Ka Nupepa Kuokoa, Volume XLI, Number 36, 3 September 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

EHA                NUPEPA KUOKOA, SEPATEMABA 4, 1903.

 

KA MOOLELO KAAO O

 

LAIEIKAWAI

 

KA HIWAHIWA O PALIULI, KA WAHINE

O KA LIULA.

 

            Noho iho la lakou ma Paliuli, iloko nae o ko lakou noho ana, aole lakou i ike i ko lakou luhi ma ia noho ana; aole hoi lako'i i ike iki i ka mea nana e hana mai ka lakou ai.  Eia wale no ko lakou manawa ike i ka lakou mau mea ai, i ka manawa makaukau o lakou e paina, ia manawa e lawe mai ai na manu i na mea ai a lakou, a na na manu no e hoihoi aku i na ukana ke pau ka lakou paina ana, a no keia mea, ua lilo o Paliuli i aina aloha loa na lakou, a malaila lakou i noho ai a hiki i ka naunaele ana ia Halaaniani.

            (Maanei e waiho i ke kamailio ana no na kaikuahine o Aiwohikupua, a ma ka Mokuna XIII. o keia Moolelo e kamailio hou no Aiwohikupua no kona hoi ana i Kauai.)

 

MOKUNA XIII.

 

Kamailio ana no Aiwohikupua - Ka olelo paa a Aiwohikupua i na hoewaa - Hanaia i Ahaaina palala, he awa ka mea inu - Hai o Aiwohikupua i kana mea i hana'i no ke kii ana ia Laieikawai - Holo o Hauailiki i Hawaii - Iho o Laieikawai me na kaikamahine i Keaau - Hele o Hauailiki ma kulana heenalu i ka heenalu.

 

            Mahope iho o ko Kahalaomapuana lele ana iloko o ke kai mai luna iho o na waa, e holo ikaika loa ana na waa ia manawa; nolaila, ua hala hope loa o Kahalaomapuana.  Hoohuli hou na waa i hope e imi ia Kahalaomapuana. aole nae i loaa; nolaila, haalele loa o Aiwohikupua i kona kaikuahine opiopio, a hoi loa aku i Kauai.

            Ia Aiwohikupua i hoi ai mai Hawaii mai a hiki mawaena o Oahu nei ame Kauai, olelo aku la o Aiwohikupua i kona mau hoewaa penei:  "I ko kakou hoi ana anei a hiki i Kauai, mai olelo oukou, i Hawaii aku nei kakou i o Laieikawai la, o hilahila auanei au; no ka mea, he kanaka wau ua waia i ka oleloia; a nolaila, ke ha'i aku nei au i ka'u olelopaa ia oukou.  O ka mea nana e ha'i i keia hele ana au i ka'u olelopaa ia oukou.  O ka mea nana e ha'i i keia hele ana o kakou, a lohe wau, alaila, o kona uku ka make, ame kona ohana apau, pela no au i olelo ai i kela poe hoewaa mamua."

            Hoi aku la lakou a Kauai, I kekahi mau la, makemake iho la ke Alii, o Aiwohikupua e hana i Ahaaina palala me na'lii, ame kona mau hoa a puni o Kauai.

            A i ka makaukau ana o ka Ahaaina palala a ke Alii, kauoha ae la ke Alii i kana olelo e kii aku i na hoa-ai; ma na aliikane wale no, a hookahi wale no aliiwahine i aeia e komo i ka Ahaaina palele, oia o Kailiokalauokekoa.

            I ka la i Ahaaina ai, akoakoa mai la na hoa-ai apau loa, ua makaukau na mea ai, a o ka awa ko lakou mea inu ma ia Ahaaina ana.

            Mamua o ko lakoou paina ana, lalau like na hoa i na apuawa, a inu iho la.  Iloko o ko lakou manawa ai, aole i loaa ia lakou ka ona ana o ka awa.

            A no ka loaa ole o ka ona o ka awa, hoolale koke ae la ke Alii i kona mau mamaawa e mama hou ka awa.  A makaukau ko ke Alii makemake, lalau like ae la na hoa-ai o ke Alii, ame ke Alii pu i na apuawa, a inu ae' la.  Ma keia inu awa hope o lakou, ua loohia mai maluna o lakou ka ona awa.  Aka, hookahi mea oi aku o ka ona, o ke Alii nana ka papaaina.

