Ka Nupepa Kuokoa, Volume XLI, Number 21, 22 May 1903 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

6 NUPEPA KUOKOA, MEI 22, 1903.

 

Ka laau hookahi e hoopau ai i ka hu'i a hoola hoi i ke kumu o ka eha. He hikiwawe loa kana hana i na iwi a kino paha i loaa i ka eha, a he pau io no ka eha. He noho mana oia maluna o na ano eha apau, he hoomalielie mai i na ano ikiiki o na aalolo a kipaku i na pilikia apau. He hiki oia ke pulumi pau i na hu'i o na aalolo, rumatika, la-au o na ami, kua eha, anu maeele, eha o na lima ame na wawae, anu, pepeiao, hu'i, niho hu'i, ame na hu'i, ikaika e ae mai ko loko ame ko waho.

Aila Kikapu

He Ola Hikiwawe no na Ma'i Maeele a pau.

Ua loaa i kuu kane ka maeele ikaika iloko o na aalolo ma kona helehelena ame kona poo. Ua hoao mau ia na mea apau a maua i ike ai e hiki ai ke hoopau i keia pilikia nui aka aole he wahi mea a loaa o ka oluolu. O ka hope, ua kuai aku la maua i ka Aila Inikini Kikapu a hoomaka aku la no i ka hamo ana a o ka loaa koke aku la no ia o ka oluolu i ka la hookahi. Owau no kekahi i hamo no'u iho no ka eha o ko'u puu a o ka loaa koke no ia o ka oluolu. Ke hoomaikai nei maua i ka loaa ana o kekahi mea nana e hoomama mai i na ano maeele apau. "O ka pane keia a Mrs. A. Kreuter, 413 N. 9th Street, Sheboygan, Wis. @

 

25 KENETA KE KUMUKUAI A HE LOAA MA NA HALEKUAI APAU. KUAIIA E HOBRON DRUG CO.

 

Nuhou o ko na Aina E.

(MAI KA AOAO EKAHI MAI.)

 

KAAAHI POINO.

            WAIPUNA, WELA, Mei 14.-Ua poinoia kekahi kaaahi maanei i keia la. He eha mau ohua i make a he iwakalua i eha.

 

MA'I O MARCONI.

            ROMA, Mei 15.-Ua loaa ia o Sinoa Marconi i ka ma'i i keia la, a ua kauoha aku kona mau kauka e hoomaha oia. Ua nui kana hana iho nei no na mea e pili ana i ka uwea telegarapa uweaole. E hele ana paha oia no Suisulana e hooluolu ai.

 

AOHE HE HIKI KE HOOEMI.

            LADANA, Mei 15.-Ma ka haina a ke Kakauolelo Kaua ia Sir Charles Dilke iloko o ka Hale o na Makaainana, ua kukala ae oia aohe he mea pono no Beritania Nui e hooemi i kana hoomakaukau kaua ana, no ka mea, ke mau nei ka hoopii ana o Farani ame Rusia i ko laua mau pualikoa ame mokukaua.

 

PAUAHI MA DENEVA.

            DENEVA, Mei 15.-Ua pau maanei i keia la ka Halepule Hoolepopo St. John, ka halepule nani loa o keia kulanakauhale.

 

KU-E NA HUI ALAHAO I KE KO HAWAII.      

            KIKAKO, Mei 15.-Ke kamailio nei na alahao no ka hooponopono ana i na uku maluna o ke kopaa i mea e hoopakele ai i ka oihana hana kopaa o na Mokuaina, a i mea hoi e houuku ai i ke komo nui ana mai o ke ko Hawaii ame Kuba.

 

HOONUI I NA KOA AME MOKUKAUA.

            MADERIDA, Mei 15.-No ka maika o ke kulana waiwai o ka aina, ke manao nei ke Aupuni o Sepania e hoonui ae i na koa ame na mokukaua. He umi mau mokukaua hou i makemakeia ame ka paku'i ana aku i hookahi mahele koa i ka puali kumau.

 

HAKAKA HOOMAINOINO A NA TUREKE.

            CONSTANTINOPLE, Mei 15.-Ua loheia mai Macedonia mai ua nui ka hoomainoinoia o na Iudaio ma na wahi e ulu nei na hoohaunaele. Ua hoounaia aku na puali koa no Monastir.

 

POINO O SHARKEY.

