Ka Nupepa Kuokoa, Volume XLI, Number 43, 23 ʻOkakopa 1903 — Page 6
| This text was transcribed by: | Kina'u Mckeague |
| This work is dedicated to: | No kuʻu Tūtū, Helen Lilia Kaluakanawaliwali McKeague. With all my heart, Aloha wau iaʻoe. |
Ka Nupepa Kuokoa
KE KILOHANA POOKELA NO KA LAHUI HAWAII.
HE MOOLELO NO KE
KAUNAWAHINE
O KE KULANAKAUHALE O TAREVIS.
KE ALOHA I KA MAKA PAHIKAUA.
MOKUNA I.
KIPA KA EMEPERA I TAREVIS.
"Ua manao wau maanei no kaua e ku ai no ka mea, malia o ninauia mai kaua i ka manawa e puka mai ai kaua iwaho nei."
Ma keia manawa ua kuene pono ae la laua ma kahi e ike pono aku ai i ka huakai oiai ka nui o na kanaka mai ka poe helewawae ame ka poe kaulio e olelo ana a na koa kaulio hoi e hooikaika ana e kaawale maikai ke alanui no ka huakai e puka mai ai. A iloko o keia ano ua hoooho ae la kekahi poe he hoailona eia ae ka huakai a oia no ka manawa i pane mai ai kekahi koa i ke kanaka opio malihini me kona hapai pu ana ae i kana ihe.
"Heio, wehe oe i kou papale, iea ae kou Haku ka Akibihopa."
Me ka hikiwawe loa o Rodolfo i unu ae ai i kona lima no ke kumu o kana pahikaua, aka ua kaomi e koke ia mai la oia e kona hoahele e hoomanao mai ana iaia no kona kulana a oia no ka manawa a ua opio nei i hoololi ae ai i ka oni ana o kona lima iluna a loaa kona papale e kau ana ma kona poo a wehe ae la, a hookahi wai o ka like i kana nana ana aku i ke anaina kanaka e kuku ana iluna e kau ana iluna o na lio-o ka hemo like o na papale mai o a o i hiki ai ke ku aku imua o ka Akibihopa manao ano kiekie.
Ua hoea mai la ka huakai-o ka mua he poe kaulio alaila o ka Akibihopa a o ka hope o ka huakai he poe kaulio no. O Anola @ona Isenboga, ka Akibihopa, aia oia e noho ana iluna o kona kaa me ka pololei o kona kino, i ka nana aku me he koa la oia a aohe hoi he wahi helehelena kahunapule.
Ma kona aoao hema e kau ana kekahi kanaka aoo ma ka lio a e kukai kamailio ana i kekahi manawa me ia. O Kauna Bitarika kona inoa a he koa@i hilimai loa ia e ka Akibihopa mamuli o kona ikaika ame ke akamai kakapahi a ua kaulana oia ma na wahi apau o ka aina. He oi aku ka hilinai o ka Akibihopaiaia mamua o na koa lehilehi e ae ona, a no ia kuu i loaa ai ka manao lauahea i ka lehulehu i ka haawi hololea o ka Akibihopa i kona ae no ka mare o ua koa nei i kana kaikamahime hanai, ka wahine opio e kau ana ma kona lio a e ukali ana hoi ma ka aoao akau o ua kahunapule nei.
He wahine opio u'i a nohea maoli kona helehelena a e kau haaheo ana oia maluna o kona lio keokeo maikai me ke ano ikaika o na maka a ano pupuku me he la i ka nana aku in a he mea oiaio keia mare alaila aole he wahi lihi iini iki o ia ano iloko o ka puuwai o ka wahine opio.
I ka manawa i hala ae ai ka huakai aia no ka Emepera opio ke nana la i ka huakai me ke ano kamaha'o no nae o kona noonoo. Ma keia anaina ua loaa like aku no na noonoo ano e iloko o na kamahele o ke alaloa no ke ano nanaina ikaika o ka Akibihopa, a no ia mea ua ninau aku la ke kanaka aoo i ka manao o ke kanaka opio ma ka pane ana:
"Ikaika ka nanaina a ano uahoa maoli i ka nana aku. He hoaloha ano puanuanu ma ka launa ana. Pehea la kou manao nona?"
