Ka Nupepa Kuokoa, Volume XLI, Number 43, 23 ʻOkakopa 1903 — Page 3
| This text was transcribed by: | Francene H Aarona |
| This work is dedicated to: | To those members who shared more history with us during services with them. |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, OKATOBA 23, 1903 3
---HE MOOLELO NO---
RODERIKA o KILADEA
KA NAITA KUPAA MAHOPE O KA MEA ANA I ALOHA AI.
---: AME :---
KATE MAKAMURAGA.
KA U ʻ I NOHEA A HOOILINA OIAIO O KALELOGA.
( Unuhiia e s. K. Nawaa. )
---
MOKUNA XII.
KA MEA I LOAA I KA EALE ILOKO O KA ULULAAU.
" Kahiho e like me a ʻ u nei, na pono ole i ke aloha o na wahine, O ka mana nae o ka nani eia no ia me a ʻ u."
"E Kiliona, " wahi a ka eale i pane aku ai i ka wa ona i komo aku ai iloko o ka lumi o ka luna halepaahao, a i kona hoi ana mai hoi mai kana huakai holoholo iloko o ka ululaau.---"pehea kau pio ?"
" Ke manao nei wau aole ona pilikia."
" Ua ike anei oe iaia i keia la ?"
" Ae. "
" Pehea kona ano ?"
" He kaumaha a he noonoo nui hoi, e kuu haku. "
" Malia paha ua noo oia no kona wehe ia aku ?"
" Aole he hiki iaʻu ke noonoo nui no ia mea ."
" No keaha hoi, e Kiliona ?"
" Aole oe i maopopo mai la i koʻu manao. Malia paha e ae mai ana oia i koʻu manao ?"
Oiai he ninau keia i kuleana ole i ka manao ana o ka lunahalepaahao : nolaila aole oia i manao he mea pono nona e hoike aku i kona manao, a ua pane aku la oia me kona kuekue ana i kona mau poohiwi :
" Aole wau i maopopo, e kuu haku. Ua hiki no ia oe ke ike nou iho mamua oʻu nei. "
" Ina pela aole oe i lohe i kona hoopuka ana i kekahi mea e pili ana no ia mea ?"
" Aole loa he wahi huaolelo i puka mai kona waha mai e pili ana no ia mea ."
Ua hele holoholo ae la ka eale iloko o ka lumi no ekolu manawa, a mahope na hookokoke aku la oia i ka puka me he mea la e hele aku ana iwaho, aka, na ku mai la oia a ninau hou mai la ia Kiliona :
" E Kiliona, na ike anei oe ie Lede Magareta ?"
" Ae, e kuu haku ."
" Aole ia he wahine uʻi ."
Ua pii hou ae la na poohiwi o ka lunahalepaahao a oia wale iho la no kana haina.
" Auhea oe, e Kiliona, aole i nele ka manao koho iloko ou."
" E like me kaʻu mea i manao ai, he oiaio aole no wau i nele i ka manao koho ."
" A ina paha mamuli o ka male ana aku ia Lede Magareta he mea ia e lilo ai oe i barona, pehea iho la ia ?"
Ua noho mumule loa iho la ka lunahalepaahao.
" Heaha kau pane, e Kiliona ?" i hoomau aku ai ka eale.
" A, e kuu haku, aole loa wau i kupono i kane na keia wahine kulana kiekie, oiai ke kukaawale loa nei oia mai ko;u kulana aku ."
" Aka, ina paha nana no e haawi mai i kona kino nou, pehehea ia ?"
" Alaila, wahi a ka lunahalepaahao i pane mai ai, me kona hehi ino ana iho iluna o ka papahele, " ke manao nei wau he mea pono nona e lele mua aku i ka lewa mamua o ka wa e hoopaa ia ai ka berita mare maluna ona ."
" Ke ike aku la wau, e Kiliona, aole ou makemake i keia lede."
" Ua pololei kau, e kuu haku ; a ina ua olelo aku nei wau mawaho o ka mea kupono, ke noi aku nei wau ia oe e kala mai oe iaʻu ."
