Ka Nupepa Kuokoa, Volume XLI, Number 30, 24 Iulai 1903 — Page 3

ʻaoʻao PDF (1.45 MB)

This text was transcribed by:  Kelly Murray
This work is dedicated to:  Awaiaulu

Ka Nupepa Kuokoa

KE KILOHANA POOKELA NO KA LAHUI HAWAII

NUPEPA KUOKOA, IULAI 24, 1903.

 

HOOLAHA KUMAU

_____

Hui Alahao âme Ainao Oahu MANAWA HOLO Mei 1, 1903.

 

MAI HONOLULU AKU

N Waianae, Waialua, Kahuku ame na wahi hoolulu ma ke alahao - 9:15a.m, 3:30p.m

N Pearl City, Ewa Mill, ame na wahi hoolulu ma ke alahao - 7:30a.m.,

9:15a.m., 11:05a.m., 8:15p.m.,

9:20p.m., 4:15p.m., 5:15p.m.,

9:20p.m., 11:15p.m.

 

MAI WAHO MAI.

Ku i Honolulu mai Kahuku, Waialua, ame Waianae mai 8:36a.m., 5:31p.m.

Ku i Honolulu mai Ewa Mill ame Pearl City mai - 6:50a.m., 7:46a.m.,

8:36a.m., 10:38a.m., 2:05p.m.,

4:21p.m., 5:31p.m., 7:40p.m.

 

5:31p.m., 7:40p.m.

Kela âme keia la.

Sabati wale no.

Koe ke Sabati.

 

G.P. DENISON, Lunahoohana.

F.C. SMITH,

G.P. & T.A.

_____

Kakela me Kuke [KAUPALENAIA]

Poe Kalepa ma ke Komisina A HE POE LAWELAWE KOPAA

Poe Agena no na Mahiko Lehulehu.

_____

Ina e makemake oe e hoomakaulii kau loaa e hele oe e kuai PAPALE, PALEILI ame na mea like nou i ka halekuai o S.OZAKI,

Helu 178 Alanui Hotele, He maikai a ano hou mau ka makou mau waiwai a he kaawale mai na pilikia mai o ke ahi ame ka wai.

_____

He Huaale Maikai Aole he like o na "Huaale a Ayers"

me na huaale e ae no ka mea he mau huaale kokua keia i ka hana a na naau, a he laau hoomaha maikai loa hoi.  Ina he paa kou hanalepo o na

"Huaale a Ayers"

ka laau e hemo maikai ai, a e hemo maikai mau ana hoi mahope aku oia manawa.

Aole loa he hiki i kekahi kanaka ke Olelo ae he maikai kona ola kino ina aole he hemo o kona hanalepo he hookahi manawa o ka la, a oi aku paha.  Ina i maopopo keia kanawai o ke ola i na kanaka apau, aole loa e like ka nui o ka poe ma'i me ka mea e ike ia nei i keia mau la.

Ua hana ia owaho me ke kopaa he maikai loa ka lawe ana.

Aohe mau Huaale i oi ae ka maikai mamua o na

"Huaale a Ayers"

Hoomakaukau ia e Kauka J.C.Ayer & Company, Lowell, Mass, U.S.A.

E loaa no keia mau Huaale ma ka Hale Kuai Laau o Hollister, alanui Papu.

_____

Nuhou o ko na Aina Mamao

E PILI ANA IA RUSIA.

            ST. PETERSBURG, Iulai 13  -Ma na nupepa i ikeia iho ai ua olelo aku o @ ia Kina e wehe ae ana oia ia @ i ka makahiki 1909 ina e maluhia ana ka aina ia wa.

 

PUHIIA E KA MAKANI.

            DENVER, Iulai 13.   -Ma keia la, ua puhiia a lele i ka makani ka halepe'a o ka ahahui Imi Pono Kristiano oiai e noho ana he 8000 kanaka maloko.  He heluna nui ona elele i eha.

 

UA LOAA PONO AKU.

            BUCHAREST, Iulai 13.  -Ua loaa pono ae nei ka hoolaia a kekahi poe o ka oihana koa e pepehi i ka poe nana i powa ka Moi Alekanekero.  He nui ka poe i hopuia.

