Ka Nupepa Kuokoa, Volume XLI, Number 19, 8 May 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

4  NUPEPA KUOKOA, MEI 8, 1903

 

            noho....            6.00     144.00

Umi-kumamalua koki ili....75.00         900.00

Elua koki ili....             125.00             250.00

Umi-kumamalua pakaukau poepoe....40.00    480.00

Hookahi pakaukau aina....300.00

Hookahi pahuumewaiho pa....500.00

Elua pahu waiho buke....125.00          300.00

Umi-kumamalua noho....10.00            120.00

Umi-kumamalua moena velveta....60.00         720.00

Hookahi moena velveta....250.00

Eha pakaukau kakau....100.00            400.00

Ponohale o kela ame keia ano....1,600.00

$6,958.00

            Ua loihi ko Chalmers noonoo ana i keia mea.

            "Ma ka nana iho, me he mea la ua hoala ae o Heseka i kekahi hotele a i ole he hale hoolimalima paha," wahi a Chalmers i noonoo iho ai. He hale hoolimalima paha o umi-kumamalua lumi.  Aole keia o ke ano ponohale ana e hoonani ai i kekahi hale ma Nu Ioka.  He mau lumi kuokoa no kona, a he nui ko'u mau manawa i hele ai malaila, a ua ike no hoi au ua piha kona mau lumi i na ponohale maikai."

            Ua nui kona manawa i heluhelu ai i keia bila, a i ka pau ana, ua hilinai aku la oia ihope a hoomaka iho la e noonoo i kana mau mea i hoomaopopo powehiwehi ai no kekahi mau olelo a Heseka.

            "Ua piha ae nei paha ka makahiki," wahi a Chalmers, me ka noonoo akahele ana, "o ko Heseka kono ana mai ia Bobe Van Horne, Blake ame a'u nei e hele i ka hotele Waladofe, a mahope mai ua hele aku makou no kona mau lumi.  Ua nui kona kamailio ana no kekahi hale ana e kukulu ana.  Ua olelo ae no hoi o Bobe Van Horne no kekahi mea e pili ana i kekahi halehoomaha o ke kau wela ma Mokupni Loihi.  Ua olelo ae o Heseka e kukulu ana oia i hale nona i oi aku ka nani mamua o ko Van Horne, a ina e hookuuia, ua like ko Van Horne hale me kanakolu keneta.  Ua akena mai oia i na mea e pili ana i ka nani o kahi e ku ai kona hale ame kekahi mau mea e ae, a ina aole au i kuhihewa, ua kamailio ae oia i kekahi mea e pili ana i na kumu loulu.  Ua ninau aku o Bobe aia la ihea ia wahi, eia nae ua pani ae oia i kona waha e like me kekahi opihi."

            Noonoo hou iho la o Chalmers.  "Ae, ua olelo ae no ia e pili ana i kekahi mau kumu loulu.  Aole au i kuhihewa.  Ke hoomaopopo nei au ua olelo ae no ia i kekahi mea e pili ana i na moowai.  Ia wa no hoi oia i pani loa ai i kona waha a hoopau loa i kana kamailio ana."

            I ka pau ana o kana nana ana i keia bila, ua nana iho la oia i ke koena o na bila, a malaila oia i ike iho ai ua ohi o Heeka i kekahi mau mea ai, mea ai kini, waiu kini, a pela wale aku, he heluna hoi e lawa ai kekahi mau kanaka no ka hele hoomaona ana.  Ua ohiia kekai mau mea mawaena o ka la 25 ame 29 o Aperila.  I ke ahiahi loa ana, akahi no a pau kana hana.  I ka hora 11 oia po ua loaa mai la iaia kekahi telegarama mai a Benada Simoa mai, a o Kikako kahi i hoounaia mai ai.  O Simoa ke kanaka i hoounaia e Kiwini e huli i na mea e pili ana ia L. Sylvester Vincent ma Kikako.  O ka lono mua loa keia a Simoa i hoouna mai ai e pili ana i kana apana hana i hoounaia ai e hana.  Ua hookomoia keia leka malalo iho i ka hora 8 o ia po.

Kikako, Mei 8.

Ia Wiliama Chalmers, Poo Lunahooponopono o ka Record o Nu Ioka:

            O L. Sylvester Vincent ka mea nana i huna malu.  Ua hoolala oia i keia kumuhana no na mahina ae nei he elua paha.  Ua ikeia oia e hui ana me Iosepa Ritemana ame kekahi poe hoopukapuka kea e ae.  Malia paha ua kokua lakou iaia i ka lawe ana e huna ia Rockwell, Carmody, Kent, Pence, Haven ame Morton.  He kanaka nanaina maikai keia Vincent, eia nae, he hana naaupo ina e huhu.  He moolelo nui ka'u.  Ua hiki ia'u ke hoouna aku i 10,000 huaolelo.  Heaha ka heluna au i makemake ai e hoouna aku au?

BENADA SIMONA,

            I ka ike ana o Chalmers i keia mea, ua kelekalapa koke aku la oia i keia wahi Simona noonoo ole e hoouna mai oia i hoike pokole o kana mau mea i hana ai e pili ana no Vincent, aole hoi o ka hoouna mai i na mea apau i mea e ikeia ai e kela ame keia.  Ua kelegalapa aku no hoi o Chalmers ia Kiwini e hoouna aku i kekahi o kona mau kanaka no Provincetown, a e hoi koke mai oia no Nu Ioka.  Ua kelepona mai no hoi o Miss Carmody e hele aku o Chalmers i kona wahi ina he mea hiki, a iloko wale no o 15 minute ua hiki aku la oia ma ka hale o Carmody.