            Iloko o kela manawa ona o ke Alii, alaila, ua nalo ole ka olelopaa ana i olelo ai i kona mau hoewaa ma ka moana, aole nae i loheia ma o kana poe i papa ai; aka, ma ka waha ponoi no o Aiwohikupa i loheia'i kela olelo huna a ke Alii.

            A ona iho la o Aiwohikupua, alaila, haliu pono aku la oia ma kahi a Kauakahialii e noho mai ana, olelo aku la, "E Kauakahialii e, ia oe no e kamailio ana ia makou no Lieikawai, komo koke iho la iloko o'u ka makemake no kela wahine; nolaila, moe ino ko'u mau po e ake e ike; nolaila, holo aku nei wau a hiki i Hawaii, pii aku nei maua a malamalama, puka i uku o Paliuli, i nana aku ka hana i ka hale o ke Alii, aole i kanamai, o ko'u hilahila, no ia mea, hoi mai nei.  Hoi mai nei hoi wau, a manao mai o na kaikuahine hoi ka mea e loaa'i, kii mai nei hoi wau, a manao mai o na kaikuahine hoi ka mea e loaa'i, kii mai nei, i hele aku nei ka hana me na kaikuahine a hiki i ka hale o ke Alii, kuu aku hoi i ka na kaikuahine loaa; i hana aku ka hana, i ka hoole waleia no a pau na kaikuahine eha, koe o kahi muli loa o'u, o ko'u hilahila no ia hoi mai nei, he oi no hoi kela o ka wahine kupaa nui wale, aole i ka lua."

            Iloko o kela manawa a Aiwohikupua e kamailio ana no ka paakiki o Laieikawai, ia manawa e noho ana o Hauailiki, ke keiki puukani o Mana iloko o ka Ahaaina, he keiki kaukaualii no hoi, oia ka oi o ka maikai.

            Ku ae la oia iluna, a olelo aku la ia Aiwohikupua "He hawawa aku la no kau hele ana, aole wau i manao he wahine paakiki ia, ina e ku au imua o kona mau maka, aole au e olelo aku, nana no e hele wale mai a hui maua; alaila, e ike oukou e noho aku ana maua."

            I aku la o Aiwohikupua, "E Hauailiki e, ke makemake nei au e hele oe i Hawaii, ina e lilo mai o Laieikawai, he oi oe, a na'u no e hoouna me oe i mau kanaka, a ia'u na waa, a i nele oe ma keia hele ana au, alaila, lilo kou mau aina ia'u; a ina i hoi mai oe me Laieikawai, alaila, nou ko'u mau aina."

            A pau ka Aiwohikupua ma olelo ana no keia mau mea, ia po iho kau o Hauailiki ma maluna o na waa a holo aku la; aka, ua nui no na la i hala ma ia holo ana.

            Ia holo ana, hiki aku lakou iwaho o Makahanaloa, i nana aku ka hana o lakou nei, e pio ana ke anuenue i kai o Keaau.  Olelo aku la ke Kuhina o Aiwohikupua ia Hauailiki, "E nana oe i kela anuenue e pi'o mai la i kai, o Keaau no ia; a aia ilaila o Laieikawai, ua iho ae la i ka nana heenalu."

            I mai la o Hauailiki, "Ka i no aia o Paliuli kona wahi noho mau?"

            A i kekahi la ae, ma ka auwina la, hiki aku la lakou i Keaau, ua hoi aku nae o Laieikawai me na kaikuahine o Aiwohikupua i uka o Paliuli.

            Ia Hauailiki ma i hiki aku ai, aia hoi ua nui na mea i hele mai e nana no keia keiki oi kelakela o ka maikai mamua o Kauakahialii ame Aiwohikupua, a he mea mahalo nui loa ia na na kamaaina o Keaau.

            I kekahi la ae ma ka puka ana a ka la, uhi ke awa ame ka noe ma Keaau a puni, a i ka mao ana'e aia hoi ehiku mau wahine e noho ana ma ke awapae o Keaau, a hookahi oi oia poe.  Akahi wale no a iho na kaikuahine o Aiwohikupua ma keia hele ana o Laieikawai, e like me kana olelo hoopomaikai.

            Ia Laieikawai ma e noho ana ma kela kakahiaka, ku ae la o Hauailiki a holoholo ae la imua o lakou la, e hoike ana iaia iho ma kona ano kanaka u'i, me ka manao e maliuia mai e ke Aliiwahine o Paliuli.  A heaha la o Hauailiki ia Laieikawai?  "he opala paha."