" Aole oʻu manao ku-e aku ia oe, e Kiliona. Ua haʻi mai oe i ka haina me ka oiaio, aka nae hoi ua awiwi iki oe i kau pane ana mai nei. Ke manao nei wa e malama maikai ana oe i kau pio, aole hoi he mea pono ia oe e hookaumaha loa aku iaia. E hana aku oe i na haaa e oluolu maikai ai kona noho ana ma ia wahi ."
Ua haalele iho la ka eale i ka lunahalepaahao, a i ka hale o lalo i halawai aku ai oia me Hiu Kapena.
" E Hiu, ua ike anei oe i ko haku i keia la ?" wahi a ka eale i ninau aku ai.
" Ae, e kuu haku ."
" Nana no anei i kauoha mai ia oe e hele aku e hui me ia ?"
" Aole. Na koʻu makemake no i kono mai iaʻu e hele aku e hui me ia. Ua manao wau he mau manao kona iaʻu, eia nae aole he mea oia ano. "
" Ua kamailio anei olua no kekahi mea e pili ana no Lede Magareta ?"
" Aole, aka ke manao nei wau ua hoopuka mai oia ia inoa."
" E Hiu, ke makemake nei wau e oiaio mai oe, iaʻu. Ke ole wau e @koua hewa aku, ua hoao aku oe ma na ano apau ia Roderika e hoolohe mai i kaʻu mau mea i manao ae e pili ana no kona mare aku i ka Lede o Kaleloga."
" Ua hana wau pela, e kuu haku. "
" Ke manao nei anei oe e hoolohe io mai ana oia i kaʻu ?"
Ua ku nana iho la o Hiu me ka pane ole aku.
" E haʻi mai i kaʻu ninau, e Hiu. Pehea kou ike aku iaia ?"
" E kuu haku, ina ua makemake mai oe e haʻi aku wau i kaʻu ea i manao ai, e hana aku no wau pela."
" E haʻi mai, e kuu Hiu maikai."
" Alaila, ke manao nei wau e make ana oia ma kona wahi e paa nei mamua o kona ae ana aku e mare ia Magareta Dorano."
" A pela e kau aku ai kona make maluna iho no o kona poo !" wahi a ka eale i puana ae ai a haalele iho la oia ia Hiu.
He mea oiaio ua hoopuka ia keia mau olelo iloko o ka wa e ulupuni ana i ka inaina. He hapalua hora mahope iho e hele holoholo ana o Kamaki Fizigerela iloko o kona lumi e noonoo nui ana hoi, mai oi aku ka pono ina aole i hanau ia mai o Magareta. Ua paa kona manao e hooko aku i kana mea i aelike ai me kona hoahanau barona. Sir Habati o Kaleloga. Aka iloko o keia mau mea apau, aole i hiki iaia ke kapae ae i kekahi mea oiaio i ikeia nana e ku-e nei i kana papahana. He koa kana keiki, he uʻi hoi a he wiwoole, me na noonoo uwila e lalapa ana iloko o kona puuwai, a he kulana hoi e pono ai ke noho aku ma ke anuu kiekie no ka hoomalu ana mai i kona mau hoa kanaka, a no Magareta hoi, he nanaina kona e makaʻu ia aku ai, a aia hoi iloko o kona puuwai na manao e hoala mai ana i ka nohona ku-ee mahae ae ai ka nohona maikai.
Ma ka hoopokole ana ae aia o Sir Kamaki Fizigerela iloko ona wiliau ana o na manao ponoole. O ka hanohano ame ka ʻoiaio no kana mea i aelike ai oia ka mea nana e hookonokono ana iaia e kupaa ma kana mea i hana ai, aka ina e paa loa ana o Roderika i kana mea i manao ai, pehea la ia e hooko ia ai ? Aole wale oia. I ka hanohano ame ka oiaio e alakai nei i kona noonoo ma kekahi alanui okoa, aia hoi kekahi leo waipahe ke ko mai la iloko o kona mau pepeiao e ume aku ana i kona aloha no kana keiki iloko o ka lumi pouli. I ka wa oe hala ae ai ia mea mai iaia aku, ua komo koke mai la ka hanohano ame ka oiaio iloko ona, aka iaia e noho hookahi ana iloko o kona lumi, kahi hoi a kana wahine aloha i noho iho ai i na la i hala aku me ka laua wahi bebe uuku maluna o kona mau lima aloha, a hoopuka ae hoi i na hua pule no ke kiai ana mai o na Mana Lani maluna o kana lei aloha, ia manawa e ko mai ai ua leo pule ia e hoomaalili ana i ka inaina iloko ona.
