Ka Nupepa Kuokoa, Volume XLI, Number 22, 29 May 1903 — Page 3
| This text was transcribed by: | Cyndi Defenbaugh |
| This work is dedicated to: | Na Koa |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, Mei 29, 1903.
HOOLAHA KUMAU
Hui Alahao ame Aina o Oahu
Mahope aku o Ianuari 1, 1902
MAI HONOLULU AKU
HALE Na la apau koe Na la apau Na la apau koe Na la apau Na la apau
ke Sabati ke Sabati
HOOLULU
a.m. a.m. a.m. a.m. a.m.
Honolulu........ 7:10 9:15 11:05 3:15 5:10
Manana.......... 8:03 9:48 11:40 3:45 5:30
Ewa Mill........ 8:32 10:08 12:00 4:05 5:10
Waianae......... ........ 10:50 ......... 4:45 ........
Waialua......... ........ 11:55 ......... 5:40 ........
Kahuku.......... ........ 12:32 .......... 6:15 ........
MAI WAHO MAI
HALE Na la apau koe Na la apau koe Na la apau Na la apau
ke Sabati ke Sabati
HOOLULU
Kabuku........... ......... 5:35 ......... 2:08
Waialua.......... ......... 6:10 ......... 2:50
Waianae......... ......... 7:10 ......... 3:55
Ewa Mill........ 5:50 7:45 1:05 4:32
Manana.......... 6:15 8:08 1:30 4:52
Honolulu........ 6:50 8:35 2:05 5:25
G. P. Dennison, F. C. Smith.
@@ Nui Luna Kuai Kikiki
Kakela me Kuke
(KAUPALENAIA)
Poe Kalepa ma
ke Komisina
:: HE :: A
POE LAWELAWE KOPAA
POE GENA NO N MAHIKO
LEHULEHU.
Ina e makemake-oe e hooakaulii
i kau loaa e hele
oe e kuai
PAPALE, PALEILI ame na
mea like nou i ka
halekuai o
S. OZAKI,
Helu 178 Alanui Hotele,
He maikai a ano hou mau ka
makou mau waiwai a he
kaawale mai na pilikia
mai o ke ahi
ame ka
wai.
KAUKA GEO. W. BURGESS
Ua nee ae nei ma Alanui Papu, Helu 1887, kokoke i ke kihi o na Alanui Papu ame Malaaina. E
loaa no ma kona home ma ka hora 10 a. m. a hiki i ka hora 3 p.m. ame hor 1 p. m. Helu
Kelepona aMin 128.
KAUKA GEO. J. AUOUR
Keena Hana 431 Alanui Beritania. Telepona Helu 1851. Hora Hana 10-12 a. m. 3-4 ame
7-8 p. m. Sabati 3:30—10:30 a. m.
..O KE..
Koko Ino ka mea e
loaa ai na Pilikia
ma ke Kino.
E Heluhelu i keia mau Manao.
O KA LAAU-----
AYER’S SARSAPARILLA
--KA--
Iaau nana e hookaawale na ma’i ino mai kou koko aku. He laau hoonoono ai a he laau e hooikaika ana i kou mau iaia apau. O ka Laau Ayer’s Sarsapailla ka laau kaulana loa a puni ke ao holookoa. Ina e hoomau ia ka lawelawe ana i keia laau e loaa ana ka ke oia kino maikai a me ke koko maemae hoi hou mai ka ula o kou mau lehelehe pu’ipu’i maikai kou mau papalina a loaa ke kulana ola kino maikai.
He loaa na pu’u paa o ke kino i ka laau Ayer’s Sarsaparilla e hoopakele ana mai ka ma’i puu paa (Brights’ Disease ame na ma’i oia ano. Ke koi ikaika aku nei makou e lawe ia keia ano laau ma kahi i ike la na ma’i Puu paa apau.
Hoomakaukau ia e Kauka J. C. Ayers.
E loaa no keia mau Huaale ma na hale kuai laau apau.
O KA MA’I HI. e pono ia e maka’ula mamua o ka ma’i eha ma ka puu. He ma’i keia e loaa ana i na makua ame na keiki. No ka loaa ole o ka laau kupono ua nui ka poe i make mai keia ano ma’i mai. O ka Laau Nahu o ka Opu, Kolera, ame Ma’i HI a Chamberlain he laau keia i kupono no keia ano ma’i a ina e haawiia i manawa nona e hoohanaia ai e ikeia no ka pono. He laau maikai keia no ka lawe ana. E pono e hoolawaia na home apau me keia laau. E kii i omole ma kela ia. E hoolaia no kekahi ola kanaka. Benson Smith & Co., na n@n@ nano kuai nei.
HE MOOLELO WALOHAIA
--NO KA--
ONAMILIONA
I LAWE A HUNA MALUIA
MA KA AINA MEHA-
MEHA
MOKUNA IX
KEKAHI MAU HANA MAKAIKIU
“Aia ka hapanui o ka waiwai o Heseka malalo o ka hoopaa bona ana o kela ame keia ano.” wahi a Chalmers. “Ke hoomanao nei wau i ka olelo ana mai a Heseka i kekahi wa aku nei i hala aia ma kahi o $15,000,000 a $16,000,000 paha kona waiwai io malalo o ka hoopaa bona ana.”
