Ka Nupepa Kuokoa, Volume XLI, Number 34, 21 ʻAukake 1903 — Page 3

This text was transcribed by:	Debbie Tom
This work is dedicated to:	Jerrilyn Greenan

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, AUGATE 21, 1903

HOOLAHA KUMAU

LEWERS & COOKE

LUI A ME KUKE, Kaupalenaia

Na Mea Hookomo mai a Kuai aku i na

LAKO HANA HALE

O Kela ame Kena Ano

Malaila e loaa ai na mea malalo iho

NA PAPA N. W., NA PAPA HOLE PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI MOENA, ETC.

O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.

LEWERS & COOKE

Kekela me Kuke

[KAUPALENAIA]

Poe Kalepa ma ke Komisina

::A HE::

POE LAWELAWE KOPAA

Poe Agena no na Mahiko Lehulehu

KAUKA T. MITAMURA

Alanui Kukui Ololi Helu 68, Honolulu Na Hora Hana:

Hora 8 a 10 kakahiaka; hora 1 a 3 ame hora 6 a 7:30 p. m. Sabati: Hora 6 a 8 p. m.

Telepone White 152. P. O. Box 842

KAUKA GEO. J. AUGUR

Kauka Kuluwai Liilii

LAAU MOMONA AOLE MULEA

Keena Hana 431 Alanui Beritania Telepona Helu 1851. Hora Hana 10-12 a. m., 3-4 ame 7-8 p. m.

Sabati 9:30-10:30 a. m.

JOHN M KEA.

He Notari no ka Lehulehu; he mea hana i na Palapala Kanawai, a he mea huli i na kuleana aiao. O na kauoha mai na mokupuni mai e hookoia no me ka pololei.

Keena Hana: Ma ka Loio Kuhina, Hale Mana Hooko.

Honolulu, Mei 22, M. H. 1903.

He Huaale Maikai

Aole he like o na

"Huaale a Ayers"

me na huaale e ae no ka mea he mau huaale kokua keia i ka hana a na naau, a he laau hoomaha maikai loa hoi. Ina he paa kou hanalepo o na "HUAALE a AYERS" ka laau e hemo maikai ai, a e hemo maikai mau ana hoi mahope aku oia manawa.

Aole loa he hiki i kekahi kanaka ke Olelo ae he maikai kona ola kino ina aole he hemo o kona hanalepo he hookahi manawa o ka la, a oi aku paha. Ina i maopopo keia kanawai o ke ola i na kanaka apau, aole loa e like ka nui o ka poe ma'i me ka mea e ike ia nei i keia mau la.

Ua hana ia owaho me ke kopaa he maikai loa ka lawe ana.

Aole mau Huaale i oi ae ka maikai manua o na "Huaale a Ayers"

Hoomakaukau ia e Kauka J. C. Ayer & Company, Lowell , Mass. U. S. A. E loaa no keia mau Huaale ma ka Hale Kuai Laau o Hollister, alanui Papu.

O NA WAHI LIKE OLE APAU. ua hoopomaikaiia ma o ka haawila ana mai o ka Laau Nahu o ka Opu, Kolera ame He a Chamberlain iloko o keia aina. He kakaikahi loa na wahi e loaa ole ana he mea i hoopakeloia ke oia ma o ka lawe ana i keia laau. O ka laau helu ekahi keia no na ano ma'i apau o ka opu ame ka naau. Aole e ulolohi ka haawi ana i ka maha a hiki ke hilimai piha ia. No ke kuai ana ma na halekuai laau lapaau apau, Benson, Smith & Co., na Agena no Hawaii.

CRACOW, Rusia. Aug. 11.-Ua. hookaanaele ka poe hooki hana maanei i nei inei a ua ki pu mai na koa maluna o lakou a ua make he 60 o ua poe nei.

KA MOOLELO KAAO O

LAIEIKAWAI

KA HIWAHIWA O PALIULI, KA WAHINE

O KA LIULA.

MOKUNA IX.