I ke kakahiaka nui o kekahi la ae mahope o ko ka eale ai ana i kona paina kakahiaka, na houluulu ae la oia i kona mau kanaka, a hele hou aku la no ka uhai holoholona iloko o ka ululaau. Aole keia o kona manao maoli, aka ua makemake oia e hele mamo aku mai kahi aku nana e hoanoe nei i kona mau noonoo.
" E Hiu, " wahi ana mamua o kona hele ana aku, "ina oe e hui aku ana me ko haku i keia la e haʻi aku oe iaia, ua paa kuu manao a aole hoi wau e luli ae ana mai ia manao ana. E hoomaopopo aku oe iaia aole loa he mea nana e hoopau iho i kaʻu mea i manao ai e hana ."
" E haʻi aku no wau iaia, e kuu haku ."
" A he mea pono nou e ike iho ua hoomaopopo mai oia ia mea ."
" Ua haawi aku la o Hiu i kona ae ma ke kunou ana.
" Ke manao nei wau ua ike no oe i keia kaikamahine nana i hoanoe ae i ka noonoo o kuu keiki ?"
Ua nana aku la o Hiu me ka hikilele. Ua maopopo no hoi i ka eale ua ike no hoi oia i ua kaikamahine la.
" Malia paha. " wahi a ka eale i pane hou aku ai me ka hoomaopopo ana i ke kumu o ka pane ole ana mai o Hiu i kana ninau. " e ike hou aku ana oe i ua kaikamahine la ?"
" Aole ia he mea hiki ole, e kuu haku ."
" Ina e ike hou aku oe iaia, e haʻi aku oe @iaia e pono iaia ke imi aku i kahi e hiki ai iaia ke hoike mai ia Roderika aole oia ehiki ke mare mai ia Roderika a e noho no hoi oia e like me ia i keia manawa ."
No ko Hiu pane ole aku ame ka hoomau ana aku i ka nana ana me ka pahaohao, ua loaa koke iho la ka noonoo i ka eale, ua hu aku kana mau olelo mawaho o ka mea kupono, nolaila ua haalele iho la oia ia Hiu a hui aku la me kona mau hoa e kali mai ana iaia.
" Mahea ka kakou hele i keia la ?" wahi a kekahi o na alakai o ka ululaau i ninau aku ai ka eale.
" E hele mua aku kakou no ka Ululaau o Kilikulana, " wahi a ka eale i pane aku ai.
Nolaila ua kamoe aku la ka lakou huakai e like me ka makemake o ka eale, a mahope o ka hala ana o hookahi hora, ua hoomaka aku la lakou e uhai mahope o kekahi puaa ui, a na ka eale no i pepehi iho i ua puaa la me kana ihe. Mahope mai ua loaa hou aku la kekahi meheu puaa, a i ke kiekie loa ana ae o ka la ua hiki aku la ka huakai i kekahi wahi oneanea iloko o ka ululaau a e waiho mai ana kekahi alanui i maa i ka hele ia.
" Aole wau i ike mua i keia alanui." wahi a ka eale i puana ae ai. " Ke holo nei keia alanui ihea ?"
" Ke holo nei keia alanui no Dalavina Hale ma kekahi aoao, a no Mauna Dysart hoi ma kekahi aoao ."
" He alanui maikai keia, a ma ka nana iho he alanui hele mau ia. Ke manao nei wau e kipa aku no Dalavina Hale. Aole no paha hoi e loihi loa aku mai nei aku no Dalavina Hale."
" Ua hiki no ia kakou ke hele aku, e kuu haku, aka aole loa e loaa ana ia kakou ka wa kupono e hoomaha iho ai."
E hoomaka aku ana ka eale e pane hou aku a ia manawa i lohe aku ai oia i ka halulu, a hooho ae la kona mau hoa " He puaa ! he puaa !" a ia manawa hookahi no hoi i nakeke ae ai o ka lakou mau ihe.