“Heaha hoi kana hana me ke dala kuiki?” wahi a Kiwini, me ka nanaina e hoike mai ana ua hiki no iaia ke ha’i mai i ka haina o kana ninau.
“Na Street & Rogers e hai mai kena minau ina no mae lakou e hai mai ana.” wahi a Chalmers. “O ke kanaka e like me Heseka, ua hiki iaia ke kuai i 750,000 kea me keia puu dala. Naauao no kona hana ana i keia mau bila kikoo dala aole e haawiia ke dala i kekahi mea okoa, ola wale no ka mea e loaa ai. Malia paha ua lawe oia i keia huina ma na bila. Ina oia i lawe ma ka bila $1,000, aole e nui ka puolo. Aia paha ma kahi o $30,000,000 ia Heseka ma keia hana ana. he huina keia e ano pupule ai kekahi kanaka. Ina owau keia, ano pupule no paha wau.”
“A heaha ke kumu nui o kona makemake ana i keia puu dala nui hewahewa?” wahi a Kivini i ninau aku ai.
“Haawi pio wau. He mea ia i kuhohonu i ko’u noonoo ana,” wahi a Chalmers. “He kanaka noonoo oie o Heseka no na kumuhana e like me kau i ninau mai nei. He hooholo wale aku no kana i ka hana imua, a hookuu aku no na na mea no mahope mai e nana no lakou iho. Aole no hoi oia i haawi i manawa nona e hoolilo ai i keia mau buke kikoo dala i mea ole. Me keia mau mea, ua hiki ia kaua ke hahai aku ma kona meheu e like me ka hahai ana i kekahi iole lapika iloko o ka hau.”
I keia manawa ua hoomaka iho la o Kiwini e noonoo no na mea e pili ana i keia kumuhana ma na kulanakauhale e like me Balatimoa, Wasinetona ame kekahi mau kulanakauhale e ae o ka hema, me ka manaolana malia paha e loaa ana kekahi wahi meheu. Ua hoouna kauoha aku la oia ma Ladana, Parisa, ame kekahi mau kulanakauhale e ae o Europa, a ua huliia iho la ia mau wahi, aohe no nae wahi mea i loaa mai.
I keia mau ia e hele mau ana o Chalmers no kahi o Carmody. Ua hoolana aku oia i ka manao o Miss Helen Carmody me ka olelo mau aku mai hookomo i ka manao hopohopo iloko ona. I kekahi la, ua olelo mai la ua lede opio nei ia Chalmers he makemake kona e holo aku maluna o kona moku holo lealea i kaheaia o “Helen Carmody,”: a e huli no kona makuakane ame kona mau hoa i nalowale pu ai.
“He manao maikai kela.” wahi a Chalmers i pane aku ai, “hele aku imua a e hoomakukau koke i ka moku i ka lako ai no hookahi mahina ame na lako ai no hookahi mahina ame na lako anau e pono ai no ka hele ana. Mai holo koke no nae ka moku a loaa mai ka lohe mai ko’u mau kanaka e huli nei. O ka la 11 keia o ka mahina. E kali oe a hiki i ka Poalua, oia ka la 16, a ina aohe e loaa kekahi wahi mea, e hoouna aku i ka “Helen.” E hoomaopopo iho oe, he nui na moku e holo nei ma ka moana i keia manawa. He akea keia wahi honua a kakou e noho nei a aia he miliona ka heluna o na wahi a kakou i ike ole ai, a malia paha ala ma kekahi o keia mau wahi ka Heseka wahi i koho ai. Me ko kakou maopopo ole ae, eia paha oia ke holoholo nei ma ka moana akea o ka Pakipika. Ma ka la 16 kakou e houluulu ai i na mea apau, a ma ia la kakou e ike ai i ka hele ame ka hele ole. E hana no nae kakou i keia mea ina aohe e loaa ana na kumu kupono ma o ka huli ana a ko’u mau kanaka. O kekahi no hoi, aohe no o’u makemake e hele ma keia huakai huli au aia wale no a haule na mea apau i hoolalaia e a’u. Aohe i maopopo iua kakou ua hewa o Heseka. E like me ka kakou i ike ai ma kana mau hana ua hiki ia kakou ke hoakaka ia mau mea a o ka kakou mau hoike ku-e aku iaia he mau mea kohokoho wale no ia. He mea maikai no hoi e haawi kakou i manawa no Heseka e ku aku ai ma kekahi o na awa o Europa. Ua kauohaia na awa apau loa e kiai nona a e lohe koke no kakou mai iaia mai ina ola e hiki aku ana ma ia mau wahi a nana ia e hoike mai i kona hewa ame kona hewa ole. He hewa koikoi keia e hookauhihi aku ai maluna o kekahi kanaka hoopono a he mea pono e haawi kakou i manawa no Heseka e kamailio ai nona iho!”
“Ua pololei oe e Mr. Chalmers.” wahi a Miss Carody. “E hoomakaukau no wai i ka moku holo lealea no kekahi huakai loihi. Me he mea la aohe io no paha na Heseka i hana keia mea. He kanaka oluolu a lokomaikai oia. Ua ike no wau he hana hewa loa ka hoopii ana aku iaia me ka maopopo pono ole o na kumu kupono.”
