Ka Nupepa Kuokoa, Volume XLI, Number 43, 23 October 1903 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, OKATOBA 23, 1903.  5

 

Ma ke Kauoha

POE KOKUA MA NA WAHI KOHO BALOTA.

HOOLAHA I NA MOHO NO NA OIHANA KALANA.

            Ke hoaiaiia aku nei na moho auau no na Oihana Kalana e pili ana i ka Pauku o na Rula ame Hooponopono no ka Oihana Hoohiki ame Maiama Kau Koho Balota e like me ia i pakulia e ke Kanawai e hoonoho ana i Aupuni no ka Teritori o Hawaii, e like me ia malalo iho:

            Pauku 30.  O kela ame keia moho, ma ka la mamua iho o ka la koho balota, e waiho mai i poe lunanana ma kela ame keia mahele koho balota me kekahi papainoa piha pono o na inoa o ka poe apau i aeia e ke kanawai e hoohanaia, a pela e hoohanaia ai e ia no ke kokua ana ma keia mahele koho balota iloko o ka manawa koho balota, a aole kekahi mea i paa ole ka inoa iloko o keia papainoa i oleloia e aeia e hana ma kela wahi koho balota no ka pono o ua moho la.

            Aohe mea oloko nei i hookomoia e unuhiia ai e paniku ai i ke kokua haawi wale a kekahi mea no kekahi moho.

            G. R. CARTER,

            Kakauolelo o ka Teritori.

            C. R. BUCKLAND,

            Lunakakauinoa Koho Balota.

            Hale Mana Hooko, Honolulu, Okatoba 20, 1903.

            2986 - Oct. 23, 30.

 

NA NOTARI O KA LEHULEHU.

            O na Komikina o keia mau Notari o ka lehulehu malalo iho nei no na Apana Kaapuni like ole o ka Teritori o Hawaii ma keia ke hoopau a holoi loa ia nei, a o ka lakou poe buke moolelo ke kauohaia nei e waiho mai me ke kakauolelo o ka Aha Hookolokolo Kaapuni o na Apana Kaapuni kahi o lakou e noho ana:

APANA KAAPUNI EKAHI.

Allen, B. G.

Kaneakua, J. Mahiai.

Murdoch, Duncan B.

Russell, F. J.

APANA KAAPUNI ELUA.

Tavares, A. F.

APANA KAAPUNI EKOLU.

Alu, Thos.

Mills, Harry T.

Greig, Jno.

Nahale, J. K.

APANA KAAPUNI EHA.

Baldwin, E. D.

Clay, J. F.

Little, W. H.

Scheilberg, L. E.

APANA KAAPUNI ELIMA.

Doverill, W. E. H.

May, M. L.

LORRIN ANDREWS,

Loio Aupuni, Teritori o Hawaii.

Keena Loio Aupuni, Okatoba 20, 1903.

2986 - Oct. 23, 30.

 

Nuhou Kuloko

            Ua hala aku i ka Poalua nei no Maui ka Puuku Kepoikai.

 

            Koho ia Moses K. Nakuina ka Moho Kuokoa no ke Kakauolelo ame Luna Kakau Kope o ke Kalana o Oahu.

 

            Oiai o Mrs. Kalei Laka e ohi opihi ana ma Honuapo, ua kapeke ae la kona mau wawae a haule aku ia iloko o ke kai a lumilumiia aku la e ke kai a make loa.  Aole i loaa kona kino make a hiki wale i ka la 17 o keia mahina.

 

            I keia kakahiaka nui ka mokuahi Alameda e ku mai ai mai ka Ipuka Gula mai o Kaleponi.  Maluna mai ona e manaoia nei e hiki mai ana ka wahine a Lunakanawai W. J. Robikana o ka Aha Hookolokolo Kaapuni o Oahu nei.

 

            I ka la apopo, i ka I'ahamauleo ana na Kapena ame na luina o ko makou nei keena e hoohala ai i ka manawa me ko makou Kapena nui, A. W. Pearson, i hoi mai nei mai kana huakai no ka hau aku nei o Maleka.  He mau lealea ke malamaia ana, a e loaa ana ia makou ka ikaika hou e hoonee aku ai i na hana o ko makou nei keena imua.

 

            Ke makemake nei o Hon. Fred W. Beckley e hoole aku i ka oiaio o na olelo e wawaia nei he Repubalika oia.  O ka mea oiaio he Home Rula oia mai ka piko o kona poo a hiki aku i kona ma@ wawae.

