Ka Nupepa Kuokoa, Volume XLI, Number 26, 26 Iune 1903 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, IUNE 26, 1903.     EKOLU

HOOLAHA KUMAU

Ka Hui Banako hoahu

Malama Dala o Hawaii

[KAUPALENAIA.]

Huina i hoahuia ...                   $250,000.00.

Peresidena ...                           Kikila Barauna

Hope Peresidena ...                 W. P. Robikana

Puuku ...                                  W. G. Cooper

Keena Hana Nui:

Alanui Papu. kokoke i Alanui Kalepa.

Keena Lala ma Hilo, Hawaii.

---E LAWELAWE ANA I KA---

Oihana Banako Hoahu Dala

ma Honolulu ame Hilo

E laweia mai no na huina hoahu ma ka haawiia o na ukupanee no na hoahu makahiki ma ka huina o 4 1/2 pa-keneta no ka makahiki.  E loaa no na Rule a me na hooponopono ana ke ninau ae ma ke Keena Hoahu.

KAUKA T. MITAMURA

Alanui Kukui Ololi Helu 68, Honolulu.

Na Hora Hana: 

Hora 8 a 10 kakahiaka; hora 1 a 3 ame hora 6 a 7:30 p. m. Sabati:  6 a 8 p. m.

Telepone White 152.     P. O. 842.

LEWERS & COOKE

LUI A ME KUKE, Kaupalenaia

Na mea Hookomo mai a Kuai aku

i na

LAKO HANA HALE

O Kela ame Kena Ano.

Malaila e loaa ai na mea malalo iho:---

NA PAPA N. W., NA PAPA HOLE, PILI HALE, NA PUKA, NA OLEPELEPE. AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

NA PENA LIKE OLE, AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

O na kauoha pono hale apau loa e hiki mai ana ia makou e hooko koke ia no me ka eleu ame na KUMU KUAI HAAHAA LOA.

LEWERS & COOKE

He Huaale Maikai

Aole he like o na

"Huaale a Ayers"

me na huaale e ae no ka mea he mau huaale kokua keia i ka hana a na naau, a he laau hoomaha maikai loa hoi.  Ina he paa kou hanalepo o na

"Huaale a Ayers"

ka laau e hemo maikai ai, a e hemo maikai mau ana hoi mahope aku oia manawa.

Aole loa he hiki i kekahi kanaka ke Olelo ae he maikai kona ola kino ina aole he hemo o kona hanalepo he hookahi manawa o ka la, a oi aku paha.  Ina i maopopo kela kanawai o ke ola i na kanaka apau, aole loa e like ka nui o ka poe ma'i me ka mea e like ia nei i kela mau la.

Ua hana ia owaho me ke kopaa he maikai loa ka lawe ana.

Aohe mau Huaale i oi ae ka maikai mamua o na

"Huaale a Ayers"

Hoomakaukau ia e Kauka J. C. Ayer & Company, Lowell, Mass., U. S. A.

E loaa no kela mau Huaale ma ka Hale Kuai Laau o Hollister, alanui Papu.

O KA LOLI MAU o ka wai oia kekuhi kumu e loaa ai i ka ma'i hi.  Ma@ o keia, i hele mau ka poe kaahele @ua me ka paa pu me ka omole laau @ @ ame hi a Chamberlain i hiki mai ka manawa e loaa ai i keia ano pilikia alaila ua loaa no ka mea nana e @ ae ia ino.  Aohe he lua e like ai @ keia laau paili i na pilikia o ka opu.  Aole e hiki mai keia ano pilikia i ka manawa iluna o na kaa a maluna o na @ku, a oia io no kahi i kupono loa aku ai keia ano laau.  He mea pono e kuai kekahi i laau o keia ano mamua o ka hele ana.  Ma kahi o Benson Smith & Col, e loaa ai keia ano laau na Agena nui e kuai nei.

Ma Kauai e malamaia ai na hoo@u polo o keia makahiki.

Ma ka Poalima o keia pule iho nei, @ uhaiia kekahi wahi kaikamahine o Becky de la Cruz ka inoa ma ke alanui Papu a ohi'uia ma ka lima hema a pakele no nae ma ka pinana ana i kekahi pa.  Ua maule oia i kona haule ana ma kahi aoao o ka pa.