O keia mau hui kamailio ana a keia mau opio i na la apau aole ia no ke kamailio wale ana no no na mea e pili ana i ke kumuhana, aka, ua kamailio laua maluna o na kumuhana he nui wale aku. Ua manao o Chalmers ua kaa mai maluna ona ke koikoi o ka hoolana ana i ka manao o keia lede opio a ua kamilio aku oia i na meahou apau ana i manao ai he mea kupono. He kanaka akamai o Chalmers ma ka haha’i moolelo hoomakeaaka a no ia kumu ua nui loa ka makemake o keia kaikamahine e hoolohe i kana kamailio ana. I na la apau a Chalmers e maopopo ai e hiki aku ana ma kona wahi e kali mau ana ua kaikamahine nei o ke kani koke ae o ka hora.
MOKUNA X
SIMOA KA MEA HANU MEHEU.
I ko Benada Simoa haalele ana aku ia Sana Lui, pau ka loheia ana maliaia mai a o kana mea i hoouna hpe loa mai ai oia ke noi e hoounaia aku i $500 dala iaia ma Nu Olina. Ua nui no hoi ka haohaoia pehea la ia hoouna mau mai ai o Simoa i dala i na wa apau ana e hoouna mai ai i kana hoike ma ke telegarama eia nae he nui ko Kirini hi@mai e holopono ana kana mau hana. I na manawa apau e kauoha mai ai o Simoa i dala e hooko ana no o Kivinia i ka wa hope loa ua kauolha aku oia e huli o Simoa l@aena o ka poe kukulu hale i ka mea nana i kukulu ka hale o Heseka.
He loihi ka manawa i loaa ole mai ai kekahi lono mai a Simoa mai. I ka hiki ana aku o kona mau hoa kakau nupepa ma Nu Olina ua ike iho la lakou i ka inoa o Simoa maloko o ka buke hoopaa inoa o ka Hotele St. Kale a ua kikoo no hoi oia i ka bila dala i hoounaia aku ai eia nae ka mea apiki aohe oia i moe iki ma kona lumi a aohe no hoi aoia i ikeia iho mahope o kona kakauinoa ana i ka buke o ka hotele. Ua hoomaka koke iho la kona mau hoa e huli iaia a no ka loaa ole ua hoomaka iho la lakou e hana i ka lakou apana hana i kauohaia mai ai.
I ko Benada Simoa hiki ana aku ma Nu Olina aohe i pono loa kona mau noonoo no ka mea ua huhewa kana mau hana ma Sana Lui ua hopu aku ola i kekahi kahunapule kaulana o ke kulanakauhale o Kikako me kona kuhihewa o L. Sylvester Vincent keia a no keia kumu ua haalele aku oia ia Sana Lui me ka hookaulua ole. Ua waiho aku oia i kona ukana ma ka Hotele Planter, a kau koke ma ke kaaahi mua loa e holo ana no ka hema.
Ma ke ahiahi o kekahi la a’e ua hiki aku la oia ma Nu Olina, a ulu ae la ka manao e hele holoholo ma ka “Palena Hema.” oia hoi kahi e piha mau ia ana e ka poe makaikai a manao iho la oia malia paha he wahi maikai keia no ka huli ana aku i kana mea e iini nui nei e loaa. O ka “Palena Hema,” he wahi keia ma kekahi wahi kokoke i kekahi lokowai, a he nui na hotele ma keia wahi. I kona hiki ana aku malaila, ua ike aku la o Simoa ua hoolakoia keia wahi me na kukui uwila a e paani ana kekahi mau bana ame kekahi mau kalapu hookani mea kani. Ua hoomaka aku la oia e hele ma o a maanei a huikau aku la me na kanaka e hoonanea ana.
“Hele, Simoa.”
Ua puka mai la kekahi kanaka kino nui mai loko mai o kekahi aluka kanaka a pa’i la ia Simoa ma ka poohiwi a hoomaka ae la e minoaka.
“E heaha kau o Nu Olina nei””
“E?”
“Oia aku la ka’u ninau. Makemake no oe e inu kiahime a’u?”
“Hiki no akahi no wau a maopopo aku la i kau ninau.” wahi a Simoa. “E ka Ilikini elemakule aole wau i lohe mua aia oe ma Nu Olina nei. Heaha kau hana i keia manawa” Mahea oe e hana nei?”
“Aohe a’u hana i keia manawa,” wahi a Dike Benoda. He kanaka kakau nupepa o Dike Beneda, a no kona ona mau aohe oia e paa ma kekahi kulana no ekolu mahina. He kanaka akamai oia ma ka oihana nupepa, a no keia haawina ino i loaa iaia, aole i holopono kana mau hana a ua lilo oia i kanaka aea.
“A nolaila aohe au hana i keia manawa?” wahi a Simoa i ninau aku ai.
“Ae, ua hooku’i aku wau me kakahi ulia ino a ua ano piliki wau i keia manawa.” wahi a Beneda, a wala ae la i kona kiaha a minoaka iho la a ma ka nana aku, ua like a like ke ino ame ka maikai iaia.
