Ka Nupepa Kuokoa, Volume XLI, Number 25, 19 Iune 1903 — Page 6
| This text was transcribed by: | Shari Fukuyama |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
EONO NUPEPA KUOKOA, IUNE 19, 1903.
WAENA o na Inikini ua ikei a he kanaka keia ame keia i piha koko ame ka ikaika. He kana ka oia nona ke kulana ikaika, oia maikai, he haawina hoi i loaa iaia aole mai ke ano oia ana o na haole. Heaha ia ka mea huna iloko o keia haawina kookela a na Inikini i loaa ole ia kakou? Eia, Laau Inikini Kipapu Sagawa (Kickapoo Indian Sagawa). Iwaena o na Inikini mamuli o ko lakou maa o ka hele nahele ua kamaaina loa ka laa u Sagawa he hoola no lakou iloko o ka wa nawaliwali; peia i imila ai a loaa mailoko mai o na aa, ililaau ame kekahi mau ano e ae pili i na mea ulu; ua ikeia ka mana hoola o ka
Kikapu Sagawa
Mamuli o keia laau i loaa ai i na Inikini ka ikaika o ko lakou kino. Ma ka inu mau ana i ua laau la i maemae amau ai ko lakou koko. He ikaika ko ianei i ka hooponopono no hou ana i na wahi poion o ke kino a hoi hou e like me mamua. Aohe loaa o na Inikini i ka ma'i nahu; a ke make, aole no ke akepau mai ke kumu. O kona akemama ua like me ka upomakani o ke kanaka amaia ma ka hoohalike ana ae i ka piha i ka makani. Aole no hoi ona loaa i na ma'i puupaa oiai oia nei ka mea nana e pale aku ia mau ino a haawi mai i ka ikaika. E hoao i ike pono. E hoihila aku no kou lilo ke loaa ole ae oia ma ka hoohana pololei ana. E loaa no ka Laau Kikapu ke hele ae i ka poe kuai laau apau; a he emi no hoi ke kumukuai.
HOBRON DRUG CO., na Agena
24 Keneta no ka Omole Hookahi a e Loaa no ma na Halekuai Laau Apau.
KUAIIA E HOBRON DRUG CO. HONOLULU, T. H.
Na Hale Kau Kanawai
(Mai ka Aoao Ekahi mai.)
Ua hoao ae kekahi poe e mahelehele aka aole i lanakila no ka mea, ua kanaeia ua itamu ia mamuli o ke noi a Beckley e kapae.
Mahope o ka pau ana o keia hana ua hooku ke komike a ua hoopanee no hoi ka Hale a noho i ka Poalima.
HALE O NA LUNAMAKAAINANA.
Iune 12.--Mai ka Papa Oihana Kalepa mai i kana olelo hooholo e pili ana i ka Papa Ola ame ko na hana hou no ka hoonui ae a malama mau hoi i ka maemae o na uwapo loaila e pono e hooholoia mai e ka Ahaolelo i itamu no ia hana no ke kokua ana i ka Papa Ola no ka mea oia ke keena aupuni i komo aku iloko o ia ano hana o ka ma@ma i ka maemae.
Ma keia manawa ua noho koke ae ia ka Hale ma ke ano komike holookoa a noonoo hou i ka bila aie. Ua hoala hou mai ia o Beckley i ka noonoo ana i ka itamu oihana koa no ka mea wahi ana ua hoikeia aku iaia he mae pono loa e loaa ia Wailuku he puali koa. Nolaila ua noonooia ae he itamu no keia oihana a ua hookomoia he $20,000 no Honolulu, $5,000 no Wailuku a he $5,000 no Hilo, Mawaho ae o keia he $3,000 no ka uwapo o Kawaihae.
Na Paele he noi e noonooia ke kuai ana i ka apana o ke kukui uwila a no ka maopopo ole i ka Hale o ka mea e hana ai ua waihola ka hana i ke komike kuikawa.
Na Pulaa e hapai hou ia mai ka noonoo itamu o ka uwapo o Kawaihae no ka mea, wahi ana ua makemake oia e hoopii hou ae i kona haawina malalo o na kumu kupono. Ma ka noonoo ana i ke kumuhana ua hooholoia he $3,500, oia hoi he $500 ka oi ae.
Mahope iho o ke kamilio ana no ka ninau e pili ana i ka haawina dala no ka mahele kalana e hoihoi no ka Teritori.
Ma ka ninau a Harris ua lilo ia i mea pohihihi a hookuuia no hoi ke komike a hoomaha no hoi ka Hale mahope iho no nae o ke kohoia ana o ke komike kuikawa no ke kumuhana kuai a o ka apana kukui uwila.