" Alia!" i hooho ae ai ka eale. "Aole kela he halulu no kekahi holoholona ahiu. Ke kokoke mai nei kekahi mau lio, a ke holo mai nei hoi mai ka hikina mai----malia paha mai Dalavina Hale mai."
" He oiaio aia malaila o Dalavina Hale," wahi a kekahi i puana ae ai.
" Malia paha o Makamuraga no. He mea pono ia kakou ke hookaawale aku no kekahi wahi mamao, iki aku a nana mai i ko lakou hele ana ae."
Iloko o ka ka pokole ua nalo aku la ka eale ame kona mau hoa, a aole hoi i loihi mahope mai ua oili mai la elua mau kanaka maluna o na lio, o kekahi o laua e paa ana i kekahi puolo nui maluna iho o kona alo.
" A mamua no hoi o ko kaua hele ana aku, naʻu e malama i ka kaua ukana." wahi a kekahi i pane ae ai.
He mau kana hihiu male no laua a e elua, i paa hoi me na aahu ilidia a he mau oiwi ikaika ko laua nana e hoike mai ana i ko laua kulana koa.
" Auwe ! heaha kela leo ? He leo ka i pu-a ae ia manawa no kekahi mea iloko o ka poino e auwe ana iloko o ka pilikia---a mahope mai he mau huaolelo o ka pule.
" O, e kuua Akua !" E aloha mai ! E aloha mai !" i poha mai ai i na puka pepeiao o ka eale ; a o ka leo he leo no kekahi wahine.
Mai hana mai oe i ka hana hoouluhua ," wahi a kekahi o ua mau kanaka la i pane aku ai, " he mea pono ia oe e noho malie iho ."
" E aloha mai ! E aloha mai ! No keaha la olua i hana mai ai iaʻu e like me keia ? O, e hookuu mai iaʻu !"
" Heaha kau e hana hupo nei, e kahi kaikamahine uuku ? Ua pono loa ia oe e noi mai e oki ia ae kou poo mai kona kano aku mamua o kou hookuu ia aku ."
He manawa pokole ka pu-a olelo ole ana a ia manawa i uwe hou ae ai ka opio wahine, a e like me ka ikaika i loaa aku iaia, ua huki mai la oia i kona lima mai ka mea nana oia e paa ana, a holo aku la iloko o ka ululaau ; aka mamua o kona kaawale loa ana aku, ua paa hou aku la oia i ka hopuia a kauoia mai la oia me ka menemene ole.
Ua hiki ole ia Sir Kamaki ke uumi hou iho i kona inaina. Ina paha o ka opio wahine ana e ike nei a he pupuka, ina no ua like aku kona manao me na kanaka e hana mai nei i keia hana aloha ole imua o kona mau maka. Ua lele ino iho la oia mai kona lio iho, a holo aku la imua me ka awiwi, a hahai mai la no hoi kona mau hoa iaia. E like me ka hikiwawe o ke ala ana mai o kona mau manao huhu, pela ka hikiwawe o ka iho ana kau o kana pahikaua, a mahele hapalua ia iho la ke poo o ke kanaka e paa ana i ka opio wahine, a i kona mau hoa e alualu la i ka lua o na kanaka, ua noho iho la oia e malama i ka opio wahine, a hii mai la iaia iluna o kona mau lima. Ua nawaliwali ka opio wahine ia manawa, a ua maule no hoi, mamuli o kona hina ana iluna o ka lepo ; aka, ua hoi mai la kona ikaika i kona wa i ike iho ai i na lima aloha nana e paa ana iaia, a me he mea la ua manao oia e hookau aku i kona mau lima ma ka a-i o kona hoopakele ; aka, ua kaili koke mai la oia i kona mau lima i kona ike ana mai he malihini keia kanaka imua o kona alo.
" E ka lede, " wahi a ka eale i pane iho ai me ka leo malie, " ua pono anei kaʻu i hana aku ai ma ka lawe ana mai ia oe mai na lima mai o keia mau kanaka ?"
" O, ae,---ae, " wahi a ka opio i pane ae ai me ka hikiwawe.