 

            Ua makemake ka Hon. Fred W. Beckley e hoike aku, aole oia i kahea a ae paha e haiolelo ma kekahi halawai i malamaia iho ma Kakaako, e like me na mea i kalahea wale ia ai mamua o ka malama ia ana oia halawai a hele nui ae na Hawiai me ka manao e lohe i kana mau olelo naauao.  O ka hoolaha i lawe hele ia ai na ka poe wale no i manao e hana aku pela.  Ke hele aku ana no oia no ia wahi ma keia mua iho ke kukala ia aku.

 

            Ua loaa mai he lono uwea telekarapa ole mai Kauai mai i ka Poalua nei ia Albert Raas, ke kokoua kanikela Farani maanei, e hoike ana i ka ili ana o kekahi moku kiapa Farani ma kekahi o na puu pohaku malalo aku nei o kakou i kapala, -French Frigate Shoals.  No ka piha ole o na mea i hoikeia ma ke telekarapa, nolaila aole i maoapopo loa ka oiaio.

 

            O na @ i loaa ma ke keena hoopaainoa o na moho e holo aku ana no na kalana, no ka mea e pili ana i ko John K. Kekaula waiho ana i kona kulana moho lunakiai no ke Kalana o Hawaii Komohana, a i manaoia ua hanaia me ka epa, ua pau wale mamuli o ka loaa ana mai nei o ka pane mai iaia mai e hoike ana; ua hana ole ia hana ma ke kakauleta ana a imua hoi o J. W. Waipuilani ame J. K. Nahale, me kona manao ponoi no.

           

Olapa ko Ahi Ku'i ka Hekili

Elua Hale ma Maui i Poino.

 

HOONEE NA REPUBALIKA I KA

PAIO ME KA HAHANA.

 

KELA AME KEIA.

            MAUI, Oct. 17, 1903. - O kekahi o na ino uwila nui i ikeia ma ka moolelo o keia mokupuni oia ka ino i ikeia ma ka la 14 iho nei.  Ia auwina la holookoa a hiki wale i na hora o ka po e olapa mau ana ke ahi a e nakolokolo mau ana ka hekili.

            Me he mea la, o ke kikowaena o ka ino, ma Hamakuapoko ame Waikoa (Kula) no ia.  Ma Hamakuapoko, ua loaa iho ka home o S. E. Taylor, ka wiliki o ka mahiko, i ka uwila a alaa pu ia ke pili o ke kihi o ka hale a waiho ana iluna o ka honua a hoopuehu ae la i ka lepo noluna o ka lanai.  O Joe Taylor, keiki a ka ona hale, e noho ana oia iloko o ka lumi e kokoke ana i ke kihi i hoopoinoia, a ua ike pono oia i na mea i hoikeia ae nei.

            Ma Waikoa, ua manaoia e ala mai ana he paio nui ma ka lewa lani mawaena o kekahi uwila ame kekahi.  Ma ka ike aku a ko Kula poe, ua halawai no keia mau mea, a ua hoohalike ae lakou i ka hopena ikeia me ka o-wa luakupapau."  Ua hoopoinoia he hale no kekahi Iapana, e ku ana makai iho o ka home o Mrs. R. von Tempsky.  Ua make he ilio, a ua pihoihoi na Iapana.

            Iloko o ka wa o keia ino, ua kauoha hoomaumau aku ka Luna Nui E. B. Carley, o ka hui uweaolelo, i ka poe he mau telepona ko lakou, e hookaawale a e waiho malie i na pahu olelo.  Ma ka po Poakolu, ua kuwatila ka hale kikowaena telepona o Paia no ka hookani mau o ka uwila i ka bele.  He makani Kona i hele pu me ke ahi uwila, oia na hikimua o keia ino.

 

HOONEE NA REPUBALIKA.

            Ma ka Poaha, i malamaia ae ai he halawai nui maloko o ka luakini o Hamakuapoko, a malaila i akoakoa ae ai na Repubalika apau.  Ua hiki kino ae na moho Repubalika apau, a mawaena o lakou o S. E. Kalama ame Rev. John Kalino.  Maikai na hana malaila.