            Eha na la o Laieikawai o ka hiki ana ma Keaau, mahope iho o ko Hauailiki puka ana aku; a eha hoi la o ko Hauailiki hoike ana iaia imua o Laieikawai, a aole nae he maliu iki ia mai.

            I ka lima o ka la'o ko Laieikawai hiki ana ma Keaau, manao iho la o Hauailiki e hoike iaia iho imua o kana mea e iini nui nei no kona akamai ma ka heenalu; he oiaio, o Hanailiki no ka oi ma Kauai no ke akamai i ka heenalu a oia no ka oi iloko o kona mau la, a he keiki kaulana hoi oia ma ke akamai i ka heenalu, a kaulana no hoi no kona u'i.

            I ua la la, i ka puka ana a ka la, aia na kamaaina ma kulanalalu, na kane, ame na wahine.

            I na kamaaina e akoakoa ana ma kulana heenalu, wehe ae la o Hanailiki i kona aahu kapa, hopu iho la i kona papaheenalu (he olo,) a hele aku la a ma kahi e kupono ana ia Laieikawai ma, ku iho la oia no kekahi mau minute, ia manawa nae, komo mai la iloko o na kaikuahine o Aiwohikupua ka makemake no Hauailiki.

            I aku la o Mailehaiwale ia Laieikawai, "Ina paha aole makou i hoolaaia e ko kakou mau makua, ina ua lawe wau ia Hauailiki i kane na'u."

            I aku la o Laieikawai.  "Ua makemake no hoi waa. ina hoi aole waa i hoolaaia e ko'u kupunawahine, nolaila, he mea ole ko'u makemake."

            "O kaua pu." wahi a Mailehaiwale.

            A pau ko Hauailiki mau minute hookahakaha, lele aku la ua o Hauailiki me kona papaheenalu i ke kai, a au aku la a kulana nalu.

            Ia Hanailiki ma kulananalu, kahea mai la kekahi kaikamahine kamaaina, "Pae hoi kakou."

            "Hee aku paha." wahi a Hauailiki, no ka mea, aole ona makemake, e hee pu oia me ka lehulehu ma ka nalu hookahi, makemake no oia e hookaokoa iaia oia wale no ma ka nalu okoa, i kumu e ike mai ai o Laieikawai no kona akamai i ka heenalu, malia o makemakeia mai oia; aole ka!

            A hala aku la na kamaaina, ohu mai la he wahi nalu opuu, ia manawa ka Hauailiki hee ana i kona nalu.  Ia Hauailiki e hee la i ka nalu, uwa ka pihe a na kamaaina, ame na kaikuahine o Aiwohikupua:  Heaha la ia ia Laieikawai?

            A no ka lohe ana aku o Hauailiki i keia piha uwa, alaila manao iho ia ua huipu me Laieikawai i keia leo uwa, aole ka!  hoomau aku la oia i ka heenalu a hala elima nalu, oia mau no.  Aole nae i loaa ka heaheaia mai, nolaila, hoomaka mai la ia Hauailiki ke kaumaha, me ka hooiaio iki i kela olelo a Aiwohikupua no ka "paakiki o Laieikawaiikawai."

           

MOKUNA XIV.

 

Hoi o Laieikawai ma i Paliuli - Pii o Hauailiki ma i Paliuli - Hiki laua i o Kahalaomapuana la, a kipaku haalele loa mai ia laua nei, a hoi aku i Keaau - Loaa o Laieikawai ma ka moeuhane ia Hauailiki - Pii hou ia i Paliuli a halawai ma ka moeuhane ia Hauailiki - Pii hou ia i Paliuli a halawai me Laieikawai - Na kamailio a laua - Kipaku o Kahalaomapuana ia Hauailiki, a hoi aku la i Keaau - Haalele i Keaau, hoi loa i Kauai - Hoopau o Aiwohikupua i ka pili a laua.

 

            A ike maopopo ae la o Hauailiki, aole i komo iloko o Laieikawai ka makemake ia Hauailiki ma ia mea, hoopau ae la oia i kaheenalu ma ka papa; manao ae la oia e kaha.

            Haalele iho la oia i kona papa, a au aku la i kulanaheenalu.  Iaia e au ana, olelo ae la o Laieikawai i kona mau hoa, "E! pupule o Hauailiki."