" A he hiki no anei iaʻu ke hana hou aku nou ? Ua hiki anei iaʻu ke hoihoi aku ia oe no kou home ?"
" O ke Akua ka mea i ike, e kuu hoaloha maikai, ua oi aku koʻu makemake i kau hana noʻu. O ! ina oe e oluolu mai ana e lawe aku iaʻu no kekahi wahi e loaa ai iaʻu ka maha e---."
Ua hoopau iho la ka opio wahine i kana mau kamailio ana, a puili ae la i kona mau lima ma kona umauma me he mea ia ua loaa aku iaia kekahi puupuu ikaika.
" E lawe aku no wau ia oe ma kau wahi e makemake ai, e ka lede, ina oe e haʻi mai ana i kahi o kou home, ua---."
Ua kau mai la na lima o ka opio wahine me he mea la e papa mai ana iaia aole e hoopuka hou aku i kekahi mau olelo, a ua ike iho la hoi ka eale i ke kau ana iho o ka makaʻu maluna o ka helehelena o ka opio wahine. Ua nana iho la ka eale me ke aloha a e ake ana hoi e ike aku i ka manao o ka opio wahine.
O keia ka wahine opio mua loa a Kamaki Fizigerela i ike ai, aole hoi i ike mua kona mau maka i kekahi kino wahine kulana maikai e like iho la me ka opio wahine ana e paa nei. I ka wa e kau aku ana ke poo o ka opio wahine maluna o kona umauma, ua ike iho la oia i ke aloha ana iaia, e huki aku ana hoi i kona manao e pulama iho iaia no ka wa mau loa. Ua apo koke aku la ka eale i ka opio wahine, a pane iho la me ke aloha maoli no no :
" E kuu kakaimahine, e hilinai mai iaʻu me he mea la owau no @kau makua ponoi. Aia ihea kou home ?"
" Home," i panai mai ai ka opio wahine me ka onioni ana ae, aka iloko o ka wa pokole na kuu iho la kona poo ilalo, a puana ae la me ka kaumaha.---"E kuu Akua ! aole oʻu home !"
" Aole anei ou home ? Aole anei ou makuakane a makuahine hoi ?"
" Aole---aole ! O! e na Lani e aloha mai iaʻu."
Maanei ua kulou loa iho la ke poo o ka opio wahine a hoomaka iho la e uwe---he uwe me he mea la ua wawahi ia iho kona puuwai---ame ka hiki ia Kamaki ke hoomalielie aku iaia i hana iho ai oia a hiki i ka oluolu ana mai o ka manao kaumaha iloko o ka opio wahine.
" E hoopau i kou uwe ana, e kuu kaikamahine. Aole i mamao loa aku koʻu home mai nei aku, a e hele pu no oe me aʻu no koʻu home, a i ka wa au e makemake ai e hele aku e haawi aku no wau i na kokua ana nou ma ana wahi au e hele aku ai. E malama no wau ia oe e like me koʻu malama ana i kaʻu keiki ponoi, a aole hoi e loaa mai na poino maluna ou oiai wau e ola ana. e hele pu anei oe me aʻu ?"
" Ae, e kuu hoaloha. Ua like oe iaʻu me kekahi kanaka puuwai aloha, a ke hilinai e aku nei no wau ia oe, a ke haawi aku nei hoi wau i koʻu hoomaikai ana ia oe."
" Ua loaa anei ia oe ka ikaika no ke kau ana iluna o ka lio ?"
" Ae."
HOOLAHA HOOKO MORAKI.
HOOLAHA MANAO PANIKU A KUAI A KA MEA PAA MORAKI.
---
GOO HOY.
---
Ma keia ke haawiia aku nei ka hoolaha mamuli o ka mana kuai iloko o kekahi moraki i hanaia ma Sepatemaba 14, 1901, i hanaia e Goo Hoy, ma ke ano he mea moraki mai, o Honolulu, Mokupuni o Oahu Teritori o Hawaii, ia Annie S. Parke, ma ke ano he mea paa moraki, o Honolulu i oleloia, a i kakau kopeia iloko o ke Keena Hoona Aina iloko o Honolulu i olelo mua ia ae nei, iloko o ka buke @237 ma na aoao 94-97, ke manao nei ka mea paa moraki e paniku i ka moraki i oleloia no ke kumu i uhaiia, e hoike ana : o ka uku ole ia o ke kumupaa ame ka ukupanee i ka manawa e uku ai.
