Ka Nupepa Kuokoa, Volume XLI, Number 22, 29 Mei 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, MEI 29, 1903

 

hookahi no hoi i hoohuli ae ai oia i kona lio a hoi aku la ma kahi e ku ana o kona mau mahele.

            Ua holo aku la wau a loaa aku la ia'u ua pualikaa ia e ku ana mahope o ka nuu.

            "Heaha ka oukou hana maanei?" wahi a'u i ninau aku ai.  "E lawe mai i ka oukou mau p u a e hoohuli aku i lakou mau waha maluna o kela pualikoa e nee mai ia."

            "Ua make iho nei ko makou kapena," wahi a ka lukanela i pane mai ai: "eia wau ke kali nei o ka loaa mai o ke kauoha."

            "E awiwi mai: aole he manawa i koe e hoopau wale ai," wahi a'u i kauoha aku ai.

            "Ma ka mahele no ka hema, huli!" i kauoha aku ai ka lukanela: a ia manawa aia na kaapu ke nakeke la no luna o ke ahua.

            "Ano ka manawa, e ki aku i ka oukou mau pu," wahi a'u i kauoha aku ai: "E ki koke aku me ka awiwi, kokahele u baka!"

            " E hoolele aku no makou i na poka paa mamua, a mahope aku i na poka pahu." wahi a ka lukanela i pane mai ai ia'u.

            Ia manawa no i hoomka aku ai na pukuniahi e kani; a ia manawa i hoomaka aku ai e kuemi ka makamua o keia mau mahele e nee mai nei oiai aia na kanaka ke hina la I na manawa apau e kani aku ai ka pu.

            "Ano, e ke kakiana, e hoouna aku i na poka, eha-kekona uwiki," wahi a ka lukanela i kauoha aku ai, iaia e ku ana ma ka aoao okona lio e paipai ana hoi i kona a-i.

            Ua huli aku la wau e nana i ka Hatafarana mea a hana ana, a ike aku la wau i ka holo a@ ana aku o kona mahele ilalo o ke awawa me ka uwauwa leo nui ana, me he mea la e kaua aku ana i na enemi.

            "E akahele mai oe!" wahi a'u i kahea aku ai i ka lukanela; "ina pela oe e hana ai o kou ki aku no ia i ko kakou poe."

            "Ololaika, e ka mekia; e haawi ae wau i mau poka pahu na lakou la, alaila e kipoka aku makou i ko lakou kikowaena."

            Ua hoomaka aku la na poka pahu e lele, a i ka wa i hui ae ai o keia mau mahele koa me ko makou, ua hoohuliia aku ka waha o na pu i ke kikowaena, a ia manawa i lele aku ai na poka pahu e hoopuehu liilii ana i na mea ola e loaa aku ana ia lakou.  Ua hiki mai la he elua mau mahele koa pukaa, a hui pu mai la me makou ma ke kipoka ana i na enemi a aia hoi ma kekahi aoao mai o ko Hatafarana mau mahele, ke ki mai la no hoi kekahi mau mahele koa pukaa.  Na keia kipoka a ko makou mau mahele koa pukaa i hookuemi hope aku i na enemi, a no kekahi manawa ko lakou ku ana mai e paio a hoomaka aku la lakou e auhee.

            He iwakalua minute mahope mai ua pau ae la ke kaua, a aole hoi i piha ka hora ua lilo hou mai la ka papu ia makou.  Ua nui ka poe i make ma keia kaua ana; oiai aia ke kula ke uhiia la e na kino make ame ka poe i eha a o ka poe e noho ana iloko o ka Papu Kekemana ua pau aku i ka paa pio.  He mau haneri kakaikahi o na Konofedereta i lilo pio mai; a o ko lakou poe i make ame ka poe i eha ua nui no.

            Oiai aole he mea i koe e hana aku ai, ua hooholo iho la wau e hoi aku; nolaila ua hele malie aku la wau a kaa ae la mahope o Generala Hatafarana ame kona mau kokua aliikoa.

            "Owai kou inoa?" wahi a ke generala i ninau mai ai mahope o ko'u haawi ana aku i ko'u aloha iaia.

            "O Mekia Wilimona ko'u inoa, a no ka pualikoa Ehiku o Nu Ioka."

            "Auwe, no ka Mahele Elima oe.  Pehea oe i hiki ai ianei, e ka mekia?'

            "Ua holo mai wau mamuli o ke kauoha i haawiia mai ia'u e nana i na mea e hanaia ana maanei."

            "Ua hele mai oe me ka hikiwawe," wahi a ke generala i pane mai ai me ka leo oluolu, "a aole hoi wau e poina ana ia oe ma ka'u hoike no kou lawe ana mai i kela konofauna pualikoa pukaa."

            Ua haawi aku la wau i ko'u hoomaikai ma ka wehe ana aku i ko'u papale kapu, a iloko o ka manawa pokole aia wau ke huli hoi la no ko'u mahele.  Ia'u i hiki aku ai i ko makou keena kaua, ua ike iho la wau ua hiki mua aku ka lono i o'u mau hoa mamua o ko'u hiki ana aku, oiai ua hookuu ia aku no koa e hoi no ko lakou mau hale lole pakahi.  Ua noho mai ko makou generala e hoolohe i na mea i hanaia ma ke kahua kaua mai ia'u aku a ua nui kona hauoli i ka lohe ana i ka'u hoike.