            I aku la kona mau hoa, "Malia paha e kahanalu ana."

            Ia Hauailiki ma kulananalu, i ka nalu i ea mai ai a kakala ma kona kua, ia manawa kaha mai la oia i ka nalu.  pii ke kai me he niho puaa la ma o a ma o o kona a-i.  Ia manawa, uwa ka piha o uka, akahi no a loaa mai ia Laieikawai ka akaaka, a he mea malihini no hoi ia i kona maka ame kona mea e ae."

            A ike aku la o Hauailiki i ko Laieikawai akaaka ana iho, manao iho la oia, na komo ka makemake ia Laieikawai ma keia hana a Hauailiki, alaila, hoomau aku la oia ma ke kahanalu, a hala elima nalu, aole i loaa ka hea mai a Laieikawai iaia nei.

            Nolaila, he mea kaumaha loa ia ia Hauailiki, ka maliu ole mai o Laieikawai iaia nei, a he mea hilahila nui loa hoi nona, no ka mea, ua olelo kaena mua kela ia Aiwohikupua, e like me ka kakou ike ana ma na Mokuna mamua ae.

            A no keia mea, lana malie iho la oia ma kulananalu, iaia e lana malie ana, ua kokoke mai ko Laieikawai ma manawa hoi i Paliuli.  Ia manawa, peahi mai la o Laieikawai ia Hauailiki.

            A ike aku la o Hauailiki i ka peahi ana mai, alaila, ua hoomohalaia kona naau kanalua.  I iho la o Hauailiki oia wale no, "Aole no ka hoi oe e kala i makemake ai, houlolohi wale iho no."

            A no ka peahi a ke Aliiwahine o Paliuli, hoomoe iho la keia i ka nalu, a pae pono aku la ma kahi a Laieikawai ma e noho mai ana.  Ia manawa, haawi mai la o Laieikawai i ka lei lehua, hoolei iho la ma ka a-i o Hauailiki, e like me kana hana mau i ka poe akamai i ka heenalu.  A mahope iho oia manawa, he uhi ana na ka noe ame ka ohu, a i ka mao ana ae, aole o Laieikawai ma, aia aku la lakou i Paliuli.

            O ka iho hope ana keia a Laieikawai ma i Keaau, iloko o ko Hauailiki mau la, aia hala aku o Hauailiki ma i Kauai, alaila, hiki hou o Laieikawai i Keaau.

            Ia Laieikawai ma i hala ai i uka o Paliuli, hoi aku la o Hauailiki mai ka heenalu aku, a halawai me ke Kuhina o Aiwohikupua, o kona alakai hoi.  I aku la, "Ka i no o kahi paa ae nei a paa, he oiaio no ka ka Aiwohikupua e olelo nei.  Nolaila, ua pau ka loaa a kuu kanaka maikai, ame kuu akamai i ka heenalu, hookahi wale no mea i koe ia kaua, o ke koelewawae no i Paliuli i neia po."  A no keia olelo a Hauailiki, hooholo ae la kona hoa i ka ae.

            Ma ka auina la mahope o ka ainaawakea, pii aku la laua iuka, komo aku la iloko o na ululaau, i ka hihia paa o ka nahele.  Ia laua i pii ai, halawai mua laua me Mailehaiwale, oia ke kiai makamua o ke Aliiwahine.  Ike mai la oia ia laua nei e kokoke aku ana i o ia nei la, i mai la, "E Hauailiki, malaila olua hoi aku, aole o olua kuleana e pii mai ai ianei; no ka mea, ua hoonohoia mai wau maanei, he kiai makamua no ke Alii, a na'u no e hookuke aku i na mea apau i hiki mai maanei, me ke kuleana ole; nolaila, e hoi olua me ke kali ole."

            I aku la o Hauailiki; "E ae mai oe ia maua, e pii aku e ike i ka hale o ke Alii."

            I mai la o Mailehaiwale, "Aole wau e ae aku i ko olua manao; no ka mea, o ko'u kuleana no ia i hoonohoia ai ma keia wahi, e kipaku aku i ka poe hele mai iuka nei e like me olua."

            Aka, no ka oi aku o ko laua nei koi ana me ka olelo ikaika imua oia la, nolaila, ua ae aku la keia.