Kukuluia o Mailekaluhea ma ka puka o ka Halealii a kuu aku oia i kona aia-Na kamailio a Laieikawai me Waka -Kukuluia o Mailelaulii ma ka puka o ka Halealii a kuu aku no hoi oia i kona ala-Na kamailio a Laieikawai me Waka-Kukuluia o Mailepakaha ma ka puka o ka Halealii a kuu aku i kona ala-Na kamilio a Laieikawai me Waka-Haalele o Aiwohikupua i na kaikuahine ona ilaila-Kahea mai na kaikuahine o Aiwo hikupua iaia.

"Oleloia ana," wahi a Aiwohikupua, "a ike aku au he kupuno i ka ae, alaila ae aku, ina he kupono ole, aole no au e ae aku."

"E kii kaua ma o ke kupunawahine la," wahi a ua Kuhina nei, "e noi aku iaia, malia o ae mai kela."

Olelo aku o Aiwohikupua, "Aole a kakou hana i koe, ua pau, eia wale no ka olelo i koe, o na kaikuahine o kaua, e noho lakou i ka nahelehele nei, no ka mea, aohe a lakou waiwai."

Alaila, huli aku la o Aiwohikupua a olelo aku la i na kaikuahine, "E noho oukou, ua nele ae la no ka'u mea i makemake ai e lawe mai ia oukou, o ka nahele no nei noho iho." Ke hele aku nei e maamaama.

A pau ka Aiowohikupua olelo ana i na kaikuahine; kulou like iho la ke poo o na kaikuahine i kahi hookahi, e uwe ana.

Kaha aku la o Aiwohikupua ma iho, kahea aku la o Kahalaomapuana, ke kaikuahine muli loa, i aku la. "E laua la! ku iho, e lohe mua makou i Kauai. e lawe ana oe a haalele ia makou i keia wahi, ina aole makou e hiki mai. Pono no la hoi ia,ina owau kekahi i kii aku nei ia Laieikawai, a nele ana la hoi, alaila, pono kau haalele ana ia'u, pau pu no o ka mea i hewa, ame ka mea hewa ole. Aole oe he malihini ia'u. ia'u wale no e ko ai kau mau mea apau."

A lohe o Aiwohikupua i keia olelo a kona kaikuahine opio, hoahewa iho la oia iaia iho.

Kahea mai la o Aiwohikupua i ke kaikuahine opiopio, "Iho mai kaua, ou mau kaikuaana ke noho aku."

"Aole wau e hiki aku," wahi a kona kaikuahine opiopio, "aia a pau loa makou i ka hoi pu me oe, alaila, hoi aku au."

MOKUNA X.

Kau mai o Mailehaiwale he mele-Kuka na kaikuahine i ko lakou manao o hooholo iho la-Hoomakaukau ke kaikuahine o lakou e holo, kani ana ke oli a Mailekaluhea-Haalele ia Keaau, hiki ma Punahoa, mahope aku ke kaikunane-Haaelele o Aiwohikupua ma ia wahi, hea aku ana o Mailelaulii ma ke mele-Haalele ia Punahoa, hiki lakou ma Honolii-Moe lakou ia po, ku wati kekahi-Hoomakaukau o Aiwohikupua ma e holo, ku ana o Kahalaomapuana mahope o ka waa, me ke kahea aku ma ke mele-Kau o Kahalaomapuana iluna o ka waa, a lele iho la iloko o ke kai, a kau aku la i ke mele.

A no keia olelo a kona kaikuahine opiopio, alaila i aku o Aiwohikupua. "O noho mamuli ou mau kaikuaana, a nau no e huli ae me ko mau kaikuaana i ka oukou wahi e hele ai, eia wau ke hoi nei."

Huli aku la o Aiwohikupua ma e hoi. ia laua e hele ana ma ke ala, kani aku la ke oli a Mailehaiwale, penei:

"Kuu kaikunane kapu,

Laniihikapu o ka manawa-e, hoi-e;

E hoi oe a ike aku

I ka maka o na makua, hai aku,

Eia makou ianei,

E malu ana i ka hala nui,

He hoomau hala paha?"

Huli mai la o Aiwohikupua nana hope aku la i na kaikuahine, me ka i aku, "Aole he hala hoomau, ka i no ua hai mua iho nei no wau ia oukou, no ka oukou waiwai ole, oia kuu mea i haalele ai ia oukou ina e loaa iho nei kuu makemake ia oukou, alaila, aole oukou e noho, oia iho la no ko oukou mea i laweia mai ai." Huli aku la no laua hoi, pau ka ike ana i na kaikuahine.