            I kona hiki ana aku, ua loaa aku iaia malaila o Miss Carmody me Miss Li Roi, Miss De Nuvile ame Mrs. Isabela Waita.  O Mrs. Waita, he makuahine ohana ia no Mis Carmody, a he wahine oluolu hoi.  Ua kamaaina o Chalmers i keia poe apau loa, koe o Mrs. Waita.  Ua ake loa lakou e lohe i ka mea hou.  Ua hai aku la oia i ke kauoha a Van Horne a hoike aku la i ke poo manao ame na mea ana e hoopuka ai ma ka nupepa i kekahi la ae.  Ua hai aku no hoi oia i kana hana i ke kukulu ana i hui makaikiu mai loko mai o ka poe kakau nupepa.

            "Ua loaa ia'u he kanaha kanaka malalo o'u e hana nei i keia wa no ka hana ana i ke kumuhana a kakou e makemake nei e holopono," wahi a Chalmers i olelo aku ai.  "He umi aia me Mr. Kiwini ma Provincetown, a o kekahi poe hoi, aia lakou ma na wahi like ole a Kiwini i hoouna aku ai.  Ke noi aku nei no nae au ia oukou e kala mai ia'u, he makemake ko'u e kamailio me Miss Carmody no kekahi mau minute pokole.  He mea pono no kakou e hooikaika no kona pono, a he kumuhana keia e pili loa ana iaia, a aohe hoi e pono e hoohemahema i kekahi wahi mea."

            "Ua hiki no, ke kala aku nei makou ia oe," i pane mai ai o Mrs. Waita."

            "O, e kalaia no oe," wahi a Miss Li Roi ame Miss De Nuvile, eia nae ua nui loa ka makemake o keia mau lede opio e lohe i na mea hou apau a Chalmers e mekemeke nei e kamailio ia Miss Carmody, a ua kokoke loa laua e hele malu aku e hoolohe malu ina mea a Chalmers ame Miss Carmody e kamailio ana.

            I ko laua hui ana, ua haha'i aku la o Chalmers ia Miss Carmody i na mea apau e pili ana ia L. Sylvester Vincent, a ua olelo pu aku oia i ka loaa ana mai o kekahi telegarama mai a Simoa mi e noho nei ma Kikako.

            "He meheu keia e pono e hookoloia," wahi a Chalmers, "Aole paha oe i lohe i kou makuakane e kamailio iki ana no kekahi kanaka o Vincent ka inoa?:

            Ua hooiaio mai la o Miss Carmody aole oia i lohe i kona makuakane e hoopuka ana i keia inoa, a ina no paha ua hoopuka oia, aole oia i hoomaopopo.

            "Aole anei i hele mai keia kanaka e ike i kou makuakane maanei?  Ina oia i hele mai, malia paha ua hoomaopopo kou kanaka malama puka, "a i ole, o kou kanaka malama hale."

            "Hookana aku la o Miss Carmody i ka bele a ua komo mai la kekahi o na kauwa lawelawe.

            "E olelo aku oe ia Kamika e hele mai, he makemake ko'u e ike iaia," wahi a Miss Carmody.

            "Ke malama nei no oe i na pepainoa o ka poe i hele mai e ike ia Mr. Morton?" wahi a Miss Carmody i ninua aku ai i ke kanaka kiai hale i kona wa i komo mai ai.

            "Ae, e Miss Elena."

            "E lawe mai oe i na pepainoa i loaa ia oe no na pule ekolu a 'eha ae nei i hala."

            Ua kunou mai la ke kanaka lawelawe, nalo aku la no kekahi mau sekona, a huli hoi mai la me na pepainoa nei maluna o ke pakaukau a hoomaka koke iho la laua e huli.

            "He paani pepa ano hou keia," wahi a Chalmers i pane ae ai me ka leha ana aku i kona hou ui nohea.  "O ka mea e loaa mua ana, nana ke kemu.

            "Na'u ke kemu!" wahi a Miss Carmody ia Chalmers he pepaina i pa'iia me ka noeau, a ua heluhelu iho la oia i keia inoa:

(Aole i pau.)

 

NA ALOHA ELUA

i ka

IPO HOOKAHI.

MOKUNA XLIX

KA SIR KILINETONA HAI AKAKA

ANA MAI I KONA HEWA.

MOKUNA L.

NA ALOHA ELUA.

            E na makamaka heluhelu, ua ike like ae la no kakou apau i ka hui pu ana o ua mau aloha la elua he alo no he alo; a oiai laua i haalele iho ai i ka laua ipo ua hele aku la laua mawaena o kekahi lumi nui me ka malie loa; alaila, huli mai la o Lede May a olelo mai la ia Daisy me ka mino aka ana:

            "E hele loa kaua iloko o ka lumi hookipa; owau wale no ko ka hale nei i keia la.  Iloko o laila kaua e kamailio ai me ka loaa ole o na keakea."