            NU IOKA, Mei 15.-Ua loaaia o Tom Sharkey, ke kaeaea pelepele o na la i hala, i kekahi ulia poino iaia e hakoko ana i keia la. Aole i maopopo pono loa ke kulana o kona eha i na kauka, eia nae, ke manaoia nei i keia manawa e make ana oia.

 

HOOPII HANA HOOMAINOINO.

            NI IOKA, Mei 16.-Ua hoopuka ae o Generala Miles i kekahi leta e olelo ana ua hanaia na hana hoomainoino ma Pilipine malalo o ke kauoha a kekahi mau aliikoa.

 

EONO MAKAHIKI HOOPAAHAO.

            MINEAPOLIS, Mei 16.-Ua hoopa'iia e paa no eono makahiki ma ka halepaahao o Meia Ames i pau no ka hewa lawe waiwai kipe. Ua hoohalahala oia.

 

HOOPAHUIA NA HALEPULE O NA PAELE.

            KIKAKO, Mei 16.-He elua mau halepule o na Paele i hoopahuia me ke dainamaita i keia la, no ka mea, ua haiolelo na kahunapule o keia mau halepule no ka apono ana i na ilikeokeo.

 

HOOMAKAUKAU KA SHAMROCK.

            GOURAKA, Mei 16.-Ke hoomakaukau nei ka Shamrock III no kana huakai ma ka Atelanika no Amerika.

 

KA RULA AMERIKA MA PILIPINE.

            ROMA, Mei 17.-Akahi no a hoike mai o Mgr. Guidi, ka mea i hoounaia e ka Pope no Pilipine no ka nana ana i ke kulana o ka hoomana Katolika malaila, i ke kulana maoli oia wahi.

            Ma kana hoike ua olelo mai ka Bihopa ua loaa aku iaia ke pii mau nei ka maikai o ke kulana ma na wahi apau. Ke apo mai nei na kanaka i ka hoomalu ana a ke aupuni Amerika, a ke maikai ae nei ke kulana waiwai o ka lahui malalo o ka hookele aupuni kivila ano.

            WASINETONA, Mei 17.-Ua hoike mai ke kiaaina o ka mahele aina o Cagayan i ke ino o ke kulana maloo o kona apana. Eia ke lukuia nei na kanaka e ka ma'i a ua hanainoia na mea ulu ai e ka waikahe.

 

KA HAKAKA KU-E IUDAIO.

            ST. PETERSBURG, Mei 17.-Ua hoopukaia ae kekahi leta a ka aha kuhina e papa ana i na Iudaio aole e ku-e i na koa e hoao ana e kipaku ia lakou. Ke pii mau ae nei ke kupilikii o ke kulana.

 

KANALIMA I EHA.

            BRIDGEPORT, Mei 17.-He kanalia poe i eha ma o kekahi hakaka i ulu ae mawaena o ka poe hui uniona ame ka poe uniona ole e hana nei ma na alahao o na kaa alanui. Ua alualu ka poe haunaele i na kaa a hiki i ke taona a kiloi i na kaa mai ke alahao ae, a pepehiia ka poe hana. O kekahi poe i eha, he poe lakou e nana wale aku ana no.

 

KA HOOLEWA O MABINI.

            MANILA, Mei 17.-O Aguinaldo, me kekahi huina o 8,000 Pilipino ka i komo pu iloko o na hana hoolewa o Mabini ma keia la.

 

HANA KALOHE MA KE KEENA OIHANA LETA.

            WASINETONA, Mei 18.-Ua ulu ae ke pihoihoi ma o ka hoike ana mai o Tulloch i kekahi mau mea e pili ana i ke Keena Haleleta. Ua olelo ae oia he nui na hana kalohe e hanaia nei ma ia keena, he nui ka poe e ukuia nei me ka loaa ole o ke kuleana e ukuia ai, a ua hookuu wale ia ka poe apuka. Ua olelo mai oia ua maopopo no keia mau mea ia Perry Heath, ke Kokua Lunaleta Ekahi mua iho nei, a ua huna oia i ka hoike ana ae i keia mau mea.

 

KAPAKU I NA HALE WAIONA.

            MANILA, Mei 18.-Ua papa o Generala Davis i ke kuaiia o ka waiona he elua mile mai kekahi wahi noho mai o na koa.

 

PILIKIA KE KO O POKO RIKO.

            SANA JUANA, Mei 18.-Nui ka maloo o keia mau la a ua nui ka pilikia i loaa aku i ke ko ulu.