            Ma ka Poalima ae, ua mahele iho la keia poe.  Ua hala aku no Lahaina o W. T. Robinson, W. A. McKay, F. C. Wittrock, H. Howell, J. K. Joseph, S. E. Kalama ame John Kalino, O. W. F. Pogue, Theo. Meyer, David Marton, N. W. Aluli, A. N. Hayselden ame W. H. King, ua hele aku no Hana ma me ka manao e hoi mai ana ma Ulupalakua.  Ma Peahi ka malama mua ana ae o keia poe i ka lakou mau haiolelo, a ma keia la.  (Oct. 17) e weheia ai he halawai ma Huelo ame Keanae.

            I Wailuku na Home Rula kahi i noho mumule ai no keia pule holookoa, a i ka po nei, (Oct. 16) akahi no a ekemu ae, i ka wa o lakou i malama ai i ka lakou halawai ma ka hale holohau.  Ke manao nei lakou e holo aku no Maui Komohana a hala loa aku no Molokai.

 

KELA AME KEIA.

            He elima Demokarata iloko o ka paa balota a na Home Rula.  O Pia Cockett, no ke kulana Puuku; o L. R. Crook, no ke kulana Luna Hooia; John Richardson no ke kulana Loio Kalana; a o T. B. Lyons ame W. H. Cornwell Jr., i mau Lunakiai.

 

            I na ahiahi o kela pule aku nei ua hoohaia aku na kini o Hana i ko lakou mau manawa ma ka makaikai ana i ka ula mai o ke ahi iluna o Mokuaweoweo.

            Ua hiki ke ike pono ia ka malamalama o ke ahi, a ma ka ike aku a na kini oia wahi, me he la e kau iho ana he kalaunu gula iluna o ka wahine o ka lua.  I keia mau la iho nei ua uhi iho ka uwahi pele maluna nei o ka aina.  I keia ahiahi e hele aku ai kekahi poe noluna o Haleakala no ka makaikai ana i na hana hookalakupua a ka wahine o ka lua e hana mai nei i Hawaii.

 

Hoea o Kalanianaole i Kapalakiko.

            Ma ka nupepa Chronicle o Kapalakiko i loaa iho ai keia poo manao maluna ae, e olelo ana ua pepa la penei:

            Ke Keikialii Kuhio Kalanianaole, Elele i ka Ahaolelo mai Hawaii mai, ua hiki mai nei maanei ma ka mokuahi Siberia o nehinei mai Honolulu mai, i ukaliia e kana wahine ame kona Kakauolelo.  Eia lakou ke noho nei ma ka hotele Halealii.  Ke manao nei o Kalanianaole e hele aku mai nei aku no Ohio, kahi hoi ona e komo pu aku ai ma ka hooikaika koho balota oia Mokuaina ma ka aoao Repubalika, mahope iho e holo loa ana oia no Wakinekona no ka noho ana i ke kau Ahaolelo e aneane mai nei.  Mai na lohe i loaa mai Hawaii mai ua lilo ke Keikialii Kalanianaole i mea hoopiiia ma kekahi mau hoopii i hana koke ia iho nei, o ka hapanui oia mau hoopii mai na poe kalepa waiwai, a mailoko mai oia mau hoopii he mau mea i hanaia he elua a ekolu makahiki i kaahope ae nei.  O ka hui aina Kapiolani, he hui hoi i noho ona ia eia ka hapalua o ka waiwai ole kekahi hui e paa nei i kekahi mau waiwai kumu waiwai nui.  Iloko o na makahiki he elua a ekolu i hala ae nei, ua hoaie aku keia hui i kekahi heluna dala nui no ka hoohana ana me kekahi mau hana like ole, a ua koikoi aku maluna o ka hui ka uku ana i na uku pa-keneta.

 

Huakai Makaikai a Kiaaina Dole ia Keoneula Hou.

            I ke kakahiaka o ka Poalua nei i holo aku ai ke Kiaaina Dole ame ka Lunanui o na Hana Hou Mr. H. E. Cooper ame ka Lunakula Nui Mr. Atkinson no Keoneula hou ke Kula Hoopololei e ku nei i Waialae, Oahu, no ka makaikai ana i kona kahua hou.

            O keia hele ana iho la a ke Kiaaina oia ka mua loa o kona hele makaikai ana i ke kua mai ka manawa i makaukau ai a ku ke kula ma kona kahua hou, a he mea maopopo loa e pau pono ana ke kahua hou i ka makaikai ia.

            Aia he mau hoolala i makaukau no ke kukulu hale ana no na kamaiki, aka aole e hoohana koke ia ana a hiki i ka manawa e makaukau ai me ka dala e like me ka hooholoia ana o ka Ahaolelo.