Ma ka manawa i noho hou ae ai ka Hale ua makaukau he eono komike me ka lakou mau hoike pili i na haawina o ka bila ukuhana o eono mahina. Ua noho ae la ka Hale ma ke ano komike holookoa, a noonoo i ka bila ukuhana o eono mahina.
O ke komike mua oia ka hoike komike pili i ke keena Hooia no na ukuhana o na kakauolelo o ia keena, a ua apono ia ka hoike komike a hookomoia ka itamu iloko o ka bila.
Hoike homike maluna o ka lunanana i'a ame kona hope. Oiai o ka hoike a ka hapanui wale no ka i waihola mai nolaila ua waihoia ka hoike hapanui ma ka papa a waihola mai ka hoike hapauuku.
O ka hoike komike o ka Hale Pupule no na ukuhana o na luna o ia keena hana a ua aponoia ka hoike komike e ka Hale. Hoike komike no ka luna agena hoopae limahana. E hoapono ana ka ke komike ia kumuhana ma ka itamu o $900 no ke Komikina a Agena Hoolaha. Na Harris he wehewehe piha ka manao maoli o keia kumuhana.
Mai keia manawa ua ku mai o Beckley a wehewehe i kona manao maluna o keia kumuhana. He manao e kue ana i ke kumuhana. Ma keia manawa ua nui ka poe i wehewehe manao maluna o keia itamu a ma ke noi e kapaeia ke itamu ua hooholoia e like me ke noi mamuli o 17 ae kue ia 9 hoole.
Ma keia manawa ua hookuu ke komike Hale a hookomoia mai ka leka a ke Kakaaulelo Carter e hoike manana i ke kakauinoa o ke Kiaaina i ka bila haawina o ke pa'i ana i ka moolelo o ka Hale. Waihoia mai he kono i ka Hale e hele e nanan paikau o na koa e hoomoana ana i Waikikikai, ua apoia mai me ka lokahi. A na ka poe kinipopo i panai mai he kono no ka hoau ana i ka pa kinipopo hou i ka manawa hookuku paani kini popo. Ua apo lokahi ia ke kono.
Mahope iho o ka haawi kauoha ana i na komike pili i ka bila Hale helu 3 ua hoopaneeia ka Hale a noho hou i ka Poakahi.
ILOKO O KA SENATE.
Iune 12.--Ma ka manawa i hiki mai no ka malama ana i ka Aha Senate aole i lawa na hoa no ka malama ana i ka hana, nolaila ua hoolaha ae ka Peresidena e noho ka Aha i ka hora @ e ia auwina la. I ka manawa i noho ae ai ka Aha aole he wahi mea ano mai no ka hana aku a mahope o ka pule a ke kahunapule. @@ra ua hoo@@@@@ ka Aha.
HALE O NA LUNAMAKAAINANA.
Iune 15.--Mai Kalaupapa mai he leka e haawi mai ana i nahoomaikai i ka Ahaolelo no na kokua i panaila aku no lakou no ka hoomanao ana i ia o Kamehameha.
Hoike komike aina aupuni a Kalama no ka huina o $20,000 no ke alanui o Kailua a hiki i ka manawa e noonoo ia ai ka bila aie.
Hoike komike kuikawa maluna o ke kumuhana kuai i ka apana o ka hui kukui uwila. Ua kakoo ke komike e kuai i ka aina nona ka huina eka o aneane 23. waihoia a noonooia me ka bila aie.
Hoike mai ka papa ukuhama o ka oihana makai o ka mokupuni o Oahu. Ma keia manawa ua noho ae la ka Hale ma ke ano komike holookoa a noonoo i ka bila Hale helu 2. Ua hapai koke ia mai la ka noonoo ana i ka leka a ka Papa Oihana Kalepa a ma ka noonoo ana ua hoopanee loa ia kona noonoo ana ma ke koho ana a keia poe malalo o ka ninau e kapae:
Na ae--Damien, Fernandez, Haia, Kaili, Kalama, Kaniho, Kalawaa, Kou, Kumalae, Kupihea, Nakaleka, Oili, Paele pali, Pulaa, Purdy ame Beckley.
Na hoole--Chillingworth, Gandali, Greenwell, Harris, Keliinoi, Knudsen, Lewis, Long, Vida ame Wright.
Hapalia mai ka noonoo ana i ka itamu no ke kuai ana i ka apana o ke kukui uwila a hooholoia e like me ia i hooponoponoia mahope iho no nae o ke kamailio nui ana.
Na ko Maui he hoike no na haawina o ia kalana a ma ke noi a Aylett ua waihoia ka noonoo ana a waihoia mai hoike o na kalana e ae. Hookuu ke komike hoomaha no hoi ka Hale.