(SKETCH OF FIVE MEN STANDING BY THE BOOM OF A SHIP AT THE HELM—TWO LOOK LIKE POSSIBLE BUSINESSMEN AND THREE APPEAR TO BE WORKING ON THE SHIP)
OWAI AE LA HOI KONA INOA? (caption)
O, ua ike wau i kou kumu pilikia, no kou inu nui ole mai ke kumu,” wahi a Simoa i olelo ano hoohenehena aku ai. Lohe mai wau ua komo oe i ka hui hoole waiona a ua nui ko’u lohe i ke kamailioia o keia mea. Pono oe e haalele i kau hoohiki hoole waiona a e hui pu mai oe me makou.”
“Mai helu mai oe ina ke hele lalau nei wau ma ko’u alahele.” wahi a Dike Beneda, “o ka’u mea wale no e makemake nei e maopopo, heaha la kau kumuhana o ka hiki ana mai nei i Nu Olina nei.”
“Aohe ou kuleana e ninau mai ai no ia mea.”
“Pololei oe, eia nae, aohe oe i haha’i pololei mai nei i ka haina o ka’u ninau. Ua maopopo no ia’u kou kumu a ke hiki ana mai nei. Eia oe ma ka meheu o keia hihia huna malu i na onamiliona.”
“Malia paha na kekahi poe i kamailio aku ia oe i keia mea. Aole e hoike aku ana ka hoike i na mea apau. Makemake oe e inu hou?”
Ua pauiho la ia laua he mau kiaha a la manawa ua ha’i pu aku la o Simoa i kana kumuhna o ka hiki ana mai eia nae, ua paa ola i ka ha’i ana aku i na kauoha i loaa mai ai iaia mai Nu Ioka mai. Ua kono aku la oia ia Dike Beneda e hele like laua ma ka haleaina e ai i ko laua ainaahiahi a ua ae mai la keia keonimana.
I ko Simoa puiwa ana ae mai kona hiamoe ae i ka auwina la o kekahi la ae ua hoomaopopo iho la oia aia oia maluna o kekahi moe e like me na moe o ka moku kahi i moe ai a ua hoomaopopo pu iho la oia aia oia ke ioia nei e like me ka ioia ana o ka moku. He mau sekona kona noonoo ana i keia mea a na manao iho ia oia no ka nui loa paha o kana inu ana i ka po o ka la mamua iho ke kumu i ulu mai a keia ano e i kona kino ame keia noonoo ua haule hou aku laoia e hiamoe.
I kona puoho hou ana ae, ua poeleele a hoomaka iho la oia e hoolono. Lohe aku la oia i ka owe mai o ke kai ame ka uluina o na likini o ka moku. Ma ka manawa o kekahi kukui e a ana ua ike aku la oia e wahiho mokaki mai ana kona mau lole ma ka papahele.
Ua lalau aku la oia i ua mau lole nei ona a hoomaka iho la e komo me ka awiwi a no ka luii o ka lumi ana e noho nei aohe he hiki pono. Ia manawa lohe aku la oia i ka nonoio mai o ka pukaihu o kekahi mea iloko o ka moe ma kekahi aoao mai wehe aku la oia i ka paku a ike aku la e moe mai ana o Dike Beneda a hoomaka koke aku la oia e hooluliluli i kona hoa.
“E ala ae oe e Beneda.” wahi ana i uwa iho ai Hoko o na pepeiao o Dike. “eia kaua ua paa i na powa o ka moana!”
Ua hookaakaa ae la o Beneda i kona mau maka imoimo mai la huli aku ia ke alo i ka paia a hoomaka hoa iho la e hiamoe. Ua hoomaka hou aku la o Simoa e hoaia iaia.
“Ke law malu ia nei kaua aole oe i lohe?” wahi a Simoa i hawanawana aku ai me ka leo ua piha i ka maka’u “E ala mai oe a e hoomakaukau oe ia oe iho e make e like me ka kanakamakua.”
“E hoopoina oe i keia mau noonoo ana.” wahi a Dike Beneda, a pani hou ae la i kona mau maka. Eia nae ua hoomau aku la no o Simoa i ka hooluliluli ana a hiki i kona lanakila ana. Iaia e komo ana i kona lole ua komo mai la iloko o ka lumi a laua e noho nei kekahi seia, a la manawa ua alaalawa ae la o Simoa ma o a maanei o ka lumi no ka nana ana i mea eha eia nae aohe he wahi mea o loko o ka humi e hiki ai ke lalau aku a hoopakele iaia iho. Ua nana mai la ua sela nei no kekahi mau sekona la laua nei a kamailio mai la.
“He manao mai nei ko’u e hele mai e hoala ia olua. Ina e paa ko olua lole e pii ae olua maluna o ka oneki malia paha ua pololi olua i keia manawa.”
Nana aku la o Simoa iaia me ke ano kanalua a ninau mai la, “Owai oe?”
“Owau ka malama moku.” wahi a ua kanaka nei.
“Malama moku o ka moku hea? aohe ou ano like me ka poe powa o ka moana?”
No keia mau olelo a Simoa ua akaaka ae ia ua kanaka nei.