---MOOLELO NO---

RODERIKA O KILADEA

KA NAITA KUPAA MAHOPE O KA MEA ANA I ALOHA AI.

---:AME:---

KATE MAKAMURAKA.

KA UI NOHEA HOOILINA OIAIO O KALOLOGA.

(Unuhiia e S. K. Naawa.)

MOKUNA I.

KA KAKOU KOA AME KONA UKALI.

O ke kokoolua o ka kakou opio he kanaka aoo ia e hoike mai ana i ke ano o ka poe mua loa i hiki aku ai i Pelekane i ikeia ma ka ino alahui, Saxona.  He mau aakoko ikaika kona, he nanaina oluolu a koa lua ole no hoi.  Ua like no oia me kona mua ae ma ka lako kaua, koe wale no ma kahi o na pahikaua pokopoko, e paa ana kekahi ihe loihi.  He ukali oia no ka kakou opio, a he naita hanohano hoi i kona mau la opio iaia maluna o ke kahua makomoko, a i na la kamalii o ka kakou opio, ua lilo mai oia i kumu a'o nana e hoonaauao i ka opio ma ka lawelawe ana i na mea kaua.  Ua pii ae kana haumana a kau ae maluna o kana kumu ma ke kulana o ka oihana naita, aole no nae oia ka mea nana e hookonokono aku i na manao ino iloko o Hiu Kapena, oiai ua kuniia ke aloha iloko ona no kona haku opio, a aole no hoi he kanaka i oi aku ka hauoli i ka hoohanohanoia ana mai o kona haku e like Hiu.

"Pehea iho la keia?" wahi a Hiu i ninau aku ai i kona haku opio.  "Aole anei ua mamao kupono kaua i keia manawa mai ke Kakela mai?"

"E akahele mai oe," wahi a ka naita opio i pane aku ai.  "Malia o loaa aku no hoi ia kaua na holoholona ma keia mau wahi aku nei.  Ke makemake nei wau o ka hoea koke mai o kekahi p;uaa nui ma keia wahi a o ka wa koke no ia e ulele aku ai."

"O ko'u makemake no ia; aka aole he noho oia ano holoholona ma na wahi nui loa o ka pohaku e like me keia.  Ke maopopo nei no hoi ia'u aole keia o ke ala e hiki aku ai i kahi a kaua e makemake nei."

"Alaila he okoa kau mea e hele nei mai ka'u aku."

"A!" wahi a Hiu i hooho ae ai me ka luliluli malie ana ae o kona poo.  "Ke manao nei wau he mea pono e loaa aku kekahi mau olelo a'o nou mai a'u aku."

"E hoomau aku, e Hiu; ua loaa ia oe ka pono ma ia mea."

"Pehea, e hoolohe mai ana anei oe?"

"Aole he hoopaapaa ana malaila."

"A e haawi ana oe i ka noonoo maikai ana no ka'u mau mea e hai aku ai ia oe?"

"Ke kupono kau mau mea e manao nei e hai mai ia'u."

"E hai aku no wau i ka'u mea e manao nei no kou pono."

"He manaoio ko'u, e kuu Hiu maikai, e hana io mai ana no oe ia mea no'u; aka he pono ia oe e waiho mai no na'u no e kaana no'u iho.  Ano, heaha kau mea e makemake nei e hai mai ia'u?"

"O ka mua e kuu haku.  Ua ike no anei oe i kahi e holo nei o keia alanui?"

"Ke manao nei wau ua ike no wau i na alanui apau oloko nei o Ducana Makamuraga."

"Ua maopopo no ia mea ia'u, e kuu Hiu maikai."

"Alaila e hoomau aku ana oe i ka hele ana a hiki i kahi e noho nei keia kaukaualii kahiko o na Ailiki?"