A hala aku la o Aiwohikupua ma, kuka iho la na kaikuahine i ko lakou manao, a hooholo iho la lakou, e ukali mahope o ke kaikunane, me ka manao e maliu mai.

Iho aku la lakou a hiki i kai o Keaau, e hoomakaukau ana na waa; noho iho la na kaikuahine ma ke awa, e kali ana no ke kaheaia mai, a pau lakou i ke kau maluna o na waa, aole nae kaheaia mai, ia lakou i hoomaka ai e holo, kani aku la ke oli a Mailekaluhea, penei:

"Kuu kaikunane kapu,

Laniihikapu o ka manawa, e huli mai,

E nana mai i ou mau pokii

I na hoa ukali o ke ala,

O ke ala nui. ala iki,

O ka ua haawe kua,

Me he keiki la;

O ka ua hookamumu hala,

Hookamumu hala o Hanalei-e.

Pehea makou-e,

I hea no la hoi kau haalele,

Haalele oe i ka hale,

Hele oe i kau huakai.

Ike aku-e.

Ike aku i ka maka,

I ka maka o na makua

Aloha wale-e."

Iloko o keia oli ana a Mailekaluhea. aole nae i maliu iki mai ko lakou kaikunane, a hala aku la lakou la ma na waa. noho iho la na kaikuahine. kuku iho la i manao no lakou. hookahi mea nana i hoopuka ka lakou olelo, o Kahalaomapuana, ko lakou muli loa.

Eia kana olelo, "He nani ia ua maliu ole mai la ko kakou kaikunane alii, i ka Mailehaiwale ame Mailekalehua. i ka laua uwalo aku, e aho e hele no kakou mauka a kahi e pae ae ai lakou, alaila, na Mailelaulii e kaukau aku i ko kakou kaikunane. malia o aloha mai ia kakou." A ua holo like ae la ia manao ia lakou.

A haalele lakou ia Keaau. hiki mua na kaikuahine i Punahoa, ma kahi i kapaia o Kanoakapa. noho iho la lakou malaila, hiki hope o Aiwohikupua ma.

Ia Aiwohikupua ma i aneane ai e pae mai ma kahi a na kaikuahine e noho aku ana. ike mai la o Aiwohikupua e noho aku ana kona mau kaikuahine. kahea koke ae la o Aiwohikupua i na hoewaa ame na hookele. "E haalele kakou i keia awa; no ka mea, eia no ua poe uhai loloa nei, e pono kakou ke imi aku i awa e ae e pae aku ai"

Ia lakou i haalele ai i kahi-a na kaikuahine e noho ana, hea aku la o Mailelaulii mahope, ma ke mele, penei:

"Kuu kaikunane kapu,

Laniihikapu o kuu manawa-e!

Heaha ka hala nui?

I paweo ai na maka o kuu haku,

I kapu ai ka leo i ka uwalo.

Ka uwalo hoi a kou mau pokii,

Kea mau pokii kaikuahine hoi,

E maliu mai.

E maliu mai i na hoa ukali,

Na hoa pii pali o Haena

Kokolo pali o ke alahaka,

Alahaka uliuli o Nualolo,

Palikui-e! kui o Makana.

E ia la-e. hoi mai-e.

Homai ka ihu i ou pokii.

A hele aku i kau huakai.

I ka huakai hoi a ke aloha ole-e.

Aloha oe, ike aku,

Ike aku i ka aina.

I ka maka o na makua-e."

A lohe o Aiwohikupua ma i ka leo o keia kaikuahine, lana malie iho la na waa, alaila, i aku la o Kahalaomapuana, "Pono io kakou, akahi no hea ana i lana malie ai na waa, hoolohe aku kakou o ka leo o ke kahea mai, a kau kakou maluna o na waa, alaila, palekana."

A liuliu ka lakou la hoolana ana i na waa, o'ka huli aku la no ia o Aiwohikupua ma e holo, aole wahi mea a maliu iki mai.

A hala aku la lakou. kuka hou iho la na kaikuahine i olelo hou na lakou. O Kahalaomapuana no ko lakou mea manao.

I mai la oia i kona mau kaikuaana, "Elua maua i koe, owau ame Mailepakaha."