            Ia Hauailiki ma i hala aku ai mahope iho o ko Mailehaiwale hookuu ana aku ia laua, halawai koke aku la laua me Mailekaluhea, ka lua o ko ke Aliiwahine kiai.

            I mai la o Mailekaluhea, "E! e hoi olua ano, aole he pono no olua e pii mai ianei, pehea la i aeia mai ai e hookuu mai ia olua?"

            I aku la laua, "I hele mai nei maua e ike i ke Aliiwahine."

            "Aole olua e pono pela."  wahi a Mailekaluhea "no ka mea, ua hoonohoia mai makou he mau kiai e kipaku aku i na mea apau i hele mai i keia wahi, nolaila, e hoi olua."

            Aka, ma kela olelo a Mailekaluhea, ua oi aku ka maalea o ka laua nei olelo malimali imua oia la, nolaila, ua hookuuia'ku laua.

            (Aole i pau.)

 

HE MOOLELO WALOHIA

- NO NA -

ONAMILIONA

 

I LAWE A HUNA MALU IA MA KA AINA MEHAMEHA.

 

MOKUNA XXI.

 

KE KUKULUIA ANA O KA IUPITA LELE.

 

            Ua hoomau aku la o Vincent ame Morton i ka pahu ana i ka lana, a aole i loihi ka laua hoe ana, ua ike aku la lakou i kekahi wahi waapa uuku e kau ana ma kula a ma ka nana aku, he wahi waapa hou loa kela.  E waiho koke ana he mau hoe he eha ka nui, a ma ka lakou nana iho, me he mea la aohe i hoohanaia keia wahi waapa.

            Ua nui kupono kela wahi waapa e hiki ai ia eha kanaka ke holo i ka manawa malie o ke kai, a na kupono hoi no ka hoohanaia maluna o ke kai o ke kaikuono.  Ua hoomaka iho la lakou e nana ina e loaa iho ana ka inoa o ka mea nana i hana, eia nae, aohe i loaa he wahi ma-ka e hoike mai ana i ka lakou mea i ake nui ai.

            Maluna pono iho o ka puu pohaku e waiho ana he mau pahu o na ano like ole, a o ka nahu hae a lakou i ike ai, ua kakooia ia me kekahi pohaku nui.  Malalo iho o ka hae, e kau ana he pepa manoanoa a ma ke kua, ua kakauia keia mau huaolelo:

            Maluna o ka Mano, Mei 18.

            Ia Mesars. Palmer J. Morton, Andrew Carmody, John M. Rockwell, Simon Pence, R. J. Kent, Hiram Haven, Sidane Hamona, ame L. Sylvester Vincent, na malihini o Mokupuni Hesetoria, me na hoomaikai o

                        WALTER B. HESEKA.

            I ko lakou helu pono ana iho i ka nui o na pahu, ua loaa iho la he 15 ka nui, a he elua o keia mau pahu he oi aku o ke kaumaha mamua o kekahi mau pahu e ae.  Ua hoolana aku la lakou i kahi waapa uuku a hookau aku la i na ukana i hiki i ka waana ke lawe.  O ka hananui iho o ka ukana ua hookauia iho la maluna o ka lana laau.

            No ka maloo o ke kai i keia manawa, ua hoi aku la o Haven ame Morton ma kula a hiki i ka hale.  Na Sidane i hoe ka waana a na Vincent hoi i pahu ka lana laau.  No ka pa maikai mai o ka makani, ua holopono keia mau hana a aole i iluliu iho mahope ua pili aku la laua ma kahi a ka Iupita Aele e ku ana.

            I ka ike ana mai o na hoa anau i keia mau mea, ua akoakoa mai Li lakou a hoomaka koke ae la e wehe i keia mau nahu no ka nana ana i na mea oloko.  I ka hemo ana o ka paho mua. ua loaa iho la he maa i'o pipi i hoomoeia i ka hau, a o ka lua o ka pahu, ua loaa iho la he mau i'o pipi i hoomoeia i ka hau, a o ka lua o ka pahu, ua loaa iho la he mau i'o mea, ua lawe koke ia aku la no kahi hoahu mea ai.  He maikai ke kulana e na i'o holoholona a ua hiki hoi ke malamala no na la he loihi.

