo paha no kana aha maluna o kekahi hihia ua oe ae ka waiwai io ame ka oiaio mamua o na wehewehe akamai ana a kekahi mau kauka loea kanawai.
Na kona moolelo i hoike mai nona iho i ke kulana makua maoli, a o kona hala ana aku la, oia no ka pau loa ana o kona ike ia ma keia ili honua a lilo i mea minamina nui loa ia aka o na hana maikai ana i hana ai maloko o kana oihana a ma na ano e ae i pu-a ai ka malamalama no kona hoakanaka aole loa ia e pau a e nalowale aka e lilo ia mau haawina maikai i kumuhoohalike na ka lehulehu e malama ai ma ke ano he rula kuhikuhi no ka nohona maikai ana.
_____
KE KIAAINA HOU A ME KA LUNAKANAWAI HOU O HAWAII.
__
Ma ka hala ana aku la o ka Lunakanawai M.M. Estee o ka Aha Hookolokolo Apana o ke Aupuni o Amerika Huipuia ma ka Teritori o Hawaii nei i ke ala hiki ole ke hoi hou mai, pela i waiho hakahaka ia iho ai ia oihana a he mea maopopo no ia he mea pono e hoopihaia ia makalua.
A maluna o keia ninau no ka hoopiha ana ua waihoia aku imua o Peresidena Rusawela o Amerka Huipuia, no ka mea oia ka mea i loaa ke kuleana e wae ai i kanaka e hoopiha ai ia wahi.
Ma na mea i loaa mai ia kakou maloko o ka uwea telegarapa ua ha'lia mai ka waeia ana o ke Kiaaina Dole o kakou e noho aku ma ia wahi, nela i pu-aia ae ai o ka Mea Hanohano S.B.Dole ka Lunakanawai Hou no Hawaii nei naloko o ka Aha Hookolokolo Apana o Amerika Huipuia he kulana hoi i hiki ole i kekahi oihana o ka Teritori ke kaulike ia no ka mea ua heluia aku ia maloko o ke kulana Aupuni Nui.
Ma ka manao o ke Kuokoa he kanaka kupono loa o Kiaaina Dole i hoonohoia aku la ma ia wahi no ka mea ua kamaaina oia i ka noho ana o Hawaii nei ma na kulana apau, iwaena o na lahui like ole apau, ua ike oia i ke alanui holomua o Hawaii, a ka lehulehu no i ike ai no lakou iho, alaila o kona kuluma i na hana aupuni o ka Teritori ame ka hui pu ana me kela o ke Aupuni Nui, a huiia me kona makaukau maoli e hiki ole ke hoopaapaaia, nolaila aia iaia ka haawina hiki iaia ke lawelawe no ka pono o ke Aupuni Nui ame ko ka Teritori.
O kekahi mea i oi aku ai o ka maikai oia ka waihoia ana mai la o ka hana ma ka lima o ke kanaka iho oloko o ka aina, e like me Dole, he kanaka e hiki ke hoolawa piha pono i na iini o ia oihana mamua o ka hoonoho ana i kanaka malihini, i maa ole i ko Hawaii nei mau ano, e like paha me ka wae ana mailoko mai o na aina hikina o Amerika a i ole o kekahi wahi e ae.
O keia wae noeau a hookohu ana a Peresidena Rusawela oia no ka mea nana i hoike ae i kona noeau ma keia kumuhana.
KE KIAAINA HOU.
I ka manawai i ikeia ae ai keia ano maluna o ke Kiaaina o Hawaii o keia mau la e hele nei, alaila ua hiki ia kakou ke ike iho i ka waiho hakahaka ia ana iho o ka noho kiaaina o ka Teritori a he mea kupono loa e hoopihaia, a e like me ka ike ana o ka Peresidena Rusawela no ka oihana lunakanawai pela no oia i maopopo ai i ke kulana kiaaina a oiai he mau malama wale no koe o Kiaaina Dole e noho ai ma ia wahi, oiai o Iune ae nei o ka makahiki 1904, ka manawa pau o kona manawa, alaila ma ka noonoo ana o ka Peresidena ua hiki mai la oia i ka panina, a o ka hua oia ka mea i hokeia mai maloko o ka uwea telegarapa, "George R. Carter ke Kiaaina."