"Aole oia ka mea i komo mai iloko o ko'u naau," awhi a ka naita i pane mai ai me ka noonoo nui ana; a hoomau hou mai la i kana olelo ana:  "Ke manao nei wau aole oe e hoohewahewa ami ana i ko'u pulama ana mai i na manao maikai no ua wahi la.  Ke hai aku nei wau ia oe e Hiu, ua manaoio wau mai make no wau ina aole i loaa mai na kokua aloha ana a Makamuraga.  Ua kokoke aku wau i kau wahi o ka make i ko'u wa i hiki aku ai i ka home o Makamuraga, a ua maopopo no hoi ia'u aole no e hiki kupono ana ia'u ke hoomanawanui me ka loaa ole mai o kekahi kokua aloha.  Nolaila, ina e loaa ana ia'u he wa kupono e hele koke aku ai ma ko Ducana hale, e noho iho no wau malaila a haawi aku i ko'u mahalo iaia no kana hana lokomaikai i hana mai ai maluna o'u."

Ua luliluli hou ae la ko Hiu poo i oi ae hoi i ko ka wa mua a pane mai la.

"A, Sir Roderika, mai ae oe e haawipio aku i kou mau noonoo e like iho la me keia.  Heaha kau e nana nui nei i keia kaukaualii oloko o ka ululaau?"

"Heaha!" i hooho ae ai ka naita opio.

"Alia, e kuu haku maikai.  Aole wau i manao he mea hewa keia."

"Ke manao mai nei paha oe aole hoi i loaa ia'u ia mea o ke aloha?"

"He oiaio, ke hai aku nei wau ia oe, o oe kekahi o na haku i komohia ia e ka puuwai aloha."

"No keaha hoi wau e hana maikai ole aku ai ia Makamuraga?"

"Ua pono, ua pono; aka o kou manao maikai anei no Makamuraga ka mea nana e kono nei i kou manao e hele aku no laila?"

"Hiu!"

"O, ua hiki no ia'u ke kamailio aku me ka moakaka ina oia kou makemake, no ka mea ke manaoio nei wau he mea pono no e hai ia aku.  Aia ka noonoo nui ana iloko ou no kela opio wahine nana oe i malama."

No kekahi manawa ka noho mumule ana o Roderika, a aia na hiohiona o ka huhu ke hohola la maluna o kona mau papalina; aka ua mae koke iho ia mau haawina o ka huhu, ame ka leo oluolu i pane mai ai oia.

"E Hiu, o oe ko'u hoahele no ka wa loihi a he hoaloha hoi na'u e maka'u ole ai i ka hoike ana aku i ko'u manao.  Ke hai aku nei wau ia oe me ka pololei, o Kate Makamuraga oia ka'u mea e makemake nei e ike.  Ke pahaohao mai la paha oe no ia mea?"

"Ae, e kuu haku," wahi a Hiu i pane aku ai ma ka hookaulua ole iho.  "Ke pahaohao nei wau no ia mea.  Heaha kou mea i makamake ai e ike hou aku iaia?"

"Kahuhu!" wahi a Roberika i hooho ae ai.  "No keaha la i iini ai ka naau o ke kanaka e waiho mauleule ana maluna o kona wahi moe e ike lihi aku i ke Aupuni Lani!  No keaha hoi i holo ai ka wai ilalo o ka pali!  No keaha hoi i hoohauoli mai ai na kukuna malamalama o ka la i na mea ulu a ke Akua i hana ai!  Heaha hoi ko'u mea e makemake nei e ike hou aku iaia?  Heaha ke ano o kau ninau!"

"A, e Sir Roderika, o keia ka'u mea i hopohopo ai.  Na ka nani o ke kaikamahine a keia kaukaualii i hoololi ae i kou mau noonoo.  Ma kekahi olelo ana ae ae, ua aloha oe iaia."

"Ke manaoio nei wau, e kuu Hiu maikai, ua hai mai la oe i ka mea oiaio.  Ua aloha i'o no wau i kela opio wahine; a pehea hoi oe i pahaohao ai no ia mea?  Aole anei ona maikai, akahai, a u'i no hoi?"

"Ua oi ae mamua o ka u'i."

"Aole, aole---aole he oi ae mamua o ka u'i."

"He oiaio, e kuu haku; mamuli o ka oi ana o kona u'i ua lilopio aku kou mau naau malaila, a ua alakaiia aku no hoi oe ma kahi o ke kuhihewa nui.  Ke manao nei wau aole oe e aa ana e hoopoino aku i kela kaikamahine ma ka hoohaahaa ana i kona kulana."

"Hoopoino!  E hoohaahaa aku i kona kulana!  E noonoo pono oe i kau mea e olelo mai nei!  Heaha ka manao o kau mau olelo e olelo mai nei?"

