Ka Nupepa Kuokoa, Volume XLI, Number 41, 9 October 1903 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA.  OKATOBA 9, 1903.  7

 

Na Eueu Kalaiaina a ka Aoao Kuokoa Home Rula.

 

NA KALAUOKALANI KA HOOPIHA MAKALUA.

 

NAKUINA KA MOHO KUOKOA NO KE KAKAUOLELO.

 

            Ma Kakaako i malama ae ai na Home Rula i ka lakou halawai hoeueu kalaiaina i ke ahiahi o ka Poaha o ka pule i hala, aneane e pau loa na moho holo balota luna aupuni kalana i ka haiolelo ma ia halawai.

            Ua malamaia kela halawai hoeueu ma kahi aoao iho o ka hale o ka Lunamakaainana Kumalae a ua muimuia ia no e ka nui kanaka.  Ma ka haiolelo a John Wise ua hoike ae oia he hoohanaia na Hawaii e na Repubalika ma na hana lawe opala ame na hana o ia ano a hookoeia ae la na oihana ano nui no ka poe malihini.

            Ua hoike pu ae oia ina e noho mana ae ka aoao Home Rula alaila e loli ana ke kulana hana, a o na Hawaii wale no ke hoonohoia aku ma na oihana kakauolelo.

NA KALAUOKALANI KA HOOPIHA MAKALUA.

            Ua unuhi hou ae o Nawahine i kona inoa ma ke ano he moho no ka oihana lana auhau no ke Kalana o Hawaii Komohana.  O kekahi o na kumu ana i hoike ai oia ka manaoio i loaa iloko iho ona no ka lawa ole o ka makaukau me ia no ka lawelawe ana i ua hana nei ke kohoia oia.

            No keia ua hoopiha aku o Kalauokalani ma ke ano peresidena no ka aoao kalaiaina Home Rula, ma ka hookohu ana aku ia W. P. McDougall ma kahi o Nawahine i waiho mai.

            Ua waiho ae o Chas. Notley i kona kulana holo moho lunakiai ma ke ano laula, a na Kalauokalani i hoopiha aku ia makalua ma ka hookohu ana ia Frank Harvey.  Ua hanaia ae keia hookohu ana iloko o ka halawai a ke Komite Home Rula i ka Poaha, o ka pule i hala.

            He Demokarata o Frank Harvey a oia no hoi kekahi moho a na Demokarata i wae ai a o ka wae ana iho la a Kalauokalani ua oleloia oia kekahi mea e hei aku ai kekahi mau Home Rula iaia.

NAKUINA KA MOHO KUOKOA NO KE KAKAUOLELO.

            O Moses Nakuina ua hoike akea ae oia i kona hele io ma ke ano he moho no ke kakauolelo o ke Kalana o Oahu, aole malalo o kekahi aoao kalaiaina.

            O kona kulana holo moho no ka oihana, wahi ana, oia ka makaukau hana, a oia ke kanaka e kupono ai oia e noho ai ma ka oihana, ma kekahi olelo moakaka ana ae o ke kanaka piha makaukau oia ke kanaka kupono e noho ma ka oihana, a he mea kupono loa ia ano kanaka e hoonohoia ma kekahi oihana kulana.

 

Pepehi Ino i Kana Wahine.

            MA ka po Lapule i hala iho la e ku ana kekahi kanaka lima kakauha maluna iho o ka wahine i palukuia me na puupuu keikikane, ma Maguna Hale ma ke alanui Moiwahine ame alanui Hema.

            E u ana ka wahine i ka nui o ka eha ona i lomiia ai e kela kanaka nana i pepehi inoino iaia i ka manawa i hoea aku ai o ka makai no ke kokua ana iaia.

J           I ka manawa i hiki mai ai o ke kaa o ka oihana makai a kaikaiia aku la ka wahine no ke kaa, aia hoi, ua ike iho la aohe he hiki pono i ka wahine ke hele nona iho me ka loaa ole aku o kekahi kokua.

                                                                                                                 No ka pane o ka ninau a ka makai ua hoike mai la ka wahine ua loaa iaia ka haawina o ka ehaeha mamuli o ka pepehi ino ia e kana kane mare.  Ma ke ala e holo ana ke kaa no ka halewai ua hoike aku ka wahine i ka ona rama o ke kane a haalele iaia mai ko laua lumi aku, a me ia mea ua haalele iho la ka wahine i ko laua lumi a no ia mea ua huli hele aku la ke kane ke kumu i pepehi ino ia ai oia i kona loaa ana aku.

            Ma kekahi wahi o ke alanui Moiwahine i ka wa maka kanaka ole i palukuia iho ai ua wahine nei me ka lima ikaika o ke aloha ole ame ka peku ana i kona u-ha ame ka opu, a mamuli o ia mau ino i haawiia e kana kane ua aneane hiki ole i ua wahine nei ke hele nona iho me ka hiki pono ole iaia ke hanu.