Olelo mai hoi o Maile pakaha, "Aole no e maliu mai ia'u, no mea ke maliu ole ae la hoi i ko kaua mau kaikuaana, oki loa aku paha wau. i ko'u manao, e aho nau e hoalohaloha "ku na kahi mea uuku o lakou, malia o maliu mai ia oe."

Aole nae he ae o kahi muli loa. alaila, hoailona iho la lakou, ma ka huhuki ana i na pua mauu. o ka mea loihi o ka mauu. oia ka mea nana e hoalohaloha ko lakou kaikunane; aka, i ka hoailona ana, ku ia Kahalaomapuana ka hoailona.

A pau ka lakou hana ana no keia mau mea, haalele lakou ia Punahoa, hele ukali hou mai la lakou ma kahi e loaa ai ko lakou kaikunane, ia hele ana, hiki lakou i Honolii, ua hiki mua o Aiwohikupua ma i Honolii, noho mai la lakou nei ma kahi kaawale, a pela no hoi o Aiwohikupua ma ma kahi kaawale.

Ia lakou ma Honolii ia po, kuka iho la lakou e moe kekhai poe. a e ala hookahi, a holo ia mea ia lakou. Hoomaka ko lakou wati e like me ko lakou hanau ana. a i ko lakou kaikaina ka wati wanaao o ke ku ana. O ke kumu o ia hana ana a lakou pela, i ikeia ka manawa holo o Aiwohikupua ma: no ka mea, ua maa kona mau kaikuahine i ka holo ana mai, mai Kauai mai ma ka wanaao e holo ai.

Ku aku la na kaikuahine i ka po, a hiki i ko Mailepakaha wati e ku ana, hoomakaukau o Aiwohikupua ma i na waa no ka holo ana, hoala aku la ia i kekahi poe o lakou. a ala like mai lakou apau.

Ia lakou e okuu nui ana. o ka Kahalaomapuana wati ia. a kau lakou ma na waa. hookokoke aku la kona mau kaikuahine ma ke awa, a o Kahalaomapuana kea mea i hele loa aku a paa mahope o na waa, a kahea aku ma ke mele penei:

"Ko makou kaikunane haku,

Kaikunane kapu.

Laniihikapu o kuu piko-e!

Auhea oe, o o -e.

O oe. o makou. i o ianei hoi,

Nau ka huakai;

Ukali aku makou,

I na pali i ka hulaana kakou,

Au aku o ka Waihalua,

Waihalau i Wailua-e;

He aloha ole-e,

He aloha ole paha kou ia makou,

Na hoa ukali o ka moana,

O ka ale nui, ale iki,

O ka ale loa, ale poko,

O ka ale kua loloa o ka moana,

Hoa ukali o kela uka,

O kela nahele liuliu,

O ka po iu anoano,

E huli mai.

E huli mai, a e maliu mai,

E hoolono mai i ka uwalo a'u,

A'u hoi a kou pokii muli loa.

I hea la hoi kau haalele

Haalele iho ia makou

I kahi haiki,

Nau i waele ke alanui mamua,

Mahope aku makou ou,

I ikea ia he man pokii,

Ilaila la haalele aku ka huhu,

Ka inaina, ka opu aloha ole,

Homai ka ihu i ou mau pokii,

Aloha wale-e."

Ia manawa a kona kaikuahine muli loa e hapai ana i keia leo kaukau imua o Aiwohikupua. alaila, ua hoomaeeleia ka naau o ko lakou kaikuahine i ke aloha kaumaha, no kona kaikuahine.

A no ka nui loa o ke aloha o Aiwohikupua i ko lakou pokii, lalau mai la a hoonoho iho la iluna o kona uha, a uwe iho la.

Ia Kahalaomapuana e kau ana i ka uha o kona kaikunane, kena ae la o Aiwohikupua i na hoewaa, e hoe ikaika ; ia manawa, ua hala hope loa kekahi mau kaikuahine, a hala mua lakou la.

Ia lakou e holo ana. alaila, ua pono ole ka manao o Kahalaomapuana i kona mau kaikuaana.

Ia Kahalaomapuana e uwe ana no kona mau kaikuaana. Ia manawa kona noi ana'ku ia Aiwohikupua, e hoihoi iaia me kona mau kaikuaana; aka, aole no he maliu mai o Aiwohikupua.