"He ano puanuanu io no," wahi a ke kanaka opio i pane hoopahemohemo aku ai oiai no nae oia e nalu ana iloko ona i ka helehelena nohea ana i ike ai iloko o ka huakai ma ka aoao akau o ka Akibihopa, wahi ana e nalu ana he helehelena e moeuhane ai a e waiho ai ke ola nona, no ia mea ua ui koke aku la oia:
"Owai hoi kela wahine opio?"
"Ke kaunawahine Tekala ia," wahi a Sigifarai i pane aku ai me na olelo pokole.
"Aka owai hoi paha oia" i ninau hou aku ai ka Emepera ma ke ano he kauoha.
"O Kaunawahine Tekala oia ke kaikamahine hanai a ka Akibihopa. Ua make kona makuakane iloko o ka noho oihana ana me ka Akibihopa a ua oleloia oia ke kanaka hookahi i punahele loa ia Iseneboga. O ka pili wale no i koe o kela kaikamahine oia o Henerika Paele no ke Kakela o Turona, kokoke i Kobilene. O kona makuahine oia ke kaikuahine ponoi o ua Paele nei."
"O kela nowa! oia no ka mea i malele ole ai oia mai kona kahu hanai aku."
"Ua hooikaika nui ka Paele no ua kaikamahine nei eia nae aole i lawa kona ikaika i ka nana aku no ka mea aole oia i hoao e limaikaika, ka mea hoi i manaoia o ka opa pu ia ana o ka pupu a palahe e kekahi kamaa e hehi iho ai iaia ua like me ka ka Akibihopa hana e hana aku ai maluna o ka Paele."
"Ke kaunawahine Tekala," wahi a ua kanaka opio nei i hawanakana iho ai me ka nune nui o kona noonoo, alaila pane maopopo maoli aku la i kona hoahele. "Oia kekahi o na hiohiona nani loa i maalo ae mamua o ka maka o ke kanaka."
"Ua hoopalauia oia i ke Kauna Bitarika ke koa e hele ana ma ka aoao hema o ka Akibihopa," wahi a Sigifarai i pane aku ai.
"Pehea! o keia kanaka uahoa i linalina kona ihu i ka moku a ka pahikaua? Aole e hiki ia'u ke manaoio i kena. Ua nani loa kela wahine opio nona," wahi a ka Emepera i kalele aku ai i kana pane ana.
"E Rodolfo, ke kahea aku nei au ia oe pela e like me kau i ae mai ai ia'u e kahea aku ia oe pela, wahi" a ke kanaka aoo. "ua lohe mo hoi au nou ma ia haawina hookahi oia hoi aole o oe hookahi wale no."
"Hoopunipuni," i hooho ae ai ka Emepera me ke ano huhu, aole au i hoopaa ia'u iho me kekahi mea. O kena ano olelo i hoikeia mai ia oe oia kekahi o na olelo haahaa loa.
Ia laua e kamailio ana oia no ka manawa a kekahi mau koa kiai elua i hoomoe ke'a ae ai i ka laua mau ihe a paa ana ko laua nei alanui e hele aku ai ma ka puka-pa.
"Maihea mai?" wahi a ka ninau a na koa.
"Mai Palanipoka mai."
"Heaha ka hana o ka hele ana i Tarevis nei?"
"He mau kanaka maauauwa kilika maua."
"Auhea ka palapala hooiaio?"
Alaila haawi aku la o Sigifarai i ko laua mau palapala o ka oihana a i ka manawa i nana pono iho ai o ke koa nana ka ninau ua pau loa ae la kona kuhihewa a lawa pono kona makemake a haawi hou mai la i ua mau pepa nei.
"Heaha ka mea hou o Palanipoka? A pehea ke kulana o ka Emepera o kakou?" wahi a ua koa nei i ninau mai ai.
"Ua hala aku nei oia i ke kaua o ka Aina Hemolele," wahi a Sigifarai.
"Aole anei i lawa na hooku'i o ka aina nei nona e hui aku ai he alo a he alo mamua o kona nana aku no ko waho? Ua lohe au he kanaka wiwoole a maka'u ole oia i oi ae mamua o kona ano koa," wahi a ke koa kiai i pane mai ai.
"Aole pela ka oiaio, wahi a Sigifarai i pane aku ai me ke ano ikaika o ka olelo.