            Alaila ike iho la o Daisy ua kaumaha maoli ka noonoo o kona hoa paio no ka mea ua hele mai la kona helehelena a haikea a nalohia aku la no hoi ka nanaina wahine ui mai iaia aku, a me he mea la ua like kona hiohiona me ko ka poe make.  Ua komo like aku la no laua iloko o ka lumi-hookipa nani, ka lumi hoi ana e luana mau ai me ke kanaka ana i manaoio mau ai o kana ipo ia, a ua lilo no hoi ia he punana na ke aloha e hoopunana mau ai no na hora he lehulehu; he hookahi minute o ko Lede May manao ana e haawi i kona manaolana; aka, ua paio ikaika aku la no oia me ka manao nawaliwali e hookaumaha mai ana iaia.  He nui loa no hoi ka manawa i koe, ana i manao iho ai iloko ona, no ka hoomanawanui ana e auamo i na ehaeha apau i loaa iaia mahope iho o ka pau ana o kana kokua ana i kana mea i aloha ai.

            E kali ana oia a hiki ia wa.  Ua hookaawale aku oia mai iaia aku ia mau manao kaumaha ona apau; aole ia e lawe hou mai ana ia mea a mamua o kona alo.  He nui loa ka manawa i koe oiai na makahiki loihi e kikoo aku nei imua me ka lana ole o ka manao.  Ua pani malie mai la oia i ka ipuka alaila, huli mai la oia me ka mino aka maluna o kona helehelena ia Daisy, a olelo mai la oia:

            "Ua aloha like kaua ia Sir Kilinetona; ua aloha kaua iaia a nui loa no ka hana ana aku i kekahi hana e hoehaeha ai i kona manao; ua makemake like kaua i kona pomaikai - aohe mea e ae; nolaila, e Daisy, e lilo ana anei oe ame a'u i mau hoaloha?"

            Ua hele mai la oia a kokoke ia Lede Adea i knoa wa e kamailio ana, me ka mino aka oluolu maluna o kona helehelena; aka, ua kuemi hope aku la o Daisy.

            "He hana paakiki loa ia e hooko kau ai," wahi a Daisy i olelo aku ai me ka hunahuna ole, "o ka hoohoaloha ana aku me ka mea a kau kane i aloha loa ai a oi ae mamua iho ou."

            "E hoolohe mai oe ia'u, e Daisy," wahi a Lede may i noi ikaika mai ai me ka haahaa.  E u ku like ana laua ia wa, o kahi ma ka aoao o kekahi, o keia mau wahine elua i aloha i ke kane hookahi - o Lede May hoi me kona ano haahaa ame ke kulana hiehie; a o Lede Adea no hoi me kona wahine ui i piha i na manao uluku ame ka puiwa.  "E hoolohe mai hoi oe ia'u e Daisy; mai noho oe a hana pela - mai hooholo e oe i kou manao a hiki i kou wa e lohe ai i na mea apau."

            Ua nana ae la o Daisy iluna iaia; i ka hoomaopopo aku me he mea la he hana maa mau ia nana o ke kauoha aku i kekahi mea e hana oia pela.  Ame he mea la he manao hoomaikai wale no ko loko o ko ka helehelena akahai a haahaa e hoike mai ana.

            "Aohe no a'u haohao ana," wahi a Daisy i olelo aku ai me ka malie; "ua oi ae no kona aloha ia oe mamua o'u; ua pa tausani ae no kou wahine ui."

            "Aohe o'u manao pela, a aole no o'u manao ua oi ae kona aloha ia'u.  E Daisy, aole anei kaua e lilo ana i mau hoaloha?"

            "Aole loa au i manao e hoolilo mai ia oe i hoaloha no'u," wahi a Daisy i olelo aku ai.  "Pehea la e hiki ai ia'u ke hana ia hana?  Ua kaili aku oe i ka puuwai o kuu kane mai a'u aku, nolaila, aohe a'u mea e ae e noonoo ai, aka, o Lede May hookahi wale no.

            "E oluolu mai hoi oe ia'u e Daisy; e hoomanao oe, aole au i ike o kau kane ia.  Aohe no a'u olelo pale e haawi aku ai no'u iho; aka, e hoomanao hoi oe ua makemake au e hai aku ina mea apau ia oe e pili ana no'u ame ko'u launa ana me ko kane; aka, aole hiki ia'u ke hana ia hana a hiki i kou wa e ae mai ai e lilo kaua i mau hoaloha."

            I ka hoomaopopo aku i ko Daisy ano ua ano kakanalua oia, a hoike mai la ko Lede May helehelena i ke ano kaumaha.

            "Daisy," wahi a Lede May i koikoi ikaika mai ai, "aohe oe e hoole mai ana i ka'u noi - owau o ka mea hoi i ake nui loa e lilo ka pono o ko kane ame kou i mea no'u e pomaikai ai.

            Aka, aole no i paanaau loa na nani o keia noho ana ia Daisy; aole i ala mai iloko ona ka manao mai ia'u e lilo au i hoaloha nou e like me kau e makemake mai nei, e Lede Terevelina.  Mamuli hoi ou i haalele mai ai kuu kane ia'u, no ka mea, e iini mau ana oia e ike i kou helehelena.  Ke hoomanao nei no au i keia poe huaolelo - 'ua uluhua, ua uluhua oia i ke kali ana no May.'  Ua hoomaopopo au ia mau mea apau, mamuli o ka manao ulu wale ae no, e like iho la me ia.  E olioli ana oia ina au e make ana, i lanakila oia mai ka hipuu nana e umii paa nei iaia; a ina he mea hiki ia ia'u ke hana, ua makaukau au no ka haawi ana i kuu ola."