Ke haawi pu ia aku nei no hoi ka hoolaha mahope o ka pau ana o ekolu pule mai ka la i hoopukaia aku ai keia hoolaha, e hoolahaia aku no ka waiwai i hoopaaia ma ka moraki i oleloia no ke kuai kudala ia ma ke akea, a e malamaia ua kuai nei ma na lumi kudala o James F. Morgan iloko o Honolulu i oleloia ma ka Poaono, Novemaba 7, 1903, ma ka hora 12 o ka la i oleloia.
O ka waiwai i hoopaaia ma ka moraki i oleloia a i manaoia e kuai e like me ka mea i hoikeia ae nei maluna, ua hoakakaia e like me kela malalo iho :
O kela mau apana a mau mahele o ka aina e waiho ia ma Kauluwela, Honolulu i olelo mua ia ae nei, a @he mau hapa hoi o ka Palapala Sila Nui Helu 6817 L. C. A. Helu 2177 ia Nika, a i hoakaka pono loa ia e like me keia malalo iho :
Akahi. E hoomaka ana ma ke kihi hikina-hema o kela apana aina ma ka aoao Akau o ke alanui-olowi a holo ma na kuhikuhi makeneki :
1. Hema 47 ° 00ʻ Komohana 66 kapuai holo ma ke alanui-olowi :
2. Akau 54 ° 00ʻ Komohana 105 kapuai :
3. Akau 22 ° 50ʻ Hikina 6 5-10 kapuai :
4. Akau 39 ° 15ʻ Hikina 61 2-10 kapuai :
5. Hema 53 ° 00ʻ Hikina 116 7-10 kapuai a hiki i kahi i hoomaka ai, nona ka iliaina o 6423 kapuai kuea, a oia no hoi ka aina i hooliloia i ka mea moraki mai i oleloia ma ka palapala kuai aina a J. H. Kunewa, i hanaia ma Aperila 19, 1901, a i kakau kopeia iloko o ke Keena Hoona Aina iloko o Honolulu i olelo mua ia iloko o ka Buke 222, ma na aoao 183-184.
Elua :
1. Akau 43 ° 32ʻ Komohana 165.6 kapuai :
2. Akau 44 ° 58ʻ Hikina 80.3 kapuai :
3. Hema 47 ° 02ʻ Hikina 167.3 kapuai :
4. Hema 39 ° @28ʻ Komohana 24.1 kapuai :
5. Akau 42 ° 32ʻ Komohana 1.6 kapuai :
6. Hema 48 ° 53ʻ Komohana 60.3 kapuai :
7. Hema 33 ° 18ʻ Komohana 6.5 kapuai a hiki i kahi i hoomaka ai, nona ka iliaina o 14,168 kapuai kuea, a oia no hoi ka apana aina i hooliloia i ka mea moraki mai ma ka palapala kuai aina a J. H. Kunewa, i hanaia ma Iune 19, 1901, a i kakau kopeia iloko o ke Keena Hoona Aina iloko o Honolulu i olelo mua ia ae nei, iloko o ka Buke 223, ma na aoao 267-268.
O na apana aina i hoakakaia ae nei maluna, ua huiia laua iloko o hookahi apana, a nona ka iliaina o 20,591 kapuai kuea.
Ma ke kuike a ma ke dala gula Amerika ka makemake a ma ka aoao o ka mea kuai mai ka lilo o na palapala kuai.
No na mea aku i koe, e loaa no mai a W. C. Parke mai, lolo iloko o keia moraki o Annie S. Parke, mea paa moraki.
Hanaia ma Honolulu, Okatoba 9, 1903. ANNIE S. PARKE, Mea Paa Moraki.
Ma o kona loio iloko o keia hana, W. C. PARKE.