Ma ka manawa i noho hou ae ai ka Hale ua hapalia mai ka bila Senate helu 2 oia ka bila ukuhana o eono mahina. Na Gandall he hoike komike hoonaauao o ma ka noonoo ana ua aponoia ka huina o $162,500, e like me ia iloko o ka bila.
Hoike komike maluna o na ukuhana o ke Keena Mahiai a ma ka noonoo ana ame ka hooponopono ana ua hooholoia he $6,000. Hoike kom@ @una o na ukuhana o ke keena kinaiahi a ma ka noonoo he #32580.
Hoike komike maluna o na ukuhana o na lunanana o ka Papa Ola a hooholoia he $7,200 no ko Honolulu nei, a he $1,440 wale no. hoike komike no na ukuhana o ka oihana makai o Hawaii a aponoia ka hoike komike. Hawaii a a ponoia ka hoike komike. Make noi a Vida ua noonoo hou ia ko ka oihana makai o Oahu a hooholoia e like me na hooponopono. Noonooia ka itamu o ko Kalaupapa a hooholoia e like me na hooponopono.
Ma keia manawa ua waihoia mai ka hoike pili i na kauka aupuni a maluna o keia kumuhana i kamailio ai ka Hale a hiki i ka manwa i hookuu ai ke komike holookoa oiai maloko o ke komike Hale ka noonooia ana o keia mau kumuhana. Hookuu ke komike a hoopanee no hoi ka Hale a noho hou.
ILOKO O KA SENATE.
Iune 15.--Ma keia la hana ua heluheluia na moolelo o ekolu ia hana i hala. Mai ke Kakakuolelo Carter mai he leka e hoike mai ana i ke kakauinoa o ke Kiaaina i ka bila haawina no ke pa'i ana i ka moolelo o ka Hale o na Lunamakaainana.
He leka na ke Keena Loio Kuhina mai e pane mai ana i ka leka a ka Senate i ui aku ai pili i ka loihi o ka mana e noho ai keia kau. Ua hoike mai la ke Kokua Loio Kuhina Mr. Weaver ua hiki ke noho ke kau iloko o kanaono la e like me ka manao o ke Kanawai Panalaau.
Na ka Hale mai o na Lunamakaainana he leka e hoike mai ana i ka hooholoia i ka la 6 o Iune ka bila haawina Senate helu 11 pili i na haawina dala o ke keena auhau.
He leka na ka Mekia o ka Puali Kumau o Amerika Huipuia e noho mai nei i Waikikikai e kono ana i na hoa senatoa no ka hele ana i ka nana @@ikau o na koa i hoomoana i Waikikikai. Ua hala hope loa keia kono, no ka mea, aole i noho ka Senate iloko o ka manawa kupono e hiki ai ke hookoia ua kono ia aka ua hooikaika no ka Peresidena e hoike i na hoa a he ekolu o lakou i hiki i kahi o ka hana a ua piha hauoli loa lakou.
Na ka Peresidena no i hoike mai, i na kikiki i haawila mai no ka hoau ana e ka pa kinipopo hou ka Poaono. O na olelo hooholo a ka Papa Oihana Kalepa i waihoia aku iloko o ka Senate ua waihoia iloko o na komike--o ke olelo hooholo e pili ana i na uwapo ua waihoia i ke komike aina aupuni, a o ka olelo hooholo no ka malama oia ua waihoia i ke komike Papa Oia.
Mai Kalaupapa mai he leka e hoike mai ana i na hoomaikai i panaiia mai e kolaila poe no na kokua a ka Ahaolelo i panai aku ai no na hana hoomanao o ka la o Kamehameha.
No ka loaa ole mai he hana na ka Senate mai ka Hale mai o na Lunamakaainana mai ua hoopaneeia ka Aha a noho hou.
HALE O NA LUNAMAKAAINANA.
Iune 16.--Mahope o ka pau ana o na hana kumau ame ka ninau a ka Lunahoomalu pili ia Jaeger ua waihoia mai ka hoike komike no ke pa'i ana i ka bila Senate helu 9 e hoike mai ana ua makaukau no ka puunaue ana i na kope i pa'ila.
Ma keia manawa ua noho ae ia ka Hale ma ke ano komike holookoa a noonoo maluna o ka bila Senate helu 2. Hoike mai ke Kalana Hawaii Hikina a ma ka noonoo ana ua noi ae o Aylett e waiho ma ka papa a loheia na hoike kalana e ae. Ma ke koho ana ua kaulike na koho ana a ma ka ana ua kaulike na koho ana a ma ka aoao o ka lunahoomalu o ke komike holooka hoike komike a loheia mai kekahi mau hoike e ae.