            Ma ka hiki ana i Kuapapanui ua hiki ole i ka wahine ke ku iluna a he mea pono iaia ke noho iluna o ka noho ma ka hoike ana aku i kana mau ike i ka mea iaia ka uwati o ka oihana makai ia manawa.

            Ua nui maoli kona eha a me ia nui eha aole oia i waiho aku i hoopii i kana kane a wahi ana no kahi wa aku a e hookuui keia manawa.  I ka hiki ana mai o ke kaapio no laua e hoi ai me ke kokua aku a ka makai i hiki pono ai i ka wahine no ka pii ana iluna o ke kaa, oiai ke kanaka ona rama e ku nana wale mai ana no me ke kokua ole.  Ma ke kulana o ka wahine he mea pono oia e noho i ka haukapila.

 

KA AHAHUI KULA SABATI O MAUI, MOLOKAI AME LANAI.

            Ke hoolaha ia aku nei, e noho ana keia Aha maloko o ka luakini o Waihee, ma Lahaina, Maui, ma ka Poalima mua o Novemaba oia ka la 6th A. D. 1903, hora 10 a. m.

            Nolaila, e akoakoa ae na lala apau o keia Aha, ma kahi ame ka manawa i oleloia maluna.

            M. P. WAIWAIOLE, Kakauolelo.

            Wailuku, Oct. 3, 1903.

 

Hoomaka na Hana Hoeueu Koho Balota.

 

KOMO HANA NA REPUBALIKA O HAWAII.

 

WEHEIA KE KAHUA OIHANA MA HILO.

 

            HILO, Okatoba 2. -- O na hana hoeueu o ke kau holo balota o ke Kalana o Hawaii Hikina eia ke holomua nei a e hana aku ana me ka hakalia ole a hiki i ka panina o ka manawa oia ka la koho balota.  I Puna i keia pule iho i hele aku ai o L. A. Andrews ame Geo. Williams ame S. L. Desha e malama i ka lakou halawai haiolelo kalaiaina a ua nui ke ohohiaia e ko laila mau Hawaii.

            Ma ka Poakahi i malama ai lakou i ka halawai i Kapoho a ua ohohia nui ko laila mau kini, a i ke awakea Poalua ma Opihikao, a ia ahiahi no i Kalapana kahi manoanoa o na Home Rula eia nae ua hookipa maikai ia lakou me ka pulama ohaoha ia o ka lakou mau olelo.

            Iloko iho o Hilo, eia na Repubalika ke liuliu nei i na hana hoeueu nui.

            Ua hoolalaia a ua pau i ka hoonohoia na hana no ka hoonee ana i na hana imua.  E hoonohoia aku i poe kanaka kupono a maikai no na kokua ana i ka papainoa o na moho Repubalika noloko o ke Kalana o Hawaii Hikina.

 

NA KEENA O NA REPUBALIKA.

 

            Na wahi hoomoana a keena hoi o na Repubalika o ke Kalana o Hawaii Hikina aia no ia i ke Alanui Waianuenue iloko o ke Kuea o Peacock.  James D. Lewis ka mea iaia ka mana malama o ke keena a ua konoia na Repubalika o ka Teritori o Hawaii holookoa e kipa ae ilaila ke hiki aku i Hilo.

            O keia kahua iho la o na Repubalika na ke komite ia i koho kahi kupono a lakou i noonoo ai ma ka halawai i malamaia i ka Poaono i hala.  O na keena ua hoolakoia me na lako i kupono loa no na hana kalaiaina.  O ka helu o ke kelepona o ke keena he 122, a o na hana apau e hoikeia mai ana ma ke kelepona mai na wahi like ole mai o Hawaii e noonoo koke ia no a e hoike koke ia aku me ka hoohakalia ole ia.  I ka po o ka la apopo e kukuluia ai na hana hoeueu a pau pu me na luna hoohana o ke kau haiolelo kalaiaina i ke koho aku. -- Tribune.

 

He Wahi Hoohalahala ma Kahi o ka Maikai.

 

            E oluolu mai e ka lunahooponopono e hookomo iho ma kahi kaawale o kau Nupepa i keia mau manao malalo nei, nona hoi ke poomanao e kau ae la maluna.

            Ma ke Sabati 27 o ka malama i hala, ua malamaia ka hoike hui o na kula Sabati, mai na Kula Sabati o Koolau a hiki i na Kula Sabati o Haena, i hui ma Waioli, Hanalei.  Ua nui no na Kula Sabati i akoakoa ae a ua maikai na hana i lawelaweia ma ia la.  Ua ike pu ia no hoi ke ahonui o na kumu ame na haumana i hele mai kahi loihi mai iloko o ka ino.