AOHE HE OPIUMA OLOKO O KA LAAU KUNU A CHAMBERLAIN.---He nui wale o na laau kunu i huiia me ka opiuma. O ka maha e loaa mai kela ano laau mai, oia ka hoemi ana mai i ka pii nui ana o ka male, a o ka maha e loaa mai ana no ka manawa wale no. I ka manawa e pau ae ai ka hana a ka opiuma, oia ka wa e hoi hou mai ai ka maʻi me ka piha oolea. E emi pu mai no hoi ke oolea o ke kino a oia ke kumu e loaa koke ai i ke anu. Aohe he opiuma oloko o ka Laau Kunu a CHAMBERLAIN, ma na ano apau. E loaa koke no ka oluolu a e waiho iho i ke kino me ka ikaika maikai. He ola mau ka maʻi iaia a he emoole no hoi kana hana. E loaa no ma kahi o Benson, Smith & Co., na agena nana e kuai kukaa nei.
He Huaale Maikai
Aole he like o na
Huaale a Ayers "
me na huaale e ae no ka mea he mau huaale kokua keia i ka hana a na naau, he laau hoomaha maikai loa hoi. Ina he paa kou hanalepo o na
" Huaale a Ayers "
ka laau e hemo maikai ai, a e hemo maikai mau ana hoi mahope aku oia manawa.
Aole loa he hiki i kekahi kanaka ke Olelo ae he maikai kona oia kino ina aole he hemo o kona hanalepo he hookahi manawa o ka la, a oi aku paha. Ina i maopopo keia kanawai a ke ola i na kanaka apau, aole loa e like ka nui o ka poe maʻi me ka mea e ike ia nei i kela mau la.
Ua hana la owaho me ke kopaa he maikai loa ka lawe ana.
Aohe mau Huaale i oi ae ka maikai mamua o na
" Huaale a Ayers "
Hoomakaukau ia e Kauka J. C. Ayer & Company, Lowell Mass. U. S. A. E loaa no kela mau Huaale ma ka Hale Kuai Laau o Hollister, alanui Papu.
HOOLAHA MANA HOOKOLOKOLO
ILOKO O KA AHA HOOKOLOKOLO
KAAPUNI O KA APANA KAA-
PUNI ELUA. TERITORI o HA-
WAII. MA KE KEENA HOOPO-
NOPONO WAIWAI HOOILINA.
---
Iloko o ka Hana o ka Waiwai o J. Kamakele i make. Ke kauoha no ka Hoolaha o ka Palapala Noi no ke kuleana Lunahooponopono Waiwai.
Ma ka heluheluia ana mai ame ka waihoia ana mai o ka Palapala Noi a Mrs. Kaaihala Kamakele, no Kula, Maui, i haʻlia mai ai me ka pololei o ka make kauoha ole o J. Kamakele o Kula, Maui, i oleloia, ma Keokea, Kula, Maui, ma ka la 13 o Novemaba, A. D. @1903. a waiho iho he waiwai iloko o Hawaii Paeaina i kupono e noho lunahooponopono waiwaiia a ke noi aku nei e hoopukaia mai i mau Palapala Hookuleana Lunahooponopono Waiwai ia Mrs. Kaaihala Kamakele.
Ke kauohaia aku nei o ka Poakolu, la 4 o Novemaba, A. D. 1903, a ma ka hora 10 a. m. o ua Poakolu la i oleloia, oia ka manawa maoli i hooholoia ai no ka hoolohe ana i ke Noi i oleloia ma ke Keena Hookolokolo o keia Aha Hookolokolo ma Wailuku, Maui a ma ia wahi a ma ka manawa i hoikeia ae nei e akoakoa ae ai na mea apau i pili iloko o kela hana, a e hoike ae i na kumu o ka hiki ole ke aela ua Palapala Noi la, ina he mau kumu kekahi a he hoolaha o keia kauoha e hoolahaia iloko o na olelo Hawaii ame Beritania no ekolu pule neepapa iloko o na nupepa o Honolulu, Kuokoa ame Hawaiian Gazette.
Hanaia ma Wailuku, Okatoba 3, 1903. ( Kakauinoaia ) JOHN W. KALUA, ( Sila )
Ikeamakaia L. R. CROOK ( Kakauinoaia )
Kakauolelo o ka Aha Kaapuni o ka Apana Kaapuni Elua. 2984---Oct. 9, 16, 23, 30.