            "Ea, e Wilimona, ua oi aku kou laki, no ka mea ooe wale no o kakou ka i komo aku iloko okeia kaua ana," wahi a Iakina i pane mai ai.

            "Ua poina oe, e Iakina, aole i loaa ia Wilimona ka kakou kaua o kela mau makalii aku nei.  I keia manawa eia oia ke hana nei i piha pono kona manawa i haule ai," wahi a ke generala i pane aku ai.  "Aka, e na keonimana, e pono ia kakou ke hoomakaukau no ka hiki ana mai o ka Peresidena i keia la e makaikai ai ia kakou."

            "Auwe, oia hana no ka ia o keia la," wahi a'u i pane aku ai.  "Ke manao nei wau aole e manao mai ana o Linekona e hana mai ia hana mahope koke iho o keia kaua ana iho la o kakou i kela kakahiaka.?"

            Ua pololei na olelo a ke generala i hai mai ai ia makou, no ka mea ia auwina la, ua kukuluia ae la na mahele koa like ole no ka hoomakaukau ana no ka hookipa ana mai i ka Peresidena ame kona mau hoahele.  He mau minute pokole mahope o ka loaa ana mai o ke kauoha ma ka o@, ua ike ia aku @ ka oili ana mai o Linekona maluna o kona lio a holo ae la e makaikai i na mahele like ole.  I ka wa i loaa mai ai o ke kauoha no ka haawi ana aku i ke aloha, ua hoihoi iho la wau i ka wini o ka'u pahikaua ilalo, a ia manawa no hoi i ike aku ai wau i ka wahine a ka Peresidena e poai puhiia ana e kona mau hoa wahine, a e hauoli ana hoi i ka nana ana mai la makou mahele ma kela aoao o ke kahua o ka Pereseidena e nana mai ana, ua loheia aku Ia ke kani kupunai ana mai o na pu ma ko makou aoao hema.  Oiai ke ikaika loa mai la, aole makou i pahaohai i ko makou nee loa ana aku no kahi o keia hana hoolelehauli.  ua hoopau koke ia ae la ka makaikai ana a Hoomaka koke aku la na mahele apau e holo me ka mama nui, eia hoi na kanaka ke @ nei no keia loli ano e ana o ka papahana o ia la.

(Aole i pau.)

_____

            HAVANA, Mei 22.  -Ua kakauinoaia ke kuikahi i hookomoia ai na hoololi a Platt, a aohe pauka o ke kuikahi i kio@.

_____

NA ALOHA ELUA i ka IPO HOOKAHI.  MOKUNA LII.

MAWAENA O NA ALOHA ELUA.

            Oiai hoi oia mawaena o kana mau aloha elua, a eia nae ka me apiki, ua nalowale like no laua a helua.  No Lede May hoi, aole loa oia e ike hou ana iaia - ua ike no oia e malama ana ia i kana huaolelo! oiai no hoi o Daisy, kana whine i waiho mai ai i kana mau olelo waipahe a lilo iho la ia i mea nana e kahaha loa ai.  He mea make wale no ke kanaka - a o ke kanaka ikaika loa he mea hooia wale iho no oia no kana mau hana hoomalimali, ana i hana aku ai ia Lede May; he wahi hauoli uuku ka mea i loaa iaia i kona wa i hoomanao ae ai ua aloha maoli no o Daisy iaia.  He mea oluolu no hoi ia ina oe e aloha ia mai ana.  Ua ike no oia o ka Daisy ana i mare aku ai ua hoomana mai oia iaia; a eia nae ka mea apiki ua laweia ia hoomana ana me ka manao puanuanu - e like me ka puanuanu o ka lawe ana aku o ka malamalama o ka la i ka nani o ka puananala; aka, o keia Daisy wahine ui no hoi ka mea hoi i hoike pololei aku i kona aloha iaia, ua lilo iho la no ia i mea na kona naau e noonoo nui ole ai.  Ua komo koke mai la no ka noonoo iloko o Daisy ua pau loa no ke aloha o kana kane i kekahi wahine akamai a noeau maoli i ke kaili ana i ka manao.  Mawaho ae o keia mau mea, he kuleana kona i oi ae ka mana ame ka ikaika maluna o ia - oia ka makuahine o kana keiki; ke keiki hoi e lilo aku ana i haku n o Esawale, ka mea no hoi nana e kakoo aku ana i kona inoa hanohano ame ka hanohano o kona hale.  Mamua aku, aole ona noonoo nui iki no kela keiki.  Aka, ua komo koke mai la nae ka noonoo iloko ona no ka hookaa ana aku i kona aie.