 

HOOMAKA'UKA'UIA NA KOREA.

            SEOUL, Mei 18.-Ua hooweliweli mai ke Kiaaina o Quelpaert e pepehiIa no a make ka poe Korea e hoolilo aku ana i ko lakou mau aina i na Iapana, a i ole, kokua aku paha i na Iapana ma na ano apau.

 

KINA AME RUSIA.

            PEKINA, Mei 18.-Ma na hana hope loa i ikeia iho nei ua hoikeia mai aole o Kina i ku-e ino loa aku ia Rusia. Ua hoopukaia ae kekahi lohe i keia la e hoole ana o Kina i ka wehe ana ae ia Manakuria i ka hookomoia ana mai o na waiwai o na aina e.

 

HOOLE NA LUNA AUPUNI.

            WASINETONA, Mei 19.-Ua olelo ae na luna aupuni o ka oihana leta he mea imi epa keia hoike a Tulloch e pili ana i ka hunaia o na hana karaima ame ka poe hana karaima o loko o ka Oihana Leta. Ke mau nei no ko Tulloch hoopaapaa ana maluna o keia mea.

 

MALAMA I KE KUIKAHI I HANA IA.

            CARACAS, Mei 19.-O Amerika Huipuia wale no ka mana i malama i ke kuikahi uwao o The Hague. Aohe i malama pono kekahi mau mana nui e ae i keia mea.

 

E KOKUA ANA O ALFONSO.

            MADRID, Mei 19.-I ka weheia ana o ka Ahaololo e ka Moi Alfonso ua olelo mai oia e haawi mai ana oia i ke kokua ikaika ana no ka hana hou ana a holopono n mea e pono ai ke aupuni.

 

HAKAKA KU-E HOOMANA.

            PARISA, Mei 19.-Ke ulu ae nei na hoohaunaele pili hoomana i na la apau, a eia ke hoopa'i mau ia nei na moneka e ka aha hookolokolo.

 

KA HAKAKA KU-E IUDAIO.

            ST. PETERSBURG, Rusia, Mei 19.-Ua hoopau aku ke aupuni o Rusia i ke Kiaaina o Kishineff no ke kumu e pili ana i ka hakaka ku-e Iudaio i ulu ae malaila. He nui na hana hoomainoino.

 

HAALELE AKU I NA PAUMA WAI.

 

            I ke kani ana o ka hora eono o ke ahiahi Poakolu nei, ua hooki iho la na wiliki ame na paoahi o na paumawai aupuni o ke alanui Beretania ame Kalihi i ko lakou hana ana. No keia kumu, ma ke kakahiaka Poaha nei, ua ikeia iho no ka manawa mua ua uuku loa ka wai ma ke kulanakauhale nei.

            O ke kumu o keia pilikia, oia no ka hoohemahema ana o ka Ahaolelo i ka hooholo ana i ka haawina pilikia kuikawa o ke keena wai, a nolaila, ua kauoha aku o Andrew Brown, lunanui o ke keena wai, ma ka Poalua nei e hooki ka hana ana no ka mea, ua hoole na wiliki ame na paoahi paku'i i ka hana ana; a aia wale no a ukuia aku ko lakou mau ukuhaana o eono pule ae nei i hala. Aohe lakou i ukuia no ekolu ae nei la uku hana, no ka mea, o ka rula i keia manawa, e ukuia lakou i kela ame keia elua pule, a no ke dala ole, aohe hiki ia Lunanui Brown ke uku ia lakou.

            Ma keia panikuia ana o keia mau pauma wai, ua emi mai ka lako wai o ka la hookahi mai ka ewalu tausani a i ekolu tausani galani wale no, a o keia ekolu tausani galani, mai na luawai mai ia o Nuuanu, a aohe i lawa keia lako wai no ka hoolako ana i ke kulanakauhale nei.

            He mea oiaio eia keia kulanakauhale ke paulele nei maluna o na pauma wai ma Alanui Beretania ame Kalihi. Na keia mau pauma wai e pauma nei ka wai mai lalo ae o ka honua a hoopiha aku i na luawai maluna o ka pali, ahe elima tausani galani wai ko laua loaa wai o ka la hookahi.

            Ma ko laua paa ana, ua nele ka poe e noho nei ma Manoa, Makiki, ame kekahi mau wahi e ae i ka wai, a ma ke kulanakauhale, aohe he ikaika o ka wai. Ina paha e hoomaka ae kekahi pauahi, aohe ana e pio, no ka mea, aohe i lawa pono ka wai no ka hana ana i keia mea.