 

E Waiwai Ole Anei ka Balota ma ka Pololei Ole o ka Ma-ka ana?

"AE," WAHI A KA LOIO AUPUNI ANDREWS

OLELO KE KIAAINA HE WAIWAI NO.

            O ka ninau pili i ke koho balota o na luna aupuni Kalana o kela kau e hiki mai ana oia ka mea nana i mahae ae i ka noonoo kanawai o na luna aupuni o kakou nei.  O na balota maoli ma ka oihana no na inoa apau o na moho no ka oihana, o na inoa no na oihana like ole e moakaka lea ana lakou mamuli o na laina ma-ka nunui, a o ka inoa o ka oihana e kau hua nunui ia ana i moakaka.

            Ma ka olelo haole e kaula ai ma ka aoao hema o ka inoa a malalo iho ona a ma ka ooao akau a malalo iho e kau ia ai no hoi ma ka olelo Hawaii i kuhikuhi no ke koho ana i ka heluna i kupono e kohoia ma ia oihana hookahi.

            E like me keia, ina no ka oihana lunakiai alaila e kau ia ana ma ka olelo haole a ma ka olelo Hawaii - "E koho no hookahi," a ina no na lunakiai, alaila e kauia ana ma na olelo a elua, "E koho no elima" e like me ka nui o na lunakiai i makemakeia e koho.

            O ka balota e ma-kaia ana a oi aku maluna o hookahi inoa no ka oihana i kupono no hookahi wale no luna aupuni e laa ka oihana lunamakai a i ole o kekahi oihana i kupono i hookahi wale no inoa e kohoia, oiai, ia balota hookahi no ua ma-ka pololei ia na inoa o na lunakiai ame na inoa no na oihana e ae, o ka ninau i ulu ae, e lilo anei ia balota i mea waiwai ole no na inoa lunakiai a luna aupuni e ae i ma-ka pololei ia mamuli o ka ma-ka hewa ia ana a oi aku maluna o hookahi inoa i kupono e ma-kaia i hookahi wale no inoa?

            Ua oleloia aia ke Kiaaina Dole ma ka manao e olelo ana aole ia he mea e waiwai ole ai ka balota holookoa, aka o kahi no i pololei ole oia no kahi i waiwai ole.

            Aole i like ka manao o ka Loio Aupuni Andrews ma keia ninau oiai wahi ana o ka balota i ma-ka pololei ole ia ina no ka oihana hookahi a oi aku paha e lilo no ua balota ma-ka hewa ia nei i mea ole no ka mea he balota ma-kaia wahi a na rula o ka oihana Koho Balota ame Hoohiki o na balota ma-ka hewa ia apau e pau no ko lakou waiwai, e komo ole ai iloko o ka helu.

            O keia mau rula kahi i kukulu ai ka Loio Aupuni i kona manao oia no kekahi hapa o ka mea holookoa a lawelaweia aku ana no keia kau koho balota o na kalana.

 

Loaa ka Piko Pau i ka Iole.

O GALLAGHER KA MEA NANA I AIHUE NA WAIWAI

MAKAMAE O MRS. SAMUEL PARKER.

            Ua loaa ae nei ka aihue nui nana i lawe aihue aku i na waiwai makamae o Mrs. Samuela Parker, e like me na mea i hoike mua ia ma na helu i hala, a ua pau ae la na nune ana no ia hana hookalakupua i hanaia ai.  O ka mea nana i hana keia hana, oia no o Gallapher, ke kalaiwa kaa o Mrs. S. Parker.

            Iloko o ka mahina o Iulai, ma ka la 31 ka hanaia ana o ka aihue, a he umi a oi paha la i hala ae nei, ua hoopauia kona noho ana no ke ino o kana mau hana.