            Alaila ku ae la o Sir Kilinetona iluna mai kona noho ae; aohe ona wahi kuleana i koe e noho loihi hou iho ai iloko o ka hale o Lede May - o ka hale hoi ia nana i hoopouliuli mai i kona alo me kekahi aka pouliuli.  Ua ku malie iho la oia ma ka ipuka no kekahi mau minute loihi, e kilohi ana i na paia o ka lumi nani ana i hoohala ai i kona mau la o ka hauoli.  Aole loa oia e moe lolii hou ana ma ka aoao o kela helehelena onaona, aole loa no hoi oia e lohe hou ana i ka leo honehone o ua aloha poina ole la ana.  Ua puka aku la oia i waho a hoi aku la no kona home.  Hele mai la o loko ona a aneane pu; a mahope iki mai no nae ua loaa mai la kahi maha iaia -  ua hiki mai i ka pahu hopu o na hana i hana ia; o ka pahi-kaua i kau loihi ai maluna iho o kona poo ua haule mai ia ilalo i keia manawa; o ka oiaio keia ana i maka'u loa ai i ka hai aku ua hai ia mai ia mea.  Malia paha he hana hoopilihua io mai no ia i ka noonoo, aka, aohe no ia he mea e hookaumaha iho ai i ka manao; ua pau ae la na mea apau - ua ike ia ae la ka mea huna.  Ua ike iho la o Lede May ua mare oia i ka wahine, a ua haawi mai oia i kona aloha hope loa iaia.  Ua pau ae la ka pihoihoi ana o ka manao, pau pu no hoi me na manao e hoopoluluhi mau ana i ka mea huna ana i makemake ole ai e hai; o ka manawa mua loa iho la ia o ka loaa ana iaia o kahi maha no kekahi mau mahina loihi loa; ua pau ae la na mea apau, aohe mea hou aku i koe e noonoo ai; pau ka lelele ana o ka oili i ke kikeke mai o ke kanaka laweleta i ka ipuka; pau pu no hoi me na hana like ole a pau.

            Ua oki ia iho la oia mai ia Lede May aku a ku mamao loa i kahi e, e like me ka mamao o ka welau akau mai ka welau hema mai.  Ua haohao iho la o loko ona heaha la ka mea i kaumaha nui loa ole ai o kona noonoo i keia manawa e like me mamua - no keaha la i loaa mai ai iaia keia wahi maha - no keaha la i oioi mau mai ai ko Daisy manao iloko ona me ka minamina pu no nae ia Lede May.  Ua ala ae la kekahi pioo nui iloko o Lifedale Hale i ka haalele honua ana mai o Mrs. Jodana, ke kahumalamahale; aole mea hookahi i ike i ke kumu, a o ka mea wale no i ike ia o kona nalowale ana mai ka hale aku; a o na kauwa keia me ko lakou aloha nui iaia; ua hoike koke aku ia lakou ia mea hou ia Sir Kilinetona.  Ina paha he wa okoa kona lohe ana i keia mea hou, me nei ua lilo ia i mea nana e noonoo ino ai; aka, i keia wa iho la, aole loa; ua piha kona noonoo i na hana hoopuiwa i hana mua ia iho ai mamua - keia halawai ana ona mawaena o kana mau aloha elua.  Aohe oia i noonoo nui aku no ka nuhou pioloke o kona mau ohua.

            "Alaila, ua haalele mai oia?  E imi aku hoi ha kakou i pani ma kona wahi.  Eia nae hoi aole o'u manao e noho hou iho i Ladana nei a loihi loa."

            Ia ahiahi no, ua loaa mai la kekahi leta iaia, e hai mai ana ua kauoha koke ia mai o Mrs. Jodana e kana keiki noka hele ana aku e halawai pu me ia i Amerika.  Nolaila, aole i ike iki ia ka Daisy mea huna, a malia paha o kana mea ia i hunakele loa ai a hiki i ka palena hope o kona oia ana.

            "E hele hou ana no oia!" wahi a na kauwa i olelo ae ai.  "A ka wa hea ia o Sir Kilinetona e mare ai i ka wahine a noho malie iho i kahi hookahi, e like me na kanaka e ae apau?  He hooluhi maoli no ia o ka hele mau a hoi mai. me ka maopopo ole o kona ano o ka noho ana.  He wahi manaolana iki ko lakou no kekahi mea maikai e hiki mai ana."

            Aohe mau olelo nune i loheia ma Kilife Hale; aohe mea nana i ninau mai owai la ka mea nana i ae o Lede Adea e komo iloko; o ka na kauwa wale no i ike oia kona hoi mua ana, a mahope mai o kekahi manawa loihi a kahi no o Sir Kilinetona a haalele iho i ka hale.  Aka, no kela hana i ikeia mamua iho - no na mea elua a ke ao nei i manao ai he mau ipo laua eia laua ke kaawale nei no ka wa mau loa.

            Ia wa haawi aku ia o Lede May i ka olelo kauoha ina e hiki mai ana kekahi poe malihini i ke koena aku o ia la e hai aku ua loaa ia wau i ke onawaliwali, a ua hiki ole ia'u ke ike i kekahi mea.  Aohe no ia he hana ano e i ike ia, no ka mea he hana maa mau no ia ia Lede May o ka noho hookahi i kekahi manawa.  Nolaila aohe i komo ka haohao iloko o na poe apau i kona wa i hoole mai ai aohe ona makemake e ai, a o kana i noi aku ai e lawe ia mai i wahi pola ti nona iloko o kona lumi.  Ua nui kona alohaia e kana mau kauwa, a i ko lakou lohe ana ua nalulu ke poo o ko lakou hakuwahine, ua noho iho la lakou me ka hamau loa, aohe pu-a leo, aohe lohe ia aku ke kamumumu o na kepuaiwawae, a hiki wale i ka hoi ana mai o Miss Lokawahie i ke ahiahi.  Ua kahaha loa iho la oia i kona ike ana mai i ka pouli ou o ka hale, a, aohe no hoi he hauwalaau.