            "He makemake loa ko'u e ai hou i ka pipi maikai," wahi a Kent i kamailio ae ai me ka hamale ou ana iho i ke poo o ka pahu hope loa a lakou.  I ka naha ana ae ua ike iho la oia ua piha i na nupepa ame na buke no ko lakou heluhelu ana.  I kona imi nono ana iho, ua loaa iho la na buke i palia ma ka mahina o Mei a malalo loa, ua loaa iho la na nupepa hou loa.  I ka ike ana mai o ka poe e noho ana ua holo awiwi mai la lakou e hao i ua mau nupepa nei.

            Ma keia puulu nupepa, ua loaa iho la na nupepa o Nu Ioka mai ka la 8 mai o Mei a hiki i ka la 12, a o na pepa ua paku'lia mai na pepa o ke kulanakauhale o Piladelefla mai ka la a lakou i haalele aku ai a hiki i kekahi o na la i hala koke iho mamua.

            "E na keonimana." wahi a Rockwell i kamailio ae ai mahope o ko lakou heluhelu ana no kekahi mau minute loihi." ua loihi iho nei ka kakou heluhelu ana a aohe i loaa iki kekahi mau mea e hoike, ana ua loaa ia kekahi o ko kakou mau ohana i ka ma i a make hoi a loaa paha i kekahi ulia kukonukonu.  He mea pono a hoopanee ke kakou hoomau i ka heluhelu ana a pau mua ka kakou hana o kela kakahiaka.  E hoomaka kakou me ka kakou apana hana a i ka pauoana oia ko kakou wa e hoomaka hou ai e heluhelu."

            Ua hooholo like iho la lakou i keia noonoo, a kauohaia aku ia o Vincent e hoihoi i ua pahu pepa nei i ka halel.  No ka loaa ana mai o keia mau mea e hoike mai ana i na meahou o kahi a lakou i haalele aku ai, na la mea i 'hoolama ae i ko lakou manao a ua ikaika ka lakou hana ana.  I ke kokoke ana e kani ka hora 11, akahi no o Carmody a haawi ae i ke kauoha no ka hoopau ana o ka lakou hana, ua hoi koke aku la lakou no ka lumi aina, a hoomaka iho la lakou e ai i na mea ai i hoomakaukaula.

            Ma ia auwina la, ua hoomaha lakou mai ka hana ana a oia ko lakou wa i hoopapau iho ai i ka heluhelu ana i na nupepa.  No elua hora aohe he huaolelo i hoopukaia.  Ua heluhelu kela ame kela kanaka pakahi i na mea e pili ana iaia iho, a na keia mau mea i hoihoi hou aku i ko lakou mau noonoo ana i na la i hala ae ma Nu Ioka a na keia mea hoopoina ae i ko lakou noonoo ae i ko lakou lawe malu ia ana maluna o ka moku ame ka hoonohoia ana maluna o ka mokupuni a lakou e noho nei.

            O Vincent, ua hoomaka iho la ola e huli ma na pepa apau no na mea e pili ana iaia iho, a o ka hope loa ua loaa iho la he wahi itamu uuku e kamailio ana i kona nalowale ano e ana, a ma ka Nu Ioka Record i loaa iho ai keia meahou iaia.

            "Ma keia hana, aohe i puka iki ko'u wahi inoa me ko oukou," wahi a Vincent i kamailio ae ai me ka leo ano kaumaha o ka manao.

            Ua akaaka ae ia kona mau hoa a ua hui pu aku la o Vincent me lakou INSERT CUT 21.

            "Mai noonoo nui oe no keia mau mea, e Vincent," wahi a Kent.  "o oe wale no ka mea i komo ole iloko o keia hana o ka lawe malu ia ana, a ina no nae e malama pono oe i ko mau akua kii gula, e lilo no oe i kanaka waiwai a e komo no kou kii ma na nupepa apau o ka aina.  Mahope no oe liio i kanaka kaulana.  Ua ike no oe i keia e Mr. Rockwell?"

            Ua hoomaka mai la o Kent e heluhelu i kekahi mea i pa'lia ma ka Record o ka la 14:

            "He mea i minamina nui ia ua kaawale aku o Mr. Walter B. Heseka.  ka mea kakau nupepa kuikawa kaulana o ka Nu Ioka Record, no ke kai Meditareniana i ka manawa i puka ae ai keia hana huna malu.  Ua kauohala aku nei na mokuahi apau e holo ana no ka hema e haawe aku i kela meahou la Heseka i mea e hiki ai e laa kekahi kokua ana mai iaia mai maluna o keia hihia kupaianaha.  Aohe he kanaka kakau nupepa e ola nei-e loaa aku o Heseka ma ka hanu ana mahope o ka meahou o na hana kolohe o kela ana a ke manao hei ka Record e ha'i aku i ka hana a Heseka maluna o keia hihia i keia mau la iho."