 

HOOPAHUIA ME KE DAINAMAITA.

            AGRAM. Crotia, Iulai 14.  -He elua

(E nana ma ke kolamu mawaho.)

_____

KA MOOLELO KAAO O LAIEIKAWAI

KA HIWAHIWA O PALIULI, KA WAHINE O KA LIULA.

MOKUNA IV.

            Ka olelo paa a Aiwohikupua imua o na kaukaualii me na kaikuahine ona - Loaa o Laieikawai ia Aiwohikupua ma ka moeuhane - Ona ke Alii i ka awa, a kau mai he mele - Holo o Aiwohikupua me kahi kahu e huli ia Laieikawai i Hawaii - Hiki laua nei ma Hana, Maui, a ike ia Hinaikamalama, ke kaikamahine Alii o Hana, e heenalu ana - Hai mai ke kaikamahine Alii ia Aiwohikupua ma - Hele laua nei i ke konane me ke kaikamahine Alii, hai i na kumu pili o laua - Make ke Alii i ke kaikamahine Alii - Haalele laua nei ia Maui, hiki ma Kapakai, ma Kohala, Hawaii - Haalele ia wahi hiki ma Kauhola, hele lakou i ke kahua mokomoko.

            Ia laua e kamailio ana no keia mau mea, alaila, hoomaopopo loa ae la ka Alii e holo i Hawaii e ike ia Laieikawai.  Ia wa ka hoopuka ana o laua i olelo hooholo no ke kii ia Laieikawai i wahine mare.

            I ka paa ana o na la ina, a hiki mai ka manawa kupono no ka holo moana, kauoha ae la ke Kuhina i na Kapenawaa o ke Alii, e hoomakaukau i na waa no ka holo i Hawaii ia po iho, ia manawa ke koho ana a ke Alii i na hoewaa kupono ke holo pu, ko ke Alii mua Iwikuamoo ponoi.

            Mamua o ka napoo ana o ka la, kauohaia ka poe nana uli o ke Alii, ame na Kilokilo e nana i na ouli o ke ao ame ka moana, ina he hiki i ke Alii ke hele, a ina he hiki ole e like me ka mea mau; aka, ua maopopo i kona poe nana uli a Kilokilo hoi, he hiki i ke Alii ke hele i kana huakai.

            A i ka wanaao, i ka puka ana o ka Hokuhookelewaa, kau aku la ke Alii ame kona Kuhina, na hoewaa he umi-kumamaono, na hookele elua, he iwakalua ko lakou nui maluna o na kaulua, a holo aku la.

            Ia holo ana a lakou ma keia holo ana, hiki mua lakou ma Nanakuli, i Waianae, ia wanaao, haalele lakou ia wahi, hiki mua lakou i Mokapu, a malaila lakou i noho ai he umi la, no ka mea, ua loohia lakou e ka ino, hiki ole ke holo i Molokai.  A pau na la he umi, ike maopopoia aku la ka malie, a maikai ka moana.  Ia po iho a ao, hiki lakou i Polihua, ma Lanai, a malaila aku hiki ma Ukumehame, a no ka makani ino ia la, ua noho lakou malaila, a i kekahi la ae, haalele lakou ia wahi, hiki lakou i Kipahulu ia la.

            Ia lakou ma Kipahulu, hooholo ae la ke Alii i olelo e helewawae mauka, a mana waa na kanaka.  Ma kahi nae a lakou i noho ai, ua nui ka poe mahalo no Aiwohikupua no ke kanaka maikai.

            Haalele lakou ia Kipahulu, hiki lakou ma Hana, mauka no ke Alii me kona Kuhina, ma na waa no na kanaka.  I ke Alii nae e hele ana, he nui ka poe i ukali ia laua, no ka makemake ia Aiwohikupua.

            Ia lakou i hiki aku ai ma ke awapaewaa o Haneoo i Hana, he nui ka poe i lulumi mai e makaikai i ke Alii, no ka pakela o ka maikai.