“Ma ka’u nana aku ua ano huikau olua e na keonimana.” wahi a ua sela nei i pane mai ai, “Ua poina ka hapa olua ia’u? Owau ka malama moku o ka mokukuna “Same Waka.” I ka po nei hoi ua maopopo pono olua ia’u.”
“Aohe o’u hoomaopopo iki i na mea i hanaia ma ka ponei.” wahi a Simoa. “Aia maua ihea, a ihea maua e manaoia nei e lawe aku?”
“E pii mai olua iluna o ka oneki,” wahi a ua sela nei, “he wela loa o lalo nei. “E pii mai olua iluna o ka oneki e ike ai ia Kapena Paka, malia paha e hoomaopopo ana olua iaia,” wehe aku la ua sela nei i ka puka o ka lumi a hele aku la no kahi e.
“Pehea kou manao i keia mea?” wahi a Simoa i ninau ae ai me ka hoao ana e noonoo i na mea ana i hana ai i ke ahiahi o ka la i hala iho. “Ke hoomaopopo anei oe i kekahi mea, e Dike Beneda?”
“Aole loa,” wahi a Dike, “Ke hoomaopopo nei wau i ko’u hui ana me kekahi poe kanaka sela ma kekahi wahi, oia wale ae la no.”
Ua hele aku la laua ma kekahi aia olioli a pii aku la maluna o kekahi wahi alapii. I ko laua hiki ana aku ma ka puka, ua pa mai ka makani huihui a na ia mea i hoomaikai ae i ko laua hau ana. I ko laua hiki ana aku maluna o ka oneki, ua ike aku la laua i kekahi kanak a ano pokole me na mea kinohinohi gula ma kona mau poohiwi ame ka papale kapu. I kona ike ana mai ia Simoa ame Beneda, ua hele mai la oia ma kahi e ku ana keia kanaka.
“Pehea oe, e Mr. Simoa?” wahi a ua kanaka nei me ka haawi ana mai i kona lima akau no ka lululima ana, a ua haawi aku la o Simoa i kona lima me ke ano hopohopo. “Pehea oe e Mr. Beneda? Maikai anei kou hiamoe ana?”
“Ae, maikai ka maua hiamoe ana,” wahi a Simoa i pane aku ai me ka loaa ana iho o ka manao aohe laua i haule iloko o na lima o na powa, a no ka maikai o na helehelena o ke kanena Ianaki, ua pau loa ae la ko laua mau manao hopohopo.
“E ke Kapena.” wahi a Simoa i ninau aku ai, “Ua huikauia maua ma na mea e pili ana i keia huakai holomoana a maua. Pehea maua i kau mai ai maluna o keia moku, a ihea maua e laweia nei?”
“Malia paha ua ano huikau loa ia no paha olua i ka ponei.” wahi a ke kapena i pane mai ai. “Aole anei o olua pololi” Ke manao nei wau ua poloii olua. Ua makaukau i ke kuke ka olua mau mea ai. E hele mai olua e ai oiai e wela ana na mea ai a na’u ia e haha’i aku i na mea apau.”
Ua komo aku la lakou maloko o ka lumi aina, a ua lawe mai la kahi kuke paele i ka laua mea ai, palaoa, pipi palai, uala, kope ame kekahi mau mea ai e ae. Ua hoomaka iho la keia mau kanaka e hoonuu i na mea i waihoia mai imua o laua.
No ka lilo loa o keia mau kanaka i ka hoonuu i ka mea ai, aohe laua i pane leo mai i ke kapena no kekahi mau minute, a mahope, ua olelo mai la o Simoa, “E ke Kapena, e oluolu oe e haha’i mai oe i ke kumu o ko maua lilo ana i mau malihini na ke kapena maikai o ka mokukuna ‘Same Waka.’”
He moolelo loihi keia, a o na mea ano nui no nae o ka moolelo, i ke ahiahi, ua hele holoholo aku o Bile Hao, ka malama moku ma ke kulanakauhale o Nu Olina, a ma na hora o ke ahiahi okoa no, ua loaa aku la o Simoa ame Beneda iaia. Ua olelo mai la laua o ka malama moku ke kanaka maikai hookahi a laua i hui pu ai, a aohe he mea pono o kona haalele ana aku ia laua.
“Ma ka hora eono o kakahiaka nei ko olua hiki ana mai me Bile.” wahi a Kapena Paka me ka haawi ana mai i ka pipi palai ia Simoa no ke kolu o ka manawa. He mea oiaio no, ua ano loaaia olua i ka makani, eia nae, ua kamailio pololei mai olua ia’u he makemake ko olua e hele ma kekeahi huakai holo moana a i ko’u olelo ana aku e holo ana makou no Havana, ua olelo mai olua o kahi ia a olua e ake loa nei e ike.
“Ua uku pololei mai olua i ko olua ukumoku a ua haalele aku kakou no ke Kaikuono nei o Mekiko i ka hora ewalu iho nei o keia kakahiaka. Ua hoomaka iho la olua e hana keaka no kekahi manawa, pii maluna o ka pou ihu o ka moku ame kekahi mau hana keko e ae, a i ka pau ana ua hoi aku olua no lalo o ka moku. Oia wale ae la no na mea e pili ana i ko lua hiki ana mai iluna nei o ke ‘Same Waka.’”