"O ke ano wiwoole a maka'u ole ame ke ano koa na haawina i loaa aku iaia." wahi a Rodolfo i pane kahamaha aku ai no kona kuha'u iki o lilo ke kumuhana i mea e alakai aku ia laua iloko o ka hoopaapaa a komo iloko o ka hakaka.
Ma keia manawa ua hoomaka aku la ua mau kamahele nei e hele malalo o ke alakai ana a ka hoahele aoo a hiki i ko laua kipa ana ma ke alanui olo-wi a haiki mai ko ke alanui aupuni. Ma keia alanui olo-wi au hiki ole i ko laua lio ke helepapa like aku a nolaila he mea pono e hele aku kahi mahope aku o kekahi.
E like me ko laua komo loa aku iloko pela ka malu loa iho, no ka mea, aia he pa kiekie manoanoa ma na aoao a elua me he pa paahao la a wahi paha o na wilikina a i ole he wahi noho no ua moneka. Ua palaina-punaia ke alanui a he kamumuhele ia o ke ala olo-wi i ke koele a na kapuai hao o na lio.
Me keia ano ka laua hoomau ana me ka pane leo ole a hiki i ka manawa ana i ninau okoa aku ai i kona hoahele.
"He mea oiaio," wahi a ka Emepera i pane aku ai @ i ko'u haawi i ko'u hilinai ia oe, no ka mea, aole he kanaka e ae mawaho ou e hiki ke alakai maalahi iloko o keia ala olo-wi me he la e alakai ana i kahi paahao e like me ka iole e paa ai iloko o ka hale iole. "Heaha keia hale nui e ku mai nei mamua pono o kaua. Ke manaoio nei au aole kela he hotele?"
Ua huli mai la o Sigifarai i hope a pane mai la me ka leo hawanawana e lohe ole ia mai ai e kekahi kanaka.
"Oia ko'u hale, a he oi aku ka malu e loaa ia oe malaila mamua o ka hotele," wahi a Sigifarai i pane aku ai.
Aole i liuliu ua hiki pono aku la laua mamua pono o kekahi puka-pa nui nona na pani-puka e pani ae ai a paa ka ipuka. Aia he wahi apo-hao e kau ana ma ke kikina puka-pa e loaa maalahi ai i ke kanaka kaulio a e loaa pu ai no hoi i ke kanaka helewawae ke kikoo ae.
Alaila hele loa aku la ka hoahele o ke kanaka opio a huki mai la i ua apo-hao uuku nei a emoole ua lohe aku la laua i ke koele iki ana o ka bele iloko o ua pa nei, a mamua o ka pau loa ana o ke o o ke kani o ka bele ua hoaikiia mai la ka puka a e nana mai ana he elua mau maka maloko mai o na kukulu hao o ka puka-pa a emoole ua hamama a manoanoa i hope, a oia no hoi ka wa o na kamahele i komo koke aku me ka hookaulua ole iho.
Lele mai la laua mai na lio mai me ke ano maluhiluhi o ka hele ana o ke alaloa, a alakai aku la ka mea nona ka home i ke kanaka opio iloko o ka hale. Pii aku la laua ma ke alapii a komo aku iloko o kekahi holo (hall) a malaila aku iloko o kekahi lumi nui akea o ke ano huina-ha nona na pukaaniani elua i hoohamamaia na puka-olepelepe aka ua paluluia mai owaho me na kukuluhao makaupena.
A ma kekahi o na pukaaniani ua hele aku la o Rodolfo e nana iwaho a ike aku la oia i ka waiho maikai mai o ka aina ame ke kulanakauhale ame ka muliwai Mose-le, a nui iho la o kona mahalo i ka nani o na hiohiona. A oiai aia ka la ke iho hikiwawe la ua ano uhi mai ka poeleele a ike maopopo ole ia aku la na wahi mamao e ae o ka aina.
"He wahi maikai loa keia no ka nana ana i keia mau hiohiona nani o ka aina, e ka Barona Sigifarai," wahi a ka Emepera opio i pane aku ai
"Ae, a he wahi no e pakele ai," wahi a ka Barona.
"He wahi e pakele ai?" i hoooho aku ai ka Emepera.