            "Aia i hea o Lede Tervelina?" wahi a Miss Lokawahie i ninau aku ai, a hai ia mai la iaia aia no ka lede hanohano iloko o kona lumi, ua onawaliwali ia.  No ka nui loa no o kona haohao, ua hoomau aku la no oia i ke kamailio ana:  "O ko Sir Kilinetona la hoi keia e hele mai ai ia nei e noho ai a po keia la - aohe anei oia i hiki mai nei?"

            "Ua hiki mai nei oia a hoi koke aku nei no."  Alaila ike koke iho la no o Miss Lokawahie he hana ka i hana ia mawaena o laua.

            Ua hakaka iho nei paha ua mau aloha nei." wahi ana i manao wale iho ai no iloko ona; "a hea la pau keia mau ano hana a laua? - a ka wa hea la laua e mare ai e like me na poe noonoo maikai e hana mai nei: a hoopau hoi i keia mau hana kohu ole?  E hele ana wau e ike iaia.  E a'o aku ana wau iaia e mare koke," ame keia mau manao iloko ona, ua hele aku la ua Miss Lokawahie nei i ka lumi o Lede May.

            Ua ano molehulehu keia wa a Miss Lokawahie i hele aku ai a kiekeke mawaho o ka ipuka o ka lumi o Lede May.  I ke kikeke mua ia ana aku aohe leo i pane mai; alaila olelo aku la o Miss Lokawahie: "May ua makemake wau e ike ia oe no kekahi mau minute pokole."

            "Ae; komo mai.  Aole wau i manao o oe ia i kikeke mai nei," wahi a kekahi leo nawaliwali i olelo mai ai.  A komo kaula ua lede aoo nei iloko.  Ua poeleele maoli no o oko o ka umi, a haupu wale ae la no o Miss Lakawahie ua komo ia paha kekahi o laua iloko o ka popilikia.

            "Poeleele maoli no hoi kou lumi, e kuu kaikamahine," wahi a Miss Lokawahie i olelo aku ai; "heaha ka mea o ka ho-a ole ana i na ipu kukui?"

            "Aohe o'u makemake i ka malamalama o ka ipu kukui," oia ka pane i paneia mai ai.

            Huli koke akula o Miss Lokawahie i kona lohe ana i kela pane.

            "Ka ha ha, maopopo ole aku la wau i ke na mea," wahi ana i olelo aku ai, "manao wau he kumu ka mea i ala mai ai o keia ano e ou, ua hele oe a kukule.  Aohe o'u makemake i ka lohe aku i kekahi mea e olelo mai ana ua oi aku kona makemake i ka pouliuli mamua o ka malamalama."

            Aole loa he huaolelo a Lede May i pane mai ai.

            "Kaumaha maoli wau i ko'u hele ana aku nei," wahi a Miss Lokawahie i hoomau aku ai i ke kamailio ana.  "Ina au i ike mua e noho hookahi ana oe i ka hale nei me nei, aole wau e hele.

            Ua maopopo loa ia'u e hele mai ana o Sir Kilinetona ia nei e noho ai a po keia la me oe."

            Aole loa no he huaolelo i puka mai mai ko Lede May waha mai.

            "Aole anei oia i hiki mai nei ia nei?" wahi a Miss Lokawahie i ninau hou aku ai.

            "Ia nei iho nei no oia," oia ka pane pokole i pane ia mai ai.

            "Alaila aohe oia i noho iho nei?" wahi a Miss Lokawahie i olelo aku ai.

            "He wahi manawa pokole wale no kona o ka noho ana iho nei," wahi a Lede May i pane mai ai; alaila, no ka hamau ola, aohe nakeke, aohe walaau, ua lohe ia aku la ke ke ana o ka uwati liilii e kau ana iluna o ke pakaukau me ka moakaka loa.

            "May," wahi a Miss Lokawahie i olelo aku ai mahope iho o kona hoomaha iki ana iho, "ua hoopaapaa iho nei oe me Sir Kilinetona?"

            "Aole.  Aole wau i hoopaapaa iho nei me kekahi mea, no keaha hoi wau e hoopaapaa ai me ia?"

            "Ke ike nei wau he wahi hewa kekahi," oia ka manao iloko o Miss Lokawahie ana e manao ana, "a ua oiae ke ino o ua mea la mamua o na mea i hana ia mamua."

            Aole hiki iaia ke hoomanawanui i keia ano e o kana kaikamahine aloha e noho hookahi nei iloko o ka pouliuli me ka pane leo ole mai.  Ua lalau malu aku la oia i ke kukaepele iloko o ka poki, a koe wikiwiki ae la oia a ho-a koke aku la i ka ipukukui mamua o ka loaa ana he manawa ia Lede May e huna ae ai i kona helehelena, a i ole ia, huli aku paha i kahi e.   Me keia malamalama piha ua ike pono ia aku la ka hailepo o kona helehelena.

            Ua hooho koke ae la o Miss Lokawahie i kekahi leo puiwa:  Auwe, ua manao loa wau he akua lapu oe - ua maka'u loa ia wau ia oe, e May.  Eia ka o oe no keia akua lapu a'u i maka'u aku nei.  Heaha keia ano e ou?"

            "Heaha keia ano e o'u, aohe o'u ano e," oia ka pane i paneia mai ai me ka ulolohi.

            "Alaila, heaha ka pilikia i loaa i kekahi mea okoa ae?  E May, May aole anei oe i hoonaukiuki hou aku nei ia Sir Kilinetona?"