            "Ma ko'u noonoo ua kupono io no oia ma keia hana."  wahi a Kent i pane ae ai.  "Ke haawi aku nei wau i ko'u mahalo ia Heseka i ka maikai o kana hana ana i na ano o kana mau mea ai i hoouna mai nei la kakou.  Ma kona ano o kana mau mea ai i hoouna mai nei la kakou.  Ma kona ano maoli ua pupule ole e e like me kekahi uku e kolo hele ana ma na mea e ae a pau, eia nae, ma ke koho ana i na mea inu ame ke ano o ke kika maikai, ua maikai kona noonoo.  E Penee, ua heluhelu iho nei oe i na mea e pili ana i ko palapala hooilina?  Ua hoike ae nei kekahi o na pepa ua hooili aku nei oe i ka huina o $25,000,000 no ke kukulu ana i home no na luahina, a ma kekahi hoi, e pau loa ana kou waiwai no kekahi kula nui no ke a'o ana i ke ano o ka noho hoalauna ana.  Ma na nupepa hoi o Piladelefia, ua oleloia ua hooili aku nei ka oe i kou waiwai holookoa maluna o ka poe bane keaka dala ole ame ka poe heihei lio.  He plolei anei keia mau mea?"

            Ua nana mai la o Penee me ka nanaina minoaka a olelo mai la:

            "Ua nui kou mau makahiki o keia ola ana, a ua maopopo hoi ia oe mai puni wale i na mea i pa'lia ma na nupepa."

            "He wahi manao ko'u," wahi a Sidane Hamona i kamailio ae ai ma na hora hope o ka auwina la i kamailioia ae nei.  "Ina e mau ana ko Heaeka polaekaa mau ana ma kela wahi, a ma ko'u manao hoi e hana mau aka ana oia i keia mae aohe he hiki ia kakou ke olelo ae o ka wa hea la oia e hiki mai ai.  He mea maopoppo, ua manao oia e noho kakou maanei no kekahi nianawa a aohe hoi i maopopo ia kakou heaha ana la kana hana paluna o kakou ma kela hope aku Malia paha ua hele kokoke mau ea ma i ka hale nei i ka po nei.  Eia ia iaho o kona mano e hoolako mau mai no la kakou me na mea apau, a malia paha e ku=e mai ana oia i keia hana kapili moku a kakou.  Me ka ike eleia aku, koloia aku ana ka Iupita Lele iwaho o ka moana i kekahi po a hookuuia aku.  He hana keia e hookomo aku ana ia kakou iloko o kekahi pilikia nui, a aohe kakou e haawi mai nei, aohe i kupono no ekolu kanaka i ke kau ana a holo ma ka moana ale nunui.  Eia nae, ua makaukau au i na manawa apau no ke kau ana aku maluna o keia wahi waapa a hole aku no ka aina nui no ke kii ana aku i kokua no kakou.  O ka mea oi aku no nae o ka maikai, e noho no kakou a e hana i ka moku o kakou a hiki i ka paa ana.  E ku kiai no nae kakou i ka po.  He mea maikai e hoonohoia i elua kanaka i keia ame keia po.  Ua hiki ia laua ke hana a makaala i na mea apau i ka wa hookahi."

            "E hana kakou e like me la," wahi a Mr. Morton.  "Owau kekahi mea i makemake e lilo i mea kiai no ka pono kekahi manawa.  Owai ka mea e hui pu mai ana me a'u?"

            Ua ae like mai la na mea apau e hui pu me ia, a ua koho aku ia o Haven kona hoa kiai.

 

MOKUNA XXII.

 

KA PUKA ANA MAI KA MOKUPUNI AKU.

 

            Ua mau iho la ko lakou haawi ana i manawa e hana ai i ka moku i hoolalala ai e lakou no ko lakou hookauwale ana aku mai keia mokupuni aku.  Ua hoopiha iho la lakou i ua moku nei me ka pohaku i mea e maopopo ai ina ua paa ono ka moku a komo ole hoi ka wai.  a ma ia hana ana aole i loaa kekahi ilu.  I'a ikela iho la he paa pono na wahi apau, aka, ua hoomakaukau no nae lakou i mau mea e paleia aku ai na pilikia ina e hiki io mai ana.