“Mai ko’u wa opiopio loa mai he ake nui ko’u e ike ia Havana a o ka mea apiki loa pehea la i komo mai ai iloko o’u e hele i keia wa, ela nae, aohe e hiki ke pale ae,” wahi a Simoa i olelo mai ai. “E hoolana i kou manao e Beneda a e inu kaua no ka pono ame ke ola o Kapena Paka ame kona mau sela wiwoole.”
(Aole i pau.)
O KA POE HOLO BAIKIKALA, aole he popo no lakou e hele wale me ka lawe pu oia ana i omole Hamo Eha a Chamberlain. He laau hamo maikai keia no na ano eha apau ame ka eha maui. E loaa no ka oluolu ma ke hamo mua ana. E hoao. Benson, Smith & Co., Ltd. na agena nana e kuai nei.
Ka Poka Nui
ame ka
Poka Iki
He Moolelo no kekahi mau Opio Elua
Iloko o ke Kaua Kuloko wawahi
Mana Kauwakuapaa o
Amerika Huipuia.
(Unuhiia e S. K. Nawaa.)
MOKUNA XXXV.
KA MAKE ANA O KE KIU.
“Ua hookolokoloia oe ano iho la. A oliai, he generala wau iloko o ka oihana kaua o na Mokuaina-Huila, ke hoahewa aku nei wau ia oe ma ke ano he kiu. E ae mai hoi oe e manaoio iho i ko’u wa e hookau aku ai i ka’u hoopai aole loa he manaolana malaila. E make oe i ka hora ewalu o ka ia apopo. E hoouna aku ana wau i ke kahunapule i ou la, a ke manaolana nei wau e hoomakaukau ana oe ia oe iho no ka haawaina e kau aka ana maluna ou.”
“Ua paa anei kou manao?” i nanau mai ai ke pio.
“Ae, oia ko’u manao paa. E hookaawale aku i ke pio. Ina oia e hoao ana e holomalu aku, e ki iaia i ka pu.” a ia wa i huli hoi aku ai ke generala no kona hale lole.
Ua hele aku la ke pio me ka nanaina hoohalahala e manao ana paha he hana paani wale no keia i hana ia aku mamula ona. Ua hoohala iho ke kahunapule me ia ia po iloko o ka hale hoopaa pio a no ka hope loa ua hoomaopopo iho la ke pio e kau i’o aku ana no ka hoopai maluna ona.
He mea oiaio, ua hanaia ae ka amana li i ka wa i puka mai ai ka malamalama o kekahi la ae ma ke kakiaia ana o kekahi pani puka hale maluna o kekahi lala alani e oioi ana iwaho. I ka hora i oleloia, ua laweia mai la ke pio a lila iho la imua o ke alo o na kanaka apau i hiki ae; a he mau minute pokole mahope iho ua kanuia iho la kona kino ma kahi ona i liia ai.
Mahope o ka pau ana o keia hana, ua kono mai la o Generala Cusaka ia’u e hele pu aku maua no ko Seridona kahua hoolulu. Ua loaa aku la ia maua ke generala e makaukau ana e hele aku no ka makaikai ana i kona mau pualikoa.
“Ae, e Cusaka aloha kakahiaka oe. Heaha na mea hou ma ko oukou wahi.” wahi a Seridona i ninau mai ai.
“Ae, e ke generala. Ua hele mai nei wau e hoike aku ia oe ua paa mai ia makou ke kiu ma Pou Penaia i ka la inehinei, hookolokoloia ia ka po nei, a liia aku ola i kela kakahiaka.”
“Helu ekahi kela. Pela iho la e hana ai. Ina pela mau iho la e hana ia ai e koe kakaikahi ana na kiu ma keia awawa.”
“Ke hauoli nei wau i kou apono ana mai la i ka’u hana i hana ai, no ka mea-----------”
“Ua oki, ua oki, mai nana ia mea ke kiu, e Cusaka. Ua pau ae la kana hana. He kupono anei kou lio no kekahi hoonee kaua hou ana aku? Ua oi aku ia mamua o kau kiu.” wahi a Seridona i ninau mai ai me kela kulana uwila ona.
“Ua makaukau i na manawa apau, e ke generala.” wahi a Cusaka i pane aku ai me ka awiwi.
“Ua pono. Malia o makemake wau ia oe e hele ae ma keia mau kuahiwi. Ina pela iho la e hoouna aku no wau i ke kauoha i keia ahiahi. La maikai oe.”
O keia iho la ka hopena o ke kiu.
“O Seridona iho la no ia.” wahi a Osebone i puana aie ai. “Ua ike oia i na pilikia e loaa mai ana mai na kiu mai. Ua piha ke Awawa i na kiu ia manawa. Ke hoomanao nei wau ia hana i hana ia ai, aka aole i loaa mai ia’u na mea e pili ana no ka hana i hana. Me he mea la o ka liia ana o ua kanaka la ka mea nana i hookuke aku i na kiu mai ia wahi aku. Ua pololei o Seridona ame Cusaka ma la hana ana.”