            "Aole; aole wau i hana aku nei i kekahi hana o ia ano," wahi a ke kaikamahine puuwai naha i pane mai ai.  "Aole wau i hakaka iho nei me ia - aka __________."

            "Aka, a pehea aku?  E kuu hiwahiwa, mai hoehaeha mai oe i kuu manao mamuli o kau mau pane hoolauwili.  Ua ike anei oe i ke kumu o'u i pii mai nei iluna nei?"

            "Aole," wahi a Lede May i pane mai ai me kela leo nawaliwali no; "aole au i maopopo i ke kumu o kou pii ana mai nei iluna nei."

            "I hele mai nei wau e koi ikaika aku ia oe, e hooki koke i keia mau hana a pau a noonoo aku no ka la e mare ai.  Ke ninau mai nei na poe apau i ka wa e hooko ia ai o ia hana: ke hoike mai nei na poe apau i ko lakou pahaohao loa i kou hoolohilohi wale iho no a loihi loa, a heaha la ke kumu o kou hana ana pela.  He oiaio no, aohe maluna o kekahi mea e ae ka pilikia, aka, aia no maluna ou: aka nae, aohe hiki ia oe ke pale aku i ka olelo a na poe apau e olelo mai nei."

            Alaila, hooki koke iho la oia i kana kamailio ana, i kona wa i ike aku ai i na maka kaumaha o kana kaikamahine.

            "E May, kuu hiwahiwa, e hai mai oe ia'u heaha la keia.  Ua lilo wau he hoaloha nou, he punahele no na makahiki loihi i hala ae nei - nolaila, mai kanalua i kou hilinai ana mai ia'u.

            Me he mea la e naha ae ana kuu puuwai i ko'u wa e nana aku ai ia oe.  Ua ike no wau no Sir Kilinetona Adea no ke kumu - aohe mea e ae iloko o ke ao nei nana i hoano e i kou noonoo."

            Alaila hele aku la o Lede May mai kona wahi aku ana e noho ana a hiki i kahi o kona hoaloha.  Ua kulou iho la kona noo ilalo a hiki i ke kau ana iluna o kona umauma: ua apo aku la ola i kona mau lima a hooho ae la oia i kekahi leo uwe me ka walania loa.

            "E hoomanawanui pu mai oe me a'u i keia pilikia nui," wahi a Lede May i olelo mai ai: "ua naha ia kuu puuwai.  E hoomanawanui pu mai oe me a'u; ua lilo kuu aloha mai a'u aku no ka wa mau loa.  Aole loa maua e hui hou ana i keia ao."

            "Alaila, ua hakaka olua!" wahi a Miss Lokawahie i olelo aku ai me ka ilihia nui.

            "Aole: he mea i oi ae mamua o kela - he hana i oi ae ke ino mamua o ka mea hiki ke hoomaopopo ia.  Aole anei he hiki ke hoomaopopo ia.  Aole anei he hiki ia oe ke koho mai?"

            "Ua lilo anei kona noonoo ame kona aloha i kekahi mea okoa aku, e May?" wahi a Miss Lokawahie i ninau aku ai me ka haohao nui.

            "Aole,; he mea i oi ae ke ino mamua o kela - aka, no'u no nae ka hewa.  He ekolu ola i hoopoino ia; a ua ike no wau aia no maluna o'u ka hewa."

            "E kuu kaikamahine aloha," wahi a Miss Lokawahie i olelo aku ai me ka leo malie, "he naaupo loa wau ma ke koho ana.  E pono no oe e hai mai ia'u.  Ua hele oe a haalulu, e May, a ke pana nei ko puuwai me ka ikaika - kou mau lima, ua like loa ka huihui me ko ka poe make!  Heaha kana hana i hana mai ai ia oe e kuu kaikamahine aloha?"

            "Ke hoomanao nei no anei oe," wahi a ke kaikamahine i olelo mai ai me ka leo nawaliwali, "i ko kaua wa i heluhelu ai iloko o na nupepa a ike ai kaua ua hoi mai?  Ua hai aku wau ia oe aole wau e hoohakalia ana i ka hele ana aku e noi iaia e kala mai ia'u.  Ua hele pu mai no hoi oe me a'u i Ladana nei, a hele loa ai wau e ike iaia."

            "Ae, ke hoomanao nei wau ia mau mea apau.  Alaila, heaha keia?" wahi a Miss Lokawahie i ninau aku me ka paupauaho.

            "Ia wa no, ia wa no - auwe, e na Lani e kokua mai oe ia'u! - ua mare mua oia i ka wahine."

            "Ua mare mua oia i ka wahine!" wahi a Miss Lokawahie i olelo aku ai me ka leo puiwa, "me kona hai ole mai ia oe ia mea!  Me kona ike no ua mare oia i ka wahine a ae mai no oia e launa pu me oe - a huna loa no hoi oia ia mea!  Aole hiki ia'u ke manaoio aku ia mea, e May.

            "He mea oiaio keia a'u e hai aku nei ia oe, ua mare oia i ka wahine.  Ua heluhelu ka oia iloko o kekahi mau nupepa hoopunipuni a ike oia e mare ana au me ka Duke o Rosekana, a no ka pono ole o kona noonoo, ua mare iho la oia i ke kaikamahine nana i malama iaia me ke ahonui oiai e waiho ana iloko o ka mawaliwali no kekahi wa loihi."