            Ua manao lakou e paa na mea apau oka Iuplia Lele i ka hanala ma ka Poaono, eia nae, aole i ko la manao ana.  Ua haule ikaika iho la ka ua ma ka auwina ia Poaono a hiki i ka Lapule ae a po wale no.  No k a hiki ole ia lakou e lawelawe i na hana owaho, ua iawe iho la lakou i keia la i la heluhelu no lakou.  I ka Poakahi ae, ua pii maikai mai ko lakou mau ikaika maikai a makaukau no ko lakou hookaawale mai keia mokupuni o lakou i hoopaahaola ai.  Ua haule mai no ka ua liilii ma kela la, a he ano puanuanu maikai hoi, a no la kumu, ua mau no ko lakou haha ana i kela auwina la.  I ke kani ana o ka hora eono o ua ahiahi nei, ua kukala ne la o Carmody ua paa ka moku, a ua makaukau hoi no ka hoohana ana aku.

            He mea hiki ole hoi ke hunahunaia iho o ka Iupita Lele kekahi o na moku kii pupuka loa i holo maluna o ka ilikai.  O ka pena wale no i hapalala iho maluna o ka moku holookoa, ola na mea i kakauia ai ka inoa o ka moku ma na aoao a i elua o ka hale o luna loa.

            O ka Iupita Lele, ua like kona leli me kekahi kao, he kanaha kapuai ka loa me kekahi hale o iwakalua kapuai ka loihi i kukuluia iho maluna a maluna iho o keia ua kukulula he elua mau kia pokole no ka paa ana i kekahi mau pe'a i hanaia mai na pale pukaaniani mai, a ma ka hana ana a keia poe, aohe lakou i nana pono i ka pololei o ke oki ana.  Ma ka Kent hoakaka e pili ana i kela mau mea, ua like ka me kekahi mau kanaka paahao e hakoko ana maloko o kekahi paani popo peku wawae.

            Ma na aoao o ka moku, ua hanaia he ekolu mau puka hoe ma ka aoao hookahi, ua hookomoia he hoe waapa ma ka puka o ka hoeuli, a ma ka mea huki heleuma, ua hoopaaia kekahi pohaku nona ke kaumaha o 500 paona no ka hoohanaia ana ma ke ano he heleuma.  Eia nae, ma ka nana aku he pupuka maoli no ka Iupita Lele, aka. ua hanaia ia me ka paa e hiki ole ni i na ale ke wawahi.  Ma ka keia poe noonoo iho, aohe e hiki i keia moku ke huli a pilikia paha i ka wa e piha mai ai i ke kai.

            "Ua maikai no hoi ka moku a kakou i hana iho nei." wahi a Kent i kamailio ae ai me ka nana ana aku i ka moku ma na wahi apau.  "malia paha e holo aku ana ola malalo o ke kai me he ia e luu ana."

            "Pela kona ano i ka hoolanaia ana." wahi a Vincent me ka akaaka ana ae, "ela nae, aohe o'u makemake e hana hou oia i kela hana olai kakou maluna ona."

 

Ina He Makemake

 

- KOU I KA -

 

Lauoho Maikai

 

E HELUHELU I KEIA.

 

Malia paha ke pau nei kou lauoho i ka helelei, a koe kakaikahi.  E kau i ka laau mamua o ka pau loa ana i ka helelei, e hana i laau e ulu hou ai.  O ka laau

"Laau Hooulu Lauoho a Ayers"

ka mea e manoanoa ai ka ulu ana, a ke loaa i keia laau pau loa ka helelei ana.

 I na he piha kou poe ke Kepia, o ka

"Laau Hooulu Lauoho a Ayers"

ka laau e pau ai a maemae kou poe, Ke Loaa i keia laau e hoi hou ana ka ulu ana o kou lauoho a like me ko kou wa bebe.

Hoomekaukau la e Kauka J. C. Ayer & Company, Lowell, Mass., U.S. A.

E loaa no keia mau Huaale ma ka Kale Kuai Laau o Hollister, alanui Papa.

 

            Ua lawela ke ola o 80 poe kipi i paa aku ma ka lima o na koa Tureke.

            Ua panai aku na Macedonia i keia hana ma o ka luku ana i kekahi mau pualikoa Tureke.