            O ka pono wale no, e noonoo koke mai ka Ahaolelo i mea e hoopau ae ai keia pilikia, no ka mea, aia ke koikoi o keia mea maluna ona a no kona hoohemahema ana ke kumu i ulu mai ai keia kulana kupilikii ma ke kulanakauhale nei.

 

Oihana Kanu Paka.

            Ma ka olelo a Mr. F.E. Conter o ke Keena Mahiai o Amerika Huipuia i holo mai nei e nana i ke kulana o na mea kanu ma keia paeaina, he maikai loa o Hawaii nei no ke kanu ana i ka paka. Ma Waimea ame na apana o Hamakua Hawaii kahi i hoohala ai o Mr. Conter i kekahi manawa, a ma kana nana ana i ka lepo o keia mau wahi, ua loaa iho la iaia ua kupono loa keia wahi no ke kanu ana i ka paka. Ina e holopono ana na hana kanu paka maanei, alaila, e weheia aku ana no kekahi mau eka aina no keia hana. E loaa no he 1,000 a i ole he 1,500 paona paka o ka eka hookahi, a he 10 a i ole he 50 pakeneta o keia he paka no ka papa ekahi e lilo ana no ke kuaiia no $2.50 a $4.00 o ka paona. O ke koena e lilo no ia no ka 15 keneta a hiki i ka $2.00 o ka paona. O na mahina o Ianuari ame Feberuari na manawa maikai e honoia ana e kanu i hookahi eka i keia makahiki.

 

Epikopo hou o ka Misiona Katolika.

            Ma ka hora 9 o ke kakahiaka Poalua Mei 12, ua hiki aku ma ka Misiona Katolika kekahi lono telegarapa e olelo ana, us hookohuia o makua Libert e noho ma kahi o Epikopo Gulekana i make.

            He nuhou hauoli keia, a ua akoakoa koke ae na kahuna e haawi i ko lakou mahalo i ka Epikopo hou. Ua kani ae na bele o ka halepule, a ua laha ae keia nuhou iwaena o na hoahanau Kakolika.

            Ma ka make ana aku nei o Epikopo Gulekana, ua manaoia no o Makua Libert ana kona pani, a ma kona kohoia ana ma keia kulana, ua kulikeia me ka manao o na mea apau o ka hoomana Katolika ma Hawaii nei.

            Ua hanauia o Rev. Makua Libert ma Antwerp, Belegiuma, i ka makahiki 1857, a he mau makua haipule kona o ka hoomana Katolika. I ka piha ana o na makahiki he umi-kumamalua iaia, ua komo oia iloko o ke kula no ke a'oia ana i ka olelo Latina no ka hoomakaukau ana i ka oihana kahunapule. I ka makahiki 1875, ua komo oia iloko o ka ahahui o na Makua o na Puuwai Hemolele ma Louvain e noho poo ia ana ia manawa e kona makuakane hanauna. Elua makahiki mahope mai, poniia oia i Kahuna maoli, a i ka makahiki 1881, ua hoounaia mai oia no Hawaii nei.

            Ma Kauai oia i hoomaka mua ai i kana mau hana ma Hawaii nei a hiki i ka mawahiki 1895, hoi oia no Wailuku ma kahi o Makua Sylvester. I keia Dekemaba iho nei, ua hookohuia aku oia e ka Epikopo Gulekana i hope nona. He Kahuna o Makua Libert i makemake nui ia, aole wale no iwaena o na Katolika, aka, iwaena no o na Hoolepope.

            Aole o ke kahunapule wale no kana oihana i kamaaina, aka, he kamana akamai no oia. Ka halepule Katolika o Kapaa, Kauai, ame kekahi mau hana e pili ana i ka Halema'i ma Wailuku, na mea nana e hoike mai i kona akamai ma ka oihana mekanika.

 

Na Kauka Huki Niho Noeau,

            hana pololei a hiki i keia manawa, a he haahaa ka auhau o ka huki ana. O ko laua no hoi ke keena kauka huki niho nui hookahi iloko o ka Paeaina Hawaii nei, a lawa pono no hoi me na lako oihana o ke ano hou loa a maikai no hoi.