He kanaka no keia no ka aina a o kona noho ana ma ka oihana kakauolelo no ka Teritori a hui me kona makaukau, ame ka hookamaaina i kela o ke Aupuni Nui alaila wahi a ke Kuokoa he kanaka kupono loa oia no ia noho, a o ka wae ana mai nei o Peresidena Rusawela a hookohu mai nei e like me ia i loaa mai ai ia kakou, aia nae ka maopopo loa a hoea maoli mai kona hookohu, a o ua hookohu ana mai la ana oia no ka hana nana e hoike ae i ke ano o ka Peresidena Rusawela, a oiai ua maikai a kupono maoli ia hana ana mai la ana alaila me ka hoopaapaa ole oia aku la no kona ano.
Ma ka aoao o ke Kuokoa ke komo pu nei oia iloko o ka manao pulama no ke Kiaaina hou me ka manaolana e mau aku ka holomua o ka Teritori maloko o kona manawa hana a ina he mea hiki e hooikaika a loaa ka mea i upu nui ia-ka loaa mai o ke kuleana mokuaina ia Hawaii.
_____
HE HOOPUNIPUNI HOME RULA ANEI IA.
__
O ka meahou hoolele hauli e puka aku nei ma ke Kiokoa o keia helu e pili ana i ke kukala a Akepoka ma kekahi Halawai Home Rula o keia kau holo balota aupuni kalana ana i ho la o Oahu nei, he kukala e olelo ana ua lohea mai ka leo o ka Elele Lahui Kalanianaole, e olelo ana-"Eia wau me oukou," ma kekahi olelo ana eia ke Keikialii ke kokua nei i ka aoao Home Rula a ku-e i kona aoao Repubalika, he makemake hoi kona e haule ua aoao la ona, o kekahi mea keia nana i hoopuiwa nui loa ae i na Repubalika ke kumu o ka uluku nui ana o na manao.
Ua ulu mai na manao like ole, a i ka manawa kupono, mahope iho o ka loaa ana o ke alanui kupono e noii ai i ka oiaio o keia mau kualehelehe, pela i ui aku ai na Repubalika i kahi e puka mai ai na hooialo ame ka ole maluna o keia kumuhana.
He mea oiaio o ka Elele Lahui oia no kahi o ke kumu no ka mea, mai iaia mai keia olelo e pono ai, no ka mea aole e hoopuka wale ia, a i ina aole mai iaia mai alaila he hookahi mea i maopopo loa he hana hoopunipuni wale no.
Ma ka manawa i hoea mai ai ka olelo a ka Elele Lahui mai Amerika mai mahope iho o ke telegarapaia ana aku e ko Honolulu nei poe Repubalika e ui ana i ka oiaio o keia mau lauahea, aia hoi ua ike maopopo ia ae la ka oiaio ole o na olelo i hoike mua ia ae nei.
Eia nae, ma ka aoao o ka mea nana i hoikeia ae nana i kukala keia ano olelo i ku i ka oiaio ole a he olelo hoopunipuni maoli ma kona kulana manao, e olelo ana maloko o ka nupepa Buletina Ahiahi, aole oia i hoopuka ia ano olelo, a oiai he Home Rula ua mea la, pela i ku ai ka ninau. "He Hoopunipuni Home Rula anei ia?"
Aia nae he mau mea i maopopo loa - akahi, ua puka ka ino i ke akea ina no aole i hoopukaia e keia Home Rula a hoopukaia paha, a o ka lua oia ka holoiia ana ae o ua ino hoinoino inoa mei mamuli o ka puka ana mai o ka oiaio mai ke kumu mai, e hoole ana i ka oiaio mai ke kumu mai, e hoole ana i ka oiaio o keia olelo hoonui ino.
Nolaila, ma ka aoao o ke Kuokoa ua nui kana makee i ka inoa maikai o ka Elele, no ka mea aia he manaoio iloko o makou aole ke alii he kanaka o ia ano haawina, a o ka puka ana mai la o ka oiaio mai iaia mai, he mea pono ka makaainana e holoi pau ae i keia ino i pu-a ae nei, a e hooholo iho ka lumanao aia ka Elele ma kona kulana kalaiaina ke hele la no ka hana ana i ka pono aole no ka mea hookahi aka no ka pono o ka lehulehu, a maloko o kona aoao oia e hana ai e like hoi me ke ano kalaiaina Amerika.