            "A, haalele oe i kau keiki uuku?"

            "Ua mano anei oe," wahi a Daisy i ninau aku ai me ka huhu hikiwawe iloko ona, "ua lilo kuu keiki he kumu no kekahi mea e hoehaeha mai ai ia'u?  O na maka o kona makuakane aia iaia e Lede Terevelina, a oia mau maka i piha loa i ke aloha ia oe, aole loa oia i nana mai ia'u me ko ano aloha, aka, me ke ano hoopalaleha wale no.  O na lehelehe o kona makuakane aia iaia, a aole loa au i hoopa iki ia laua no ka mea ua ike no wau aole loa i honi mai ka'u kane ia'u."

            Ike maopopo iho la no o Lede May ua hewa loa ia hana ana; aka, ua aneane e hiki ole ke hoomanawanui iho i ka hoolohe ana aku i keia mau mea.  A hoomau aku la no o Daisy i ke kamailio ana.

            "Ua aloha au i ka'u keikikane uuku, aka, e lilo mau ana ia i mea na'u e hoomanao mau ai, ua nele ia i ke aloha o kona makuakane.  Auwe, e Lede Terevelina, he mea ehaeha maoli no ke hoomanao ae i keia haawe kaumaha!  Ua manao loa wau e naha ana kuu puuwai i ko'u wa i ike mua loa ai i kuu kane e nana ana i kuu keiki.  Aohe ano aloha iloko ona a kona mau maka e hoike mai ana, aohe no hoi he nanaina hoihoi maluna o kona helehelena."

            "Aloha no ke keiki!" wahi a Lede May i olelo mai ai me ka leo oluolu; "aloha no hoi ka makuahine!  aohe no i nele aku la ia mea he luuluu, a hoomanao mai la au i keia mau wahi lalani mele.

            "Ua eha oe, a ua eha wau, Luuluuu kaua i ke aloha."

            Na kela mau wahi lalani mele a Lede May i waiho aku ai imua o Daisy oia ka mea nana i hookomo iki iho i ke aloha iloko o kona naau, a ua oi ae no hoi ia mamua o na noi haahaa ana ana apau.  Ua haloiloi mai la na waimaka iloko o na maka o Daisy - ka Daisy no hoi ia i manao ai e paa malie no i kona kulana ma ke ano oia ke kuleana o ka waiwai e aumeume ia nei.

            "Ke olelo hou aku nei wau," wahi a Daisy i olelo aku ai, "ina he mea hiki ia, ua hauoli loa au i ka haawi ana aku i kuu ole; o ka'u wale no e minamina nei o ka hiki ole ia'u ke hana pela.  Ina e hiki ana ia'u ke hoi hou i Farani, a hii mai i kuu keiki iluna, a haule iho au ma kona aoao no ka make mau loa!"

            "He opiopio loa oe, e Daisy no ka hoomake ana i kou manaolana," wahi a Lede May i olelo mai ai.

            "Ae, he opiopio io no wau ma na makahiki, aka, o ka wahine a kekahi kane ka mea hoi i haawi aku i kona aloha i kekahi wahine okoa aohe i ana ia kona mau la o ke ola ana ma na makahiki.  I ko'u hoomaopopo iho ia'u me he mea la he kanalima o'u makahiki iloko o ka makahiki hookahi."

            "No ka mea, aohe i loaa ia oe ka noho'na hauoli.  Nolaila, i keia wa e Daisy, e hai mai oe ia'u, e ae ana no anei oe e lilo kaua i mau hoaloha?"

            "Aohe o'u manao pela," oia ka pane oiaio i pane ia aku ai.

            "I kekahi wa i hala ae nei, e Daisy, ua heluhelu au i ka moolelo o kekahi mau wahine elua i aloha i ke kanaka hookahi - he pa-tausani ae kana mau hana ino mamua o Sir Kilinetona.

            Ua aloha no oia i kana wahine, alaila, hoopaapaa iho la oia me ia; mahope mai o ia wa ua hele aku la oia a haalele iho la iaia; mahope mai o kona haalele ana i kana wahine ua mare hou aku la oia me kekahi wahine okoa, a mahope mai no hoi o ia wa, ua halawai pu iho la ua mau wahine la.  O ka wahine elua ka mea i loaa ke keiki.  Ke hoomanao nei no wau i ke kii o ua mau wahine la elua - na mea kino ola hoi i hoopoino ia - eu noho like ana no laua no ko laua aloha i ke keiki.  E Daisy, e Daisy no hoi e -!  e hoomanao i ke aloha ame ke ahonui iloko o kela mau wahine, i ka menemene, ame ka lokomaikai - e hoomanao i kela mau mea!  E hoopaapaa ana anei kaua mamui o ia kumu?"

            Ia wa, ea ae la ko Daisy poo iluna, a nana aku la kona mau maka kaumaha ia Lede May.

            "Ina," wahi a Daisy i olelo aku ai me ka malie -"ina, au e make ana, e Lede Terevelina, e hoowahawaha ana anei oe i kuu keiki?"