"E Aiwohikupua." wahi a kona kaikuahine, "aole wau e ae e lawe oe ia'u owau wale, ke ole oe e lawe pu me ko'u mau kaikuaana; no ka mea, ua kahea mua ae no oe ia'u i ko kakou wa i Paliuli; aka, aole wau i ae mai, no kou lawe ia'u owau wale."

A no ka paakiki loa o Aiwohikupua. aole e hookuu i kona kaikuahine. Ia manawa, lele aku la o Kahalaomapuana mai luna aku o ka waa a haule iloko o ke kai. Ia manawa, hoopuka aku ia kona kaikuahine i olelo hope, ma ke mele penei:

"Ke hoi la oe a ike aku,

Ike aku i ka maka,

I ka maka o na makua,

Aloha aku i ka aina,

I ka nui ame na makamaka,

Ke hoi nei wau me o'u pokii,

Me o'u kaikuaana hoi-e."

MOKUNA XI.

Kauoha o Aiwohikupua e hoemi hope ka waa -(Waiho ke kamailio ana no Aiwohikupua)- Uwe na kaikuaana o Kahalaomapuana no kona hoi ana me ko lakou kaikunane, ia lakou e uwe ana. hoea mai ana o Kahalaomapuana ma ka pali mai-Kuka like lakou no ka hoi hou ana i Paliuli-Hiki lakou ma Paliuli, ma na puhalaau lakou kahi i noho ai - Kuka hou lakou i mea e ike ai ia Laieikawai, a hooholo iho la-Ho-a lakou i ke ahi, a i ka lima o ka po. hana o Kahalaomapuana i ka pu la i-Kena o Laieikawai i kona wahi kahu e nana i kahi i kani ai o ka mea kani. hoi aku kahi kahu a hai aku i kana mea i ike ai-Kena hou o Laieikawai e kiiia kahi mea uuku loa o lakou, a hele aku la o Kahalaomapuana a ka Halealii-Ninau mai la ke Alii i kana mea kani, a hookani iho ia o Kahalaomapuana.

Iloko o keia kaukau hope loa a Kahalaomapuana, ua hoopihaia ko Aiwohikupua naau i ke aloha nui; a kahea ae ia oia e hoemi hope na waa, aka, ua hala hope loa o Kahalaomapuana i hope, no ka ikaika loa o ka holo o na waa; a i ka wa i huli hope ai na waa e kiihou i kona kaikuahine, aole nae i loaa.

(Maanei e waiho iki i ke kamailio ana no Aiwohikupua, e pono ke kamailio hou no kona mau kaikuahine; alaila, e kamailio hou no Aiwohikupua.)

(Aole i pau.)

HOOLAHA KUMAU

Hui Alahao ame Ainao Oahu

MANAWA HOLO

Mei 1, 1903

MAI HONOLULU AKU

No Waianae. Waialua. Kahuku ame na wahi hoolulu ma ke alahao- *9:15 am, *3:30 p.m.,

No Pearl City, Ewa Mill, ame na wahi hoolulu ma ke alahao-t7:30 a.m., *9:15 a. m., *11:05 a. m., *3:15 p. m., *3:20 p. m., t4:15 p. m., *5:15 p. m., t9:30 p. m., t11:15 p.m.

MAI WAHO MAI

Ku i Honolulu mai Kahuku. Waialua, ame Waianae mai *8:36 a. m., *5:31 p. m.

Ku i Honolulu mai Ewa Mill ame Pearly City mai - t6:50 a. m., t7:46 a. m., *8:36 a. m., *10:38 a. m., *2:05 p. m., *4:31 p. m., *5:31 p. m., *7:40 p. m.

*5:31 p. m., *7:40 p.m.

*Kela ame keia la.

tSabati wale no.

t Koe ke Sabati

G. P. DENISON

Lunahoohana.

F. C. SMITH,

G. P. & T. A.

Kuai Hoopau Loa

MA KO'U HALEKUAI

ma Alanui Hotele

E hooliloia aku ana na PALULE. PALEILE, KIMONA, PAPALE ame na pono Iapana ma na kumukuai i loaa mai ai no ka pomaikai o ka poe paa i ka hana i ke ao a hiki ole hoi ke hele e kuai i ka lakou mau mea e makemake ai.