            "Aole hiki ia'u ke manaoio aku ia mea, e May.  Aole hiki i kekahi kanaka ke hoohaahaa iaia a hana i kekahi hana ino loa e like me kela -."

            "Mai kapa aku oe iaia he ino; aohe ia o kona kuleana.  No'u no ka hewa, aohe nona."

            "Me ka oiaio loa," wahi a Miss Lokawahie i olelo aku ai, "aohe oe e kala aku ana iaia, e May, no la hana ana?

            "Ua hiki no ia'u ke hookuu aku iaia mai ia hana mai ana i hana ai.  Ua ike no wau ua aloha loa oia ia'u, a ua ike no hoi wau no ka'u hana lapuwale no i hana ai ka mea mama i hoopupule i kona noonoo a hiki i kona auwana hele ana.  Aole oia i huli hoi mai i Enelani nei, e like me ka kaua i manao ai no ka ike ana mai ia'u.  Aole o'u manao, o kona makemake ia o ka ike hou mai ia'u.  Ua ike no oe na'u oia i imi aku," wahi no a Lede May e olelo la me ka haalulu o kona leo.  "Aole loa kaua e hoopoina ia mea.  Ua hauoli no hoi oia i ka ike ana mai ia'u ame he mea la ua ala hou mai kela aloha kahiko loa iloko ona me ka ikaika.  Aole wau i haawi aku i manawa nona e hai mai ai ia'u i kela po, ame he mea la mahope mai o ia wa, manao wau, ua hilahila oia i ka hai mai, a i ole ia, he maka'u paha."

            "May," wahi a Miss Lokawahie i hooho aku ai me ka inaina, "mai noho oe a kala aku iaia," aohe kala ana nona; aohe hiki ke loaa kekahi huikala ana i kekahi kanaka e like me ia ke ano.  Ke olelo aku nei wau o kekahi hana hoopunipuni, a epa e like me kela ke ano he hewa nui ia ma ke kanawai - aole no he wahi hewa uuku, aole no hoi he kuhihewa, - aka, he hewa koikoi maoli no e hoopai ia ai e ke kanawai Auwe no hoi keia kanaka wahahee, e! he lede oe o ke kulana hanohano a i ike ia e na poe apau, he akahai a he oiaio ma kau mau hana, a eia ka, e huikala aku ana oe iaia - he mea weliweli loa ia ke noonoo ae!

            Makemake loa wau ina eia no oia ia nei; me nei ua lohe pololei na pepeiao ona a lilo ia i mea nona e puiwa ai.  E kahea aku no oe ia Sir Kilinetona O like me kau i makemake ai; ke olelo aku nei wau oia kekahi kanaka ino loa no kona hana ana i keia hana!"

            Ua hooki koke iho la o Miss Lokawahie i kana kamailio ana, no ka mea, ua ike aku la oia i ka haikea ana ae o ka helehelena o ke kaikamahine, a haalulu mai la kona kino, a kuemi hope akula oia me ka uwe ana ae i kekahi leo uwe me ka walania loa.

            "Ina oe e olelo hou mai ana e like me kela ke ano, a ina oe e hoopuka hou mai ana i kekahi huaolelo ino nona, o ko kaua wa keia e kaawale ai, pau kou ike ana mai ia'u a pau ko'u ike ana aku ia oe!  Malia paha ua hana hewa io no oia; aka, oia ka'u aloha mua loa i aloha ai, a oia ana no hoi ka'u aloha hope loa e aloha ai, a aole o'u makemake e lohe hou aku i kahi huaolelo ino e pili ana nona - aole loa!  O na huaolelo apau e hoino ana iaia ua like ia me ka pahikaua oi lua e hou mai ana i kuu puuwai - ua ike anei oe ia mea?"

            "Aka, e May, e noonoo kupono oe.  Aole i hanaia kekahi hana hoopunipuni ino loa, a lokoino no hoi maluna o kekahi mea kino uhane e ae; aka, maluna ae o na mea like ole apau, o oe hookahi, e May, ka mea i hanaia e like me ia.  Aole anei ou manao aole hiki ia'u ke manaoio aku ia mea?  Ina ua mare kela kanaka i ka wahine, heaha kona mea o ka hai ole ana mai ia'u.  Ina aole ona makemake e hai ia oe ia mea?  Aole hiki ke loaa iaia ka huikala ana ma keia ano.  May, ina he mea okoa kela, pehea la oe e hana ai i kou noonoo maikai o ka pono ame ka hewa?  Heaha la kau e olelo ai no ke kokua ana iaia?"                    

            "Aohe a'u mea e olelo ai," wahi a Lede May i pane, mai ai: aka, ina he mea hiki ole ia'u ke huikala iaia, ua hiki ia'u ke olelo aku na kuu aloha i pale ae iaia mai na hoahewa ana a pau - hoomau no wau i ko'u oiaio iaia i kona na iloko o ka popilikia ame ka popilikia ole."

            "May!" wahi @ a Miss Lokawahie i hooho aku ai me ka leo huhu; "heaha ke kohu o kau olelo ana i kou aloha no ke kanaka i marela."

            "Ua pololei oe, aohe io no ia he hana kohu.  Mahope aku o keia la aole loa kuu mau lehelehe e hoopuka hou ana i kona inoa.  Aole wau e kamailio aku ana iaia - aohe hiki ia'u ke hana hou me ia.  Ua hookaawale ia maua i keia ia no ka wa mau loa!"