            Ua nana pono loa mai la o Lede May i ka wa o Daisy i olelo aku ai i kela mau huaolelo, "Hoowahawaha i kau keiki, e Daisy - ke keikikane uuku a Sir Kilinetona!  Pehea iho la kou manao ana no'u?  Aole loa wau e hana ia hana.  Ina oe e make ana - aka, e haawi ana au i ka'u leo pule i na Lani me ko'u naau apau e hoomau mai no i kou ola ana, e lawe mai ana wau i ko keiki i milimili na'u me he mea la mailoko aku ia o ko'u puhaka ponoi."

            I ko Daisy wa i lohe ai i kela mau huaolelo a kahi no a palupalu mai kona manao.

            "E hana ana anei oe pela?  Alaila, o oe kekahi wahine maikai loa, e Lede Terevelina.

            "Daisy," wahi a Lede May i olelo mai ai, "he noho'na ehaeha, a luuluu maoli no ka i loaa ia oe, he noho'na hoi i hoomanawanui ia na hana lokoino.  E ae mai ia'u e a'o aku ia oe i kekahi mea, e kuu hoa - mai hoohuli aku oe i ko alo i kahi e mai a'u aku - e ae mai ia'u e ao' aku ia oe i ka manaoio ana i ke ano maoli o ko keia noho'na, i ka piha lokomaikai ma ka naau, i ke kupaa ma ka manao ame ka manaoio ana.  E kapa ia mai ana kaua e na poe apau he mau punalua, o ko'u manao wale ae la no ia, oiai ua aloha like kaua i ke kanaka hookahi.  Nolaila, maluna o keia alahaka o ka paio pu ana, ua makaukau au i ka haawi ana aku i kuu lima akau ame kuu aloha hoalauna me kuu aloha apau, ka oiaio ame ka hoopono.  E ae ana anei oe e lawe aku ia mau mea?"

            "Aohe paha ia he hana pono na'u e ae aku ai," wahi a Daisy i olelo aku ai.  "Ina wau e hoopa aku ana i ko lima, ua like o ia me ko'u malama ana i ka'u huaolelo ame ka makemake ana aku ia oe.  Pehea la e hiki ai ia'u ke ae aku i kou makemake, oiai ua oi aku ka makemake o kuu kane ia oe mamua o'u?"

            I ko Lede May wa i lohe ai i kela manao o Daisy, ua hoike mai la kona helehelena i ke kaumaha.

            "Aole no oe e ke kaikamahine maikai!" wahi a Lede May i olelo mai ai me ka leo oluolu; "ua ike no au he hana paakiki ia.  Ua oi aku ko'u aloha ia oe e Daisy no kou paakiki i ka hoole ana, mamua o kou haawi ana mai i kou ae, a malama ole oe i kau huaolelo.  Ina no oe e ae ole ana e lilo i hoaloha no'u, aole no ia he mea no'u e hoahewa aku ai ia oe, aka nae, e hoomau ana no au i ko'u hilinai ana ia oe, e Daisy.  E hai aku ana au i ko'u moolelo a me ka moolelo o ko kane, alaila, e ike ana oe i na kumu pale kupono i oi ae ka mana mamua o na mea hiki ia'u ke haawi aku.  E haawi mai oe i ko lima ia'u e kuu hoa; a paa malie aku no hoi au iloko o ko'u mau lima.  O ka wahine i aloha ia Sir Kilinetona i na makahiki liuliu i hala ae aole oia e poina ana i ka hoomanao ana eia oia ke kamailio nei i ka wahine a Sir Kilinetona.  He mau makahiki loihi i hala ae nei ko'u ike ana i ko kane, i ko'u wa kamalii loa no, he umi-kumamahiku makahiki; he kanaka ui maopopo oia ia wa - auwe, e Daisy, ua ano e maoli kona ano i keia wa, ua ano e maoli no!  -aole au e hoopoina ana ia mau la ona.  Aohe a'u aloha e ae, a, aole loa no hoi au e manao aku ana i aloha hou mawaho ae ona.  Ua paa ke aloha mawaena o maua ia mau la, a ua hoopalau maua no ka mare ana mahope mai."

            Ua hai mai o Lede May i na mea apau e pili ana i ko laua hoopaapaa ana ame ko laua kaawale ana;a ole oia i huna iaia iho; ua hai aku oia i ka mea oiaio maole, elike me na mea i hanaia mawaena o laua.

            "Ua hele aku oia i kahi e mai a'u aku," wahi a Lede May i olelo mai ai; "a i ko'u wa i ninau hou aku ai iaia mahope mai i kana wahi i hele ai, ua hai mai oia ia'u, ma ke ano opulepule a oluolu o kona noonoo kona hele ana."

            Ke hoomanao la o Daisy ia mea - i ke kumu o ka ehaeha ame ke kaumaha nana i hoopupule i ko Sir Kilinetona noonoo, ka mea hoi nana i hoauwana iaia iloko o ka nahelehele, a loaa aku ai oia iaia, ua pau ka ike, a ua aneane loa e make.  Aole i pau pono ka Lede May ole ana, a keakea koke mai la oia iaia.

            "Ua ike au," wahi a Daisy i olelo aku ai; "oia ka wa ona i loaa ai ia'u!