            Ia Aiwohikupua ma nae i hiki aku ai, e heenalu mai ana na kane ame na wahine i ka nalu o Puhele, aia nae ilaila kekahi kaikamahine Alii maikai kaulana o Hana, o Hinaikamalama kona inoa.  Iloko hoi o ko laua ike ana i ua kaikamahine Alii nei o Hana, alaila, ua hoopuniia ke Alii kane, ame kona Kuhina e na kuko; a oia no hoi ke kumu o ko Aiwohikupua ma noho ana malaila ia la.

            A pau ka heenalu ana a na kamaaina, a i ka nalu pau loa o ko Hinaikamalama hee ana, o ka nalu ia i pae ai hoopololei mai la ka hee ana a ke kaikamahine Alii ma ka wai o Kumaka, kahi hoi a Aiwohikupua ma e noho mai ana.

            I ke kaikamahine Alii nae e auau ana i ka wai o Kumaka, ua hoopuiwaiia ke Alii kane, ame kona Kuhina e ke kuko ino.  A no ia mea, iniki malu aku la ke Kuhina o ke Alii ia Aiwohikupua, e hookaawale ia laua mai kahi a Hinaikamalama e auau ana, i ole laua e pilikia ma ka manao.

            Ia Aiwohikupua ma i hoomaka ai e hookaawale ia laua mai ko ke Alii wahine wahi e auau ana, alaila, pane aku la ke Alii wahine, "E na'lii! he holo ka hoi ka olua, ka i no hoi he wehe ko ke kapa, lele iho hoi he wai, hookahi hoi ka auau ana o kakou, hoi oia iho la no ka waiwai a ke kamaaina, i makemake no hoi e hele, hele no, ina he makemake e noho, o Hana no hoi nei noho iho."

            A no keia olelo a ke Alii wahine, i aku la ke Kuhina i ke Alii, "E! pono ha ka manao o ke Alii wahine, no ka mea, ua makemake loa ke Alii wahine ia oe."

            I mai la o Aiwohikupua, "Ua makemake au i ke Alii wahine, no ka mea, ke ike lea nei au i ka oi loa o kona maikai mamua o ka'u mau wahine mua nana i kumakaia; aka, ua lohe oe i ka'u hoohiki paa ana, aole au e lawe mai i kekahi wahine o keia mau moku i wahine na'u."

            A no keia olelo a Aiwohikupua, i aku kona Kuhina, ua laa oe no kela hoohiki au, alaila, e aho na'u ka wahine a kaua."

            A pau keia kamailio liilii ana a laua, hele aku la laua i ka heenalu.  A ia laua e heenalu ana, aia hoi, ua hoopuniia mai la ke Alii wahine no Aiwohikupua, a ua nui ka poe i hoopuni paaia no ka makemake i ke Alii kane.

            A pau ka auau ana a laua, hoi aku la laua me ka manao e kau maluna o na waa a holo aku; aka, ike aku la o Aiwohikupua i ke Alii wahine e konane mai ana, a manao iho la ke Alii kane malihini e hele i ke konane; aka, ua lilo mua na ke Alii wahine ke kahea e konane laua.

            A hiki o Aiwohikupua ma kahi o ke Alii wahine, kau na iliili a paa ka papa, ninau mai ke Alii wahine, "Heaha ke kumu pili o ka malihini ke make i ke kamaaina?"

            I aku o Aiwohikupua, "He mau waa kaulana ko'u kumu pili, aia ke lana mai la iloko o ke kai, oia ko'u kumu pili me oe."

            I mai la ke Alii wahine.  "Aole he maikai o kou kumu pili e ka malihini, hookahi no kumu pili mamua loa, oia na kino no o kaua, ina e make au ia oe, alaila, e lilo wau nau, ma kau hana e olelo mai ai, malaila wau e hoolohe ai, a e hooko ai hoi, ma ka mea kupono nae i ka hooko aku a ina hoi e make oe ia'u, alaila, o oe no ka'u, e like me kau hana ia'u pela no au e hana ai ia oe, me ko noho i Maui nei."