            Mamua ae o ka manawa o ka hoike, ua hoomakaukauia he mau makana hoeueu e kekahi mau haipule, i ake no ka holomua o na kula, i ke kula holomua.  Ua koho ia no hoi he komite o elima lala na lakou e nana i ke kula oi aku o ka holomua ma ke kahua.

            I ka pau ana o na hana hoike, ua hoike mai ka lunahoomalu o ke komite ua lilo i ke kula Sabati o Wainiha ka makana helu ekahi, i ke kula o Wanini ka makana helu elua, a i ke kula Sabati o Kalihiwai ka helu ekolu.  O ka makana helu ekahi, he pai kii i ua kula la i heluia a hoolaha ma ka "Buke Hoaloha;" makana helu elua, he umi buke "Leo Hoonani."

            O ka makana ekolu, he lawe wale i ka buke "Ka Hoaloha" he elima a piha ka makahiki.  O na kula i loaa ka helu he mau kula pokii wale no lakou.

            Heaha hoi ka pili o ke poomanao i na manao maluna?  Eia ka pili aole i malama ia ka manawa ai o ka lehulehu i hiki ae.  Aia ko lakou manawa i paina ai i ka hapalua o ka hora ekolu o ka auwina la o ua la la.  Mamuli o ia ua hoopilikia loa i ke ola o ka lehulehu ma ia la.  Ua ike aku kou mea kakau i ka pilikia o kekahi poe iloko o ka hana, aka ua hoomanawanui no nae me ka pono ole.

            I ka manawa hoi i ai ai ua ai wale aku la no me ke ano ono ole, no ka mea ua hala loa ka manawa ai kupono.  Ua mahalo no na mea ola kino i hoomakaukauia, aka mamuli o ka hala loa o ka manawa ai, ua lilo ka maikai i maikai ole, ka ono i ono ole, ka hauoli i hauoli ole.

            He maikai no ia mau hana e hapaiia nei ke malamaia ma ko lakou mau wahi ponoi iho.  I ka manao o keia makapeni e pono e hoololi ia ia mau ano, a e hapai ia ia mau hana e kulike me keia au e hele nei, he au holomua ame ka naauao.

            Hiki no anei ke hapaiia ma ke ano oi ae ka maikai?  I kuu manao hiki no, no ka mea, he hana hiki no ia i ke kanaka.

 

            SOL. M. HEHA.

            Kilauea, Kauai.  Oct. 2, 1903.

 

            Mai koho ia Aberahama Fernanadez, no ka mea, o ka banana no keia i walawala ae nei a okuu ana i ka Home Rule, mai ka aoao Holokake Demokarata mai a i ka Aoao Home Maiawahi a Bila Aila.  Kahuhu!  Lalau no.

 

Eueu Nui ka Hana Kalaiaina ma Maui

 

AIA NA REPUBALIKA I KAHUA MA NA MOKUPUNI.

 

HULUI PAU HOI NA HOME RULA NO KA PAIO ANA.

 

            MAUI, Okatoba 3. -- Ua mehameha na paia o Wailuku me na leo kalaiaina i keia manawa no ka mea aia lakou ma na wahi apau o ke kalana no ka paio ana ma keia kau holo balota o na moho luna aupuni kalana.

            O na moho Repubalika ua mahele ia ae lakou iloko o na mahele elua, hookahi e hele ana i Molokai a o kekahi e hoomaka ana ma ka aoao hikina o Maui mai Huelo aku.

            O ka mahele no Molokai, oia na lunakiai hui pu ia me Noa Aluli ame David Morton a o W. T. Robinson ame Lunakanawai McKay ame Hon. S. E. Kalama o lakou ka i hala aku no Huelo e hoomaka ana i Pauwela.

            Inehinei ko lakou hele ana a hoomaka no i ka hana.  Ua loaa pu ia lakou ka manao e hooaumoe aku i Keanae ke akakuu mai ka ino o ka ua.

            O na Home Rula hoi kekahi e hooikaika nei ma ka wae ana i na haiolelo maikai no ke kokua ana i ka lakou mau moho.  Ua nee ae ka lakou hoeueu haiolelo kalaiaina ma Hana ae, a e nee ae ana malaila ae a hiki i Ulupalakua.

            Ma ka nana aku i na paio ana he mea paakiki ke kuailo mua ae i ka mea e lawe haaheo ai i ka lanakila o ka la koho balota.

 

KELA AME KEIA.

 

            O ke kula lepo ulaula o Kihei ame ko Kula e hoowaiwaiia aku ana ia mau kula ma ke kanu ko ke hiki aku ka hookahekahe.  O ka wai e hoolakoia ai keia mau kula mai na kahawai mai no ia o ke Koolau.

            E noho ana ka Ahahui Kula Sabati o ka Mokupuni o Maui i Lahaina ma kona kau mau.  E eleu ae na lala e pono ai na hana.