“Ke kulike nei ko’u manao me kou.” wahi a Generala Filitia. “O ke kino kanaka hookahi aole ia i heluia ma keia hana o ke kaua. I ka wa e lilo ai kekahi kanaka i kiu ua lawe ola i kona ola iloko o kona mau ilima.”
“Well, e na keonimana.” wahi a Osebone, “ke manao nei wau pono ia kakou ke hooluolu. Ua maopopo no la oukou aole e kali mai ana ka hoailona hoala hiamoe, ina no ia he generala a i ole he wahi kanaka kakau nupepa wale no.”
“Oia ka olelo naauao.” wahi a ke generala i pane mai ai me kona kolo ana aku iloko o kona kihei huluhulu. “Gu-di-naita oukou.”
Ua hana like aku la kela ame keia e like me ka ke generala i hana ai a iloko o ka wa pokole aia makou iloko o ka hiamoe kulipolipo.
MOKUNA XXXVI
KA HOAO HOPE.
“Maalo aku la ka uwahi:
A ikeia aku l ana pu o ka Akau e kie
iho ana maluna o na enemi.”
I ke kau hooilo o 1864 ame 65 i hala ae ai a e hoomaka mai ana hoi na kula e hoike mai i ko lakou mau mea ulu uliuli ua hiki aku o Seridona i ka pahu hopu o kana huakai e nee ana nokahakai. Ua haole iho o Wiliminitona mamuli o ka lilo pio ana mai o ka Papu Fika, a ua hoopuipui loa la aku ka ikaika o na laina koa e paa ana mamua iho o Piabuka ame Rikimona. Ua ike la aku ko Li hooikaika ana e mawehe ae i kela paa la ana ona oiai ua hakoko mai la ola no elua manawa aole no nae ia he mau hakoko ano nui oiai ua opa pu ia aku ola i kinohi no. Ma Senanadoa ke houluulu ae la o Seridona i kona ikaika apau no ka palo ana mai a mawehe ae i kona alahele e hui mai ai me ko Kalani mau mahele. Ua hoi aku ka Mahele Eono ma ka laina o ka paa ana aku ia Li. Ma ke ano o na mea apau e ike la ana aia kekahi hana nui a koikoi ke waiho mai la mamua o na Pualikoa o Potomake (he inoa i kuluma a i kapaia maluna o ka huina o na pualikoa Federala). Ma na wahi apau ua ikeia ia aku na hoomakaukau ano nui. Ke komo mai la na pualikoa hou ame na lakou ai ame kaua a o ka anoi nui wale no iloko o kela ame keia oia no ka hoea mai o ka manawa e ulele iho ai a hookuu ia ae hoi na miliona kanaka e noho kauwakuapaa ana.
Ua hele aku wau e nana i na laina koa kiai oiai he aliikoa wau e malama ana i k ahana ia manawa i kekahi po o ka mahina o Maraki a hiki hou aku la wau i ko’u hale lole i ke aumoe me ka lohi nui a makahiamoe no hoi. Ua emi iho ka a ana o ke ahi o ko makou hale lole la manawa a e moe ana hoi o Denisa ma kona wahi moe. Ua peku aku la wau i ke koena waole a noho iho ia wau e noonoo no na mea i hoea mai ia’o iloko o ke kaua. Aole i maopopo ia’u ka loihi o keia noho ana o’u ma kae o ke ahi oiai ua hiamoe iho la wau iluna o ko’u noho. Me ka puiwa nui i aia ae ai wau mamuli o ke kupinai ana mai o na leo pu i paku’i koke ia mai hoi e na leo o na pukuniahi.
“Berora! ela hou no la” wahi a Denisa i hooho ae ai me ke ala ana mai a kuakuai i kona mau maka. “E ka mekia aole anei ou lohe aku i kela mau leo e haiuku mai nei”
“Ae, ua lohe wau ia mea. Eia hou no ua poe enemi nei o kakou ke oueu mai nei.”
“Aia la hoi i hea keia kaua?”
“Ma ka hoomaopopo ana i ke ano o ke kani ana o na pu aia loa ikahi mamao.”
“Ke hoopapau loa mai ia lakou ia” wahi a Denisa me kona aia ana ae iluna a komo iho ia i kona kana. “He hakoko keia me na pu raifeia: maila paha ke makemakeia nei kakou e lilo pio aku.”
“Ua ala anei oe e Mekia Wilimona?” wahi a Konela Hadina i ninau mai ai me ke kiei ana mai iloko o ko maua hale lole.
“Ae, e ke konela aole wau i hoi e hiamoe i keia manawa.”
“Eia hou no ko kakou mau enemi ke hoeueu mai nei.” wahi a Konela Hadina i pane mai ai. “Aia la hoi ihea keia kaua?”
“O ka’u ninau hookahi no hoi ia.” wahi a Lukanela Malone i pane aku ai a ia manawa hookahi no hoi aia ola ke komo la i kona lole wawae. “He kauoha anei kau e ke konela?”
“Ae, e Malone: oiai ua paa kou lole he mea pono la oe ke holo aku ma na hale lole o na aliikoa a hoala aku ia lakou. He mea pono ia kakou e makaukau mamua o ka loaa ana mai o ke kauoha. E Wilimona, e oluolu anei oe e kauoha aku i ka poe hookani pahu e hookani aku i ka lakou mau pahu. Auwe no hoe e! e hoolohe aku i ke kani mai o na pu raifela. A! ke hoomaka mai la na pualinukaa i ka lakou hana.”