            He hukiia kou niho me ka eha ole a iloko no hoi o ka lawelawe noeau a maiau ana no hoi e hanaia ai, a o ia no hoi ka makou e ake nei. Aohe auhau no ka nana ana. He wahine Hawaii ke kokua iloko o ke keena hana.

            Keena hana ma Arlington Block, Helu 215, Alanui Hotele, ma o aku o Alanui Union.

 

Poho na Kanaka Hana.

Kamailio kekahi o na Alakai Maluna o ia Kumuhana.

Hahai mai i na Mea i Loaa @aia i Kona wa e noho Kanaka Hana ana ma ka Hale Hana Hao.

            O Mr. A.C. Holmes, o Oneonta, N.Y., he kanaka hana o na hale hana kaaahi o ia wahi, a he mea kamaaina hoi iwaena o na ahahui hanalima, a ma kana mea i haha'i mai ai i keia mau la koke iho nei no, e pono ia e noonoo akahele ia e na kanaka hana i haule mau ka wa hana ame ka ukuhana ma o ka loaa mau ana i ka ma'i. Wahi a Mr. Holmes:

            "Elua ae nei makahiki i hala, ua loaa ia wau i ka garipa, a ua kukonukonu ko'u loaa ana. Nui ko'u nawaliwali, a no eha a elima mahina paha ko'u loaa ana i ka ma'i, kekahi manawa moe wau no elua a ekolu paha ia mai ka hana mai. Aohe hiki ia'u ke hana mau e like me keia, eia nae, aohe he hiki ia'u ke pale ae, ua hiki ole ia'u ke hoomanawanui i ka hele ana i ka hana. Emi mai ko'u kino, haalulu mai eha ke poo a maluhiluhi ke kino i na manawa apau.

            "I kekahi manawa mahope mai, ua heluhelu wau i kekahi mau hoolaha e pili ana i ka hoolaia o kekahi mau ma'i e like me ko'u e ka Huaale Akala a Kauka Williams no ka Poe Haikea, a ua hooholo iho la ko'u manao e hoao i ka lawe ana. I ka pau ana o kekahi mau poho kakaikahi, ua pii hou mai ko'u maikai, a ke manao nei wau he umi paha poho i pau ia'u mamua o ko'u oluolu loa ana. Ua kipaku loa ia aku na ano mea apau e pili ana i ka ma'i mai ko'u kino aku, a ua like wau me kekahi kanaka i hanau hou ia. Ua kamailio aku wau i ko'u mau hoaloha i ka maikai o ka Huaale Akala a Kauka Williams ame ka lakou hana no'u."

            Mahope o ka pau ana ae o ke garipa, e koe mai ana no kekahi mau mea ano e a hoopilikia. I kekahi wa, he oi aku ke ino o keia mau mea mamua o ka ma'i garipa maoli, a he nui ka hoopuhiliia o na kauka. Wawahiia ke kulana ola maikai-lahilahi mai ke koko, wiwi mai ke kino, pii mai e pihoihoi ame ka haalulu, a ina e hoao ae e hana, pii mai ka naenae. He mau hoailona ino keia, a he mau kumu keia e hoike mai ana aia ke kino iloko o ke kulana e loaa ai i ka numonia, ma'i o loko o ka puu, a i ole, o ka hokii. Na ka Huaale Akala a Kauka Williams no ka Poe Haikea e hoihoi mai ke ola kino mahope o ka loaa ana i ke garipa a e kipaku aku no hoi i na anoano ma'i ma o ka hoomaemae ana i ke koko, na keia mea e kau pale aku i ka ma'i. Mai loko ae o na ma'i he haneri i like me ko Mr. Holmes, ua hoikeia mai ua hiki i ka Huaale Akala a Kauka Williams ke hana i ka apana i oleloia ua hiki ke hanaia.

            Ke kuai hoolilo ia nei ka Huaale Akala a Kauka Williams no ka Poe Haikea ma na halekuai laau apau, a i na aole loaa, hoouna mai i kanalima keneta, a e hoounaia aku no i hookahi poho; eono poho no $2.50 ma ke kakau ana ia Dr. Williams Medicine Company, Schenectady, N.Y.

 

Aole Hale Inu Bia ma na Uwapo.

KAUPALENA O KEPOIKAI I KA HAAWI ANA I NA LAIKINI.

IWAKALUA-KUMAMAKAHI LAIKINI I HOOPUKAIA.