Aka hoi, ina ua hoopuka io ia keia ano ino me ka ike iho no aole he oiaio, aole i walaauia mai e ka Elele, a i manaoia hoi malaila ke kiina balota no ka hoonui huahelu ana, alaila ke pane nei ke Kuokoa aole i kanamai ka moowini, o ia ano papa hoohana, eia nae, aole no ia he haawina i hoohewahewaia ma ka aoao o kekahi poe Home Rula, oi loa aku i na alakai.
_____
Alua kau i haule pa-hu ai na Home Rula, ke Kau Holo Balota Ahaolelo ame keia Kau Koho Balota Kalana Maui Home Rula, Hawaii Hikina Home Rula, kona ikaika. Me he la he hookahi haule ana i koe o ka pio loa no ia pela i ka nana aku i kona kulana o keia mau la.
_____
Ke kau kehakeha nei na Repubalika o Oahu no ka huluiia aneane e pau loa na oihana kalana. -hoohalahala na Home Rula, nolaila wahi a lakou e helu hou ia na balota e pono ai.
_____
E like me ia e ku nei mahope o ke koho balota kalana a puni ka Paeaina, o na Repubalika no ka heke. Repubalika ma Oahu, Kauai, ame Hawaii Komohana.
_____
I na ai na like ola e hanu pono iho ma ka maikai ina nae i ku i ke kanawai aohe he hoohalahala no ka helu hou ana.
_____
MA KE KAUOHA
_____
Keena o ka Papa Ola, Honolulu, Hawaii Okatoba 29, 1903.
NA RULA AME NA KUHIKUHI NO NA MA'I LEPERA AME NA KOKUA E NOHO NEI MA KE KAHUA MA'I LEPERA O MOLOKAI.
(Hoolahaia i kulike me ka Pauku 993, P.L. 1897).
NA WAI INU ONA.
PAUKU 32. Aole kekahi mea e noho nei ma ke Kahua Ma'i Lepera, Mokupuni o Molokai, e loaa ka pono no ka hana ana, puhi ana a i ole ma kekahi ano okoa ae paha e lilo ai i waiona; a i ole e paa paha malalo o kona malu, kana malama ana a ona paha, a i ole e kuai a e hoolilo ma kekahi ano, i ka waiona i ikeia ma ka inoa "Suaina."
NA KA PAPA OLA
Ma o kona Peresidena,
CHAS. B. COOPER, M.D.,
Ikemakaia:
C.C. Charlock,
Kakauolelo o ka Papa Ola.
Ke apono a ke hooiaio nei au i keia rula maluna ae.
SANFORD B. DOLE,
Kiaaina o ka Teritori o Hawaii.
2988-Nov. 6,13,20.
_____
NA LILO KOHO BALOTA.
__
HOOLAHA I NA MOHO NO NA OIHANA KALANA.
__
Ke hoaiaiia aku nei na moho apau no na Oihana Kalana e pili ana i ka Pauku o na Rula ame Hooponopono no ka Oihana Hoohiki ame Malama Kau Koho Balota e like me ia i pakuiia e ke Kanawai e hoonoho ana i Aupuni no ka Teritori o Hawaii, e like me ia malalo iho:
Pauku 31. Maloko mai o na la he iwakalua mahope iho o kekahi koho balota ana, e waiho aku kela ame keia moho holo balota pakahi ame na agena pakahi a komike paha, e hooikaika ana no kekahi moho i ke Kakauolelo o ka Teritori, i hoike helu papa o kona a o ko lakou mau lilo koho balota no ua moho a koho balota ana la paha, e hoike ana i na huina pakahi i hooliloia; i ka manao ame ke kumu pakahi i hanaia ai ia hoolilo, i ke kanaka a mau kanaka paha i ukuia ai a e hookikiia ua mau hoike lilo la e kela ame keia mea nana i hana ia hoolilo a e hamama no ko ka lehulehu nana ana.
HOIKE INA AOHE MAU HOOLILO.