(Aole i pau.)

_____

MEA HOU O KA HALE AHAOLELO.

HALE O NA LUNAMAKAAINANA.

            Mei 20.  -E like me ka hooholoia ana i ka la ua hoopaneeia ka Hale a noho i ka Poaha la 16, a mamuli o ka ulu nui ana mai o na manao like ole iwaena o na kakauolelo i ke kanawai o ke kulanakauhale, e olelo ana ua ku-e keia hoopanee ana o ka hale i ke Kanawai Panalaau oiai ma ka helu ana ua piha ka ekolu la a oi oiai hoi ke kanawai Panalaau e olelo ana aole e hoomaha kekahi o na Hale a elua a oi aku maluna o ekolu la me ka ae ole o kekahi o laua, a malalo o keia kumu, i keia kakahiaka ua kahea ae la ka Hope Lunahoomalu e akoakoa ka Hale no ka noho ana i kulike ai me ke kanawai Panalaau.

            Ua hookoia ae keia hana mamuli o ke kahea ana a noho ka Hale o na Lunamakaainana mahope koke iho o ka hora 11 a pau no hoi ke kaheaainoa ana.  Aole he mea i hanaia i keia la hana.

            E like meka loaa ana o ka manao e kahea i ka akoakoa ana o ka Hale aole no ka hana i na hana aka no ka hoopiha pono ana i ka makemake o ke kanawai Panalaau, nolaila mahope koke iho o ka pule ana a Hon. S.K. Kaili ua noi koke mai la o Hon. Harris e hoopanee i ka Hale a hooholoia no hoi e like me ke noi.

 

HALE O NA LUNAMAKAAINANA.

            Mei 21.  -Ma ka manawa i noho ae ai ka Hale ua heluheluia ka moolelo o ka Hale o ka la hana o ka Poaono la 16, ka la hope i hoopanee ai ka Hale a noho i keia la, a i ka pau ana o ia, ua heluheluia mai ka moolelo o ka la hana o ka Poakolu iho ma na olelo a elua a i ka manawa i pau ae ai ua noi ia mai e holoi loa ia kela moolelo aole e hoopaa a ua kokuaia no, aka, ua noi mai la o Harris e aponoia ka moolelo a ua kokuaia no hoi.

            Ma keia manawa ua ku mai ka Lunahoomalu Beckley a hoakaka i kona mau manao e kue ana i keia moolelo o ka la i hala koke iho.  Wahi ana aole he leo i haawiia mai iaia mai ke Kiaaina mai no ka a'o ana mai he mea kupono e malamaia ka hana i keia la i oleloia oiai no nae he manao kahi o ia ano i haawiia ae i ka Hope Lunahoomalu.

            He leka na ka lunakula Nui e noi ana e hoopii ae i ka haawina o $1,000 i ka $1,500 no na lilo huikau o ka oihana hoonaauao.  Waihoia ka noonoo ana me ka bila haawina o na pilikia kuikawa.  Ma keia manawa ua loaa mai la ka bila ukuhana o eono mahina mai ka Senate mai a pau i ka heluhelu ekahiia.

            Mahope o ke kamailio ana no ka ninau pili i ka panikuia ana o ka paumawai ua hapaiia mai ka noonoo ana i ka bila o na haawina o na pilikia kuikawa a maloko o ia ano ua waihoia mai na hoike komike.  O ka hoike komike pili i ke koi a I. Noah ka i laweia mai a noonoo.  ua kakoo mai ke komike e ukuia i $1,476.50.  Maluna o keia kumuhana i paio ai ka Hale, a ma ka hooponopono ana ua aponoia ka hoike komike ma ka uku ana i hookahi dala no ke kapuai aina hookahi.

            Me na hooponopono apau maluna o na itamu i hooholoia ua hiki ka heluna nui o ka bila haawina o na pilikia kuikawa i ka $284, 983.75, a hooholoia no hoi ka bila.  He 26 ae kakoo i ka 1 hoole.

            Ma ke noi a Harris ua hapaiia mai ke kumuhana o na bila uku ole ia, a o ka hoike pili i ua kumuhana nei i ka manawa o ke kau mau ua heluheluia mai mahope iho no nae o ka huli ana i ua hoike nei, a ma ke noi a Vida ua waihoia ua kumuhana nei a noonoo pu ia me ka bila a noho no hoi ka Hale ma ke ano komike holookoa no ka noonoo ana maluna o ka bila.

            Maluna o keia bila ka noonoo ana o ke komike holookoa.  Ua lawe mua ia mai na itamu o ka oihana hookolokolo Pau ia ua noonooia ko ke Keena o na @ Hou a @ e k-ia keena i @ ai na @ lunamakaainana! na haawina o na alanui a i ka Miki ana i ka manawa e kupono e hoopanee ua hookuu ke komike Hale mahope no hoi o ia manawa ka hoopanee ana.

 

ILOKO O KA SENATE.

           

            Mei 21.  -Hoike komike na McCandless maluna o na itamu ola a waihoia ka hoike a noonoo pu me ka bila.  Iloko o keia hoike ua kakoo ke komike e hooholoia i haawina dala o 5000 no ke kukulu kelepona ana no Kalaupapa a e hoohuiia me ke telegarama uwea ole.