"He palaie loa ka manao o ka'u mau olelo," wahi a kona ukali i pane aku ai me ka loli ole ae o kona ano mamuli o ke ano o kona haku.  "Ina ua aloha oe i ua opio wahine la a hoike aku hoi oe ia mea iaia, e aloha mai ana oia ia oe."

(Aole i pau.)

KA MOOLELO KAAO O

LAIEIKAWAI

KA HIWAHIWA O PALIULI, KA WAHINE

O KA LIULA.

MOKUNA I.

Na makua o Laieikawai ~ Ka olelo paa a Kahauokapaka imua o Malaekahana ~ Hapai o Malaekahana ~ Ka hele ana imua o ke Kahuna ~ Hele o Kahauokapaka i ka lawai'a ~ Hanau o Malaekahana, a kapaia iho la o Laieikawai, hanau hou mai la a kapaia kona inoa o Laielohelohe ~ Ka hoi ana mai o Kahauokapaka ~ Ka noho ana o Laieikawai i Waiapuka ~ Ka hiki ana mai o ka Makaula i Oahu mai Kauai mai ~ Hiki ka Makaula i Waiapuka.

I ke kamailio ana i keia kaao, ua oleloia ma Laie, Koolau, kona wahi i hanau ai, a he mau mahoe laua, o Kahauokapaka ka makuakane, o Malaekahana ka makuahine. O Kahauokapaka nae, oia ke Alii nona na okana elua, o Koolauloa a me Koolaupoko, a ia ia ka mana nui maluna o kela mau okana.

I ka manawa i lawe ai o Kahauokapaka ia Malaekahana'i wahine mare nana (hoao) mahope iho o ko laua hoao ana, hai mua o Kahauokapaka i kana olelo paa imua o kana wahine, o laua wale no ma ke kaawale, oiai iloko o ko laua mau minute oluolu, a eia ua olelo paa la:

"E kuu wahine, he nani ia ua mare ae nei kaua, a nolaila, ke hai nei au i kuu olelo paa ia oe; i noho aku auanei kaua, a i loaa ka kaua keiki, a he keikikane, alaila pomaikai kaua, ola na iwi iloko o ko kaua mau la elemakule, a haule aku i ka make, nalo no hoi na wahi huna: na ia keiki e nai na moku e pau ai, ke loaa hoi ia kaua ke keiki mua a he keikikane; aka hoi, ina he kaikamahine ke hanau mua mai, alaila e make, a ina he mau kaikamahine wale no ka kaua ke hanau mai e make no, aia no ke ola a hanau mai a he keikikane, ola na hanau mui i na he mau kaikamahine."

I ka ewalu paha o na makahiki o ko laua noho ana he kane a he wahine, hapai ae la o Malaekahana, a hanau mai la he kaikamahine, ua maikai na helehelena i ka nana aku, a no ka maikai o na helehelena o ua kaikamahine nei, manao iho la ka makuahine o ke kumu la hoi ia e lilo ai ka olelo paa a Kahauokapaka i mea ole, ola la hoi ua kaikamahine nei, aole ka! Ia manawa i hanau ai, aia nae o Kahauokapaka i ka lawai-a me na kanaka.

A hoi mai o Kahauokapaka mai ka lawai-a mai, haiia aku la ua hanau o Malaekahana he kaikamahine. A hiki ke alii i ka hale, ua wahiia ke kaikamahine i ke kapa keiki, kena koke ae la o Kahauokapaka i ka Ilamuku e pepehi.

Ma ia hope iho hapai hou o Malaekahana, a hanau hou mai la he kaikamahine, o keia nae ke kaikamahine oi aku o ka maikai mamua o kela kaikamahine mua, manao iho la e ola la hoi, aole ka! Ike ae la o Kahauokapaka i ke kaikamahine e hiiia mai ana, ua hoaahuia i ke kapa keiki, ia manawa, kena koke ae la ke alii i ka Ilamuku e pepehi.

Mahope mai, ua hapai wale no o Malaekahana, he mau kaikamahine wale no, aole nae i ola iki kekahi oia mau hanau ana o Malaekahana, ua pau wale no i ka pepehiia e like me ka olelo paa a ke alii.