Pauku 32. Ina o kekahi moho, a i ole o kekahi agena a komite paha e lawelawe ana ma kona inoa, aole i hana i kekahi mau hoolilo no ia koho balota ana, e waiho aku oia a o lakou paha me ke Kakauolelo o ka Teritori maloko mai o na la he iwakalua mahope iho o ke koho balota ana i hoike i hoohikiia e wehewehe ana no ia mea.
NA LILO POLOLEI I AEIA.
Pauku 33. Eia iho malalo na lilo i ku i ke kanawai, aole o na mea e ae, e hooliloia ai no kekahi moho holo balota ma ke ano Senatoa a Lunamakaainana paha:
1. kona mau lilo pilikino ma ke ano moho holo balota.
2. Na lilo o ke pa'i a hoolaha ana ma na nupepa.
3. Na lilo o na lakou palapala me na pooleta.
4. Na lilo o na halawai makaaianana akea, ana.
5. Uku hoolimalima ame na hoolako ana i na Keena Komite, aole nae e oi aku mamua o hookahi no kela ame keia wahi koho.
6. Na uku o na Kakauolelo, aole e oi aku mamua o hookahi ame elua elele no kela ame keia wahi koho.
7. Na uku o na kiai aole e oi aku mamua o hookahi, ma ka la koho balota wale no ma kela ame keia wahi koho.
G.R. CARTER, Kakauolelo o ka Teritori.
C.R. BUCKLAND, Lunakakauinoa Koho Balota.
Hale Mana Hooko, Honolulu, Novemaba 3, 1903.
2988-Nov. 6,13,20.
_____
HOOLAHA PALENA AINA.
__
ua hoopanee ia ka noho ana o ke Komisina Palena Aina, i hoolaha mua ia no Hilo, no ka la 7 o Novemaba, a hiki i ka la 14, a o na hooponopono Palena aina o Kohala i hoolaha mua ia no ka la 14, o Novemaba, ua hoopanee ia a hiki i ka la 21 o Novemaba.
F.S.LYMAN,
Komisina Palena Aina, Mokupuni o Hawaii.
Oakland, Cal., Oct. 16, 1903.
2988-Nov. 6.13.20.
_____
Kakauinoaia na Bona.
__
Ma keia huli hoi ana mai nei o ka mokuahi Siberia i hoi mai ai o George R. Carter mai kana haukai aku nei no ke kalewa ana i na bona e like me ka mea a ka Ahaolelo i hooholo ai. Ua lawe pu mai oia me ia na bona i pa'i hakahakaia no ke kakauinoa ana aku o ka Puuku Kepoikai ame ka Mea Hoopaa Moolelo H.C.Hapai.
O keia ke hana nui loaa ae i ke Keena Waiwai a ua hoohalaia he manawa e ka puuku ame H.C. Hapai ma ke kakauinoa ana i keia mau bona. He 4 1-2 keneta ka ukupanee. Ua holo pu mai o F.H.Howland, ma ka aoao o ka hui nana e paa ana i kela mau bona, ame ke Keena Waiwai ae oia ma ka la i kakauinoa ia ai o keia mau bona.
Ma ka hoike a Geo. R. Carter o ka Teritori wale no o Hawaii nei ka Teritoi a Amerika i ae mua ai e hoopaa mai i kona kokua bona a he mea hou kela i ikeia ma ka moolelo o Amerika. Ma keia hana a Amerika i loaa ai ka aeia o kela mau bona, a he hoike hoi keia i ko Amerika manao maikai no keia Teritori a he mea hoi na na Hawaii e ike iho ai, o ka Repubalika ana maanei i like aku me ko Amerika pela no e loaa mai ai na kakoo ana mai ka aoao Repubalika mai a Amerika. O keia ae la kekahi mau hooia e hooia ana o ka aoao Repubalika oia ka aoao o ka holomua ame ka ike ia mai ma o.
_____
Ua olelo ae o William Henry, ka Lunahoomalu o ke komite Kalana o Oahu nei, e malamaia ana he halawai nui no ka lanakila i koaa iho la i na Repubalika.
_____
E Haawiia ka Pono i Kahi i Hiki mai ai.
__
NA KU-KA ANA ME KEKAHI KOA KAHIKO O KA PUALI KUMAU.
