Ka Nupepa Kuokoa, Volume XLI, Number 26, 26 Iune 1903 — Hana Powa ma Pap [Illegible] Hawaii [ARTICLE]

Hana Powa ma Pap [Illegible] Hawaii

Eia na makai o Hawaii ke hoao nei i keia mau Ia e loaa he meheu e hiki ai i ka lima o ke kanawai ke kau aku maluna o ka mea nana i hana kekahi hana puuwai menemene ole i hanaia ma ka mahiko o Papaaloa. Ma ka la 31 iho nei o Mei, ua loaa aku ke kino make o kekahi lanana o Konde Kumigero ka inoa maloko o kekahi awawa a malalo pono hoi o ka ha-wai. Uaii loaa aku ua kokoke e lele ke poo mai ke kino ae, a he nui no hoi na eha e ae a puni ke kino. Ua ino ke kino i ka loaa ana aku, a ua hiki ole i ke kauka ke nana pono i ke kumu o kona halawai ana me ka make. Ua kaheaia aha koronero a he ekolu manawa a lakou i noho ai, Mei 31, June 2 ame June 15. Ma ka la hope loa o ka lakou noho ana, ua hooholo lakou ua halawai keia lapana me ka make ma o ka pepehiia ana e kekahi mea i maopopo ole i ka aha koronero. Ma o ka ninaninauia ana o kekahi mau hoike, ua ikeia iho he wahi kanaka ano noho malie ka mea i make. Ma ka po o ka la 14 o Mei, ua ikeia ka mea i make me elua Kepani okoa iho ma ka hale o kekahi kanaka Hawaii. a he ano kaawale keia wahi mai ka halewili mai. Ua ano ona keia poe Kepani. Ma ka hora 10 o ka po, ua haalele aku lakou I ka hale o ke kanaka Hawaii, o Konde ka mea no nae i hoi mua. O keia kona wa i ike hope loa ia ai. Ua oleloia ae, mahope mai, hiki hou mai na hoa hele o Konde ia po ma kahi o ka hoike a noi mai e alakai aku ia laua no kekahi hale kanaka okoa aku, a olelo ae ua hele aku o Konde no ka ha-wai a ua make. Eia keia mau lapana ke paaia nei e na makai. Ma ka manao o nā mea i ike i kahi i waiho ai ke kino, ua manao lakou aole ka lapana i haule mai ka ha-wai aku, aka, me he mea la ua haule aku oia mai luna mai o ka pali, a i ole, ua olokaaia aku paha mai luna aku o ka pali. Ua manaoia no hoi, aole i kokoke e kaawale ke poo mai ke kino mai ma ka olokaa ana mai luna mai o ka pali, me he mea la ua okiia ke poo a kokoke e lele mamua o kona hoolokaaia ana ilalo o ka pali. Aohe i maopopo ke kumu o ka hanaia ana o keia karaima.