Hoolaha a ka Lunahooponopono Waiwai.
---
WAIWAI O HARRY NUNN.
Mamuli o ka hookohuia ana o ka mea nona ka inoa malalo iho he Lunahooponopono i ka Waiwai o Harry Nunn, o Makaweli, Kauai, i make kauoha ole, nolaila ma keia ke haʻi ia aku nei ka lono, o ka poe apau he mau koi ka lakou, e waiho mai ia mea ma koʻu wahi noho ma Makaweli, Kauai, a i ole ia, ia Henry Smith, ma Aliiolani Hale, Honolulu, Mokupuni o Oahu, mamua o ka pau ana o na mahina eono, o hoole loa ia auanei.
A o ka poe i ale i ka mea i make, ma kela ke kauoha ia aku nei lakou e hookaa koke mai ano i ka mea nona ka inoa malalo ma Makaweli i oleloia, a i ole ia Henry Smith, ma kahi i olelo mua ia ae la maluna.
Kakauinoaia ma Makaweli, Kauai, Sepatemaba 12, 1903. HELEN NUNN. Lunahooponopono Waiwai.
2981---Sept. 18, 25,---Oct. 2, 9, 16.
HOOLAHA KUMAU.
JOHN M KEA.
---
He Notari no ka Lehulehu ; he mea hana i na Palapala Kanawai, a he mea huli i na kuleana aina. O na kauoha mai na mokupuni mai e hookoia no me ka pololei.
Keena Hana : Ma ka Loio Kuhina, Hale Mana Hooko. Honolulu, Mei. 22, M. H. 1903.
---HE---
Kuai Hoopau Loa
MA KOʻU HALEKUAI
ma Alanui Hotele
---
E hooliloia aku ana na PALULE, PALEILI, KIMONA, PAPALE ame na pono Iapana ma na kumukuai i loaa mai ai no ka pomaikai o ka poe paa i ka hana i ke ao a hiki ole hoi ke hele e kuai i ka lakou mau mea e makemake ai.
E hamama no i na ahiahi apau, a e hele mai apau loa e nana ina aole makou e haʻi ana i ka oiaio.
S. OZAKI,
Waverly Block Alanui Hotele.
PA KA MAKANI LELE LIILII.
Princeton, Ill., Oct. 4.---I ka hoea ana mai o ke tonado maanei, he nui ka waiwai i poino a make hoi he ekolu mau kino ola.
WANPACA, Wisikonosina. Oct. 4.---He elua mea i make ma o ka pulumi ana ae o ka makani tonado ma keia hapa o Wisikonosina i keia la. Aohe i heluia ka poino i ili aku o ka waiwai.
E ALA KAUA MAI ANA PAHA.
SHANGHAI, Oct. 4.---Ua hoole aku nei o Kina i ke noi a Farani e ae mai e hoonoho i mau koa ma Minkiang. E hoea mai ana paha kekahi ku-ee.
PAA MA KA HALE PUPULE.
WASINETONA, D. C., Oct. 5.---O Peter Elliott, ke kanaka i hoopaakiki ai e ike ia Peresidena Rusawela i keia la a hakaka hoi a eha kekahi o na kiai, ua @hoounaia aku nei no ka Hale Pupule.
LUMBERLON. Oct. @6---O N. M. Albert Cope, ua pepehi oia i kana wahine, kaikaina-wahine ame ia iho i keia la a pau loa i ka make. Ua manao wale ia he pupule paha ke kumu o keia hana.
HOOPAE MALU I NA PAKE.
MANILA, Oct. 8,---Ua loaa ae nei kekahi @hoolaiano ka hoopae malu ana mai i na Pake iloko o ka paeaina. Ua hopuia he elua o na lunanona.
ANEANE E LILO KE OLA.
OXFORD, Ohio. Oct. 2,---Oiai kekahi poe hoohaunaele e homaka ana e @li ia Joseph @Spisy, ua hoopakeleia oia e na makai. He mau haneri o ka poe a ke taona i holo aku e kokua i ka poe hoohaunaele, a i ka hakaka ana ua eha aku he eha poe i na hoahanau o @Spisy.