__
WAHI ANA, NA NA HUAALE AKALA A KAUKA WILLAIMS I HOOLA MAI NA ANO MA'I HAALULU ANA HOI E KAKOO IKAIKA NEI.
__
Aia he koa kahiko iloko o kekahi puali kumau, he koa hoi i noho iloko o ka Puali F. O ka Mahele koa nui helu 15 o Amerika Huipuia a he kamaaina i ike nui ia no Broadhead, Wis., o Mr. E.E. Eddy kona inoa ua makemake nui oia o ka pono he mea pono e haawiia i kahi ona i puka mai ai, a ma ka hui ku-ka ana ua hoike ae oia:
"He kanaka ma'i au o ka ma'i ano haalulu, a ina aole au i ike i na Huaale Akala a Kauka Williams no ka Poe Haikea i hoolahaia maloko o ka palapala ina ua noho loihi loa au iloko o ka pilikia."
"He pena papa kau hoolaha ka'u hana a no ka nui loa o ko'u nawaliwali mamuli o keia pilikia, ua hookuu aku la wau i ka hana a'u i kamaaina ai mamuli o ka hiki ole ke hana no ka nui nawaliwali."
"No elua pule holookoa wau i waiho ai ma kahi moe, a o na laau lapaau o ke ano mau ua hoohanaia aole nae he loaa o ka maha. Ua maalo ae ka ono ai mai ia'u aku a'u hoi i manaoio ai ua pilikia loa kuu akepaa a lilo iho la wau i mea manaolana noho."
"Mahope mai ua ike iho la wau i ka hoolaha o na Huaale Akala a Kauka Williams no ka Poe Haikea a hooholo iho la wau e hoao. Ia manawa koke no ua ike au i ka maikai mai o kuu mau a-u a pii ikaika mau ae la ka ikaika o'u i maalo ae i na la i hala. Ua loaa ia'u ka maha mai ka manawa mua no a'u i lawe ai i keia mau huaale."
"Ua ike koke iho la wau i ka ikaika mai o kuu mau aaololo, a hoi hou mai la ka ono ai me a'u, a pii hou mai la ka ikaika o kuu kino o iloko o ka manawa kupono ua hoi hou mai na mea i nalowale mai ia'u aku a ola loa ae la wau. Ke haawi nei au i ka pono o ka mahalo no na Huaale Akala a Kauka Williams no ka Poe Haikea, a ke hooaiai kakoo nei imua o ka nui lehulehu."
Na Huaale Akala a Kauka Williams no ka Poe Haikea he mana hoola ko lakou no na ano ma'i haalulu apau no ka mea aia iloko o lakou na ano kumu hoola oiaio o ka laau lapaau i huliia e Kauka Williams a loaa ka mea huli ko'a, a o ka nanehuna o ua ko'a la ua hoililiia lakou apau iloko o keia mau huaale.
Iloko o kela ame keia huaale aia he elua oihana lapaau - no ke koko a no ke aalolo. A no keia kumu oiaio i like ole ai keia mau huaale me na laau e ae, a no lakou hoi ka mana hoola i oi loa i ko na laau lapaau i hoohanaia a haule pa-hu ko lakou mana hoola.
Ua hoolaia e lakou na ma'i ano paakiki ma ka lapaau ana, o ka rumatika, ano lolo, eha o ka opu, nalulu o ke poo, ke ano ma'i mahope iho o ka hoola ana ae mai ka la garipa mai, ka fiva ame na ano ma'i ikiiki, ke kapalili o ka puuwai, hohoma a haikea o ka helehelena ame na ano ma'i kane a wahine.
I hoopomaikai ai kekahi mai na Huaale Akala mai a Kauka Williams, he mea pono e kii aku i na Huaale oiaio maoli a Kauka Williams. E loaa no mai na Halekuai Laau Lapaau apau a loaa pu aku no hoi ke hoouna aku i ke kumukuai he kanalima keneta no ke poho hookahi a he elua dala me kanalima keneta no eono poho laau, mai ke Dr. Williams Medicine Co., Schenectady, N.Y.
_____
He Leta.