            "E oluolu oe e hai mai ia'u i kou moolelo i keia wa," wahi a Lede May i olelo mai ai; a hai aku la o Daisy e like me kana mea i noi mai ai - i ke ano o kona hoomaka ana o aloha iaia, oiai oia e waiho ana iloko o ka ma'i; a i kana hoomaopopo iho iaia ina oia e oluolu ana, a hoi oia i kona wahi ponoi, e make ana oia; a pela no hoi kona piha hauoli ana i kona noi ana mai iaia i wahine; a hai pu aku la oia no ko laua home i na aina e, ame kona hoomaopopo pono ana mahope mai aohe wahi aloha iloko ona no'u."

            "Alaila," wahi a Lede May i olelo mai ai, "no keaha la ka oia i mare ai ia oe?"

            "Oia ka mea pohihihi ia'u," wahi a Daisy i pane aku ai.  No ka mea, he kaikamahine ilihune au, aohe dala, aohe waiwai; he wahine ilihune ko'u makuahine e hooikaika ana i ka hana i mea e ola ai kona noho ana; aohe no hoi au he wahine u e makemake ia mai ai; aole oia i aloha ia'u - heaha no ia hoi kona mea o ka mare ana mai ia'u?"

            "Malia paha he ui no oe, e Daisy ma ke ano he ui i ka wa opiopio loa.  Ua hiki loa ia'u ke ike aku i kou ana iloko o na makahiki elua, a ekolu i hala ae nei.  Nolaila, ua makemake au e hai aku ia oe i kau hana maikai e hana ai i kau kane.  Ua hai mai ne oe ia'u i kona hoomaka ana mai e uluhua i ke ano o ka noho ana o Farani, a hele mai ai oia ia nei?"

            "Ae," wahi a Daisy i olelo aku ai me ka manao kaumaha; "a he piha hauoli mau au a hiki mai ia wa."

            "Owau kai hana hewa," wahi a Lede May i olelo mai ai, "a ua makemake au e hai aku iaia e like me ia.  Aole paha oe e huhu mai ana ia'u no ia mea, e kuu hoa; aka, mahope mai o kona wa i haalele iho ai ia'u, akahi no au a ike mai i ka malohilohi, i ka maeele o ia mea he aloha.  Ua hooikaika au ma na ano apau e ike i kana wahi i hele ai, aka, ua lilo ia lia ana ia upu ana, i mea waiwai ole.  Ua hooholo iho la au i ko'u manao e kali malie no au a hiki i kona wa e huli hoi mai ai, aohe o'u nana pehea la ka loihi o na makahiki ona e kaawale ai, alaila noi aku wau i kona oluolu e huikala mai i ko'u mau manao uilani a'u i manao ai he pono ia, a hoihoi hou mai ia'u i ka mea i lilo mai a'u aku.  Ke ike mai la no oe, o ko'u manao ia a'u i hooholo ai - aole na Sir Kilinetona.  Ua ike iho la au iloko o na nupepa i kona wa i hoi mai ai, ame kona wahi i noho ai.  Nolaila, ua hele aku la au e imi iaia, a loaa aku no hoi oia ia'u e noho hookahi ana.  Daisy, ua kukuli koke iho la wau malalo aku o kona mau wawawae a aole au i ae iki e haalele iaia a hiki i kona wa e huikala mai ai ia'u.  Nolaila e Daisy mai kau oe i ka ahewa ana maluna ona; e hoomanao oe, no kona aloha ia'u kona mea o ka naauaua ana, a hauoli no hoi au i ko'u ike hou ana iaia; ua nonoi aku au iaia me ka haahaa, koi aku me ka ikaika e like me ka mea hiki ia'u ke hana; aka, i keia wa a no ua komo mai ka noonoo iloko o'u, ua ano e maoli no kona an mai na la mai mamua.  No kela ano e ona, ua komo mai la iloko o'u ka manao ua pau kona aloha ana ia'u' aole ona hoihoi mai, aohe no hoi he hoopukapuka mai no ke aloha, he oli loa no, a i na wa apau e hoolalelale mau ia ae ana ko'u wahi manao e aneane loa ana au e hakaka hou me ia.

            "Aka, aole loa paha i hana hou ia ia hana?" wahi a Daisy i keakea koke aku ai.

            "Aole loa, no ka mea ua hoao au e uumi malie ia manao.  Ua ike au ua hoehaeha loa ia kona noonoo mamuli o ka'u mau hana i hana ai, a na ia ehaeha i hoopupule i kona noonoo.  Nolaila, i ikeia wa, e Daisy, ua ike ae la au i na mea apau - aole hiki iaia ke hoike mau i kona hoihoi ia'u i ko maua wa i halawai pu ai no ka mea aole loa oia i hoopoina i kana wahine."

            "Ua manao anei oe o ka mea oiaio maoli kela?" wahi a Daisy i ninau aku ai me ka iini nui.

            "Ua maopopo loa ia mea ia'u," wahi a Lede May i pane mai ai, "a e hai aku ana au ia oe i ke kumu o ko'u maopopo ana."

MOKUNA LI.

            "E a'o mai hoi ha oe ia'u?"