"E hoomaopopo oe, he hookahi hale ke kiekie ae o keia hale maluna o ka pa o keia kulanakauhale. Aia he kaula e lewalewa ana mawaho o ka pukaaniani kahi e iho ai ke kanaka in a no kona pakele, ua hiki loa oia ke iho ma keia kaula a hiki ilalo a he nui ka aina nona e holo ai mamua hoi o ka manao ana e onou poo maoli aku ma ka puka-pa."
"Oiaio," wahi a ka Emepera i pane aku ai me ka minoaka ana iho, "aka pehea la e hiki ai i ua kanaka la ke iho hikiwawe ilalo iloko o ka manawa kupono. He manawa loihi ia nona e apuapu ai i kela mau kukulu-hao makaupena e pani-ku mai nei i ke ala e loaa aku ai ke kaula. "He akua lapu maoli no paha oia e hiki ai oia ke poholo aku mawaena o kela mau kukulu-hao."
"Pela no, aka he maalahi loa ke ala ke ike oia i kona wahi huna."
Ma keia olelo ana ua kalele aku la kona lima ma kekahi waiho ka pukaaniani a malele ana ua mau kukulu-hao nei a i ka ume koke ana aku o ka Barona o ka hemo aku la no ia o ua mau kukulu-hao nei ma ke ano he pani-puka, a hamama ana ka pukaaniani.
"Nui no ke akamai o ka hana ana ame na hoolala ana no keia mea huna," wahi a ka Emepera i pane aku ai me ke ano kamahao.
"Aia he pokaa kaula ma ia wahi au e hehi la," wahi a ka Barona i pane aku ai, "a hoomaka aku la oia e peku i au pokaa kaula la a lele ana ilalo. Ua hoopaaia kekahi piko i ka linahao mawaho o ka pukaaniani."
"He wahi kupono loa keia i ka hoopakele ana i ka ipo," wahi a ke kanaka opio i pane ae ai ma kona hoomanao ana ae i ka helehelena u'i nohea o ka wahine opio e hele ana ma ka aoao o ka Akibihopa.
"Ua hanaia keia mea no ka hoopakele ana i ke kanaka mamua o ka hooili ana i ka poino maluna ona," wahi a ka Barona.
Ua akaaka leo nui ae la ka Emepera ma keia wehewehe a kona hoa.
"Eia nae," wahi ana i pane aku ai, "ina me a'u ka ipo iloko o keia lumi aole no paha oia e hoomaopopo ana i keia mea huna, aka, he makemake ko'u e ninau aku ia oe, a e kala mai oe ia'u i ko'u komo loa iloko o kou kuleana, i mea e pau ai ko'u ano pohihihi, heaha la ke kumu o keia mau mea apau?" Ua hanaia anei keia mau mea no'u no ko'u maluhia "no ka mea i ka nana aku o ka hana koke ia ana iho nei no ia o keia mau mea, aohe he ano popopo?"
"Aole, e like me ia au e ike la pela no ia mai kinohi mai o ka hanaia ana. Aole i maopopo ia'u ka moolelo o keia mau mea. Na kuu makuakane i hana i keia maumea a o ka manao nui no nae oia no ka hoopakele i ke kanaka mai na ano ino aku o keia kulanakauhale hoopilikia nui wale. O kekahi mea kupaianaha a kuu makuakane i malama mau ai a he mea nui no hoi ia iaia, a no ia kumu ua malama wale iho no wau ia mea me ko'u ike no i ka waiwai ole o ia mea ia'u."
"Heaha ia mea kahiko?" wahi a ka ninau.
"Aia maluna pono nei o kaua i keia manawa ke ku nei he kiai, iloko o ia wahi e noho mau ai oia i na manawa apau i ke ao ame ka po. I ka manawa ana e ike ai i kekahi kukui i ka po i ka hale e ku nei ma kae o ka muliwai a lohe paha i ka leo mai ka muliwai mai ina no i ka po a i ke ao, alaila, e holo koke mai ana oia iloko o keia lumi a hookuu koke aku i ke kaula no ka hoolewalewa ana ilalo. E like no me ka'u i olelo mua iho nei aole au i ike i ka waiwai, aka he hoao no nae wau i ka'u mau paau'a ma ka pinana ana ma keia kaula."