__
"I ka Hui Hoolewa Harrison, ame kona mau Luna Nui, aloha kakou:" -O makou o ka poe nona na Inoa malalo iho nei he poe Hawaii Oiaio e noho ana ma ka Apana o Kamananui, Waialua, Oahu, a ma keia:
Ke hoike aku nei makou ma ke akea i ko makou apono me ka hooiaio a hilinai maoli i ka lawa pono o na mea apau i hoomakaukau ia e keia Hui Hoolewa no ka hiki ana mai i kou hora hope o kou ola ana ma keia ao.
I hoike no keia; ma ka la 10 o Sept. nei `1903, ua kipa mai la ianei ka Anela o ka make, a lawe aku la i a hanu ola o Kapea Kauila, w. he luahine nona na makahiki mawaena o 60 ame 80 paha, aka, ua hiki mua mai na agena o kela hui ma ka mahina o Feb., a i ole o Maraki o keia makahiki e ninau i ka poe e makemake ana e komo i keia hui. A ua komo io aku la oia a ua haawi aku i kana mau dala ekolu ($3.00) no kona hooko ana i na mea apau a kela agena i hooiaio mai ai ma kana olelo, a ua loaa pu mai hoi me na likiki hoiaio o ia mau dala.
A i ka la 10 o ka mahina i olelo mua ia ae nei, a i ka make ana o Kanea Kauila, w. i oleloia, ua kelepona, aku la kekahi o na hoaloha ma Waialua nei i ke keena o keia Hui ma Honolulu, a halawai a ku-ka pu a ike he lala io o Kapea Kauila w. iloko o ka Hui, a ma ka la 11 ae, ua hiki mai la ka Hale Pahu me ka wa-hi o waho, ma ke kaaahi, a ua hiki pu mai la me J.H. Townsend, a ua lilo aku la iaia na hooponopono naauao ana he hora a oia oia me makou i noho ai, a huli aku la ko ke kaona keiki.
Nolaila, e na hoaloha ame na makamaka Hawaii oiaio, eia ka nani, ka oluolu, ka ma-ha, he ekolu wale no wahi dala, komo ana ke kino i ka Hale Pahu maikai, he hui no ka poe ilihune, e kono mai ana ia oe e hoomakaukau no kou mau la hope e hiki mai ana. Nolaila, he mea pono e komo nui mai kakou iloko o keia hui, a ke haawi nei makou i ko makou hoomaikai a nui loa i na Luna Nui o ka "Hui Hoolewa o Harrison."
Me ka mahalo,
JOHN H. BARENABA, MRS. W. BARENABA, MRS. KAPEA KALAIKAWAHA EMILY AMAU, KAMAKA, MRS. PUAIOLE MAHELONA, MAS. WM. KALAIKAWAHA, MOSES KAOHE, MAKAULU, JOHN NEHEMIA.
______
Ma ka Poalua nei i holo aku ai ka mokuahi Mauna Loa no kona mau awa mau, mahope o ka pau ana o ke koho a kona mau pela.
_____
Lono Koho Balota ma Amerika.
__
Penei na lono koho balota ma Amerika i loaa mai ma ka uwea telegarapa, a ke koho balota o ka Poalua nei:
NU IOKA, Nov. 4. -O George B. McClellan, ka moho Meia a ka aoao Repubalike, ua kohoia oia a haule o Seth Low ma o na balota oi kelakela o 70,000. O na balota Repubalike e ae ua pau pu ma keia haawina.
KAPALAKIKO.
KAPALAKIKO, Nov. 4. -Meia Schmitz, ka moho a ka aoao o na Limahana, ua koho hou ia ma o na balota oi kelakela o 300.
MAKEKUKEKA.
BOSETONA, Nov. 4. -O ka paa balota Repubalika holookoa ka i puka me ka oi kelakela i ikeia i na makahiki i haia.
KENEKAKE.
LOUISVILLE, Nov. 4. -O Kiaaina Beckham. Demokarata, ka mea e noho nei ma ia kulana, ua koho hou ia no.
OHIO.
COLUMBIA, Nov. 4. -O Myron T. Herrick, ka moho Repubalika no ke kulana Kiaaina, ua kohoia ma o na balota kiekie o 100,000. Ka Ahaolelo he Repubalika, a e maopopo loa ai ka hoi hou o Mark Hanna i ka Aha Senate.
MERELANA.
