Ka Nupepa Kuokoa, Volume XLI, Number 39, 25 September 1903 — Aha Elele a ka Home Rula. [ARTICLE]

Aha Elele a ka Home Rula.

Makai Nui—R- W. Wilcox. (Wilikoki) Kakauolelo —D. Kalauokalani Opio. Luna Hooia—Chas. Wilcox. Loio Kalana—E. Caypless. Ana Aina—S. W. Willis. Na Lunakiai Holo Akea:— Chas. Notley (Kale Nokale), James H. Boyd (Kimo Boe), ame Abraham Fernandez (Aberahama Panana.) KA HOOMAKA ANA O NA HANA. Ma ka hapaha i hala, o ka hora 10 o ke kakahiaka Poakolu nei i akoakoa ae ai na elele o ka Aha Wae Moho o ka Aoao Kalaiaina Home Rula o ke Kalana o Oahu ma ka halekeaka Opiuma no ka noonoo a wae ana i ka lakou mau moho e komo aku ana iloko o ka hahana o ke kahua kaua o ke koho balota e hiki mai ana i keia Novemaba

ae. Ua hoomaka ka halawai me Peresidena Kalauokalani ma ka noho me D. M. Kupihea ma ke kulana kakauolelo. Mahope o ka pule a Sam Kamakaia, ua ku mai o Senatoa Kalauokalani a hoakaka mai i na hoa i ke kumuhana ano nui a lakou e hana aku ai. I ka pau ana o ka Kalauokalani haiolelo ana, ua hoomaopopoia ae ka nui o na elele i hiki mai. I ka heluia ana ua maopopo ae he 88 hoa i hiki mai. Ma ke noi a Iaukea, ua kohoia i komite o ekolu maluna o na palapala hookohu. Ma ke noi a J. H. Wise, ua kohoia i komite maluna o na rula ame ke komite o ke kumuhana. Noi mai o Iaukea e hoopanee ka aha a ka hora 2 o ka auwina la, a ua olelo ae ka lunahoomalu e pono paha e noho hou i ka 7:30 o ke ahiahi. Aponoia. HALAWAI AHIAHI. Ua noho hou ka aha he mau minute mahope iho o ka hapaha hora 7 o ke ahiahi. Ua noho ke komite hookohu e nana i na hookohu o na elele i hiki ole mai i ka halawai o ke kakahiaka, a ua aponoia. He hoike komite na Wise maluna o na rula o aha. Aponoia. WILIKOKI KA MAKAI NUI. Mahope o ke kukala ana a Kalauoka-

lani o ka wa keia no ka waiho ana mai i na inoa no na moho holo makai nui o ke kalana, ua ku mai o Kaohi a waiho mai i ka inoa o R. W. Wilikoki me ka olelo ana ae ua haawi o Wilikoki i kona ola iho no na kanaka Hawaii, a ina o Wilikoki ke kanaka ma ke kulana makai nui, oia ka mea nana e nana i na hana a na kauka o ka Papa Ola e hoopaa wale nei i na kanaka Hawaii no ka ma'i hookaawale ohana. He kanaka no hoi o Wilikoki i poina ole i na Hawaii i kona wa pii ae ai ma ke kulana hanohano, a e loaa no ka pono i na Hawaii ma ke kakoo ana iaia. Kokuaia keia inoa e Wise a paniia ka puka. Huro na hoa elele no ka piha ohohia. HAIOLELO A WILIKOKI. I ka puka ana o Wilikoki, ua kahea mai na. hoa e haiolelo aku ka moho, a ua ku mai o Wilikoki a olelo mai aole oia i imi e loaa keia hanohano, aka ua hooiliia ma[i] keia hanohano maluna ona, a malalo o ka makemake o ka lehulehu, e hapai hou ae ana oia i kana pahikaua a hakaka aku i na enemi o ka lahui. Ua noi aku oia i na elele apau i hiki mai e hana aku no ka lanakila o ka aoao Home Rula, a o ka lokahi ka mea e ko ai ia makemake. Ua olelo ae oia e hu'e ae ana oia i kekahi mau hana a Brown, ka makai nui i keia wa, a e kaua ikaika aku ana oia iaia. CAYPLESS LOIO KALANA. No ke kulana loio kalana, o Edgar Caypless wale no ka inoa i waihoia mai. Hooholoia, a ua ku mai o Cavpless e haawi i kona mahalo i ke kauia ana aku o keia hanohano maluna ona. C. W. WILLIS ANA AINA. Na Kaohi i waiho mai ka inoa o Chris Willis, a i maopopo hoi i na kanaka o Kaliko Halepiano, ka moho Ana Aina. Ninau ae kekahi mau hoa aia la oia ihea a ua ku mai o Prendergast a hoike mai ua komo powaia kona hale i keia mau po aku nei a ua noho aku oia i kauhale no ka malama ana i kana wahine. Ua lokahiia keia inoa. KALE WILIKOKI—LUNA HOOIA. Na Kaohi i waiho mai o Kale Wilikoki ka moho luna hooia, lokahiia. Ku mai o Kale Wilikoki a haawi mai i kona mahalo i ka hanohano i papahiia aku maluna ona. IAUKEA—LUNA OHI AUHAU. He elua inoa i waihoia mai no keia kulana—Jesse P. Makainai ame C. P. Iaukea. Ma ke koho balota ana a na hoa elele, ua ili aku ka hanohano maluna o laukea, he 64 balota iaia a he 27 wale no i kona hoa. Ua haawi mai oia i kekahi mau olelo mahalo ma ke olelo mai e hakaka ikaika aku ana oia i na enemi o ka lahui, ka poe e hoao nei e hoohaiki i ka mana o na kanaka, a aia ka lanakila o ka aoao kaiaiaina oiwi iloko no o ka lima'o na kanaka. "E like me ka haule ana o na pakaua o na lani i keia po, pela e haule mai ai na balota no ka pono o ko aoao Home Rula." Ma ke noi a Peresidena Kalauokalani ua hoopanee ka aha a noho hou ma ke kakahiaka Poaono. Aponoia. HALAWAI POAHA. I ka noho ana o ka aha i ka hora 10 o ke kakahiaka Poaha nei, ua noonooia na lunakiai holo laula, a eia iho na inoa i puka ma ke koho balota ana: Chas. Notley .....73 J. H. Boyd .....80 A. Fernandez .....67 @ Starr Kapu .....11 F. Harvey ..... 9 O Chas. Notley, J. H. Boyd ame A. Fernandez na mea i puka. Ma ka hora 12 o ke awakea, ua hoomaha ka aha a noho hou ma ka hora 3 o ka auwina la, a oia ka wa e hookomoia mai ai na inoa o na moho lunakiai mai na Apana 4 ame 5 mai. NO NA MAUI, NA PEHU AME KA LOLO, aohe he laau hamo e loaa aku ka laau Hamo Eha a CHAMBERLAIN. [H]e @ @ @ @ He mau tausani i hiki ke hooia mai i ka oiaio o keia mea. Ma ka hamo mua ana no e ikeia ai ka palekana. E hoao. BENSON SMITH & CO., na Agena kuai kukaa nana e kuai nei.