            A no keia mau olelo maikai a ke Alii wahine imua o Aiwohikupua, alaila, hooholo koke ae la oia i kona manao ae ma ka waha wale no.

            A iloko o ko laua manawa kamailio, hoopuka aku la o Aiwohikupua i kona manao imua o ke Alii wahine, "He nani hoi ia ua pili ae nei ko'u kino me oe, a ua maikai no; aka, aole kana e launa koke, aia a hoi mai au mai kuu huakai kaapuni ia Hawaii; no ka mea, ua hoohiki wau mamua o kuu holo ana mai nei, aole wau e launa me kekahi o na wahine e ae, aia no a puni o Hawaii, alaila, hana wau e like me kuu makemake, e like me ka kaua e kamailio nei, a oia hoi ka hookoia ana o kou makemake.  Nolaila, ke kauoha mua aku nei wau ia oe mamua o kuu hele ana, e noho oe me ka maluhia loa, aole e lilo i kekahi mea e ae, aole hoi e hana iki i kekahi mea pono ole e keakea ai i ka kaua hoohiki, a hoi mai wau mai kuu huakai makaikai mai, alaila, e hookoia ke kumu pili o ka wahine alii.  Ina i hoi mai wau aole oe i maluhia, aole hoi oe i hooko i ka'u mau kauoha, alaila, o ka pau no ia."

            Aole nae keia o ko Aiwohikupua manao maoli.  A pau na kauoha a Aiwohikupua ia Hinaikamalama, haalele lakou ia Maui, hiki lakou nei i Kapakai ma Kohala.

            I kekahi la ae, haalele lakou ia Kapakai, holo aku la lakou a mawaho pono o Kauhola, nana aku la o Aiwohikupua i ka akoakoa lehulehu ana o na kanaka mauka o Kapaau.

            Ia manawa, kauoha ae la o Aiwohikupua i na hoewaa, e hookokoke aina aku na waa, no ka mea, ua makemake ke Alii e ike i ke kumu o keia akoakoa lehulehu ana o na kanaka.

            A hiki lakou i ke awapaewaa ma Kauhola, ninau aku la ke Alii i ke kumu o ka akoakoa lehulehu ana o na kanaka, alaila, hai mai la na kamaaina, he aha mokomoko ke kumu o ia lehulehu ana.

            Ia manawa, okalakala koke ae la o Aiwohikupua e hele e makaikai i ka aha mokomoko, a hekau iho la na waa o lakou, pii aku la o Aiwohikupua, ame kona Kuhina, ame na hookele elua, eha ko lakou nui o ka pii ana.

            A hiki lakou i Hinakahua i ke kahua mokomoko, ia manawa, ike mai la ka aha mokomoko i ke keiki Kauai, no ka oi o kona kanaka maikai mamua o na keiki kamaaina, a lilo iho la ka aha i mea haunaele.

            Mahope iho o keia haunaele ana, hoomaka hou ka hoonoho o ke kahua mokomoko, ia manawa, pili aku la o Aiwohikupua ma ke kumu laau milo, e nana ana no ka hoouka kaua.

            Ia Aiwohikupua nae e ku ana, ma kona wahi, puka mai la o Ihuanu a ku iwaena o ke kahua mokomoko, e hoike ana iaia iho imua o ke anaina, a kahea mai la me ka leo nui, "Owai ka mea ma kela aoao mai e hele mai la e mokomoko?"  Aka, aole e hiki i kekahi mea ke aa mai e ku imua o Ihuanu, no ka mea,  o ko Kohala oi kelakela no ia ma ka ikaika i ke kuikui.

            Ia Ihuanu e hoike ana iaia iho, huli ae la oia, a ike ia Aiwohikupua, kahea mai la.  "Pehea oe e ka malihini?  E pono paha ke lealea?"

            A lohe o Aiwohikupua i keia leo kahea a Ihuanu, hele aku la a ku imua o ke kahuakaua, e hawele ana me kona aahu pukohukohu, i like me ke ano mau o na Puali o ke Alii.  Pane aku la oia imua o kona hoa hakaka.