            I keia pule i holo aku ai o Mrs. Kahokuoluna i Honolulu no ka ike ana i ke keiki e waiho ma'i nei i ke Kula o Kamehameha.

            Nui ka hana a na hope makai nui no na hana o ka Aha Hookolokolo e noho ana i Wailuku ma ka la 14 o keia mahina.

            Ma ke kanawai i hooholoia iho nei e ka Ahaolelo e malama ai ka Aha Hookolokolo Kaapuni Elua he ekolu mau kau kiure o ka makahiki aole he elua e like me ka maa.  E malamaia ana i iloko o Malaki, Iune ame Okatoba.

 

Kuko i ka Wahine a ona Hoalauna.

 

            LOS ANGELES, Sept. 25. -- Ma keia ahiahi, ua lalau aku na makai a hopu aku ia Rev. C. D. Whalen a hoopaa ae iaia maloko o ka halepaahao o keia kulanakauhale no ka hewa aihue wahine.  Ua kau aku na lima o ke aupuni maluna ona ma o ka loaa ana mai a kekahi kauoha mai Plattsburg, Nu Ioka, mai e kauoha ana ua hoomahuka keia kahunapule ia Mrs. Jas. H. Clark.

            O Whalen ke kahu o ka halepule Bapetizo Kuokoa o Plattsburg i oleloia ae nei, a me ia pu malaila, e noho ana kana wahine ame na keiki he eha ka heluna.  O James H. Clark ame kana Eva, he mau hoahanau laua no ka halepule e noho kahuhipa ia ana e ua Whalen nei.  Maloko o ka nohona ano hoahanau a kaikuahine ana, ua ulu ae ke aloha pumehana mawaena o ke kanaka i hoaahuia me ka inoa laa o ke kahuna Levi ame Mrs. Clark, a o ka haina o ka moe, ua holo malu aku keia mau mea a hoopunana ma kekahi wahi he mau tausani mile ka mamao mai kahi a laua i noho mua ai.

            He ewalu mahina mahope o ko laua nalowale ana, ua loaa aku la ka lohe ma ka home mua eia laua ma Los Angeles nei kahi i noho ai no kekahi manawa loihi.

            Ia laua i hiki a ma Los Angeles nei, ua hapai ae laua a lawelawe i na hana pono, aka mahope mai ua halawai iho la o Mrs. Clark me kekahi ulia i kela mahina iho nei a poino kona ola.  Ua ha'i aku o Whalen i keia lono i kona poe ma Plattsburg, a maluna o keia mea i hanu mai ai na makai a loaa oia maanei.

            Maloko o kekahi lumi hoopaa lawehala o ka halepaahao o ke kulanakauhale nei, ua olelo ae oia penei:  "He mea oiaio ua aihue wau i ka wahine a kekahi kanaka okoa, a haalele aku hoi i ko'u ohana ponoi a holo me ka'u ipo i aloha ai, eia nae, o keia hana a'u oia wale no ke kiko eleele maluna o'u ma keia ola ana.  Ua hemolele wau ma na ano apau a koe hoi keia mea."

 

Hoomanao Mahina Poepoe.

 

            Ma ka po Poaono nei i hoomaka ai na keiki o ka aina pua e malama i na hana hoomanao mahina poepoe.  Ma na hale hoomana kii, he nui ka poe i hele aku e kunokunou i na kii ame ke kalokalo pule ana aku i na uhane o ka kupuna i hala aku ma kela aoao o ka muliwai lenalena, a ma na hale ahahui, ua malama ae lakou i na hana hookulikuli hoopa-hupa-hu ame paani hana pakini.

            Ma ka po o ka Lapule nei, ua haawi luau laiki ae kekahi mau Pake, a he nui ka poe i hele aku e hoonuu i na meaai a inu hoi i na @am @u o ke kulana helu ekahi i waihoia mai ma na pakaukau.

 

Ma ke Kauoha.

 

UAHAUA KOHO BALOTA

 

            OIAI, ma ke Kanawai 31 o ke kau kumau o ka Ahaolelo o ka Panalaau o Hawaii ua haawiia mai ke kuleana e malamaia kekahi kau koho balota ma ka la ekolu (3) o Novemaba, A. D. 1903, no ke koho ana i na Luna Kalana, a iloko hoi o kanaono la mamua o ka la ekolu (3) o Novemaba, A. D. 1903, e hoopuka aku ai ke Kiaaina i kekahi kuahaua no ua kau koho balota la:

            ANO, NOLAILA, i kulike ai me ia, OWAU O SANFORD B. DOLE, KIAAINA O KA PANALAAU O HAWAII, ma keia ke hoolaha aku nei e malama ia i kau koho balota kuikawa no na Luna Kalana o na Kalana like ole o ka Panalaau o Hawaii, ma ka Poalua, ka la ekolu (3) o Novemaba, A. D. 1903, mawaena o na hora 8 A. M. ame 5 P. M., iloko o na Kalana pakahi a puni ka Panalaau, a koe ke Kalana o Kalawao a i huiia o Kalaupapa, Kalawao ame Waikolu, iloko o ka Mokupuni o Molokai.