            Ua hele aku oia iloko o ka hale inu rama Wela ka Hao, a iloko o ka lulumi o ka waiona i pu-a ae ai ka moali mua o ke kolohe.  He makemake ko Gallagher e hoolilo aku i kekahi pohaku daimana ia Bila Cunningham, ma ka hoolilo loa a i ole ma ke ano hoopaa aie.  Ua komo koke ka makemake iloko o Cunningham a ia wa pu no hoi ua komo mai la ka hoohuoi iloko ona, nolaila i laweia ai i ka hale kuai o Wichman, ma Alanui Papu, me ka ninau pu ana aku, ina ua hiki i ka poe oloko o keia halekuai ke koho mai a hoike mai paha i ka mea nona ia waiwai.  I ka nana ia ana ua hoike koke ia aku iaia o kekahi keia o na waiwai makamae o Mrs. Smuel Parker i aihueia ai, a ua hoike koke ia aku keia lohe ia Konela Sam. Parker.  Ua hoike pu ia aku keia mea i ka Oihana Makai, a aole i loihi mahope iho noho ana ke kolohe iloko o Kaupapanui, kahi ona i ninaninauia a hiki i kona hoike pololie ana nana io no i hana ia aihue.  No ka makemake o Sam. Parker e huna iho i kela mea, ua ha'i aku oia i ke kolohe ina oia e hoihoi mai ana i na mea ana i aihue ai, aole oia e hoopiiia ma ke kanawai, a no ia mea ua hele aku la oia a me Rooney no kahi noho o ke kolohea, mahope iho o ka Halekeaka Oplumba, a loaa na waiwai aihue i koe iho a hoihoiia aku la ia Mrs. Parker.  O kekahi o keia mau mea ua hooliloia aku e ke kolohe ma America, a o ka waiwai io o keia mau mea i koe ua hiki aku no ia i ka $11,000.

            I ka wa e noho ana o Gallagher me Sam. Parker ma ke ano he kalaiwakaa, e ukuia ana oia he $45 o ka mahina, a mailoko ae oia huina e uku ana oia i kana wahine mare i hookaawaleia e ke kanawai he $20 no ka mahina a pela no hoi me ka uku loio.

            Ua hookuuia ke kolohe aole i hoopaa ia, aole hoi he palapala hopu a kumu hoopii i waiho ia aku imua o ka Makai Nui.

           

Haule Ilalo a Make Loa.

            Mamuli o ka haule ana mai ka lanai mai o kekahi o na hale e ku nei ma ke alanui Liliha i ke kakahiaka Poalua nei, i lilo aku ai ke ola o Ootani, he Iapana, mahope o kona waiho ana i ka auwe no kekahi mau hora.

            Mamua iho o ka loaa ana o keia ulia, ua ikeia aku keia Kepani e na Makai Bortfeld ame Spillner ua ona ia.  Ua ha'i ae o Yoshosshiro, he hoaloa no ka mea i poino, ua hele aku o Ootani i ka hale i ke aumoe Poakahi nei a noho iho la mawaho o ka lanai a iluna hoi o ka pale.  Pela oia i noho ai a iaia i makemake ai e eu ae, ua hapopu iho la kona wawae a lilo aku la ka ikaika o kona kino iwaho, a walawala ana ilalo a waiho ana iluna o ka @ laau.  Ua laweia ae oia me ke kahe o ke koko a na na Makai i lawe aku iaia no ka halema'i o na Kepani, kahi hoi ana i waiho iho ai a make he hora mahope o kona komo ana iloko.

            Ua komo ae ka uhane daimonia iloko o kekahi Hawaii oiai oia maluna o ka mokuahi Mauna Loa, a e holo ana hoi mawaena o Napoopoo ame Hookena, a ua hoao ae oia e lele iloko o ke kai, i pakele kona ola i ka nui o na lima kokua.

 

Nuhou o na Aina E

 

HOEUEU IAPANA.

            PARISA, Farani, Oct. 1. - Ua loaa mai ka lohe maanei ua hoouna aku nei o Iapana he elua mau regimana koa no Iapana.

 

LAWEIA KO LAKOU MAU OLA ME KA UWILA.

            DENNEMORA, Nu Ioka, Oct. 1. - O na hoahanau Van Wormer he ekolu ka heluna ua laweia na ola me ka uwila maloko o na paia o ka halepaahao mokuaina.  O ka pepehi ana a make ko lakou makuakane hanauna, o P. A. Lattenbeck, ke kumu o ke kau ana mai o ka hoopa'i make maluna o lakou.

 

KE OHI NEI NA BULUGARIANA.

            SOFIA, Oct. 2. - No ka ike ana i ka ohi hou o ke Suletana i mau koa hou no kona mau puali, ua kauohaia ae nei e ohi hou ia i mau koa maanei.

 

LI HOU IA HE PAELE.

            MARSHALL, Texas, Oct. 2. - Ua liia he paele maanei i ka po nei.

 

PAU I KA LUKUIA.