Ma keia manawa ua waihoia mai ka hoike komike o ke Kalana o Hawaii Komohana a waihoia no ma ka papa a hiki i ka manawa e pau pono mai ai na hoike o ia ano hookahi.
No ka hala ana o Knudsen ka mea iaia ka hoike o ke Kalana o Kauai ua hookuuia ke komike Hale a hoomaha no hoi ka Hale. Aka i ka manawa i noho hou ae ai ka Hale ua hapai koke ia mai ka hoike o Kauai.
Hoike komike o ke Kalana o Oahu a mahope iho o ke kuu ana iho ua hoohalahala koke mai ia o Kupihea aka aole i lanakila kana no ka mea ua waihoia ua hoike la ma ka papa no ka noonooia aku me na hoike kalana e ae.
Na Harris he itamu o $20,000 no ka hale paahao o Oahu ma ke ano he hoolilo Teritori aole ma ke ano kalana, a mahope o ke kamailio nui ana no ka mea, ua hoike ae kekahi poe he hoolilo aupuni kalana ia a ma ke koho ana i maopopo ai he hoolilo Teritori ia ma ke koho ana o 13 kaoo teritori kue ia 12 hoole.
Ma keia manawa ua noonooia na hoike komike kalana a o ko Hawaii Hikina ka i aponoia he $223,000; pela no hoi ko Hawaii Komohana he $87,294.88; ko Maui, he $184,600; ko Kauai, he $143,900.
Ma ka manawa i noonooia ai ka hoike o ke Kalana o Oahu ua ku koke mai la o Beckley a hoohalahala mamuli o ka itamu o ke ana ana i ke alanui Kula a maluna o keia kumuhana ka nui kamailio ana, aka, i ka hiki ana mai i ka panina, ua aponoia ka hoike e like no me kona mau mua iho.
I ka manwa i hiki mai ai i ka pauku 6 us hookomo mai ia o Kumalae, e haawiia ka aelike i ke kanaka nana ke koho haahaa loa me ka hoopaa mai i bona maikai a lawa kupono.
Ma keia manawa ua maikai ka piha pno o ka bila aka no aneane e uhi mai ka po ua hoopanee ka Hale a noho hou no ka hooholo loa aku i ua bila nei.
ILOKO O KA SENATE.
Iune 16.--He elua bila hou i hookomoia iloko o ka Senate. Ua haawila mai ia Isenberg he manawa hou no kana komike no ka noonoo hou ana i ka bila a Dickey pili i ka hooemi ana i ka papa o na luna aupuni.
Na C. Brown i hookomo mai k kela mau bila hou elua e hoike ana:--He bila e pakui ana i ke kanawai I o na kanawai o ke kau kuikawa o ka Ahaolelo o ka makahiki 1903. E hookupono ana ka bila hou i ka manawa e hiki aku ai i Dekemaba 31 o keia makahiki no ka bila haawina o na pilikia kuikawa.
O kekahi he kanawai e hookaawale ana i dala no ka uku ana i na hoolilo o ka Luna Hooia o ka Teritori o Hawaii, no kona hoolako aku i na luna aupuni kalana me na palapala pa'i hakahaka ame na buke pa'i hakahaka e like me ke kauoha a ka pauku 505 o ke kanawai 31 o ke kau mau. He $12,500 ka nui o ka huina no na lilo.
Aole i liuliu ka noho ana o ka Aha o ka hoopanee no ia a noho hou.
Haule i ke Kai a Nalowale loa.
I keia huli hoi ana aku nei a ka mokukaua Amerika Yorktown mai Honolulu aku nei no Kapalakiko, ua nalowale honua kekahi o kona mau kanaka oiai oia ma ka moana, a ua manaoia, ua haule oia iloko o ke kai me ka ike ole ia.
He elua a ekolu paha ia mamua o kona ku ana aku i Kapalakiko, ua heluia ka nui o na kanaka; a malaila i ikeia iho ai ua nalowale kekahi mea, a aohe mea o luna o ka moku e hiki ke ha'i mai i ke ano o keia nalo wale kupaianaha ana.
Ua manao wale ia, ua haule oia i ka po iaia e ku ana paha ma ka aoao o ka moku.
Aohe he wa a Piiia e ke Kaa
KOKOKE LOA O LUNAALAHAO ELLIOTT E HINA MALALO PONO O NA HUILA O KA ENEKINI.
UA OLOKAA AKU OIA MAI LUNA AKU O KE ALAHAO I KA WA KUPONO NO KA HOOPAKELE ANA IAIA IHO.