            O na Kalana, oia keia malalo iho:

            KALANA O OAHU: Ka Mokupuni o Oahu ame na mokupuni e ae apau o ka Panalaau i komo ole maloko o kekahi kalana.

            KALANA O MAUI: Na Mokupuni o Maui, Molokai, Lanai ame Kahoolawe me na Mokupuni e ae apau e moe ana maloko o ekolu mile ana moana mai ko lakou mau kapakai aku, a koe no nae kela hapa o ka Mokupuni o Molokai i maopopoia o Kalaupapa, Kalawao ame Waikolu.

            KALANA O HAWAII KOMOHANA: O na Apana o Kau, Kohala Akau, Kohala Hema, Kona Akau ame Kona Hema, maluna o ka Mokupuni o Hawaii ame na Mokupuni e ae apau e moe ana maloko o ekolu mile ana moana mai ko lakou mau kapakai aku.

            KALANA O HAWAII HIKINA: O na Apana o Hilo, Puna ame Hamakua, maluna o ka Mokupuni o Hawaii, ame na Mokupuni e ae apau e moe ana maloko o eono mile ana moana mai ko lakou mau kapakai aku.

            KALANA O KAUAI: O na Mokupuni o Kauai ame Niihau, ame na Mokupuni e ae apau e moe ana maloko o ekolu mile ana moana mai ko laua mau kapakai aku.

            Na Luna Kalana e kohoia aku ana:

 

NO KE KALANA O OAHU.

 

            Ehiku Lunakiai, he elua e kohoia mai ka Apana Lunamakaainana Eha mai, elua mai ka Apana Lunamakaainana Elima mai, a ekolu e koho laula ia mai ke Kalana ae:

            Luna Makai, oia ka Luna Koronero ma ke kulana;

            Kakauolelo o ke Kalana, oia ka Luna Kakau Hope ma ke kulana;

            Luna Hooia;

            Luna Helu me Ohi Auhau;

            Loio Apana;

            Puuku, oia ka Luna Ohi Auhau Laikini ma ke kulana;

            Ana Aina.

 

NO NA KALANA PAKAHI O MAUI, HAWAII HEMA, HAWAII HIKINA AME KAUAI.

 

            Elima Lunakiai;

            Luna Makai, oia ka Luna Koronero ma ke kulana;

            Kakauolelo o ke Kalana, oia ka Luna Kakau Kope ma ke kulana;

            Luna Hooia;

            Luna Helu me Ohi Auhau;

            Loio Apana;

            Puuku, oia ka Luna Ohi Auhau Laikini ma ke kulana;

            Ana Aina.

            O na Mahele Hoopaainoa, oia keia malalo iho:

 

APANA EKAHI.

 

Puna, Hilo ame Hamakua, Mokupuni o Hawaii.

 

            Mahele Ekahi. -- O kela wahi apau o Puna koe o Keaau ame Olaa.

            Mahele Elua -- Na aina o Keaau ame Olaa.

            Mahele Ekolu -- Kela hapa o Hilo e moe ana mawaena o Puna ame ke Alanui Ponahawai ame ke alanui ame ka laina e moe la a hiki i ke kai.

            Mahele Eha -- O kela hapa apau o Hilo e moe la mawaena o ka Mahele Ekolu ame ke Kahawai o Honolii.

            Mahele Elima -- Kela hapa o Hilo e moe la mawaena o ke Kahawai o Honolii ame ka aina o Makahanaloa.

            Mahele Eono -- Kela hapa o Hilo e moe la mawaena o ka Mahele Elima ame lalo o ke Awawa o Waikaumalo

            Mahele Ehiku -- Kela hapa o ka Apana Koho Ekahi e moe la mawaena o ka Mahele Eono ame lalo o ke Awawa o Kaula.

            Mahele Ewalu -- Kela hapa o ka Apana Koko Ekahi e moe la mawaena o ka Mahele Ehiku ame ka aina o Kalopa.

            Mahele Eiwa -- Kela hapa o ka Apana Koho Ekahi e moe la mawaena o ka Mahele Ewalu ame lalo o ke Awawa o Malanahae.

            Mahele Umi -- Kela hapa o ka Apana Koho Ekahi e moe la mawaena o ka Mahele Eiwa ame Kohala.

 

APANA ELUA.

 

Kohala, Kona ame Kau, Mokupuni o Hawaii.

 

            Mahele Ekahi -- Kohala Akau.

            Mahele Elua -- Kohala Hema.