            SOFIA, Oct. 3. - Ua loaa mai ka lohe ua lukuia a pau loa na Kristiano e noho ana ma Mohomia.  Ua maopopo he 3,200 ka heluna o na Bulugariana ma ia wahi.

 

HOOKU'I KAAAHI WELIWELI.

            BEOWAWE , Nevada, Oct. 2. - Ua hooku'i aku ke kaaahi Atelanika lawe ohua me kekahi kaa hali ukana ma kekahi wahi e kokoke mai ana i keia wahi, ma na poo ka hooku'i ana.  He hookahi mea i make a he 25 i eha ma keia ulia.

 

HAKI KA IWIKUAMOO.

            SOFIA, Oct. 2. - Ua haki ka iwikuamoo o ke kipi ma Macedonia i na koa o Tureke.  Ua ano haule mai ka manaolana o na kipi a ke manaoia nei e pau ana na hana hooulu kipi a koe paha he mau wahi puulu hoohaunaele liilii.

 

LILO HE HAPALUA MILIONA.

            NU IOKA, Oct. 3. - O F. L. Crosby, he kanaka paahao mamua, ua hopuia ma Denver no ka aihue i kekahi eke leta ma Piladelefia ma Sepatemaba 8, a maloko o laila he mau pepa kikoo dala nona na waiwai io i hiki aku i ka $5,000,000.

 

WELIWELI KA HANA A KA MAKANI.

            ST. CHARLES, Minesota, Oct. 4. - I ka pa ana mai a ka makani cyclone maanei he ehiku poe i make a he kanakolu i eha.

            INDEPENDENCE, Wis., Oct. 4. - Ua hoea mai he tonado ma keia wahi a he elima poe i make.

 

LUKU MENEMENE OLE A NA TUREKE.

            SOLONICA, Oct. 5. - He 20 ka heluna o na kauhale o ka apana o Razlog i puhiahiia mahope o kekahi hooili kaua ana a i make ai he 2000 o na Tureke.

            SOFIA, Oct. 5. - Ua loaa mai kekahi lohe e pili ana i kekahi hoouka kaua hahana mawaena o na Tureke me na Bulugariana ma Demirkajria me ka nui o na poino o na aoao a i elua.

 

IWAKALUA MOKU I POINO.

            AMSTERDAM, Oct. 9. - He iwakalua ka heluna o na moku i poino iloko o ka inoa i hiki mai ma keia la.

 

EKOLU WALE NO I PAKELE.

            LADANA, Oct. 9. - Ua ili ka moku Renjamin Sewall ma Pecadores.  He ekolu wale no o na luina i pakele mai.

 

HOOULU KIPI NA PAAHAO.

            KULANAKAUHALE LOKO PAAKAI, Oct. 9. - Ua hoala kipi ae na paahao o ka halepaahao maanei i keia la.  Mahope o keia kipi ana ua ulu ae he kaua hahana mawaena o na paahao ame na kiai.  Ua make he hookahi paahao a eha he elua i na kiai, a he elua hoi o na kipi i puka a holo, a he elua o na kiai i eha.

 

HULI HOU O LIPTON.

            NU IOKA, Oct. 10. - Ua kau aku o Sir Thomas Lipton ma ka moku no kona home i nehinei.

 

NA IAPANA KA PUUPUU MUA.

            PARISA, Oct. 11. - Ua manao wale ia, ina e ulu io ae ana ke kaua mawaena o Rusia ame Iapana, na Iapana ana paha e hoolele ka puupuu mua.  Ua loaa mai ka hoole mai ke keena kuhina Iapana mai aohe i hoolele aku o Iapana i mau koa ma Korea.

 

MAKA'U KE ZA I NA ANAKIA.

            VIENNA, Oct. 11. - Aole e hele aku ana ke Za no Roma no kona maka'u i na anakia.

 

MAKE O MRS. MOODY.

            BOSETONA, Oct. 11 - Ua make ka wahine-kane-make a ka mea ha'i euanelio kaulana Dwight L. Moody.

 

KOKOKE E HOOLELE NA AI.

            CHEEFOO, Kina, Oct. 12. - Ua manaoia ae maanei ua maopopo loa e kaua ana o Rusia me Iapana.  Ua hoonohonohoia ae nei na mokukaua ma na wahi kupono no ka hoohanaia ana i ka pu e puka ae ai ke kaua.

 

KUOKOA O FARANI ME BERITANIA NUI.