            Aohe he makemake o Puuku Kepoikai e kukuluia i mau halekuai bia ma na wahi e kokoke ana i na uwapo kumoku o ke taona nei, a no ia kumu, ina e makewai na sela, e hele loa no lakou a hiki i na huina alanui Paou, Hotele, Moi ame Nuuanu. O Ryan ka mea i noi aku i laikini bia ma kekahi wahi e kokoke ana i ka Home o na Sela, a ua hoole mai o Kepoikai.

            Aia ma kahi o kanalima noi laikini e waiho nei ma ka lima o ka Puuku, a he iwakalua-kumamakahi wale no i hoopukaia. Ua ano kanalua ka Puuku i ka hoopuka ana aku i na laikini i kela ame keia, aia wale no ka loaa a loaa na hooia kupono ua hiki i ka mea noi ke malama i na rula e pili ana i ka oihana kuai waiona, ame kahi e ku ai ka hale. Aohe i aeia na hale bia e kukuluia ma na apana e ku nei na hale noho.

            Eia iho na laikini i hoopukaia mai ka Poalima mai o kela pule iho nei: D.H. Kahaulelio, Alanui Moiwahine, Ionah Kamalae, hope.

            J.A. Aheong, 104, Alanui Beretania.

            Hatutaro Miyamoto, 17 alanui Kukui, Pacific Surety Co., Hope.

            J.Q. Babtista, Alanui Puowaina, ame Luso, S.J. Alencastre, hope.

 

O KA POE HOLO BAIKIKALA, aole he pono no lakou e hele wale me ka lawe pu ole ana i omole Hamo Eha a Chamberlain. He laau hamo maikai keia no na ano eha apau ame ka eha maui. E loaa no ka oluolu ma ka hamo mua ana. E hoao. Benson, Smith & Co., Ltd., na agena nana e kuai nei.

 

MA KE KAUOHA,

 

HOOLAHA AINA AUPUNI.

            Ma ka Poaono, ka la umi-kumamakolu (13) o Iune, 1903, ma ka hora 12 awakea, a ma ke alo iho o ka Hale Hookolokolo e kuai kudala ia aku ai ma ke akea ka hoolimalima o ka aina o Kawailoa-uka, iloko o Kailua, Koolaupoko, Oahu, nona ka iliaina o 525 eka oi aku a emi mai.

            Manawa: 10 makahiki.

            Ukuhoolimalima haahaa: $100.00 no ka makahiki hookahi, uku mua i kela ame keia hapa-makahiki. Eia na kahua o ka hoolimalima malalo iho:

            E hookoe no ke Aupuni i ke kuleana o ka lawe ana i kekahi hapa a mau hapa paha o ka aina i hoikeia ae nei maluna no ke kuai hoolilo ana a no na pono e ae no apau o ka lehulehu.

            E hoike ana ka palapala hoolimalima e malama mau ia ka maemae o ka aina mai na laau lanatana mai iloko o ka manawa apau o ka hoolimalima i oleloia, a e pa ia ua aina la me kekahi palaau maikai a kupono.

            E.S. BOYD.

            Komikina Aina Aupuni.

Keena Aina Aupuni,

Mei 13, 1903.

2963-May 15. 22, 29.

 

JOHN M. KEA.

He Notari no ka Lehulehu; he mea hana i na Palapala Kanawai, a he mea huli i na kuleana aiaa. O na kauoha mai na mokupuni mai e hookoia no me ka pololei.

Keena Hana: Ma ka Loio Kuhina,

            Hale Mana Hooko.

Honolulu, Mei 22, M.H. 1903.

 

HOOLAHA A KA LUNAHOOPONOPONO WAIWAI.

            Oiai ua hookohu pono ia mai ka mea nona ka Inoa malalo iho i Lunahooponopono no ka waiwai o ka mea i make nolaila, ke hoike ia aku nei ka lohe i na mea apau ina he koina ko lakou i ka waiwai o ka mea i make e hoike mai me na hooiaio kupono iloko o na mahina eono i ole ia e hoole loa ia no a o ka poe i aie i ka mea i make e hookaa koke mai.

            J.D. KEAMO,

Lunahooponopono Waiwai o Wm. Keamo i make no Keoneoio Honuaula Maui.

2964-Mei 22, 29.-Iune 5, 13.

 

HOOLAHA HUI I HOOHUIIA.

KWONG SING LOY COMPANY.