BALATIMOA, Nov. 4. -Ua puka ae nei ke kiaaina Democarata a pela no hoi ka Ahaolelo e like no me ko lakou oi i na wa i hala ae nei. Ma keia e maopopo ai e puka ae ana o Gorman ma ke ano moho Democarata ikaika loa no ke kulana Peresidena.
LOKO PAAKAI.
LOKO PAAKAI, Nov. 4. -Ua kohoia ka moho Meia a ka Aoao Democarata.
COLORADO.
DENEVA, Nov. 4. -Ua lilo ka hanohano i na Repubalika, me ka puka pu o ka lakou moho Lunakanawai Kiekie.
RODA AILANA,
PROVIDENCE, Nov. 4. -Ua puka ae nei ka noho Kiaaina a na Democarata i wae ai.
NU IEKE.
TRENTON, N.Y., Nov. 4. -Ua puka na moho o ka Ahaolelo a ka aoao Repabalika.
IOWA.
DESMOINES, Nov. 4. -Ua puka ka moho Kiaaina a ka aoao Repubalika ma o na balota kiekie o 60,000.
_____
KUAI A KE KOMISINA O KA WAIWAI MA KONA AKAU, MAOKUPUNI O HAWAII.
__
Mamuli o kekahi Olelo Hooholoa i haawiia e ka Mea Hanohano J.T. DeBolt, Lunakanawai Ekahi o ka Aha Kaapuni Apana Ekahi, i hanaia ma ka la 16 o Okatoba, M.H. 1903, ma ka hihia i kapaia M.F. Scott ku-e ia E.K. Pilipo, ame kekahi poe e ae, ma ka Aha Kaulike, o ka mea nona ka inoa malalo iho ke Komisina i hookohuia e ka Aha, e kuai aku ana ma ke Kudala akea, a e aponoia nae e ka Aha.
Ma ka Poaono, Dekemaba 12, 1903, ma ka hora 12 awakea oia la, ma ka aoao mauka e komo ai i ka Hale Hookolokolo ma Honolulu, i na kuleana apau o na poe apau i kuleana ma ua hihia la ma ka hihia i oleloia maluna a o lakou pakahi hoi a pau iloko o kela apana o Holualoa 1 ame 11 Kona Akau, ma ka Mokupuni o Hawaii, a i hoikeia ma ke kuleana Helu 7713 Apana 43 ma ka inoa o V. Kamamalu, a ke waiho nei hoi mauka o ka 1000 Eka i hookaawaleia no M.F. Scoot, a e pili pu ana hoi me ua Apana Aina la, a mauka hoi i ke alanui Aupuni ma Kona Akau; a o ka aina e kuai ia ana, ua hoakakaia penei:
E hoomaka ana ma ke kihi Hikina Akau, ma ke kihi o ka 1000 Eka i hoolimalimaia, a e holo ana penei ma ka meridiana oiaio:
1. Hik. 55 deg. 15 min. 42 sek. Ak., 22118 kapuai e pili ana ia Puapuaanui ame Puaa 1 a hiki i ke kahua Ana Aina ma puu Laalaau, mailaila ae;
2. Hik. 28 deg. 00 min. 45 sek. Hema, 10841 kapuai e pili ana me Keauhou 2 a hiki i ke kihi Hikina Akau o Kaumalumalu;
3. Kom. 56 deg. 48 min. 56 sek. Hema, 18850 kapuai a hiki i ke kihi Hikina Hema o Holualoa 4:
4. Kom. 22 deg. o4 min. 00 sek. Akau, 1716 kapuai:
5. Hema 72 deg.00 min. 00 sek., 5130 kapuai:
6. Kom. 14 deg. 50 min. 00 sek. Akau 7550 kapuai a i kahi i hoomaka ai, a ma ia aina he 5189 Eka.
E kuai ia ana ua aina la ma ke kumukuai koho aku he Elima Tausani Dala kuike. O na lilo o na Palapala na ka poe kuai mai; a e paa ana no hoi malolo o ke koena i koe o ka hoolimalima o ua aina la i hanaia e William R. Kakela ia M.de Gouveia a i konela ma ka Buke 140 aoao 437.
O ka aina maluna ae oia kekahi o na aina hanai holoholona ma Kona, a i ole, oia no ka aina Helu Ekahi.