            Ma keia manawa ua hapaiia mai ka noonoo ana i ka bila haawina o na hoolilo o ka Hale a mahope o ka noonoo ana ua hoopaneeia ka noonoo ana, a ua a'o ia aku ke komike o na loaa ame na ala e kui aku me ke komike waiwai o ka Hale no ke kuka ana no na mea pili i keia bila.  Ma ke noi a Dickey ua hookomoia iho he $700 no ke keena inisua.

            Make noi a Achi e hoopii ae i ka haawina o $1,000 no ka hoolaha ana ia Hawaii i ke ao holookoa i ka $1,500 ma ka hookomo pu ana i ka manao hoopaelimahana, a ma ka noonoo ana ua aponoia ke noi.  Hookomo hou ia he itamu o $250 no ke kuai ana i piano ame lako kula o ke kula pokii hou.

            Ma ka hoolaha a Baldwin ua ikeia aole he haawina no ka hooponopono ana i na uwapo kumoku iloko o Honolulu, a ma ke noi ua hooholoia he $50,000 no ia hana.  Ma ke noi a Baldwin ua hooholoia e holoi ae i ka huaolelo "hale" he mea e hiki ai ke hoohana aku i ka haawina dala pili ia kumuhana no ka hoohana ana ma na mea e maalahi ai a holomua ia hana.

            Na Dickey i waiho mai i ke kumuhana e hoihoi i ka auhau waiwai o $1,776 i ka Hawaiian Fertilizer Co., a ma ka noonoo ana ua waihoia i ke komike hookolokolo.  Na J.T. Brown he itamu o $5,000 no ke Alanui Moi, Hilo, a na Wilikoki he $3,000 no ke alanui o Kalihiwai, Kauai.

            Hoopaneeia ka noonoo ana i na hana i koe ma ka hoopanee ana o ka Aha.

           

HALE O NA LUNAMAKAAINANA.

            Mei 22.  -Ma ka noho ana o ka Hale ua waiho mai la ka Lunahoomalu i ka leka a ka Kokua Loio Kuhina e kakoo ana i ka hoopanee ana o ka Hale mai ka Poaono a ka Poaha.

(E nana ma ka aoao 5.)

_____

KAPALAKIKO, Mei 22.  -Ua hopuia ke kuhoe o ke Coptic ame kekahi mau ohua no ka hewa hoopae malu.

_____

HOOLAHA KUMAU

_____

Ka Hui Banako Hoohu Malama Dala o Hawaii

(KAUPALENAIA.)

Huina i hoahuia           $250,000.00

Peresidean                   Kikiia @

Hope Peresidena         W.P. @

Puuku                          W.G. @

Keena Hana Nui:

Alanui Papu, kokoke i Alanui Kalepa Keena Lala ma Hilo, Hawaii.

E lawelawe ana i ka Oihana Banako Hoahu Dala ma Honolulu a me Hilo

            E laweia mai no na huina hoahu me ka haawiia no na ukupanee no na hoahu makahiki ma ka huina o @ pakeneta no ka makahiki.  E loaa no na Rula a me na hooponopono ana ke ninau ae ma ke Keena Hoahu.

2828-yr.

_____

KAUKA T. MITAMURA

Alanui Kukui Ololi Helu 68.  Honolulu. Na Hora Hana:

            Hora 8 a 10 kakahiaka: hora 1 a 3 ame hora 6 a 7:30 p.m.  Sabati: Hora @ 8 p.m.

Telepone White 153.  P.O.Box 942

_____

LEWERS & COOKE

LUI A ME KUKE, Kaupalenaia

Na Mea Hookomo mai a Kuai aku ina LAKO HANA HALE

            O Kela ame Kena Ano.

Malaila e loaa ai na mea malalo iho:

            NA PAPA N.W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

            NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

 

            O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.

LEWERS & COOKE

_____

Bro. Benjamin's Herbalo

HE MAIKAI NO!

E hoola no ia oe  - E hoao.  Ke kuai ia nei e HOBRON DRIUG CO.

Alanui Papu,  @

_____

Ina He Makemake KOU I KA Lauoho Maikai

E HELUHELU I KEIA.

Malia paha ke pau nei kou lauoho i ka helelei,  a koe kakaikahi.  E kau i ka laau mamua o ka pau loa ana i ka helelei, e hana i laau e ulu kou ai.  O ka laau

"Laau Hooulu Lauoho a Ayers"

ka mea e ulu hou ai.  He nani ka lauoho ke ulu mai, a he nui hoi.  Ina he nawali ka ulu ana o kou lauoho, o ka

"Laau Hooulu Lauoho a Ayers"

ka mea e manoanoa ai ka ulu ana a ke loaa i keia laau pau loa ka helelei ana.  I na he piha kou poo ke Kepia,  o ka

"Laau Hooulu Lauoho Ayers"

ka laau e pau ai a maemae kou poa.  Ke loaa i keia laau e hoi hou ana ka ulu ana o kou lauoho a like me ke kou wa bebe.

Hoomakaukau la e Kauka J.C.Ayer & Company, Lowell, Mass., U.S.A. E loaa no keia mau Huaale ma ka Hale Kuai Laau o Hollister, alanui Papu.

_____

            PILADELEFIA, Mei 24.  -Ua pau i ke ahi kekahi  ona hale hoahu ukana nui o keia kulanakauhale ma keia la, me ka poho ana o hookahi miliona dala.