            "Ae, e hai aku au ia oe i ke kumu," wahi a Lede May i hoopuka hou mai ai i keia mau huaolelo.  "O na hora a pau ame na la apau a maua i hele pu ai, i noho pu ai mai kona la i huli hoi mai ai a hiki i keia la, aole loa oia i hoopuka iki mai ka huaolelo aloha, a i ole ia, i ka huaolelo mare ia'u.  I kela ahiahi a'u i hele aku ai e ike iaia, ua piha loa ia wau i ka pihoihoi ame ka poo i ka hoomaopopo ana aku i keia mau mea a kaua e kamailio nei; ua manao iho la wau, he hana aloha ole loa kela ana e hoike mai ana; aka, ua lilo wale ae la no ia i mea ole ia'u mahope mai.  I kekahi la ae, ua hele mai oia i Kilife Hale nei, a hauoli loa iho la no hoi wau i ko'u ike ana aku iaia; he nui wale ka'u mau mea i kamailio aku ai iaia, a, aohe ona kamailio mai, o ia noho mumule wale mai no.  No'u no ka hewa, oia ka'u e kamailio mau ana iloko o'u - 'na'u no i imi ka hewa: ua hoehaeha aku wau iaia, a ua hiki ole iaia ke hoopoina ia mea.'  Ke hoomanao nei au i ka hoomaopopo aku i kona ano ua uluhua oia i ko makou wa e ninau aku ai iaia no na mea e pili ana i kana wahi i hele ai.  Nolaila, ua manao iho wau, aia paha kona noonoo i kahi e, apau no ko makou ninau hou ana aku.  Oiai ka wa e nee ana imua, he lehulehu wale na manawa ana i hoomahui mai ai he mea kana i makemake ai e kamailio mai ia'u; me ko'u moeuhane mua ole i ke ano o ua mea la, ua hoole aku wau aohe o'u makemake e hoolohe ia mea.  Ua ike no wau aohe keia he kumu pale kupono; a heaha no la hoi kona mea o ka hai mua ole ana mai ia'u i kinohi i kela ahiahi a'u i hele aku ai e ike iaia, ua mare oia i ka wahine.  Ua ike no wau he puupuu ikaika ia e pahu koke mai ai ia wa, aka, me nei he mea hiki no ia ke hoomanawanui ia, a manao wau, aohe i oi ae ke ino o ia mamua o ka hooloihi ana aku i ka ehaeha e nee imua - he ehaeha hoi i hiki ole ke hoopau ia, a, aole, aole loa no ia a e pau ana; no ka mea ua loihi na la i hookuu ia ai me ia, Daisy, owau, o ka mea i piha i ke aloha nona, ua piha wau i ka ehaeha ame ka pahaohao i kona noho mumule mai; he kaumaha kona ano ana e hoike mau mai ai; e komo mau ana ka haohao iloko o'u, no keaha la oia e olelo ole mai nei he aloha oia ia'u - a no keaha la oia e hoopuka ole mai nei i ka huaolelo mare ia'u; aohe leo pane mai iaia mai o ka nanaina kaumaha wale no ka mea ike mau ia ma kona helehelena.  Ua komo iho la ke aloha iloko o'u nona, e Daisy - a ua aloha no hoi oia ia'u; ua ike no oia u aloha wau iaia, a, aole iaia kela manao kioa e hai mai ai ia'u ua mare oia i ka wahine.  Ua nawaliwali ka manaolana iloko on, a he hana hohe wale ia ana i hana ai - aohe kumu pale kupono nona; ina no he mau huaolelo ia e pepehi mai ai iaia a make, ua oi aku no ka maikai o kona hai ana mai ia mea."

(Aole i pau.)

 

IKEIA HE HOKOU LELE MA HILO.

            Ma ka hapalua i hala o ka hora elima o ke kakahiaka Poaha nei, ua hoohikileleia ae ka poe o Hilo mai ko lakou hiamoe ae i ka lohe ana i kekahi pahu e like me ke kuu ana a ka hekili, a i ole, e like me ka olai.  O ka poe i ala mua, ua maopopo ia lakou ke kumu o keia halele.  Ua ike aku keia poe i kekahi hokulele i ka lele ana a kokoke mai i ka honua me kekahi huelo ahi he elima haneri kapuai paha ka loihi.  I kona kokoke ana mai i ka honua nei, ua pahu ae la ua hokulele nei, a ua uhi ia ke kulanakauhale o Hilo no kekahi manawa e ka uwahi.  Aohe i ikeia ka haule ana o kekahi apana o ua hokulele nei i ka honua nei, a i ole, iloko paha o ke kai.  O Mr. Kuhns o Kaumana ka i ike pono loa i keia mea kupaianaha.  Ua olelo ae oia ua ike oia i ka lele ana ae o kekahi mea poepoe he ekolu kapuai paha ke anawaena maluna o ke kulanakauhale o Hilo, a i ke kaa ana iho malalo o na ao ua hoomaka ae la e pahu, me ka punonohu ana ae o ka uwahi no kekahi mau minuke mahope o ka pahu ana, ua lohe aku la oia i ka pahu e like me ke kui ana a ka hekili.

 

ELEU O HILO AKAU.

OHI E NO I NA LUNAAUPUNI KALANA.