Ia Lunaaiahao J. T. Elliott i kiloi aku ai i kekahi kuiki maloko o kahi hoolulu kaaahi o ke alahao Peneselevenia, a e hele ana hoi maluna o ke alahao a kekahi enekini e holo mai ana, ua ikeia aku kona hina ana iho ilalo me ka hikiwawe. Ua kokoke loa oia e pilia e na huila mua o ka enekini, eia nae, ma ke ulia wale no o ka laki, ua olokaa aku la oia mai luna aku o ke alahao a waiho ana ma kekahi aoao. Aole oia i eha.
"Mahope mai," wahi ana i kamailio aku ai i kekahi mea kakau nupepa, "ua manao iho la au e hoopau i ka hana ana. O ke kumu o ko'u hina ana a kokoke loa ai e poino ko'u ola, oia no ko'u loaa ana i kekahi ano ma'i huki, a he manawa wale no epii mai ai keia ano ma'i. Ua hoomaka mai keia ma'i ma ka eha ana mai o na oloolo wawae, a i ka nana ana a ko'u kauka, ua olelo mai oia he rumatika o na io huki ke ano o keia ma'i. no kekahi manawa ko'u lawe ana i ka laau me ka loaa ole o ka pono. Mau no ka eha a ua emi iho la wau aohe i like ko'u ano laiwale e like me na la i hala, a aohe hoi he hiki ke pii iluna o ke kaa me ka hikiwawe. I ko'u pakele ana mai ka ulia mai maloko o kahi hoolulu kaaahi, ua haalele wau i ka hana ana.
"I keia manawa, ua kaa wau malalo o ka lawelawe ana a kekahi kauka okoa, a ua olelo mai oia he locomotor ataxia ko'u ma'i, a ma kana lawelawe ana ua hele loa iho la wau i ke ino. Ua hoomaka mai la e pii mai ka luai, a i kekahi loaa ana o'u, he umikumamaono la i noho ai me ka paa ole aku o kekahi wahi mea ai iloko o ko'u opu. Ua wiwi wau e like me ka iwi kanaka a nawaliwali no hoi. Mahope mai, ua nanaia wau e ekolu kauka mai Pitibuga mai, a ua olelo ae lakou he ma'i ola ole ko'u. ua pii nui ae la no hoi ka eha o ko'u kino ame na wawae, a no ka nui ino o ka eha i kekahi manawa, ua lawe wau i ka mofine i mea e nalowale iki aku ai ka eha a loaa hoi kahi hiamoe. Mahope iki mai, nui loa mai ana a hiki ole ke hele no ka haalulu o na wawae.
I kekahi la ua hoouna mai la kekahi o ko'u mau hoaloha i kekahi wahi apana nupepa e olelo ana i ka hoolaia o ka ma'i locomotor ataxia e ka Huaale Akala a Kauka Williams no ka Poe Haikea. Ua lawe koke wau i keia laau. Ua oluolu wau i na kuhikuhi apau, a ua hoomaka koe mai ko'u maikai. He manawa no i hala mamua o ko'u ola loa ana, eia nae, i ko'u ola ana ae, aole wau i loaa hou, a i keia manawa, ua like wau me kekahi kanaka hou. Ua hiki ia'u ke hele ma ka'u wahi e makemake ai me ka hiki ole mai o na ulia poino i loaa ia'u mamua aku. Aole loa wau i loaa i kekahi eha a luai hoi mai ko'u wa i oluolu ae ai mai keia ma'i ae."
He umikumamaha makahiki ko Mr. Elliott hana ana me ka hui alahao Peneselevenia ma na kulana kanaka hoopaapeleki, mea ohi kikiki, a mahope mai, lilo i lunaalahao. Aia oia ke noho nei ma Helu 5818, Parker Street, Pittsburg, Pa., a ua makaukau oia e hoapono mai ina mea i oleloia ae nei maluna.
E loaa no ka Hualle Akala a Kauka Williams no ka Poa Haikea ma na halekuai laau lapaau apau, a i ole, mai a Dr. Williams Medicine Company Schenectady, N. Y., he 50 keneta ko ke poho; eono poho no $2.50, me ka ukuia o ka lilo leta.
E Ulele Kuikui Puupuu Houana.
Ma ka auwina la Poalua o ka pule i hala iho nei, ua hoolaha ae o Cohen, ka lunanui o ka Opiuma, ua hooponoponia kekahi hui hakaka ana mawaena o Billy Woods ame Millet, a ma ka la 4 o Iulai e hui ai laua ma ke kahua mokomoko. He umikumamalima puni ka mea i aelike ia, a he $1,200 ka makana.