            Mahele Ekolu -- Kela hapa o Kona Akau e moe la ma ka aoao akau o ka palena akau o Holualoa ame ka laina e holo la mai ke kihi akau o Holualoa a hiki i ke kihi hema o Puuanahulu.

            Mahele Eha -- Kela hapa o ka Apana Koho Elua e hoopuniia la e ka Mahele Ekolu, Hamakua, Kau, ka palena o Keauhou mai Kau a hiki i Honaunau ame ka palena akau o Honaunau a hiki i ke kai.

            Mahele Elima -- Kela hapa o Kona Hema e moe la mawaena o Keei ame Olelomoana.

            Mahele Eono -- Kela hapa o Kona Hema e moe la mawaena o ka Mahele Elima ame Kau.

            Mahele Ehiku -- Kela hapa o Kau e moe la mawaena o Kona Hema ame Punaluu.

            Mahele Ewalu -- Ka hapa i koe o Kau.

 

APANA EKOLU.

 

Na Mokupuni o Maui, Molokai, Lanai ame Kahoolawe.

 

            Mahele Elua -- Kela hapa o ka Mokupuni o Molokai, koe o Kalaupapa, Kalawao ame Waikolu.

            Mahele Ekolu -- Kela hapa komohana o Maui e moe ia mawaena o na aina o Waikapu ame Honokowai.

            Mahele Eha -- Kela hapa komohana o Hanakaoo ame Waihee a i ikeia o Kaanapali.

            Mahele Elima -- Mokupuni o Lanai.

            Mahele Eono -- Kela hapa o ka Apana o Wailuku e moe komohana la, a me ke komohana-akau o ka laina e holo la mai ka waha mai o ke kahawai o Wailuku ma ka aoao hema ma na puuone a hiki i ke Awa o Maalaea huiia me ka Mokupuni o Kahoolawe.

            Mahele Ehiku -- Kela hapa o ka Apana o Wailuku i apoia e ka Mahele Eono, na aina o Pulehunui, Kelialinu, Kailua, Hokuula ame Hamakuapoko ame ke kai.

            Mahele Ewalu -- Kela hapa apau o Kula, Maui Hikina, e moe komohana la ma ka laina e holo la mai Honuaula a hiki i ka palena akau e Pulehunui ma ka laina o na puu a elua, Puu o Kali ame Puu o Koha.

            Mahele Eiwa -- Ka hapa i koe o Kula ame kela hapa o Hamakualoa e moe komohana-hema la o ke Awawa o Maliko, a mauka e ke Alanui e holo ana mai Kaluanui a hiki i ka Halepaahao o Makawao ame ka laina e moe loa la.

            Mahele Umi -- Ka hapa i koe o Hamakuapoko ame kela hapa o Hamakualoa e moe komohana la o ke Kahawai o Kahalehaku.

            Mahele Umi-kumamakahi -- Kela hapa o Maui Hikina e moe la mawaena o na Kahawai o Halehaku ame Opuloa.

            Mahele umi-kumamalua -- Kela hapa o Maui Hikina e moe la mawaena o na Kahawai o Opuloa ame Kapaula.

            Mahele Umi-kumamakolu -- Kela hapa apau o Maui Hikina e moe la mawaena o ka Mahele Umi-kumamalua a me Kipahulu.

            Mahele Umi-kumamaha -- Kipahulu a me Kaupo.

            Mahele Umi-kumamalima -- Kela hapa o Maui Hikina e moe la mawaena o ka Mahele Umi-kumamaha ame na Mahele Ewalu ame Eiwa huiia me Kahikinui me Honuaula.

 

APANA EHA.

 

            O kela hapa apau o ka Mokupuni o Oahu e moe hikina ana ame hema o ke Alanui Nuuanu ame ka laina e moe loihi ana malaila a ka Pali o Nuuanu a hiki i ka Lae o Mokapu.

            Mahele Ekahi -- Kela hapa apau o ka Apana Koho i oleloia e apo la i ka Apana o Honolulu, e moe hikina ana ka laina e holo ana mai ka uwapo loihi o Ala Moana a hiki i ka huina akau o na Alanui Moi ame Punahou, -- o ka hoakaka oiaio, oia ka Akau 30 ˚ 30' Hikina holo ma ke Alanui Punahou a hiki i ka hoomaka ana o ke Alaloa o Manoa; a malaila aku ma ka aoao mauka holo ma ke kae komohana o ke Awawa o Manoa a hiki i ka piko o ua kae la.

            Mahele Elua -- Kela hapa apau o ka Apana i oleloia a e moe la mawaena o ka palena komohana o ka Mahele Ekahi ame ka laina e holo ana mai kahakai ma ke Alanui Sheridan, Alanui hou o Piikoi i hoomoeia iho nei ame Alanui Piikoi, a malaila aku ma ka palena komohana o na aina o Lunalilo Home a hiki i ke kihi hema o Kalawahine, a ma ka palena hikina o Kalawahine holo a hiki i ka hui ana o ka aoao komohana o ka Mahele Ekahi ma ka maka aneane 1400 kapuai mauka o Tantalus.