Ua haalele iho la wau i ke konela e hoopau aku i kana mea e kamailio ana a holo aku la wau i ka hale o na keiki hookani pahu a ua loaa aku la lakou ia’u e kuku ana mawaho o ko lakou mau hale lole e hoolohe ana i keia hakoko e paloia mai nei. He nui o lakou e paa ana no i ka lakou mau pahu: no laila ua hooko koke aku la lakou i ka’u kauoha a hookahi ka huikau ana aku o keia mau leo pahu me na leo o na pu e kakani nei.
Ke omaka mai nei ka malamalama i keiaa manawa, a iloko o ka hapalua hora mai ka wa a makou i lohe ai i na leo o na pu, ame ko makou makaukau ana, ua hui pu aku la na pualikoa mai ka aoao hema a i ka akau ma ka paio ana. Aaole he kauaoha i loaa mai la makou, koe wale no ka makaukau ana e hooko aku i ke kauoha ke kani mai ka o-le o ko makou keena kaua: nolaila ua ku iho la ko makou regimana me na koa iloko o ka laina, e hoolohe ana i ke kani mai o na pu me ka noonoo ana heaha la ke ano o keia hoouka kaua e paioia nei.
“E Mekia Wilimona.” wahi a Iakina i pane mai ai ia’u, iaia i hoea mai ai maluna o kona lio “ua makemake o Generala Filita e hele aku oe e nana i kahi o kela kaua.—Ua manao ola ua hiki no hoi ia oe ke hookuu mai ia Wilimona, e ke konela.”
“Ua pono, e Iakina, ina ola ka makemake o ke kenerala.” wahi a Konela Hadina i pane aku ai.
“Ua pono, nolaila eia wau ke hele nei.” wahi a’u i pane aku ai me ka hoihoi no ka loaa ana mai o keia hana la’u.
Iloko o na minute pokole, ua Iliki aku la wau i ke alanui nui e holo pololei ana no ke kahua o ka palo a la’u e holo ana ua komo mai ia ka hauoli iloko o’u no ko’u ike ana aku i na hiohiona o ke kaua. He oiaio aole i nui loa ko’u wa i hiamoe ai, aiea nae aia ko’u noonoo ke uwila la a ke makemake la wau i ka holo o ko’u lio. Iloko o hapalua hora, ua hiki aku la wau i ke alanui Jerusalema, a loaa aku la ia’u he heluna nui o na mahele koa e nee awiwi ana no ke kahua o ke kaua.
“Heaha ka mea i hoea mai?” wahi a’u i ninau aku ai i kekahi o na aliikoa.
“Ua wawahi mai nei o Li i ko kakou laina koa, a ua lilo pio aku nei ka Papu Kekemana.” oia ka pane i loaa mai ia’u.
O keia kekahi o na mea hou hoopihoihoi, a oia no hoi ka mea nana i hoike mai i ke kumu o keia paio hahana ana. Me he mea la ua lele kaua mai na Konofedereta ma ka heluna nui, no ka mea, aole e haule wale keia papu oiai ola kekahi o na pau ikaika loa o makou.
Ua puka mai ka malamalma o ka la i keia manawa a’u e holo nei, a ia’u i kaa aku ai ma kahi o ka mahele o Peneselevenia ua ike aku la wau ua pau keia mahele i ka hele aku no kahi o ke kaua. Aole i loihi mahope mai oia manawa,ua hiki aku la wau i kahi e palola ana.
Ua ike aku la wau aia kekahi mahele koa o na Konofedereia ke komo la iloko o ka papu a e nee ana me ka awiwi no ke kokua ana aku i na mahele ihala mua aku. Ia manawa ua ike aku la wau i ka manao o keia hoonee kaua a na Konofedereta, oia hoi e nee ae ana lakou e oki ae la makou mai ke kahua aku o ko makou mau lako ai e waiho la ma ka Lae Kulanakauhale.
I ko’u hiki ana aku ma kekahi ahua ua kaohi mai la wau i ko’u lio a ku aku la e nana i ka nee ana mai o na Konofedereta ma kekahi owawa. I keia manawa ua komo mai la kekahi mahele iloko o ka papu a nee mai ia me ka awiwi a i ka hui ana ae o kona mau koa me ko ka mahele i komo mua mai ai ua hiki ke ike ia aku ko laua ikaika palena ole. Ia manawa ua holo mai ia o Generala Hatafarana me kekahi o kona mau kokua aliikoa a i kona ike ana mai i ko’u ku aku ua kahea mai la oia ia’u me ka leo nui.---
“E ka mekia, ua ike anei oe i kahi i hala aku nei o keia pualikea?”
“Aia ma keia aoao o keia puu ma o la.” wahi a’u i pane aku ai me ke kuhikuhi pu ana aku i kahi a’u i ike mua ai i ke kau ana mai o na puku@ahi.
“E oluolu hoi oe e holo aku a lawe mai ma kahi o ka hana.” wahi a ke generala i pane mai ai, a ia manawa