A i ka hapai hou ana o Malaekahana i ke keiki, o ka lima ia, a kokoke i na la hanau, hele aku la kela a imua o ke Kahuna, a olelo aku la, "E! auhea oe? E nana mai oe i keia opu o'u e hapai nei, no ka mea, ua pauaho ae nei hoi i ka pau o na keiki i ka make i ka pakela pepehi a ke kane, aha ae nei a maua keiki, aha no i ka make; nolaila, e nana mai oe i keia opu o'u e hapai nei, ina i ike oe he kaikamahine, e omilomilo ae au, oiai aole i hookanaka ae ke keiki. Aka hoi, ina i ike mai hoi oe i keia opu o'u e hapai nei a he keikikane, aole ana."

Alaila, olelo mai ke Kahuna ia Malaekahana, "O hoi, a kokoke i ko la hanau, alaila, hele mai oe i o'u nei, i nana aku au i keia hapai ana."

A kokoke i na la hanau, i ka malama o Ikuwa, i na la kapu heiau, hoomanao ae la o Malaekahana i ke kauoha a ke Kahuna. Ia ianei e nahunahu ana, hele aku la keia imua o ke Kahuna, me ka olelo aku, "I hele mai nei au ma ke kauoha a ke Kahuna, no ka mea, ke hoomaka mai nei ka nahunahu hanau keiki ana; nolaila, ano oe e nana mai oe i kuu keiki e hapai nei."

Ia Malaekahana me ke Kahuna e kamailio ana no keia mau mea, alaila, hai aku la ke Kahuna i kana olelo ia Malaekahana, "E hailona aku au ia oe, ma ka mea a'u e noi aku ai, e haawi mai oe."

Ia manawa, nonoi aku la ke Kahuna ia Malaekahana e haawi mai i kekahi lima imua o ke alo o ke Kahuna, e like no me ka hailona mau o keia lahui, ma ka lima no nae ana e makemake ai e haawi aku imua o ke Kahuna.

Ia manawa a ke Kahuna i noi aku ai i kekahi lima, haawi mai la o Malaekahana i ka lima hema, me ka hoohuliia o ke alo o ka lima iluna. Alaila, hai aku la ke Kahuna i ka hailona i ku i kana ike, "E hanau hou ana no oe he kaikamahine, no ka mea, ua haawi mai nei oe i kou lima hema ia'u, me ka huli nae o ke alo o ka lima iluna."

A no keia olelo a ke Kahuna, kaumaha loa iho la ka naau o Malaekahana, no ka mea, ua kumakena mau kela i ka pepehi mau a kana kane i na keiki mua; nolaila, noi aku la o Malekahana i ke Kahuna e noonoo mai i mea e pono ai ka wahine, a e ola ai hoi ke keiki.

Alaila, hai aku la ke Kahuna i kana mau olelo ia Malaekahana, "E hoi oe a ka hale, ina e hiki i ka wa e aneane hanau ai, alaila ea, e ono ae oe i ka ohua, me ka olelo aku ia Kahauokapaka, nana ponoi no e lawai-a, o ka i-a ponoi no e loaa ana ma kona lima oia kau i-a e ono ai; no ka mea, he kanaka puni kaalauohua hoi ko kane, i lilo ai kela i ka lawai-a, ike ole ia i kou hanau ana, a ina e hanau ae, alaila, na'u e malama ke keiki, i hoi mai ia ua lilo ia'u ke keiki, a ina e niuau mai, hai aku oe he heiki alualu, alaila pau wale."

A pau ka laua kamailio ana no keia mau mea, hoi aku la o Malaekahana a hiki i ka hale, in manawa, nui loa mai la ka nahunahu ana a aneane e hanau, alaila, hoomanao ae la o Malaekahana i na olelo a ke Kahuna i a'oa'o mai ai iaia.

A i ka mao ana'e o ka eha no ka aneane hanau, olelo aku la o Malaekahana i kana kane, "E Kahauokapaka e! ke kau mai nei i ko'u mau maka ka ohuapalemo; nolaila, e holo aku oe i ke kaalauohua, me he mea'la a loaa mai ka ohuapalemo, alaila hemo kuu keiki, akahi wale no o'u hanau ino ana, a me ka ono o'u i ka ohua; nolaila, e hele koke aku oe me na kanaka i ka lawai'a."