            "E ke kamaaina, ua noi mai oe ia'u e lealea kaua, a eia hoi ka'u noi ia oe, i elua mai ma kou aoao, huipu me oe, akolu oukou, alaila mikomiko iki iho ka malihini."

            A lohe o Ihuanu i keia olelo a Aiwohikupua, i mai la oia, "He oi oe o ke kanaka nana i olelo hookano iho nei wau imua o keia aha apau, owau no ka oi mamua o na kanaka apau, a ke olelo mai nei hoi oe i ekolu aku ma keia aoao, a heaha la oe imua o'u?"

            Olelo mai la o Aiwohikupua, "Aole au e aa aku e hakaka me oe ma kau noi, ke ole e ku mai me na mea e ae ma kou aoao, a heaha hoi oe imua o'u.  Nolaila, ke olelopaa nei wau ano, he hiki ia'u ke hoolilo i keia Aha i mea ole iloko o kuu lima."

            A no keia olelo a Aiwohikupua, hele mai la kekahi o na puali ikaika a ma ke kua o Aiwohikupua, olelo mai la.  "E! mai olelo aku oe ia Ihuanu, o ko Kohala oi no kela; aohe puko momona o Kohala nei i kela kanaka."

            Ia manawa, huli ae la o Aiwohikupua, a pale ae la i ka mea nana i olelo mai ma kona kua, haule aku la ilalo a make loa.

_____

MOKUNA V.

            Kukuli o Aiwohikupua, a pule aku i kona mau akua - Kui o Ihuanu ia Aiwohikupua a hala - Kui o Aiwohikupua ia Ihuanu ma ka houpo hula ma ke kua a make loa - Haalele lakou ia wahi, hiki ma Honokaape, ma Waipio, malaila aku a waho o Paauhau - Hili o Aiwohikupua ma ke kahua mokomoko - Haalele lakou ia wahi, hiki ma Laupahoehoe.

           

            A ike mai la ka aha kanaka apau o ke kahua mokomoko i ka oi ana o ka ikaika o Aiwohikupua, no ka make loa ana o ke kanaka ma ke pale wale ana no.

            Ia manawa, hele mai la kekahi mau puali o Ihuanu, a olelo mai la ia Ihuanu penei:  "E Ihuanu e! ke ike maopopo lea aku nei wau ano i keia manawa, aole e lanakila ana ko kakou aoao, a ma kuu manaopaa hoi, e lanakila ana ka malihini maluna o kakou, no ka mea, ke ike maopopo aku la no oe, ua make loa ko kakou kanaka i ka welau wale no o ko ia la lima, ahona a kui maoli aku kela, lele liilii.  Nolaila, ke noi aku nei au ia oe, e hui ka aha, e pono ke hoopau ka mokomoko ana, ame kou aa ana aku i ka malihini, a nolaila, e hele oe a i ka malihini, e lulu lima olua, a e haawi aku i kou aloha nona i aloha pu ai olua me ka ike aku o ka aha ua hoomoe a pau wale ke kaua."

            Iloko o keia olelo, alaila, ua ho-aia ka inaina wela o Ihuanu no keia olelo, me ka olelo aku, "E ko'u mau kokua, mai maka'u oukou, mai hopohopo no ka make ana o kela kanaka o kakou ma ke pale ana i ka welau o kona lima, aole anei wau i hana pela i kekahi mau la mamua ae nei maanei?  A heaha la oukou i maka'u ai; a nolaila, ke hai aku nei wau ia oukou, ina i hopo oukou no kela malihini, alaila, e huna oukou i ko oukou mau maka i ke aouli, aia a lohe aku oukou ua lanakila o Ihuanu, alaila, e hoomanao oukou i kuu puupuu ia Kanikapiha, ka ai a ke kumu i a'o oleia ia oukou.  No ka mea, ke ike nei wau, aole e lanakila mai oia maluna o'u, no ka mea, ua kani ka pola o kuu malo i keia la."