Ma ia auwina la hookahi no, ua hoolaha ae o Larry Dee, ka lunahooponopono o Jack Weday, e ae no o Jack Weday e hakaka me Joe Millet ina e hoemila mai ko Millet mau paona i ka 160, o Weday hoi he 158, a mamua o ko laua hakaka ana, e kaupaonaia la@a ma ka aoao o ka lima mamua koke iho o ko laua hakaka ana. He 165 paona ko Millet kaumaha i keia manawa, a he 5 paona wale no ana e kiloi ai. He umi puni ka mea i makemakeia me la hakaka ana, a e kohoia ka mea nana e nana ka hakaka i ka po e hakaka ai.
KE KULANA MA SEREVIA.
GENEVA, Suizulani, Iune 15.--Ua haawila mai ka lohe ia Keikialii Petero Garageorgevitch i kona kohola ana i moi no ke Kalaunu o Serevia a ua haawi koke aku oia i kona ae. Ke hoomakaukauia nei kana huakai no Serevia.
Na kauka Huki Niho Noeau,
hana pololei a hiki i keia manawa, a he haahaa ka auhau o ka huki ana. O ko laua no hoi ke keena kauka huki niho nui hookahi iloko o ka Paeaina Hawaii nei, a lawa pono no hoi me na lako oihana o ke ano hou loa a maikai no hoi.
He hukiia kou niho me ka eha ole a iloko no hoi o ka lawelawe noeau a maiau ana no hoi e hanaia ai, a o ia no hoi ka makou e ake nei. Aohe auhau no ka nana ana. He wahine Hawaii ke kokua iloko o ke keena hana.
Keena hana ma Arlington Block, Helu 215, Alanui Hotele, ma o aku o Alanui Union.
Ke Aloha Makua o ke Keiki.
No ka pupule i kau aku maluna o Miss Mabel Roberts he kaikamahine no ka make o kona makuakane ua laweia ae ia oia e ka Luna Paahao o Kawa Mr. Henry malalo o kana malama ana. I ka Poaha nei ka loaa ana aku o keia kaikamahine oia wale no iloko o ka hale.
Aia kahi noho o keia ohana kokoke i Kawa iloko o kekahi hale nona ke kiekie o elua hale. He elua makahiki i hala aku nei ua make iho la o Roberts ka makuakane, a koe iho la i keia ao ua wahi kaikamahine nei ame ka makuahine. He luna ka hana a keia kanaka iloko o ka hale hana mikini o ka hui alahao o Oahu. Ua waiho iho keia kanaka he waiwai nona ka huina ma ke dala mawaena o $7,000 ame $8,000.
Mamua aku o ka make ana o Mr. Roberts oia hoi e ola ana no, ua ikeia he maikamahine ano naauao oia no kona mau makahiki umikumamakahi wale no, aka, i ka manawa i hala ai ka makuakane a mahope mai ua ikeia ka emi hikiwawe mai o ke ola kino o ka kamaiki.
I ka Poaha nei ua loaa aku la ke kaikamahine oia wale no oiai ua hele kona makuahine. Ua loaa aku oia iloko o ke kulana ku i ke aloha--aohe ai o kekahi ano, a ua uliuli maoli kona mau maka. Ua oleloia o ka manao o ke Aupuni e nana pono ia keia kaikamahine, a ina ua pupule io oia alaila e hoihoi ia oia i ka hale pupule.
Na Kaa Uwila i ka La 11 iho nei
E like me ka mea i hoike mua ia aku no ka malama ia o na hana heihei lio iwaho o Kapiolani Paka peia i piha ku'i aku ai ka paka me na keonimana ame na lede, a he nani hoi kau i ka nui ohohia.
Iloko no o keia la, o na kaa uwila o ka Hui Kaa Uwila o Honolulu nei kekahi i komo aku iloko o na hana o ia la a o ka lakou mau hana oia no ka halihali ana i ua mau makaikai lealea nei o ka papka, a o ka huina nui o na kanaka i kau aku maluna o lakou ua hiki aku ma kahi o 28000.
He mau haneri ka oi ae o keia heluna loaa o keia la kulaia i ko na heluna kiekie o na wa i hala, a o na loaa no keia la aia ma kahi o $1,360.
O ka mea i oi loa o ka maikai oia ka loaa ole o kekahi ulia poino ma ia la kulaia o ka Na'i Aupuni o Hawaii Paeaina maluna o keia mau kaa, koe walo he wahi luahine ua kuwala aku oia mai kona wahi e noho ana iluna o ke kaa i ka manawa i ku ai ke kaa. Ua haule aku oia i lalo i ka honua aole nae i eha nui loa. O ke kumu o keia ua nanea loa paha oia i ka holo a ke kaa uwila ke kumu o kona hiamoe ana a loaa ai iaia ia wahi ulia.