Ia manawa, puka koke aku o Kahauokapaka a hele aku la. Ia lakou e hele ana, hanau ae la ua keiki nei he kaikamahine, a lilo ae la ia Waka ka hanai, a kapa iho la i ka inoa o LAIEIKAWAI. Ia lakou no hoi e lawelawe ana i ke keiki mua, hanau hou mai la he kaikamahine no, a lilo ae la ia Kapukaihaoa, a kapa iho la i ka inoa o ka muli o LAIELOHELOHE.

A lilo na kaikamahine ma ka lima o Waka a me Kapukaihaoa me ke kaawale, hoi mai la o Kahauokapaka mai ka lawai-a mai, ninau iho la i ka wahine, "Pehea oe?"

I mai la ka wahine, "Ua hanau ae nei au he keiki alualu, ua kiolai'aku nei i ka moana."

Ua akaka mua no nae ia Kahauokapaka ka hanau ia lakou i ka moana; no ka mea, elua hekili o ke kui ana, manao ae la no hoi o Kahauokapaka ua hanau ka wahine; mai ka hanau ana o Laieikawai me Laielohelohe, oia ka hoomaka ana o ka hekili e kani iloko o Ikuwa, pela i olelo ia iloko o keia moolelo.

(Aole i pau.)

Ka Poka Nui

ame ka

Poka Iki

He Moolelo no kekahi mau Opio Elua

loko o ke Kaua Kulokoi wawahi

Mana Kauwakuapaa o

Amerika Haipuia

(Unuhiia e S. K. Nawaa.)

MOKUNA XL.

MAI KA HOALOHA A I KA IO HOO-

KAHI.

Ia'u i lohe ai i ko lakou mele ana mai i keia mele, ua huki koke ia aku la ko'u mau noonoo ana i kuu Nu Hemesia aloha, a paialewa loa ia aku la no kuu home aloha, kahi hoi a ko'u luaui makuahine e noho hoomanawanui mai ana o ko'u hoi aku e ike i kona mau helehelena aloha.  he mea oiaio, aole loa wau i ike aku i kona mau maka mai ka wa a'u i hoi aku ai mai ka nohona hoomaha ana me kuu Tome aloha, he ehiku makahiki i kaahope aku, a nolaila ua ala nui mai na hoomanao ana iloko o'u, e huki aku ana hoi ia'u e hoi aku e honi i kona mau papalina aloha.  Iloko oia mau hoomanao ana nona, ua uhi mai la na hoomanao ana ia Kate Makala ame kana honi mahanahana i haawi mai ai ia'u ma kela po a'u i hoopakela ae ai iaia mai na lima kakauha o Nede Kalekona.

"He honi anei kela o ke aloha hoaloha e like me ia i kuniia ai mawaena o Tome ame a'u, a i ole, honi anei e sila ana i ko maua mau puuwai i hookahi?"  oia ka ninau nji e hoholo ana iloko o ko'u puuwai.

He mea oiaio, ua aloha wau iaia, aka nae ua powehiwehi ko'u ike ana i kona manao no'u, oiai aole wau i haha mua aku i ka mea huna e moe lolii ana iloko o kona puuwai.

Ia'u e nalu nei me ka hoholo ana o kela ame keia ano noonoo, ua hoopuiwaia wau i ka hoea ana mai o kuu hoaloha, Konela Hadina, a pane mai la ia'u:

"Well, e kuu Wilimona maikai, apopo e hoi aku ai kakou no Wakinetona.  Aole anei ou noonoo iho e loaa mai ana na hookipa aloha ana ia kakou ia kakou e hiki aku ai?  Aole anei e hiki ae ana na wahine opio a kakou i haalele aku ai, ehiku makahiki i hala ae nei?  O, e wela ana ka hao ke hiki aku kakou ilaila," a ia wa i houhou mai ai kuu hoaloha i ko'u aoao me ka akaaka leo ni ana ae.

"Pela io paha, aka ke kaumaha nei wau no ka nele i ka wahine opio ole nana e hookipa mai ia'u ilaila.  O oe o kaua ka i ponopono, oiai ke ike e la no wau i na hoailona maluna o kou helehelena," wahi a'u i pane aku ai me ka akaaka pu ana ae.