            A no keia olelo a Ihuanu, i aku kona mau hoa hui mokomoko, "Auhea oe!  Ua pau ka makou olelo, aohe hana i koe, kulia imua o ka ai a ke kumu a kakou i a'o pu oleia mai ia makou, a ke olelo mai nei hoi oe, ua kani ka pola o ko malo, malia o lanakila oe i ua malo ou."  Alaila, nee aku la kona mau hoa mawaho o ka aha.

            Ia Ihuanu nae e olelo kaena ana iaia iho imua o kona mau hoa no kona lanakila maluna o Aiwohikupua, alaila oi mai la o Aiwohikupua a kokoke iki ma ke alo o Ihuanu upoipoi ae la oia i kona mau lima ma ka poohiwi, me he moa kane la e hoomakaukau ana no ke kani ana, a olelo aku la oia ia Ihuanu, "E Ihuanu! Kuiia i kuu piko a pololei i eha kauna kui?"

            A lohe o Ihuanu i keia kaena a Aiwohikupua e kui, alaila, leha ae la na maka o Ihuanu a puni ka aha, ike aku la oia e hiiia mai ana kekahi keiki opiopio loa, alaila, olelo aku la o Ihuanu ia Aiwohikupua, "Aole na'u oe e kui, na kela wahi keiki e hiiia mai la, nana oe e kui, a oia kou hoa hakaka."

            A lohe o Aiwohikupua i keia olelo, he mea e kona ukiuki, ia manawa, pii ae la ka ula o Aiwohikupua a puni ke kino, me he mea la ua hoolauia i ke koko o na hipa keiki.  Huli ae la oia a kupono imua o ka aha, a olelo aku ia, "Owai keia kanaka i aa mai ai oia i ke keiki Kauai nei, nolaila, ke olelo nei wau i keia, he hiki i kuu akua ke haawi mai ia'u e lanakila maluna o keia kanaka, a e hoolilo ae kuu akua i ke poo o ko oukou ikaika i mea milimili na kuu mau hoewaa."

            Alaila, kukuli iho la o Aiwohikupua a pule aku la J kona mau akua penei:  "E Lanipipili, Lanioaka, Lanikahuliomealani, e Lono, e Hekilikaakaa, ame Nakolowailani, i keia la,  e ike mai oukou ia'u i ka oukou kama, ka oukou pua i koe ma ke ao nei, ma keia la, e haawi mai oukou i ka ikaika apau maluna o ka oukou kama nei, e hikino ia oukou ke hoohala i kana puupuu ma kona kui ana mai i ka oukou kama, a ke noi aku nei wau e haawi mai i ke poo o Ihuanu i kuu lima, i mea paani na ko'u mau hoewaa, i ike ai keia aha apau, owau ke lanakila maluna o keia kanaka i oki poepoe oleia.  (Amama.)

            A pau kana pule ana ku ae la o Aiwohikupua iluna me ka maka ikaika a makaukau no ka hoouka kaua, a ninau aku la ia Ihuanu.  "Ua makaukau anei oe e kui mai ia'u."

            Olelo mai la o Ihuanu, "Aole au e kui aku ia oe, nau e kui mua mai ia'u."

            A lohe ke kumu kui a Ihuanu i keia mau olelo, hele mai la a ma ka aoao o Ihuanu, i mai la.  "Hawawa oe e kuu haumana, ina e kena hou mai kela, alaila, e hoomaka oe e kui me kou ikaika apau, no ka mea, o kona manawa e kena mai ai e kui, oia iho la no ka hoomaka ana." a nolaila, ua pono keia ia Ihuanu.

            A pau ka laua kamailio ana, ninau hou aku la o Aiwohikupua ia Ihuanu.  "Ua makaukau anei oe e kui mai ia'u; ina he manao e kui, kui mai i kuu maka."

            Ia manawa, e waiho koke mai ana o Ihuanu i ka puupuu, hu ka makani ma ka papalina o Aiwohikupua, aole nae i ku, no ka mea, ua alo o Aiwohikupua, oia ka mea i hala'i.

(Aole i pau.)