Ke Hanuna mai nei Kaleo Aloha
Mrs. Jas. H. S. Kaleo, Honolulu, Aloha:
Ke hauoli nei wau i ka hoike aku ia oe no na mea i hanaia, a i kulike ai hoi me na mea i hooholoia, no ka malama ana i ke kaihuakai o na Kula Sabati o Maui Hikina (Puali Inu Wai) ma ka ia 11 o Iune 1903.
Ua hala aku la ka la 11 o Iune me kona mau hiohiona nani a hauoli hoi, he nani na hana. O ka huina o na haumana i komo mai ma keia huakai, he kanawalukumamahiku, aole hoi i hui pu mai ma keia hana maikai ke Kula Sabati o Kipahulu.
Ua hokoakoaia na haumana kula Sabati apau i hiki mai keia ame keia Kula Sabati mai ma Hooululahui a e ike ia ana hoi lakou ma ka welo ana o na hae like ole, i hoomakaukau ia e keia me keia Kula Sabati.
Ua hoomaka ke kai ana o ka huakai mai Hooululahui aku, a i ka hiki ana mawaho o Hana Saloon, a ua ku iho la ka huakai no ka hoolohe ana i ka haiolelo a D. W. Kawahamae, alaila, ua nee hou ka huakai a hiki mawaho o Hana Store, ua hoomaha iho la ka huakai no ka inu wai momona ana.
I ka pau ana o ka inuwai momona ana ua nee hou aku la ka huakai no ka luakini. Ua hoomaka na hana hoike kula Sabati i ka hora 11:30 a. m. a pau i ka hora 1:30 p. m. alaila, ka olelo paipai mai ia Rev. J. Kalino mai, a hookuu na hana no ka paina ana.
Ea, he ui maoli no a he eehia pu hoi na hana i hanaia, he nani na hae a he lilelile hoi na aahu keokeo i aahu ia, a o na Kepani i maalo ae ma ke alanui, e wehe ana lakou i na papale me ke kunou ana, a o kekahi poe hoi, ua haawi mai i na makana.
Nui na makaikai i hiki mai e ike i na hana, ua hele a piha pono ka luakini aole noho kaawale. He la nui keia a he pomaikai ina e loaa hou ana. Ua ninau ia mai au i la hou, ua pane aku wau aia a hoi mai oe. O ka huina o na dala i loaa mai ka Aha Mele ame na Kula Sabati, he Hookahi Haneri dala a oi.
Ua hoau ia na kukui hou, he ui maoli no, a ua ano e hou ae ka luakini o kakou. Ua hai aku au i kou aloha ia lakou, a ua hopu mai lakou me ke aloha pumehana.
Me ka mahalo,
J. K. HANUNA, Hana Iune 12, 1903.
Me ka hauoli wau e panai aku nei i kau o ka la 12 o Iune M. H. 1903, me ka lana o kuu manao e loaa hou ana no ia kakou he la hauoli hou no na Kula Sabati o Maui Hikina e like iho la me ia a oukou i hana iho la, ke hooloihila mai ko kakou mau la. Ua piha wau i ka hauoli i ka lohe ana mai mai ia oe mai no na mea i hanaia. Ke haawi aku nei wau i ko'u hoomaikai i na poe apau i akoakoa ae no ka hooko ana i ka hana i waihoia mai iloko o ko kakou mau lima e hana, a iloko o Kona lima e loaa ai ka pomaikai ame ka malu.
Me ka mahalo,
JAS. H. S. KALEO, Honolulu, Iune 15, 1903.
TOPEKA, Iune 10.--E kaheaia ana i Kau Ahaolelo Kuikawa ma keia la no ka haawi kokua ana i ka poe i pilikia i ka waikahe.
MA KE KAUOHA
NA NOTARI O KA LEHULEHU
O na Palapala Komikina @ na Notari a Luna Hooialo Palapala no lakou na inoa malalo iho nei, no na Apana Hookolokolo Kaapuni Elua, Ekolu ame Eha o ka Teritori o Hawaii, ma keia ke hoopau loa ia nei a holoi loa ia lakou, a o ka lakou mau buke moolelo ma keia oihana e waiho mai i ke Kakauolelo o ka Aha Hookolokolo Kaapuni o na Apana Kaapuni a lakou pekahi e noho nei:
APANA KAAPUNI ELUA:
Aukai, D. H.
Haia, W. P.
Kunukai, Geo. H.
Kaleihuia, W. K.
Nishwitz, Joseph H.
Zumwait, J. L. W.
Bailey, E. H.
Kahokuoluna, P. H.