"Pehea la i hoohuoi ole ia ai oe e ko Tarevis ma kou ano he kalepa no ka mea, he kamaaina oe noonei a he home hoi kou i ike nui ia?" wahi hou a ka Emepera.
"O kuu manao ua ike nui ia wau aole iloko o keia home aka aia ka manao o ka lehulehu no'u i ka home ma ka'e o ka muliwai Mose-le a i Palanipoka no hoi, a o ka lakou upu nui ana paha aia wau i Pai@@poka i ka hapanui o ka manawa a he mea oiaio no ia." Ke manao nei au i keia manawa he mea kupono ia oe e hoomaha a o ka lumi e pili kokoke ana i keia keena oia ana kou lumi a ke manao nei wau e loaa ana i ka Mea Kiekie ka maha mai keia luhi a kaua i hele mai nei."
"He hookahi a'u ninau i koe a o ka pau no ia, a oia keia, o kela hale e ku mai la ma ka'e o ka muliwai, nou anei ia hale?"
"Ae, he wahi hale uuku ia aka he hap a no nae no keia home. Oia kahi a'u e malama nei, he lio holo mama loa a he waapa holo loa a o ke kanaka e loaa ana i ka uhaiaholo a ka poino a makemake e pakele e hookuukuuia no oia mai keia pukaaniani aku a maluna o kekahi o laua e holo ai oia i pakele ai."
"Ua pomaikai kaua in a e loaa ana kekahi hoohuoi ma ko'u aoao au hiki loa ke malele aku mai ka poino aku me ka maalahi," wahi a ka Emepera.
"He mea oiaio ua oleloia aohe mea waiwai ole ma ka honua nei noka hoowaiwai ana i kekahi mea," wahi a Sigifarai.
"Alaila lalau aku la ka Barona i ka mea e paa hou ai na kukulu-hao o ka pukaaniani a o ka hoi hou ae la no ia o lakou a ku ana ma kahi mau me he la aole i hoonioniia. Alaila ua komo mai la ke kuene a hoike mai la au makaukau ka papaaina a o ka iho aku la no ia o na kamahele o ke alaloa no ka papaaina.
(Aole i pau.)
-----
HOOLAHA HOOKO MORAKI.
---
HOOLAHA MANAO PANIKU A KUAI A KA MEA PAA MORAKI.
---
M. G. SILVA.
---
Ke haawila aku nei ka hoolaha mamuli o ka mana kuai iloko o kekahi moraki o ka mana kuai iloko o kekahi moraki i hanaia e M. G. Silva o Honolulu, Mokupuni o Oahu. Teritori o Hawaiii, ka mea Moraki Mai, ma ka la 7 o Mei, 1902, ia'u i ka mea nona ka inoa malalo iho o Ernesto Machado o Honolulu i olelo mua ia ae nei, ka mea Paa Moraki, he moraki i kakau kopeia iloko o ke Keena Kakau Kope Aina o Hawaii Paeaina, iloko o ka Buke helu 237 aoao 48 a ka aoao 50. Owau o Ernesto Machado i oleloia ke manao mei i paniku i ka moraki i oleloia no na kumupaa ame ka ukupanee i ka manawa e uku ai.
Ke haawi pu ia aku nei no hoi ka hoolaha o ka waiwai apau loa i hoopaaia iloko o ka moraki i oleloia e kuai ia aku ana ma ke kudala akea ma na keena kudala o James F. Morgan, Alanui Kaahumanu, Honolulu, i olelo mua ia ae nei, ma ka Poaono, ka la 24 o Okatoba, 1903.