E hamama no i na ahiahi apau, a e hele mai apau loa e nana ina aole makou e ha'i ana i ka oiaio.

S. OZAKI,

Waverly Block Alanui Hotele.

KA HOIKE A. O. I. K. O KOOLAU

AME KAPAA,KAUAI.

I ke kakahiaka o ke Sabati Aug. 9, ua ikeia aku na haumana o na Koolau e naue ana i ke ala no ka hiki aku i ka luakini o Kapaa, kahi i kaheaia ai no ka hoike hui o keia mau kuia, i ka pumehana pono ana ae o ka la, ua hoea mai la ke kaa mahu o ka hui o Kealia me na kaa i uluwehi i na haumana a Anehola.

I ke koele ana ae o ka hora 11 a.m. ua hoomaka ia na hana, ma ka hookuene pono ana i na papa kula, ua hiki ole nae i ka luakini ke apo pau mai i ka nui i akoakoa mai. ua hoonee ia aku na hana imua me ka hoomalu ana a ke komite hoeueu J. K. Apolo. Mele ia ka aoao 107 Lei Alii. me ka pule a I. K. Kaauwai, himeni hui aoao 155 L. A. ka haiolelo a ka Peresidena o ka Ahahui o na Koolau, G. M. Huddy, no Kapaa, 1. B. Cummings, ka hoike makahiki a ke komite hoeueu J. K. Apolo. I ke kuu ana iho o keia, ua hapaila ke koho hou ana i na luna nui o na Ahahui no Koolau. G. M. Huddy, Peresidena: J. K. Apolo, hope: Mrs. K. Lovell, Puuku: W. Huddy, Kakauolelo: Hose Castro, Ho@ No Kapaa, hoomau ia ka papa mua, a ma kahi o ke kakauolelo. koho hou ia o Peter Kauhoe, Mose Kuhaulua, hoa. Komite hoeueu no Kauai Hikina, J. K.

Ma ka pau ana ae o keia , ua mele hou ia mai ma ka aoao 3 L. A. Ua hemo ae na hipuu no ka lulu ana no ka waihona o ka Ahahui o Kapaa. ua nee ae ka papa kula o Kilauea. e alakai ia ana e Mrs. C. Huddy a he 12 minute i hana ia mai e lakou.

Papa mai o Kalihiwai a mahele elua hoi o Kilauea. e alakalia ana no na haawina e lakou. manawa 6 minute. Kula mai o Kapaa. manawa 21 minute e alakai ia ana e C, K. Haae. Kula mai o Anehole, manawa 25 minute e alakalia ana e Lucy Kahanu na pokii. S. Kaialoa. na Opio me makua. Kula o Koolau. manawa 8 minute. e alakai ia ana e Mrs. W. Huddy.

Iloko o keia mau paa kuia i hoike ia. he pahee na haawina Baibala i hana ia mai e na haumana a pela no hoi na himeni. he mau olelo paipai mai a I. K. Kaauwai. S. N. Kaanehe. 8am. Davis Z. M. Naahumakua.

O ka huina ma keia ia aole i @ mai malolo o 200 mai na haumana ame ka poe i hana la ia ame ka makaikai e ole hoi ka nui he hana maikai. hookuuia na hana me ke mele ana ma ka aoao 13 L.A. me ka pule a G. M. Huddy.

I ka puhee ana ae iwaho o ka Luakini e ahu mai ana ka momona ua hele a luluu na pakaukau i na mea ai like ole. i hoomakaukau ia e ka puuwai hamama o na haumana o Kapaa.

Mahalo,

WILLIAM HUDDY.

Kilauea, Kauai.

KE KUIKAHI ME KINA.

WASINETONA, Aug. 17- Ua kukalaia ae ma ke Keena Mokuaina i keia la ua loaa ia Kuhina Center he aelike i kakauinoaia e Keikealii Chin- e olelo ana e kakauinoaia no kekahi kuikahi me Amerika Huipuia me ka apono mai e komo no na awa o Moeikoa ame Tatung-tao ma ka hookolo waiwai apa me na aina e ma ka la i o Okaibba Ina e hookoia ana keia aelike a loaa ana i keia ke komo ana aku ma na hana e alii ana ia Manakuria.