No na mea i koe e ninau i ke Komiina, a i ole ia, ia J.K. Nahale, Kailua, Kona Akau, Hawaii, a i ole ia W.C.Achi o Honolulu Oahu.
W.A.WALL, Komisina.
W.C. ACHI, Loio no ke Komisina.
Honolulu, -Okatoba 23, 1903.
2987 - Oct. 30. - Nov. 6, 13, 20, 27 - Dec. 4, 11
_____
O KA PAA O KA LEO O KA BEBE i kaa malalo o ka naeoa'iku he hoailona ia o ka puka mai o ka ma'i. Ina e hoohana koke ia ka laau kunu CHAMBERLAIN'S COUGH REMEDY i ka manawa no e hoomaka ai e paa ka leo o ka bebe a i ole mahope iho o ka puka ana o ke kunu alaila aole he olelo ana no ka mea he mea maopopo loa ka hemo o la ano pilikia. Aole hala kela laau kunu mana hoola, a he hala hakalia ole no hoi. O Benson, Smith & Co., Ltd., na Agena Kuai Kukaai ka poe e kuai nei i keia laau.
_____
HOOLAHA KUMAU
_____
LEWERS & COOKE LUI A ME KUKE, Kaupalenaia
Na Mea Hookomo mai a Kuai aku i na LAKO HANA HALE
O Kela ame Kena Ano. Malaila e loaa ai na mea malalo iho@
__
NA PAPA N.W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.
O na kauoha pono hale apau loa a hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
_____
Hui Alahao ame Ainao Oahu MANAWA HOLO Mei 1, 1903.
MAI HONOLULU AKU
No Waianae, Waialua, Kahuku ame na wahi hoolulu ma e alahao -
9:15a.m., 3:30p.m.,
No Pearl City, Ewa Mill, ame na wahi hoolulu ma ke alahao -
7:30a.m., 9:15a.m., 11:05a.m., 3:15p.m., 3:20p.m., 4:15p.m., 5:15p.m., 9:30p.m., 11:15p.m.
MAI WAHO MAI.
Ku i Honolulu mai Kahuku, Waialua ame Waianae mai
8:36a.m., 5:31p.m.
Ku i Honolulu mai Ewa Mill ame Pearl City mai -
6:50a.m., 7:46a.m., 8:36a.m., 10:33a.m., 2:05p.m., 4:31p.m., 5:31p.m., 7:40p.m.
5:31p.m., 7:40p.m.
Kela ame keia la.
Sabati wale no.
Koe ke Sabati.
G.P. DENISON, Lunahoohana.
F.C. SMITH,
G.P. & T.A.
_____
Kakela me Kuke [KAUPALENAIA]
__
Poe Kalepa ma ke Komisina A HE POE LAWELAWE KOPAA
__
Poe Agena no na Mahiko Lehulehu.
_____
KAUKA T. MITAMURA
Alanui Kukui Ololi Helu 68. Honolulu Na Hora Hana:
Hora 8 a 10 kakahiaka; hora 1 a 3 ame hora 6a.m. 8:00p.m Sabati Hora @ a 8p.m.
Telepone Blue 2366 P.O.Box 462
_____
He Huaale Maikai
Aole he like e na
Huaale a Ayers"
me na huaale e ae no ka mea he @ huaale kokua keia i ka hana a @ naau, a he laau hoomaha maikai @ hoi. Ina he paa kou hanalepo @
"Huaale a Ayers"
ka laau e hemo maikai ai, a e @ maikai mau ana hoi mahope @ oia manawa.
Aole loa he hiki i kekahi kana@ Olelo ae he maikai kona oia @ ina aole he hemo o kona hanalepo @ he hookahi manawa o ka la, a o aku @ paha. Ina i maopopo keia kanawai @ ke ola i na kanaka apau, aole @ e like ka nui o ka poe ma'i me @ mea e ike ia nei i keia mau la.
Ua hana ia owaho me ke kopaa @ maikai loa ka lawe ana.
Aohe mau Huaale i oi ae ka mai@ mamua o na
"Huaale a Ayers"
Hoomakaukau ia o Kauka J.C.Ayers & Company, Lowell, Mass. U.S.A.
E loaa no keia mau Huaale ma @ Hale Kuai Laau o Hollister, alanui @ Papu.