Kaiwiaea, B. K.
Mossman, W. F.
Nakaleka, Joel
APANA KAAPUNI EKOLU:
Haanio Jr., Samuel
Hart, E. H.
Lazaro, S.
Pulaa, Chas. H.
Wilder, G. K.
Heydtmann, A. W.
Holstein, E. H.
Lenhart, J. C.
Vreadenburg, Wilmot
APANA KAAPUNI EHA:
Estep, E. W.
Jakina, Geo. V.
Le Blonds, Chas, M.
Porter, D.
Richkard, W. J.
Wilder, G. K.
Washburn, F. M.
Hitchcock, Chas. H. W.
Kamakawiwoole, C. M.
Malterre, Leon
Paakiki, Z.
Winter, F. L.
Wakefield, F. M.
LORRIN ANDREWS, Loio Kuhina Teritori o Hawaii, Keena Loio Kuhina, Iune 8, 1903.
2966--Iune 5, 12, 19.
HOOLAHA HUI I HOOHUILA.
TERITORI O HAWAII, KEENA O KA PUUKU, HONOLULU, OAHU, MA KA HANA O KA HOOPAU LOA ANA I KA JUDD & COMPANY, LIMITED, (KAUPALENAIA.)
Oiai ka Judd & Company, Limited, he hui i hoohuila a i ku malalo ame ka malu o na kanawai o ka Teritori o Hawaii, mamuli o ua Kanawai la, a e like me ia i hoikeia malaila, ua waihoia mai ma keia keena he Palapala noi e hoopauia ua hui ia, me ka Palapala Hoola i hoopili pu ia i kulike ai me ke Kanawai.
Nolaila, Ma keia ke hoolahaia aku nei i ka mea a i ka poe apau i kuleana a e kuleana nei ma na ano apau iloko o ua hui la i oleloia e waiho mai i na kumu kue i ka aeia o ua noi la i oleloia ma keia keena ma kaia a mamua ae paha o ka hora 9 a. m. o ka la umikumamalima (15) o Iulai, A. D. 1903, a o keia mae keia mea e makemake ana e loheia ma ia hana e hele kino ae ma ke keena oihana o ka mea nona ka inoa malalo iho ma ka Hale Mana Hooko, Honolulu, ma ka hora 9 a. m. o ua la la i oleloia e hoike mai no ke aha ia e ae ole ia ai ia noi.
A. N. KEPOIKAI, Honolul, Mei 6, 1903.
2963--Mei 15, 22, 29--June 5, 12, 19, 26-- July 3, 10.
Hoolaha a ka Lunahooponopono Waiwai.
Oiai ua hookohu pono ia mai ka mea nona ka Inoa malalo iho i Lunahooponopono no ka waiwai o ka mea i make nolaila, ke hoike ia aku nei ka lohe i na mea apau ina he koina ko lakou i ka waiwai o ka mea i make e hoike mai me na hoolalo kupono iloko o na mahina eono i ole ia e hoole loa ia no a o ka poe i aie i ka mea make e hookaa koke mai.
J. D. KEAMO, Lunahooponopono Waiwai o Wm. Keamo i make no Keoneolo Honuaula Maui.
2964--Mei 22, 29.--Iune 5, 12.
Hoolaha i ka Poe Aie.
WAIWAI O WILLIAM H. MCGREGOR
Mamuli o ka hookohuia ana o ka mea nona ka inoa malalo iho he lunahooponopono no ka waiwai i hoikeia ae la maluna, nolaila ma keia ke kauohala aku nei ka poe apau he mau koi ka lakou e waiho mai ia mau mea i ka mea nona ka inoa malalo iho ma kona keena, ma Alliiolani Hale, Honolulu iloko o eono mahina mai keia ia aku, o hoole loa ia auanei.
A o ka poe i ale i ka waiwai o ka mea i make, e oluolue lakou e hooponopono koke me ka lunahooponopono me ka lohi oe.
Kakauia ma Honolulu, T. H. May 2@, 1903.
HENRY SMITH, lunahooponopon Waiwai.
2965--Mei 29--Iune 5, 12, 19, 26
J. R. Mills
Notari a Luna Hooialo Palapala Kanawai o na ano apau. He akahele a noeau ka lawelawe hana ana. Keena Hana ma Pearl City, Manana, Ewa.
JOHN M. KEA.
He Notari no ka Lehulehu; me mea hana i na Palapala Kanawai, @ he mea huli i na kuleana a@aa. O na kauoha mai na mokupuni mai e hookoia no me ka pololei.
Keena Hana: Ma ka Loio Kuhina, Hale Mana Hooke.
Honolulu, Mei 22, M. H. 19@@.