            BERLINA, Geremania, Oct. 12. - Ua ulu ae he manaoio ame ka hoomaopopo ana mawaena o Farani ame Beritania Nui aole e @ keia mau aupuni iloko o ke kaua mawaena o Rusia ame Iapana ina e ulu @ ae ana.  Ua hoole o Enelani i ke kokua ana ia Iapana, me ka noonoo ole i ke kuikahi Anegelo-Iapana, a aole o Farani e haawi kokua aku ana ia Rusia, kona hoaaloha kahiko.

 

MAIKAI IKI KE KALANA.

            WASINETONA, Oct. 13. - Aohe i pioloke ke Keena Rukini i ka mea e pili ana i ka hooulu hakaka ma Manakuria a ke manaolana nei e hooponopono maikai ia no keia mau mea.

            YOKOHAMA, Oct. 13. - Ua hoomahuahuaia ae nei na koa Rukini ma Newchwang.

 

PILIKIA I KA WAIKAHE.

            NU IOKA, Oct. 13. - He $4,000,000 ke poho i ili aku maluna o Paterson ame Passalo, Nu Iese, ma o ka loaa pono ana i ka waikahe.  He mau tausani i hooneleia i ka hana.

 

NUI KA INO MA KA ATELANIKA.

            NORFOLK, Va., Oct. 13. - He 4 mau moku i piholo a he a i nalowale ka mea i ikeia i keia ino nui ana iho nei.  He 5 poe i piholo.

 

KAUOHAIA E HOI NO KA AINA.

            ROMA, Oct. 13. - He 45 ka heluna o na aliikoa Iapana e hele nei i na kula a'o kaua like ole ame kekahi mau kula e ae i kauohaia mai nei e hoi no ke aupuni makua malalo o ke kauoha a ke Aupuni Iapana.

 

KE MAU MEI NO KA UNENE KAUA.

            YOKOHAMA, Iapana, Oct. 14. - Ua malamaia ae he halawai a na loe kalaiaina i keia la, a o ka @ lio kekahi i komo pu mai.  Ua noonoo a kamailio na mea apau e pili ana i ke kulana mawaena o Iapana ame Rusia.

            CHEEFOO, Kina, Oct. 14. - Eia, ke puka mai nei na Pake ame na Iapana mai Manakuria mai, no ka onene kaua mai ke kumu.

 

HE ILI NANI, LIMA A'IA'I

ME KA

LAUOHO ULIULI

KA HUA O KE

Kopa Cutikura

            HE MILIONA A OI ka nui o na wahine e auau mau nei me keia KOPA CUTICURA no ka malama ana, hoomaemae ana, a no ka hoonani ana i ka lakou ili, i pau ai ka papaa o ke poo, ka unahi-pii, a i mea no hoi kekahi a pau ai ka helelei ana o ka lauoho, a i hoopalupalu, hoa'ia'i a me ka @ like me na lima, a pela no hoi e hoopau ai i na eha, ma ka holoi ana i @ wahi eha me keia kopa, i ole oi e ike i ka aai me ka welawela; i ole no @ hou nui, ma ka holoi ana i na wahi pehu a palahehe; a he oi loa aku ka waiwai nui o keia kopa i na makuahine e lawelawe ana i na hana lehulehu @ pili i na keiki a me lakou iho no hoi, a i na wahine no a apu; a he @ kai o keia kopa, aole loa lakou e ae iki ana e hoao i kekahi kopa okoa aku, ke kolia mai; ina no e oleloia ana, he kupono ia ano okoa aku no na mea e pili ana i ka ili, ke poo a me ka lauoho o na bebe a me na keiki.  Ua loaa mai keia waiwai nui o ke KOPA CUTIKURA mailoko mai hoi o kela laau hoola, ikaika loa i kapaia, KUTICURA, oia ka laau ikaika loa ma ka hoola ana i na popilikia a pau e pili ana i na mea ika loa i ka pale ana i na mea ino, a he loaa no hoi ke ala maikai o na puailoko o keia kopa.  Aole loa e hiki ke hoohalikeia mai kekahi ano kopa e aei hoohuihuiia e ke akamai o kanaka me keia kopa, ma kana mau hana ma-lama, hoola a me ka hoou'iu'i ana i ka ili, a pela aku.  Pela hoi i ka ili o ke poo, ka lauoho a me na wahi e ae.