            Ma keia ke haawiia aku nei ka hoolaha i ke kukuluia o kekahi Hui (i noho hana mai ka la 19 mai o Aperila, 1903,) e ka poe malalo iho no lakou na inoa ame ko lakou wahi i hoikeia malalo iho nei:

            Ng Chuck, Lam Yee Sing, Ng Ah Chew, Young Yan, Lum Lan Sing, Yong Pak, Wai Tong, ame Ng Chock, no Honolulu lakou apau, Mokupuni o Oahu Teritori o Hawaii. O ka manao nui ame ke ano o ka hana o keia Hui oia no ke kuai ana i na waiwai lole ma ke kuai liilii. O ka inoa o ka hui oia ka "Kwong Sing Loy Company."

            Kukuluia ma Alanui Moi, Helu 20 ame 24, ma Honolulu i olelo mua ia ae nei. Me ka Mahalo.

            NG. CHUCK, LUM YEE SING,

            NG AH CHEW, YOUNG YAN,

            LUM LAN SING, YONG PAK,

            WAI TONG, NG CHOCK.

2964-Mei 22, 29

 

Ka Kakou mea i ike ai

            O ke kenturia i kaa hope aku nei, oia kekahi o na keneturia kupaianaha loa i ikeia mai ka hookumu ana a hiki i keia manawa.

            No ka like aku o keia keneturia me ia, na ke au o ka manawa e hoike mai ia mea. O ka holomua o na hana e pili ana i ka holo ame ke pale ana aku i ka ma'i, oia ka mea i oi ae mamua o na mea apau. I keia wa, aohe laha ae o na ma'i ahulau a puni ke ao holookoa ua maopopo i na kanaka ke ano o ke umi ana i keia mau kupueu ino i ko lakou manawa e hanau ae ai.

            No na mea hoi e pili ana i na ma'i kumau a puni ka honua, na ano ma'i hoi nana e luku nei na kanaka a oi aku mamua o ka luku puka manawa a ke kolera, hepela, a i ole, o ka bubonika paha, ua hiki loa ia kakou ke hoomalu ia lakou, a he iwakalua-kumamalima wale anei no, aohe i moeuhaneia e hiki ana ke hanaia keia mea. Ma keia papainoa, ua komo ka ma'i Scrofuia, Anemia, La Garipa, Ma'i wela ame ke Anu, na Ma'i o ka Puu, Akemama, Opu ame na Naau ame na Ma'i Emi pu o na ano apau. Maluna ae o na ma'i apau e hoopilikia nei i na lahuikanaka, o ka laau lapaau pookela i loaa ma ka imi ana ma na hana a ke akamai e pili ana i na laau lapaau, oia no ka

WAMPOLE'S PREPARATION

            Ua like ma momona o keia laau me ka hone meli, a ua loaa iaia na mea hoonoono ai maikai i loaa i ka aila Cod Maemae, i hanaia e makou mai ke akepaa mai o ka i'a cod hou loa, a i huiia me ke Compouny Syrup of Hypophosphites ame ka Extract of Malt ame Wild Cherry. He kamahao kona mana hooikaika kino i hana mau ka nohona a ka ma'i, aohe mea e like ai. Aohe e pahu'a kana mau hana no ka hookomo hou ana mai i ka oolea iloko o ke kino nawaliwali, a he laau hoi no ka papa ekahi o na laau no na ma'i emi pu mai o ke kino. He puuhonua keia no ka poe i loaa ole ka pono mai ka lawe ana i kekahi mau laau e ae; ua hiki ke koko ke hoomaemaeia, a e kaupale aku hoi i na anoano o ka ma'i mai ke kino aku. Aole e pahu'a na hana. E aoao oia ka mea nana e hoola mai. No ka omole mua e hoola mai. Loaa ka pono i ka lawe mua ana. E kii i ka mea pololei. Ke kuaiia nei e ka poe kuai laau maanei ame na wahi e ae a puni ke ao nei.

 

ME KE KAUOHA

 

HOOLAHA AINA AUPUNI.

            Ma keia ke haawia aku nei ka hoolaha i na lala apau o ka Ahahui Hamo Hookuonoono Samuel Kauhane, e na Palapala Noi no ko lakou mau apana pakahi iho iloko o na aina o Kioiakaa, Puumakaa, Paapohaku, ame Puweo iloko o Kau, Hawaii, ma ke Keena o J. Kaelemakule lakou e hanaia ai he keena iloko o Kailua, Kona Akau, Hawaii, ma a mahope aku o ka hora eiwa (9) i kakahiaka Poaono, la kanakolu (30) o Mei, 1903.