O ka waiwai i hoopaaia maloko o ka moraki i oleloia a e kauiia aku ai e like me ka hoike maluna ae oia kela palapala o ka hoolimalima helu 170, i haawiia ia John H. Brown e ke Komikina o na Aina Leialii ma ka la 25 o Maraki, 189, e hoolilo pau loa ana i kela mahele a apana o ka aina e waiho la i Auwaiolimu, Apana o Kona, Mokuuni o Oahu, Teritori o Hawii, a i hoakaka pono loa ia e like me ia malalo iho:
E hoomaka ana ma ke kihi Hikina o ka apana kahi o ka ma-ka nona ke ana Akau 50 deg. 25. Kon. 376.S kapuai mai ka pou i kukulu paa ia ma ke kihi Hikina-hema o na Alanui Kinau ame Alapai e holo naa hoi na palena e like me keia malalo iho:
1. hema 55 deg. 49 min. Kom oiaio 389.5 kapuai holo ma ka aina Leialii;
2. Akau 31 deg. 3 min. Kom. oiaio 318.5 kapuai holo ma na apana o Brown ame Davidson;
3. Akau 60 deg. 24 min. Hik. oiaio 445.5 kapuai holo ma ka apana o ka Halema'i Moiwahine a hiki i ke kihi o ia apana no;
4. Hema 18. deg. 30 min. Hik. oiaio 253.2 kapuai holo ma na Aina Leialii a hiki i kahi i hoomaka ai a nona hoi ka iliaina o 2.68 Eka, no ka manawao umi-kumamalima makahiki mai Aperila 1 aku, o ka makahiki 1891, no $100.00 ukuhoolimalima no ka makahiki hookahi (koe nae mawaho o kela hana ka hapa o ka aina i oleloia i hoolimalimaia e Catherine K. Brown ia J. G. Faria ma kekahi palapala i hanaia ma ka la 15 o Mei, makahiki 1900, a i hoakakaia e like me ia malalo iho: e holo ana 112 kapuai ma ka apana o Onterio Guwai ma ka aoao mauka; 113 kapuai ma ka aina hoolimalima o Kapiolani Estate ma ka aoao Waikiki; 112 kapuai ma ka aina o W. J. Smith Estate ma ka aoao makai, ame 120 kapuai ma ka apana o C. K. Brown ma ka aoao Ewa; a pela no hoi kekahi apana o ka aina i oleloia i hoakakaia e like me ia malalo iho; E hoomaka ana ma ke kihi o keia mau apana ame ka aina o ka Halema'i Moiwahine a holo ma ka ainao Martha Swinton he 207 kapuai; malaila aku holo ma ka aina i hoolimalima ia Faria he 120 kapuai; malaila aku holo ma ke koena o keia mau aina he 51 kapuai; malaila aku holo ma ka aina e paaia nei e Silveira Fernandez he 94 kapuai a ma ia wahi hookahi no he 140 kapuai; a holo loa aku no ma ko ka Halema'i Moiwahine aina a hiki i kahi i hoomaka ai he 16 1-2 kapuai.)
Pau pu me na ukuhoolimalima apau loa ame na hoolimalima liilii maluna no o ia aina hookahi a o ua poe hoolimalima liilii nei oia keia malalo iho:
M. G. Silva ia Albina Ferreira hanaia i Sepatemaba 10, 1901, $40.00 ukuhoolimalima no ka makahiki hookahi, e pau ana ka manawa i Aperila 1, 1906.
Catherine K. Brown ia J. M. Vivas i hanaia Novemaba 25, 1898, $40.00 ukuhoolimalima no ka makahiki hookahi, e pau ana ka manawa i Aperila 1, 1906.
Catherine K. Brown ia Antone Silva, i hanaia i Ianuari 26, 1895, $45.00 ukuhoolimalima no makahiki hookahi e pau ana ka manawa i Ianuari 1, 1903.
Catherine K. Brown ia Antone Louis i hanaia i Mei 11, 1895, ukuhoolimalima $20.00 no ka makahiki hookahi, e pau ana ka manawa i Aperila 1, 1905.
Catherine K. Brown ia Antone Louis Fernandez ame Antone Gomes Vesquel i hanaia i Dekemaba 1, 1894, $20.00 ukuhoolimalima no ka makahiki e pau ana ka manawa i Ianuari 1, 1905.
Catherine K. Brown ia Virginia Peugdly i hanaia i Mei 11, 1896, $40.00 ukuhoolimalima no ka makahiki hookahi, e pau ana ka manawa i Aperila 1, 1906.
M. G. Silva ia Manuel Garcia Cordeira i hanaia i Ianuari 14, 1897, $25.00 ukuhoolimalima no ka makahiki hookahi, e pau ana ka manawa i Ianuari 1, 1905.
Catherine K. Brown ia Jose Aveiro, i hanaia i Ianuari 14, 1897, $25.00 ukuhoolimalima no ka makahiki hookahi, e pau ana ka manawa i Ianuari 1, 1905.