_____

HOOLAHA KUMAU

_____

Ka Hui Banako Hoahu Malama Dala o Hawaii (KAUPALENAIA)

 

Huina i hoahuia           $160,000.00

Peresidena                   Kikila Baraunu

Hope Peresidena         W.P.Robikana

Puuku                          W.G. Cooper

Keena Hana Nui:

Alanui Papu, kokoke i Alanui Kalepa.  Keena Laia ma Hilo, Hawaii.  E lawelawe ana i ka Oihana Banako Hoahu Dala ma Honolulu a me Hilo

            E laweia mai no na huina hoahu me ka haawila o na ukupanee no na hoahu makahiki ma ka huina o 41/2 pakeneta no ka makahiki.  E loaa no na Rula a me na hooponopono ana ke ninau ae ma ke Keena Hoahu.

2823-1yr.

_____

KAUKA T. MITAMURA

Alanui Kukui Ololi Helu 68, Honolulu.

Na hora Hana:

            Hora 8 a 10 kakahiaka: hora 1 a 3 ame hora 6 a 7:30p.m. Sabati: Hora 6 a 8p.m.

Telepone White 152.   P.O.Box 942.

_____

LEWERS & COOKE LUI A ME KUKE, Kaupalenaia

Na mea Hookomo mai a Kuai aku i na LAKO HANA HALE

O Kela ame Kena Ano.

Malaila e loaa ai na mea malalo ihoi.

            NA PAPA N.W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

            NA PENA LIKE OLE AME NA HULU PENA, NA ANLANI, NA PEPA HALE, PALE PUKA ANIANI, MOENA, ETC.

            O na kauoha pono hale apau loa e hiki mai ana ia makou e hooke koke ia no me ka eleu ame na KUMUKUAI HAAHAA LOA.

LEWERS & COOKE

_____

KAUKA GEO. J AUGUR

Kauka Kuluwai Liilii.

LAAU MOMONA AOLE MULEA

Keena Hana 431 Alanui Beritania.  Telepona Helu 1851.  Hora hana 10-12 a.m., 3-4 ame 7-8p.m. Sabati 9:30-10:30a.m.

_____

JOHN M KEA.

He Notari no ka Lehulehu: 

he mea hana i na Palapala Kanawai a he mea huli i na kuleana aina.  O na kauoha mai na mokupuni mai e hookoia no me ka pololei.

Keena Hana:  Ma ka Loio Kuhina Hale Mana Hooko.

Honolulu, Mei 22, M.H. 1903.

_____

Nuhou o ko na Aina Mamao.

mau pahu dainamaita weliweli i puka ae maanei i keia la, he hana keia e pili ana i na hana kalaiaina.

KA OLELO A RUSIA.

            WASINETONA.  Iulai 14.  -Ua haawi mai o Hansen, ka mea e lawellawe nei ma ke keena o ke kuhina o Rusia. I keia la he palapala ia Kakauolelo Hay e pili ana i na awa ma Mana@ i makaukau no ka wehi ana.  Ua hoe ole aku ke Kakauolelo i ke kamailio ana maluna o keia kumuhana a Rusia.

KAKAUOLELO KEENA KAUA.

            WASINETONA. Iulai 14.  -Ua hoomaopopoia ae nei e lilo aku ana o Konela Oliver, ka mea i noho ae nei ma kahi o Konela Sunger ma ke kulana Kokua Kakauolelo o ke Keena Kaua, i Kakauolelo o ke Keena Kaua ma kahi Elihu Root, no ka mea he makemake ko Root e waiho i kona kulana.

MANAO E KAOHI.

            OYSTER BAY, @.  Iuali 14.  -Ua halawai ae o Peresidena Rusia wela ma keia la me na iaia Iudala no na mea e pili ana i ke noi i ke Za maluna o na hana hoomainoino Iudala ma Kichine?"  Mahope o keia halawai ana ua hoikeia ae ke manaoia nei aole e hoounaia aku ana ua noi nei.  Ua lawelawe ae nei ke Za i kekahi hana maluna o ka poe nana i hooulu keia mau hana, a o kekahi no hoi, ua ano ulu ku-e ae keia mau aupuni no na mea ma Mana@ a ua manaoia, he mea pono e kaomiia na mea e puka ae ai ka inaina.