            Mahele Ekolu -- Kela hapa apau o ka Apana i oleloia i apoia e na palena komohana o na Mahele Ekahi, Elua ame Ewalu, na Alanui Nuuanu ame Kula, ame ka laina e holo ana mai ka huli o na Alanui Kula ame Puowaina a hiki i ka pahu hae kahiko iluna o Puowaina ame ka piko o ke Kuahiwi o Konahuanui.

            Mahele Eha -- Kela hapa apau o ka Apana i oleloia i apoia e ka Mahele Ekolu ame Ewalu, a, e na Alanui Beretania ame Nuuanu.

            Mahele Elima -- Kela hapa apau o ka Apana i oleloia i apoia e ka Mahele Ewalu ame na Alanui Beretania, Puowaina, Moi ame Mililani ame ke kuapanalu.

            Mahele Eono -- Kela hapa apau o ka Apana i oleloia i apoia e na Alanui Miliani, Moi, Puowaina, Beretania ame Nuuanu ame ke Awa-kumoku.

            Mahele Ehiku -- Kela hapa apau loa o ka Apana i oleloia e moe la mawaho o ka Apana o Honolulu.

            Mahele Ewalu -- Kela hapa apau o ka Apana i oleloia e moe la mawaena o ka palena komohana o ka Mahele Elua ame ka laina e holo ana mai kahakai mai me na Alanui Hema, Moi, ame Alapai, a mai ke poo mai o ke Alanui Alapai a hiki i ka pahu hae kahiko iluna o Puowaina malaila aku holo ma ke ka'e hikina o ke Awawa o Pauoa a hiki i ka hui ana i ka laina komohana o ka Mahele Elua ma ka maka makai koke iho o ke kuamoo o ke kualapa ma ke kumu o ka puu o Tantalus.

 

APANA ELIMA.

 

            Kela hapa apau loa o ka Mokupuni o Oahu e moe la ma ke komohana ame ka akau o ke Alanui Nuuanu ame ka laina e moe loihi la mailaila aku a ka Pali o Nuuanu a hiki i ka Lae o Mokapu.

            Mahele Ekahi -- Kela Apana Hookolokolo ame Ohi Auhau o Koolaupoko e moe la ma ke komohana ame ka akau o ka laina e moe ana mai ka Pali o Nuuanu a hiki i ka Lae o Mokapu.

            Mahele Elua -- Ka Apana Hookolokolo ame Ohi Auhau o Koolauloa.

            Mahele Ekolu -- Ka Apana Hookolokolo ame Ohi Auhau o Waialua.

            Mahele Eha -- Ka Apana Hookolokolo ame Ohi Auhau o Waianae.

            Mahele Elima -- Kela hapa o ka Apana Hookolokolo ame Ohi Auhau o Ewa, huiia na aina o Hoaeae ame Honouliuli.

            Mahele Eono -- Ka hapa apau i koe o ka Apana Hookolokolo ame Ohi Auhau o Ewa.

            Mahele Ehiku -- Kela hapa apau o Honolulu a o Kona hoi e moe la ma ka aoao makai o ke Alanui Moi mai ka laina Ewa mai a hiki i ka uwapo o ke Alanui Moi, ame ka aoao mauka o ke Alanui i oleloia mai ka laina Ewa mai a hiki i ke Alanui nui iuka o ke Awawa o Kalihi.

            Mahele Ewalu -- Kela hapa apau o Honolulu a o Kona hoi e moe la mauka o ke Alanui Moi mai ke Alanui nui iuka o ke Awawa o Kalihi a hiki i ke Alanui Liliha,, ame ka laina e moe la mai ke poo mai e moe loihi la o ka laina o ke Alanui Judd, malaila aku a holo ma ke kualapa e waiho la ma ka aoao komohana o ke Awawa o Nuuanu.

            Mahele Eiwa -- Kela hapa o Honolulu a o Kona hoi e moe la mawaena o ka Mahele Ewalu ame ke Alanui Nuuanu, a ma ka aoao mauka o ka laina e moe la ma Alanui Kula, ke Kahawai o Nuuanu ame Alanui Beretania.

            Mahele Umi -- Kela hapa o Honolulu a o Kona hoi i apoia e na Alanui Moi, Liliha ame Kula, ke Kahawai o Nuuanu, na Alanui Beretania ame Nuuanu ame ke Awa-kumoku.

 

APANA EONO.

 

Na Mokupuni o Kauai ame Niihau.

            Mahele Ekahi -- Mokupuni o Niihau.