"He kumulaau maloo anei oe, e Wilimona?  Ke manao nei paha hoi wau ua pau loa la hoi kakou he poe kumulaau uliuli wale no, eia ka hoi aole.  Well, mai nana oe ia mea e Wilimona, i kou wa e hiki aku ai ilaila a ia oe a hoea aku i ke alapii, e wae koke ia mai ana oe e na wahine opio, a e nui ana lokou a nau e haalele, oiai e kau mai ana ko lakou mau maka mamua o kou mau pilali o ke kulana konela."

"Konela!  Heaha ka manao o kau mau olelo, e kuu Hadina maikai?" wahi a'u i ninau koke aku ai me ke pahaohao.  "Aole he pono i elua konela iloko o ka mahele hookahi; hoi iho no hoi, ua pau ke kaua, heaha ka waiwai o keia hookiekie ia ana ae ma kekahi anuu hou ae."

"E ike ana oe i keia ahiahi," wahi a Hadina i pane mai ai me kona mino aka ana mai, a huli ae la oia a hele aku la.

Ua noho iho la wau e noonoo nui i keia mau lohe a Hadina i lawe mai ai, a hoao ae la e hoohuihui, aole no nae he wahi mohala mai o ko'u noonoo.  Ia ahiahi ua heluheluia mai la na poe i hookiekiea, a iwaena oia poe ua lohe aku la wau i ka puana ia ana mai o ko'u inoa, e hoike ana hoi ua pololei ka'u mea i lohe ai mai kuu hoaloha mai.  Ua loaa pu mai la no hoi ia'u ka ike i ke kumu o keia mau hookiekie i hana ia, oia no ka lele ana aku o ko makou generala aloha, Lukanela-Generala Filitia ma ke kulana generala, a o kuu konela aloha, Konela Hadina, ma ko Filitia makalua, a ua paniia aku hoi wau ma kona makalua.  O kuu Denisa aloha, ua pii ae la oia ma ke kulana kapena, a kaa aku la malalo o kona alakai ana ko makou puali i komo like ai i ke kaua.  Ma keia hoonohonoho hou i loaa mai ia makou, ua piha pono iho la ko makou mahele, aka nae he mea kaumaha no ka noonoo ana ae no ko makou poe e hiamoe la ma na wahi a makou i paio aku ai, oiai ina aole i lilo aku ko lakou mau ola, aole no e kaa mai ana maluna o makou keia mau haawina hanohano, oiai o lakou ko makou mau mua ae, a no lakou hoi keia mau hanohano a makou e hooioi nei.

I ke kakahiaka nui o kekahi la ae, ua hiki mai la ka Mahele Umi-kumamalua no ka lawe ana ae i ko makou wahi, a ia wa i liuliu ae ai makou no ka hoi ana aku.  Ia makou i kau ai iluna o na kaa e holo ana no ke kahua ku moku, he wa ia o na olelo hookaau i loha nui ia ai, a iwaena oia mau olelo i puana ia aku ai na huaolelo o ke aloha i ko makou mau hoa e noho la ihope, a loaa mai la no hoi na panai ana, ame na leo huro o ka hauoli, iloko o na minute pokole, aia makou ke lawe ia la e ka mana o ka mahu, a no ke kahua hooluolu moku ka pahu hopu.

I kekahi la ae, i ka la e aui ae ana mai ka lolo ae, aia makou ke hookomo la i Wakinetona, a iloko o elua hora mahope mai, aia makou ke maki la no ko makou wahi i hookaawaleia ai ma ka hale koa.  Ia makou e hoopili ana i ka uwapo, ua lohe aku la makou i ke kani mai o ka bana a ia manawa hookahi no hoi, aia ka aha kanaka i akoakoa mai ke huro la me ka leo nui, e owiliwili ana i ko lakou mau papale ame na hainaka, a iwaena oia mau haawina hauoli e paholaia mai ana no makou, ua lohe pu aku la makou inoa kapakapa i haawiia mai ai e Generala warena,---"Ka Puuwai Liona o Nu Ioka."  I ka poha ana mai o keia inoa i ko makou mau kumu pepeiao, oia no ka manawa i olowalu like ae ai na leo