            Ma ka pule i hala, ua malamaia ma Laupahoehoe he halawai e na kupa o Hila Akau no ka wae ana i na moho luna aupuni kalana.  O ka poe i hiki ae ma ia halawai, ua hooholo lakou o na Komisina o ke Kala o Hawaii Hikina, i hookahi lala mai Hamakua mai, hookahi o Hilo Akau, elua o Hilo Hema, a i hookahi o Puna.

            Ma ka hoike a ka Nupepa Tribune o Hilo, ua lokahi keia poe o W. G. walker o Ookala Hilo, ka lakou iaia mua no ka Papa Kalana.

           

KE KAUWA MAIKAI.

I O'U MAU HAKU MAKAAINANA O KA APANA VI,

MOKUPUNI O KAUAI, AME NIIHAU.

            Aloha oukou: - Ua koho mai oukou ia'u i wahaolelo no oukou iloko o ka Hale Kau Kanawai o ka Panalaau o Hawii, no ke kukakuka pu ana , i na mea e pono ai oukou, e o'u mau Haku ame ke Aupuni.

            Ua ae aku au ia mau meau apai mai a oukou mai e hana a hooko e like me ko oukou makemake, a ua hanaia ia a hiki i ka pau ana o na la he 60.

            O na mea i hanaia e ka oukou kauwa, e ike aku maka iho ana oukou ia mau pono, a me na mea e pono ai oukou ke hooko aku i ke alanui e hahai mai ai na pomaikai mahope o kakou iloko no o keia au hooholomua o ka aina.

            O na hana laula o ka lehulehu, ame na hana hou o ka aina, ame na hana hoowaiwai o ka aina, ame na hana hoeueu hana, ua hooholoia ia i keia Kau no keia mua aku, a he kau Ahaolelo ano nui keia hookoia e na kauwa a oukou mai Hawaii a Kauai, me ka nana ole i na aoao Kalaiaina o kakou i papahi o kakou e o'u mau Haku o ko Moto a makou i papahi ai iloko o na la he 60 i aui ae la iloko o ko Hale Kaukanawai, oia ka "Lokahi" a ma ia ano i hookoia ai na mea e holo mua ai ka Aina pomaikai ai ka lehulehu.

            E kala mai i ka oukou @ mau hooakaka ina ua keia @ manao, e aho no ia, me ka malu ko kakou Akua mai.

            S. K. KAILI

Honolulu, Aperila 29, 1903.

 

HOOLAHA KUMAU

Ka Hui Banako Hoohu Malama Dala o Hawaii

(KAUPALENAIA.)

Huina i hoahuia....                   $250,000.00

Peresidena....                           Kikila Baraunu

Hope Peresidena....                 W. P. Robikana

Puuku....                                  W. G. Cooper

Keena Hana Nui:

Alanui Papu, kokoke i Alanui Kalepa, Keena Lala ma Hilo, Hawaii.  E lawelawe ana i ka Oihana Banako Hoahu Dala ma Honolulu a me Hilo.

            E laweia mai no na huina hoahu me ka haawiia o na ukupanee no na hoahu makahiki ma ka huina o 4 1/2 pakeneta no ka makahiki.  E loaa no na Rula a me na hooponopono ana ke ninau ae ma ke Keena Hoahu.

2828-lyr.

KAUKA T. MITAMURA

            Alanui Kukui Ololi Helu 68, Honolulu.  Na Hora Hana: Hora 8 a 10 kakahiaka; hora 1 a 3 ame hora 6 a 7:30 p. m. Sabati: Hora 6 a 8 p. m.

Telephone White 152.  P. O. box 842.

 

KAUKA GEO. J. AUOUR

Keena Hana 431 Alanui Beritania.  Telephona Helu 1851.  Hora Hana 10-12 a. m. 3-4 ame 7-8 p. m.  Sabati 3:30 - 10:30 a. m.

 

D. KALAUOKALANI, JR.

Loio ma ke Kanawai.  me T. McCanta Stewart Loea ma ke Kanawai.  Halepohaku o McIntyre, kihi o Alanui Papu ame Moi.  Pahu leta 509 Telepona 181 Honolulu, T. H.

 

LEWERS & COOKE

LUI A ME KUKE, Kaupalenaia

Na Mea Hookomo mai a Kuai aku i na

LAKO HANA HALE

O Kela ame Kena Ano.

Malaila e loaa ai na mea malalo iho:

            NA PAPA N. W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

            NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

            O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.

LEWERS & COOKE

 

Bro. Benjamin's Herbalo

HE MAIKAI NO!

E hoola no ia oe - E hoao.  Ke kuai ia nei e

HOBRON DRUG CO.

Alanui Papu : : : :Honolulu, T. H.

           

            O KA MA'I HI, e pono ia e maka'uia mamua o ka ma'i eha ina ka puu.  He ma'i keia e loaa ana i na makua ame na keiki.  No ka loaa ole o ka laau kupono, ua nui ka poe i make mai keia ano ma'i mai.  O ka Laau Nahu o ka Opu, Kolera, ame Ma'i Hi a Chamberlain, he laau keia i kupono no keia ano ma'i, a ina e haawiia i manawa nona e hoohanaia ai, e ikeia no ka pono.  He laau maikai keia no ka lawe ana.  E pono e hoolawaia na home apau me keia laau.  E kii i omole ma keia la.  E hoolaia no kekahi ola kanaka.  Benson, Smith & Co., na aena nana e kuai nei.