            Mahele Elua -- Kela hapa o ka Apana o Waimea e moe ana mai ka Mahele Ekolu a hiki i ka Lae o Puanaaua.

            Mahele Ekolu -- Kela hapa o ka Apana o Waimea e moe ana mai Hanapepe a hiki i ka laina mawaena o Waimea ame ka Mahiko o Kekaha e moe loa ana ma ka laina moe loihi o ka palena i oleloia a hiki i ke kai.

            Mahele Eha -- Mai Kalaheo mai a pau pu me Kalaheo i oleloia, a hiki i Hanapepe a pau pu me Hanapepe.

            Mahele Elima -- Ka Apana o Koloa mai kona huina me Lihue aku a hiki i ka aina o Lawai a pau pu me ua aina la i oleloia.

            Mahele Eono -- Ka Apana o Lihue.

            Mahele Ehiku -- E moe ana mai ka aina mai o Papaa a hiki i ka aina o Wailua a pau pu me ka aina o Wailua i oleloia.

            Mahele Ewalu -- E moe ana mai ka Muliwai o Kalihiwai a hiki i ka aina o Papaa a pau pu me Papaa i oleloia.

            Mahele Eiwa -- E moe ana mai ka Muliwai o Kalihiwai a hiki i ka palena akau o ka Apana o Waimea.

            I HOIKE NO KEIA, KE KAU NEI au i ko'u pulima ame ka hoopili pu ana i ke Sila o ke Panalaau o Hawaii.  (Sila)

            Hanaia ma ka Hale Mana Hooko ma Honolulu, i keia la 31 o Augate, A. D. 1903.

            SANFORD B. DOLE.

Na ke Kiaaina,

            G. R. CARTER,

            Kakauolelo o ka Panalaau.

 

HOOLAHA KUMAU

 

..  O KE ..

Koko Ino ka mea e Loaa ai na Pilikia ma ke Kino.

E Heluhelu i keia mau Manao.

O KA LAAU

AYER'S SARSAPARILLA

KA

laau nana e hookaawale na ma'i ino mai kou koko aku.  He laau hoonoono ai, a he laau e hooikaika ana i kou mau lala apau.  O ka Laau Ayer's Sarsaparilla ka laau kaulana loa a puni ke ao holookoa.  Ina e hoomau ia ka lawelawe ana i keia laau e loaa ana ka ke ola kino maikai a me ke koko maemae, hoi hou mai ka ula o kou mau lehelhe, pu'ipu'i maikai kou mau papalina, a loaa ke kulana ola kino maikai.

            He loaa na pu'u paa o ke kino i ka laau Ayer's Sarsaparilla, e hoopakele ana mai ka ma'i puu paa (Brights' Disease ame na ma'i oia ano.  Ke koi ikaika aku nei makou e lawe ia keia ano laau ma kahi i ike ia na ma'i Puu paa apau.

            Hoomakaukau ia e Kauka J. C. Ayers

            E loaa no keia mau Huaale ma na hale kuai laau apau.

 

FUKURODA

Halekuai Lole Iapana Helu 1.

 

Mea Hana Papale Ie

28 32 Alanui Hotele.

            Telepona White 2424

            EDWARD KEALOHA,

            Mea Kuai Lole.

 

Mai Poino ia Iapana i ka Paani.

 

            O ka paani wale ana a kekahi Iapana Kane i inu i ka rama, mai poino ke ola o kekahi wahine Kepani, iaia e hoao ana e kau aku iluna o ke kaa uwila oiai ma ke alanui Hotele kokoke i ke alanui Muliwai.

            I ke kaa uwila e holo mai ana i ke kulanakauhale mai ka Palama mai oia ka manawa a kekahi Iapana wahine i haalele aku ai i kekahi halekuai mea liilii, e laa ke kanake, waimomona ame na mea like, a holo no ke kihi o ke alanui no ke kau ana iluna o ke kaa.

            Ua kaa iki aku ka wahine mawaho o ke alanui helewawae oia no ka hoi ka manawa i puka ae ai kekahi Iapana kane mai kekahi halekuai e ku kokoke ana me ka akaaka nui ame na olelo o ke ano paani.

            I kona hele pu ana mai me ka wahine no ka hookokoke ana mai i ke kaa ua hopu aku la ua Iapana kane nei i ka wahine ma na poaeae o ka wahine a onou aku la oia i mua ma kahi a ke kaa uwila e holo mai ana.  Ma kela hana ana a kela kane ua kulana aku la ua Kepani wahine nei a hina mamuli o ka hihia ana o na kamaa laau o ua wahine nei a me ka hooikaika nui no hoi ua wahine nei i @e ae ai i kona kino mai ka hina io aku ilalo, a ina oia i hina ina ua kaa malalo o ke kaa.

            Ua lilo keia hiohiona kupilikii o ka wahine i haawina hoeeke i na ohua o luna o ke kaa uwila.