            E.S.BOYD,

            Komikina o na Aina Aupuni,

Keena Aina Aupuni,

            Mei 19, 1903.

2964-Mei 22, 29.-Iune 3.

 

HOOLAHA AINA AUPUNI.

            Ma ka Poaona, la umi-kumamakolu (13) o Iune, 1903, a ma ka hora 11 awakea, ma ke alo iho o ka Hale Hookolokolo, e kuai kudala ia aku ai ma ke akea malalo o na kahua i hoomaopopoia no ka uku ana ame na hana hou, keia apana aina malalo iho e waiho la i Lualualei, Waianae, Oahu.

            Kumuwaiwai

Helu Apana     Iliaiana            haahaa

7                      589 Eka,          $1,178.00

            O ka mea e kuai mai ana i keia apana aina i hoikeia ae la maluna, i mea oia nona na makahiki i kaa aku maluna o umi-kumamawalu (18) makahiki a he kupa hoi no Amerika Huipuia.

            No na palapala aina, na kahua ame na mea apau e pili ana i keia apana, ame na kahua o ke kuai ana na mea no apau e pili ana i kela mea na mea e ike ae i ke Keena Aina Aupuni ma Honolulu.

            E.S. BOYD,

            Komikina Aina Aupuni,

Keena Aina Aupuni,

            Mei 13, 1903.

2963-May 15, 22, 29.

 

HOOLAHA HUI I HOOHUIIA.

TERITORI O HAWAII.

KEENA O KA PUUKU, HONOLULU, OAHU.

MA KA HANA O KA HOOPAU LOA ANA I KA JUDD & COMPANY, LIMITED (KAUPALENAIA.)

            Oiai ka Judd & Company, Limited, he hai i hoohuiia a i ku malalo ame ka malu o na kanawai o ka Teritori o Hawaii, mamuli o ua Kanawai ia, a e like me ia i hoikeia malaila, ua waihoia mai ma keia keena he Palapala noi e hoopauia ua hui ia, me ka Palapala Hoola i hoopili pu ia i kulike ai me ke Kanawai.

            Nolaila, Ma keia ke hoolahaia aku nei i ka mea a i ka poe apau i kuleana a e kuleana nei ma na ano apau iloko o ua hui la i oleloia e waiho mai i na kumu ku-e i ka aeia o ua noi la i oleloia ma keia keena ma ka ia a mamua ae paha o ka hora 9 a.m. o ka la umikumamalima (15) o Iulai, A.D. 19@, a o kela ame keia mea e makemake ana e loheia ma ia hana e hele kino ae ma ke keena oihana o ka mea nona ka inoa malalo iho ma ka Hale Mana Hooko. Honolulu, ma ka hora 9 a.m. o ka la ia i oleloia e hoike mai no ke aha la e ae ole ia ai ia noi.

            A.N. KEPOIKAI,

            Puuku Teritori o Hawaii,

Honolulu, Mei 6, 1903.

2963-Mei 15, 22, 29,-June 5, 12, 19, 26.-July 3, 10.

 

O Kou mau niho kou mau hoaloha maikai

            O ka hoohemahema ia lakou oia kou ehaeha, e maeele ana iloko o ke kino, ka noonoo ame ke ano e o ka helehelena. Ina he manao kou no ka hana ia aku, e kipa mai i o makou nei no ka kuka pu ana me ka auhau ole. O na hana apau me ka maikai wale no e lawelaweia ai a eha ole no hoi, a nui nohoi ka poe i ike ia makou o ko Honolulu nei ame ko na mokupuni a lawa ko lakou makemake a na lakou e hoike ae makou.

Na auhau no ka Hana ana.

Papa Niho Gula           $@.00

Papa niho pono           $@.00

Hoopiha me ke gula $1.00 a pii aku.

Hoopiha me ke dala 50 keneta.

 

New York Dental Parlors

            Helu 1057, Alanui Papu mawaena o na Alanui Moi ame Hotele.

Ma ko William Pa'i Kii ipuka no e komo ai a loaa ko makou keena.

 

J.R. MILLS

Notari a Luna Hooiaio Palapala Kanawai o na ano apau. He akahele a noeau ka lawelawe hana ana.

Keena Hana ma Pearl City, Manana, Ewa.