            Aole no i lihi launa mai na kopa ona aina e me keia, no ka auhau ana a me ka hana o na keiki liilii.  Pela ihoia i lilo ai ka waiwai o na kopa a pau i HOOKAHI no ke KUMUKUAI hoo@ a no Helu Ekahi keia Kope no na poino o ka ili a me kahi auau, a hehelu ekahi no hoi no na kamalii a @ ke ao nei.

            NO KA HOOLA LOA ANA I NA ANO PEHU A POHAKA PALAPU MA NA WAHI A PUNI KE KINO, e hoomaemae i ka palapu me ke kopa CUTICURA i pau ai ka paapaa lepo a ano e ae paha o ka ili, a pela hoi @ ka Aila Hamo CUTICURA i mama ae ai ka akiaki ana a ka hu'i a me ka ehaeha, a pela hoi e hoohana ai ka laau i kana hana a ola ka eha, alaila o @ ka Laau Inu CUTIKURA i mea e maemae ai ke koko maloko.  Ke @ keia laau ma na wahi a pau o ka honua nei.  Ma Aukekulia: o R. @ & Co., o Sydney, N. S. W. ko laila Agena; ma Aferika Hema Depot: @, Ltd. Na "Hoakaka no ka Hoola ana i na Bebe a me ko lakou mau @naunau," he loaa wale no me ke kuai ole.

            O POTTER DRUG AND CHEM. COMP., Boston, U. S. A., na Ona @ laau CUTICURA  a pau loa.

 

Na Mea

PAANI AME HOOIKAIKA KINO

Ma Kahi o

PEARSON & POTTER CO.,

LIMITED.

ALANUI HOTELE ME UNIONA

 

HOOKAHI PA HAUKALIMA ME KA MEAONO NO : : 10 KENETA

HOOKAHI KIAHA WAIU ME KA MEAONO NO : : : 10 KENETA

 

MA KA HALEKUAI PUHI PALAOA

SUNRISE BAKERY

Alanui Nuuanu kokoke i Alanui Beretania.

O ka Hau Kalima (Ice Cream) e hanaia nei maanei mai ka waiu maikai a momona maoli i loaa mai ai, oiai o na meaono e hanaia nei aia ma ke ano maikai loa.  He hookoia na kauhoa palaoa me na meaono o na ano apau no ke kumukuai kupono.  E hele nui mai.

 

OLELO HOOLAHA.

            E ike auanei na mea apau e noho ana ma Wailua Nui, Koolau, Maui, owau o ka mea nona ka inoa malalo iho, ke papa a ke hookapu loa aku nei au i na poe e noho ana a e mahiai a e malama ana maluna o keia mau apana aina eha (4), oia keia:

            Apana 1.  Ma Paakamaka, e pili ana me ko Kamani ame ko Kanekoa.

            Apana 2.  Ma Waieli, e pili ana me ko Kukae, Wahinemaikai, ame ko Kauila.

            Apana 3.  Ma Palolena, e pili ana me ko Kamai.

            Apana 4.  Ma Puakamaka e pili ana me ko Kaniki.

            O na mea a mau mea paha e ku-e ana i keia, e hoopii ia ma ke kanawai, a i ole e hooponoponoia me a'u.

            H. KEKUMU.

            Oct. 3, 16.

 

OLELO HOOLAHA.

            Ua hookohu ponoia mai ka mea nona ka inoa malalo iho e ka Lunakanawai Jacob Hardy i Lunahooponopono Waiwai no ka Waiwai o James U. Unauna i make.

            Nolaila ke koila aku nei ka poe apau i kuleana i ka waiwai o James U. Unauna i make e hoike koke mai i ko lakou mau bila me na hooia kupono iloko o na malama eono mai keia la aku.  A ina aole e hoole mau loa ia aku no.  A o ka poe apau i ale mai e ka mea i make e hookaa koke mai me ko'u lima.

            R. K. AINAIKE,

            Lunahooponopono Waiwai o ka Waiwai o James U. Unauna i make.

            Koloa, Kauai, Oct. 16, A. D. 1903.

            2365 - Oct. 14, 23, 30 - Nov. 6, 13.

 

Goo Kima

MALAILA E LOAA AI NA

Mea Kuai Lole ame na Mea Nani Like Ole, Perry Block, @ o na Alanui o Hotele ame @.

Loaa mai na Pono Hou ma na Mokuahi Apau.

O na mea apau e like me ka mea i oleloia.