Catherine K. Brown ia Antone Comes Vesquel i hanaia i Iune 29, 1895 $10.00 ukuhoolimalima no ka makahiki hookahi, e pau ana ka manawa i Ianuari 1, 1905.
ERNESTO MACHADO.
Mea Paa Moraki.
Ma ke dala gula Amerika ka makemake a ma ka aoao o ka mea kuai mai na lilo palapala apau.
No na mea aku i koe e ike ae ia Holmes & Stanley na Lolo o ka Mea Paa Moraki.
Hanaia ma Honolulu, Sepatemaba 25, 1903.
2983-Oct. 2, 9, 16, 23.
-----
FUKURODA
---
Halekuai Lole Iapana Helu 1.
---
Mea Hana Papale Ie
28-32 Alanui Hotele.
Telepona White 2@21
EDWARD KEALOHA,
Mea Kuai Lole.
-----
HOOLAHA KUMAU
---
LEWERS & COOKE
LUI A ME KUKE, Kaupalenaia
Na Mea Hookomo mai a Kuai aku i na
LAKO HANA HALE
O Kela ame Kena Ano.
Malaila e loaa ai na mea malalo iho:
---
NA PAPA N. W. NA PAPA HOLE, PILI HALE, NA PUKA, NA OLEPLEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA. NA ANIANI, NA PEPA HALE, PALE PUKA ANIANI, MOENA, ETC.
O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
-----
Hui Alahau ame Ainao Oahu
MANAWA HOLO
Mei 1, 1903.
MAI HONOLULU AKU
No Waianae, Waialua, Kahuku ame na wahi hoolulu ma ke alahao-
9:15 a.m., 3:30 p.m.
No Pearl City, Ewa Mill, ame na wahi hoolulu ma ke alahao- 7:30 a.m.,
9:15 a.m., 11:05 a.m., 8:15 p.m.,
3:20 p.m., 4:15 p.m., 5:15 p.m.,
9:30 p.m., 11:15 p.m.
MAI WAHO MAI.
Ku i Honolulu mai Kahuku, Waialua, ame Waianae mai 8:36 a.m., 5:31 p.m.
Ku i Honolulu mai Ewa Mill ame Pearl City mai- 6: 50 a.m., 7:46 a.m.,
8:36 a.m., 10:38 a.m., 2:05 a.m.,
4:31 p.m., 5:31 p.m., 7:40 p.m.
5:31 p.m., 7:40 p.m.
Keia ame kela la.
Sabati wale no.
Koe ke Sabati.
G. P. DENISON.
Lunahoohana.
F. C. SMITH.
G. P. & T. A.
-----
Kakela me Kuke
[KAUPALENAIA]
---
Poe Kalepa ma ke Komisina
A HE
POE LAWELAWE KOPAA
---
Poe Agena no na Wahiko Lehulehu
-----
KAUKA T. MITAMURA
Alanui Kukui Ololi Helu @8. Honolulu.
Na Hora Hana:
Hora 8 a 10 kakahiaka; hora 1 a @ ame hora 6 a.m. 8:00 p.m. Sabati: hora 6 a 8 p.m.
Telepone Blue 2366 P. O. Box @42
-----
O KE
Koko Ino ka mea e loaa ai na Pilikia ma ke Kino.
---
E Heluhelu i keia mau Manao.
O KA LAAU-
AYER'S SARSAPARILLA
KA
laau nana e hookaawale na ma'i ino mai kou koko aku. He laau hoonoono ai, a he laau e hooikaika ana i kou mau iaia apau. O ka Laau Ayer's Sarsaparilla ka laau kaulana loa a puni ke ao holooko, ina e hoomau ia ka lawelawe ana i keia laau e loaa ana ka ke ola kino maikai a me ke koko maemae, hoi hou mai ka ula o kou mau lehelehe, pu'ipu'i maikai kou mau papalina, a loaa ke kulana ola kino maikai.
He loaa na pu'u paa o ke kino i ka laau Ayer's Sarsaparilla, e hoopakele ana mai ka ma'i puu paa (Brights' Disease) ame na ma'i oia ano. Ke ko@ ikaika aku nei makou e lawe la kela ano laau ma kahi i ike ia na ma'i Puu paa apau.
Hoomakaukau ia e Kauka J. C. Ayers E loaa no keia mau Huaale ma na hale kuau laau apau.